السوط الأول اختفت الالوان وتحولت الدنيا الي اسود وابيض مثل افلام اسماعيل ياسين القديمة.يمكن كذلك نفس اصوات الهبل والصراخ. السوط الثاني اختفى الناس وبقي هو وحده بسمع في الصراخ والزغاريد ولكنه لا يرى أصحابها . لا يرى سوى المباني والصيوان ولمبات الزينة التي تحول لونها الي ابيض جاهر .كأنها لمبات الرتينة الغازية تسبح في الفضاء .... بعد السوط الثالث فقد الاحساس تماما وتحول الي رجل آلي شعر بيدين تحيطان بكتفه وأخرى تربت على ظهره مصحوبة بعبارة ابشر يا زول. تم اجلاسه علي كرسي وسمع أحدهم يخاطبه . والله ركزت يا عادل لكن ما قايلك تركز . مين عادل دا .؟؟؟؟ انت..... انت عادل . انا عادل؟؟ وانت مين؟؟؟ انا عصام..... يا عادل انت فقدت الذاكرة ولا شنو ؟؟؟ نحن وين ؟؟؟ نحن وين كيف؟؟ نحن في شندي . نحن منو زاتو ؟؟ يا عادل الظاهر عليك فوت . انا عصام وانت عادل طلاب بكلية الهندسة جامعة الخرطوم وانت جيت معاي شندي تحضر عرس اخوي . اها والحصل شنو . لينا تلاتة ايام في شندي انت عجبتك احسان بنت جيرانا .عاين ليها ياها ديك تعاين لك وتزغرد . ياخي انا ما قادر أجمع عليك الله رتب لي الحكاية من اول انا شاعر ضهري مولع نار والدم سائل . ما فاهم حاجة . المهم نحن كنا قاعدين في الحفلة واهلنا ناس القرى يرقصوا يعرضوا وينجلدو . وانت مركز مع احسان وهي ما شغالة بيك وانت اتغظت قلت معقولة انا طالب الهندسة بجامعة الخرطوم تتجاهلني وتعاين للعرب الهمج ديل .
اها الحاصل شنو بعد داك .؟؟؟ انا قلت لك بالهظار لو عاوز تلفت نظرها الا تنجلد زيهم .اها انت ركبت راسك وقلت الا تنجلد . خلعت قميصك وربطته في وسطك على بنطلون الجينز . اها الحاصل شنو بعد داك . اخذت لك تلاتة سيطان ما شاء الله ركزت لكن... ولا اتهزيت.. الناس كلها بتسال من الولد ابو بنطلون الفحل دا من وين؟؟؟ انا بكل فخر اقول لهم دا صاحبي من الخرطوم . وشوف احسان لهسع فخورة بيك كل ما عينها تقع عليك تزغرد . وانت اتجلدت معاي ؟؟؟؟ ابدا انا ما اتجلدت . امشي يا معفن.... تشوف لي عربية هسه دي ترجعني الخرطوم . ياخي الصباح رباح . لا لا هسه بليلنا دا . واحسان ما عايز تتكلم معاها ؟ بلا احسان بلا بطيخ كنتوا عايزين تجيبوا لي الشلل يا متخلفين ،😂😂😂😂😂😂😂😂
06-09-2018, 09:15 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
أبشر يا زول 2 أصر عادل على العودة ورغم رجاءات عصام لينتظر حتى الصباح.🤗🤗🤗🤗😂 وهم في جدالهم كل مرة يقطع حديثهم مبشر جديد. أبشر يا بطل. ابشر يا زول أبشر يا عريس. بل بعض النساء كبيرات السن أتين نحوهما وهما يجلسان في الركن الخارجي من بيت عصام بعيدا قليلا عن مكان الحفل وبدأن في الزغاريد. ماشاء الله ولدنا الضيف فارس وولد فرسان كمان . عصام: أها شفت جبت لينا الهوا والمطاعانات . عادل: مافي شيء فات هسع أقلع قميصك وامشي انجلد . عشان تآآآمن . عصام : يا زول أنا بالنسبة لي مسألة مبدئية ما تفتكرني خايف . عادل : يعني أنا كان عندي فيها عقيدة؟ ما هي حالة من الغيرة كدا تزرع فيك حماس غريب وشجاعة تلاقي نفسك في النص. وتظهر أم عصام في الصورة تقطع الحوار: يا ولد يا عصام أمشي سوق الولد الضيف دخلوا الصالون نظفوا له ظهره بالديتول والقطن. وكذلك تطلق زغرودة أخرى. مشجعة ومعبرة لعادل عن فخرها به . ويقوم عادل متحاملا على كتف عصام . كذلك تظهر من بعيد شلة من الفتيات تحمل احداهن الطبل ( الدلوكة ) على كتفها وأخرى من خلفها تطرق عليها ويشرعن في أغاني الحماسة . وفي مقدمتهن أحسان زينة الحسان واتضح انه صوتهم كذلك جميل مثلها . ما دايرالك الميته أم رماداً شح دايراك يوم لقى بدميك تتوشّح الميت مسولب والعجاج يكتح أحيّ علي سيفه البسوي التح إن وردن بجيك في أول الواردات مرناً مو نشيط إن قبّلن شاردات أسد بيشه المكرمد قمزاته متطابقات برضع في ضرايع العنّز الفاردات كوفيتك الخوده أم عصا بولاد ودرعك في أم لهيب زي الشمس وقّاد وسيفك من سقايته إستعجب الحدّاد وقارحك غير شكال ما بقربه الشدّاد يا جرعة عقود السم يا مقنع بنات جعل العزاز من جم الخيل عركسن ما قال عدادهن كم فرتاق حافلن ملاي سروجهن دم يفلت عادل من قبضة عصام بعد أن كان متكئا ويقفز مبشرا على الحسان المغنيات . ( أبشرن أبشرن أبشرن ) عصام يقف مندهشا ينظر لصديقه عاري الصدر والدماء تسيل من ظهره يبشر بحماس والزغاريد والغناء تشتعل حتى جذبت باقي الناس من مكان الحفل الرئيسي. وأصبحت هناك حفل صغير جانبي بطله أو عريسه عادل. ولدهشات عصام المستمرة يصر عادل أن ينجلد مرة أخرى . يا زول أنت جنيت هسع مش قلت ماشي اهلك ما عارف أمشي نادي لي طارق العريس خليه يديني سوطين تاني .😂😂😂😂
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالحفيظ ابوسن
فيس بوك
تويتر
انستقرام
يوتيوب
بنتيريست