|
|
|
 Re: ونسة عربات في الطرمبة (Re: درديري كباشي)
|
2
بعد ضجة و ( ورورة ) المحركات والتدافع
- هوي الجوطة شنو صدعتونا . والله الشفع ديل كرهونا البنزين زاتو .
- مالك يا هايص عاملة هيصة.
- أهلا يا كامري كيفك شديدة ؟والله يا كامري بقيت أكره أجي داخلة المدينة عشان الشفع ديل .
- قصدك الركشات ؟
- مالن القشرات ومعاهن المفعوصات الشرفانات ديل .
- الأمجادات أهي هي هي هي صاح ؟ وانتي وين الزمن دا كله لا شفناك في صف ولا في شارع .
- انا اليومين ديل ماسكة خط يا بت أمي. مش قالوا الخلا ولا الرفيق الفسل.
- خط وين يعني كدا ؟
- يا ستي شغالة حسب الطلب مرة شندي ومرة مدني ومرات لغاية كوستي نصلها. خاصة بعد جية المغتربين ديل. والواحد يرفع شفعه بعفشهم تقول له المينا البري؟ يقول لك بري بتاع شنو كوستي طوالي ولا القطينة ولا مدني.
- ويدفعوا كويس ؟
- ما شاء الله ولا يساومك النقولوا له يدفع طوالي . عايزين يتخارجوا من البلد دي بأي تمن يا بت أمي.
- أها الخط كيف الشارع سمح ونضيف.
- والله هي ما نضافة يقولوا عليها كدا لكن أحسن بكتير من خمج الخرطوم دا والحفر الهدت حيلكم دي. والله بس من نمسك الخط السواق يخط لي نمرة خمسة تاني ما يعشق الا اذا يقيف .
- والله بختكم أنا عشاقتي اتملخت من كثرة التعشيق والزحمة والحفر والمطبات لمن جاني غضروف في الجربوكس .
تأتي ركشة (تتمرحك ) تريد أن تدخل في الفراغ بين الكامري والهايص .
- هوي الشافعة دي داخلة وين كمان؟ والله اتحرك عليك اعفصك لمن اطلع دم سيدك بالعادم أمرقي برة يمرق جلدك.
- أعصابك يا هايص طولي بلك شفع الزمن دا ما عندهم أدب بتعريفة.
- تقولي شنو يا كامري هو كله نص جالون جايين يزاحموا الكبار ويقلوا في أدبهم.
- ديل ما ما تربوا زينا يا هايص . نحن زمان لمن نشوف البص ولا الحافلة في الطريق نخلي ليهم الشارع لغاية ما يمروا خليك من نجي نتحشر قدامهم في الصف.
- هي هايص معانا .
- أهلا الأمورة سوناتا زمن. طولنا منكم شديد.
- كيفك انشاء الله شديدة وين الغيبة الطويلة دي .
- اسكتي ساي يا سوناتا هايص قالت ليك ماسكة خط وبقت سفرية كمان ؟
- أصلي ما بصدق صحي يا هايص بقيتي سفرية؟
- - ومال نحن بنلعب؟
- أها كيف ومغطية معاكم ؟
- الحمد لله مستورين ومرتاحين من زحمتكم دي ؟
- والأبيض ضميرك كيف انشاء الله منستر معاكم .
- ما ياهو ايصالهم دا .تاني عندهم معانا شنو ؟ نقطع الايصال دا ونختوا ليهم في الطابلون .
- يعني بقت رسوم ثابتة؟
- زي ما تقولي كدا. وين العسولة أكسنت زمن ما شفتها؟
- ياها ديك قدامنا قربت من المسدس.
- واحلاتي ماشاء الله كبرت.
- والله لا كبرت ولا شي قولي عجزت من الحفر والمطبات ديل.
- لا والله لسع شباب بنورتها .
- نناديها تسلم عليك . أكسنت يا بت يا اكسنت . تعالي سلمي على خالتك هايص .
- خالتي هايص أصلي ما بصدق. كيفك انشاء الله تمام وكيف عمو تاتشر زمن ما شفناه.
- والله عمك تاتشر بس ضارب الخلا من صحراء لصحراء. شعر ناس المدن ديل بقوا ما بيطيقوه عشان كدا بس قال أخير له الخلا دا.
- أها لسع ما بقيتوا تلاتة ؟
- نبقى تلاتة كيف هو نحن قعد نتلاقى وين؟
- أنت يا هايص أخواتك الكبار ديل رافعات القزاز ولا تشوفيهم في صف ولا في أي زحمة تقولي ماشات بلا بنزين .
- قصدك لاندكروزر وبرادو والله أنا زاتي من اتفارقنا في المينا تاني بس اشوفهن جاريات في الشارع سلام ما يسلمن علينا ما تقولي بنات بطن واحدة أبدا.
- يلا يا خالتو مع السلامة أنا دوري جا . يلا جاو .
- يلا باي يا عسل محل ما يسري يمري.
| |
 
|
|
|
|
|
|
|
|
Re: ونسة عربات في الطرمبة (Re: درديري كباشي)
|
ونسة عربات في الصف
3
صف الجاز (الديزل)
- أووووو عمنا بدفورد أبو سفنجة ياخ عاش من شافك. زمن ما جيت داخل البلد.
- أهلااااان ولدنا دفار كيفك أخباركم شنو . يا زول نحن بس واقعين الخلا دا علي باليمين كان كما زنقة الجاز دي أصلا ما بنجي داخلين عندكم.
- وشغالين شنو في خلاكم دا يا عم سفنجة.
- والله تجارة محاصيل بس بين الأبيض القضارف بورتسودان .
- هيييع قلت لي سمسم وعيش .
- وصمغ عربي ما تنسى كمان.
- والقطن كيف؟.
- يا حليل زمن القطن يا ولدنا ويا حليل مشروع الجزيرة على باليمين زمان اشحن قطت (ست) لمن ارتفاع أربعة أمتار ولا تحس بنفسك شاحن كأنه ضهرك دا فاضي أوصله بورتسودان وأجي قالب من هناك.
- يا جماعة ما تتحركوا أنت يا دفار ويا عم سفنجة.
- دا مالو كمان يتنهر الممسح الحنكوش دا
- هاهاهاهاها قصدك البص السياحي هو دا كان ما شقيان مارسيدس جايي من ألمانيا للشقاوة دي؟.
- نحن هينين نحن ذاتنا ما جايين من إنجلترا أنت شايف الغبشة دي قايلنا ما أولاد عز؟
- بس أنت يا عم سفنجة زمان قالوا كان مكتوب عليكم صنع خصيصا للسودان.
- أيوا صاح نحن رجال حارة نحن غبش وأولاد غبش لكن دا ما ينفي انه نحن أولاد عز وصناعة انجليزية متينة نادر تشوف ليك سفنجة راقدة خردة هيكل بس .
- صحيح يا عم سفنجة أنتو أي شيء اشتغلتوه قلبوكم بصات اشتغلتوا نقل تراب اشتغلتوا .
- يا دفار نحن خدمنا البلد دي بضراعاتنا لا كلينا ولا ملينا. خضنا أوحال ورمال. يمين الحنكوش دا كان ما عملوا ليه شارع ظلط ما يقدر يصل الجيلي كمان جايي يتنهر ويفتري علينا .
- يا جماعة ما قلنا ليكم اتحركوا .
- شنو يا أبو الشباب ما متحركين تتنهر ما لك أنت ولد ما عندك أدب ولا شنو ؟
- اتنهر شنو ما اتنهرت ولا حاجة نحن ورانا سفريات .
- ونحن ماشين ننوم؟ ما ورانا شحنات وسفريات برضو .
- يا جماعة هدوا هدوا مافي داعي كلنا في زنقة وعايزين نتخارج .
- ما شايفو يفتري كيف يا فيات ياخ . هم ديل قايلين روحهم أهم مننا هسع عليك الله أهم نقل البضاعة ولا نقل الناس.
- معليش يا عم سفنجة هو ما قاصد حاجة زي دي. طول بالك ياخ .
- أخخخخخ يا عم سفنجة قالوا الجاز قطع الا ننتظر تنكر تاني قالوا يصل الصباح.
- أحسن زاتو فقرها المدلع دا .
- شكلنا حا نبيت في الصف تاني ياعم سفنجة .
- نبيت نبيت يلا خلينا نتونس نحن ورانا شنو .
| |
|
|
|
|
|
|
|
|
|
Re: ونسة عربات في الطرمبة (Re: درديري كباشي)
|
درديري كباشي
سلام ومحبة يمين ماقريت ولا شيء من كلامك الفوق ده
لكني أثق تماماً في كتاباتكـ ورواياتكـ
فا
خليكـ قريب وكتر لينا من الحاجات دي مع رمضان .
التحايا الزاكيات...
| |
|
|
|
|
|
|
|
|
|
Re: ونسة عربات في الطرمبة (Re: تماضر الطاهر)
|
تحياتي
قصصك دي عن تجربة؟
وقفت في الصف بنفسك؟
*******************************
مرحب بيك يا تماضر في المنبر ونورتينا .
لكن سؤالك غريب .كيف أكون وقفت في الصف وسمعت العربات تتونس مع بعض
هذه مجرد فنتازيا خيالية
أكيد العربات ما تتونس مع بعض
| |
|
|
|
|
|
|
|
|
|
Re: ونسة عربات في الطرمبة (Re: تماضر الطاهر)
|
موقف قديم
من عجائب الأرزاق
زمان في حبيبتنا كسلا في طرف السوق كان يوجد موقف بصات كسلا القضارف .
بما أن الحركة السفرية لم تكن بنشاط اليوم وعدد ناس كسلا المرتبطين بالقضارف ليس بالعدد الذي يملأ أكثر من بص في اليوم الواحد. لذلك لم يكن هناك حجز مسبق. فأنت تأتي الموقف ملزم تركب البص الذي هو في المقدمة.
لكن الغريب والطريف دائما تجد البص مليان ركاب وباقي مقعد واحد فقط أو مقعدين وموقعهم استراتيجي عادة خلف السواق مباشرة وكما هو معروف المقعد المفضل للركاب المسافرين. تروح عند (الكموسنجي) لتقطع تذكره تجد عنده دفتر فيه صفحة بها مربعات صغيره مرقمة بعدد مقاعد البص. كلها مؤشر عليها عدا هذين المقعدين المغريين بالسفر. تحجز وأنت مطمئن من باب (جاء يطل وسبق الكل). لكن بمجرد جلوسك تلاحظ واحد من الركاب نزل ممكن يعمل حركات تشير الى انه أجل السفر. وهكذا يركب راكب جديد في مكانه وبالمقابل ينزل آخر ساخط.
والبص الذي كان ينقصه نفرين فقط ليسافر ظل ساعتين لا يتحرك وكذلك يظل هناك مقعد فاضي.
يا عمنا ما تتحرك.
اتحرك كيف تدفع ثمن المقاعد الفاضية دي أنت؟
يتحرك البص الذي ركبت فيه الساعة ثمانية بعد ثلاثة ساعات أو أكثر وتلاحظ تقريبا كل الركاب تغيروا.
لتكتشف أنه هؤلاء لم يكونوا الا ركاب وهميين هذه هي وظيفتهم، مثل أعضاء البرلمان. لا يحلوا ولا يربطوا ولا يسافروا. كل همهم هي عمولتهم التي يتحصلون عليها في نهاية اليوم من أصحاب الباصات. ولكي يحبكوا الدور المنوط بهم لا يتحدثون مع بعض على الاطلاق كأنه لا يوجد حديث مشترك بينهم.
الأطرف أن سائقي التاكسي بعد ما طبق لهم نظام (الطراحة) وهو أن التاكسي يشتغل مثل المواصلات العامة يركب عدة افراد ليس لهم علاقة ببعض. سائقي التاكسي قرروا يطبقوا نظرية موقف القضارف . لكن بما أن ساقي التكسي كلامهم كثير (مع الاحترام) لم يستطيعوا البقاء صامتين كانوا يملوا التاكسي ويتركوا مقعد واحد فارغ . كل ما اتى راكب نزل سائق تاكسي . لكن الونسة فضحتهم فدائما ما تجد شكله سببها (انتو تغشونا)🤗😂😂😂😂😂😂
غايتو كانت أيام ما احلاها
| |
|
|
|
|
|
|
| |
تماضر الطاهر
فيس بوك
تويتر
انستقرام
يوتيوب
بنتيريست