ما أدري من أي وكر استوردنا سكنة الضيق والشقق والزحمة وبيت في ميتين متر ولود بيرنق وما أداراك. بيوت زمان والحيشان الكبيرة من العصر تركب الخرطوش وترش الحوش تسقي الزرع تفرش السراير واطلاق البخور جري الصغار والمساككة قعدة الجبنة وقلية البن وكل مرة يصرخ طفل عضته نملة ام ريش. ادعكوها ليه بملح وليمون. يا بت جيبي حفاظة الموية ختيها برة في التربيزة . يا ولد يا خالد نادي جدك من الشارع قولي ليه تعال للجبنة. الليلة يا حاجة جبنتك مالها خفيفة كدا. ياحاج عملتها خفيفة مخصوص عشانك انت ما قالوا عندك الضغط. نان الضغط بقي على حبيبة البن دي. الشافعي السميني دي هيل منو؟ مالك ومالها أها عايز تسحر بت الناس. دي بنت منال جارتنا الجديدي . يا بت يا تقوى امشي المخزن من شوال البركاوي غسليلي تمرات. يا حاج أنت التمر دا الدكتور ما قالك اخطاه. قلت تمرات ما قلنا ملوة نان جبنتك المرة دي بتتبلع كيفن بلا تمرات. - هسع ما قلت خفيفي . - انتو طارق وعادل وينهم - في تمرين الكورة لسع ما رجعوا بتدوربهم شنو ؟ - عايز ارسلهم لعبد الغفار يجيبوا لي منه ايجار الدكان. - نان الاتنين لشنو واحد ما بكفي ؟. - ما هو أي واحد فيهم يمشي انا قلت هسع يروحوا الاتنين . كبي جبنة كبي غلبتك ما عندها نهاية. - الليلي العشا عايزنه بشنو؟ نرسل طارق يجيب الفول من المطعم ولا اعوسلكم قراصي؟ - والله كان عستيلنا فطير باللبن أخير من الفول دا هرد مصارينا. - ************ وبالليل نتوزع على الحوش في السراير كل واحد يجر بطانيته عليه وتستمر الونسة والضحك من تحت البطاطين . وكل مرة يخرج واحد من الشبكة يبدأ في الشخير. لغاية ما تجد نفسك لوحدك صاحي فرحة اللقاء تصنع لك تخمة أرق تعد في النجوم. وفجأة تلاحظ من خلال السور هناك حرامي يشب محاولا التسلل لداخل الحوش. تحسبها سريعا تقول لو نهرته حا يجري وينتهي الموضوع. لا لن انهره الآن لا زم استفيد من الحادثة مثل ما استفادت إسرائيل من احداث سبتمبر. تتصنع النوم تغمض نصف تغميضة لتراقبه. ينزل (يتلب ) داخل الحوش وكالعادة الحرامي أول خطوة يتفقد النائمين يتأكد انهم نائمين فعلا والا سيجد نفسه وقع في كمين. لو تأكد من نومهم العميق يطمع في الأغراض التي تكون عادة قرب الاسرة من نوع راديو ساعة أو حتى كيس سعوط ولا حقا الموبايلات. ثم إذا لم يجد ما يشبع طمعه يتسلل الى داخل الغرف. تخلي الحرامي يبدأ هذه الخطوة وترفع البطانية بسرعة مع نهرة كبيرة تصحي كل النائمين وأكيد الحرامي حا يجري ناحية عداد الموية الداخل من الخارج يشب ويقفز. ويبدأ الجميع يستيقظوا من نهرتك وتعود الونسة من جديد , وكل واحد يبدأ قصصه مع الحرامية . مرة جانا حرامي ومسكته من رجله ورفسني لمن وقعت . ,,,,,,, وتتذكر الحرامي داك يا عاطف لمن عفصك في بطنك وهو ينط الحيطة لمن خلاك صرخت . وتنطلق الضحكات من جديد .. ووووووووووو الخ يا سلام ياخ . ونسة حتى تشرق الشمس ما عايزين لود بيرنق رجعوا لينا بيوتنا الزمان.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست