بت بشير قالو كانت شابة جميلة جدا لكنها متمردة على كل أشكال التسلط الذكوري عندها سبعة أخوان ذكور كانو بخافوا عليها جدا و تحت مسمى الخوف كان بمنعوها تمشي بيوت اللعب (بيوت العرس زمان كان بسموها بيوت اللعب).. كانت بتسرق جلابية واحد من أخوانا وتلبسا وتتلفح بالشال وتشيل هدوما في كيس وتركب اي حمار في البيت و تجي مارقة قدام ابوها وامها والدنيا ليل كانوا بفتكروها واحد من الولاد بسبب طول قامتا و رشاقة جسمها تمشي بيت اللعب تربط الحمار و تغير هدوما تلبس التوب الابيض و تدخل الدارة كانت بتتبلم عشان اخوانا ما يعرفوها وما بظهر منها الا عيونا .. في يوم مشت حفلة في سمعريت اتبلمت و نزلت الدارة عاد رقصت زييين تمد صدرها قدام و تميل بي جسما متل البانه وهي في توبا الابيض مبلمة فشبهت في رقيصا داك الوزينة الشايلا موج النيل تعلو وتهبط و تتمايل جاي وغادي يكشف التوب عن أسفل ساقها الممتلئ فيتوه خيال العاشقين بين سهام عينيها و أمتلأ ساقيها و جسدها اللادن الميال فيطوف بهم الخيال ليرسموا بقية ملامح الراقصة الغامضة .. كان عمدة تنقاسي حاضرا فاضمر في نفسه ان يكشف هوية الحسناء فيطلبها للزواج و عندما همت بمغادرة الدارة جبد طرف توبا فأنحسر عن جانب وجهها الذي اشرق عن سحنة قمحية و شلوخ عرضية عريضة رسمت باتقان على خدود متوردة وقبل ان يتفوه العمدة رفعت توبا فوق وشيها و جرت و فضلت ملامحا عالقة في ذاكرة العمدة ينوم ويقوم على نظرتا المتفاجئة الوجلة و بقى يسأل عن ألأوصاف الشافا لامن عرف انها من البريقعاب و مشى اتقدم ليها وتم العرس و عاد كان فرحان طاير في السماء يجيب الغنابيين يغنوا في الحوش و بت بشير معاهو بي جوه ترقص متل الوزينة الشايلة موج النيل.. في يوم عرفت انو في عرس في حلتا والعمدة ما بخليها تمشي و كان معاهو ضيوف ومشغول عنها سرقت حمار العمدة وساقت اختو الصغيرة (السارة) و مشت بيت اللعب و لمن الحفلة بدت بت بشير اتلبشت بلمت توبا الابيض عشان ما يعرفوا انها مرت العمدة و رقصت زيييين في شاعر شاف رقيصا و عجبوا قام قطع فوقا اغنية واداها للفنان الغنية بتقول:- زي البانه مياله يا ناس صلو على جماله الرسول يا ناس شوفو حاله ده الساق مليان لي نعاله تتوه في تيها و دلاله قمر دورين اظنو خاله تلت ايدا و مالت شماله وميلت للحفلة بي حاله حاكت الوزة العوم حلا لا الرسول شبال يا غزالة ((هذه الاغنية تغنى بها محمد عثمان وردي لاحقا )) العمدة في صالونو سمع الغناء و عرف انها هي المقصودة بالغنية وانها مشت الحفلة من وراهو قام قفل الابواب كلها و منع الشغاليين يفتحوا الباب لأي زول مهما كان .. ولمن جات راجعة لقت الابواب مقفلة نادت واحدة من السريات بي فوق السور .السرية قالت ليها سيدي العمدة قفل الابواب وقال ما يفتحوها لأي زول . بت بشير نطت بالحيطة فتحت الباب لي السارة اخت العمدة دخلتا و ربطت الحمار و فاتت أهلا.. العمدة أخد كم يوم وبقى يرسل ليها في الأجاويد عشان ترجع و هي رافضة .آخر شئ رسل ليها سارة اختو قامت بت بشير كتبت ليه :- أمشي قوليلو ابيت مااااني راجعي انا تب ابيت كان ضبح تورك و جبتوا جيت وكان مرق مركوبك و حبيت وان مشيت في الخرتوم بنيت وان قلع جدك سمعريت مااااني راجعي انا تب ابيت شن عملتا انا شن سويت؟ لامن القى الشفتو ولقيت؟ من رجوعي تقفل البيت؟ مالي شن اذنبت وجنيت؟ يسلموا السبعه ولاد بشير سوولي حوش كيفن كبير فيهو دستة ألت ضلاليل فيهو حنفيه و فيهو بير وتلاتة خدامات بنات جيل منهن للدلكة وللغسيل وواحدة لي فريش السرير أضاني فيها الدهب الاصيل ايدي فيها اب حرفن كبير ساقي فيها القشلي التقيل والجلاليب من غزل الحرير.. أمشي قوليلو ابيت ماااااني جاي انا تب ابيت ان مشيت في الخرتوم بنيت وان قلع جدك سمعريت.. ورفضت بت بشير ترجع للعمدة و الخطاب كل يوم يدقوا بابا و هي رافضة اي راجل الا بي شروطا .. لحدي ما سمع بيها تاجر من الخرتوم قبل بي شروطا واتزوجتوا وسافرت وانقطعت اخبارا عن العامة . هسع ورونا ذريتها وين فى الخرتوم يبقى عندنا نصيب
03-08-2018, 10:37 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Khalid Elsayed
محمد البشرى الخضر
فيس بوك
تويتر
انستقرام
يوتيوب
بنتيريست