اشهد الله الذي لا اله الا هو هذا ما حدث بكل صدق وأمانه : سلمت جوازي وجوازات بناتي لضابط على يميني. وبعدي ابني عادل سلم جوازه. سألته ضابطه على اليسار هل انت معهم ؟ قال لها نعم معهم. سلمه الضابط الجواز الضابطة : قالت ليه كيف تقول معهم وجوازك في يدك ؟ ابني قال ليها ايوة معهم الضابطة: نظرت له بإحتقار بإزدراء من رأسه الي قدمه انا اوجعتني النظرة !! جناي يحتقر وفي بلده !! انا قلت ليها نظرتك مؤلمة حسيتها جوة قلبي لو طفل عمر سنتين ما مفروض تنظرى ليه كدا انتي في موقع حساس بتمثلي السودان كله الضابطة : هاجت طفل انتي شايفة دا طفل انا قلت ليك لو كان دا طفل. ما من حقك تحتقريه ابني قال ليها يا أستاذة الضابطة : تقول لي أستاذة انا أستاذة شايفنى شايلة طباشيرة. ونعم التربية منتهى قلة الأدب وشالت الجواز. في جيبها وقالت ليه اعرف سافر. ؟ ؟؟؟؟ اتصلت بأخي . يااا احمد انا ماشة على الطيارة وعادل عنده مشكلة مسكو جوازه اخي قال لي امشي الطيارة وانا اسع بكون معاه قفل مني واتصل بابني في شنو؟ ابني قال ليه ما في حاجة بس عندي مشكلة مع واحدة قليلة أدب راجل. ود رجال وعرفت تاخد حقك ولد ابوك واضح وصريح قليلة أدب في وشها وبأعلى صوت عفيت منك مافي راجل يقبل الإساءة على نفسه انا مشيت الطيارة وهي بتقول بأعلى صوت ليها يفصلوني ايوة يفصلوني ما يفصلوني بس مافهمت معنى كلامها ؟ قلبي مكسور اتصلت بعادل كتير مارد منعته الرد رد. انت وين. سرعة انا في قسم امتداد الدرجة التالتة راجل ود رجال والسجن حق الرجال وصلته وكيل النيابة للضابطة قال ليها معقول اخرتيه من أمه وأخواته. انتي جاده ؟ ود بلد يا وكيل النيابة ربنا يجبر خاطرك دنيا وآخره. ليه ما واصلتي يا الضابطة كان تواصلي. ليه تراخيتي. ليه طلعتي كان تفتحي بلاغاتك كان تسجنيه لا اتهز لا خاف لا انهار تربية ابوه ود قندتو مصنع الرجال في ثواني جاك تلفون حسمتي مشكلتك بنفسك حاضر سعادتك جدا سعادتك ما قلتي الا يعتذر يعتذر عن شنو انتي بديتي الإساءة ما قدرت أرد ليك الإساءة لأني تربية أستاذ وطبشيرة. وعندي وليان رافعين رأسي ما بسيئ ليهم لكن ولدي عرف رد ليك لانه تربية طبيب لا يخاف في الحق لومة لائم ولا يخاف الا الله وورث ولده الشخصية القوية وعدم الانكسار
شكرًا لكل ركاب الطائرة. شكرًا للأساتذة المتجهين للمملكة السعودية دعمتوني نفسيا وصوني لا تجزعي ارفعي يديك ونحن معاك
كنت مستاءة منهارة نفسيا دي بلدي ديل ناسي ديل اهلي ديل عزي وعزوتي ديل سندي لا لا الغربة افضل الغربة احترام وتقدير !! متذكر يا عادل يوم طالعين من مطار الشارقة الفجر وانت مرهق وصاري متذكر الضابط قال ليك ليه زعلان نحن ما عندنا حد يطلع مننا زعلان وانا قلت ليه مرهقين بس ومساهرين ربنا يجبر بخاطرك دنيا وآخرة كتفك مليان نجوم تتلألأ وحريص زول يكون زعلان مافي شتان بين نجومك ونجوم بت بلدي ما تفتكري يا بت بلدي ان كل الطيور يؤكل لحمها بسهولة انا وراي رجال وراي قبائل وما تغربت عشان لقمة عيش. عيالي أبوهم خيروا واااافر وربنا يزيدة ويبارك فيه انا اتغربت عشان تصرفات أمثالك في بلدي انا اتغربت عشان أعيش أولادي في ثقافات مختلفة عشان ما يطلعو عندهم قصور في التفكير ( فهمتيني ) وعشان يشوفو الدنيا فيها شنو
لا أطالب بتعويض مادي. أطالب بتعويض عن الحالة النفسية المريت بيها. عن الرعب العاشوه بناتي عن الوجع الشفته في بلدي ورجاء اي زول عنده نفسيات أبعدوه لينا من مطار بلدنا مطارنا واجهتنا امام الأجانب ما تحرجونا أكتر من كدا . دمتم : دكتورة : اشراقة بشير محمد بشير تنقور ( قندتو ) أستاذ مشارك -كلية الاقتصاد -جامعة شندي حاليا أعمل في احدى الدول العربية
كسرة 😎😎 انا ما كنت حابة اعدل في القصة ودايراها تنزل زي ما هي لكن التعليقيات ال٣ اللقيتهم من البنات ال٣ قالو ما فاهمين القصة قلت اعدلها مع انه القصة واضحة لكن احتمال في بنات زيهم كتير
كسرة تانية 🙊🙊 عندنا والله في السودان الضابطات المهذبات المحترمات الراقيات البعرفو اتعاملو مع اي زول بس ما عارفة مطار الخرطوم دا تحديدا مهمل من كل الجوانب كدة ليه 🤔🤔🤔
كسرة ثالثة وجعتني شديييد😔😔😔
الطيارة اتأخرت وما قامت في مواعيدها عشان نزلو شنطة عادل منها 😔😔 تاااااني حسبي الله ونعم الوكيل فيك عملتك دي مافي زول واعي عاقل بعملها الولد اتأخر من السفر حرمتيهو من مساعدة امو واخواتو وكل الركاب الباقين اتأخرو من السفر بسبب عملتك دي 😔😔 Ishraqa Bashir دكتورة اشراقة ام عادل
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة