طبعاً ممكن تتطابق الاسماء لكن قطعاً الارقام لا تتطابق. سوء النية محتمل لكن الترتيب لسوء النيه لا يدعمه منطق . أسواء حاجه يمكن التعايش معها في البورد محدودية المشاركات لذا سنوجز القصه في هذه المشاركة وسأتبعه برأي وتحليل شخصي في المداخلة الأخيره حتي اعود في مدخل عام جديد ... أحله المولي عز وجل علينا وعليكم باليمن والبركات .
هاتفي زي اي هاتف زكي عندي مُـــعّــرِفْ رقم اسمو (Truecaller) وزي ما بتجي اتصالات طاشه جاتني 3 مكالمات بعد صلاة العشاء . الاولي بإسم Jameela ةالثانية باسم سكينة والثالثة بإسم سعادة .. سعادة هكذا كتبتها لكم بنفس الصيغة التي وردت عندي في المعرف . ولان اسماء السودانيين متشابهه حاولت الرجوع للارقام بالرغم من ان اسم جميلا، يتطابق مع اسم بت خالتي التي يندر ان تتواصل معي بالهاتف مهما كان عظم الامر ...
تلفون سعادة وجميلا مغلق ولا يمكن الوصل اليه أنتهي ... فجأة جاءني اتصال من سكينة وبإلحاح فتحت الخط وكنت في ركشه انا اسمعها قالت ما سامعاني قفلت الخط ... نزلت اتصلت عليها حق الله بق الله سلام ومطايبه يا بت الناس انتي منو انا ما عرفتك ؟! قالت هي سكينة ومن الأبيض بدون خوض في تفاصيل قلت ليها لا ..لا أنت غلطانه راجعي الرقم انا ما بعرف زول من الابيض . رغم انو عندي اصدقاء في العمل ولاد بلد اعرف انهم يسكنون عروس الرمال واتمني زيارتها. رجعت بإتصال قالت فعلا هي متأسفة الرقم كان غلط فشكرتها...
نهار أمس وأنا في دلالة الصحافة جاني اتصال من خالد ، ومحاولة اتصال من سعادة تجاهلتها واتصال من عامر واتصال من الرشيد صديق وجميعهم من مدينة الابيض لدرجة احد الجالسين الي جواري نحتسي القهوة لاحظ ذلك ولدرجة عندما اتصل الرشيد صديق بادرته بعد السلام :(انت من الابيض) فـــ واجاب بنعم وسألني لييييه قلت ليييه :(انتو ناس الابيض من امس عندكم مشكلة من امس اي تلفون غلط بجيني من الابيض ) فتبادلنا الضحكات وتعرف عليَا وتطايبنا بكلام الخير والايمان نحو معرفة الرجال كنز وربنا يديم التعارف وكدا ... مساء نفس اليوم اتصل عليَا نبيل كما ظهر عندي ... رجعت ليهو اهلاً نبيل ازيك انت من الابيض برضو ... بادرني أنا ما نبيل طيب انت منو أنا مجتبي ونفسو حااااااار قلت ليهو ما فرقت لو من الابيض برضو ضارب غلط ... _ انا ما ضارب غلط انت منوووو؟؟ قلت ليهو رغم انك انت المتصل !!! انا محمد حمزة من الباوقه المكالمة انقطعت قلتا رصيدو انتهي رجعت ليهو ... _ انا ما ضارب غلط تلفونك دا لقيتو في تلفون مرتي ... ضحكت قلت ليهو دي منو دي جميلا ... _ قال لا سعاد ... قلت ليهو ( سعاد دي اتصلت وانا رجعت ليها وتلفونا مقفول ) _ طيب بي تعرف جميلا من ويين ... قلت ليهو برضو اتصلت ورجعت لقيت تلفونا مقفول وزدتا ليهو كما اتصلت واحد في نفس الزمن اسمها سكينة واعتذرت انو الرقم غلط ) _ طيب بي تعرف نبيل من وييين ... جاوبتو لانو الرقم المتصل منو انتا دا ظهر عندي باسم نبيل ... حقيقه الراجل انا كنت فاضي وطولت روحي معاه وسمعتو للآخر ,ولان الموضوع فيهو نسوان واتصل قلت اتحلي بالصبر صاح انا بعيد لكن ربما المسكينة لو تعاملت باستهتار او مرواغه ممكن البال يمشي بعيد ...بسمع فيهو - قال تتصل علي نسوانا واسي جميلا دي يوم زواجا عايز تخرب بيتا ودي قلة ادب وكلام كندو ما عارف شنو ، انا اسي بكلم نبيل بقول ليهو الزول قال بعرفك وبمشي سوداتل اشوف الكلام فعلا غلط في الشبكة ولا قلة ادب منك ... حقيقة دماغي غلي وكلمة قلة ادب الكررا مرات دي بالحيل فورت دمي ... قاطعتو بالكلام لامن وقف وقلت ليهو شوف يابن الحلال نحنا ناس محترمين وانت ما بتعرفني ولا انا بعرف فما تطول لسانك وتشتم الناس انا برضو عندي لسان يحش الحلفا بشمتك والعن سلفيل ابو اهلك وطز فيك واركب اعلي ما خيلك لكن اسمع كلامي كويس واعقلو ... :- (انا اسمي محمد حمزة الحسين من الباوقه واسكن بين الخرطوم وحلفا الجديده وعندي شغل في الابيض لو جيت هناك بلاقيك وكلام واضح وسِــجْل المكالمات موجود وممكن تجي تشوف البداء بالاتصال منو او حتي ترسل زول من معارفك انا الان في الخرطوم وتبقي مشكلة لو الماكلمات الطاشة من الصباح دي استقصائية عشان رقم ليقتو في تلفون مرتك او خطيبة صاحبك امشي طلقو النسوان ديل لانو انا لو شكيت في مرتي لدرجة زي دي تاني ما بتقعد معاي يوم واحد ) _ الراجل بادرني خلاص كملت كلامك ... نعم كملت كلامي - طيب انا بمشي سوداتل واشوف الكلام دا لو غلط في الاتصال والله قلة ادب منك ... زعلت منو وقلت ليهو انت بتفهم كيف يا زول ياخي ثبت الكلام دا عندك تاني اولا انا ما قلت لك بعرف نبيل نبيل دا ظهر اسم للرقم المتصل منو انت الآن ... انا ما قلت ليك ضربت غلط حريمك هم البادروا بالاتصال غلط وانا رجعت يعني لازم تتأكد الاتصل اول منو ... لازم تكون زول محترم وبعد ما تتأكد من صحة معلوماتي دي لازم تكون شجاع وتتصل تعتذر وترد لي حقي الادبي ... وتاني حريمك انت مخير فيهم _ انا من ناحية بتصل بك بتصل خليني اشوف قلة الادب دي حدها ويين (انتهي) حتي لحظة كتابه هذه السطور لم يتصل ونواصل : : : مع التحيات لله الزاكيات طبعا دا الفرق بيني نحنا الكشا مشا والفنان درديري كان زركشه وطلع منها حكي طاعم إنما إييييه
12-31-2017, 04:28 PM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1469
حقيقة الحادثه دي مرت ومألات الاحداث ووالشمار وياربي الحصل للمسكينات سعادة وجميل الللسع ما جدعو فوقا حبل رغم اني ما تكلمت معاهم مجرد محاولة اتصال منهم ومحاولة رجوع مني باءت بالفشل لان الرقم لا يمكن الوصول اليه حاليا (بالمناسبة دي في ناس بفرزو متين الرقم مغلق ومتين برا زون الشبكة ) انا كولو عندي صابون لستك ما يهم انني لن استطيع مكالمتك الآن بكثرة التفكير ومراجعة الاحتمالات توصلت للاتي :- * كل المتصلين من لدن سكينة وحتي الرشيد صديق ما ضاربين غلط وانما متصلين للتقصي السلس ومعرفة هوية المتصل ودا معناتو ان الشكوك حول السيدتين كانت اقوي من كل احتمال طيب اذا قلنا الكلام دا صاح اجوبتي كانت واحدة ومتانسقه مع كل المتصلين لانني كنت اعتقد فعلا ان هناك مشكلة في الشبكة عند ناس الابيض طيب مكالمة مجتبي من تلفون نبيل معناتا شنووووو * اذا استبعدنا فرضية الشكوك هل هناك حالات مشابهه لتداخل ارقام طاشة . * ما هي الطريقة المثلي للتعامل مع مثل تلك الحالات بافتراض محاولة اتصال وتواصل في تلفون الزوجه او محاولة اتصال مثلاًً missed call أو نحو ذلك # ساعود لتفصيل اكثر عن مثل تلك الحالات ورأي الشخصي في مطلع العام القادم بإذن الله تعالي اهله المولي عز وجل علينا وعليكم باليمن والبركات والبلاد ترفل في عز وسؤدد : : : : مع التحيات لله الزاكيات
12-31-2017, 05:13 PM
Abureesh Abureesh
تاريخ التسجيل: 09-22-2003
مجموع المشاركات: 30182
سلام ناس الباوقا اللذيذ تفاحا فعلاً صدفة غريبة (لو فعلا صدفة) تحليلك أقرب للواقع: الاتصال الأول كان بالخطأ - رقم مجلّي وكدا ما تلاه من اتصالات أتوقع أتوقع كدا لها علاقة بالاتصال الأول المهم متابعين معاك ونشوف الموضوع دا حدو وين
دمت رايق
01-03-2018, 11:43 AM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1469
شكرا جزيلاً للأخوة المتداخلين وبجيكم واحد واحد وعظيم اسفي للتأخير يوم امس الثلاثاء لصعوبة الشبكة البوست حتل وخاصية البحث عصلجت معاي ونواصل :-
حقيقة كنت منتظر تحريات المتصل الاخير مجتبي واما ان يثبت ما ذهبت نواياه له او ان يتشجع ويعتذر وبما ان اليوم كان رأس سنه وإجازة لم أكن في عجلة من أمري ومر اليوم بطيئاً حتي الساعة الثالثه بعد الظهر كنت في سوق مربع 15 ابوسعد وهو عبارة عن نادي مشاهده كبير كل قهوة بها شاشه LCD 32INC لجذب الزبائن وتسويق القهوة والشيشه لذا لم انتبه لجرس التلفون في تلك الضجه ... وجدت 3 مكالمات لم يرد عليها من المتصل الاخير مجتبي ... أووووو مجتبي شخصياً اخذت كرسي بلاستيك صفرة وانتحيت جانباً من الضجه ولم يواتيني الصبر لانتظر إتصاله مرة رابعه فاتصلت عليه ... ألووووووو _ اهلاً بيك وطوالي خش شمال معاي منو نبيل نبيل في عيينك يا زول معاك محمد حمزة الحسين الزول الشتمتني امبارح ... قطعت المكالمة أو قُطعت . رجعت مره تاليه ...يا مجتبي معاك محمد حمزة الحسين ياخي انت عايز شنو بالضبط ونبيل دا منو وعايز تعتذر واللا عايز تشتمني تاني حقيقة اسطوانة نبيل زعلتني شديد - والله ياااااااا ابن العمّ نحن فعلا عندنا مشكلة في تلفون نبيل دا لمن نتصل عليه بحول المكالمات عندك يا راجل خليك واضح وتعال نحكي بي رواقه انا يمكن اكبر منك بسنين والحمدلله اولادي دخلوا الجامعه وللعلم انا موضوعكم دا شغلني طول الليل ونزلتوا في سودانيز والفيس بوك وتويتر فخليك واضح وصريح معاي طبعاً حنك عاضي مني ساااي عايز اكبر كومي اني زول مهم . (فعلاً يا ابو عاقله زي ما اكدت علي تحليلي الاتصالات ليها علاقه ببعضها ذاك اليوم الكنته واضحه بس برضو فيها استعجال وسذاجه) - والله يا خيييي فعلاً نحن في تلفونات بتجي تعاكس زوجتي وما طالبني حليفة انا عاقد ويوم الاحد دا يوم دخلتي وتراها دي حنتي في يدييني ... (قاطعتوا قلتا الطف الجو يفتح قلبوا واسمع باقي الحكي )ربنا يتتم لك علي خير يارب . - آمييين تلفوني وتلفون العروس ختيناهم مع نبيل وزيري ونبيل لمن جاتو تلفونات كتيرا بتعات معاكسه قفل التلفونات والبنات صاحبات زوجتي لمن يضربوا لي نبيل الاتصال بحول عندك عشان كدا ظهروا ليك مكالمات من جميلا وسعاد وسكينه خت نفسك في محلي انت حا تعمل شنوووو يا خوووي هوووي اول حاجه سكينة دي اتصلت وفعلا لقت الرقم خطأ واعتذرت ثانيا جميلا وسعاد دي انا اصلا ما عاكستهم ولا تكلمت معاهم انتو لمن جيتو تتقصوا الحقايق ما لقيتو رقمي دا اتصل كم مره ؟! واتكلم كم دقيقه !!!! - والله ياخيييي فعلا كل التلفونات الإتكلمت مع نبيل كلام فاضي اتقفلت وتلفونك الوحيد لقينا منو محاولة اتصال كان فاتح وبرد (هههههههههههههه) الضحكة دي مني انا . طيب يا خوووي اهااااا اتصالاتك مع سوداني اسفرت عن شنوووو - والله ياخييييي انا بعتذر لك لانك انت راجل واضح وردودك ما تغيرت اقبل اعتذاري تاني وتالت ورابع ومعليش ياخيييييي ... طبعاً أنا محمد حمزة دا من تقول لي معليش التقول بي ترشني بي مويه بارد في الصيف تقتل قلبي طوالي قلت ليهو ولا يهمك وان شاء الله ربنا يهنيك - وبدينا من جديد حق الله بق الله ختمت المكالمه بسؤال استرسالي أهااا ناوي تعمل شنو مع الجماعه ديل ... - خليهم بلم فيهم (حمار ومات) : : : : : مع التحيات لله الزاكيات
01-03-2018, 12:08 PM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1469
Quote: يا محمد حمزة هذا سرد ممتع للغاية. لو واصلت فيها ستكون رواية عظيمة.. شخصيا اعتبرها هدية راس السنة وكثير الشكر لك.
تشكر Abureesh علي المرور والتشجيع بس لسع ينقصنا الكثير لحبك الروايات من مثل هذه المواقف .
Quote: الكلام دة جد؟ و الا مشروع رواية؟ هههههههمبالغة لكنكدي ناس الهندسة و الاتصالات يجو يشرحو الحاصلتحياتي و كل سنة و انت طيب
والله الكلام دا جد يا أيمن الفاضل في معرض تحليلي بعد شتايم مجتبي كنت شبه موقن ان الاتصالات بتاعت الابيض ليها علاقه بي بعض وقد كانت تحري دبلماسي لكن لم تشفي غليل العريس مجتبي يبدو انو حسم الامر وقال لهم ادوني ود اللذينا دا افشش بطني فيه بس سذاجتو خلتني اميل لسماع التوقعات وباقي الحكي اكثر من التشفي ...
Quote: سلام ناس الباوقا اللذيذ تفاحافعلاً صدفة غريبة (لو فعلا صدفة)تحليلك أقرب للواقع:الاتصال الأول كان بالخطأ - رقم مجلّي وكداما تلاه من اتصالات أتوقع أتوقع كدا لها علاقة بالاتصال الأولالمهم متابعين معاك ونشوف الموضوع دا حدو ويندمت رايق
الباوقه اللذيذ تفاحا دي ياعمر عايز ليها رد منفصل براها فعلا صدقت فيما توقعت الاخ عمر أبوعاقلة وبالليل عقلي الباطني حدثني بمثل ذلك ، لكن المسائل الزي دي فيها تريث هذا الشباب متحمس وعديم خبره وصبر>>> وزد علي ذلك انه حمش او متحمش فالخيارات المتاحه امامه هو واصدقائه لضبط مثل تلك السلوك التي صارت سمه غالبه للشباب في استغلال الارقام الطاشه او الارقام المخمنه وحفظها والمدوامه علي معاكستها كالاتي :- إما تمد له في الحبل وتسجل مكالمته وتمشي طوالي للنيابه يجيبو كشف بيانات وحساب يطابق زمن المكالمه مع التسجيل وأظن العقاب الجلد والغرامه ولو فيها سوابق تصل العقوبه للسجن .... او تعمل زي اي سوداني ستور لمن يتصل تشيل التلفون من المدام وترد انت وهنا في احتمالين ، يا طلع لئيم واتلاءمت معاه وهددتو ووصلتو علالتكم السماء بث حا يهزمك لو بقيت زول وديع ما بتعرف تتلادح هههههه او اعتذر بان الرقم خطأ ومرات يلطخ لك اي اسم ويتخارج منك وتاني ما بكررا لانو بخت في بالو البيت محروس ... حقيقه تحضرني قصص كثيره مشابه لمثل تلك المعاكسات بجيكم بكرا الكوته خلصت . : : : : : : مع التحيات لله الزاكيات التعديل لبعض الاضافات واظهار ايقونه خطأ
الاخ محمد حمزه - سلام عليكم الحكايه دى برضو بتحصل معاى عندى رقمين فجاه يومين تلاتهالتلفونات الغلط تكرهك. انا بسال المتصل عن الرقم المتصل عليهو واغلبهم بيكونو متصلين على الرقم بتاعى لكن على اساس انو رقم شخص تانى. مع العلم انو ارقامى الجديد فيها ليهو 9 سنه . طبعا فى ناس بيغيرو ارقامهم زى مابيغيرملابسهم كل كم هر تلقاهو عمل رقم جديد. مره اتصل بى مدير طبى لمستشفى فى فتره عطلات على الرقم بتاع طبيبه عندو. ووضحت ليهو انودا رقمى و لااسمح لاى شخص باستخدامه لاى غرض. وزى دا كتير. فى حاجه مهمه احيانا فى ناس بتبيع موبايلاتها ويكون فى ارقام فى ذاكره الهاتف وبعد كدا ممكن يلقاها زول فاضى ويلعب واحيانا زى حكايه الطبيبه والمدير الطبى ممكن تتخلص من زول برقم تلفون غلط صادفك فى فى ذاكره تلفون مستعمل اشتريتو...الخ. هسع سودانى عملت خدمه زى تروكولر لكن من دون انترنت. عيبها انو المشترك ممكن يغير اسمو ويظهر اسم تانى وبرضو الارقام المسحوبه من الخدمه لعدم تسجيلها واعاده بيعها احيانا بيظهر اسم المستخدم الاول. المهم الزول يكون فى ذهنو حاجات زى دى عشان يقطع الطريق على مضايقات وحاجات زى دى. تحياتى
01-04-2018, 07:39 AM
محمد فضل الله المكى محمد فضل الله المكى
تاريخ التسجيل: 03-29-2008
مجموع المشاركات: 4846
يا محمد فضل الله انا مره مساهر للصباح مع واحد عامل خدمة واتصل بالليل في تلفوني وانا نايم المدام قامت مخلوعه ردت علي التلفون المتأخر وفي زهنها كل مصايب الدنيا وهو ما صدق التلفون طلع حق مرا وقعد يتساخف تقفل التلفون ويضرب تاني مسكتو ليك صباحي اتخيل كان سكران وما فارز راجل واللا مرا عايز يقول كلام فاحش وبس
مشكور عاصم علي علي المشاركة ما قلته صحيح 100% وبجيك بي رواقه هذا ما كنت انوي ان استفيض فيه الدنيا آخر اسبوع وسقط الاحد اخضر ان شاء الله : : : : : مع التحيات لله الزاكيات
01-04-2018, 02:02 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 33372
كل سنة وأنت طيب .. يا أخ قريت الموضوع مع المدام .. ولأول مرة قلت ليها أفتحي تلفونك خلينى نشوف المتصليين عليك مينو؟ ضحكت قالت لي أحسن تفتح تلفون البيت وشوف كمية خلق الله المتصليين بالخطأ .. الكلام دا في أمريكا بحصل وعلي الدوام .. لكن لم يحصل قط مسألة سؤال عن نسوان .. كل الأتصالت الخطأ عن أناس قصروا في سداد فواتير، أو شركة متصلة علي شخص بغرض التسويق وكده .. ويقعوا فينا بالغلط ..
المهم في الموضوع ممكن تحظر الرقم المتصل .. أو لو تكرر تتصل بجهة أسمها Do not call list وتقدم أسم الشركة .. لو أتصل إنسان أخر وقال الجهة تحرشت بهم يتم مساءلتها قانونياً ..
محمد يا اخي هل هناك أي جهة تحمي الناس زيك وقعوا ضحية لشخص مستهبل أخر ..؟ لو لم توجد ممكن تتصل علي سوداتل أو شكرتك وتعرفهم كيف يمكن الحماية ؟ وكيف يمكن ملاحقة الشخص المستهبل؟ هذي جريمة يا محمد في كثير من الدول، هل تعلم ذلك؟
أمر غريب ..
بريمة
01-07-2018, 01:35 PM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1469
Quote: هذي جريمة يا محمد في كثير من الدول، هل تعلم ذلك؟
أمر غريب ..
بريمة
الأخ بريمة حياك الله يا حبيب الأغرب من ذلك يوم يغضب عليك الله وتتقفل عليك السبل وتلجأ للقانون ضياع زمن وشيل الحال ... عشاااان كدا الناس بتلجأ تأخد حقها أُم إيد ... يا بريمة غالبية الشعب السوداني مسكين وغلبان والحقوق البي تتشدقوا بيها هناك في بلاد الفرنجه نحن هنا بنحشش بيها كمكارم اخلاق ... تضرب لي شركة اتصالات في موضوع زي دا البت الراقيه البي تتكلم سريع ديييك شوفتها بعد تسمعك كويس تقول لك امشي افتح بلاغ وهنا قايمتك تربط . : : عوداً علي بدء للأخ عاصم علي والأخ بريمة انت كذلك اسمع القصه دي ... مرة مشيت افتح بلاغ 179 ج شيكات مرتدهـ في نيابة ابوسعد لقيت مرا مقهوره ومرافقين ليها اربعة اشخاص جارهم وزوجها واتنين مستشارين (شمشارين او شمارين كيفما اتفق) الموضوع انو مشت لي بتاع الاتصالات وطلبت منو تحويل رصيد الراجل حول ليها رصيد زياده وفتح الخط بمناسبة التحويل الزايد دا يراود فيها هي اعتبرت دي ثغرة منو وما عايزا ترجع ليهو الرصيد أو كما ادعت ليس لها معرفة بإرجاع الرصيد ... لمن قلت ادبو زادات كلمت بعلها مشي ليهو الراجل نكر وكان مطلبوا ارجاع الرصيد الزائد او دفع ثمنه ... لحدي هنا الموضوع المفروض يكون انتهي. لكن تمادي الرجل وبقي متلح ليك الحرمة معاكسه وقلت ادب شديدهـ الجار قام بتشجيعهم وتنويرهم لحقوقهم التي يمكن ان ينالوها بالقانون وكشف حساب الاتصالات الليليه والنهاريه يثبت ذلك ... المرافقين الاثنان لا أجزم انهم عساكر لكن قطروهم من القسم او ما جاوره مؤازرين متشمشرين ... ودخلوا النيابه يقوموا سوا ويقعدو سوا ... ملاحظتي انو الحرمة وزوجها مخلوعين ما بتكلموا بتكلموا المرافقين ما تعرفهم شمتانين أم زعلانين... أنا بعد سمعت خلاصة الموضوع ذهبت في طريق حالي وكل إشفاق لحال هذه الحرمه وانكشاف حالها اتخيل بث انا بفتح في بلاغ 179ج عرفت كل دا فما بال الأخرين لحدي ما كملوا الاجراء يكون عرفو قصتهم دي كم شخص ، وباروهم عديمي شغله كم نفر وكان الله في عونهم ... ولي عـــــــــــودة : : : : : مع التحيات لله الزاكيات وبقي
01-08-2018, 02:03 PM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1469
السودان بلد العجايب والمحن حقيقة تحضرني كثير من مأسي الاتصالات المترصدهـ والطاشه فيها ما يتم بحسن نيه وفيها ما يتم عن قصد وسوء نيه للتسليه او المقاصد غير المحترمه عندي قصه طويله اتمني اقدر اصيغها وافتح بيها بوست منفصل فهي تراجيكوميديا لكن هنا انا بصدد تصليت الضوء علي بعض تلك التصرفات مما انا طرف فيه او شاهد عليه القصه الاولي انا طرف فيها
اشتريت تلفون معاهـ شريحه برقم مميز للوالدهـ ميزة اخري لهذا الرقم انو بنزل ليك رصيد مجاني شهرياً، ما دامت الشريعه علي نفس الهاتف ، لانو ظهرت موضه انك تاخد الاوبشن تبيع الهاتف وتستمتع بمزايا الشريحه وممكن تتاجر فيها لي ناس الضهاري مثل انا بديك شريحه شهريا بينزل ليك فيها رصيد عشرة جنيه فتكون بعت الشريحه والهاتف والرصيد المجاني ... ما يهمنا في الموضوع التلفون بي شريحتو فُـــقــد آي وقع كان عشمي الزول الذي وجدهـ ينبه عليه لكنه طلع سارق خبيث واحتفظ بيهو حي (life) ... السارق لم يكتفي بالغنيمه بل جات شكاوي من قائمة ارقام الوالدهـ انو ضرب لي واحد من تلفونك واتكلم معاي فارغ وانا مختشيه اكلمك قلتا من اولادك ما عارفا تلفونك سُــرق ... الحاجه كلمتني بالتطور الجديد مشيت حظرت الشريحه وطلعتها مضحي بالهاتف وخيار الرصيد المجاني طلع الراجل انزل واخبث مما اتوقعت أحتفظ بي سجل الهاتف وصار يعاكس كل من تقع عينه عليه باسم حرمة ... ربك رب الخير بواسطة أحد المعارف حددنا الشخص وعنوانه واسمو وكان لسع ظاهرة الشرايحه البي عشرة جنيه ومنشطه جاهزا دي لسع (حقيقة ماف مهزله اكبر من مثل هكذا تعامل مع شرايح الهاتف المعروضه كالطماطم ) ولحسن الحظ طلع الشريحه مسجله باسمه شخصيا وكان عادي يكتشف حنكنا لو بقي مستخرجها ليهو ود الجيوان او صاحبو المهم اتصلنا عليهو وريناهو انت يالاسمك قلان وانا ممكن اجيبك حسي من المكان الفلاني العلاني الراجل قعد في علبو وانقطعت المعاكسات ... : : القصه الثانيه شاهد عيان عليها اتصل عليها في هاتفها الشخصي كيف ما عارف (عادي بحصل لينا بجيب رقمك كيف الله اعلم) فبشرها بانها قد ربحت جائزه وقدرها كذا مبلغ يسيل له اللعاب ولكن عليها ان تقوم بتحويل 1200 جنيه نظير خدمه يقدمها لها حتي يتابع لها استلام الجائزه المليونيه الزوله دي شافت الــ 1200ج ما كتيرا ابدن عليك انت يا وجه الخير طوالي هرعت لمكان الاتصالات وكان ولد طيب يفتح في الشارع امام دكاني الشهير بود الحسين للاسبيرات بمحطة سراج الفتيحاب وقد حفظ وجهها من كثرت تحويلاتها للرصيد ابو جنيهين او خمسه رغم انها لا تملك عشر المبلغ ولكن عشمها في الجائزة الموعوده كان كبير ... حملت الرقم المطلوب التحويل عليه واعطه له لكي يحول عليه مبلغ 1200ج وبعد التحويل وعدته خيرا ولانه يعرف تعاملها معه وافق علي مضض وذهبت وما ان استلم التحويل المحترم حتي اغلق هاتفه وغرقت المسكينه في حيره كيفية سداد المبلغ المنهوب وفضلت ان تختفي عن انظار صاحب الاتصالات ريثما ظهر الملعون او جاءها الفرج من كريم ... صاحبي عمل رايح يوم يومين وفي اليوم الثالث توجه لفتح بلاغ ضد فلانه بالارشاد واحتفظ لنفسه بتوقيت الغاء القبض عليها او عفوها لو تدبرت امرها وجاءته بالمبلغ معتذره ولكن بعد مضي اكثر من شهرين جاءه الخبر اليقين ان زولتك متلبسه في مشوار مع صويحباتها لعزاء واجب فتأبط امر قبض بالارشاد والغي عليهاالقبض بنفسه ومن كثرة الشوشره والشمشارين وعدم معرفة الضحيه بحقوقها ظهر بتاع مباحث فنفذ امر القبض بي حقو وذهبن سيرة حريم للقسم بدل بيت العزاء وانتشر الخبر وظهر اهل الخير والايمان منهم من يريد ان يجمع مبلغ لفك اثر المسكين واخيرا تم جمع المبلغ ساهم فيه صاحب الاتصالات بي 200ج المحيرني حتي اللحظه 48 ساعه بالتمام حتي تم تجميع المبلغ ولم يظهر من اولياء المرأه من يمتشق ابو بقره من جيبه لغقالة عثرت المرأه المُحتال عليها .. والي لقاء في حوادث اخري. : : : : مع التحيات لله الزاكيات
01-10-2018, 03:29 PM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1469
عمتي زينب كرتات لها الرحمه والمغفره جعل قبرها روضة من رياض الجنه آميييين
جاها رصيد في تلفونا الربيكا أذكر كان (100ج) ضربت لصاحب الرقم جاني رصيد منك انت منو ما عرفتك نكر بي الله الواحد ما منو بلا كتير رجع مرة تانيه قال ليها الرصيد الجاك حوليهو ليّا قالت ليهو انا مرا كبيرا خلي البت تجي ترجعوا ليك رصيدك حد الله بيني وبينو ... يبدو انو بت بتها كذلك جات في زمن غير مناسب ... عايزا تحول الرصيد قالت تتأكد من الرقم عشان ما تحول غلط ... عمك تاني نكر بلا كتير تاني رجع ليها قال ليها آي انا بتاع الرصيد حوليهو ليّا ... قالت ليهو حسي ما قلت دا ما إنت قال ليها يا بت انا صاحب الرصيد حوليهو ليّا سريع ... سريع دي مني انا والله أنا جيت داخل لقيت الحجه قايما اخدت التلفون = يا زول مالك الحكاية شنو قال هو حول رصيد خطأ وعايز يرجعوهو ليهو = طيب شنو اللولوهـ مره حولوه ومره دا ما انت ؟ قال (والله هم بضربو في وقت ما مناسب ) كانت المرحومه مصرا يحولو ليه الرصيد وحد الله ما بينا وبينو فتبادلنا الضحكات وحولنا الرصيد ... قال الوقت ما مناسب قال : : : : مع التحيات لله الزاكيات
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد حمزة الحسين
Abureesh
أيمن الفاضل
عمر أبوعاقلة
Asim Ali
محمد فضل الله المكى
Biraima M Adam
فيس بوك
تويتر
انستقرام
يوتيوب
بنتيريست