|
|
|
 Re: طالب في جامعة الخرطوم قال ما بعرف الشاعر � (Re: Osman Musa)
|
سلامات
اولاد الومن دا ناس شربات قشر (الاابرى الابيض)...حالتهم صعبه بعيدين جدا الثقافه داخليا او خارجيا ..مايهمهم اهتمامات زى اهتمامات جريده الدار.
مره فى محاضره مع طلاب السنه النهائيه وفى اجابه لسؤال احد الطلاب قلت ليهو بعد اجابه السؤال ولتطليف جفاف الدرس قلت ليهو يعنى تاثير ماسالت عنو
على محيطو زى مابقول المثل ( القندول الشنقل الريكه)...سرت موجه من الابتسام والاستغراب وقال لى دا شنو ريكه ؟ فى مثل زى دا ؟
.
فى بوست عن مشاكل الشباب فى المنبر قد يكون به تطرق لاسباب هذه الماساه
| |
 
|
|
|
|
|
|
|
 Re: طالب في جامعة الخرطوم قال ما بعرف الشاعر � (Re: Osman Musa)
|
اجد للشباب العذر ، زمان الواحد بتسلي بالقراءة بالكتب والمجلات والجرائد
الان في عالم النت والقنوات الفضائية وعصر السرعة ومواقع التواصل الاجتماعي
لا يجدو مساحة لمعرفة اولا يوجد لديهم معلومة مبذولة لهم للشعراء والعلماء
امثال الشاعر محمد المكي وغيره من الشعراء ، ونسبه لضيق ذات اليد عزف كثير من الادباء والكتاب
والعلماء في تدوين ما حباهم الله من علم .
اشتريت كتابين قبل ثلاثة اشهر ولم استطع قراءتهما حتى الان
اقول ليك حاجة
(أضربني بمسدسك ..... املاني انا رصاص)
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: Asim Ali)
|
يعني الطالب دا ما سمع بثورة إكتوبر؟
* بالعكس النت يسر الإطلاع وسهولة الحصول علي المعلومة يعني بنقرة واحدة يمكن يعرف عن
ود المكي وأكتوبر الأخضر والملحمة وهاشم صديق ! والقرشي !
ويعرف عن جامعته جامعة الخرطوم ودورها الوطني ورموزها - !
* محمد المكي إبراهيم - رمزمعروف ومن يجهله يجهل الثقافة والأدب والفن وأكتوبر وهذا
يحسب علي من يجهل - لا علي الرمز !
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: كمال عباس)
|
بي هدوء كدا"إستلفتها من أبو سن"
يعرف محمد المكي عشان شنو ؟
السودان دا مليان عبدة تاريخ يؤسطرون الشخوص
وسجن الحاضر والمستقبل في تابوت التاريخ
الزمن إتغير , الماضي ما عنده أي قيمة شغالين مناحات علي الفاضي
مافي أي محاكمات حقيقية تمت لأجيال ما بعد خروج المستعمر
ولماذا فشلوا في بناء هذا السودان ..
بالغنا في تمجيد الفنانين وتقديس السياسين , وحولناهم الي أساطير
وضخمنا أحداث الماضي , عشان كدا البلد بقت مربوطة بالماضي
والجميع يبكي "يا حليل زمان" .. الشعوب تتقدم ونحن نتباكي علي الماضي
الشعوب تعمل بجد ونحن نلعن الظروف ونلعن الأجيال الجديدة , وعاوزين
نمارس عليهم وصاية ونسجن وجدانهم في كهوف التاريخ
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: عبدالعظيم عثمان)
|
صاحب البوست وضيوفه - سلامات تانى
ياعبدالعظيم .
الظاهر ليك زمن من السودان ,القصه ماقصه وقوف عند محط التاريخ .
الطالب فى الجامعه فى دراستو عندو مشكله ...طلاب فى كليات قمه مابقدرو يكتبو اسمهم بكل صحيح عربى او انجليزى.
طلاب فى كليه معمار يعجزو عن اجراء عمليات رياضيه درسها قبل الجامعه ...
طالب فى هندسه كهرباء يجهل معلومات اساسيه عن الكهربيه التى درسها فى الثانوى
الطالب الجامعى وصل مرحله استرخاء وخمول يطالب بالملخص كحق ولايجب ن يخرج عنه الامتحان ( بالمعنى الحرفى )
وبيعتمد على النجاح بسبب درجات المساعده (بوش) ودرجات اعمال السنه من البحوث التى هى اجحيانا تنقل من كتاب حرفيا ويدور او يكون
اغلب الدفعه ناقل من فرد واد.
توفر المراجع والماده التعليميه عبر موقع ولايكون عندهم فضول ونهم للمعرفه بالرجوع للمرحع سواء عبر موقع او فى مكتبه .
فى الوقت اللى فيه الطالب يكاد يصبح الهاتف الحديث جزء منو ...... التكنولوجيا لسماع الاغانى وصور السيلفى ولعب الالعاب...
كل شىء الا استخدامه والاستفاده منه للاستزاده المعرفيه.
اها حتى الاستفاده من التكنولوجيا فى المعرفه المعاصره سواء تكنولوجيا او معرفه انسانيه لايسعون للحصول عليها بضربه على الكى بورد
فى مشكله حقيقيه عند الشباب والتعامل السطحى والطفيلى مع مجريات الحياه.
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: Asim Ali)
|
يا عثمان،
الولد دا لو سألتو مثلاً عن دينا خالد، المستنير، بروف أمين نوتة وقال ما بعرفهم، في الحالة دي ممكن نوصفو بعدم الثقافة والجهل بمبدعي عصور،
لكن ما فيها حاجة كونو ما بعرف محمد المكي.
أبداع محمد المكي تسأل منو الناس الغنايم مات ناس الملك وم مدثر، وكنت داير أضيف ليهم قباني، لكن متشكلين، خلينا في الاتنين ديل كمثال.
ود المكي لا ينافس حالياً
السوق ملان
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: أبوبكر عباس)
|
الولد دا لو سألتو مثلاً عن دينا خالد، المستنير، بروف أمين نوتة وقال ما بعرفهم، في الحالة دي ممكن نوصفو بعدم الثقافة والجهل بمبدعي عصور،
إنا لله ياخ
هسع انت فرقك من محمد المكي شنو 
ده شعر عديييل في شكل وردة
-
بتعرف نقد
او كما قال الزول داك لغورباتشوف
| |
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: أبوبكر عباس)
|
في ١٩٨٨ كنا في ضيافة د. الرشيد خليفه بسان فرانسيسكو والتقينا أستاذه جامعيه أمريكيه من أفريقيه
فسألتني في الونسه عن جنسيتي فعرفتها عن بلدي وبالطبع لم تعرف السودان ولا أية دولة تقرب لها الصوره
ولم تعرف من الشرق الأوسط وأفريقيا سوى مصر و (الخميني) .. بالطبع كنت أتوقع أن تكون ملمه بمحطة
أبوحمامه والكلاكلات وبالميت كدا لام اكول أو الجاغريو لأننا في طفولتنا ، ولسذاجتنا ، كنا نعرف كل شيء عن أسلافها
ونوع ما يزرعون من أقطان في ألاباما وما يلزم وما لا يلزم لا يلزم ..
تخيل يا عثمان أدتني من اللاخر كدا وقالت لي أنها لم تزر واشنطن في حياتها وهي ليست في حوجه لذلك..
مسكينه، فاتت عليها روائع إنصاف مفكات وعوضيه جربوكس..
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: محمد المرتضى حامد)
|
استاذ محمد المرتضي سلامات
في أول عودة لي للسودان وانا حايم البلاد للتعازي في اهلنا الراحلين مشيت
افتش عن بيت الراحل أستاذ التجاني الطيب . وأنا قريب جدا للبيت علي حسب الوصف
لقيت تلاتة شباب في ركن بيت مشغولين كل واحد بي تلفونو . سألت القاعد طرف منهم
عن منزل الزعيم أستاذ التجاني الطيب بابكر . قال لي ماعرفتو . بس الحمد لله في اللحظة
ديك كانت في حاجة سمعت الكلام . والله يا محمد أشرت لي علي البيت الكان شبحات مننا
وفي عيون الحاجة دمعة ما عرفتها علي التجاني ولا علي الحالة .
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: كمال عباس)
|
يعني الطالب دا ما سمع بثورة إكتوبر؟ * بالعكس النت يسر الإطلاع وسهولة الحصول علي المعلومة يعني بنقرة واحدة يمكن يعرف عن ود المكي وأكتوبر الأخضر والملحمة وهاشم صديق ! والقرشي ! ويعرف عن جامعته جامعة الخرطوم ودورها الوطني ورموزها - ! * محمد المكي إبراهيم - رمزمعروف ومن يجهله يجهل الثقافة والأدب والفن وأكتوبر وهذا يحسب علي من يجهل - لا علي الرمز !
اها قول سمع باكتوبر
عاوزنهم كمان يعرفوا كل الشعراء الاتغنوا باكتوبر
وكل الفنانين والترابي والشيوعيين والمستنير لمن جرى بالملاية الصفراء
طلاب الجامعات الان هم مواليد من عام 1998 الي 2000م ، وكلك نظر
اما حكاية النت سهلت الحصول على المعلومة فهي صحيح
ولكن المعلومات البفتش انا عنها في النت ما نفس المعلومة البتفتش انت عنها
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: ابراهيم عبد الوهاب)
|
الأخ إبراهيم عبدالوهاب سلامات
اكيد انت من كنت في سنة رابعة أولية سمعت بي وزير خارجية امريكا هنري كسنجر والشاعر السوداني
كجراي و لاعب دفاع الهلال فوزي المرضي . اكيد كنت ملم بي الحاصل داخل وخارج السودان . و بدون
نوكيا و بدون أي فون . ساكت بي البركة . يا حليلو قطار كريمة قبل نزول الجنيه . و يا حليلو طعم
الليمون .
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: Osman Musa)
|
لمن بديت اقرا في ثالث ابتدائي
لقيت في البيت يومي جريدة الايام والصحافة
والاهرام واخبار اليوم والمصور واكتوبر وروز اليوسف
والكواكب ، وكتب (الجيب) البتجي مجان مع جريدة الاهرام كل شهر
ومجلة المجلة والعربي والدستور
والكتب والروايات والالغاز
دا غير مكتبة ضخمة في المدرسة الثانوية
والمناشط
لكن
الساعدنا انو ما كان في قنوات فضائية ولاجولات ولا تلفونات
الناس كانت تقضي اوقاتها في الكورة والندوات الثقافية
والسياسة والقراءة
لكن انظر للجيل الحالي
لازم نعذرهم لانهم محرومين لا في كتب لا في مناشط
لا في تعليم زي الناس
اها يمشوا وين ويقضوا اوقات فراغهم وين
يا تلفونات وجوالات وقنوات
يا حبوب مخدرة وحبوب هلوسة
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: Osman Musa)
|
اجد للشباب العذر ، زمان الواحد بتسلي بالقراءة بالكتب والمجلات والجرائد
الان في عالم النت والقنوات الفضائية وعصر السرعة ومواقع التواصل الاجتماعي
لا يجدو مساحة لمعرفة اولا يوجد لديهم معلومة مبذولة لهم للشعراء والعلماء
امثال الشاعر محمد المكي وغيره من الشعراء ، ونسبه لضيق ذات اليد عزف كثير من الادباء والكتاب
والعلماء في تدوين ما حباهم الله من علم .
اشتريت كتابين قبل ثلاثة اشهر ولم استطع قراءتهما حتى الان
*************************************************************
تحية طيبة لصاحب البوست وضيوفه الكرام
تحية خاصة للأخ إبراهيم عبدالوهاب وأنا أصطحب ماجاء به قلمه
أنا ضد حكاية محاكمة الأجيال وإسقاط مسألة التغييرات الحاصلة
ياجماعة كل زمن وليهو ناسو
وكل زمن وليهو أدواتو البتأثر على سلوكيات الناس وفيهو
وإجتماعياتهم ...وحتى على هواياتهم
ماممكن نحن نقعد نرقص بساق واحدة عمرنا كلو
ويصبح فهمنا نحن بس هو الميزان والمقياس
وزي ماختم كمان أخوي ابراهيم عبدالوهاب
أنا كمان بقول ....
حرامي القلوب تلب
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: ابراهيم عبد الوهاب)
|
الحبيب عثمان موسى وضيوفه الكرام
أذكر في برنامج فرسان في الميدان الذي كان يقدمه حمدي بدرالدين كانت المنافسة بين طلبة الجامعات ، وسأل حمدي احدى الطالبات أن تصف سبل السفر
من الخرطوم إلى بورتسودان : اجابت بالقطار وسكتت ، قال حمدي وبعدين : اجابت الطالبة : بالباخرة .
-
عندما كنت في الهند في مطلع سبعينات القرن الماضي كان يتطلب الأمر أن اقابل وكيل وزارة الأغذية للحصول على تصديق حليب لأطفالي ،
وعندما قابلته سألني سيادته من أي بلد أنت فاجبته من السودان ..سألني السودان في ليبيا اجبته بأن السودان دولة مستقلة تقع في إفريقيا .قاطعني
بقوله ولكن اظنه كان تابعا لليبيا في الماضي
عادي جدا عندما كنت التقي ببعض الهمود يعتقدون أن السودان احد ولايات جنوب الهند وربما كان ذلك للوني القريب من بعض سكان ولايات
جنوب الهند .
الحبيب مولانا محمد المرتضى
لعلك والأسرة الكريمة بألف خير وعافية
اذكر قبل سنوات عندما كانت في امريكا انتخابات لحاكم ولاية كلفورنيا سأل المذيع احد المتنافسين للمنصب :
من هو نائب الرئيس الأمريكي ؟ فاجاب الرجل انه لا يعرفه ولا يدري اسمه وعندما قال المذيع كيف تنافس على منصب
حاكم الولاية وانت لا تعرف نائب الرئيس الأمريكي ؟ اجاب الرجل بكل برود انه منافس لمنصب حاكم ولاية وليس لمنصب
الرئيس الأمريكي
تحياتي ووافر احترامي
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: معتصم سليمان)
|
تعرف يا ابراهيم مرة طلاب الثانوية في بريطانيا ( اوائل التسعينات) جاوبوا على سؤال في الجغرافيا (ايهما اكبر من حيث المساحة روسيا ام المملكة المتحدة؟)
قالوا بريطانيا
الاجابة كانت كالصاقعة على مسؤولي التعليم ... لكن عذروا طلابهم لأنو اجابتهم كانت تنطوي على (غيرة وطنية) وليس جهلا بالمساحة
-
بالمناسبة دي
Russia is about 70 times bigger than United Kingdom.
United Kingdom is approximately 243,610 sq km, while Russia is approximately 17,098,242 sq km
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: حيدر حسن ميرغني)
|
كلامك سليم يا سيد حيدر
لو عاوزين الطلاب يعرفوا معلومات لازم تدرسها لهم في المراحل التعليمية المختلفة
وبمناسبة روسيا اتذكر في المرحلة المتوسطة دروسنا السكك الحديد في روسيا
من موسكو الي فلادفستك قاطع 9000 كيلو مدينة مدينة محطه محطه
لكن هسه ما بدرسوهم زي الناس وكمان يطلبوا منهم ما لا يطاق
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: معتصم سليمان)
|
سلام لصاحب الطرح والمتداخلين٫ن
اسا الفورة والجلبة دي كلها عشان طالب جامعي ما عرف الشاعر محمد المكي ابراهيم ؟
مش زمان ايام عبود يقال انه كان هناك احتفال في القصر الجمهوري ومن المدعوين الاستاذ عبدالله الطيب وجاء داخل القصر ومنع من الدخول لمظهره (قميص ابيض وبنطلون) واراد ان يتشفع للبواب باسمه فقال له
أنا دكتور عبدالله الطيب، وجهله البواب . فتعجب الاستاذ وقال له بلغة دارجة: بتعرف جكسا؟ قاليهو بلحيل، دا ما الغلب المريخ يوم المولد.
من المؤسف لا بواكي لهذا الجيل من الشباب ولا احد يلتفت لقضاياهم ولو قارنتهم بجيل الشاعر محمد المكي لوجدت البون شاسعاً في كل شئ ولدمى قلبك لجيل اليوم الذي اضعناه وضيعناه.
جيل محمد المكي نعرفهم نحن باولاد الحكومة يعني الواحد من الابتدائي حتى الجامعة ترعى الحكومة تعليمه وتزوده بكل ما ينقصه ولا اريد ان اخوض في التفاصيل، بالاضافة للانشطة الموازية للتعليم من أندية ثقافية ورياضية وميادين وجدائق
ثم الوظيفة التي تنتظره عند التخرج. ثم قدرته على الارتباط بمن يحب أو يرتضي.
فهل ربع ما وجده جيل محمد المكي والذي قبله والذي بعده وجده جيل اليوم؟
وانظر لهذا الجيل من الشباب، واكبر قضاياه لا تناقش ابداً سوى في هذا المنبر أو في الاجهزة الاعلامية أو اجهزة الدولة ، وهي البطالة والتي منها تتولد كل الاحباطات كما انه ضيق عليه بمصادرة كل الميادين الرياضية والاندية وصارت قطاعاً خاصا لا تستطيع الدخول إليها إلا بدفع مبلغ من المال
لهذا لم يجد الشباب بد من ملء فراغهم وامسياتهم إلا فيما ليس له مردود بدني أو نفسي أو فكري فلا تندهش ان وجدت بعض الشباب يتسامرون في الشارع على مصطبة منه، كل في يده الهاتف الحديث منشغل به عن اخوته، أو يلعبون الضمنة والورق تحت اضاءة لمبة الشارع. او حفلات الغناء
من اكبر الجرائم هي ان الحكومة غافلة تماماًعن قضايا الشباب اليوم وكما اشرت فأكبر مهدد لهم هي البطالة التي لم تحدد نسبتها واظن انها تصل إلى ٦٠٪ ففي كل عشرة من الشباب أن وجدت اربعة يعملون فذلك فتح من الله .
لهذا يسراً بالشباب وليت من في المنبر يتبنى قضاياهم.
مودتي للجميع
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: Ali Alkanzi)
|
حبيبنا على الكنزي .. مودتي
مداخلتك في الصميم لا توجد أي رعاية للشباب إلا في حالات الخدمة العسكرية
نعم صدقت جيلنا كان متوفر له كل شيء داخليات ووجبات وسرير وفرش وبطانية كراسات حتى ملابس الكورة
الشباب اليوم في قمة المعاناة ..
====
خالص التحية للحبيب عثمان موسى على البوست
لقد فتحت نافذة لموضوع مهم ويستحق النقاش
شكراً كثير عثمان
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: Ali Alkanzi)
|
ذكر الاخ على الكنزى
وهي البطالة والتي منها تتولد كل الاحباطات
****
نعم الشباب لديه قضايا ولكن عميقه ومسئوليه الجميع الاسره والمجتمع والدوله وفى المقام الاول مسئوليه الشباب فرديا وجماعيا.
البطاله تقال لشباب مؤهل ..لكن شباب غير مؤهل ويستسهل الامور سواء ثقافه عامه تضيف الى قيمته كمواطن فاعل او سواء كعلم متخصص
يكسب به عيشه ويسهم به فى تنميه وطنه.
الشباب الان متم بالتفاعات من الامور والهوامش وعقل خامل عن السعى لتغذيته فى عصر المعرفه الموجوده بضربه مفتاح والعالم اصبح اصغر من قريه صعيره .
ودونك الشباب فى الحى او مدارج الدراسه على مختلف المستويات اوو حتى العاملين وحائزبن على شهادات عليا قد تتعجب كيف حصلوا عليها وهم خواء فى مجالهم وتخصصهم
الذى يحملون باسمه هذه الدرجات(الواسطه واللولاء السياسى يصنع مايصنع).
دور الدوله مفروغ منه ويمكن القول بسلبيته ..اذن المه الشباب نفسه عليه ان يستشعر انه فى زمن ليس سهلا وضروره التسلح بالمعرفه والثقاه عامه ومتخصصه.
.
السىء ان ثقافه الفهلوه والتفتيح واجاده التلون اصبحت هى السائده وغالبه على الثقافه التى تقدر الاجتهاد والتحصيل وسعه الافق باتساع الثقافه والمعرفه.
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: Asim Ali)
|
Quote:
طيب بتعرف شنو تاني . وكت ما بتعرف الشاعر الفخيم محمد المكي إبراهيم . مالك يا ولدي داير تشيل الناس هموم الجايات ؟ محمد المكي ده يا ولدي زي الجامعة دي . وزي النيل ده وزي جسر الحديد القدامك دأك
|
يا سلااااام عليك ... عزيزى عثمان موسى .. أحسنت ووفيت وكفيت
خازوق يكون طالب بكلية الآداب وقسم لغة عربية !!!
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: Osman Musa)
|
انتو يا سادة بتكلموا عن طالب بجامعة الخرطوم شاب صغير يمكن همو محصور فى التحصيل فقط وما عندو اهتمام بى شعر او اكتوبر او تاريخ وما سمع وردى ولا الله يا خلاسية عند عركى ،ما تلوموهو نحن زمان لما سمعنا وعرفنا لعبت بيوتنا وحيشانا وأهلنا الكبار اثر فى اننا نقرا ونستمع ونعرف الأدباء والشعراء والفنانين ونمشى السينما هسه مافى زول فاضى لى كل ده كفاية الأهل يوفروا درجة معقولة من العيش الكريم . بعدين محمد المكى ابراهيم السامعة بيهو ما النوع ألبفرض نفسو فى الأجهزة يخيل كان هسه ما بعرفو ، وتستغربوا ليه الحلنقى فى اذاعة امدرمان وهو مديرها ويتحدث كل يوم فى برنامج مع مذيع اشتر الصوت فى برنامج اسمو عشه صغيرة فى البعرفوا وألما بعرفوا بى جرأة وعين وقوة عين ويفتى ، وآخر شى قال انو أغنية دمعة الشوق يا كلمات المساح يا ود البنا ،زى ده يقولوا عليهو شنو ،الداير اقولو انو فى ناس بتعرف تسوق روحا وفى ناس عظام يظلوا فى الظل بتذكر زمان ايام كان الناس يتحدثوا عن دور الراحل احمد الطيب فى الأدب والمسرح وكثير من الفنون ويتساءلو لماذا لم تهتم به جامعة الخرطوم ولم يعرفه الناس فأجاب احد الحضور احمد الطيب وين يلقى صيت مع ناس دجاج يلقط الحب إشارة الى المشاركين فى برنامج فرسان فى الميدان وفى كثير من البرامج الاخرى
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: Amira Hussien)
|
سلام صاحب البوست والمتداخلين
اعتقد ان السبب هو تغير التركيبة الدمغرافية لشعب السودان الفضل
وعلى اذكر ان فى اخر تعداد من هم اقل من عمر 15 يشكلون اكثر من 50 %
ونسبه النساء 52% .
يعنى ان هناك ( جيلين ضاعوا ) لا تحصلوا على التاريخ ولا يعرفوا طريق
المستقبل . وهذة الأزمة التى تواجه السودان
| |
|
|
|
|
|
|
|
|
|
Re: طالب في جامعة الخرطوم قال ما بعرف الشاعر � (Re: Hani Arabi Mohamed)
|
عارف يا أخ Hani Arabi Mohamed
لغتك دي الما دايرنها الناس في السودان لانو لا يحبون ان يواجهوا بنواقصهم وأخطائهم
جيل محمد المكي إبراهيم هم الذين اضاعوا السودان وضيعوه فأخذوا ولم يعطوا الوطن ولو قليلاً
فعندي هم الجيل العاق
ما قلت إلا الحق وانظر وانت تقول:
Quote: وهل الطلاب يعلمون الغيب ؟
من أين يجدون الثقافة ؟
لماذا تتنصل الأجيال السابقة من كل مسئولياتها ويرمونها على شبابٍ لم يجدو أمامهم لا قدوة ، لا تأهيل ، لا توجيه |
| |
|
|
|
|
|
|
| |
Osman Musa
Asim Ali
ابراهيم عبد الوهاب
عبداللطيف حسن علي
كمال عباس
عبدالعظيم عثمان
أبوبكر عباس
حيدر حسن ميرغني
محمد المرتضى حامد
معتصم سليمان
Gaafar Ismail
Ali Alkanzi
علي عبدالوهاب عثمان
Amira Hussien
هاشم احمد ادم
Hani Arabi Mohamed
فيس بوك
تويتر
انستقرام
يوتيوب
بنتيريست