|
|
|
 Re: قنطار حظ (Re: درديري كباشي)
|
يا درديري عندي ليك اقتراح
اكتب القصة وييرد كولها وتعال شوت في جابترز
ماعندنا مشكلة قصصك الباتعه دي كولها ما قاعد تتم وبعدين تزوغ مننا في جخانين بكري
كان تميتها ما نلقاها ...
:
:
:
:
:
:
:
منتظرينك واصل وما تنقطع
مع التحيات لله الزاكيات
| |
 
|
|
|
|
|
|
|
|
Re: قنطار حظ (Re: درديري كباشي)
|
قنطار حظ
2
وصل الصديقان الى حيث المطعم المنشود ..أما عضه رغم حبه الجارف للأكل لكن اليوم غلب عليه الفضول .. ما الذي وجده صديقه وأحدثه عنده هذه النقلة المفاجئة ؟ ..وهو حتى ليلة الأمس كانوا يترجوه ليجدوا عنده الاشتراك في البوش ( فتة الفول ) عند وجبة العشاء .. - يلا تعال غسل بعدين نطلب .
- يعني أنت ما عاوز تورينا الحاصل شنو ؟
- ياخ ما تصبر أنت مالك ثقيل كدا ؟
- هسع عليك الله ثقيل أنا ولا أنت ..أنا لو ما عرفت الحاصل ما حا أقدر آكل زاتو .
- يا سلام من متين كدا ؟
- والله يا ضجة أنا قربت أزعل منك . أنت فاكر انا ما عندي هم في الدنيا دي غير الأكل .. هسع يمكن قروشك دي قروش حرام ..
- بالله يا عضة بطل عوارتك دي .. هو نحن كنا لا قين قروش الحرام وأبيناها؟ .. نحن حتى الحرام قفل في وشنا .
- هاهاهاهاها والله جد حيرتني قدر ما حاولت استفزك ما قدرت على برودك وثقالتك دي .
- المهم ستة سيخات كفاية ولا نزيد ؟
- ستة سيخات أقاشي مرة واحدة .؟. غايتو الله يعدي اليوم دا على خير .
وفعلا أحضرت الطلبات وبدأ الصديقان يأكلان بنهم ..
- أها تشرب شنو ببسي ولا شربوت ؟
- لا ببسي شربوت شنو كمان عاوز تمشي لينا بطنا في الحر دا . يلا أبدأ أحكي ..
- خلاص حا أحكي ليك عشان تقدر تكمل الأقاشي دا ..
- يلا سريع عليك الله جننتا جن .
- المهم كنا قاعدين قدام دكان عمك اللمين الفاتح في الظلط داك أنا والشلة ناس صلاح وعمر وأولاد حلة الظلط الباقين العطالة منهم والشغالين .. جات عربية مارسيدس شبح النوع الشبح شبح بالجد داك صوت ما عندها سايقاها مرة .. فجأة سمعنا ليك صوت كفر طرشق وبدأ ينفس .. نحن نعاين من بعيد .. نشوفها ليك نزلت منها بنت لا بسة توب سوداني .. في الحقيقة هي مرة متزوجة لأنها محننة .مرة شنو قول تاجوج بتاعة المحلق ديك . يا زول ريحتها دي لمن وصلتنا في الدكان .. وقفت تعاين للكفر وتصفق في يديها وتتلفت . واضح عايزة مساعدة .
سكت لحظة وبدأ يتبسم .
- ياخ ما تكمل وترتنا .
- طبعا ناس حلة الظلط متعودين على المواقف دي ولا اشتغلوا بيها الشغلة .. أنا صراحة أثرتني شعرت بيها قربت تبكي . قمت أنتفضت كدا عايز أمشي عليها .أها ناس صلاح قالوا لي ياخ سيبك منها ديل ناس حناكيش ماكلين البلد دي .. هسع لو طلبت منها مساعدة تطردك زي الكلب خليها تتعذب شوية ولا تتصل براجلها الحرامي دي يجي يصلح ليها الكفر .
- طبعا أنت يا عنتر بن شداد ما اشتغلت بيهم طوالي مشيت عليها .
- أخوك ما بيقصر معقولة نسيب الحنان دا يتعذب ونحن نعاين كدا مافي مروة ولا شهامة؟ ..مشيت عليها ..أول حاجة طبعا قلت ليها كفارة ياخ وسلامتك وبسيطة تنحل .نظام برستيج واوتوكيت والحاجات ديك ياخ . شكرتني وابتسمت كدا وقالت لي ألله يخليك .. قلت ليها أفتحي الضهرية طلعت العفريته والكفر الاسبير غيرت ليها الكفر .
- أها الموتر جا من وين ؟
- ياخ أنا ما جاييك ما تقاطعني .
- خلاص خلاص كمل .
- أثناء أنا ما بغير ليها في الكفر قالت لي اسمك منو يا كابتن ؟ قلت ليها ضجة .. أنفجرت بالضحك وقالت لي بصوت رقيق وحنين كدا معقولة اسمك ضجة ؟؟ ( طبعا دا كله منكم لصقتوا فيني الاسم دا لغاية ما نسيتوني اسمي الأصلي )
- هاهاهاهاها ياخ واصل ما تملانا فقر .
- أها قلت لا أنا أصلا اسمي خالد وأولاد الحلة من صغير لصقوا فيني اللقب دا لغاية حتى ناس البيت بقوا ينادوني بيه .. وتاني انفجرت بالضحك وقالت مع أنه شايفاك زول هادي ورايق . قلت ليها دا بس معاك أنت لكن أنا لمن اتونس في بيتنا الحلة كلها تكون سامعة صوتي . تاني ضحكت وأنا خلاص في الوقت دا قفلت الكفر ..ورجعت الاسبير المنفس في الضهرية وعايز أمشي نادتني دخلت يدها في محفظتها وطلعت حزمة قروش حلفت بدين أبوي ما استلم منها ولا جنيه .. وعملت فيه زعلان كمان . مع أنه أنا حق التمباك ما عندي .. المهم جاتني ليك الشهامة والمروة وعوارة السودانيين ديك .. طوالي بدون مقدمات قالت لي تشتغل معاي يا خالد ؟ .. خلاص الباقي أرح نكمله ليك مع ست الشاي .
- تبالغ يا ضجة ياخ معقولة تاني أصبر نحن لسع ما عرفنا الموتر جا من وين ؟
لم يعقب ركبا الموتر وتوجها ناحية شارع النيل .
- يا خالد ياخ ما تكمل ؟
- ما حا تسمع مع ضجة الموتور دي .
يتبع
| |
|
|
|
|
|
|
|
|
|
Re: قنطار حظ (Re: درديري كباشي)
|
قنطار حظ
3
وهما في طريقهم الى شارع النيل ظهرت ست شاي تجلس تحت ظل أحدى الاشجار . يضربه عضة على ظهره .
- وقف هنا يا خالد وقف نشرب الشاي هنا .
- ما قلنا شارع النيل .؟
- شارع النيل بتاع شنو ياخ كرهتنا زاتو عايزين نعرف الفلم بتاعك دا نهايته وين ؟
- هو الفلم ياداب بدأ تقول لي نهايته وين ؟
- المهم الحتة الوصلت فيها للموتر الجديد بعدها ما عايز أشوف خلقتك دي .
- متأكد؟
- ياخ والله أنت مقرف عايز (تطرشنا) الأكل الأكلتنا ليه دا عارف ثقالتك دي حاجة تعملها مرة في السنة وتندم الزول عليها .
- خلاص مافي مشكلة نشرب الشاي هنا .
نزل بالموتر من شارع الظلط واتجه ناحية شجرة بائعة الشاي . جرا مقعدين قصيرين ( بنابر ) وجلسا بعيدا من الناس بعد أن طلبا شايين بالنعناع .
- أها يلا كمل .
- نحن كنا واقفين وين ؟
- واقفين وين بتاع شنو؟ قلت قالت لك تشتغل معاي يا خالد .
- أيوا بالظبط .. قلت ليها أنتو شغلكم شنو ؟ أها هي قالت لي تفتكر ممكن يكون شنو .. قلت ليها غايتو يا تياب وملابس نسائية يا كريمات واكسسوارات البنات زي كدا ؟؟ ضحكت قالت لي ليه الخلاك تفتكر كدا شنو؟ .. قلت لها ما هو دا الشغل البيشتغلوه النسوان في البلد دي عادة . قالت لي ما في حاجة تاني بيعرفوها النسوان؟ .. ما في دكتورات وصديليات ومهندسات .. قلت لها العفو لكن ما أعتقد في شركة هندسية أو طبية صاحبتها مره .
رفع مخاطبا ست الشاي رأسه قال لو سمحتي شوية سكر يا أخت ..
نظر له عضة بغيظ وقام بسرعة تناول السكر من بائعة الشاي وأحضره .
- أها في النهاية قالت شغلها شنو .
- قالت لي انا مهندسة ديكور وعندي شركة بتاعة تأثيث كاملة .. خلي بالك كويس تأثيث بالثاء مش تأسيس بالسين عارف الفرق ؟.. قلت لها طبعا أنا ما جاهل للدرجة دي . يسكت قليلا .أنت عارف الفرق يا عضة ؟.
- ياخ مالك ومالي ما تكمل قصتك يا حيوان ..
- ينفجر بالضحك ويقول . قلت لها التأثيث يعني الشركة بتفرش المباني وبالأثاث مع الديكور وخلافه .. تأسيس هي شركة مقاولات مهمتها فقط تحفر الاساسات وتصب العلب وتتخارج .... قالت لي برافو عليك . و بالمناسبة أنت دارس شنو .. قلت ليها إدارة أعمال تخصص تسويق .. قالت حلو ... والله لو سمعتها جرتها كيف حلو دي.. أها قالت آسفة سألتك من تخصصك قبل ما أعرف أنك موافق تشتغل معاي .قلت لها طبعا موافق .. قالت لي طيب أديك فرصة أولا تقدم استقالتك من شغلك وتجيني على العنوان دا .. طلعت كرت قلت ليها أنا قدمت استقالتي من الآن وقبلوها .. قالت لي كيف الكلام دا؟ قلت أناشغال أعمال حرة ( خجلت أقول لها عاطل زي ما أنت عارف ) وقلت لها قراري في يدي .ضحكت بفرح وقالت لي أرح نبدأـ توظيفك ..
- الوقت دا كله وانتوا واقفين في الشارع ؟
- تتصور صاح ما منتبهين لروحنا أما ناس صاحبك صلاح ديلك قربوا يتشقوا من الغيظ .منتظرين متين أرجع عشان أفت ليهم الشمار .
- أها لسع ما وصلنا للموتر
- أصبر ما أنا جاييك ياخ
- والله انت براي بري حرقت يومنا كله .
- ما مليت ليك كرشك تاني شنو هاهاهاها .
- آي اقعد امسكني بيها كدا ليوم الدين .
- المهم قالت لي أركب نحن الوقت سرقنا .
- طوالي ركبت ؟
- دا كلامك ؟ ما أركب عربية زي الطيارة .
- والله يوم شلاقتك دي تضيعك هسع لو طلعت بتاعة أعضاء بشرية ولا مصيبة والله كان كليتك الليلة صبحتها في ايطاليا .
- هاهاهاهاها الله يقلعك ما هو خوفك دا المخليك عاطل من ضل لضل . الحياة عايزة مغامرات .
- مغامرات شنو كمان ؟عايز تعمل لي فيها بطل لقيت بت حنكوشة سايقة شبح ارتاحت لك ونغنغتك .. اليسمع مغامرات دي يقول قطعت البحر الأبيض سباحة مع الجماعة ديك .
- المهم عايز تسمع الباقي ولا ما عندك رغبة خلاص .
- ياخ عليك الله أحكي ما تملانا فقر زيادة ما ناقصنك .
يتبع
| |
|
|
|
|
|
|
|
|
|
Re: قنطار حظ (Re: درديري كباشي)
|
قنطار حظ
4
واصل ضجة في حكايته لصديقه عضة
قال : قالت خلاص أركب .. ركبنا العربية وتحركنا التفت ليك لأصحابنا ديك ما فضل ليهم الا يجروا ورى العربية .. يازول العربية تكييف زي تلاجة الموز ومن جوة صوت مافيها يمين تقول طيارة .. ماشة ليك تتهادى في الشارع حسيت بنفسي راكب سفينة فضاء من أفلام الخيال العلمي ديك .
- ياخ قول المهم سيبك من العربية كلنا عارفين المارسيدس عاملة كيف ؟
- اها عارفها من وين كمان؟ عاوز تكذب عمرك ركبت شبح موديل السنة .
- عليك الله يا ضجة ما تفقع مرارتنا أحكي المهم عليك الله سيبك مني أنا ولا حتى لاندكروزر ما ركبت أها رأيك شنو ؟
- خلاص واصلت في حديثها عن طبيعة شغلها وقالت نحن نستورد أثاث ايطالي وماليزي وصيني ومتخصصين في تجهيز الشقق والفلل والمكاتب للاجانب . سفارات وشركات ومنظمات . نادر جدا ما نتعامل مع عميل مواطن .. نستلم الشقة أو المكتب بعد البياض بعداك نصمم لها الديكور ونرسل التصاميم للمصانع في ايطاليا أو ماليزيا حسب الماركة المطلوبة يرسلوا لينا الأثاث وأوراق الحائط ولا أخشاب الباركيه والجبس وغيرها .. نسلم الشقة أو المكتب جاهزة للسكن . طبعا بعد رسم الخرط والنماذج وموافقة العميل .
قلت لها معقولة في أجانب في البلد دي ممكن يكفوا لقيام شركة ؟ قالت كيف ياخ أنت ما شايف المنظمات والسفارات والشركات الاجنبية .قلت لها طيب أنا ما حا أقدر اتعامل مع الاجانب ديل صراحة لغتي الانجليزية تعبانة جدا .. قالت شي طبيعي ومتوقع . على كل حال حا ندخلك كورسات مكثفة في البريتش كانصل عشان تقوي لغتك .. لكن قبل كدا أنا وجودك نفسه أضاف لي فكرة جديدة عايزة افتح خط للتعامل مع المؤسسات الوطنية وأنت حاتكون مندوبنا للبنوك والمؤسسات الحكومية .. تدخل تجيب لينا كراسات المناقصات ويمكن بعد فترة ندربك على حسابات التكلفة وممكن تعمل المناقصة براك .. وأنا حا أخصص لك راتب أربعة ألف وعندك عمولة مع كل عملية تجيبها لينا حا نبدأ معاك خمسة في المائة وبعدين تزيد كال ما شفنا نشاطك زاد . قلت لها أنتو ؟ تتكلمي بصيغة الجمع ليه هو في معاك ناس تانين .. قالت طبعا هي شركة لكن بصراحة نحن إداراتنا كلها بنات . نحن ثلاثة أخوات أنا فاتن واختي شادن والثالثة علا .. ومعانا مهندسات ومحاسبات ومديرة مالية .. كلهن إما صديقات أخواتي أو بعضهن عيناهن معنا .. الرجل الوحيد في الشركة هو السواق عم صالح .. وبعداك عندنا طاقم العمال والنجارين ديل للشغل اليدوي و عندنا ورشة ومخزن في المنطقة الصناعية لتجميع الأثاث وتركيبه ..بعداك قالت لي عندي فكرة خلينا نغشى مقهى هنا نجلس ونتفاكر في طبيعة شغلك .. وفعلا وقفنا لينا في مقهى كدا فاخر أول مرة أشوفه النوع المظلل داك وفيه بنات شغالات حاجة كدا تمخول .. ياخ اليوم دا يا عضة حسيت أنه انا ما عايش في السودان .. أو رحت بلد تاني . المهم قعدنا في ركن كدا وطلبت لي حاجات كدا عجيبة كابتشينو وموقا .. ومش عارف شنو .. المهم حاجات كدا طعمها زي الخيال . وواصلنا في الحوار . اليوم راح الوقت سرقنا أرح نتحرك .
- عليك الله يا خالد كمل ياخ نحن ورانا شنو أنت راجع الشغل تاني؟ .
- لا أنا دوامي حا يبدأ بكرة الصباح اليوم هو تسليم شغلي القديم .
- هو أنت كان عندك شغل قديم ؟.
- ما طلس ساي كمان عايزني أقول ليها عاطل وقع لك من السما .. لازم أفهمها أنه عندي أعمال عايزة تسليم وتشطيب شغلي القديم عشان الأهمية وكدا . الدنيا دي ما دايرة شوية حنك كمان يا عضة ياخ .
- هاهاهاهاها فقري لكن .. أها طيب واصل يا طلاس ..
- المهم قالت لي يا خالد نحن قبل ما نمشي المكتب في حاجات فيك عايزة تغيير .
- أنا أخو الرجال حاجات شنو كمان ؟
- اصبر يا وهم .. قالت لي نوع لبسك دا ما مناسب . لازم أنت داخل على وظيفة جديدة البرستيج مهم في أول داخلة ..اوعك تدخل على أي وظيفة جديدة وأنت مبهدل .. لازم تكون في كامل أناقتك .. عشان لو دخلت مبهدل من أول مرة تاني مهما اتأنقت ولبست حيكون الانطباع الأول موجود عند زملاك . يمكن يمنوا عليك يقولوا ليك أنت ما جيتنا مقطع ومبهدل نحن نظفناك .
- ديشاك ياخ الزولة دي حبتك عديل .
- ياخ خلي عندك فهم هي زولة متزوجة ياخ .
- اها طيب واصل .
- قالت من هنا أول شئ لازم نروح محلات الملابس الراقية ولازم يكون عندك نوعين من اللبس .. لبس رسمي ولبس كاجوال .
- كاجوال ورسمي الفرق بينهم شنو ؟
- ما أنا سألتها نفس سؤالك دا . حسيت أنه البساط بينا بقى أحمدي .. قالت لي اللبس الكاجوال هو الللبس الملون والمشكل زي بناطلين الجينز والتي شيرتات والاحذية الرياضية .. واللبس الرسمي هو البناطلين والقمصان السادة والكرفتات والبدل السادة كمان ..مع جزم رسمية وهي الجزم السوداء الطويلة وعندها كعب قصير وبدون رباط ..
وقلت ليها طيب أنا الكاجوال البسه متين والرسمي متين ؟.قالت الرسمي تلبسه عندما تدخل لجهة ما أول مرة تروح لها .. يعني مثلا اليوم أول شئ نحن راح نغشى محل الملابس اشتري لك كل اللبس القلناه دا وتروح معاي الشركة باللبس الرسمي بدلة وكرفته عشان تعطي الانطباع الأول بأنك شخص رسمي وجادي وجايي لوظيفة واثق في نفسك إنك مؤهل لها تماما .. قلت لها طيب الكاجوال .. قالت الكاجوال كمان في البيزنس عنده دور .. يعني مثلا لو عايزين نتعاقد مع شركة أو مؤسسة أو بنك لأول مرة .. تروح لها باللبس الرسمي .. بعداك بعد ما يبدأ العمل ممكن في المرات التالية تروح باللبس الكاجوال . قلت لها طيب الكاجوال فايدته شنو .. قلت هو بيدي انطباع بالراحة عند العميل وأنه الحالة بقت واحدة .. وحا يتعامل معاك بدون تشدد او رسميات ويمكن يطلب منك شغل جانبي مثلا تجهز له شقة خاصة . المهم اللبس الكاجوال بيعطي احساس الصداقة . قلت لها طيب لو عكستها يعني في الاول مشيت بالكاجوال . قالت عكستها راح يحدث العكس زي ما قلت لك في الأول أنك شخص غير جادي وجايي تحصيل حاصل وتأدية واجي عشان تستلم راتب .. وتان لو رحت بالرسمي حا يفهموا أنك غلطت غلطة وجاي تصلحها بأي ثمن . عرفت الفرق ؟
- ديشاااك انا أول مرة اعرف أنه اللبس عنده أهميات للدرجة دي .
- هاهاهاها ما أنت براك أنا وانت والبلد كلها فاكرين اللبس وظيفته هي ستر العورة وبس .
- اها واصل
- بعداك قالت لي تعرف تسوق عربية ؟ قلت لها عندي رخصة لكن سواقتي تعبانة .. بس بعرف أسوق موتر . قالت حلو الموتر أفضل عشان زحمة الخرطوم والاشارات الكتيرة وخاصة نحن نحتاج مرات نرسلك السوق العربي والبنوك للتحويلات و تغيير العملة في الوكالات والحتات ديك بعربية يروح يومك كله . قلت لها لكن معقول البس بدلة وكرفتة وانا سائق موتر حايكون منظري زي سوبرمان .. ضحكت بشدة وقالت لمن يكون عندك مشوار رسمي بالبدلة تطلع مع عم صالح السواق .. ومشاوريك الباقية خليها بالكاجوال . وفعلا من المقهى مشينا محلات الملابس أول شئ نزلت لي ثلاثة بدل وثلاثة بناطلين جينز وستة قمصان وتيشرتات .. حتى الحزامات يا عضة فيها كاجوال وفيها رسمي .. تعرف نحن الدنيا كانت عايزة تفطنا عديل ندخل ونمرق منها في حاجات في بلدنا نكون ما شفناها ولا ضقناها .
- اها والموتر .
- أيوا من هناك مشينا عدل على وكالة السوزوكي واخترت أنا الموتر دا . وقالت لهم خلصوا الترخيص واتصلوا عليها لمن يكون جاهز ومن هناك عدل على مقر الشركة .
- اها الشركة محلها وين ؟
- مش عارف والله تقريبا الحتات الداخلة في بعض ديك ناس منشية ومعمورة والرياض .. المهم وصلنا عمارة كدا برج عالي طلعت ليها رموت القراش فتح . توشاك دخلت بالعربية .. قراش تحت العمارة .
- ما خفت .؟؟
- صراحة والله قلبي ضرب .. جاني كلامك الأول داك قلت . المرة دي لو بختني بمخدر ولا مصيبة يمين ما في زول يجيب خبري .. هي عاينت لي كدا وابتسمت .. كأنها حست بالخوف في عيني .. لكن أنا عملت ليها شفت ضحكت وقلت لها ماشاء الله دام عزك ياخ . وقفت العربية في القراش في مكان معين مكتوب فيه المدير . وهناك عربات كثيرة صغيرة وملونة وفيها ديكورات ظاهر عليها عربات بنات .
ومن هناك مشت على الاسنانسير وقالت لي أنا حا أطلع قدامك بعد عشرة دقائق تعال وراي الدور التاني تلاقي لوحة صغيرة بالانجليزي اسمها ارتست كومبني تدخل على السكرتيرة تقول لها عايز اقابل المديرة فاتن .. بعد شوية حا تدخلك علي أنا أقعد معاك شوية .بعدين اطلع أعرفك بالاستاف طاقم الموظفات .
- واللبس الكاجوال وين ؟ ما تقول لي كنت خامي الهدوم معاك .
- لا يا غشيم أنت قايل نحن ما نفهم في البرستيج .. من المحل أول شئ لبست اللبسة الرسمية البدلة وباقي الملابس قلت لهم حا أجي استلمها بعدين منكم . هي زاتها اتكيفت مني ابتسمت عرفتني ليك مفتح . المهم أخوك دخل ليك الشركة بالبدلة والكرفتة . يا زول الشركة دي فيها بنات يمين أنا قايل نفسي دخلت مسلسل في زي ألوان ..كلهم بقوا يعاينوا لي بدهشة كدا .. أخوك بهرهن .
- أها والموتر .
- ياخ انت جنك موتر خلينا نمشي بكمل ليك الحكاية بعد نصل البيت .
يتبع
| |
|
|
|
|
|
|
|
|
|
Re: قنطار حظ (Re: إدريس محمد إبراهيم)
|
| Quote: - ياخ انت جنك موتر خلينا نمشي بكمل ليك الحكاية بعد نصل البيت . |
اهاااااا يا فنان قمنا علي حركات الطلس ملص دي الكوت الاولي
عرفناه نهاية حبكة mbc2 وكدا النقطة شنووووو 
| |
|
|
|
|
|
|
| |
محمد حمزة الحسين
إدريس محمد إبراهيم
فيس بوك
تويتر
انستقرام
يوتيوب
بنتيريست