ولد ابا ود الشيخ..!! عذبتنا يا ولد ابوك.. ياخي جبنا ليك الما نسونا بالحبشي والسوداني ..وانتا عاصر في جاز عطبرة؟؟ ياولد ابا لو اضانك نجيضة في المزيكا ..جاز الديم ما بنفات...!!..والله صحي.. واهو ديلك اشتغلوا المانسونا ، علي بالحلال يا ود الشيخ لو تجيبوا قطر عطبر وصفارتو..لمن يصل حلفا..مافي زول بينجضنا زي العالم دي..!!
للمرة التانية..!
كبر
10-30-2017, 12:05 PM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11825
لغاية ما تفرج معاك يا ود الشيخ ، وتفتح معاك.. صلاح بشير على قول استاذنا المعز ابو نورا..صلاح الشهير بي صلاح بروان تيمنا بجيمس بروان..!!..الغنية دي يا ودي الشيخ بتفضح الكيزان الفاكينها في روحهم لمن جابوا فكرة العرس الجماعي ، فات عليهم ، نحن انصار الله ورسولو..من زمان بنغني عن عرس الكورة (القاموا الكيزان سموهو عرس جماعي..!!..غني بالجاز يا ود الشيخ..)..
الغريبة يا محمد..صلاح بروان هو والد ايمن الربع..!! وانا بحب جاز الديوم..!! كبر
10-30-2017, 12:26 PM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 24982
يا سلام يا ول أبا محمد النور كبر ربنا يرحم عمر عبده و يطوّل في عمر كمال كيلا الديم وطننا ،الديمقراطي ، حيث لا قبيلة و لا دين و لا عنصرية . شكراً ليك كبر.
10-31-2017, 11:44 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
زمان يا عثمان عندهم مكان إسمه كارمارا ، الكارامارا دا بيشتغل بين 6 مساء إلى 11 ليلا، مشيد على نمط تقليدي من القصب ويشبه المسرح الفي الفيديو أعلاه وفيهو بنابر وكنبات في شكل نصف دائره وتقدم على مسرحه عروض موسيقاهم ورقصهم الشعبي ويقدمون فيه الزغني والأنجيرا والزلزل والتبسي والقهوه. في إحدى زياراتي فاجأتنا مغنية حسناء بأغنية الراحله بيزونيش بيكيلي Hizib Le Hizib (الناس بالناس) إن لم تخني الذاكرة والمعلومة، وهي أغنية صافحت آذاننا منذ الصبا في سبعينيات القرن المنصرم حين غناها الرائع عبدالله دينق في فرقة جاز المدرعات لامن كان في السودان جاز ومدرعات، عبدالله دينق يترجمها على أنها أغنية (المانسونا) وكان عازفا ماهرا للساكس ويقدم صولات على أيقاع التمتم المُسكِر لكافة شعوب القرن الأفريقي وبلاد كوش ومن أزرى بهم الدهر في غفلة من التاريخ، أعادتني تلك الفتاة الجميلة إلى أيام بنكهة حلومر قيد العواسه في عصريات ما قبل رمضان ونحن بين الأهل لاشايلين هم لا عارفين بكرا الجايينا..
مشاركه في بوست سابق من 8/5/2017
غايتو يا كبر..
10-31-2017, 03:50 PM
الفاتح ميرغني الفاتح ميرغني
تاريخ التسجيل: 03-01-2007
مجموع المشاركات: 7488
ول ابا كبر تحية ليك ولضيوفك الأفاضل طبعا كنا بنسمع بجاز الديوم وجاز العقارب وناس عثمان زيتو، وناس الجيلاني الواثق وفرقة البلو ستارز وعمر قيري، وأظنهم أول ناس غنوا لبوب، ويقال ايضاً عزفوا مع جيمي كليف عندما زار السودان( بينة سماعية - Hearsay)،. مرة ناس جاز العقارب ديل جوا الابيض ومعاهم فنان اسمه بلاّل وضربو " براي يا خلا انا من عيني النوم قلّ" لحدي هسع لمن اسمعها بشعر اني في حالة سهر مستدام، حتى لو بالنهار!! شكرا يا مان على اثارة كوامن الشجن والنوستالجيا، تصدق قبل فترة كنت بسمع في السوسنة السمراء، ويتني هيوستون، لقيت واحد امريكي كتب متحسراً على الزمن السمح بالحيل، والله صحي!! ياخ سؤال ما زال يلح عليّ لماذا اختفى الجاز من غنائنا، ولم يتبق لنا سوى الأسطورة شرحبيل - حقظه الله؟
محبتي
10-31-2017, 04:08 PM
عمر السلمة عمر السلمة
تاريخ التسجيل: 01-09-2013
مجموع المشاركات: 264
حبيبنا الاديب الأريب كبر .. حروفك جميلة .. في ذلك الزمن في ضواحي الدنيا في أقاصي الشمال .. كنت معلم في المرحلة الثانوية العامة وكان الوضع الاقتصادي في بداية السبعينات ممتاز جداً ( إسكيل جيه 31 جنيه) الاحتياجات كلها من سواقينا .. فقط السكر والشاي والصابون والزيت من السوق .. وبحكم أننا معلمين ونعيش في حاضنات أهل وأقارب لم يكن متاح لنا النزهة والحاجات خارج السياق إلا في ( ميز المدرسين .. ليالي الخميس ) .. كان متنفسنا الاجازات الصيفية الطويلة .. كنا نسافر إلى العاصمة لقضاء شهر من الفسحة والنزهة وفي جيوبنا تحويشة 70 جنيه كافية لكل الأمور .. كنت أسلم القيادة لإخواننا الموجودين في العاصمة لأنني لم أكن أفقه شيئاً في المجتمع العاصمي .. لقد تطرقت إلى هذه الخواطر لأن ( إسم الفنان الرائع كمال كيلا ) مازال عالقاًً في خاطري .. فقد قادني أخي فتاح كان يعمل في مجلس بحري إلى كازينو إسمه ( النيل الازرق ) تقريباً كان بالقرب من النقل الميكانيكي بالقرب من كبري بحري إذا لم تخني الذاكرة .. جلسنا في حديقة مفتوحة .. ولا داعي للتفاصيل .. المهم بعد تلك الجلسة إنتقلنا إلى صالة .. وهناك ولأول مرة في حياتي أشاهد فرقة ( جاز ) كنا نسمع أحياناً شرحبيل في الراديو ولكن يبدو ان موسيقى الجاز يحتاج إلى المشاهدة أولاً ثم بعد ذلك السماع .. لأن السماع من الراديو بدون إستحضار الصورة الذهنية أو الشخوص لا يطرب .. دخلت الصالة ووجدت آلات النفخ والجيتار والفنان ( كمال كيلا ) يتحرك في المسرح .. معظم الناس كانوا خارج السياق .. رقص مختلط .. وأذكر كان كمال كيلا يلبس قميص ( كنغولي ) لست متأكداً من الاسم .. عندما رأيت منظر الشباب والشابات عرفت لماذا يحب الناس هذا النوع من الموسيقى الذي يحلق بك في عوالم من الجمال كالدرويش الصوفي عندما يبلغ البسط .. هذه كانت بدايتي لأعشق موسيقى الجاز .. بعدها أدمنت سماع الجاز في الراديو ولم أكن أستسيغه قبل مشاهدة كمال كيلا .. حتى الاغنية التي كان يرددها كيلا كان على مستوى جميل من اللحن .. سوف أحاول أن أجتهد وإستحضر بعض الكلمات مثل : I want to tell you about girl I know She is my baby and love her so فكنت في ريعان الشباب ومحب للغة الانجليزية ومعلم لها .. فحفظت مقاطع منها ولكني عجزت أن أستحضرها الآن .. فكان كيلا يرددها بطريقة رائعة وحركة جسدية تتناغم مع الموسيقى .. ولكني فشلت تماماً في الاندماج مع الراقصين والراقصات فإكتفيت بالفرجة مع إحساس عميق بالحسرة والكآبة .. رغم أنني كنت إعتبر نفسي مسايراً لموضة ذلك الزمان من حيث اللبس والاناقة لأن أخي فتاح كان قد جهز لي ( شارلستون وفنلة جوزيف ) لزوم الطلعة .. عندها لعنت اليوم الذي قذف بنا في ضواحي الدنيا .. كيف لي أن أكتفي فقط بمشاهدة الغيد الحسان ولا أشارك في الرقص والبهجة .. عكس أخي فتاح .. شكراً كبر على هذه المساحة ..
11-01-2017, 03:32 AM
Kabar Kabar
تاريخ التسجيل: 11-26-2002
مجموع المشاركات: 18537
Quote: شوف الاستعجال هسع كان قريت كلامك مالو بس شفت الفيديو وطاخ مع انك نوهت لانو ده صلاح براون
استاذنا وصديقنا..حبابك.. عادي يا استاذ...!!! قبل سنوات ، منبر سودانيز اونلاين..احتفل بالتشكلية السودانية..صفية محمد اسحق (الآن تقيم في باريس ، ولا ادري أين هي باريس تلك...!!)..قمتا ختيت صورة في البروفايل بتاعي..وكانت صورة لصفية بي توب زراق (علي قول الروائي السوداني الحريف ، دهب تلبو:زرقة يا توب المرقة..!!).. نفس الصورة ، صورة صفية اسحق ، كانت في بروفايل صديقنا الخلوق عماد خليفة..!!..لحدي هنا عادي..!! قام صديقنا ول ابا بريمة فتح بوست ، واتداخل فيهو صديقنا عماد خليفة (واضع صورة التشكيلية صفية اسحاق ، في البروفايل بتاعو..!!).. بريمة توووشك يصرخ: يا ول ابا كبر..عيك وعااااااااااااااااااااااك..!! لمن واحد مواطن من سودانيز اونلاين..قال لبريمة: البيتكلم معاك عمادخليفة با بريمة..!!! اول مرة جبت المادة ، نبهني صديقنا الجميل البروف المعز ابو نورا: عن الفرق بين كمال كيلا وصلاح بروان..!! بعد داك ، براي..عرفت كيف انو صلاح بروان ، هو والد ايمن الربع..!! و بالطبع ، مزيكا صلاح براون عندي اكتر قيمة من مزيكا ايمن الربع..!!
كبر
11-01-2017, 04:06 AM
Kabar Kabar
تاريخ التسجيل: 11-26-2002
مجموع المشاركات: 18537
صديقنا ول ابا محمد محمود..حبابك.. الديم يا صديقي ، برضك كان عوالم محمد حسنين (ابو سريع).. وبرضك عوالم عيال عبد اهلو (صلاح ، عماد) وابوساندرا..وناس تانية تلتحف البهاء بغتة..! جاز الديوم هين يا صاحب..! الكلام في جاز ام زين..!!
كتر خيرك يا صاحب..!!
كبر
11-01-2017, 04:29 AM
Kabar Kabar
تاريخ التسجيل: 11-26-2002
مجموع المشاركات: 18537
كتر خيرك على المرور..ول ابا الفاتح ميرغني.. ولسه طالبك ، نقرشة على اوتار جيتار معلون يا حبيب..! لمتين الطيبة يا الفاتح..؟ المقام جاز ، حديث فالت عن جاز..ولكن..!
نقول عليهم يا ربي جلابة؟..نقول عليهم يا ربي مركز؟ نقول عليهم يا ربي هامش؟.. سعدت ، يا الفاتح ، انو المرحوم وردي ، بجلالة قدرو..ماشاف محفوظ عليش..!! بلوز؟..جاز؟..فرحة بت لذينا؟.. سلام ليك يا الفاتح..سلام لمحفوظ عليش ياااااااااااااااااااااااخ..!! اتذكر يا الفاتح..مجرد نقرشة علي جيتار يااااااااااااااااااااخ...!! كبر
11-01-2017, 05:14 AM
Kabar Kabar
تاريخ التسجيل: 11-26-2002
مجموع المشاركات: 18537
بس نبهو حاتم انو نحن ما بنتناول في امور اكاديمية وشنو الفرق بين الاغنية الشعبية واغنية الحقيبة نحن ناس طرب ساكت. نحن صغار لمان نجي البندر كنا بنتفرج في عبد الله دينق لمان يجيب الساكسفون من تحت رجليه ويطلع صولوهات(مش اسمو الساكسفون العامل زي مصفاة البترول دا؟)
فشنو خلينا نستلجأ يكون جاز ولا بنزين
11-01-2017, 09:40 PM
Deng Deng
تاريخ التسجيل: 11-28-2002
مجموع المشاركات: 52545
كتر خيرك على هذه الإضافات الإشراقة..والتحية لعمر عبدو..فنحت الصخر بالأظافر عملية شاقة ، ولكنها ممتعة في نفس الوقت..فهاهو باقيا بيننا..فقط تخيل لو عمر عبده حضر زمن تكنولوجيا الزمن ده..!!! اسم (ابراهيم حسين) في بعض الفيديوهات لخبطت علي افكار..فطوالي مشيت للفنان ابراهيم حسين (ليه يا شمعة سهرانة ، تعيش انتا ويدوم خيرك ، قالوا الزمن دوار..الخ) ، وكنت اتوقع له اعمال بلغة الهوسا..ولكن..! هل هو تشابه اسماء؟
اهديك بعض من الأشياء المحببة للروح..ادريس محمد..فالجاز حاجة جميلة للغاية..وانا من محبي السوفت جاز..
شكرا.. كبر
11-04-2017, 05:49 AM
Kabar Kabar
تاريخ التسجيل: 11-26-2002
مجموع المشاركات: 18537
هدية خاصة لصديقاتنا واصدقائنا ممن يتابع هذا الخيط..وزي ما بيقولوا اهلنا:جديد حار من الفرن..! التحية للفنانة الشابة هالة دهب..وتحية للفنان الشاب زرياب دهب (توزيع موسيقى)..وتحية برضك لأشرف دهب..يا ربي الناس ديل اخوان؟
الفنانة هالة دهب..لديها مادة جديد في اليوتوب (تمت اضافاتها قبل خمس ايام من تاريخ اليوم، يعني 30 اكتوبر 2017)..واشتغلت اغنية (الزهور والورد)..شغل جاز..وفي الجاز سوفت جاز.. Soft Jazz Smooth Jazz والشغل ده بيوضح انو المزيكا السودانية فيها جاز كتير بس محتاج اعادة ترتيب..!
اكتر حاجة عجبتني في تجربة هالة دهب وهي بتغني غنية (الزهور والورد) هو: الـــــ Setting في الكستيوم هالة اختارت مظهر مغنيات الجاز من الأفريكان امريكان في الخمسينات والستينات..يعني شكل المغنية بيشبه كتير شكل مغنيات الزمن داك..!! طبعا اتذكرت ديانا روس ، بطريقة خاصة..وهي قد لا تكون مغنية جاز..ولكن شكل هالة في هذا الكليب ذكرني ببعض من ملامحها..!!
لغاية ما نشوفكم في نموذج لصديقنا وليد عبد الحميد..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
حيدر حسن ميرغني
أبوذر بابكر
MOHAMMED ELSHEIKH
Elmosley
محمد محمود محمد
حاتم إبراهيم
محمد المرتضى حامد
الفاتح ميرغني
عمر السلمة
علي عبدالوهاب عثمان
Deng
فيس بوك
تويتر
انستقرام
يوتيوب
بنتيريست