فى صالون السراج... كانت لنا أيام كتب مهندس / بدر الدين العتاق القاهرة
مدخل مهم :
فى : 7 / أغسطس / 2014 م ، حملت بعض الرقاع وريشة.. وشئ من دواية بها حبر متنخل من عصارة القرض ومن صدأ الحديد ولوح عجب ذنب اﻹبل مرقوم به : " فى صالون الشيخ الطيب السراج .. كانت لنا أيام " عازما الدخول لذلك الصالون .. متحاشيا النقاش فى أى من مواضيع اﻷدب العربى أو اﻹنجليزى أو ... غيرة ؛ وإلا ...فالفشل والهزيمة الفكرية حليفان لى لا محاله .. فآثرت التنوع لا التوغل فى شخص وفكر اﻷديب النحرير اﻹعلامى الكبير الدكتور / حديد الطيب السراج ...محاولا التحدث بسهولة .. فالرجل خريت نابه عالم ثبت محقق ..فى كل شئ ..ومن الخير إجتناب الفذلكة والفلسفة واﻹدعاء بالمعرفة .. وعن حق .. لست أعرف أمامه من اﻷدب إلا رسمه وعنوانه ...فهو : مؤدب أديب ..مهذب تهذيب.. يلقاك هاشا باشا فرحا خلوقا فكها مرحا مستقبلا مستمعا أكثر منه متكلما شرها ...فهو نحيف الجسم ممتلئ الفكر مهاب الجناب عظيم التواضع أنيق الملبس وهادئ البال.... وإن كان أحب إلى أن يتكلم هو وأن أسكت أنا مما تجده منه من متع اﻵيات وجم العلوم.. ...فإلى مضابط الحوار ...
- السلام عليكم يا دكتور .. - وعليكم السلام ورحمه الله وبركاته ...
- والله أنا جاييك يا أستاذ فى غرضين .. لو تسمح لى بيهم أكون شاكر ومقدر..!
- إتفضل ..بدر الدين...
- شكرا دكتور / حديد ...الغرض اﻷول : عندك كتابين طلعتهم السنه القبل الفاتت ( 2012 م ) عاوزك تورينى نبذه عنهم. وفيهم شنو من الجديد القديم وبتكلمو عن شنو. ... الغرض التانى. يا خال : إنى ح أنشر الونسة دى ( الحوار دا ) معاك فى الجرايد ؛ فإنت عارفنى بتعامل معاهم وبكتب عندهم خصوووووصا صحيفة. " ألوان "... أها : قلت شنو ؟؟
بالنسبة لسؤالك عن الكتابين : الكتاب اﻷول : ( السراج وأدب الرسائل ) بتكلم عن مخاطبات ومواقف ورسائل كتبا الشيخ الوالد / الطيب السراج عليه رحمه الله .. وهى مهمه جدا وطال عليها الزمن وما كانت فى فرصة لطباعتا طيلة الفترة الفاتت .. وترجع أهميتا إنها بتوثق لمرحلة تأريخية مهمة جدا فى اﻷدب والسياسة ...المرحوم / خضر حمد .. مثلا..وهو سياسي معروف كان من أصدقاء الوالد وأحد جلساءه.. واﻷستاذ المرحوم / بابكر أحمد موسى وهو من أصدقاء وجلساء شيخ الطيب برضو وبيناتم رسائل ود ومساجلات ومداومين فى : " صالون شيخ الطيب السراج ..اﻷدبى " ..وإنت عارف برضو من ضمن رواد الصالون المرحوم / خالد أبو الروس الشاعر والمنولوجست المشهور ..فجا الكتاب يوثق للمرحلة دى .. بالنسبة لسؤالك عن النشر ..عارفك بتكتب فى الجرايد ..أنشرا طوالى ..
- شكرا يا دكتور ..طيب بالنسبة لرواد المنتدى منو من الشخصيات الكانت بتداوم عليه فى عهد شيخ الطيب عليه رحمه الله ؟ - المرحوم / محمد بشير عتيق الشاعر المعروف .. الشاعر الكبير / محمد المهدى مجذوب والدكتور المرحوم / عبد الله الطيب والمرحوم / محمد عبد القادر كرف والمرحوم / مصطفى أبو شرف والسيد / خضر حمد والأستاذ / بابكر أحمد موسى..رحمهم الله أجمعين.. بعدين السيد / الصادق المهدى. .. وغيرم كتاار .. - مقاطعا : سمعت من السيد / الصادق المهدى كلام قريب من دا .. بقول : " و مكثت عاما ونصف فى منزل الشيخ / الطيب السراج .. أتعلم منه اللغة العربية " ... - أيوة.. السيد / الصادق المهدى كان من تلاميذ شيخ الطيب ..وهو قريب فى العمر من أخى اﻷكبر / فراج الطيب... - يا دكتور ...إنت كاتب. فى كتابك التانى : ( اللغوى الشاعر - الطيب السراج ) عبارة : " حتى إنه ليكاد أن يكون من المستحيلات أن نؤرخ لﻷدب دون أن نؤرخ للسياسة " أو : " بعيدا عن السياسة " والدكتور طه حسين : ( 1889 م - 1973 م ) بيقول : " أكره أن أأؤرخ لمادة اﻷدب بالتأريخ السياسى " .أو " باﻷحداث السياسية ".فرايك شنو. فى العبارتين ديل ؟ - من الصعب إنك ما تربط بينم ...ﻷنو دا تاريخ .. والتاريخ فيه كل اﻷحداث السياسية واﻷدبية واﻹجتماعية والفرد هو مركز الحركة دى ...وأنا ربطت فى الكتاب فترة ما قبل اﻹستقلال من مؤتمر الخريجين ودور الوالد إبان عملو بالسكة الحديد فى عطبرة وهو إستولى على عطبرة لمدة محدودة من الزمن. ..فالربط بين اﻷدب والسياسة أو اﻷحداث البتمس الناس لا غنى للكاتب واﻷديب عنها ....
( ولم يعلق على عبارة د. طه حسين )
- متين نشأ : " صالون الشيخ الطيب السراج اﻷدبى " ؟ - بدا فى حياة الوالد رحمه الله وإستمر بعد وفاتة وكان قائم ومهتم بيه أخى وشقيقى اﻷكبر / فراج الطيب ...حتى وفاتو رحمهم الله ومسكت الصالون أنا بعد وفاتم ومستمر حتى اليوم وحيستمر إلى أن يشاء الله .. وتقريبا عمر الصالون حوالى سبعين سنة ( 70 ) .. - كلمنا عن فراج الطيب ؟ - بالمناسبة .. فراج أخوى بدا حياتو ممثل فى مسرح ميسرة السراج .. وكان هو وميسرة وإسماعيل خورشيد وخالد أبو الروس ومرات أنا .. وغيرم .. بمثلو فى الحوش البرة دا ...بيختو الطربيزة فى نص الحوش ويطلعو فيها بإعتبارا خشبة مسرح .. وكل واحد فيهم يجسد دور من قصة معينة...بعدين فراج إتجه الشعر والعمل فى اﻹذاعه وقدم كممم برنامج ' منها : الشعراء الشباب ومقدمة البرنامج مقدمة درامية .. الباب يدق كذا مرة .. وينادى واحد.. وهو فراج . من بالباب ؟ و يكون الرد : نحن الشعراء ... وطبعا البرنامج اﻷشهر " لسان العرب " وشعارو.آية سورة النحل 103 " لسان الذى يلحدون إليه.أعجمى ،.وهذا لسان عربى مبين " بصوت اﻷستاذ / عبد الكريم قبانى ..ما زال يقدم حتى اليوم ..
- اﻷستاذ / صديق المجتبى ..حسين خوجلى..مصطفى عوض الله بشارة...إمام على الشيخ...البروف / اﻷمين أبو منقه ..مبارك المغربى ...مصطفى سند .. سيف الدين الدسوقى.. وغيرم كتيير...
- إنت .. الدور عليك يا دكتور ...منو من جلسائك. وتلاميذك ...؟
- روضه الحاج. محمد ..أبو عاقلة إدريس ... وغيرم.. .الصالون دا يوم الجمعه بتملى ناس بجو من بعيد ومن قريب ....فالناس كتيرة والحمد لله ..
- المواضيع شنو البتناولا الصالون ؟
- كل فنون الشعر واﻷدب والسياسة واﻹجتماع والبحوث والدراسات واﻷخبار الحياتية وهموم الناس. ' ولو توفى أحدهم بنعمل ليه جلسة خاصة موضوعا ..دراسات حول إنتاجو الفكرى أو الشعر أو غيرو. حسب ما هو معروف بيه....
- سؤال خطير جدا يا دكتور وصريح وبدون مجاملة .... رأيك فى شعر اﻷستاذة : روضة الحاج محمد شنو ..؟
- " قام من كرسيه القاعد فيهو ومشى للكرسى البعيد منو وهو يتبسم ويكاد يضحك .. والله على ما أقول شهيد وأنا أتابعه " فبادرته بغتة بالسؤال التانى : عارفا زميلتك فى اﻹذاعه واﻹعلام .. بس ما تجامل يا خال ... دا توثيق للتاريخ والله...؟
- والله ياااإبنى ...شعرها كويس ...بس زى ما إنت عارف العرب بتقول : " النحو زينة اللغة " فشعرها يخلو من النحو ...
- وأبوعاقله إدريس ..؟ - " يضحك رحمه الله من السؤال ويجيب " : الراجل من المدامومين والملتزمين معانا فى الصالون ...وشعرو كويس برضو ونقاشاتو كويسه بس عيبا الطول والثرثرة وما بدخل فى الموضوع طوالى ...
- مشاريعك للمستقبل شنو ...؟
- عندى كتابين بعد فيهم للنشر ..اﻷول : ( شاعران من وادى النيل - عباس العقاد والطيب السراج ) مقارن بيناتم فهم قريبين من بعض من عدة وجوه ...النشأة والتعليم وغيرا... الكتاب التانى : ( مهد المعارف ) ديوان شعر للشيخ الطيب السراج ...طبعتهم بالكمبيوتر وجاهزين للمطبعه...تعال أوريك ليهم ..
مكتبته.." فيها كتب قيمة " مكتبة الشيخ الطيب وإبنيه فراج وحديد .. ممتلئة حتى سقف الغرفة والصالون وغرفة الصالون فيها من الصحف القديمة والكتب اﻷمهات نفائس ودرر ما هو غير موجود بغيرها ..وتشرفت بمشاهدتها وحيث أشار ..وهى فى مهدها قبل الطبع ... - يا دكتور .. إنت بتكتب شعر ..؟
- " يبتسم ويجيب " : الماعارفينو الناس إنى شاعر .. وبكتب من بدرى جدا .. بالفصيح كمان .. والبعرفوه إنى إذاعى وإعلامى بس ..
" سؤال مفاجئ " : - قبيل أبيت تورينى عمرك كم ...هسه عمرك كم ربنا يمتع بالصحة والعافيه ...
- داير بيهو شنو عمرى ..يعنى إنت ما عارف ؟؟
- والله يا خال ما عارف ...بس إنت قلت فى كتابك " اللغوى الشاعر " إنو الوالد كان بيقرا ليك من كتاب أدب إنجليزى وكنت بتقوم على خدمتو جدا وهو خاصيك بعطف ومحنة شديدة ﻷنك الصغير .. وعمرك ما تجاوز العشرينات بكتير .. إحتمال عمرك اﻵن يكون. " ......" صح ؟
- ما تراك شاطر وعارف " يضحك بهدوء وتواضع "...
- كنت بتشارك فى المربد العربى بالعراق .. بغداد ..؟
- كنت بشارك بالشعر والقصائد الجياد.. أنا وفراج أخوى ..بس فراج إشتهر بالمربديات والمنتديات العربية وأنا باﻹعلام والتلفزيون ..
- طيب يا خال..إنت عندك دكتوراة فى. اﻹعلام صح ..كلمنا عن حياتك العلمية والمهنية شوية لو ممكن ؟ ؛ - أيوة .. وكتبت بعض الكتب فى : الشعر .. واﻷدب واﻹعلام وغيرا .. وكنت بدرس فى جامعه القرآن الكريم بأمدرمان مواد إعلام وعضو مجلس أمناء الجامعة وعميد كلية اﻹعلام بالجامعة .. وعضو مجلس أمناء إدارة كلية النصر التقنية بأمدرمان ...وعضو هيئة علماء السودان ..ورئيس إتحاد أدباء السودان سابقا ..وعضو هيئة اﻹعجاز العلمى فى القرآن الكريم...ومدير الهيئة القومية لﻹذاعة.السودانية 1983 م..ومدير التلفزيون القومى ( 1988 م - 1989 م )...وشغلت عدة مناصب. إدارية. بجامعة القرآن الكريم بأمدرمان ...ودرست الجامعة بالقاهرة .. ودرست تأريخ وطرق المفاوضات.. وتخصصت فى اﻹعلام ...وحصلت على درجة الدكتوارة العلمية فى اﻹعلام....وعندى بعض البحوث والدراسات والتآليف المتنوعة .لمجالات مختلفة .فى اﻷدب والشعر والسياسة والدين ...
- تعرف يا خال ... يا دكتور ..إنت ممتع جدا ومبدع للغاية وأنا بحبك خالص .. وما كنت متخيل إنك تدينى فرصة نقاش وونسة ( حوار ) قدر دا... ؟
- والله يا سيدى وإبنى المهندس .. بدر الدين العتاق .. أنا أشكرك جدا ﻷسئلتك دى وبتمنى تتكرر مرات ومرات وتعال لينا فى الصالون نشوفك بتقول شنو ..
- إن شاء الله ح أكون معاكم ..وبهذه المناسبة بهدى ليك كتابى عن الشيخ الطيب السراج وفراج الطيب ( قبضة من أثر اﻷديب ) دراسة نقدية ما فيها شكر ...أقراه وأدينا رايك ...( بدون مجامله )..." ونبتسم ضاحكين "
- جدا ..إن شاء الله ...وإنت برضك شيل الكتابين ديل هدية ليك غير اﻷخيرات ......كتاب عن.( اﻹعلام و / فراج الطيب.. شاعرا ) من تأليفى..
ودعناك الله والرسول وربنا يمتعك بالصحة والعافية ويحزيك عننا كل خير ودمت أبدا ..مع السلامه ....
وسرجت بعيرى المربوطة ناصيته بإحدى سوارى زرائب أبى روف المعطونة برائحة الطين واﻷظافر والمراكب وكثير نسمات شواطئها المخملية ..بعد أن رحلت. مقبلا ما بين عينيه روحا قدسية تعبق بالتأريخ وتمتزج باﻷدب وتذخر بالعلم وتنبض بالحياة ، وحال نفسى يردد قول البروف / عبد الله الطيب :
عصتنى الطيعات من القوافى * فما أدرى وحقك ما أقول
وأعيانى البيان وكيف يجزى * جميلك أيها الشيخ الجليل..
حب النيل حبك فى فؤادى * وبيانك الثر النبيل
وجعلت كلماته فى قرطاس لتلمسوه بأيديكم وعيونكم عساه....
خلدتك فى صحائف مشرقات * كما خلد المبرد والخليل ...
رحم الله اﻷستاذ الكبير الدكتور / حديد الطيب السراج. ( 1943 م - 2017 م ) رحمة واسعة وأسبغ على قبره شآبيب المغفرة والرضوان وأنزله منازل اﻹحسان وأسكنه فسيح الجنان. وألهم آله وذويه ومحبية. وتلاميذه الصبر وحسن العزاء والسلوان " إنا لله وإنا إليه راجعون "... آميين ..آميين ..
والعزاء لإبنه محمد المنتصر ولسعادة السفير بسفارة السودان بالقاهرة / رشاد فراج الطيب السراج.
09-06-2018, 07:53 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12483
حبيبنا بدرالدين .. تحياتي .. شكراً على هذا التوثيق والاجمل أن الموضوع بطريقة شيقة وجاذبة التحية لهذه العائلة التي أهدت الوطن قامات في مجال الادب والفن وجدت متعة في قراءة البوست وكأني معكم في الجلسة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بدر الدين العتاق
علي عبدالوهاب عثمان
فيس بوك
تويتر
انستقرام
يوتيوب
بنتيريست