|
|
|
 Re: يا الله أخلقنا (Re: عبدالحفيظ ابوسن)
|
ود ابسن
عمك عربي خلا بجي البحر يشتغل بي جملو ينقل بيهو المحاصيل
الجمل يوم اصبح ميت وعمك دق جرس
الناس بيواسو فيهو : يازول اصبر ، اذكر الله ، ربنا بعيشك
قال ليهم : يا ناس هوي ان بقا عندكم دبارة وروني ليها لاكين عيشة الله بي جمل بعرفا وبلا جمل بعرفا
| |
 
|
|
|
|
|
|
|
 Re: يا الله أخلقنا (Re: Abdullah Idrees)
|
يا الله اخلقنا
العيشة علينا
هو تعبير مداعبة
بكايدو بيهو الناس بعضهم البعض
والمكايدة لا تخلو من ادانة اخلاقية
بعض الناس اشتهرو انهم بعرفو يطلعو القرش دون حدود اخلاقية ودون وازع من أي نوع
بشتغلو اي شي .. وفي سبيل القروش مستعد يعمل اي حاجة ويتنازل عن اي قيمة
ف شنو
بشاغلوهم كدة الناس .. وبتسمعها كتير في السوق كل مرة يلصقوها لي مجموعة جغرافية محددة
يعني ديل ما شغالين بالرزق ياكلو رزقهم ورزق غيرهم
| |
|
|
|
|
|
|
|
|
|
Re: يا الله أخلقنا (Re: عبدالحفيظ ابوسن)
|
عمنا مصطفي حسن جميل من الناس الاذكياء المثقفين والمتعلمين في زمن التعليم بسيط
وهو رجل حاضر البديهة وطريف
بيتو سورو قصير .. جات موجة حرامية .. كلم واحد بنا يجي يعلي ليهو السور
البنا اتماطل عليهو والناس كلها بتتعارف واهل .. كوستي القديمة
بقا ساكيهو لامن لما فيهو
يا فلان ياخ ما تجي تعلي لي الحيطة دي .. الحرامية ملو البلد
قام البنا قال ليهو مداعبا
الحرامي لو جا ما بشيل اكتر من قسمتو
عمنا مصطفي قال ليهو
انا لو عارف قسمتو كم اختها ليهو في نص الشارع ... لكن خايفو ينط يشيل قسمتو وقسمتي
| |
|
|
|
|
|
|
|
|
|
Re: يا الله أخلقنا (Re: عبدالحفيظ ابوسن)
|
Quote: علي بي جملة الايمان يا جلال اول امس اشتريناها بي ألف ونص
يعني لو رجعنا الالف ج قبل 89 اشتريتها بي 189 دولار |
قبلكم وحدكم و براكم
كان بقيت فى مكانك كان قلت .. ولّ سيبك
تقومو تطلعونى مستنير كمان
غايتو عملن لى الله ب اوصيك بالعدس
و يا ريت يكون بالتونه
| |
|
|
|
|
|
|
|
|
|
Re: يا الله أخلقنا (Re: جلالدونا)
|
يا جلال هوي ما تباري لي هيثم الممباري بكري داك
العدس زاتو داير رغيف
كيلو العدس 50 ج
والمستوردين لغياب الرقابة بدل يعملو كيس ربع الكيلو عدس زنة 250 جرام عملوهو 200 جرام
المواطن متعود يشتري ربع كيلو عدس يقوم يشتريهو 200 جم ناقص 50 جم
الحكومة خلت المستورد علي كيفو
ما اياهو شغلونا والعيشة علينا
الحياة دايرة انبلاجا
| |
|
|
|
|
|
|
|
|
|
Re: يا الله أخلقنا (Re: جلالدونا)
|
مرحبا عم عثمان عووضة
المنقة هينة
راجي لي سماية
يا قباني
المنقة دي اكلتي المفضلة .. التقول بتكشف انت .. واحد صحبي واعدني بي كرتونة منقة لو جا رمضان يكون عمل سنة ونص نايم
يا جلال
ألكع
| |
|
|
|
|
|
|
|
|
|
Re: يا الله أخلقنا (Re: عبدالحفيظ ابوسن)
|
نجي للحكومة
مصلحة نبي الله الخدر في الذهنية الشعبية
بتخلق الولايات والمحليات والمسميات الوظيفية من عدم لو غلبهم ياي ومساعد ياي راقدة
اها بخلقو الوظايف والموظفين يتصرفو تدعمهم القوانين والاوامر المحلية واحكامهم نافذة
جات المواهي يخشو السوق بس
وبنود الجبايات مطاطية جدا ولا نهائية
ما بعتقو زول لو كان عتالي عندو درداقة
المهم يتم اختيارك في الحكومة وتاني هي ما مسؤولة من معبشتك
| |
|
|
|
|
|
|
|
|
|
Re: يا الله أخلقنا (Re: عبدالحفيظ ابوسن)
|
تندهش جدا من كمية اصحاب المصلحة في بقاء السلطة المنهارة
كل مؤسسة جزيرة منفصلة قائمة بذاتها لا حسيب ولا رقيب لها ما دام سادة اضان الحكومة وما بتطالب بي مال
ومش كدة ممكن تزيد من صلاحياتها بتقديم المال للحكومة
ف بالجد بتحتار جدا من كمية الناس المستفيدة
تقريبا كل موظفي الدولة من مدير لي غفير بصورة او بأخري مستفيد
كل الحكومة شايله شوفها وخاتاهو في المواطن
المواطن مصدر رزق ليها ولجيوشها من الموظفين
ستندهش جدا لو علمت انو موظف كبير ماهيتو ما بتحصل الالفين لكن بصرف راتب اكتر من عشرة الف في الشهر
| |
|
|
|
|
|
|
|
|
|
Re: يا الله أخلقنا (Re: عبدالحفيظ ابوسن)
|
كيف الدبارة ما العمل
لما القبيلة تشيل سيوفا السوق
تبيعا على عجل
تغشى المغارات الحشيش
تاخد بخور ودخان
ولفافات سطل
ورق المواثيق إنبهل
كاويق جريح
طارتبو ريح
كيمان مقنبرة للمديح
من غير ضريح
دارت من العهر الصريح
حلقات قمار تحت النخل
والخيل مجهزة للسباق
آخر النهار فوق السهل
لما الجدل يبقى الدجل
والأيدلوجيا هي البوليس كتال كتل
ليش البلاد ما تستباح
يوماتي كل ما الليل دخل
إشمعنا يا شوقنا الرحل
إشمعنا يا شوقنا الرحل
لو صدقت زرقة غناك
والبت نصيرة سنة محل
بنت الدهب بنيانا ما فات الركب
حزنت على الكيل الكرب
بعد الرجال سكنوا الترب
والدنيا غابة وسط حريق
تصبح كرب تنمسى ضيق
قامت نصيرة تحت تعب .. برت الفريق
يا أخواتي ستات البيوت
ناولني قوت قبال أموت
دور والمعاي ما فكو ريق
طبق الدهب بي مد دقيق
دهب الجبال صافي البريق
بي مد دقيق لو كان مريق
مطفية نيران التكل ... رغم الدخان
والحلة زي المافي زول ... رغم البطان
عين الشمس زي التقول
مدشوشة أو محمرة من حرقة غضب
والليل دخل كبت الفريق
قنعت نصيرة من البلد
قنعت نصيرة من الدقيق
كشحت على كوشة الدهب
وجات راجعة بي نفس الطريق
لا رحمة غير الموت قبل
لمت عيالا على عجل
أنشهدت واستغفروا
وقفلت على روحا الجبل
كانت نصيرة بتفتكر
جوف الجبال أولابا من عيشة الوبال
أولابا من جرس الرجال
ساعة يصيب الحال خلل
حميد
| |
|
|
|
|
|
|
|
|
|
Re: يا الله أخلقنا (Re: عبدالحفيظ ابوسن)
|
وافسدت اخلاق الناس
القرارات الاخيرة بخصوص النقد خلقت تجارة قذرة جديدة
البنوك مافيها نقد . ويتم صرف مبالغ بسيطة
في ناس قاعدين في البنوك بي كاشهم .. لو جيت تصرف مبلغ كبير . البنك برفض ليك هو بصرفك المبلغ الدايرو لكن تدفع زيادة . مثلا داير تصرف مية مليون .. بديك مية مليون لكن تحول ليهو من حسابك في حسابو اكتر من مية مليون وهكذا
| |
|
|
|
|
|
|
|
|
|
Re: يا الله أخلقنا (Re: عبدالحفيظ ابوسن)
|
دخل الصيف
قش المكيف بي 400ج وكان 100 ج
قلت لمحدثي
يعني المكيفات حترجع لموقعها الطبقي للاثرياء
قال لي
داير شوال خيش اعملها بدل القش
لو ما نجحت بوقفو
اهو الناس بتتصرف بقدر الامكان
| |
|
|
|
|
|
|
| |
عبدالحفيظ ابوسن
جلالدونا
Abdullah Idrees
محمد حيدر المشرف
Osman Awoda
يحي قباني
Nasser Amin
فيس بوك
تويتر
انستقرام
يوتيوب
بنتيريست