وداعاً عاطف ديدى

Quote: فى ذمة الله..الاخ الحبيب عاطف ديدي..زميلنا فى جامعة الجزيرة ..وايقونة جامعة الجزيرة وموحد خريجيها وكلمة السر فى كل فعالياتها واحداثها..صاحب الحضور الطاغى فى افراح واتراح ومناسبات الجميع دون فرز ...لا يتقاعس عن واجب ولا يغيب عن موجوع..انيس السمر عالى القامة كالقمر اللهم تقبله بقدر فضائل اعماله..فهو من الذين قال الرسول عنهم:ان لله رجالا اختصهم بقضاء حوائج الناس...حببهم الى الخير و حبب الخير اليهم..انهم الآمنون من عذاب يوم القيامة

Quote: له الرحمة والمغفرة وجبر الله كسركم وعظم اجركم اخى سيف

Quote: تاني قام واحد جميل في بلدنا مات وكان بغني.. للمساكين.. والمسولتين.. والحفات وكان بغني للمنافي والعصافير والرعات وكان بغني لي بلد.. في الحلم جاي اغنيات وكان بطمبر وكان بدوبي للحياة تاني قام واحد ملك.. رووح.. وفات وكان ملك في الريدة وانسان في الصفات وكان مهاجرفي دموع كل البكات وكان وتر مشدود ومسكون دندنات وكان عليهو سلام تقول ما زول حياة اللهم اتاك عبدك ديدي يحمل معه حب ومحبة خلقك فادخله يا ربي مع حبيبك المصطفى فى اعلى عليين .. واجعل البركة في ذريته الي يوم الدين انك ولي ذلك والقادر عليه

Quote: عارفه الناس نائمة بس انا مااا جايني نوم وكيف انام وباب من الخير كان يمشي علي الارض حجب عنا في ناس متذكرة قصة مدير القروب الاهدوه زملائه سيارة في يوم ما!! القصة التي ضج بها الواتس اب قبل اكثر من عام !! اليوم .. اليوم وبعد ان استطاع ان يجمع زملائه في اكثر من 50 قروب.. قروبات دفع، قروبات كليات وقروبات تخصصات .. ذهب عنهم نعم ذهب عنهم وترك السيارة التي اهدوها له... تركها واقفة أمام منزله تحكي قصة وفاءه للآخرين.. تركهم جميعا .. تركهم ولم يعطيهم اااي فرصة لرد حق جميل يستحقه.. لم يعطيهم فرصة لممارضته.. لزيارته في المستشفي.. حرم البعض حتي من تشييع جثمانه ذهب لوحده من دون ان يزعج أحد ولا يكبد احد مشقة... وصل إلي ربه اليوم وترك لهم قصة في الحلق وذكري ملائكية ... عاطف ديدي ندعو لك بالرحمة بل ندعو الي ما تركتهم خلفك من زملائك واسرتك وأصدقائك الذين ماذالو مغروضين فيك.. ربنا يتلطف بهم انا لله وانا اليه راجعون

Quote: فات الكان بدينا إحساس بالإلفه وكان راوينا، فات الباكي جرحنا وناسي جروحو ولافَى ورانا مدينه ……مدينه فات الصاحي ونحن نغط في النومة السابعة طالق حسو ولا حسينا حتحت فينا غناه الطاعم وفات قنعان من خيرا فينا سلا مات يا زول يا رائع سلا مات عوافي ! يا خلاصة الخير الفي الناس وترياق الزمن المتعافي سلا مات يا زول يا رائع سلامات عوافي ربنا يرحمك حبيب الكل أخو الاخوان عاطف عثمان

Quote: سمقت قامتك فوق النخل جودا و أينعت ثمارك للجار و البعيدا رمت الخير من مجامعه صدقا عند الخطوب باديا للرأى سديدا حنوت على الكل بعطفك دافعا جور الأيام للأرحام مريدا أناخت اللأواء عليك بكلكلها حبا من عالم النجوى لعبده المريدا ترجلت عن صهوتك مبتسما ترجو ثوابك من رب البيت سعيدا ( أحمد عوض الكريم ) ما أقسى الرحيل و ما أعظم الفاجعة .. نسأل الله أن يتغمدك بواسع رحمته أخى عاطف عثمان( ١٠/ تكنو) ، فقد كنت نبراسا يضئ لنا ظلمة الأيام .. عنوانا لجامعة الجزيرة و التى و إن ضنت عليك بشهادتها الأكاديمية، فقد أعطيتها من الحب و التواصل ما عجز الجميع عن إبلاغه .. إن القلب ليحزن و إن العين لتدمع و إنا لفراقك يا عاطف لمحزونون و لا نقول إلا ما يرضى الرب .. إنا لله وإنا إليه راجعون ..

Quote: الله يرحمك ويتقبلك الاخو عاطف ديدي Atif Osman الليلة وينك يا الاخو اصبحت وين قولي مشيت تاهت حروف وصف الفقد ماعرفت اقول انا ياتو بيت مر الفراق ياصاحبي حار من بعدِ مافتَّ ومشيت وين تاني نلقاك يا الاخو في ايِّ دار في ايِّ بيت رحل البيفقد كل زول وبحل مشاكلو في الخفا رحل الاخو الكان مثال للالفة والحب والوفا رحل الصديق الماعرف في الدنيا قسوة او جفا رحل الحبيب الما اشتكى من شيل همومنا وقال كفى رحل الجمعنا بالسنين وقربنا في كل الظروف رحل السكن جوة القلوب دايما حنين دايما عطوف رحل النقي رحل العفيف رحل الاديب رحل الولوف مفقود وحاتك بالكتير ويبكوك حبايبك بالالوف برسل عزاي لكلْ اخو اصبح حزين وملان جروح برسل عزاي لكل اخت بالدمعة تبكي عليك تنوح وبعزي خلق الكون جميع حتى الجماد والفيهو روح وبعزي نفسي يا الاخو واصلو العمرة مدة وبِروح اسكن ياصاحبي في الخلود في رحمة الرب في امان هو البكفلك ويتقبلك ياديدي في اعلى الجنان ونحن بنعيش ذاكراك زاد مش ماضي زي ما كان وكان ودعانا ابدا مابيقيف بالرحمة ليك في كل زمان اخوك/ سعدالبنا 6/1/2018

Quote: صباحنا اليوم مختلف اصبحت يا عاطف في دنيا الخلود،،،، نور الصباح زايد خفوت شمس السبت مابيه الطلوع الدمعه حاره ما الزول عزيز مشيت صفحتك عشان القاك ،،واملي اشوف ،، ديدي يكتب،،، لكن ما لقيت ما هان علي ما القاك كتبت انا ورسلت ليك ،، احسن الله عزانا ،، فيك ردك عارفاه بكون ابقوا عشره على العقاب،، نوعدك ،،ان شا الله البديتو نكملو وعثمان وراك ما نهملو ،،،،،سهير جمعه جابر(بت جمعه كما كان يحلو لك)