هل لي أن أحلم...

Quote: الكلام دخل الحوش ... موكب امدرمان يوم ٩ بالمختصر المفيد الموكب دا لازم يكون الاكبر والاجمل والاطول ناس امدر ما مفترض نوصيكم يعني ثم نحن في امدر ناس بهجه وسرور وطرب ينفع موكبنا يكون بدون دلوكه وطبله وزنق وزغاريد !؟ عارف لا يجوز بالمختصر الموكب دا يكوون زي زنقاتنا حقت المسرح القومي وصولات نجيري والربع واسامة يعني اخر قيافه و لبس واغاني وكتمه اها من خط سير الموكب من صينية المهندسين بداية بالناس الزيت ناس الفتيحاب ( الفاتيكان ) اسياد الرصه والمنصه ناس ثنائي ابوسعد ونادي النجوم واحمد هاشم والطلائع وميدان الحمري ناس الجزر اهل الساس والرأس مرورا بي المهندسين نفسها وناس بانت شرق وغرب يعني الراستات وشفوت الاربعين معانا ناس ابوكدوك و وحي الضباط والهاشماب والعباسية والمورداب تجونا من هناك زحفا بالاقدام والاعلام ونفتح القلوب قبل البيوت للضيوف ومعروف اصلا امدر يعني الكرم والثبات والتاريخ.. باقي الناس كلنا امبدات الظابطه والثورجية الاصليين والعرضة والدوحه اصل الطرب ناس دار السلامات والاسكان والملازمين و ود رو و ودنوباوي و حي مكي والشهداء ناس المسالمة و حي العرب والارساليه و كل سكان امدرمان ح تجو المهندسين ومن هناك البرلمان امدر بتعيد التاريخ علي ايقاعات دار فلاح و هتاف الثوار بالنسبه لناس الخرطوم وبحري يعني تعالونا بدري من زمان منتظرين فرصتنا وتجونا هنا و تشوفو ناس امدر كيف رد واجب الثورة لينا زمن بنقطع كباري ونجيكم المرة دي تعالوا اخدو نفحات امدرمانية خليكم كتار وتعالوا كتار شديد إيد علي إيد تجدع بعيد الاهم يا جماعة الناس تكثف الاعلان للموكب وتعمل عليهو جدا انشروا الاعلان يوم باكر دا الفيس كلو موكب امدر موكب امدرمان دا بعد دا عندنا موضوع شخصي للدين يعني #قفل_واحتفل #نتقابل في الشارع

Quote: دقيقتين من وقتكم بس عشان تعرفوا احنا منو حصل طلعتو مظاهرة بت اتحرشو بيها هناك !! مش ياهم البنات الصعاليق و الاولاد الشماسة هل في بت لما كانت ماشة في نص الاولاد كانت خايفة!! هل في بت علقو على بنطلونا!! وين ناس فلفل اسود و دبوس و بتاع عارفنهم اختفو وين!! اختفوا لانهم ما قدرو علينا ديل كانو ما عاوزننا نكون يد وحدة عاوزننا نخاف من بعض عاوزنا نشكك في نوايا بعض امبارح البت المنقبة جرت الولد من يده عشان الرصاص دي الكانو بقولو عليها معقدة و امبارح الولد جرا قدام الكجر عشان يبعدهم من المحل الإدسو فيهو البنات دا الكانو بقولو عليهو صعلوق مفلفل شعرو و حايم في الجبنات شفتو براكم الحصل شنو صح شفتو لما البت حاصروها طلعت فوق ضهر ولد لا حصل شافا لا بعرفا شفتو الخوف الفينا على بعض و شفتو لما الولد ضربو رصاص في بري اول من جرا عليهو بت حمتو بضهرا عرضت حياتا للخطر عشان خاطره عشان تعرفوا اننا سند لبعض عارفين ليه كل شيء اتغير عشان دا معدنا الاصيل عشان احنا جيل هم ما قادرين يفهمونا حاولو يهزمونا معنويا قبل اي شيء حاولو يصورو البنات في نظرنا ما كويسات و في نظر البنات ان الشباب هم ذئاب بشرية لكن في اول موقف حقيقي طلعت الحقيقة و هم لسى بحاولو يكسرو الفينا كل يوم بجونا بليل يا ولدي مالك و مال المظاهرات.. !! يا ولدي مالك و مال الموت انت ود صغير!! يا ولدي عاين لنفسك و لقرايتك.. !! يا ولدي عاين لامك التعبانة دي..!! كل يوم كلنا كدا بنرجع البيت بنسمع الكلام دا و تاني يوم بنطلع اقوى من اليوم قد يكون سهوا منهم ما بقصد..!! لكن هم ما فاهمين الجوانا بالجد 😞 بنطلع المظاهرات ما عشان نفسنا و الله و اغلبنا ما فارق معاهو بس برضو بنطلع عشان ما قعد نعاين لنفسنا بأنانية زي ماهم انانيين بنعاين لمجتمع كامل من شافع في دارفور ما لاقي يتعلم لابو في الشمالية ما لاقي اكل لولده لام في الشرق ماتت عشان ما لاقية علاج و اكبر هاجس في حياتم احنا كسرناهو في راسم عارفين هو هاجس شنو هاجس العنصرية البغيضة عشان نقول ليكم احنا جيل سليم نفسيا احكي ليكم قصة صغيرة كانت من داخل المعتقل لما اعتقلونا في الاحداث دي كان في واحد قبضو معانا من جامعتنا ما بنعرف بعض و لا حصل اتقابلنا مع بعض الا في المعتقل الود دا كان بيتم ضربو بطريقة وحشية جدا و مرضم النفسي مخول ليهم انو منتمي لجهة معينة الولد كان رافض اي تصريحات و ساكت و برضو كان بتعذب كلنا كان الخوف فينا رغم اننا ما ضقنا ربع الضاقو قاعد جمبي واحد قال لي اسمع احنا نحاول نفك الزول دا بس ما كان في طريقة م لقينا حل غير انه نستفز الضابط عشان يدقنا معاهو حبة مسافة ماهو يرتاح و الله عملنا كدا نزل فينا ضرب و خلى الزول دا لحد بليل قاعدين نتونس و وشوشنا مورمة و اي زول بضحك في التاني حتى الوجع اتقاسمناهو عشان احنا واحد عشان كدا مرقنا نزيل الافكار قبل الناس نرجع لموضوعنا عارفين ليه بقولو لينا حيقتلوكم.. !! عشان هم ما فاهمننا انو احنا على استعداد نحمي بعض بصدورنا بالرصاص عشان كدا اي زول فينا ضربو برصاص او قطعوا يدو او عذبوهو في معتقلاتهم اول كلمة بقولا تسقط بس و متأكد انو الشهيد لو رجع بس ثواني للدنيا حيقول تسقط بس هم محتارين ليه نحنا ما عاوزين نكون زيهم رافضين للعنصرية رافضين للخوف رافضين للحياة كلنا عاوزين نموت لو في سبيل يعيش واحد بس فينا معزز مكرم في وطنه حاولو كمان يفتحو جامعات و يوقفو جامعات يوم يومين و الناس ترجع زي ما كانت و ردنا كان واضح صريح انو ما حنقرا و ما حنتعلم مالم يسقط هذا النظام و انا خريج سنة خامسة و مستعد اقعد تاني عشرة سنة قدام في الجامعة مالم نرد حق اخوانا الشهداء.. و يقول ليك اقرا.. كيف اقرا و انا اخوي و اختي دمهم لسى ما نشف.. عرفتو ليه هم محتارين فينا!! لانو هم اي زول بفكر في نفسه بس نحنا شايلين هم بعض لانو نحنا عندنا انسانية بس هم ما عندهم عشان كدا حيحاولو كمان يفرزونا من بعض دا شيوعي دا لبرالي دا متحرر دا سلفي دا بتاع الليلة كلنا كدا قررنا نسقطكم و واثقين في بعضنا اكتر منكم بغض النظر عن افكاركم السخيفة و الباهتة لا مصدقين ناس الجهاد و حرب الجنوب و الله و الرسول لانو الله و الرسول معانا في ثورتنا و لا مصدقين ناس علمانية و لبرالية لانو نحنا م كدا عشان كدا في اول اختبار حقيقي ابناء الإسلامين انسلخو من احزابهم و ابناء اليسار انسلخو من احزابهم و انضموا للشارع عشان ما هاين عليهم يشوف ابناء جيلهم بموتو و في نفس الوقت يخرفو ليهم في راسم صدقونا في 30 يوم و كذبو الاتربو على يدهم 30 سنة الناس دي خرافات عاشوها قبل 90 سنة عاوزننا نعيشا زيهم عشان عاشو هم خايفين عاوزننا نعيش زيهم عشان هم ما قدرو يحققو ربع امنياتم فاكرين اننا حنقتلا زيهم ما عارفين النبض الفي قلوبنا مع كل ضربة بقول حرية سلام حرية عارفين ديل منو هم ديل البقيفو في الشارع بدقونهم و يعاينو ليكم البشوفو اخواتكم بعتقلوهم و هم مكتفين يدينم الناس الما بتحل و لا بتربط بتنظر بس و بنتقد و بتدمر في جيلنا بس دي شغلتم ديل القاعدين ايام صف العيش ينقو لينا في راسنا و الله نحنا عشنا و عشنا و عشنا و ال90 رغيفة بي ربع قرش ما لقينا حكومة زي دي و لا لقينا جيل زي دا و لمن بقى الجد و ظهر الموت مرق ليهو شافع عمره 1ق سنة و ادسى منو عمك ابو 70 سنة عشان كدا لما تشوفهم ما تركزو معاهم في الشارع خلوهم في الوهن الهم عايشين فيهو ما تتأثروا انو هم ما طلعو معاكم اصلا م منهم رجا دا ما الشعب الحقيقي ديل اشباه الشعب احنا الحنكتب التاريخ و هم حيعيشو في خيرنا الشعب الحقيقي نحنا الطلعنا نموت عشان يعيش غيرنا الابينا نقرا عشان دم اخوانا احنا جيل الود المفلفل شعرو واقف صدرو قدام السلاح وراهو البت قليلة الادب الفاكة الطرحة ماسكة المايك بتردد حرية سلام حرية حرية سلام حرية حرية سلام حرية منقول ... #مدنالسودانتنتفض