فوكوشيما

Quote: سنة 1987 وقف قندران برة المدرسة الداخلية الكنت بقرأ فيها، وزعوا لينا بسكويت مكتوب عليهو من برة بلغة ما مفهومة، عرفت فيما بعد إنها كانت تركية ويابانية وروسية، تلاتة أنواع من البسكويت، الياباني جوة كيس لامع فضي وخفييييف أظن ربع رطل وسكرو ناقص ذاتو وعلى العليهو البسكويتة مشتتين فوقها ملح بلوري حبتو كبيرة، كنا بنمسك بسكويتين نحكهم مع بعض نظام الصنفرة الواحدة تكرش ملح أختها وبعدين ناكلهم الاتنين، التركي كان معقول وريحتو حلوة وكل اتنين ملصقات مع بعض بعجينة السكر (بسكويت محشي بكلام الليلة، أظن). البسكويت الروسي كان عجيب، أي واحد من الطلبة كان بياخد باكو كل يومين، الباكو فيهو أربعة سبايط طوال، كل سبيطة فيها تلاتين حبة مرصوصات زي الذخيرة في شريط الدوشكا، كان الواحد فينا بيقوم بالسبيطة كاملة بكباية شاي واحدة، بمعدل سبيطتين في اليوم، بقينا سمان، القندران كان بجي كل أسبوع لفترة أظنها كانت شهرين. أها، سنة 2001 اتنورت وعرفت من الانترنت إنو كان زمان في مفاعل انفجر في حتة اسمها شيرنوبل في الاتحاد السوفيتي، ومن ديك بعدها بشهور كل الدول في مسار السحابة النووية اتخلصت من الأغذية المخزونة، ودوها وين أنا ما عارف، ليوم الليلة، الله أعلم، لأنو قالوا السكان الواعيين خافوا ورفضوا يشتروا من المحلات فاضطرت حكوماتهم لإصدار تعميمات بالتخلص من أي منتجات في الفترة ديك. مع أني هرست زي 40 كيلو بسكويت في شهرين، تراني أنا كويس (so far so good) وأحمد الله لا شعيت ولا بقيت شيوعي إلا شيبت قبال يومي، قاتل الله النيوترونات. أها أنا دربي مرق، نصيييييح غايتو، لكن شوفوا باقي الناس، لأنو وقتنا الطلبة داك كنا سامعين تحت تحت إنو القندرانات كانت شاحنة لحوم معلبة وفواكه مجففة وحاجات تانية بياكلوها ما سمعنا بيها، التغذية الجيدة الممتازة دي حالتنا كنا طلبة في الأقاليم، انتوا شوفوا الطيبات التانية اتوزعت وين. ______ غايتو في أساتذة من ديك السنة تاني ما سمعت بيهم. Re: مشروع الخارطة الإشعاعية للسودان ..Re: مشروع الخارطة الإشعاعية للسودان ..