على وين تقبل وين تمش من ضلك الباراك كيفن عاد تفوت وعين الشمس مبحلقه فى الضلام الدس جهرات البيوت و نهارك الطار من امس الكان قريب حارسك وقاعد فى ضراك ترا ياهو داك فوق شدر العتمه راك و نيلك مصهين لا نضم لا وصى موجات الكلام حلف بى طينو ما يطراك
فيا شيمة الدمع البحر امسكى غرق الروح عليك ما تحرشى
على وين تقبل وين تمش والبِنيه النيّه الواقفه داب ورده ما بين مسامك والشغاف وقيزان الهموم الويحيده القاعده منفرده بضاريك بى توب الحنان من زيفة الشوق و السموم البنيه المارقه من تالا الجنان حيث لا زول بشتكى ولا زول بخاف
تعالى يا طعم الزمان امرقى وشيلى فانوس الأمان كوسى المودر فتشى
على وين تقبل وين تمش وحلمك مكتف مرمى فى قعر السهر ليلك مستف بى غيابك و السفر دربك مرسف بى حجار الهم و بالحيل الفتر
المسافات صاره وشها فى رجاك والشوق كسيح غالبو المشى
ومن العِمير ما باقى شى
على وين تقبل وين تمش وجعك شديد فرحك بعيد ما بتهبش
همك عنيد عامِت نواحى الروح لا داير يزح لا داير يروح لا بنكسف لا بختشى
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
فيس بوك
تويتر
انستقرام
يوتيوب
بنتيريست