المثل يقول: ياكاتل الروح وين تروح! كرما الصالح العام او قانون المعاوضة بدأ يشتغل لصالح كل مظلوم!! طول الزمن لايؤثر علي ذاكرة الكرما فهو أبدا لاينسي ولايغفل!
ضربة، أولي، موجعة، تلقاها النظام من بعض المعينين الرافضين لمناصب بالدولة! سيدي الرئيس عمر البشير،إنت حاكم البلد لما يقارب ال30 سنة وماشاء الله عندك قدر كافي من التعليم والخبرات البتخليك تدير السودان بصورة إحترافية، نشهد لك بكفااات عالية، وفي كل المجالات، حتي كفاءتك في الرقيص، ياريس لو تذكر، قريب دا، الرياضي ميسي ذات نفسو أهداك قميصو ودا من شدة إعجابو بيك وبي رقيصك بتاع الصقارية، وبرضو جامعة أديس أبابا قامت بتكريمك لما إختارتك رمزا للكرامة الأفريقية African Dignity لعام 2016 ألبستك سترة الكرامة مع إنك لابسها لكن عريان لط!.
ف يا سعادة الرئيس لو بمؤهلاتك العلمية مامثلك ولد، ولو بخبراتك تب ماك ساهل، إنت زول جدير بكل ما تعنية كلمة جدارة من مفاهيم
في السنوات الماضية وإنت في قمة مشغولياتك جازفت حتي حضرت درجة الماجستير، بفصل الله وبفضل البروف عوض إبراهيم عوض!! دا، ناهيك من الأوسمة والنياشين الماليا صدرك وكتفيك وهي بتلالي وبتراري من بعيد، ما في ود مقنعة أنسب منك ليرأس هذا الوطن التعيس، لأن الوطن أنت وإنت الوطن، وعليه، مافي زول أمين ومخلص زيك عشان ما يقدر يشغل منصب وزير المالية! فمالك ومال الود الإسمو حمدوك، دا زول كل قرايتو وخبراتو مافايته ليها سنوات تعدها بأصابع اليد الواحدة، أما بالمقابل ياسعادة الريس، إنت مما تخرجت من الكلية الحربية(عرين الأسود) ماخليت حتة بالسودان ما إشتغلت فيها: خدمت بالقيادة الجنوبية، بالقيادة الغربية، بالقيادة الشرقية، ووادي سيدنا والأوسط وخدمت خارج الوطن، بالشرق الأوسط وعندكم خبرات واسعة مع سلاح الجوء الإسرائيلي(منظومة الدفاع بالنظر) والآن لكم خبرات "ثرة"بعاصفة الحزم بالذات المناورات العسكرية الكانت بمروي ولديكم محاولات مقدرة لعقد شراكات حماية مع الرئيس فلادمير بوتن(نسمع تحت تحت رفضت).. دا كووولو خليهو جانب، فقط تكفيك فترة حكمك للسودان، عندك 30 سنة بترأسو، صحيح كنت محاصر وكانت تحركاتك خارج الوطن محدودة ومرصودة من قبل أعداء الوطن والدين، لكن رغم كدا قاعد تخاتل وتجاسف في الأسرة الدولية فزرت جنوب أفريقيا وتخارجت من عصابة الICC بإعجوبة بالغة، بنظرية(المال تلتو ولا كتلتو). لما نقول انت رئيس للسودان بنعني، أنك زلمة عنيد(راسك قوي) ولديك خبرة واسعة في إبادة النصاري بالجنوب وإبادة أهلك الغرابة الحاقدين وناس النيل الأزرق وجبال النوبة بتاعين الكجور!
زول مثلك بتلك المواصفات ممكن يدير العالم كله مش يدير السودان وبس! إدارة السودان بالنسبالك Piece of cake صدقني بإمكانك إدارة البلد بدون وزراء ومستشارين. ودا الحاصل بالضبط، لانك ياسعادتو كدا كدا مسير البلد براك فمالك ومال القراية أم دق! سيدي الرئيس يجب ان تعمل بالمثل البيقول:
الجاب لو دبيب لازم يلفحها برقبتو! فإنت يا سعادتو متخصص في تدقيس الشعب كم مره وعدته بجنة عدن ولم يجدها، لما أمريكا زالت منكم العقوبات! ثم مره اخري وعدته برفاهية وبحبوحة في ظل حكومة الوفاق الوطني ولكن الشعب السوداني شقي في عضمو كلما تخطط ليهو، التخطيط بتاعك يفشل لأن الشعب شقي وعوده ناشف!
أنسب شخص يشغل المالية وكل الوزارات هو إنت ياسعادة الرئيس! لأنك الكل في كل! يبقي، أعقلها وتوكل، ثم سير، سير يا البشير!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Mohamed Adam
فيس بوك
تويتر
انستقرام
يوتيوب
بنتيريست