السلام عليكم ورحمه الله و بركاته.... العمود الفقري للوتري الشهادة الثانوية نجاح....و شهادة الخبرة البتثبت أنك شغال و ما زلت..و أنك إنسان مثمر و منتج (productive) و ستكون إضافة و ليس عالة علي الحكومة الأمريكية...
طيب أول ماعرفت انك فائز اهم حاجة حاتعملها انك 🔥 تحتفظ بالكونفرميشن نمبر العرفت بيهو النتيجة وما تضيعو لانو دا الحاتعرف بيو تاريخ مقابلتك 🔥تطبع خطاب الفوز وتحتفظ بيو سواءا احتفظت بيهو كنسخة مطبوعة او كنسخة pdf على جهاز الكمبيوتر او الموبايل خطاب الفوز العرفت بيو النتيجة دا بسموهو الخطاب الاول (1NL) والخطاب دا بتلقى فيو الكيس نمبر بتاعك الكيس نمبر بتلقاو بالطريقة دى 2019AF00020250 * 2019 دى بترمز لسنة اللوترى * رمز AF اختصار لافريقيا او القارة الاتولد فيها المقدم،، فاذا كنت مولود فى قارة اسيا الرمز بجيك بى AS ،، واذا كنت مولود فى قارة اوروبا بجيك بى EU * 20250 دا رقم الكيس بتاعك وعلى اساسو بتتحدد ليك المقابلة * الكيس نمبر دا بتحفظو زى اسمك واحد
♨بوست رقم ٢♨
💢المتطلبات💢
المتطلبات نوعين.. فى اشياء حاتعملها قبل ما تتحدد ليك المقابلة وفى اشياء حاتعملها بعد ما تتحدد ليك المقابلة
♦المتطلبات قبل تحديد المقابلة♦ الفيش و شهادة الميلاد الأصلية و صورة من جواز سفرك و شهادة تبين موقفك من التجنيد دي بتترسل لناس كنتاكي بعد تعبئة الDS260 بالايميل التالي: Kccdvdocuments@ state.gov
🔥اول حاجة حاتعملها حاتطلع شهادة ميلاد الكترونية (مطلوب مهم) - ما حنقدر نقول انو شهاده التسنين ما مقبولة ولكن تم إيقاف إستخراجها من قبل الدولة وتم إعتماد شهادة الميلاد الإلكترونية فقط - شهادة الميلاد هى الاساس بتاع كل الورق ،، لانو شهادة الميلاد على اساسها بطلع ليك الرقم الوطنى ،والرقم الوطنى على اساسو بطلع ليك الجواز ،، ممكن تعدل فى الرقم الوطنى عادى اذا جبت ما يثبت واذا عدلت الرقم الوطنى ممكن تتطلع جواز جديد ببيانات الرقم الوطنى الجديد لكن صعب جدا انك تعدل شهادة الميلاد . احيانا ممكن تكون عندك شهادة ميلاد لكن ما مؤرشفة عندهم او عندهم بيانات مختلفة للشهادة العندك عشان كدا اول شى تطلع شهادة الميلاد الالكترونية عشان اذا فى اى اختلاف فى البيانات تقدر تتلافاهو من بدرى 🔥 ثانيا بتطلع الرقم الوطنى ليك ولكل افراد اسرتك ( الزوجة والاطفال) (مطلوب مهم) واذا عندك رقم وطنى عاوز تعدل بياناتو زى الحالة الاجتماعية او المهنة ممكن تعدل البيانات عادى لانو البيانات دى على اساسها بتطلع الجواز 🔥 ثالثا بتطلع الجواز ليك ولكل افراد اسرتك ( الزوجة والاطفال) (مطلوب مهم) 🔥 رابعا بتطلع الشهادة الثانوية ويجب إستخراجها بالعربي و بالانجليزى (مطلوب مهم للفائز الرئيسى ) 🔥خامسا اذا كنت متزوج حا تطلع قسيمة زواج الكترونية ، أما في حالات الطلاق حا تطلع قسيمة طلاق موثقة من المحكمة والخارجية 🔥 سادسا الافضل انو يكون عندك الشهادة الجامعية اذا قريت جامعة 🔥 سابعا ودى اهم نقطة بعد تستخرج الاوراق القلناها دى حا تبدا تملا فورم الدى اس (DS260 form) بناءا على المعلومات الفى الورق الاستخرجتو 🔥طبعا ممكن تملا الفورم بدون ما تستخرج الاوراق الذكرناها دى.. لكن اذا مليت الفورم وطلع فى خطا فى الاوراق حاتضطر تانى تعدل فى فورم الدى اس وعشان تعدل فى فورم الدى اس حا تحتاج ترسل لى ناس كنتاكى انو يفتحو ليك الفورم لانو بعد ترسل الفورم مابتقدر تعدل فى الفورم دا الا ناس كنتاكى يفتحو ليك عشان كدا اضمن شى انك تجهز الاوراق الذكرناها دى بعداك تبدا تملا الفورم بناءا على المستندات العندك. 🔥بعد مليت فورم الدى اس 260 تجى مرحلة الانتظار لحدى ما يحددو ليك مقابلتك .. وفى الفترة دى تبدا تلملم قروش الكشف الطبى والمقابلة ورسوم القرين كارد والتذاكر 😂😂
♦المتطلبات بعد تحديد المقابلة♦
طبعا اى واحد حا يقابل القنصل فى السفارة الامريكية والقنصل هو البديك الموافقة او الرفض للفيزا.. مواعيد المقابلة بتتحدد بناءا على رقم الكيس بتاعك. 🔥طيب اول ما اتحددت ليك المقابلة محتاجين منك ضامن فى امريكا.. الضامن دا لازم يكون عندو قرين كارد او جواز .. ولازم يكون بدفع الضرائب.. ولازم يكون دخلو السنوى بغطى عدد افراد اسرتو واسرة الفائز .. ولازم يكون ما بشيل معونات من الحكومة الأمريكية .. وفى اوراق برسلها ليك 🔥تانيا محتاج تعمل كشف طبى ليك ولزوجتك واطفالك.. والدكتور المعتمد عند السفارة د.خالد بمستشفى فضيل 🔥 تالتا حاتعمل فيش ليك ولزوجتك والأبناء فوق عمر ١٦ عام من السودان ومن كل دولة كنت مقيم فيها ، ما عدا الخروج النهائي لا يحتاج فيش 🔥رابعا مطلوب منك ٢ صورة فوتوغرافية بمواصفات معينة 🔥 خامسا فى رسوم المقابلة 330 دولار عن كل فرد وبتندفع فى السفارة يوم المقابلة بالدولار.
♨بوست رقم ٣♨
♦المتطلبات قبل تحديد المقابلة♦
💢 استخراج شهادة الميلاد 💢
اول حاجة زى ما قلنا حاتعملها حاتطلع شهادة ميلاد الكترونية.. طيب يعنى شنو الكترونية ؟؟ شهادة الميلاد زمان كانت البيانات فيها مكتوبة بخط الايد .. بدوك نسخة وبخلو عندهم نسخة فى الارشيف.. الان بقت شهادة الميلاد بعملو ادخال لبياناتها فى الكمبيوتر وبتجيك مطبوعة بالكمبيوتر
🔥تستخرج شهادة الميلاد للفائز و اذا كنت متزوج بتستخرجها برضو لزوجتك واطفالك 🔥احسن مكان السجل المدني بالمك نمر. كل محلية عندها مركز لسجل المواليد براه يعني مواليد الخرطوم السجل المدني المك نمر مواليد أم درمان عندهم سجلهم براهم بحري أيضا وده في حالة أنك عاوز تعمل إدخال للشهادة في الشبكة لأول مرة. بتمشي سجل الحته الانت مولود فيها اذا عملت إدخال للشبكة ممكن تطلعها من السجل المدني المك نمر المهم إدخال شهادة الميلاد في الشبكة عشان تستخرجها الاكترونية والكلام ده برضو ينطبق علي ناس الولايات وبرضو ناس الولايات عندهم مكتب في السجل المدني بالمك نمر يسمي مكتب الولايات للبحث.
🇺🇸 خطوات استبدال شهادة الميلاد بالكترونية 🇺🇸 ♨مطلوب صوره من الرقم الوطنى ♨ مطلوب شهادة الميلاد الاصلية ♨سحب الاورنيك من السجل المدنى ♨فحص الشهادة بالسجلات ♨ دفع الرسوم 127 ج ♨ لتصديق قى الصالة ♨ ادخال البيانات
بعد استخراج شهادة الميلاد بالعربي اتأكد أنو يوقع ويختم ليك الضابط التوقيعوا معتمد في الخارجية طبعا ما عاوزين نحدد شخص لانو ممكن ينقلوه بس اتأكد من الضابط التوقيعوا معتمد من الخارجية *بعد التوقيع بتشيل الشهادة توثقها في الخارجية * بعد التوثيق فى الخارجية بتصور الشهادة صورة ملونة وتمشي وحدة الترجمة والتعريب بجامعة الخرطوم تترجم شهادة الميلاد
♨بوست رقم ٤♨
♦المتطلبات قبل تحديد المقابلة♦
💢استخراج الرقم الوطنى 💢
🔥يتم استخراجو لكل فرد داخل المقابلة سواء فائز أو مضاف مستفيد يعني مملح 🔥استخراجه بالجنسيه ظنيته كدا..😊 و شهاده الميلاد. و شاهدين 🔥اذا عندك رقم وطني تصوروا صورة عادية وتمشي بيه الإدارة العامة للسجل المدني فى وزارة الداخلية أو مجمعات خدمات الجهور بتقول ليهم عاوز اوثق الرقم الوطني 🔥في الفحص اذا لقوا مستنداتك ما مكتملة ف الارشفة أو عندك مشكلة بقولوا ليك امشي أرشف الحاجة دي أو عدل الحاجة دي وارشفها لينا وتعال راجع طبعا الحاجات دي بتم في ألاماكن الطلعت منو الرقم الوطني 🔥طيب انتهينا من اعتماد الرقم الوطني في الإدارة العامة للسجل المدني طوالي نمشي الخارجية نوثق الرقم الوطني 🔥 بعد التوثيق تصوروا صورة ملونة و نمشي وحدة الترجمة والتعريب ف جامعة الخرطوم وتترجموا
♨بوست رقم ٥♨
♦المتطلبات قبل تحديد المقابلة♦
💢استخراج الجواز💢
🔥اول ما النتيجة تطلع اذا كان عندك جواز سفر قديم اتاكد انو تاريخ انتهائه ما اقل من سنتين لانو جواز السفر لمن تجى تقابل فى السفارة المفترض يكون باقى لى تاريخ انتهائو ٨ شهور اقل شى واذا ما عندك جواز حا تطلع واحد جديد ليك ولكل افراد اسرتك 🔥الجواز مدتو ٥ سنوات بطلع من مجمعات الجمهور 🔥حاول الاسم و مكان الميلاد يكون مطابق لي اسم الفوز 🔥طبعا بيانات الجواز بتطلع بناءا على بيانات الرقم الوطنى 🔥اذا اسره تطلع الجوازات لجميع افراد اسرتك الزوجه/ الزوج والاولاد 🔥عشان تطلع الجواز لازم يكون معاك رقم وطنى 🔥الجواز بقى ساهل جدا بتقدم ليو الليلة بكرة بتستلمو 🔥رسوم الجواز بتختلف للكبار وللاطفال
♨بوست رقم ٦♨
♦المتطلبات قبل تحديد المقابلة♦
💢استخراج الشهادة الثانوية 💢
🔥تطلب من الفائز الرئيسي فقط لكن يفضل استخراجها للمرافقين ايضا 🔥تستخرج من وزاره التربيه إدارة الامتحانات باللغه العربية و الانجليزيه. تتزكر عام الامتحان و لو بتقدر رقم الجلوس و المدرسه الامتحنته منها.. عندها متطلبات حسب عام الامتحان 🔥في ناس بطلبوا منهم بطاقه الخدمه أو إذن توثيق للشهادة الثانوية من الخدمة و في ناس بستخرجوها ليهم ساي 🔥الشهادات انواع في نوع بي صوره فوتغرافيه و نوع بدون صوره حسب العام الامتحنت فيه كلهم مقبولات اذا مستخرجه بطريقه سليمه.. من غير تزوير 🔥بالنسبة للمتحنين منازل يجب عليهم استخراج الشهادة السودانية مع وجود إسم المدرسة وعدم وجود إسم المدرسة يسبب اشكاليه في السفاره عشان كدا لازم تكون حريص على وجود اسم المدرسه 🇺🇸متطلبات شهادة الثانوى 🇺🇸 ♨صوره من الجواز لمطابقة الإسم باللغة الانجليزيه اوالرقم الوطنى ♨صورة فوتوغرافية ♨خلو طرف من الخدمة ♨الرسوم 31 ج ♨التوثيق الاستلام اليوم التالى والرسوم 16 ج محتاج فقط الشهادة الثانوية
🔥بعد تستلم الشهادة من أخر شباك بتوثقها في مكتب مدير امتحانات السودان وشباك التوثيق أول شباك طوالى بتسلمها ليهم وبتستلم الشهادة اليوم التانى موثقة 🔥 بعد دا تمش بيها الخارجية وتوثقها وطبعا ما بتحتاج تترجمها لانها بتطلع جاهزة بالانجليزى
♨بوست رقم ٧♨
♦المتطلبات قبل تحديد المقابلة♦
💢 قسيمة الزواج💢
🔥القسيمة البديك ليها الماذون ما بتتوثق فى الخارجية لكن بى قسيمتك دى بتطلع واحدة تانية من مول الواحة 🔥في الاول توثق القسيمه الاصل الاداك ليها الماذون في المحكمه التابع ليها الماذون 🔥بعد التوثيق تمشي مول الواحه لاستخراج النسخه العربيه والانجليزيه 🔥بعداك النسخة البدوك ليها تمش توثقها في الخارجيه. بتحتاج لي الجوازات عشان الاستخراج.
🇺🇸متطلبات توثيق قسيمة الزواج 🇺🇸 ♨اولا توثيق القسمة فى المحكمة المستخرج منها القسيمة لدى القاضى ♨تكتب عريضة فى البداية للقاضى وتعمل عليه دمغة بى 2 ج ♨القسيمة الاصل وصورة من القسيمة ♨ترفق العريضة وصورة القسيمة لمكتب المراقب ♨مقابلة القاضى والتصديق على العريضة ♨الذهاب للمستندات لفحص قسيمة الزواج بطلبو منك تنتظر نص ساعة او ساعة ♨دفع الرسوم 10 جنيه عن القسيمة الواحدة ♨الرجوع لمكتب المراقب مرة اخرى ويتم اخذ الاوراق عن طريق حاجب المحكمة ♨ الرجوع للقاضى مرة اخرى عن طريق حاجب المحكمة للتوقيع على الوثيقة ♨و أخيرا ختم الوثيقة من مكتب الختم ♨الذهاب الى مول الواحة الناحية الشرقية ادارة التوثيقات لاستخراج وثيقة زواج مطبوعة والمطلوب ♨ جوازات السفر للزوج والزوجة ♨وثيقة الزواج المصدق عليها من المحكمة ♨الرسوم لنسخة العربى و لنسخة الانجليزى الاتنين ♨ بعداك تشيل القسيمة توديها الخارجية توثقها ♨ طبعا ما بتحتاج تترجمها لانها بتطلع جاهزة بالانجليزى
♨بوست رقم ٨ ♨
♦المتطلبات قبل تحديد المقابلة♦
💢الخدمه الوطنيه ( خلو الطرف او افادة الحصر)💢
🔥تستخرج للفائز الزوج / الزوجه و الابناء اذا امتحنوا شهاده واقل من 21 عام.
لاستخراج افاده الخدمه:
🎈اما ان تكون مقضي الخدمه و عندك خلوطرف 🎈
🔥بتشيل خلو الطرف مغلف كما هو كما هو كما هو ما تفك التغليف ما تفك التغليف ما تفك التغليف وتصوروا صورة ملونة 🔥تترجموا في جامعه الخرطوم وحدة الترجمة والتعريب 🔥بعد استلام الترجمة .. بتمشي مكتب اللواء مدير المنسقية في شارع 61 بالمنسقيه يمضي و يختم علي الترجمه و تكون شايل الاصل معاك . 🇺🇸 لتوثيق خلو الطرف 🇺🇸 ♨مطلوب صورة من الرقم الوطنى او البطاقة القومية ♨صورة من خلو الطرف+ الاصل ♨صورة من الترجمة +الاصل ♨استخراج افادة حاسوب من كاونتر بمنسقية 61 ♨ التصديق عند ضباط الشعبة للذهاب للارشيف ♨ الذهاب للارشيف والتاكد من وجود خلو الطرف بالارشيف ♨ الذهاب الى رئيس شعبة التجنيد للتصديق للذهاب للمدير ♨اخيرا التوقيع والختم من مدير منسقية الخدمة الوطنية 🔥تشيل الترجمه و توثقها فى الخارجية
🎈اذا ما مقضي خدمه او بتقضي فيها 🎈 🔥تمشي منسقيه المغتربين بشارع محمد نجيب شرق المغتربين مكتب الشؤون الفنيه اسال من مكتب حسن موسي ضروري حسن موسي أو مساعدو جدووو 🔥لازم تتصنف في الاول اذا ما مصنف (أ ج د) 🔥التصنيف بشتغل يوم الاربعاء من كل اسبوع بدري 🔥بتقابل اللجنه الطبيه و بصنفوك 🔥بتشيل ورقه التصنيف و تقابل السكرتيره و تعمل ليك الافاده 🔥يكون معاك اثبات شخصيه والرقم الوطني و ورقه خطاب الفوز. 🔥بعد استلام الافاده الافضل توثقها ف الخارجية وتصورها صورة ملونة ثم تترجم بجامعه الخرطوم وحدة الترجمة والتعريب 🔥ترجع تاني لي ناس حسن موسي يوقع علي الترجمه و يختم فيها 🔥تمشي وزاره الخارجيه مرة اخري توثق الترجمه. 🔥اي توثيق لي ترجمه لازم شيل معاك الاصل بتاع المستند.
♨ بوست رقم ٩♨
♦المتطلبات قبل تحديد المقابلة♦
💢ملى form DS260💢
🔥بعد استخراج شهادات الميلاد و الجوازات و الشهادات الدراسيه تبدا في ملى الفورم DS260 و ارساله لجميع افراد الاسره 🔥رابط الفورم https://ceac.state.gov/IV/Login.aspx 🔥بعد تفتح الصفحة حا يطلب منك تدخل الكيس نمبر اللى هو حا يبدا بى 2019AF00012345 وبتضغط على continue 🔥حاتفتح معاك صفحة جديدة بطلب منك تدخل تاريخ الميلاد وبتكتبو .. والمستطيل البعدو بسالك I am وبديك ٣ خيارات .. بتختار applicant.. بعداك بتدخل الرموز الظاهرة عندك وبتضغط على continue 🔥 بتفتح معاك الصفحة.. بتلقى فيها جدول مكتوب فيها applicant information والجدول دا بتلقى فيو اسمك زى ما قدمت بيو ومكتوب قدامو principal applicant دا فى حالة كنت اعزب 🔥 اذا كنت متزوج حاتلقى اسم الفائز الرئيسى اول واحد مكتوب قدامو principal applicant سواءا اكان الفائز الزوج او الزوجة وتحتو طوالى المرافق الزوج/الزوجة ومكتوب قدامو accompany وتحت ليهم الاطفال برضو مكتوب accompany 🔥بالنسبة للاسر لازم تكون اساميكم كلها نازلة زى ما وضحنا ودا معناها اى واحد فيكم اتعمل ليهو فورم ولازم تملا فورمات اى واحد فيكم وترسلها ❌فى حالة انو لقيتو واحدة من الاسامى ماف دا معناها انك فى التقديم الاول ما اضفتو ودى رفض طوالى ❌ ❌مثلا اذا كنت متزوج لكن فى التقديم الاول كتبت انك اعزب فى الجدول حا يظهر اسمك فقط وفى الحالة دى اذا اضفت زوجتك او جبت سيرتها دى طوالى رفض تواصل على انك اعزب بس ولازم الرقم الوطنى يكون بى اعزب ❌ ❌اذا لقيت اسم واحد من الاطفال ماف دا معناها انك ما ذكرتو فى التقديم الاول ودى رفض طوالى برضو ❌ 🔥اذا تزوجت بعد الفوز بتضيف فورم عادى للزوجه/ الزوج .. بس بتضغط على add applicant . وبنزل اسم الزوج/ الزوجة فى الجدول،، بشرط انو الزواج دا كان بعد التقديم الاول 🔥اذا رزقت بمولود بعد الفوز بتضيف فورم للطفل برضو بتضغط على add applicant بنزل ليك اسمو فى الجدول بشرط انو الولادة كانت بعد التقديم الاول 🔥فى اخر عمود قدام اى اسم بتلقى مكتوب uncompleted ودا معناها انو الفورم لسة ما اترسل مجرد ما تكمل البيانات وترسل الفورم كل ماتفتح الصفحة دى بتلقى قدام الاسم فى اخر عمود مكتوب completed 🔥 اذا ما رسلت الفورم ممكن تعدل فى بياناتك زى ما داير مجرد ما ترسلو تانى ما بتقدر تعدل فى البيانات 🔥الفورم مليهو ساهل جدا وافضل شى انك تملاهو بنفسك وتشيل البيانات من الورق بتاعك واذا احتجت لاى مساعدة ممكن تتواصل مع اى واحد من الادمن او تصلو عديل وتملو الفورم سوا .. اهم شى ابعد من ناس المكاتب .. 🔥 بعد ترسل الفورم اتاكد انك استلمت الكونفرميشن نمبر ودى بتجيك اخر شى 🔥اهم شى لازم تتاكد انك رسلت الفورم بتاعك ورسلت فورم الزوجة والاطفال .. اى واحد لازم يكون عندو فورم خاص بيهو واى واحد فى النهاية بكون عندو كونفرميشن نمبر بتاعو
♨بوست رقم ١٠♨
💢النشرة Visa Bulletin 💢
🔥طيب بعد ملينا form DS260 ورسلناو بعد تجى مرحلة انتظار تحديد المقابلة 🔥المقابلة بتحدد اولا بناءا على رقم الكيس نمبر بتاعك كل ما الكيس نمبر بتاعك كان صغير كل ما حاتقابل بدرى .. والمقابلة بتتحدد برضو بناءا على تاريخ ارسال الفورم .. ❌طبعا اذا ما رسلت الفورم ما حاتتحدد ليك مقابلة ❌ 🔥اول مقابلة ليكم ناس ٢٠١٩ حاتكون ان شاء الله فى شهر اكتوبر ٢٠١٨ والمقابلات حاتستمر لمدة سنة كااااملة لحدى اخر مقابلة حاتكون فى سبتمبر ٢٠١٩ .. لحدى يوم ٣٠ سبتمبر الاخذ الفيزا اخدها والما اخدها ربنا يعوضو 🔥كل شهر بقابلو عدد معين من الناس العدد دا بحددوهو ناس كنتاكى ( كنتاكى ديل المسؤولين من موضوع اللوترى ومكانهم ولاية كنتاكى ) 🔥 ناس كنتاكى كل شهر بنزلو فى الموقع على النت حاجة اسمها (Visa Bulletin) ودى نشرة بتنزل كل شهر بتحدد ارقام الكيس نمبر المفترض يقابلو بعد شهرين لحدى كم 🔥يعنى اول نشرة بتطلع فى شهر اغسطس بتوضح لى ناس شهر اكتوير الارقام الحاتقابل لحدى كم.. وتانى نشرة بتطلع فى شهر ٩ عشان توضح لى الحايقابلو منو فى شهر ١١ ونشرة شهرة ١٠ حاتوضح لى ناس شهر ١٢ حايقابلو لحدى رقم كم وهكذا اخر نشرة حاتكون فى شهر ٧ حاتوضح ناس شهر ٩ حايقابلو لحدى كم .. 🔥دائما النشرة بتطلع من يوم ١٠-١٥ من كل شهر .. طبعا الناس بتكون منتظرة من يوم ١٠ عشان تشوف روحها حاتخش النشرة ولا لسة🧐🧐 وناس الارقام الكبيرة ينومو ساااااى 😁😁 🔥 دا الرابط بتاع النشرات https://travel.state.gov/…/leg…/visa-law0/visa-bulletin.html حاتلقى مكتوب Current Visa Bulletin ودى النشرة السابقة Upcoming Visa Bulletin ودى النشرة الجديدة بتضغط عليها وبتفتح معاك صفحة ... بتنزل لاخر جدول فى الصفحة بتلقى فيو كل قارة وقدامها الارقام المفترض تقابل
♨بوست رقم ١١♨
💢خطابات المقابلة (الخطاب الثانى 2NL) 💢
🔥طيب بعد النشرة طلعت اذا رقمك ما خش النشرة تنتظر النشرة البعدها واذا رقمك خش النشرة ،، بتنتظر خطاب المقابلة 🔥خطاب المقابلة دا بسموهو الخطاب الثانى او 2NL ودا الخطاب البتتحدد ليك فيو مواعيد مقابلتك يوم كم والساعة كم 🔥خطابات المقابلة بتترسل بعد النشرة تطلع خلال عشرة ايام لى اسبوعين 🔥بتجيك رسالة فى الايميل الكتبتو فى الدى اس .. الرسالة دى بتقوليك امش خش صفحة الفوز وما بتديك اى تفاصيل عن تاريخ مقابلتك متين 🔥اول ماعرفت روحك خشيت النشرة والخطابات بدت تترسل طوالى تمش تخش على الموقع العرفت منو نتيجة الفوز وبتدخل بياناتك زى الكانك داير تعرف نتيجة الفوز .. بعد تخش بدل يقولو ليك انك فزت بتلقى محددين ليك تاريخ مقابلتك متين والساعة كم .. طبعا بتدخل على الموقع www.dvlottery.state.gov/ESC وبتضغط على continue وبتدخل الكومفرميشن نمبر الادوك ليو فى التقديم الاول وبتدخل ال last name القدمت بيو وبتدخل تاريخ الميلاد القدمت بيو وبتدخل الرموز الظاهرة معاك وبتضغط على submit .. بتفتح معاك صفحة بتلقى فيها خطاب المقابلة (زى ما قلنا خطاب الفوز الفيو الكيس نمبر حايتمسح وحاتلقى خطاب المقابلة الفيو تاريخ مقابلتك) 🔥الخطاب دا طوالى تقوم تطبعو فى ورقة لانو مطلوب منك فى يوم المقابلة مع الورق
❌طيب فى حالة ضيعت رقم الكونفرميشن نمبر بتاع التقديم الاول حاتعمل شنو ؟❌ 🔥فى خيار تانى لكن لازم تكون عارف الايميل القدمت بيو فى التقديم الاول اللى هو انك بتخش على الموقع www.dvlottery.state.gov/ESC ويطلب من تدخل الكونفرميشن نمبر بتلقى خيار مكتوب forgot conformation number بتصغط على الخيار دا 🔥 بتفتح معاك صفحة بتختار سنة الفوز اللى هى 2019.. وبتدخل ال last name ,first name, middle name. زى ما قدمت بيهو واذا مامتذكر بتلقى الاسم فى الدى اس جاهز برة.. وبتدخل تاريخ الميلاد .. والايميل الكتبتو فى التقديم الاول .. وبتدخل الحروف الظاهرة معاك وبتضغط على submit بفتح معاك الخطاب طوالى ❌طيب اذا نسيت الايميل القدمت بيو والكونفرميشن نمبر بتاعك ضاع .. فى الحالة دى بترسل لى ناس كنتاكى رسالة بتطلب منهم يوروك تاريخ مقابلتك متين ..
♨بوست رقم ١٢♨
✅المتطلبات بعد تحديد مواعيد المقابلة ✅
💢💢ورق الضامن 💢 💢
♨Form i-134 ♨فورم الضرائب 1040 بيجيبو الضامن جاهز من الضرائب ♨ورقة W-2 فيها تفاصيل المرتب ودى الورقة البعمل بيها ضرائبو بكون فيها الدخل لو رسل ليك ورق الضرائب مكتمل هي جزء منه ♨صورة من القرين كارد او الجواز او الرخصة ♨ مقابلات شهر اربعة وخمسة تتطلب الضرائب الجديد اسمها ضرائب 2018 ♨كل المعلومات عن الضامن حتي لو مابعرفه شديد توجد في فورم I-134 والرجاء المحافظة علي سريه بيانات الضامن رد جميل للخدمة القدم ليك
اولا: فورم الضمان Form i-134 *وهو فورم مهم جدا وبه معلومات عن الضامن حساسه يرجي المحافظه عليه.و علي سريتها منها الدخل السنوي و رقم السوشال سكيورتي و عنوانه. *الفورم عشان يتملي لازم ترسل نسخه من الجواز لي الضامن بشيل منه الاسم و تاريخ الميلاد في الفورم بتعهد الضامن بانه يقدم ليك خدمات عند الوصل و دي حسب زوق الضامن مثلا السكن المعيشه الترحيل تزاكر سفر العلاج اي خدمه ممكن يتعهد بيها و بيها تديك موقف قوي في انك ما حتكون عاله علي الحكومه. *الضامن بكتب جميع افراد اسرته معاك المتكفل بيهم في حاله انه متزوج. وبكتب الدخل السنوي و معلومات عنه شخصيا و بكتب اسمك و اسماء جميع المرفقين ليك اذا كنت متزوج. *لازم في الاخر يوقع بي قلم اسود. *الفورم عنده طريقتين عشان تملاه يا اما بالحاسوب مباشره بعد تنزل الملف و بعد ذلك بطبعه و يوقع عليه .او يطبعه و يملا بخط اليد والطريقتين صحيحات. يرسل عبر الايميل بعد عمل اسكنر له. و تطبعه انت.
لازم دخل الضامن يغطى اقل دخل لو انت و الضامن بس تاني مافي زول يكون 20,575 دولار في العام اذا الضامن اسرة وانت اسرة بتحسب عدد افراد اسرتكم الكلى وبتشوف من الجدول التحت الدخل المطلوب كم ٢ شخص مطلوب ٢٠.٥٧٥ ٣ اشخاص مطلوب ٢٥.٩٧٥ ٤ اشخاص مطلوب ٣١.٣٧٥ ٥ اشخاص مطلوب ٣٦.٧٧٥ ٦ اشخاص مطلوب ٤٢.١٧٥ ٧ اشخاص مطلوب ٤٧.٥٧٥ ٨ اشخاص مطلوب ٥٢.٩٧٥ اى زيادة فى عدد الافراد بتضيف 5400 دولار في حاله عدم وجود ضامن ترفض تاشيرتك . دا لو مقابل في الخرطوم كل سفاره عندها متطلباتها.
ثانيا: ورق الضرائب اسمه الفورم 1040
بستخرج بعد دفع الضرائب الضرائب بتدفع في يناير الي ابريل من كل عام مثلا ناس 2019 البقابلو قبل ابريل يمكن ان يستخرج لهم ضرائب 2017 اذا مقابل بعد ابريل تستخرج ضرائب 2018 الفورم اكتر من 15 صفحه اطبع اول 3 او 2 من الصفحات.
ثالثا اثبات شخصيه للضامن ممكن جواز، بطاقه القرين كارد، وبدرجة أقل رخصه قياده رابعا فورم W-2 يطلب من بعض الناس و يستخرج عبر الضامن لتعزيز الدخل المكتوب بفورم الضمان 134 خامسا: خطاب عمل بالجهه التي يعمل بها الضامن موضح الفتره القضاها و دخله لتعزيز الدخل و مصدره و لكن لا يطلب ان وجد خير وبركه.
💢نصيحة عن الضامن💢 اى واحد ممكن يضمنك اذا كان 1-عندو قرين كارد او جواز 2-بدفع ضرائبو 3-دخلو بكفى 4- ما بياخد معونات اسال معارفك و اصدقائك افضل ليك .. لو في اي زول من معارفك بعرف زول هناك افضل ليك... دي افضل طريقه تجد بيها الضامن... لانهم بخافوا من زول لا انت بتعرفه ولا هو بعرفه تجي تقول لي عندي واحد ضمنه كيف.. ح يزوقوا منك بي حجج كتيره جربته اسال لي الناس القبالكم بس مافي زول دقه سدره .. عشان كدا المعرفه اول خطوه ... ممكن تفتش و تسال في المواقع السودانيه الكبيره لو زول ممكن يضمنك عسي ولعل تجد من يساعد... الضامن دا اهم كرت لازم تحافظ عليه يعني في نوع البترسل ليه ما برد عليك.. في النوع البقول ليك ضمنه حسي نفرين السنه دي... وفي النوع البقول ليك الدخل بتاعي حبه وفي النوع البقول ليك ما قاعد ادفع ضرائب.. وفي النوع البقول ليك برسل ليك الورق بس اصبر حبه كل ما تساله يتحرجر. و يتحرجر
عشان كدا لازم يكون عندك اسبير و ما تعتمد علي ضامن واحد و ما تاخر شديد ارسال ورق الضمان قريب لي المقابله بي يوم.. لازم قبل اسبوعين من مقابلتك يكون رسل ليك الورق.. افضل وقت للونسه مع الضامن ايام السبت والاحد عشان عطله. اهم شي تعرف معلومات عنه بالتفصيل و كل ما لقيت فرقه اتونس معاه و كات بقيت زول سفر شوف داير شنو و تحيب ليه معاك 😊 اعرف اسمه و شغال وين و سافر متين و اخر مره لاقيته وين و عرفته من وين و ساكن وين و اسرته كم و اساميهم منو المهم تصاحبه و يصاحبك كل ما تعرف اكتر عنه بفيدك في المقابله لانه كل الاسئله عن الضامن و البسيط حقتك.. واهم شي مكان سكنك او اقامتك لو سالوك منها في المقابله تكون مع الضامن او في نفس ولايه الضامن
لسه الوقت مناسب للبحث عن الضامن بس لازم تجتهد بالبحث عن المعارف القراب ليك اذا بعرفوا زول هناك
العنوان المكتوب في الفورم 260 حق استلام القرين كارد ما تشيلو ليه هم ممكن يتغير في المقابله عادي .. بس توضح انك داير تغير العنوان في المقابله لي عنوان الضامن.. بس اتاكد لو غير الضامن عنوانه في اي وقت قبل ما تستلم القرين كارد لازم تغير عنوان استلام القرين كارد للعنوان الجديد. ممكن يتغير العنوان في المقابله او في اول مطار تصله عند ضابط الهجره او من خلال موقع متابعه حاله القرين كارد بعد تصل .
ربنا يوفقكم في ايجاد الضامن و كتروا من الدعوات والصدقات
♨بوست رقم ١٣♨
✅المتطلبات بعد تحديد مواعيد المقابلة ✅
💢الكشف الطبي💢
🔥اول ما اتحددت ليك المقابلة طوالى بتحجز عن د. خالد بمستشفى فضيل ودا الدكتور المعتمد للسفارة . 🔥للحجز اتصل بالتلفون على الرقم +249 90 802 5110 🔥الكشف الطبي لجميع افراد الاسره. 🔥رسوم الكشف الطبى للشخص الكبير الف و 600 للاطفال 850 🔥تشيل معاك 6 صور فوتغرافيه لكل فرد 🔥خطاب المقابلة و عنوان بامريكا و عنوانك بالسودان 🔥الكشف في مستشفي فضيل الطابق السادس عند د.خالد بالمساء. 🔥لو عندك اطفال شيل كرت التطعيم واطلب منه ان يديك نسخه من التطعيمات باللغه الانجليزيه.
♨بوست رقم ١٤ ♨
✅المتطلبات بعد تحديد مواعيد المقابلة✅
💢 الفيش 💢 🔥يستخرج للزوج والزوجة ولكل للابناء فوق عمر ١٦ عام باللغه الانجليزيه 🔥يفضل استخراجه قبل اسبوعين من المواعيد 🔥الاستلام ممكن ف نفس اليوم اوبعد يوم بالظهر 🔥بعد الاستلام تأكد انو موقع ومختوم من ضابط ختموا معتمد في الخارجية عشان التوثيق 🔥يفضل الذهاب في الصباح الباكر و عموما الفيش بالانجليزي مافيه صفوف.. اذا في واسطه في نفس اليوم بتستلم. 🔥الحنه مشكله عشان البصمه في السفاره.. ممكن ترسم 😊
🇺🇸متطلبات الفيش 🇺🇸 ♨صوره من الجواز والرقم الوطني ♨خطاب المقابلة ♨صورتين فوتوغرافية ♨خطاب خلو طرف لو كنت موظف في وزاره الصحه ♨الرسوم في المجمعات 148ج
♨بوست رقم ١٥♨
✅المتطلبات بعد تحديد مواعيد المقابلة ✅
💢 2 صوره فوتغرافيه للتأشيره 💢
🔥مطلوب للمقابلة ٢ صورة فوتوغرافية بمواصفات معينة لازم تكون 5×5 🔥يفضل انها تكون من استديو خبرة ويفضل استديوهات منير الرماح صورتهم سمحه وأفضلهم فرع ش محمد نجيب مقاصد مقابر فاروق ... دي دعايه مجانيه.. 🔥الصوره لجميع افراد الاسره .. ممكن تتصور في استديو تاني و تشيل معاك صوره اسبير لو ما اتقبلت الاولي.
♨ بوست رقم ١٦♨
❤❤يوم المقابلة ❤❤
اول حاجة عندك الرسوم ثابتة 330 دولار بتندفع لكل فرد من افراد العائلة صغير او كبير
تانيا فى ورق مهم جدا لازم يكون معاك يوم المقابلة وبكون مرتب بى ترتيب معين .. الترتيب دا بطلبو منك ناس السفارة بعد تخش جوة ❤الاوراق المطلوبة فى السفارة بتكون حسب الترتيب التالى اولا اوراق الفائز الرئيسى ( الزوج/ الزوجة) ١- خطاب المقابلة ٢-الجواز + ٢ صورة فوتوغرافية وزى ماقلنا الصورة عندها مواصفات معينة ٣- الشهادة الثانوية اصل + الترجمة اذا كانت الشهادة الثانوية بالعربى + نسخة من الاصل+ نسخة من الترجمة ٤-شهادة الميلاد الاصل + الترجمة + نسخة من الاصل + نسخة من الترجمة ٥- الرقم الوطنى الاصل + الترجمة + نسخة من الاصل + نسخة من الترجمة ٦- القسيمة الاصل + الترجمة اذا كان الاصل بالعربى + نسخة من الاصل + نسخة من الترجمة ٧- خلو الطرف او افادة من الخدمة الوطنية الاصل + الترجمة + نسخة من الاصل + نسخة من الترجمة ٨- الفحص الطبى بتفصل الظرف الصغير وبتخليو عندك ٩- الفيش الاصل فقط من السودان ومن اى دولة كنت مقيم فيها ١٠- اوراق الضامن ( فورم I-134 + فورم الضرائب 1040 + صورة من اثبات هوية الضامن)
ثانيا اوراق المرافق الاول (الزوج/الزوجة)
١-الجواز + ٢ صورة فوتوغرافية وزى ماقلنا الصورة عندها مواصفات معينة ٢-شهادة الميلاد الاصل + الترجمة + نسخة من الاصل + نسخة من الترجمة ٣- الرقم الوطنى الاصل + الترجمة + نسخة من الاصل + نسخة من الترجمة ٤- القسيمة الاصل + الترجمة اذا كان الاصل بالعربى + نسخة من الاصل + نسخة من الترجمة ٥- خلو الطرف او افادة من الخدمة الوطنية الاصل + الترجمة + نسخة من الاصل + نسخة من الترجمة ٦- الفحص الطبى بتفصل الظرف الصغير وبتخليو عندك ٧- الفيش الاصل فقط من السودان ومن اى دولة كنت مقيم فيها
ثالثا اوراق المرافق الثانى ( الطفل)
١-الجواز + ٢ صورة فوتوغرافية وزى ماقلنا الصورة عندها مواصفات معينة ٢-شهادة الميلاد الاصل + الترجمة + نسخة من الاصل + نسخة من الترجمة ٣- الرقم الوطنى الاصل + الترجمة + نسخة من الاصل + نسخة من الترجمة ٤- خلو الطرف او افادة من الخدمة الوطنية الاصل + الترجمة + نسخة من الاصل + نسخة من الترجمة اذا كان الطفل عمرو اكبر من ١٨ عام ٥- الفحص الطبى بتفصل الظرف الصغير وبتخليو عندك ٦- الفيش الاصل فقط من السودان ومن اى دولة كنت مقيم فيها اذا كان الطفل عمرو اكبر من ١٦ عام
وهكذا بقية الابناء
♨بوست رقم ١٧♨
💢اسئلة المقابلة 💢
🎯استنتاج من خلال سابق المقابلات. ....
🎯طريقة الأسئلة التي لا تتعدى الخمس دقائق. ...
🎯الضامن. ...ببقي ليك شنو ....ساكن في اي ولاية ....متزوج ولا عازب .....اولادو كم .....شغال شنو ......سافر متي ......الطريقة السافر بيها ......هل شفتو قبل كدا ......آخر مرة شفتو متي ....من لحظة سافر رجع البلد .. نازل معاه ولا مع شخص آخر
🎯🎯مستواك التعليمي. . ...درست شنو ....في اي جامعة ....اتخرجت متي ...خلصت الخدمة ....لو عمرك اقل من 26 هل جاهز تقضي الخدمة لامريكا ....
🎯🎯🎯للمتزوجين ....اتزوجت متي ....صلة القرابة بينكم .....اتعرفتو وين .....هل متزوج من قبل ......متي كان ذلك ......عندك ابناء .....كم عددهم .....
احياناً بسئلك لو استلمت الفيزا حتسافر متي. ..؟ أنت وحظك احتمال يسئلك سؤال واحد ويقول ليك مبروك. ...
لو نسيت حاجة ممكن تضيفوها ان شاءالله لينا تدوم العشرة والاخوه موفقييين
♨بوست رقم ١٨♨ 💢اسباب الرفض لفيزا اللوترى ...💢 طبعا بعد مانتيجة اللوترى تطلع وتفوز اى فائز بتكون عندو مقابلة مع القنصل فى السفارة الامريكية براجع ورقك و بتاكد من المعلومات القدمتها... اى اختلاف او شك ممكن يرفض انو يديك فيزا.. 🔥من اكتر الاخطاء البقعو فيها الناس وبتخليهم يترفضو السؤال المتعلق ببلد الاهلية زى ما قلنا قبل كدا بلد الاهلية هى البلد الانت اتولدت فيها فى مثلا سودانين اتولدو فى الامارات وماعندهم جنسية اماراتية فى الحالة دى بلد الاهلية الحاتقدم بيها هى الامارات.. اذا قلت انو بلد الاهلية هى السودان دا طوالى رفض لانو لمن تفوز حايدوك حاجة اسمها ال case number ، فى الكيس نمبر دا اذا انت عامل بلد الاهلية السودان وانت مولود فى الامارات الكيس نمبر حايطلع ليك بى افريقيا والمفترض انو يطلع بى اسيا ودى طوالى رفض ومافيها اى مجاملة.
🔥من الاخطاء برضو انو الواحد يكون متزوج وما يضيف زوجتو فى التقديم الاول او مطلق ويكتب انو اعزب فى التقديم او يكون عندو اولاد وما يضيف اولادو او واحد من اولادو ودى كلها رفض طوالى للفيزا فى المقابلة ومافيها اى تهاون.. 🔥طبعا اذا عاوز تتزوج بعد التقديم ممكن عادى قبل ماتتزوج تقدم وتكتب انك عازب وبعد تتزوجو وتفوز فى فورمة ممكن تضيف فيها زوجتك واذا جبت ولد بعد التقديم ممكن تضيف الولد فى الفورمة بشرط انو دا كلو يكون حصل بعد التقديم الاول ..
🔥من الحاجات البتخلى الزول انو يترفض فى المقابلة بعد الفوز انو يكون ما عندو شهادة ثانوية، او عندو شهادة سودانية لكن رسوب، او شهادة فنية سنتين، ودى رفض طوالى، واى شهادة ما طالعة من وزارة التربية والتعليم ما معتمدة 🔥من اسباب الرفض انك تكون مثلا مقدم وداير تضيف زوجتك تقوم تغلط تخت صورة زوجتك مكان صورتك وصورتك مكان صورة زوجتك او تلخبط فى صور الاطفال ودى طوااالى رفض ومافيها تفاهم وبتحصل كتيير...
🔥من اسباب الرفض انك تكون قدمت مرتين فى نفس السنة وطبعا بظهر للقنصل اذا قدمت مرتين ودى رفض طوالى 🔥وبرضو بظهر ليو بياناتك القدمت بيها السنين الفاتت واذا لقى نفس الصورة مقدم بيها تانى ممكن يرفضك ودى بتعتمد على القنصل 🔥 في حالة جيت المقابلة وعندك ورقة ناقصة قبل تاريخ 11/09/2018 (وبالمناسبة اليوم العدلنا فيهو البوستات كان اول يوم لتنفيذ قرار النواقص) كان بدخلوك اجراء اداري نواقص .. اما بعد التاريخ المذكور يحق للقنصل برفض طلب تأشيرتك ♨بوست رقم ١٩♨
بتدخل رقم الكيس بتاعك من غير اصفار بعد الحرفين مثلا 2019AF12345 منه بتعرف حاله تاشيرتك وهي انواع
+++++++++++++++++++++++++++++++++++++++++++++++++++ أولاً: “AT NVC”. National visa center كل كيس ببدأ بي الحاله دي طيب و دي عندها 3 معاني فقط أ) الكيس بتاعك لسه ما بقي كرنت ب) الكيس بتاعك كرنت بس انت اتاخرته في ارسال الفورم 260 او لم ترسله من الأساس و لم تتم المعالجه. ت) الكيس بتاعك كرنت واتعالج لكن منتظر ناس السفارة يحددوا ليك مواعيد...
ثانياً:
“In Transit” الحاله دي بتظهر لفتره بسيطه لمن ناس كنتاكي حددوا ليك المواعيد و رسلو الكيس بتاعك لي السفارة و وصل الكيس السفارة لكن ناس السفارة ما عملوا تحديث لكيس بتاعك اول يعملو تحديث ببقي جاهز.
ثالثاً:
“READY” دي الحاله البعد (In Transit) طوالي و بتعني الكيس بتاعك وصل السفارة للمقابلة بس مرات بعد نقابل لسه بكون في الوضع دا ما تقلك بعد كم يوم بحصل ليه تحديث.
رابعاً: “Issued” دي الحاله الدايرنها كلنا نشوفه و يا بختوا و يا سعدوا من بقت حالته اشيود دي كدا خلاص موضوع ظبط و فضل ليك يوم يومين لحدي ما يطبعوا الفيزا و يتصلوا عليك بالايميل يقولوا ليك تعال استلم.الاستلام في العاده بكون بعد اسبوعين من الحاله تقلب ايشود و ممكن في اقل من اسبوع تستلم و قاااابله انها تجر اسبوع او اكتر حسب الزحمه طيب طبعا بعد تقابل بتكون حالتك لسه ريدي و بتستمر كدا فتره لحدي ما تلقب لي ساعات محدوده اجراء اداري و دي يعني كيسك حاليا في امريكا بشطبوا فيه وكدا بعد كم ساعه كدا ح تلقب ايشود و مبرووووك عليك
خامساً: “Refused” دي الحاله العدوا ان شاءالله ... الشر برة وبعيد علي قول أولاد بمبا ... يعني تم رفض طلبك. بس داير اشرح حاجه فيها لمن تكونوا اسرة ممكن الرفض يكون لاحد افراد الاسره ..علي شرط يكون ما الفائز الرئيسي يعني احد الناس المملحين معاه ... الباقين بدوهم التاشيرة عادي . بس اذا الرفض كان لي العضو الأساسي باقي الأعضاء كلهم بترفضوا معاه.. الله يبعد عننا جميعا تلك العبارة ... قولوا امين..
سادساً:
“Administrative Processing” دا الاجراء الإداري بحصل لمن بكونوا دايرين يتاكدوا من صحه الورق بتاعك او يطلبوا معلومات زياده منك ممكن تستمر أيام او شهور ... دعواتكم لي الناس الفي الحاله دي ربنا يعجل بي سرعه المعالجه وامورهم تظبط.
♨بوست رقم ٢٠♨
💢دفع رسوم القرين كارد💢
🔥بتدفع الرسوم بعد استلام الجواز مؤشر اما قبل السفر او بعد الوصول . 🔥قيمه الرسوم 220 دولار. لكل فرد كبير كان ام صغير. 🔥الرسوم بتندفع اونلاين بى فيزا كارد او ماستر كارد .. اذا داير تدفعها قبل تسافر الا يدفعها ليك زول عندو فيزا كارد .. 🔥رابط الموقع البتدفع فيو القرين كارد https://www.uscis.gov/file-online/uscis-immigrant-fee 🔥بعد اتمام عمليه الدفع التاكد من حفظ رقم الريسيت نمبر فمن خلاله تستطيع متابعه القرين كارد صدرت ام غير ذلك.
اخر حاله هي انها تم ارساله لساعي البريد .. و بعدها ستستلم بطاقتك في العنوان المكتوب لدي سلطه الهجره.
##########################
♨بوست رقم ٢١♨
💢بوست عن كيفية اضافة مولود جديد💢
اضافة الاطفال امر طبيعى يحدث دائما ولكن التعامل الصحيح هو امر مهم.. كيفية اضافة الطفل تعتمد على زمن الولادة خلال اجراءات اللوترى.
🇺🇸الحالة الاولى: اذا كانت الولادة قبل ان يدخل الكيس النشرة او قبل ان يتم تحديد المقابلة🇺🇸
فى هذه الحالة بعد الولادة مباشرة الرجاء اتباع التالى : 🔥استخراج شهادة الميلاد والرقم الوطنى والجواز للطفل 🔥فتح الدى اس لكلا الوالدين (ويجب اضافة تفاصيل الوالدين فى الايميل الذى سيتم ارساله الى كنتاكى ) 🔥اضافة الطفل فى فورمات كلا الوالدين 🔥انشاء فورم جديد للطفل وادخال بياناته وسيطلب منك ارفاق شهادة الميلاد 🔥الطفل بحاجة لعمل الكشف الطبى مع بقية اعضاء العائلة وحضور المقابلة
ملحوظة: اضافة الطفل فى العادة لاتؤخر معالجة الكيس
🇺🇸الحالة الثانية: اذا كانت الولادة بعد تحديد زمن المقابلة ولكن قبل المقابلة.🇺🇸
🔥فى هذه الحالة لايمكن فتح الدى اس لذلك انت بحاجة للتواصل مع السفارة واخبارهم بانك ستجلب طفل مولود الى المقابلة لذلك بعد الولادة الرجاء اتباع التالى: 🔥استخراج شهادة الميلاد والرقم الوطنى والجواز للطفل 🔥اخبار السفارة بالولادة بارسال ايميل وارفاق شهادة الميلاد ومن الافضل اخبار كنتاكى ايضا 🔥 السفارة حا تضيف ليك فورم للطفل مع فورماتكم .. تملا الفورم دا وترسلو طوالى 🔥 يجب على الطفل اجراء الكشف الطبى مع باقى الاسرة وحضور المقابلة
🇺🇸الحالة الثالثة: اذا كانت الولادة بعد المقابلة واخذ الابروف وقبل السفر.🇺🇸
وهو اجراء ساهل جدا حيث انه هناك اجراءات خاصة فى مطار الوصول لرضع للمهاجرين الجدد، سيتم معالجة القرين كارد للطفل بعد الوصول والمعاينة، ولكن خطوط الطيران قد لاتتفهم هذا الاجراء وتصر على وجود ما يسمح من السفارة لسفر هذا الطفل، لذلك يجب عليك التاكد من الخطوط اولا وارفاق شهادة الميلاد والجواز ، وفى حالة تشكيك الخطوط وطلب الحصول على اذن سفر للطفل يمكنك اخبار السفارة بالميلاد وطلب اذن سفر للطفل، وبعد الوصول الى الولايات المتحدة يمكنك تفعيل الاجراءات للطفل. بالطبع لم يتم عمل الكشف الطبى للطفل ودفع رسوم المقابلة ولكن عليك دفع رسوم القرين كارد
🇺🇸الحالة الرابعة: اذا كانت الولادة بعد دخول الولايات المتحدة وتفعيل الحالة ولكن بعد ذلك غادرت الولايات المتحدة وكانت الولادة خارج الولايات المتحدة.🇺🇸
هناك اجراءات خاصة لحاملى القرين كارد الذين انجبو طفلا خارج الولايات المتحدة حيث ان المعالجة شبيهة بالحالة الثالثة ولكن بما ان الولادة كانت بعد دخول الولايات المتحدة، يجب ان يكون عمر الطفل اقل من عامين وان يكون مصاحبا لاحد الوالدين على الاقل مع ما يثبت بالمستندات علاقة الابوة.
♨بوست رقم ٢٢♨
💢معالجة الاخطاء💢
🔥طبعا زى ما قلنا اصح طريقة انك تطلع مستنداتك كلها وتبدا تملا الفورم بالمستندات .. لانو كلنا عارفين لخبطة المؤسسات الحكومية 🔥طيب اذا لقيت عندك خطا فى الدى اس وانت خلاص رسلت الدى اس .. وداير تعالج الخطا دا او فى معلومة نسيت ما تضيفها كل العليك ترسل لى ناس كنتاكى ايميل عشان يفتحو ليك الدى اس وتقدر تعدل 🔥ايميل ناس كنتاكى [email protected] 🔥لازم تذكر فى الايميل اسمك كامل زى ما جا فى خطاب الفوز ورقم الكيس نمبر وتاريخ الميلاد .. ونهائى ماترفق اوراق لى ناس كنتاكى لانو اى ايميل فيو مستندات مرفقة حا يمسحو طوالى ولا حايشوفوهو زاتو فى صيغة جاهزة بترسلها ليهم عشان يفتحو ليك الفورم كالاتى
Email subject: Unlock request
Email Body:
Name: First name Middle name last name
Case Number: 2019AF00012345 Date of Birth: October/23/1981
Dear Sir/Madam, Please, Unlock my application so i can make changes to information.
Thank you.
🔥اذا عاوز تفتح الفورم لواحد من المرافقين بتذكر معلومات الفائز الرئيسى زى ما مذكور فوق وفى الرسالة بتوضح ياتو مرافق محتاج تفتح ليو الدى اس 🔥 اول ما ترسل الرسالة بتجيك رسالة اتوماتيك من ناس كنتاكى 🔥بعد يومين تلاتة عادة بفتحو ليك الفورم وممكن لحدى اسبوعين حسب انشغالهم 🔥بعد تعمل التعديل حاترسلو تانى واتاكد انو جاك كومفرميشن نمبر
دا اهم فورم و اول فورم بتبدأ به اللوتري.. دا الفورم البتعبيهو في شهر اكتوبر لحدي اول نوفمبر ... بتكتب بيانات و تخت صورتك و ترسله و تنتظر الحظ 😊.. ما ممكن تعدل فيه من متزوج لي اعزب .. بتخوش في جرجره... ما ممكن تنسي واحد من افراد اسرتك وما تضيفو.. بلد الاهليه بتختاره منه.. الطريقه الكتبه بيها اسمك في الثلاثه خانات بجيك بيو خطاب الفوز ... و ممكن الاسبلنج أو تاريخ الميلاد يتعدل بعد الفوز... قبال ترسل الفورم للتقديم .. بسالك داير تطبعه ولا لا... اذا طبعته خلاص مكسب.. اذا رسلته من غير طباعه تاني ما بتقدر تلم فيه.. بفتحه القنصل اول ما تقيف قدامه تاني و بقراه.. و بشوف صورتك القدمته بيها...
رقم الكيسcase number: رقم الكَيس ما الكِييس 😂😂😂
دا الرقم البتلاقيه في خطاب الفوز بعد اسمك تحت و منه بتعرف ترتيبك الكم في المقابله.
بلد الاهليه: دي البلد البتختاره في حاله ولدوك في بلد غير مسموح لي مواطنيها بالتقديم في اللوتري.. تختار بلد تانيه مسموح بيها التقديم... لازم تكون بلد ميلادك هي بلد الاهليه بتاعتك و عن طريقه بطلع ليك رقم الكيس بتاعك حسب القاره المولود فيها.. مثلا قاره افريقيا كل الكيسات بتبدا بي الحرفين AF قاره اسيا رقم الكيس ببدأ بي AS
النشره:
دي البتوضح مقابلتك ح تكون شهر كم .. كل الفائزين بنتظروا النشرات تتطلع و يعرفوا منها هل رقم الكيس بتاعهم دخل ولا ينتظروا النشره ال منقول بتصرف
11-07-2018, 04:55 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سيف اليزل برعي البدوي
مزمل عوض الكريم
فيس بوك
تويتر
انستقرام
يوتيوب
بنتيريست