انا طلعت امس من قسم المقرن بالضمانة ، كنت معتقل مع مهند اخوي و ويني عمر ومياس . الحصل انو انا ومهند مشينا زيارة لي مياس في بيتها وجاتنا ويني هناك بعد خلصت شغلها ، بعد اقل من نص ساعة من وصول ويني لينا داهمتنا قوة مكونه من 15 زول بالزي المدني ، دخلوا الشقة بالشباك الجمب الباب . نحن إتفاجئنا بيهم معانا في الصالة . قالو لينا نحن حكومة ماف زول يتحرك ، في ضابط لقي ويني قاعدة في الكرسي ، جا بي وشو جمب وشها وقال ليها بي صوت واضح ومسموع لينا انا ومهند ومياس : انتي مش ويني عمر ؟ العملتي حركات لي عبد الرحيم ؟ (وكيل النيابة حاضن النمل ) قال ليها اها وقعتي معانا ووريني دي حاتتحلّي منها كيف ؟ مياس طلبت من الضابط انو يورينا امر التفتيش ، الضابط طلّع ورقة من جزلانو قديمة ومهترئة ومقدّدة من النص ومُشرَّطة بسبب الطبيق واضح انو الورقة دي قاعدة في جزلانو ليها سنة ونص . مكتوب عليها حي الزهور لكن ما مكتوب اسم مياس او عنوان بيتها . قلنا ليه الورقة دي للبيت ده ؟ انت جبتها من النيابة ؟ بقي يأشّر لينا علي الترويسة الفي الورقة : عاينو ده مش حكومة ؟ حكومة سجم ورماد البتنتهك خصوصية الناس وبتجيهم بالشبابيك لتلفيق التهم والانتقام باسم القانون . الحصل ده إنتهاك لخصوصيتنا وتلفيق القصد منو إذلال ويني لانها ما إستجابت لي معاكسات وكيل النيابة الاسمو عبد الرحيم وبعد مالقي نفسو مفضوح بالتلفيق وخسر سمعتو وشغلو الوسخان قرر ينتقم منها ويلفق ليها اي تهمة ومتخيل انو بكدة ممكن يلطخ سمعتها لكن الترصد واضح باكتر من دليل . المشكلة الاساسية هي في قانون النظام العام وكل شرطتو وأقسامو والقضاة الشغالين فيه البيعملوا مع بعض كعصابة بإمكانيات دولة ديكتاتورية فاسدة ، قمة السخف والانحطاط الأخلاقي في الممارسات البتحصل من شرطة النظام العام وقضاة النظام العام الكل همهم انهم يختطفوا الناس من الشوارع ومن بيوتهم ومن قعداتهم في اي حتة ، بقبضوك ساي وبيرجهوا ليك تهم ملفقة ومن غير تحقيق بيودوك لمحاكمة إيجازية هي في الاساس مهزلة ومن غير مازول يسمعك او يكون عندك حق تدافع عن نفسك ، انت اصلا مازول ولا عندك حقوق انت بس مفروض تدفع الغرامة البيحددها القاضي من غير ما يسألك اي سؤال ، الناس ديل بيلمّوا الشحادين بيبيتوهم في القسم ويومي الصباح بيطلعوا دفّارين مليانات بدخلوهم للقاضي كلهم وهو مابيكلف نفسو غير انو يكتب الحكم ويرفع راسو ويقول ليهم 500 جنية غرامة وسجن شهر في حالة عدم الدفع ! شغل بتاع قلع ونهب عديييييل !.
احنا اتقبضنا يوم الثلاثاء وتاني يوم ودونا المحكمة والقاضي جا قال دخلوا لي الناس ديل قام النائب العام اتصل وقال جيبوا لي الملف ده ، رجعونا النيابة والنائب قرر انو يعيدوا التحقيق في الملف ، انا ومهند الوكت داك كان ماحققوا معانا اصلا ، قرروا يبدوا التحقيقات الساعة 7:30 لمن انتهت مشوا لقوا وكيل النيابة ماف ، جرجره يوم الاربع والخميس في الفاضي ووكيل النيابه زاغ من المكتب وقفل تلفوناتو المحامين عرفوا بيتو مشوا دقوا ليه الباب ابي يفتحوا !
منعونا نقابل المحامين رغم انهم قدموا طلب رسمي لمقابلتنا واترفض . لحدي ما طلعت بالضمان ماخلوني أقابل محامي عموما في مايخص قضيتنا لسة النيابة ما وجهت لينا اي تهمة ! وطلعنا كلنا بالضمانة ومستنين النيابة توجه لينا تهمة وتحدد محكمة . إسمي انا ومهند ماكان مكتوب مع ويني في الخمسة ايام الكنا فيها في الحراسة كان بسبب انو ماما ماكانت عارفة انو انا ومهند مقبوضين في الحراسة لانو أخواتي قرروا انها ماتعرف عشان هي مصابه بالضغط وممكن صحتها ما تتدهور .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست