موضوع طريف قرأته في قروب مجاور.. بعد الأذن انقله للفائدة والمرح.. و الله الليلة كنت ناوي اجي اتكلم عن حاجة حصلت لي قبيل في مجمع خدمات الجمهور بحري و انا داير اجدد الرخصه لكن بعد الكتل بتاع ناس النظام العام الحايم ده انا حالتزم الصمت #كسره هل الشعر عندو علاقه مع تجديد الرخصه لانو قبيل حصلت لي جرجرة بي سبب موضوع الشعر ده من محل التصوير ارجع لي الضابط من الضابط اقول لي تمشي لي العميد مدير المرور العميد يرجعني للضابط يقول لي ده ما شغلي #المهم في الاخر شلت الورق بتاعي و قولت ليهم كان فيها حلاقه ح اخلي الرخصه و الايصالات و الورق عندي و كان حصلت حاجه بينا المحكمه في الاخر بعد قنعو مني صوروني و ادوني الرخصة و ما كان في داعي الكلام ده كلو #كسره_تانية الناس طلعو القمر و انحنا لسه في فلان شعرو كتير و فلان محترم عشان اصلا عندو صلعة وراثية و ماف حاجه مراجعنا لي وراء غير انو بنعاين لي الناس بي المظاهر مافي #كسره_تالته اسي انا الجواز بتاعي قرب انتهي برضو حيتجرجرو معاي نفس الجرجرة دي و لو حصلت الحاجه دي هل ممكن امشي المحكمة تجيب لي حقي #كسره_رابعة برضو لمن مشيت كشف النظر اول ما شافوا الشعر في رائد قاعد قال لي دكتورة العيون خلي الزول ده اخر واحد و اعملو ليهو كشف بتاع مخدرات و ده كلو عشان الشعر
#كسره_اخيرة اسي بكره كان كتلوني في شارع النيل عليك الله اتذكرونا بي صالح الدعوات
و الله من وراء القصد ... عبده عمر.. احترس قدامك كشة التعليقات: اعتقد للجواز لازم تحلق علشان الصورة تكون طبيعية لانك بتتنقل بيه في دول مختلفة والصينيين عن تجربة ممكن يرجعوك 😂😂 ابدا ما بيربطوا بيت اختلاف الشكل بالنسبة للشعر فالسودانيين ساي كدا بيكرهوه ما عارفة ليه.. .. .. انتو خليتو الموضوع الاساسي وبقيتو ع الشعر يتخيل لي دا شي شخصي لا انت لا الشرطة ماتتكلم فيهو وماف قانون بمنع دا .. .. الشعب دا كلو جاهل وغبي وجهه نظر لو ماشي تستخرج الجواز اكسر الحنك انا خليتو يي سبب نقتهم في حين انتا لو ود مسوول شعرك لو حاكي مع الواطه بطلعو ليك اوراقك من غير كلمه .. .. بغض النظر عن كل الحوارات الموجودة في المنشور. الواحد لو خلى شكله مهندم ومقبول لدى كل الناس البحصل شنو؟ هل الشعر تربيته او حلاقته بأشكال غريبه بتخلي الواحد مميز مثلا؟ وما يجي زول يقول دي حريه شخصية نحن عايشين وسط مجتمعات يفترض اننا نعمل الشي البخلينا مقبولين عند كل شرائح المجتمع.. .. .. سنوات الانقاذ دي شوهتتنا جدا ... وين المشكله في شعرو ... حتي لو بقي صلعه ... انت حيفيدك ولا حيضرك بشنو ... انت سلطه اخلاقيه في المجتمع ونحن م عارفين ... الله مثلا انت حتحاسب الناس ... بعدين الدين دا فيهو اربعه مذاهب وكمية بتاعت اختلافات ... يعني اي زول يختلف معاك هو غلط ... ولا وفوق دا تعمل لي نفسك سلطه لا هي في الدين وتحاسبو !!!
لمن الدين يكون مبرر لقهر وازلال الناس دي مصيبة فعلا ... وحينتج زي م حاصل يوم كمية كبيرة بتاعت شاب بعيده من الدين .. .. يا جماعة .. الصور في الاوراق الثبوتية لازم تكون صورة واضحة بالشكل الطبيعي للزول .. انه يكون لابس نظارة .. مربي دقن كتيييير .. شعر كتييييير .. دي بتغير ملامح الزول هم كجهة رسمية ما يصوروك بشعرك ده .. .. انتو قايلين الهوية السودانية شنو غير شعر.. اتعلمتو الحكحكة والمسيح .. 90 في المية من القبائل السودانية بتربي شعر... الهدندوة.. الشوايقة.. البقارة.... الفووور...الدناقلة.... البجا.. المجاذيب.. الكواهلة... قبائل الشرق كلها... معظم قبائل الغرب... كردفان... الشعر يمثل الهوية السودانية الله يقطع سنين الأتراك الوروكم الحلاقين .. .. طبعا الردود كلها منقسمة لي أجيال مختلفة.. الجيل الحالي دا موضع تربية الشعر وفلفلتو شي عادي جدا زي الموضة الكانت في السبعينات وكدا اغلب الشعب كان مربي شعرو (القجة) وما كان المربي شعرو بتنصنف غير إنو شخص امتثل للموضة وخلاص.. جانا جيل الانقاذ من التسعينات اشتغل في الموضوع دا نتف ليك ريش الامة دي كلها ما خلانا استاذ وما خلانا نظام عام وما خلتنا شرطة عسكرية.. الخ وكلهم ديل كانو حلاقين جد ... بقا مترسخ في عقول الناس إنو اي زول بربي شعرو ما مهذب ... اها قام المشروع الحضاري بتاع الجماعة طرشق والشغلانة بقت فاكة ساي أو مافي زول براقب زول بقا ... والجيل الهسي بقا شايف انو دي حاجات ما مفروض تكون مشغولا بيها الحكومة.. فحتلقوا ناس مختلفة الاراء في الموضوع دا في المؤيد وفي المعارض .. وكلو من الحكومة دي😂 .. .. المظهر العام دي م تخلف ولا رجعيه لو لقيتك تاني بحلق ليك خور ابو عنجه .. .. كان حلقت شعرك تاني الا تغير رخصتك عسكري بصدق انو دا انت ماف .. .. انا شايف انك تحلق شعرك يمكن تنحل مشاكل البلد ونستقر والدولار ينخفض سعرو.. .. .. بغض النظر عن كل الحوارات الموجودة في المنشور.
الواحد لو خلى شكله مهندم ومقبول لدى كل الناس البحصل شنو؟ هل الشعر تربيته او حلاقته بأشكال غريبه بتخلي الواحد مميز مثلا؟ وما يجي زول يقول دي حريه شخصية نحن عايشين وسط مجتمعات يفترض اننا نعمل الشي البخلينا مقبولين عند كل شرائح المجتمع.. . . . ولسه.. المهم انتو رايكم شنو؟
07-03-2018, 03:11 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر التاج
أبوذر بابكر
فيس بوك
تويتر
انستقرام
يوتيوب
بنتيريست