|
|
|
 Re: البنك المركزي يوجه المصارف بتسليم تحويلا� (Re: Nasr)
|
الأخ نصر
الاجابة على سؤالك موجودة في ثنايا الخبر
وأعلن البنك المركزي - في تعميم صحفي - عن تعامل جميع المصارف العاملة بالبلاد في استقبال وتسليم تحويلات المغتربين عبر فروع مخصصة (نوافذ) تعلنها المصارف لأغراض تذليل العقبات
| |
 
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: عبدالعظيم عثمان)
|
البنك المركزي دا بيحلم ولا شنو؟
البنوك السودانية كحيانة وما بتقدر علي خدمة المغتربين
وخدمات السوق الموازي متقدمة مقارنة بالبنوك
عشان كدا البنك المركزي لا عنده سياسات
ولا عنده جهاز مصرفي فعال
كله في النهاية كلام في كلام
وسعر الجنيه كل يوم غاتس لي تحت
----------------------
ليه المشكلة شنو يا عبدالعظيم؟!! الناس دي حتحول وتستلم بنفس العملة ويسرعة وضمان كمان
يعني مافي مشكلة في السعر ولا التسليم والتسلم ..بعدين تحويلات السوق الموازي دي كثير منها بتحدث فيها اشكالات ومغالطات لأنها تقليدية ولا ضمانات كافية فيها..يعني بتتوقف على ثقة التاجر بالعملاء..اما الينوك فهناك مستندات وشغل ادارة ونظم بنكية متكاملة لا مجال للتلاعب فيها
زمان المشكلة في سعر الصرف.. الآن تحول دولار تستلم دولار وده بوفر عملات حرة ضخمة داخل السوق السوداني ووفرة العرض تنزل الاسعار
شكرا عبد العظيم على المداخلة
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: محمد بشير عبادى)
|
سياسات بنك السودان وحدها غير كافية ...
لو كان عندنا جهاز مغتربين وبيعمل على تذليل العقبات للمغتربين ...
كان إلتفت للجارة إثيوبيا ويتعلم منهم كيفية التعامل مع المغتربين ...
يجب أن تكون هناك حوافز تشجيعية من أراضي وشقق وبيوت وإعفاءات جمركية ...
إن كانت الحكومة حقاً تريد حل جزء من مشاكل المغتربين ...
وبارك الله في من فاد وإستفاد ...
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: نزار عبد الوهاب)
|
سياسات بنك السودان وحدها غير كافية ...
لو كان عندنا جهاز مغتربين وبيعمل على تذليل العقبات للمغتربين ...
كان إلتفت للجارة إثيوبيا ويتعلم منهم كيفية التعامل مع المغتربين ...
يجب أن تكون هناك حوافز تشجيعية من أراضي وشقق وبيوت وإعفاءات جمركية ...
إن كانت الحكومة حقاً تريد حل جزء من مشاكل المغتربين ...
وبارك الله في من فاد وإستفاد ...
-------------------------
أوافقك الرأي أخي نزار..يجب تقدبم حوافز تشجيعية للمغتربين أسوة بأثيوبيا ومصر وغيرها من الدول..إيرادات المغتربين مورد مهم لإقتصادات الدول
لكن خطوة بنك السودان هذه مهمة جدا وتاتي في اطار الحزم التشجيعية للمغتربين
مش احسن من السياسات القديمة ؟؟!!
شكرا نزار على المداخلة
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: نزار عبد الوهاب)
|
"وأعلن البنك المركزي - في تعميم صحفي - عن تعامل جميع المصارف العاملة بالبلاد في استقبال وتسليم تحويلات المغتربين عبر فروع مخصصة (نوافذ) تعلنه"
طيب أنا حول دولار والبنك في السودان سلمني دولار
داير قروش سودانية
هل أنا ملزم في هذه الحالة بصرف القروش في البنك
وبنفس سعر الصفر المعلن للبنوك ؟؟؟؟
ولو داير أبيع قروشي لمن يدفع أكثر (إسمه سوق الله أكبر)
في طريقة ؟؟؟؟؟؟؟؟؟؟
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: Nasr)
|
القرارات سااااهلة الصعوبة تكمن في الاستمرار عليها والالتزام بها هم جربوا الكلام ده قبل كده وما قدروا يلتزموا بيهو ..
بعد فترة بسيطة حتجي تستلم قروشك بالعملة التي تم تحوليها لك بها حيقولوا ليك ما عندنا الا تنتظر كم يوم لو عايز تستلمها بالعملة الحرة ..
وحتمشي وتجي وحيماطلوك ويطلعوا عينك وفي النهاية حترضخ وتستلمها بالجنية وبالسعر الهم محددنه المشكلة هي انعدام الثقة وبناءها يحتاج للكثير ..
ثم انت عندك سوق موازي بالضخامة دي أكيد انت محتاج لتغطية بعملات صعبة تتجاوز حجم الاموال المرسلة بكثير ..
ده عشان تقدر تلتزم بالتسليم بسرعة وعشان كمان تردم الهوة وتنتهي من السوق الموازي تماما ..
هل البنوك او الدولة عندها العملات الصعبة متوفرة بمئات الملايين !! ولا حتعتمد على رزق اليوم باليوم والجاي يسلموهو لي اصحابه ؟ ..
ويقعدوا يصفقوا ويغنوا الكنينة ..  لان التحدي الالتزام بالنقطة دي تحديدا
ناس الحكومة ديل بيحلموا ساي قالوا التسوي بي ايديك يغلّب أجاويدك والسوق الموازي ده صنيعة النظام وبي أخوي وأخوك مابينتهي ..
لا بي قرارات ارتجالية ولا بي قرارات فوقية يتم تنفيذها بالقوة الجبرية ده سوق ان لم تنتفي ربحية تجار العملة لن يتوقفوا بالمرة ..
القرار ده عبثي ومرحلي وعبارة عن بيع الترماي للناس ...
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: جمال ود القوز)
|
في لقاء تلفزيوني بقناة أم درمان كان أحد الضيوف محافظ أسبق لبنك السودان ، سأله مقد البرنامج: اذا كان لديك دولارات بتبيعها في البنك بالسعر الرسمي و الله السوق الأسود ؟، رد: ليه أبيعها في البنك بالسعر الرسمي !! ببيعها في السوق الأسود بي 11 جنيه !! و كان الرجل صادقا في اجابته.
| |
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: الحاج حمد الحاج)
|
كيف تستطيع البنوك توفير النقد الأجنبي الكافي لمقابلة تحويلات المغتربين؟؟؟
المغتربين ديل ما مستثمرين ولا تجار ممكن يخلوا أرصدتهم في البنوك لفترة طويلة
دي تحويلات خاصة بمصاريف معيشية أو علاجية أو رسوم دراسية ...
عايزين يصرفوها في حينه ....
من أين تستطيع البنوك توفير النقد الأجنبي الكافي لها .....
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: عبد الباقي الجيلي)
|
القرارات دي غير فعالة
وعمرها ما حتكون حافز للمغتربين لاستعامل الاوعية خلينا نقول القانونية
لاسباب ذكر اغلبها المعلقين اعلاه واضيف
- النظام البنكي السوداني متخلف جدا مقارنة مع الانظمة البنكية التى اعتاد عليها المغتربين
- جميع التحويلات المصرفية والتحويلات عن طريق الصرافات المعتمدة عليها رسوم مقابل الخدمة في حين ان هذه الرسوم غير موجودة عند الطرف الاخر للمعادلة
- التجار بجوك لحد عندك ومافي اي تعقيدات
اقترح على الحكومة والبنك المركزي التحربة الهندية في هذا المجال والموضوع بسيط جداوسهل التنفيذ ويفيد الطريفين سواء الحكومة بانسياب العملة الصعبة في مواعينها
والمغترب الذي سيستفيد استفادة ملحوظة مقابل تحويله عبر الانظمة الرسمية
التحربة الهندية باختصار، مقابل كل مبلغ يتم تحويله هناك فائدة معينة
مثال:
1- عند تحويل 1000 دولار يسمح لك بادخال ثلاجة بدون جمارك (لاحظ انو الجمارك في الهند 300% على جميع الاستيراد ودا لتشجيع المنتج المحلي)
2- عند تحويل 10000 دولار يسمح لك بادخال (غير متاكد من التفاصيل)
3- عند تحويل 100000 دولار قطعة ارض مجانية مع دعم مقدر لمواد البناء
والمسألة تراكمية يعني انت حتستفيد من النقاط 1 و 2 و3 وتزيد استفادتك كلما زادت المبالغ المحولة
غير كدا ما حيكون في اي حل وسنظل ندور في نفس المكان
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: MOHAMMED ELSHEIKH)
|
السؤال واضح ومافي ليه اجابة.
بعد ان استلم الدولارات في يدي اوديها وين؟؟؟؟؟؟؟؟؟؟
انتظر اجابة الاخ عبادي
----------------
مرحبا الاخ محمد الشيخ
الإجابة واضحة..البنك حيسلمك عملة حرة ..تبيعها في البنوك تبيعها في السوق الموازي ..تحتفظ بيها ..انت حر.. السؤال الصرافات الأهلية ماذا تفعل الان(السوق الموازي)..انت بتعطي مبلغك للتاجر في مهجرك برسل رسالة لي زول هنا في السودان بيعطي اهلك قروش سودانية بسعر السوق..اها لو اديناك ليها كاش ؟؟!! ..امشي لذات الزول واديها ليهو ده اذا اسعار البنوك ما اتغيرت ..لو قلت لي التجار قبضوهم ..خلاص لا تغير في البنك ولا السوق احتفظ بيها المشكلة شنو؟
يا اخوان التحويلات الحالية غير حقيقية دولار قاعد برة وعملة محلية متداولة..اما اذا توفرت العملة الحرة تلقائيا اسعار السوق الموازي حتنخفض والبنوك ستصير مجزية كما السابق
اهم شئ الوفرة ثم الوفرة
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: Nasr)
|
عليك نور يا راعي البوست
كدا أبنت وظهر المغطي وملان شطة
"يا نصر البنك عايز يضمن رسوم التحويل بالدولار اولا بعد داك يغيرها بالسوداني "
البنك يشيل رسوم التحويل بالدورلار
ويديك قروشك بالسوداني
وآل إيه !!!!
بسعر الصرف الرسمي !!!!!!!!!!
------------------
ده ما كلامي بانصر..انا كلامي واضح ..حسب فهمي المتواضع للخبر حتاخد قروشك بالعملة الحرة وانت حر بعد داك..اما العمولة انا ماتحدثت عنها راجع آخر مداخلة لي
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: محمد بشير عبادى)
|
وفرة في أيد الناس فايدتها شنو للإقتصاد ؟
الوفرة الممكن تساعد غي تقوية الجنيه السوداني .. إنو يكون عندي اعتماد ، أمشي البنك يخصم من حسابي بالجنيه و يوفّر لي المقابل بالعملة الحرة لتغطية الآعتماد ، وده بيتوفر لما الدولة يكون عندها فوائض من العملة الحرة و توفروا للبنوك التجارية .. و يصبح تاجر العملة ما عندو وظيفة الوكت داك .. لغاية ما الدولة تحقق المسألة دي ، انسى حكاية تحويلات مغتربين و تسليمها بنفس العملة في تقوية الجنيه .
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: محمد محمود محمد)
|
Quote: خلاص لا تغير في البنك ولا السوق احتفظ بيها المشكلة شنو؟
|
كيفن المشكلة شنو يا عبادي !! ..
بتبالغ .. يعني معقول تفكيرك وقف هنا بس !! ..
اصلا القروش المحولة دي دايرين يكتنزوها مثلا ! ..
يأخ دي مصاريف بيوت ناس اكل وشراب ومدارس والذي منو ..
حيتصرفوا بي شنو ؟ .. ياكلوا ورق الدولارات يعني ؟ ..
اللهم الا لو الحكومة في نيتها تلغي الجنية السوداني ..
وتشتغل بالدولار كعملة متداولة داخل البلد ..
في الحالة دي بيكون القرار ده ..
زي حمار الشيخ الوقف في العقبة ..
المفروض قبل ان تم اتخاذ قرار ارتجالي زي ده ..
يتم التمهيد له بتوفير كم هائل من العملات الحرة ..
للتغطية ولموازنة العرض والطلب في السوق الموازي ..
والا بيبقى ده قرار زلنطحي لا بيودي ولا بيجيب ..
لو فرضنا جدلا انه البنك سلمك قروشك بالعملة الحرة ..
حتمش تكوس التجار بره البنك لتبديلها .. مش كده ..
حتلقى ناس الامن منتظرنك يخموك ويصادروا قروشك ..
أو بالميت ما حتلقى تاجر يتعامل معاك ويشتري منك ..
حينها انت ملزم تبدل في البنك بالسعر البيحدده البنك ...
طيب البخليني ادخل نفسي في الزرزرة دي شنو ؟..
حارجع تاااني لتاجر العملة البره البلد ..
وهو ما حيعدم الطريقة اليسلمني بيها قروشي بالداخل ..
يبقى دي حلقة مفتوحة لانها مبنية على لا شيء ..
حتقول انت كحكومة حتمش تقبض تجار العملة البره البلد ..
حتكون بتضحك على نفسك ساي لا بتلقى دليل عليهم ..
ولا في دولة حتضع ليك امكانياتها تحت أمرك ولصالحك ..
وتمش تقبض ليك ناس اصلا بيساهموا في بقاء النقد حقها ..
داخل دائرة دورتها المصرفية وهي لن تتضرر منهم شيئا ..
بل ستستفيد مع بقاء قروشها وزياد حركة دورتها النقدية ..
في انعاش اقتصادها بالكم الهائل من البضائع ..
التي يقوم تجار العملة بشراءها وتصديرها لاوطانهم ..
حتى لو بقيت الاموال دي في بنوكهم هم مستفيدين باستثمارها ..
القرار ده أي زول بيفهم اقتصاد ولو في حدوده الدنيا ..
ما حيتعب روحه في اتخاذه لانه مولود ميت ومحكوم عليه بالفشل ...
فالى ان تستطيع الحكومة توفير النقد الاجنبي وتقدر تلتزم بالسداد والتسليم ..
وتقدر تعمل توازن لسعر الصرف بالتحكم في العرض والطلب ..
بطرح العملات الصعبة في السوق لكبح جماح ارتفاعها والسيطرة عليها ..
بتكون الحكومة كمن يحرث في البحر ..
زمان قلنا السودان فشل تماما في اخراج اقتصاديين ..
يعرفوا كيف يديروا اقتصاد ناجح يتخذ قرارا ت اقتصادية رشيدة ..
لكن اللوم مش على الاقتصاديين اللوم على الكبار الاصلا امكانياتهم ..
لا تمكنهم من انهم يديروا اقتصاد وربحية كشك او طاحونة ..
ناهيك عن اقتصاد دولة بحالها .. الى الله المشتكى وعليه التكلان .......
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: جمال ود القوز)
|
الحكومة بتلعب وبتضيع في الزمن
وعاوزة تحل القضية الإقتصاديه زي ما بتعمل في السياسة
تشتري وقت وتأجل مواجهة الأزمة وتبيع الوهم للناس ..
بس التكيتك دا في معاش الناس ما بنفع
ممكن تكسب وقت في قضية الحريات والناس يصبروا
وممكن تكسب وقت في موضوع الديمقراطية وتخوف الناس بالحرب والفوضي
والناس تصبر
وومكن تكسب وقت في التسوية السياسة وتماطل وتشتري الوقت
موضوع الإقتصاد ومعاش الناس وسعر الصرف ما بتحلا بالطريقة البتعمل فيها الحكومة دي
عشان كدا الكلام البعمل فيه بنك السودان والعساكر المشككلين خلية أزمة "البشير\عطا\الركابي"
الثلاثة ديل شن عرفهم بالإقتصاد
الحلول واضحه زي الشمس
وما عاوزة كلام كثير عاوزة إرادة وقناعة بالتغير ودا الحكومة شعرا لا عندها ليه رقبة
ولا عندها رغبة في علاج الأزمة ولا حاجة ولا بهمها سعر الدولار يطلع أو ينزل
ديل حارسين قروش الدعم والودائع والإعانات والقروض
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: عبدالعظيم عثمان)
|
بما إنو البنك الجهة الممكن الزول يثق فيها وممكن يفتح فيها حساب ويخت قروشو
البنك يلعب ضاغط مع السوق الموازي
بإمكانياتو الضخة قادر على إخراج التجار من السوق
مثلاً سعر الدولار 25 يقوم البنك يعرض سعر سعر 26 ج للدولار
وكلما يتقدم التجار خطوة البنك يسبقهم ويرفع السعر
حتى يصلوا مرحلة العجز التام ومافي زول تاني بقدر يشتري دولار خارج البنك
في المقابل يحاول يكسب ثقة المغتربين .. ليس بالوعود الماكرة الزي دي .. تحول بالدولار ويسلموك بالدولار .. دا احتيال
الغرض منو إنو يختو قروشك في بطنهم ويماطلوك زي ما قال الأخ لامن ترضى بالسعر الرسمي
لكن مثلاً يعرض أسعاره بالجنيه .. يستلم منك ويديك سعر كويس أعلى من السعر الفي السوق .. انت تحول ريال أو دولار وأهلك يستلموها جنيه
وزايداً على كدا يشتغلوا بي نظام النقاط المذكور أعلاه .. لأنو حتى لو السعر في البنك والسوق الموازي كان واحد لكن البنك بديني ميزة إنو أنا يكون عندي رصيد نقاط في حالة التحويل عن طريقه
في هذه الحالة أنا بفضل البنك
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: بدرالدين بابكر مصطفى)
|
شكرا يا بدر الدين
"لكن مثلاً يعرض أسعاره بالجنيه .. يستلم منك ويديك سعر كويس أعلى من السعر الفي السوق ..
انت تحول ريال أو دولار وأهلك يستلموها جنيه"
وأظنه الحل الوحيد الممكن
أنا شخصيا ممكن أقبل بسعر السوق أو أقل منه بجنيه مثلا
السؤال المهم
هل هناك صرافات مصدق لها بتحويل العملات؟؟؟؟؟؟
| |
|
|
|
|
|
|
|
|
|
Re: البنك المركزي يوجه المصارف بتسليم تحويلا� (Re: محمد بشير عبادى)
|
تحويلات المغتربين .. هل تسد فجوة الدولار
الزم البنك المركزي المصارف السودانية بصرف العملات بعملات البلاد المحولة منها نفسها، تأتي هذه الخطوة وفق الحزم التشجيعية وان اتت متأخرة بعض الشيء لكن واقع الحال يطرح سؤالا محوريا كم عدد المصارف السودانية ذات الامتداد الخارجي التي يمكنها ان تجذب عدد المغتربين في الخارج؟ فالمصارف السودانية بالخارج عددها قليل ومنتشرة في مدن بعينها في الخارج عليه لابد من تفعيل دور القنصليات والسفارات في الخارج لتكون بمثابة نقاط تحويل لمدخرات المغتربين الشهرية التي تقدر بملايين العملات الصعبة خاصة في دول الخليج الاكثر جذبا للكوادر والخبرات والايدي العاملة السودانية ومقارنة بفرق سعر الدولار او الدرهم او الريال كل على حد السواء نجد ان هناك مكاتب تنشط في هذه الدول تحول مدخرات المغتربين بسعر اعلى من ما هو موجود في السوق الموازي بالداخل وتمتلك هذه المكاتب مواقع منتشرة بكثافة في دول الخليج ولا يتعاملون بمستندات ولا شبكات ظاهرة للعيان وان كانت الدول قامت مؤخرا بفتح بلاغات ضد عدد منهم لم تكشف عن اسمائهم لكن الملاحظ والمعروف عن هذه الشبكات والمكاتب ذات اليد الطولي انها تتعامل بشبكات التواصل الاجتماعي ما يصعب تتبعها والحد منها.
سد الفجوة
ولايزال الحديث عن سد الفجوة التي خلفها خروج النفط من الموازنة عبر تحويلات المغتربين مجرد اطروحات على مدى عامين، في وقت يشكو فيه المغتربون من عقم الاجراءات والتسهيلات المشجعة للتحويل عبر القنوات الرسمية وخلق استثمارات داخل البلاد ، وسط مساع لرفع تحويلات المغتربين الى 6 ملايين دولار فيما بلغ حجمها في الوقت الحالي 4 ملايين دولار وفقا لحديث نائب الامين العام لجهاز المغتربين.
ووجه بنك السودان المركزي المصارف بضرورة صرف التحويلات الواردة من الخارج بالنقد الأجنبي ما لم يطلب المستفيد غير ذلك، واشار البنك الى ان ذلك يأتي في إطار سعي بنك السودان المركزي لتسهيل عملية انسياب موارد النقد الأجنبي وتحفيزاً للعاملين بالخارج لحفظ وتحويل مدخراتهم في وعبر الجهاز المصرفي السوداني.
وأمّن البنك المركزي على صرف أصل وأرباح الودائع الاستثمارية المحفوظة بالنقد الأجنبي طرف المصارف أيضاً بالنقد الأجنبي.
سياسات تحفيزية
وكان جهاز المغتربين قد أعلن فى بداية العام الحالى عن حزمة مقترحات تدرس الآن لجذب تحويلات ومدّخرات المغتربين خاصة بعد رفع الحظر الاقتصادي عن البلاد، وقال إن المرحلة المقبلة تتطلب وضع سياسات تحفيزية واضحة وجريئة تقدم كحوافز للمغتربين لاستقطاب مدّخراتهم، بجانب وضع حزمة من الحوافز تشمل فتح التمويل للمغتربين عبر البنوك لتحقيق تطلعاتهم في المجال العقاري والتعليم والسيارات، وكشف نائب مدير جهاز تنظيم شؤون السودانيين العاملين بالخارج، د. عبدالرحمن سيد أحمد، أن تحويلات المغتربين تقدر ما بين «4ـ 6» مليارات دولار سنوياً، مشيراً إلى أن مدخرات وأصول المغتربين بالخارج تعادل 5 أضعاف مبلغ التحويلات.
ويرى خبراء اقتصاديون أن انسياب تحويلات المغتربين عبر السوق الموازي محفوف بمخاطر عدة، منها تحكم تجار السوق الموازي في أسعار الصرف في حالة الاستلام بالعملة المحلية، ربما تصل إلى حد تزوير العملات في حال الاستلام بالدولار، بجانب التعرض لعمليات احتيال، وهذا بالضبط ما حذر منه الأمين العام السابق لاتحاد الصرافات عبد المنعم نور الدين في حديث سابق حيث قال «إن المغترب قطعاً لن يخاطر بأمواله، لأن السوق الموازي أصبح يقدم له سعراً مجزياً»، بجانب سهولة وسرعة التعامل، وشدد نور الدين على ضرورة تقديم الجهاز المصرفي خدمات متميزة تتمثل في السرعة وضمان الاستلام بالعملات الأجنبية
فتح قنوات بالبنوك
ويرى الخبير الاقتصادى هيثم فتحي ان المرحلة القادمة تتطلب وضع سياسات جريئة تقدم للمغتربين كحوافز لجذب مدخراتهم مشيرا الى ان تحويلاتهم تقدر ما بين 4ـ6 مليار دولار سنويا فيما تعادل المدخرات والاصول للمغتربين بالخارج «5» اضعاف مبلغ التحويلات.
وطالب فتحي بفتح قنوات بالبنوك للتمويل العقاري والسيارات لانها اكثر وسائل جذب التحويلات والمدخرات.
و قال لابد من تهيئة البنية التحتية للاقتصاد الوطني التي تعتبر المغتربين أحد آلياته
وقطع بضرورة وضع رؤية شاملة تعيد الثقة للمصارف السودانية وإدخال منتجات مصرفية جاذبة المغتربين للاستفادة من النقد الأجنبي وجذب مدخرات المغتربين لان جذب المدخرات يتطلب الثقة في النظام المصرفي وتحسين الصورة الذهنية عن التحويلات المالية والنقدية عبر المصارف السودانية بوضع سياسات واضحة تمكن المغتربين من من تحويل 4 ـ 6 مليار دولار عبر النظام المصرفي على سبيل المثال من طرح التمويل العقاري والسيارات والتعليمي
وقال المغترب بالسعودية التقي سعيد إن الدولة وضعت خطة عمل لمصلحة المغتربين مؤكداً حاجتهم لإنشاء وزارة خاصة بهم معتبرا أن هذه القرارات تعد بمثابة اللبنة الأولى لتصحيح وضع المغتربين داعياً لأهمية وجود بنوك لتحويلات المغتربين خاصة أنهم يحولون فى الوقت الحالي عن طريق القنصلية والأشخاص مطالبا بوضع سياسات تحفيزية للمغتربين مثل دخولهم في المشاريع الزراعية والسكنية وغيرها إلى جانب توفير الخدمات بجهاز المغتربين.
الثقة مفقودة
فيما اكد المغترب بدولة الامارات عوض الحاج الطاهر ان الثقة مفقودة بين السودانيين والجهاز المصرفي منذ وقت طويل والثقة «ما بترجع» بين ليلة وضحاها بالذات في ظل الوضع «دا .. خليهم يحلموا.. والله ريال ولا دولار واحد ما بشمو»
وأقر رئيس الجالية السودانية، مساعد رئيس المجلس الأعلى للجاليات بمكة د. محمد الطيب بوجود إشكالات في تحويلات المغتربين خاصة في السعودية نتيجة لصدور قرار بمنعها سابقًا مؤكداً أهمية معالجة هذه المشكلة.
وأشار رئيس قسم الطلبيات بشركة شيكان للتأمين مسعد ناصر سيد لبداية التأمين للمغتربين من الشركة عقب الاتفاق الموقع مع جهاز المغتربين لافتاً لوجود طواف مشترك من الجهاز والشركة لتقديم خدمة التأمين للمغتربين وأسرهم او الودائع بالعملة الحرة وبدون مقدم وتسدد على أقساط وبذلك تُسهم في زيادة الموارد الأجنبية في النظام المصرفي، بجانب منحهم الإعفاء الجمركي وبذلك يزيد الإنتاج بالاستثمارات الممولة من البنوك.
جوافز تشجيعية
ودعا الى الإسراع في إصدار قرارات منح المغتربين حوافز تشجيعية عبر قيام مشروعات استثمارية وشركات مساهمة عامة في قطاعات مهمة بمساهمة المغتربين مع تهيئة مناخ الاستثمار بالاستفادة من قرار رفع الحظر الاقتصادي وتمكين المصارف من المنافسة في كيفية جذب التحويلات والمدخرات لدى المغتربين.
وكان النائب الأول لرئيس الجمهورية الفريق اول ركن بكري حسن صالح وجه بنك السودان المركزي بتسليم المغتربين لتحويلاتهم بالنقد الأجنبي وتفعيل البنوك والإسراع بإنشاء بنك للمغتربين وتشكيل آليات من الجهات المعنية لتعزيز دور المغتربين في دفع الاقتصاد الوطني وإنشاء صندوق تكافلي لدعم المغتربين عند العودة النهائية، فضلاً عن آلية أخرى لوضع سياسات وطنية للهجرة وإلغاء المساهمة الوطنية المفروضة على القطاعات غير المهنية ابتداءً من العام القادم. وعبر عدد من المغتربين عن ارتياحهم لصدور القرارات لدعم المغترب مؤكدين أهمية الإسراع بتنفيذها.
الضحافة.
| |
|
|
|
|
|
|
| |
محمد بشير عبادى
Nasr
عبدالعظيم عثمان
نزار عبد الوهاب
Hafiz Bashir
جمال ود القوز
الحاج حمد الحاج
عبد الباقي الجيلي
mohamed mamoun
MOHAMMED ELSHEIKH
محمد جبره
محمد محمود محمد
بدرالدين بابكر مصطفى
فيس بوك
تويتر
انستقرام
يوتيوب
بنتيريست