صحف الجرائم هي الأكثر مباعا وبرضو ما قاعدين يوقفوها ولا يحاسبوها رغم كترتها لكن ندر وندر جدا تلقي فيها اخبار جرائم متشابهة كل جريمة نسيجا لوحدها وتمتاز بغرابة الجريمة .. و تمتاز بفظاعتها ومرتكبي الجرايم زاتم زي قصص اجاثا كريستي ابعد الناس من الشك اب يقتل ابنه ابن يقتل والدته اب يغتصب بنته معلم شيخ خلوة امام جامع سيد الكنتين الفاتح ليهو في الحلة تلاتين سنة وثم الوصف الفظيع للجريمة وامسك الاسباب التافهة لحدوث جرايم القتل . يجيك احساس انك لو ركبت بص وقلت لي جارك عشان بسف ممكن اقعد جمب الشباك احتمال كبير يطعنك قصص خطف غاية في الادهاش . يعني ممكن ولدك يكون واقف في الحوش والباب فاتح تلقي خطفوهو اغتصاب بالكوم لاطفال . اطفال في اقصي حالات الطفولة تقرأ وتشعر انك خايف نفس تفاصيل حياتك الهادية دي ممكن فجأة تنقلب رأسا علي عقب تعمل حسابك !! ماهو انت عامل حسابك والقصة القريتها بتشبه ذات قصة حسابك العاملو دة انت تعيش في رعب من سيد الكنتين المعلم امام الجامع ود جيرانكم وابوهو زاتو ود اختك .. ود اخوك .. اخوك زاتو انت مرتاب دوما موسوس
12-21-2017, 08:19 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
انت عايش في رعب من انفراط الامن من ذهاب السلطة ! خايف تتحول اسرتك ضحية لجريمة بشعة في كوستي انتشرت جريمة اغتصاب طفلة . اغتصاب بشع . التفاصيل المنتشرة خطفوها وهي راقدة جمب امها واخوانها . ارتعبت كل الاسر من المغرب تلقا الناس متوجسة . مافي شافع برسلو للكنتين . مافي شافع يتأخر ربع ساعة من المدرسة الا تلقي الاسرة كلها متوترة انتشرت وقبضو الجناة واها مرت سنة ولا ازيد مافي زول عارف عملو شنو للمغتصب
12-21-2017, 08:23 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
تقديراتي الشخصية الجرايم دي بكثافتها دي مريبة جدا وبتفاصيل فظاعتها مريبة لا انكر حدوث بعضها القليل ولكن لا اظن بذات تلك التفاصيل انتشرت قبل فترة في كوستي قصة واحد بتاع فرن اغتصب طفلة لامن سمع امها بتناديها جدعها جوة الفرن القصة دي حكيت فيها شديد . شفتو ليكم فرن فيهو نفر واحد !؟ ياخ فيهو ما لا يقل عن ستة عمال حد ادني في قصص صحيح في جريمة لكن ما اظن لدرجة كم صحيفة اي واحدة عندها سبعة تمنية جرايم
12-21-2017, 08:27 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
عصابات منظمة للخطف حيوانات غريبة تجوس اطراف المدن والاحياء ظامئة تبحث عن ضحيتها رعب خوف اها من المستفيد لجعلنا نشعر بالرعب والخوف الخوف من انفراط الامن من ذهاب السلطة الامانة يأتي اولا من !!؟؟
12-21-2017, 08:41 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
تاااني السلطة يا قريبك؟ السلطة برضو العلّمت المواطن حب الشمار و خلّت جريدة الدار الأعلى توزيعا هي الخلّته يضغط زر الفورورد في الواتس قبل حتى يكمل القراءة كويّس
ياخى انت لو كتبت حرف وااااحد برااهو بعمل بوست و دى حقيقة ما مجاملة بس حقيقة الوضع مخيف جداً كل شئ ممكن يتصلح الا اخلاق المجتمع وحتى لو ح تتصلح دايرة زمن طويل جداً حسبنا الله و نعم الوكيل
12-21-2017, 09:02 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
انت يا ودو قايل نظريات الاعلام النازي بتعتمد علي شنو!؟ ما بتعتمد علي سلوك المواطن وسايكلوجيتو بتسوقو للمحلة الدايراها يصل ليها فبدلا من نشر الوعي والتوعية التي لا تصب في مصلحة السلطات الديكتاتورية . تعمل علي تكريس الجهل والخرافة وهي اسلحة تجعلها في مأمن عدو كل السلطات الديكتاتورية هو الوعي الوعي بالحقوق والواجبات وقوانين حركة المجتمع لتسريعها نحو الافضل ف شنو سمحت لجرايد الجريمة بنشر التفاصيل وامكن يزودوهم بيها . بدون مضايقات ولا حظر . وهم عارفين المواطن بتاع شمار .. الشمار البقراهو هو البشكل وعيو . ودة مقصد السلطة تشكيل وعينا بالاحساس بالخوف والمجهول لنتمسك بهذه السلطة خوفا من الفوضي
12-21-2017, 09:29 AM
عمر أبوعاقلة عمر أبوعاقلة
تاريخ التسجيل: 04-11-2016
مجموع المشاركات: 1321
وارد يا حفيظ .. وارد جدا أن يعمل نظام على تثبيت نفسه عبر ماكينة الاعلام
Quote: لنتمسك بهذه السلطة خوفا من الفوضي
لكن الفرضية الفوق دي شايفها بعيدة عن واقعنا لأنه المواطن واعي أن النظام نفسه هو من خلق هذه الفوضى النظام نفسه ضليع بعدد من حالات الاغتصاب والتحرش النظام نفسه هو من أضغف الأمن وعمل على تقوية الفصائل التي تزيد من عمره النظام نفسه هو من شتت المجتمع وفرز الناس كيمان ناس فوق وناس تحت دون خط الفقر وصقل لنا قانون غاب: (القوي من يملك سلاح المال) والمواطن عارف وشايف وواعي لهذا الدرك فما أتوقع أنني يوماً أشعر بالخوف على نفسي وأسرتي وألجأ لهذا النظام أو أدعو له بالاستمرارية وكثر غيري
ختاما مودتي وربنا يلطف بنا
12-21-2017, 09:45 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
كدي يا ابوعاقلة نمرق من شاشة السايبر دة ونعاين للواقع واقع الناس البتمثل ثقل السكان فكرة البوست جاتني من موقف بتكرر يوميا جمب محلي بعد صلاة العصر .. مجموعة لا تقل عن عشرة بتقعد جمبي يتونسو وشايلين الجرايد الاياها بتونسو في الجرايم دي دون ان يمسو الحكومة ولا دورها . بتكلمو عن البحصل دة . يقروا ويشمرو ويضيفو حكاوي سمعوها حكاوي المسؤولين دي ما بتتنشر في الجرايد عشان تتمسك بي لازم تحس بحوجتك لي تحس بالرعب ان تفقد الاستقرار الذي تحس به تلك الجرايم بتحصل للاخرين ما لي انا في واقع انا بعيد عنو يوماتي بقروا وبياخدو الكلام مسلم بيهو و ديل حقو الحكومة تشنقهم وحقو وحقو مافي واحد بقول هي السبب دة الواقع الاعلام وكورساتو في امريكا بلد صناعة الرأي العام
12-24-2017, 05:47 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
خبر واحدة جلدوها بتاكل باسطة مع شاب في غرفة النوم شوف تفاهة الاخبار وشوف تفاصيل التفاهة زاتا القصد التوضيح بفساد المجتمع المجتمع الساهمو هم في افساده بسؤ الافعال والاقوال
12-24-2017, 06:45 AM
عمر أبوعاقلة عمر أبوعاقلة
تاريخ التسجيل: 04-11-2016
مجموع المشاركات: 1321
يعني أنا أفهم انه واحدة قبض عليها مع غير محرم شرعي في غرفة نوم وإن كان دا ما نوع الصحافة التي ننتظرها طيب شنو الدخل (زوجة فنان شاب) في الموضوع وشنو الدخل (أكل الباسطة) في الموضوع
ات يا حفيظ الجرايد دي ياكافي البلاء مافيها رؤساء تحرير
الله كريم
12-24-2017, 07:15 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
انت عايش في رعب من انفراط الامن من ذهاب السلطة ! خايف تتحول اسرتك ضحية لجريمة بشعة في كوستي انتشرت جريمة اغتصاب طفلة . اغتصاب بشع . التفاصيل المنتشرة خطفوها وهي راقدة جمب امها واخوانها . ارتعبت كل الاسر من المغرب تلقا الناس متوجسة . مافي شافع برسلو للكنتين . مافي شافع يتأخر ربع ساعة من المدرسة الا تلقي الاسرة كلها متوترة انتشرت وقبضو الجناة واها مرت سنة ولا ازيد مافي زول عارف عملو شنو للمغتصب
12-24-2017, 06:24 PM
nour tawir nour tawir
تاريخ التسجيل: 08-16-2004
مجموع المشاركات: 17638
واحد بتاع فرن اغتصب طفلة لامن سمع امها بتناديها جدعها جوة الفرن القصة دي حكيت فيها شديد . شفتو ليكم فرن فيهو نفر واحد !؟ ياخ فيهو ما لا يقل عن ستة عمال حد ادني في قصص صحيح في جريمة لكن ما اظن لدرجة كم صحيفة اي واحدة عندها سبعة تمنية جرايم
12-24-2017, 06:32 PM
صديق مهدى على صديق مهدى على
تاريخ التسجيل: 10-09-2009
مجموع المشاركات: 10175
عصا نايمة وعصا قايمة من ديل واسفاى كاتلين الجدادة وخامين بيضا شر البلية ما يضحك ههههههه هوووووو غايتو ربنا يرحم أخلاق اهل السودان وزى ما بقول المثل البرقص ما بغطى دقنو والله عيب عديل
12-25-2017, 04:16 PM
أحمد الشايقي أحمد الشايقي
تاريخ التسجيل: 08-08-2004
مجموع المشاركات: 14611
حباب ستي نور يخلو المواطن في خوف وفزع يعني اضرب ليك مثل واحد يقول ليك ديل الله يطيرهم مننا ثم سيتدرك ويردف قائلا الواحد خايف يمشو بي هنا البلد دي تولع نار هسة هي مولعة نار .. اتون كأنه من سعر
12-25-2017, 05:48 PM
nour tawir nour tawir
تاريخ التسجيل: 08-16-2004
مجموع المشاركات: 17638
حباب ستي نور يخلو المواطن في خوف وفزع يعني اضرب ليك مثل واحد يقول ليك ديل الله يطيرهم مننا ثم سيتدرك ويردف قائلا الواحد خايف يمشو بي هنا البلد دي تولع نار هسة هي مولعة نار .. اتون كأنه من سعر ...
أت اللى سيدنا و تاج راسنا يا ود ابسن.. لانك دايما بتدخل بينا فى الغريق مباشرة ... و بدون لف او دوران.. الاستدرك دا سيدو ما عندو موضوع.. لانو مهما وّلعت مستقبلا.. فما حتحصل ربع البيعملوا فيه الكيزان.. و لا البيحصل فى زمن الكيزان.. لانه انحنا هسى فى زمن الانحطاط الحضارى بكامل هيلمانو..
و يا ود ابسن ما طالبنى حليفة.. مشية الشووم المشيتها للسودان من 2007 لى 2012.. شفت وسمعت حاجات لامن حصل لى خلل فى مفهومى للدنيا كلها.. لولا ان لطف الله وقدر و بكيت وستغفرت .... حتى رجع لى التوازن النفسى مرة تانية..
جاتنا البت الشغّاله ذات صباح.. تبكى وترجف متل القصبة.. و فين وفيييين لامن هّديناها و قدرنا نسمع منها القصة.. و القصة بأختصار شديد هى انو جارتهم (الحيطة هنا شوالات وورق كراتين !).. اها جارتهم دى ست شاى... عايشة مع ابوها.. وزوجها.. و بّتها رضيعة... أها فى اليوم داك الزوج اضطر يمشى الشغل بالنهار (لانه بيعمل حارس بالليل لامن ترجع هى من السوق) .. فأضطرت تسيب بتها وهى رضيعة مع جدها... الحصل انه الجد اعتدى على بت بتّه الرضيعة و مزقها شر ممزق لحدى ما ماتت! تقول لى باسطة فى اوضة نوم ؟ ديك باسطة يا اب سن.. فتخيل اركان الجريمة اللى حصلت من اب فى حق ابنته بأن أعتدى على ابنتها.. و من جد فى حق حفيدته.. و من رجل مسن فى حق رضيعة.. و خيانة زوج ابنته فى ما فعله فى ابنته الرضيعة.. ثم خيانة الامانة....الخ عشان كدا الاستدراك حيلة بيخدع بها المستدرك نفسه.. لانو عارف و متأكد انو السودان الان فى الدرك الاسفل من الوجود الانسانى.. و فى قاع جهنم الحمرا... لدرجة انو اصبح واحد من الدول المهددة بالانقراض..
12-25-2017, 05:58 PM
nour tawir nour tawir
تاريخ التسجيل: 08-16-2004
مجموع المشاركات: 17638
نسيت اقول ليك يا اب سن.. انو الوالدة رفضت تفتح بلاغ ضد ابوها (عشان ما تفضحه ) ! و الزوج وافقها الرأى لان المجرم عمه.. كل القدرو عليه انهم رجعوه البلد... و رحلوا من الحلة..
يعنى البيحصل خارج نطاق الاعلام..( الذى يسبب الخوف و الرعب).. بسبب (نظرة المجتمع).. أخطر بكثير مما ينشر فى الاعلام.. و لا تنسى الوجود الاجنبى اليوم فى السودان.. فهو مكثف.. و يّدخل الى السودان مفاهيم وعادات و تقاليد ليست سودانية.. و هناك سودانيين يتأثرون بها ويقلدونها.. لاحظ التغيير الذى حدث فى الزى السودانى... على العموم انحنا فى مصيبة... مافى ذلك شك..
12-25-2017, 07:47 PM
Asim Ali Asim Ali
تاريخ التسجيل: 01-25-2017
مجموع المشاركات: 13492
ابوسن وضيوفو -سلام عليكم الاعلام مرئي ومسموع مقروء الراديو ونسه تلفونات على الهواء وأغاني والتلفزيون نفس الحال بدل وجلاليب فاخره وتياب فاخره وحنه ومجاملات ويرامج طبخ وونسه وغنا وعبارات مجامله لا طعم لها والجرائد سياسية باهته وكوره واخبار منقولة بالحرف من المواقع العالمية.مافى صحافه حقيقيه تغوص في عمق المجتمع وتشريح مشاكلو . زمان الإذاعة نفحات الصباح ولسان العرب برامج متنوعة ومسلسلات مازالت في الذاكرة لقيمتها. التلفزيون قناة واحده وزمن محدود لكن كان في موضوع يهمك للراحل حسن عباس صبحي ومسابقات المدارس والمروج الخضراء...و جنه الأطفال ماده سودانية خالصه وهادفه العم شعبان واسكتشات جحا و(لا يا عزوز) والرسائل المهمة للطفل والاخبار في الراديو والتلفزيون لغة جيده ومظهر محترم. الاعلام انحدر بجميع اشكالو انحدر وبقى بعيد عن تقديم ماده مفيدة وفاعله للمتلقي سامع او مشاهد او قارئ. وعى المواطن أصبح مشوش بسبب تعدد وسائط الاعلام رسمي او خاص او تواصل اجتماعي والنظام له نفاذ من خلال كل منها. نحنا فاقدين اعلام رسمي او خاص يضع يده على اوجاع المجتمع وتشريحها بالراي العلمي المسئول.دون رقابه اوسيطره خلاف الامانه العلميه والمسئوليه الاخلاقيه . النظام مسئول عن حاله الاعلام عامه وحاله موضوع البوست خاصه ايجابا/سلبا و فعلا /تجاهلا ولاننسى وسيله اعلام تستخدمها بعض الاجهزه للتحكم والسيطره واداره الراى العام حيث تستخدم احاديث المجالس لبث ما قد يحول الاشاعه المحبوكه الى حقيقه والامان الى خوف .
شخصيا مقاطع الاعلام المحلى الاذاعه الوحيده التى اسمعها اذاعه جامعه السودان المفتوحه ومطالعه بعض مقالات الصحف على مواقعها الالكترونيه
12-26-2017, 05:59 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
ولي حد كبير كمان يا الشايقي اليومين دي لافي فيديو عن قتل فتاة في صراف آلي ومحددين المكان الثورة ام درمان والحادث برة السودان ومن 2013 شوف دة معاهو كم خبر مضروب .بنتفي منها الصدفة ويثبت القصد
12-26-2017, 06:03 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
صحي يا عاصم الواحد يعجز عن تتبع برنامج سوداني واحد لمدة خمسة دقايق سماجة وسخف في الحوار دة غير الجلسات المتشتحة للضيوف ومقدم البرنامج والدعايات الكل دقيقة تصدق الاغنية لو داير تسمعها لي نص الشاشة دعايات مقسمة لي كم سطر
12-26-2017, 06:15 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
يا ود اب سن اتفّق معك حول مسؤولية الحكومة بتقصيرها في احد مسؤولياتها الأساسية وهي توفير الأمن للمجتمع و توفير العدالة المستقلة ايضا و افقار الناس و الفساد وغيره لكن لا افهم تحميلها كون احدهم عايز يتونس شال فيديو من 2013 و طمس معالمه واعاد توزيعه على اساس انه جريمة سودانية!! وهذا على سبيل المثال فقط المجتمع يتحمل و الفرد يتحمل و اعفائهم من المسؤولية وتحميلها للحكومة فقط يخلق نوع من التواكل و التهرب بل و التبرير كمان
________________________
اتمنّى أن لا يقرأ أحدهم / إحداهن كلامي بتذاكي لاداع له على انه دفاع عن الحكومة
12-26-2017, 08:46 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
حولاااا طول بالك يا ودو تربية المجتمع دة بتبدا من الطفولة وانت ماشي غرس القيم الانسانية الراقية .. ومعاقبة من يقوم بتجاوزها .. وتحفيز من يضرب المثل في الارتقاء بتبدأ كدة بالتوعية والتحفيز وضرب الامثلة واخيرا العقاب . حتي يصير السلوك جزء من السلوك اليومي الاعتيادي ودة مسؤولية الدولة .. هي بي مؤسساتها تسعي لي دة عبر وسايل مختلفة واحد منها رياض الاطفال والمؤسسات التعليمية .. والاعلام الاعلام وبشكل محبب وجذاب وليس وعظا غليظا جافا بعد دة كلو بتلقا النشاذ لكن الحكومة لامن تكون شايله عكازها وتعرض قدام الناس وقايداهم أكيد الناس بكشفو كشف تمام
12-26-2017, 08:49 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
معليش يا قريبك اختلف معك جزئيا, اعفاء المجتمع و الأفراد من تسؤولية التقصير ورميها على الحكومة فقط ليس أمرا صحيحا تربية ابناءك على قيم الصدق أمر شخصي إماطة الأذى من الطريق و الحفاظ على حق الناس فيه قال به الإسلام, نحنا نلقي نفايتنا في الطريق العام و نحتله ونشغله بالدرابزين و الصيوانات ونلعن أم الحكومة التي لا تهتم بجمع النفايات! هل نحافظ على المال العام؟ هل نعصم السنتنا من اعراض الناس؟ ألا نعيد توزيع ونشر الأكاذيب و الفبركات وأخبار الجرائم الغريبة - قول الفبركة حكومية - لماذا نعيد نشرها وتوزيعها بهذه السبهللية و الأريحية! لماذا نقبل و ندفع لرشوة ولماذا صارت أمرا معتادا لا نستنكره
يا عزيزي لا اعفي الحكومة و النظام وكذلك لا اعفينا, علينا ان سعى للحل و العلاج على المستويين, اسقاط أو اجبار النظام على الإصلاح و في نفس الوقت معالجة عيوب المجتمع واعادة القيم التي بدأت تندثر
12-26-2017, 10:33 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
قلت شنو يا ودو ؟!! نجبرو !! وهو نحن بنسوي في شنو هسة نحن دايرين نشيلو عديل لأنو كل هذه القيم الفاسدة والمنحطة هو يضرب فيها افضل الامثلة . مش ضرب الامثلة الشخصية وبس .. بل المساعدة للافلات من العقاب لكل من ينتسب لأي واحد من السلطة مهما صغر منصبه يا ودو الآباء والاسر ما مقصرين . لكن تعال شوف التأثير الكبير من وين . مبدأ الثواب والعقاب هو المحفز الجيد والصارم ودة حكم الحكومة الناس بتقرأ في تقرير المراجع العام وبتشوف في محيطها منو القاعد يعتلي هرم القمة المالية والاجتماعية والسلطوية وتقارنو بي سلوكو المعروف والمجاهر بيهو وبتعرف من القاعد يفتقر وينزل السلم وسلوكو واخلاقو الناس القاعدة تمشي فوق ياتا والبتهبط ياتا . الاطفال والشباب ما آلات برضو بشوفو وبسمعو لو كانت في سلطة محترمة وامينة أكيد كانت بتدعم مهمة الاسر . وحتي الاسر الما منضبطة القانون بأدبها وبتعرف نهاية الطريق دة وين السبب الاول والمهم والرئيسي هي الحكومة .. ان صلحت صلح المجتمع لأنو في يدها القانون والسلطة والقوة وبالجمبة كدة الآباء مالاقين وقت يقعدو مع اولادهم الحكومة شاغلاهم شغلة شديدة بي معاشهم تقنع ولدك بالقراية كيف وهو شايف وانت شايف الشهادة لا تمثل شيئا بل ان تكون من السلطة دة المهم سنويا بنقرأ تقرير المراجع العام وما شفنا مسؤول واحد قدمو للمحاكمة بل برقوهم ف شنو شغالين وشغالين لنؤكد ان بقاء هذه السلطة هو تكريس للفساد وانحطاط القيم
12-26-2017, 10:46 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
ما لا يدرك كلّه لا يترك جلّه, أنا قلت إسقاط النظام أولا ثم قلت أو إجباره على الإصلاح عموما زي ما قلت ليك حديثي ليس لتبرأة النظام لكن في نفس الوقت ضد تحميله كامل المسؤولية واعفاء المجتمع والأفراد منها هذا الإعفاء سيقود لنوع من التواكل و التبرير
12-26-2017, 12:56 PM
nour tawir nour tawir
تاريخ التسجيل: 08-16-2004
مجموع المشاركات: 17638
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالحفيظ ابوسن
محمد البشرى الخضر
عمر أبوعاقلة
nour tawir
صديق مهدى على
أحمد الشايقي
Asim Ali
فيس بوك
تويتر
انستقرام
يوتيوب
بنتيريست