|
|
|
 Re: أحزان المجتمع الجمهوري: العم الأستاذ عوض � (Re: MOHAMMED ELSHEIKH)
|
الأخ حيدر بدوي صادق
الأخ علي الكنزي
الأخ نصر الدين عثمان
الأخ ياسر الشريف
الأخ أحمد حمودي
الأخ عمر دهب
الأخ عمر عبدالله عمر
الأخت أمتثال عبدالله
الأخ عادل محمود الأمين
الأخ عاصم فقيري
والأخ محمد الشيخ
شكر الله لكم جميعا وتقبل منكم وأكيد اعتذاري فقد كنت على سفر
الله يتقبل منكم ويثيبكم الخير كله عن الفقيد العزيز وعنا
| |
  
|
|
|
|
|
|
|
|
Re: أحزان المجتمع الجمهوري: العم الأستاذ عوض � (Re: عبدالله عثمان)
|
المصدر: عبدالله الفكي البشير، صاحب الفهم الجديد محمود محمد طه والمثقفون: قراءة في المواقف وتزوير التاريخ، ط1، دار رؤية للنشر ، القاهرة، 2013، ص 330- 332.
مذكرات تلاميذ الأستاذ محمود وتلميذاته
كتب خمسة من تلاميذ الأستاذ محمود مذكراتهم. نشر ثلاثة منهم مذكراته وهم: إبراهيم يوسف فضل الله وعوض لطفي عبدالله، وبتول مختار محمد طه.كما دفع مجذوب محمد مجذوب بمذكراته للمطبعة، وهؤلاء من أبكار تلاميذ الأستاذ محمود. أما بتول، فهي ابنة شقيق الأستاذ محمود وتلميذته، وقد ظلت أكثر الناس التصاقاً به. أيضاَ، جمع حمد النيل عبدالله العركي ودوَّن ما سمعه من أحاديث الأستاذ محمود في مخطوطة. مثّل ما جمعه العركي من أحاديث وبما قدمه من شرح وتصوير للمناخ العام حول الحديث، مشروع مذكرات على نمط جديد في التدوين وتسجيل المشاهدات وجمع الأحاديث وتوثيقها في السودان وربما العالم، مع الاحتراز. إن المذكرات الخمس قدمت شهادات قوية في حق الأستاذ محمود وحول مشروعه وعن طبيعة مساجلاته وعن تاريخ الحركة الجمهورية وتطورها. كان كُتابها الخمسة من الملازمين للأستاذ محمود ومن الشاهدين والمعاصرين للأحداث والمشاركين في صنعها، ولهذا فإن مذكراتهم ذات قيمة تاريخية عالية فهي تمثل أول مصدر تاريخي وصلنا من تلاميذ الأستاذ محمود، يحمل تجربة كل منهم الذاتية. ولهذا فإني أستميح القارى الكريم عذراً في أن أقدم له لمحة مختصرة عن كل منها، باعتبارها أول مذكرات تصدر من تلاميذ الأستاذ محمود، وباعتبار أن ما حوته من معلومات وأحداث تتيح الفرصة للمقارنة بتقديم قرائن جديدة لمقارنتها مع ما هو متوفر لدينا من معلومات حول الأحداث والوقائع التاريخية. سأستعرض باختصار كل مذكرة من المذكرات الخمس، مرتبة وفقاً لتاريخ الصدور.
مذكرات عوض لطفي عبدالله
نشر عوض لطفي كتاباً بعنوان: زمان الوصل: محطات وسندات ، تضمن الكتاب، كما أشار مؤلفه، بعض ما يذكره من ذكرياته. ففي الأصل، كانت نواة الكتاب محاضرة قدمها عوض في مدينة أيوا بالولايات المتحدة الأمريكية، يوم 28 يونيو 2002م، استجابة لدعوة الجمعية السودانية لخدمات المجتمع بالمدينة. أعجب بعض الحضور بالمحاضرة، فطلبوا منه الموافقة على تسجيل تاريخ حياته منذ ميلاده عام 1920م وحتى تاريخ مجيئه لأمريكا. وافق عوض لطفي، فتم التسجيل، ثم تم تفريغ المادة وإعدادها للنشر، وصدر الكتاب. تهيكل الكتاب في مقدمة وأربعة أبواب، إلى جانب فصل في آخرها بعنوان: "شخصيات يجب معرفتها". يقع الكتاب في 134 صفحة من القطع المتوسط. أشار عوض لطفي إلى الأستاذ محمود خاصة في الباب الثالث، وقدم معلومات عن النضال الوطني للأستاذ محمود في النصف الثاني من أربعينيات القرن الماضي. تحدث عوض حديثاً مهماً عن ثورة رفاعة.
تعود أهمية مذكرات عوض لطفي إلى أنه شاهد عيان، عايش الأحداث بل شارك في بعضها، خاصة ثورة رفاعة، إذ كان عمره وقتئذ ستة وعشرين عاماً، وكذلك عايش خروج الأستاذ محمود من اعتكافه بمدينة رفاعة ورافقه في أول جولة له خارجها. هنا ربما كان عوض لطفي هو المصدر الوحيد الذي على قيد الحياة مِنْ مَنْ عايش ثورة رفاعة وخروج الأستاذ محمود من اعتكافه. قدم لنا عوض معلومات نادرة وفي غاية الأهمية. إن صلة عوض لطفي بالأستاذ محمود، صلة كبيرة وباكرة، فهو شقيق "أمنا" آمنة زوجة الأستاذ محمود، كما أنه من تلاميذه الأبكار. فقد رافق عوض لطفي الأستاذ محمود وزوجته آمنة لطفي، في أول جولة بعد خروج الأستاذ محمود من اعتكافه بمدينة رفاعة في أكتوبر عام 1951م. فعندما أراد الأستاذ محمود أن يخرج من خلوته أخبر شيخ لطفي، الذي بدوره أرسل في طلب ابنه عوض، الذي كان يعمل بمصلحة الغابات بالدندر، وطلب منه الحضور فوراً إلى مدينة رفاعة، لمرافقة الأستاذ محمود وشقيقته آمنة زوجة الأستاذ محمود في جولة لبعض المدن. حضر عوض لطفي ورافق الأستاذ محمود وشقيقته آمنة، زوجة الأستاذ محمود في جولة انطلقت من مدينة رفاعة، وبدأت بمدينة أم درمان ثم مدينة عطبرة، وبورتوسودان وكسلا والقضارف. كان الأستاذ محمود كلما وصل إلى مدينة أقام المحاضرات وحدث الناس في شؤون السودان والإسلام. ومن مدينة القضارف رجع عوض إلى رفاعة، وواصل الأستاذ محمود جولته بمعية زوجته إلى مدينتي كوستي والأبيض .
| |
|
|
|
|
|
|
|
|
|
Re: أحزان المجتمع الجمهوري: العم الأستاذ عوض � (Re: عبدالله عثمان)
|
نقلا عن صحيفة الصحافة
---
ونسة مع عوض لطفي
ابوى سماهو بابكر بدرى و انا اول سودانى يزرع بن
اتونس معاه خليفة حسن بلة
العم عوض لطفى تعرفت عليه بواسطة زميلنا علاء الدين بشير واتفقنا على ونسة خفيفة عن رحلته الطويلة فى الحياة « أمد الله فى ايامه » فهو مهموم بالتوثيق وحاضر الذاكرة فدعانا الى افطار رمضانى دسم فكان معنا الزميل عبدالمنعم ابوادريس وتشاركنا ثلاثتنا فى ادارة ونسة مع العم عوض لطفى .. ومن رفاعة للخرطوم والشرق والشمال الى الجنوب .. قفزنا فى محطاته سريعا والتى ستصدر فى كتب جمعها هو ينتظر اخراجها قريبا للناس ...
* انتو من رفاعة ؟
* = بالحيل
* * وبالتأكيد من ديم لطفى وهو فى مدخل رفاعة ؟
* = هو فى الحقيقة ما كان اسمه ديم لطفى .. ابوى الله يرحمه كان بقول عليه ديم الاوسط وفى ناس بقولوا عليه ديم القريداب
* * وانتو اصلا قريداب ؟
* = نحنا ركابية صادقاب
* * لكن لطفى دة اسم ما بسمو بيهو كتير عند السودانيين ... جاكم من وين ؟
* = ابوى الشيخ لطفى كان من اوائل تلامذة الشيخ بابكر بدرى
* * وين ؟
* = اصلا مدير المعارف طلب من الشيخ بابكر بدرى يسوق عشرة من اولاد رفاعة عشان يتعلموا فكان كلما يختار جماعة يمشو معاه يجو الجماعة لأهلهم يقولوا ليهم انتو دايرين تودوا اولادكم المدارس عشان تطلعوهم (باطلين) فيسحبوا الاهل اولادهم وبعد صعوبة جمع عشرة اولاد واصلوا معاه من ضمنهم ابوى الشيخ لطفى
* * انا كنت بسألك من وين جاء اسم لطفى ؟
* = اصلا هو اسمو محمد عبدالله قوى
* * ولطفى ؟
* = دة سماهو ليهو الشيخ بابكر بدرى
* * ليه ؟
* = كانت عندو عادة يختار لكل واحد من تلاميذه اسم فأختار لأبوى اسم لطفى لأنو بقولوا انو زول لطيف وبقول على ابوى ابنى البكر .. واختار للشيخ شبيكة عزمى والشيخ على سماهو ناصف وواحد اداهو عزمى والاختيار دة حسب صفات الواحد
* *...............................؟
* = ابوى واصل فى التعليم فى كلية غردون ودخل قسم المعلمين ولغاية ما بقى مفتش لغة عربية وكان الشيخ عمر اسحق من ناس امدرمان هو اول مفتش اول اللغة العربية فى السودان وبعده الشيخ كمال الدين عباس من بربر وبعدهم الشيخ لطفى من رفاعة بعدها اتغير النظام وبقى هناك قسم فى كل مديرية وكان لطفى فى الخرطوم ويلف على السودان كله وبعد ما اخد المعاش أسس مدرسة لطفى فى رفاعة
* * انتو ما عشتو فى رفاعة كتير ؟
* = لا كنا هناك لغاية ما جيت كلية غردون
* * لكن قرايتك كلها فى رفاعة ؟
* = ايوة بعدين اتذكر ليك موقف جيد من ناس رفاعة ... كانت المدرسة بتقبل طلبة سنة وتفط سنة
* * ليه ؟
* = قالوا بسبب التكلفة .. فقاموا ناس رفاعة قالوا ابدا لازم تقبل كل سنة وهم يتكفلوا بالطلبة وفعلا اتقسموا طلبة الداخليات على بيوتهم .. دة موقف عظيم يشبه ناس رفاعة
* * يعنى كان بجوها طلبة من مناطق بعيدة منها ؟
* = ايوة بجو ناس سنجة والقطينة والكوة واولاد كوستى
* * ابوكم مرتبط بالتعليم لكن انت ما مشيت فى نفس الخط ..
* = انا ما مشيت فى خط التعليم لكن اخوانى فيهم من مشى مع ابوى .. يوسف لطفى كان مدرس فى رفاعة واشتغل كتير لكنهم فى النهاية بقى نائب وكيل وزارة المالية والآن استقر فى امريكا . عبدالرحمن لطفى كان مهندس وبقى وكيل وزارة الرى لأقسام الخزانات ... على لطفى كان مدير تعليم فى منطقة الفاو وانا اتجهت للغابات وكنت مفتش غابات واتنقلت فى الشمال واشتغلت فى الجنوب
* * كانت دى رغبتك دون تدخل من الوالد ؟
* = لا ما بتدخل فى اختيارنا اى زول حسب رغبته
* * دخلت كلية غردون سنة كم ؟
* = سنة اربعين
* * بتتذكر اساتذتك وزملاءك فى رفاعة وفى كلية غردون؟
* = ناظرنا فى رفاعة كان عبدالقادرشريف ومن دفعتنا كان صلاح الدين المليك وحسن سوطرى ومبارك على الشيخ وبعدنا ناس محمد ابراهيم ابو سن وعوض الكريم سنادة كان مدير مشروع الجنيد وفى غردون كان معانا المليك والنزير دفع الله ومورس سدرة وعثمان عبدالله وبابكر عوض الله
* *والغابات كان تخصص قديم فى الكلية ؟
* = لا كان فى مفتش فى القضارف انجليزى فى سنة واحد وعشرين طلب يفتحوا مدرسة للغابات والمالية ماوافقت .. والحقيقة اتفتحت بعد صعوبة وممانعة فى بداية الامر من وزارة المالية .. وفى اواخر العشرينات وافقوا ليهو
*
* *..............................؟
* = ابرز ما كان فى دراستنا للغابات هو النظام العملى يعنى بعد ما ناخد النظريات يمشوا بينا للعملى ويقول ليك اهو دى شجرة وزعها لينا بتستفيد منها شنو . طبعا بتقسمها حسب معرفتك وقرايتك وطوالى بعدها يديك الفاس وبقول ليك طلّع القلتو هسة دة منها .. برضو كنا نركب الجمال من غرب امدرمان ويقولوا لينا تاخدوا الاتجاه الفلانى بتلقى فيها شجرة تحتها تلقى ورقة تحدد لينا اتجاه تانى وطبعا معانا البوصلة عشان نعرف نتعامل بيها والحكاية دى تستمر لعدة ساعات
* * كنتوا اول دفعة تقرأ غابات ؟
* = لا نحنا الدفعة التانية ... الدفعة الاولى فيها عبدالله ابوراسين من الابيض وابراهيم طه ا لفكى من رفاعة وعلى عبدالرحيم من رفاعة وابراهيم مالك ؟ والد وزير الاعلام الزهاوى ؟ من رفاعة وواحد من عطبرة كان قبطى
* *................................؟
* =اسس مناشير لأنو الاشجار كانت قايمة بطريقة طبيعية ومافى زول استفاد منه فأفتتح اول منشار فى( لونى ) جنوب سنجة فى الثلاثينيات والتزمت الغابات انها تمول السكة حديد بكل ما تحتاجه من فلنكات ودى كانت بتجينا من برة السودان وبعده اتفتحت عدد من المناشير
*
* *وكيف كانت اجواء الخرطوم اثناء الحرب العالمية التانية ؟
* = طبعا كانت الاجواء فى كل السودان اجواء حرب خاصة الشرق لأنو بورسودان كانوا بضربوها وكسلا برضو الخرطوم كانوا بضربوها ونحنا حضرنا وقت انضرب حمار كلتوم ست اللبن
* * يعنى دى كانت حادثة حقيقة ؟
* = ايوة االقنابل وقعت وكسرت بوابة مدارس الاحفاد وقتلت حمار كلتوم بعدين مدارس الاحفاد عوضوها
* * معناها كلتوم ما عوضوها
* = (يضحك )
* * وكنتوا بتتابعوا اخبارها ؟
* = ايوة وكنا بنسمع فى اذاعات ألمانيا وايطاليا انو تم ضرب مصنع ضخم فى الخرطوم لصناعة الصينى وهو فى الحقيقة بوصة البعملوا فيها شغل الفخار يعنى حاجة ما فيها اى شئ
* * يعنى زى حكاية مصنع الشفاء
* =( يضحك ) تماما .. الطليان جو من تسنى ووصلوا كسلا ورغم انو الطليان والألمان ضربوا لندن الا انه تشرشل كان بقول فى تصريحاته انهم حينتصروا وفعلا دة تم بعد ما بريطانيا استدعت جيوش الدول الكانت تحت سيطرتها وبى كدة انتصروا .. تعرف انو طلعت فريد دة لعب دور كبير جدا هنا فى الحرب العالمية التانية
* * كيف ؟
* = كان وهو ضابط صغير كان بتنكر فى زى راعى ويسوق قدامو بهايم و معاه عساكر متنكرين ويدخل كسلا ينقل منها الاخبار وهو سبب اساسى فى استعادة كسلا
* *النشاط جوة كلية غردون كان كيف ؟
* =كان شعورنا كله مع دول المحور وكنا بنحب هتلر جدا كراهية فى الانجليز
* *انتو العشتو بداية السودنة ؟
* = ايوة محمود الفضلى كان ليهو فضل كبير فى السودنة لأنو كان رئيس لجنة السودنة ونفذها فى وقت وجيز حيّر الانجليز
* * وانتو كنتوا جاهزين تحلو محل الانجليز ؟
* = طبعا ياخى لأنو السودانيين كانوا ماسكين فعليا كل المصالح بس المدير هو الانجليزى.. المالية كانوا ماسكنها سودانيين والميزانية برضو وكل المصالح
* * بعد ما اتخرجت اول مكان تشتغل فيه وين ؟
* = انا استلمت قسم الغابات فى الدويم من الجبلين لغاية جبل اولياء شرق وغرب .. بعده نقلونى كسلا عشان اسودن وظيفة الخواجة هناك وفعلا فكنت مسئول من نهر الرهد الى كسلا والقاش وجبيت وبورسودان وجيت الحواتة وبعده مشيت الدندر
* * وظليت بس فى الغابات ما جيت المصلحة او الوزارة ؟
* = لا لكن كانوا انتدبونى ناس الغابات عشان امشى معى دكتور قرين ودكتور جون احوّل معاهم الفحم النباتى لى فحم حجرى فى عطبرة بعد ما خافوا انو ما يجى للسودان الفحم الحجرى وفعلا نجحنا فى دة نجاح كبير وكانوا ناس السكة حديد دايرينى اقعد معاهم نهائى لكن انا رفضت
* * حبا فى الغابات ؟
* = طبعا ياخى انا ارتبطت بها ارتباط كبير
* * والغابات هى الوصلتك الجنوب ؟
* = الجنوب مسكت غابات من شمال ملكال لغاية جنوب الجبلين شرق وغرب وكان مأمور الدينكا فى الرنك ابراهيم بدرى وكان الدينكا بحبوه جدا وبطلقوا عليه لقب ( ماريال)ودى معناها التور الابيض العظيم
* * لكن الغابات بقت مربوطة الآن بالتمرد
* = ( يضحك ) هى بينى وبينك مريحة للداير يندس .. والله ذكرتنى حكاية بمناسبة التمرد كانوا معانا جماعة فى ياى ضابط البوليس جنوبى وعدد من المسئولين هناك جنوبيين فجونا الجماعة ديل وقالوا لينا يا جماعة نحنا اخوانا الجنوبيين فى الغابة بجونا نص الليل يشيلوا مرتباتنا وهدومنا وحاجاتنا السمحة لأنهم بعرفونا فحقو تكلموا على بلدو ينقلنا الشمال ويجيب شماليين بدلنا الناس ديل ما حيعرفوهم وما حيسألوهم
* * على بلدو كان شنو الوقت داك ؟
* = كان مدير الاستوائية
* * وقمتوا بالواسطة ؟
* = طبعا كلمناه لكنهم فهموا الكلام بطريقة تانية وقالاوا بالعكس الأمن مستتب والحكومة مسئولة عن امن الشعب وخطب .. النتيجة كانت انو ناسنا الجونا ووسطونا دخلوا الغابة حتى شالوا معاهم رخصتى بتاعة السواقة كانت عندهم للتجديد ..
* * وظليت فى الجنوب ؟
* = ايوة لغاية ما استقلت هناك وبرضو بعدها بقيت فى الجنوب
* *استقلت سنة كم ؟
* = سنة تمانية وستين
* * ليه ؟
* = لأنى لقيت انو احسن لى ازرع بن وفعلا كنت اول سودانى يعمل مزرعة بن فىالجنوب
* * وين؟
* = فى ياى .. والرئيس عبود جاب لى جواب رغم انى ما قابلته لكنه اشاد بالفكرة وقال انو بستدل بى قدام نا س البرير وابوالعلاء وناس كردمان لأنو بى عملى دة بوفر لخزينة الدولة تلاتة مليون عملة صعبة وقال لى انو لو احتاجو لمساعدة نساعدهم وهو وعدهم بالموافقة على اى مشروع يطلبوه هناك
* * وفعلا وافقوا هم ؟
* = جانى منهم أحمد زين العابدين ومحمود حسن قبانى والسر عباس بعدهم جاء خضر حمد لقى المحلات الكويسة انتهت لكن لقينا ليهو فى مريدى ... زراعتنا نجحت نجاح شديد وأول بن طلع من مزرعتى رسلت منه للرئيس عبود بواسطة قائد القيادة الجنوبية الطاهر عبدالرحمن مقبول ورسلوا لى شكر واللواء محمد احمد عروة كان وزير جاء وسأل منى وقال لى لو داير اى مساعدات نحنا جاهزين وبعدنا برضو اشتغلوا فى المزارع ناس جورج حجار
* * ...........................؟
* = جورج حجار فى الجنوب كان وكيل بريد عندو لورى بلف بيهو يوزع البوستة ويستلم البوسته فعرض عليه واحد من الانجليز هناك مزرعة كان عاملة واحد انجليزى بالدس فبعد ما طردوه باعوا مزرعته لجورج حجار بى تلاتين جنيه ودة كان سعر اسمى .. زرع فيها شاى وتباكو وبن برضو لكن المؤسف لقى نوع البن (أرابيكا) ودة نوع ما بقوم الا فى المحلات العالية فما نجح
* * وانتو كنتوا بتزرعوا ياتو نوع ؟
* = نحنا جبنا( الروبستا ) وبعدها جورج حجار اتجه لزراعته ونجح معاه .. برضو زرعنا نوع اسمه ( اكسلسر) ودة بحبوه ناس الشرق لأنو بعملوا مننه البكر والتنى وتانى التنى ويظل مر جدا
* * .............................؟
* = كانت مزرعتى برضو محل اجتماعات للحكومة مع ناس زائيرويوغندا
* * هسة اخبار مزرعتك شنو ؟
* = طبعا مع الاحداث بتاع الحرب الطويلة وقفت تماما ونحنا اتضررنا وقدمت طلب لتعويض مبلغ 15 مليار وانا عايز ارجع الجنوب وأعمر زى ما هم طلبوا من الجنوبيين يعمروا .. انا ياخى اتبرعت ببندقيتى لتنمية الجنوب وهى آخر حاجة كانت عندى بمناسبة اتفاق المائدة المستديرة
* * انا عرفت انك بتعرف رطانة قبائل من الجنوب
* = الانجليز كانوا بيصروا على انو اى زول داير يشتغل فى الجنوب لازم يعرف لغة المنطقة وكانوا البمتحن لغة من هناك وينجح فيها بمنحوه مرتب سنة حافز والامتحان بعملوه فى كلية غردون بجيبوا ابراهيم بدرى مفتش الدينكا ومعاه مفتش الانواك ومفتش الشلك وبعض القسس يمتحنوا السودانيين والانجليز
* * انتو استقبلتو طلبة جنوبيين فى مدرسة لطفى .. دة كان اقتراح منكم ام من جهة تانية ؟
* = لا كان اقتراح من اولاد الشيخ لطفى .. لأنو بسبب حوادث حرب الجنوب اكتشفنا انو بعض الجنوبيين بمشو يقروا فى يوغندا وكينيا ولقينا فى جزء كبير فى الخرطوم ففتحنا المدرسة دى للطلبة الجنوبيين فكانت لفتة لقت صدى طيب وسطهم وسمعنا انو فى ناس من الطلبة ديل مشوا مناطقهم واقترحوا على قيادتهم هناك يطلقوا اسم لطفى على مرافق عامة وفعلا الآن فى شوارع فى بعض مدن الجنوب اسمه على الشيخ لطفى
* * فى النهاية لو قلت ليك بعد جولتك الواسعة فى كل اتلسودان تحب تعيش فى ياتو منطقة ؟
* = ياى .. فى الجنوب
| |
|
|
|
|
|
|
| |
عبدالله عثمان
Haydar Badawi Sadig
Ali Alkanzi
نصر الدين عثمان
Yasir Elsharif
احمد حمودى
عمر دهب
Omer Abdalla Omer
adil amin
Asim Fageary
MOHAMMED ELSHEIKH
عبدالحفيظ حسن
فيس بوك
تويتر
انستقرام
يوتيوب
بنتيريست