اكيد ناس السودان اكثر المتاثرين وناس الخرطوم مجانين عدييل واحد ساكن القريه ولمن دلعوها سموها الفتح 1 ولاننا فى زمن الانقاذ دابو للفتح توم سموه الافتح اتنين طبعا الموضوع ما وقف علي كده جابو الوادى الاخضر وعلشان ناس التوالى والمتحاورين ما يزعلوا عملوا وراه الوادى الاحمر حتي السياسه بقت انقاذيبة المنطق نائب رئيس والحقوه نائب رئيس الوزراء والمشكلة نواب 3 لرئيس الوزراء بقى ذى قطر الوحده وللناس المابعرفوه اصلو قطر فى زمن انقلاب مايو ليه راسين وثلاثة عربات بقوم من الخرطوم الصباح وبفطر الناس فى عطبره وكان ماش كويس بس قالوا اودوه ابوحمد وعينك ما تشوف الا النور قالوا واحد من ظرفاء الربطاب اول مرة اجى ابوحمد ولحظه القطر كان وصل وعمك يعاين ليه وبعد فترة سمع الصفاره وعمك يعاين داير اشوف القطر ده لفته كيف بس حيروا قام بالاتجاه التانى عاين ليه كويس وقال ( التقول شاف بمص فى عضم ) ومن اليوم لا قطر وحدة الا كده نشوف قطر الجزيرة فى زمن انقلاب الانقاذ البيحصل ليه شنو ما قلته ليكم ده الزهج يعنى كلام خراطيف برجع ليكم العنده زهج يجي بفكه
09-11-2017, 04:47 PM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
طيب يا زول ما تخمنا ساكت شنو قصدك بقطر الجزيرة داير تشتغلهم برضو والله شنو .... ما لسه الشغل وقته ما جه لكن قطر الحزيرة قالوا بيكون مع فك العقوبات فى اول اكتوبر وحقو عمك ترامب لو اصلو داير يفكها ما يخليها يوم 21 اكتوبر على الاقل تكون احياء لذكرى ثورة اكتوبر كمان قطر الجزيرة بقوم من ميدان جاكسون وبقيف فى اربع محطات القطر ما بهمنا بس البهمنى عربية الكشه بتاعت المحلية لافه فى ميدان جاكسون التقول اشارة اسعاف المشكلة فى الخريف ميدان جاكسون بصبح مجاري صرف صحى الحافلات بتطلع بره لكن مع القطر الناس تعمل شنو اهو برضو رزق لناس الدردقات الشيلة بخمس جنيهات والعفش على مسؤلية صاحبه بشرط يكون خارج اطار الدرداقه في جاكسون وده الاسم البقوله الشغالين فيه ليمون باره بجنيه وكركردى ام روابه بجنيه وقضيم نيالا ببجنيه ودخن كردفان بجنيه بالله شفته العجب الدخن بقى عصير مع ازمة الانقاذ الاقتصاديه اما المنقه اصبحت للناس البطنهم طامه ولان اغلبية الشعب السودانى طامين المنقه اصبحت من الخضروات والشطه الدليل نواصل
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بلدى يا حبوب
فيس بوك
تويتر
انستقرام
يوتيوب
بنتيريست