|
Re: انت والآخر .. من تغير في سن الخمسين ومابعده (Re: يحيى العوض)
|
تحياتي استاذ يحيى اذكر جيدا في مرة من المرات كنت اشاهد تمثيلية سودانية تمثيل واخراج يحيى فضل الله عن زوجين عادا للشباب وكانت تلكم القصة سبب قوي لان ادرس الادب والقصة والنقد. هناك ولع للبني ادم بالعودة (او البقاء) في مرحلة الشباب. رحلةعودة الزوجين كانت عبارة عن سياحة في اماكن لها ذكريات خاصة بينهما. ( قلبنة ) القصة جاطت لي راسي وخلتني زي الزول البرتب ف ورق كوتشينة وما قادر يجاوز الكروت . قريت قبل قصة استاذنا قصص تبدا من نهاياتها وبعد ذلك ايضا ولكنها كانت اول مرة اتذوق نفس الطريقة بطعم سوداني مبدع . حقيقة اعتقد ان التغير ( الشكلي ) يبدأ من النصف الثاني للثلاثينات اما التغيير الاخلاقي ( سلبا او ايجابا ) يبدأ في الاربعينات والنسيان ( زي حقك دة يا استاذنا ) ببدا مع نهاية الاربعين الخمسين بتعدي بخيرها وشرها بس الستين فيها بداية خرف والسبعين هرم والثمانين الشباب الثاني والتسعين استراحة المحارب. العادات عندها كم مخرج كدة بس بتقل من الخمسين برضوعلى ما اعتقد. الشيئ المهم ما بتنسي بسهولة خصوصا ( الكنوز) . ارى ان النسيان من كثرة تراكمات الاحداث التي تمر بالانسان ( زي ذاكرة الكمبيوتر لمن ما تلقا مساحة يا تمسح من القديم يا اما كمان مافي طريقة حفظ).
برجع كان ربنا هون
لك الود
| |
|
|
|
|
|
|
Re: انت والآخر .. من تغير في سن الخمسين ومابعده (Re: Osama Mohammed)
|
عزيزنا اسامة محمود ، تحليلك رائع ، وقد وثقت شهادة رائعة للاستاذ يحيى فضل الله عن تاثير مسرحيته التى حفزتك لدراسة الادب والقصة والنقد .. معلوماتك عن سن الستين والسبعين من خرف وهرم تحتاج الى مراجعة والعزاء في تشبيهك بذاكرة الكمبيوتر ، تمسح القديم وتحفظ الجديد ، ليتنا اصبنا بهذه العدوى ، ولو فايروس !!
| |
|
|
|
|
|
|
Re: انت والآخر .. من تغير في سن الخمسين ومابعده (Re: يحيى العوض)
|
Sara Adam
Sara Adam الكنز مش انحنا يا بابا هو نحنا بنتنسي 🤔 بعدين انت لسه شباب ❤️
Like · Reply · 2 hrs Manage .
Farouk Hamid Moh'd
Farouk Hamid Moh'd اعترف يا يحي أين خبأت الكنوز. ؟؟ 😜😝😄😂😝
LikeShow more reactions · Reply ·
2 · 2 hrs Manage .
Osman Suliman
Osman Suliman الذاكرة المتقدة هي ،دون ريب ، كنز الحياة .. والذهن الحاضر هو الجائزة التي يدخرها لنا الزمن والمكافأة التي نستبقيها مؤونة لقادم الأيام . فهنيئاً لنا ولكم بمدخراتنا وكنوزنا الباقيات..
LikeShow more reactions · Reply · 1 hr Manage .
Yahya Alawad
Yahya Alawad سارة ابنتي أحرجتني واخي فاروق أثارني وصديقي عثمان حفزني لأقول لكم : أنتم كنزي وبهجة حياتي
| |
|
|
|
|
|
|
Re: انت والآخر .. من تغير في سن الخمسين ومابعده (Re: يحيى العوض)
|
تحايا عطرة؛ استاذنا يحيى؛ النسيان غير مرتبط بالعمر؛ في العشرينات احكي لاصدقائي ذكرياتهم معي في المتوسطة والثانوي؛ اجدهموقدنسيوها تماما؛ رغم كونهم همو الابطال.... اذكر وانا بعد في العشريات ابحث لنظارتي واكتشف بعد فترة طويلة انني لابسا؛؛ صاحبنا نساي خلاص ذهب باسرته للحديقة؛ تركهم هناك وعاد البيت؛ وجده هادي؛ تساءل سرا وعلانية المرة دي خمت الشفع ديل ومشت وين؟؟؟ اقول دوما ساخرا من الغربة انها تنسيك اسمك عديل كدة؟ عمك قال لي انا نسيت اسمي قدام المحامي وكانت قصة طويلة؛ .......... هسع عادي بنسى اسمي؛ ومرات مرات تغلبني القراية.... 99% من المغتربين نسايين؛ والعجب الجوة!!!
| |
|
|
|
|
|
|
Re: انت والآخر .. من تغير في سن الخمسين ومابعده (Re: يحيى العوض)
|
الأخ يحي العوض
الحالة التي ذكرتها تشخص حالة زميل سوداني كان معنا في ماليزيا وهو زميل في الجامعة والسكن وعنده النسيان حالة طبيعية, مرة كان مردف زميل سكن آخر في موتر, والموتر تعبان شوية, وصادف مرتفع في الطريق, قال لي الزميل الآخر ليهو الموتر ده تعبان وما بقدر يطلع بينا الإتنين عشان كده أنزل ولمن أطلع العالي بنتظرك فوق وحصلني. المهم الزميل التاني نزل وأخينا فرتك خلاهو ونساهو, والغريبة قاعد يتونس معاهو ولمن شعر مافي رد من الخلف إتلفت ولقاهو مافي, وبدء يسأل نفسه يا جماعة الزول ده وقع وين؟ والمهم رجع عشان يشوفوا وقع وين. طبعا المصادفة الغريبة الإتنين ما كان عندهم رصيد في الموبيلات عشان يتصل علي بعض وزميلنا النزلوه مش لي صندوق تلفون عشان يتصل عليهو كمان لقى ماليزيا في داخل الصندوق متصل. المهم بعد شوية شاف أخينا جاي راجع بالموتر, ولمن وصلوا قال ليهو يا فلان إنت النزلك هنا شنو؟ قال ليهو: ياخي إنت ما قلت لي أنزل لمن تطلع العالي ده أحصلك؟ يلا بعد داك إتذكر بأنه الطلب منه النزول. وعنده قصص كتيرة مع النسيان
| |
|
|
|
|
|
|
Re: انت والآخر .. من تغير في سن الخمسين ومابعده (Re: يحيى العوض)
|
قبل شهر توفى احد معارفنا .. ولم يتوفر لي رقم للإتصال بهم .. فكلفت أحد الأصدقاء اذا مشى الفراش يجمعني باهل المرحوم .. ولم يقصر الرجل فاعاطاني شقيق المرحوم .. وبعد البكاء والنخنخة طلبت منهم ان يصبروا على مصيبتهم .. وقلت له بالله اديني الوالد اعزيه .. فانتفض الرجل وقال لي البقية في حياتك.. ابوي ياعثمان مات من سنتين وانت ذاتك ماقصرت اتصلت علينا وتاني جيت البيت !!!!!
السنة الفاتت عندي شافعة عاينت فيني شديد .. وقامت جارية لأمها .. يمة يمة شفت ابوي قاعد يشرب في الموية من الزير آي والله فعلا شربت كرطعت كوز كاااامل .. هذا كان يوم عرفة !!! ومتعودين البيت كله يصوم.. لكن اقسم بالله شفت الزير مندي ونسيت حكاية عرفة دي نهائي .. غايتو الله نجدنا بي شيخ { نص مكنة } قال لي واصل يومك !!
أما هذه فلم اجد لها اي تفسير لأنها حدثت معي ثلاث مرات .. حينما اصل مكتبي افتح شنطة اللاب توب لاخراج الجهاز والمذكرات والأقلام .. طوالي بلقى ريموت الريسيفر والموبايل مش موجود !!!!!
هجمة مرتدة انا وكل المغتربين ح يكون عندنا زهايمر حاد جدا ومشاتر وح تكون مرحلة الشيخوخة واحدة من أسوأ المراحل التي تمر على المحيطين بنا زوجة ابناء اقارب !!!!! هذا بخلاف ان اي احد منا ح يكون زي التلفزيون المغرب يطلعوه في الحوش بعد شوية يبقى يكورك ويقول ليهم انا { صقتان } دخلوني جوة
| |
|
|
|
|
|
|
Re: انت والآخر .. من تغير في سن الخمسين ومابعده (Re: يحيى العوض)
|
(شواية الزمن ) عبر مراحل العمر ...!
يمتعنا الكاتب الكبير غابرييل ماركيز، بتحليلاته الرائعة التي تغوص في النفس البشرية ، عبر كل الحدود الجغرافية .. الانسان هو الانسان ... : * عندما شاهد آخر صورة له قال : تأكدت مذعورا مرة أخرى أن المرء يشيخ في الصور أكثر وأسوأ مما في الواقع ! * صرت أقيس الحياة بالعقود , فعقد الخمسين كان حاسما لأنني وعيت أن كل الناس أصغر منى سنا . وعقد الستين كان الأكثر تركيزا وزخما , لاعتقادي بأنه لم يعد أمامي وقت كي أخطئ ، عقد السبعين كان مخيفا بسبب إمكانية أن يكون الأخير . ومع ذلك حين استيقظت حيا في الصباح الأول من سنوات عمري التسعين ، انتابتني فكرة سارة بأن الحياة ليست شيئا يجري مثل نهر ، بل مناسبة وحيدة للتقلب علي شواية الزمن
| |
|
|
|
|
|
|
Re: انت والآخر .. من تغير في سن الخمسين ومابعده (Re: يحيى العوض)
|
رسالة من الدكتور عبد المطلب صديق :
والعمر تحدده قدرتك على احتمال نار الشواء. بالامس قلت لاحدهم ، يحى العوض يقول : الانسان لا يخشى الموت ويظنه بعيدا ... لان الموت يحدث دوما للاخرين ... لا يحدث لنا ...تسمع ان فلانا قد مات .. ولحسن الحظ لن تسمع ابدا انك مت .
LikeShow more reactions · Reply · 1 hr · Edited Manage .
Yahya Alawad
Yahya Alawad عزيزي د عبد المطلب ، فاجأني الاستاذ عبد العزيز بركة ساكن بقوله : بقينا زي عمود الشاورما ، وشنا على النار والسكين في ضهرنا !
LikeShow more reactions · Reply · 4 mins Manage .
Abdalmotalab Makki
Abdalmotalab Makki بركة ساكن مبدع في توصيف الحال، وهي الملكة الاهم في التعبير، الخيال واجتراح الافكار ثم العبارة.
| |
|
|
|
|
|
|
Re: انت والآخر .. من تغير في سن الخمسين ومابعده (Re: يحيى العوض)
|
· 59 mins
Manage .
رسالة من عبدالإله زمراوي
عبدالإله زمراوي لكم طول العًمر يا شيخنا الجليل. هذا العمر مباركٌ وانت لم تقتل أحدا ولم تخون شعبك وبلدك. حتماً عمر زاهر مزدهر
LikeShow more reactions · Reply · 24 mins Manage .
Yahya Alawad
Yahya Alawad العزيز زمراوي .. الكلمات تعجز عن التعبير ، لله الحمد ولك الامتنان وكل الحب..
| |
|
|
|
|
|
|
Re: انت والآخر .. من تغير في سن الخمسين ومابعده (Re: يحيى العوض)
|
. رسالة من الاستاذ مجدي ابراهيم محجوب :
Magdi Ibrahim M. Mahgoub
Magdi Ibrahim M. Mahgoub يكفيك عزاً ومجداً ، ويكفينا فخراً بك ؛ نظافة يديك ، وعفة لسانك ، ونقاء السريرة ، والسيرة الناصعة البياض كما الثلج ؛ و يا مولانا يحيي عمراً مديداً من الطهارة والصفاء.
* رد على الرسالة :
Yahya Alawad
Yahya Alawad عزيزي مجدي (تاوقت ) مرات ومرات على مداخلتك ... وعجزت في صياغة كلمة او كلمتين في مستوى ماطوقتني به من فيض احسانك ، والحمد لله في مثل هذه المواقف ، دموعنا تنسال أسرع من الحبر ونبضات الكيبورد ....
| |
|
|
|
|
|
|
Re: انت والآخر .. من تغير في سن الخمسين ومابعده (Re: يحيى العوض)
|
الماضي والمستقبل موجودان في ذهننا فقط ! سياحة مع الكاتب الأرجنتيني الكبير باولو كويلو : اللحظة الحاضرة فقط تكون الآن ! لايسعك قياس الزمن كم تقيس المسافة بين نقطتين . الزمن لا يمر ! نحن البشر نجد صعوبة هائلة في التركيز في الحاضر .. اننا نفكر دوما في ما فعلناه ، وكيف يمكن لنا فعله افضل . نفكر في عواقب أفعالنا ، ولم لم نتصرف كما كان ينبغي . باستطاعتك تغيير مستقبلك بجلب الماضي الي الحاضر . الماضي والمستقبل موجودان في ذهننا فقط . أما اللحظة الحاضرة فهي خارجة عن الزمن ! .. ليست أفعالك في الماضي ما سيؤثر في الحاضر ، إن ما تفعله في الحاضر سيفتدي الماضي وبالتالي سيغير المستقبل . أنت قادر فرضيا على السفر في الزمن ، رجوعا الي الماضي وأماما الي المستقبل اننا نحاول دوما تفسير الأمور وفق مانريد لا وفق ماهي عليه ..!
| |
|
|
|
|
|
|
|