** واحدة من ثمار القرارات السعودية بالنسبة لنا كسودانيين **

Quote: مبروك عليها وربنا يتم ليها علي الف خير ...... يا ابوحراز المشكلة الكبيرة الحاتلاقي المغتربين هي كترة الانجاب ! لو كان انجبوا بصورة محدودة كان الوضع بكون شوية مختلف المعاناة لكن الشئ المعروف كترة الانجاب هي البتكون من ضمن .. المشاكل البتعاني منها الاسرة لو في السودان او في الدول العربية الآخري . لانه الحياة صعبت جدآ والوضع اختلف ونحن كسودانيين التكافل الاجتماعي من واجبنا الاسري والتربوي ودي برضو من ضمن الاعباءة والمشاكل الحا تواجهنا مستقبلآ . ومن هنا بناشد الاخوة في الدول العربية ان يحددوا النسل شوية عشان ما يكون سبب التعاسة ليهم وللقادمون الجدد من اطفال ! معذرة لو ادخلت في شئون خاصة لكن الاطفال ما عندهم ذنب للعيش الضنك العايشين فيهم معظم اناس العالم .. ولك التحية اخي الكريم حراز .

Quote: أخيرا .. وقبل 37 يوما حزم حقائبه .. ولملم أطرافه وسافر نهائيا للسودان .. الآن المدام حاااااااااامل !!!!!! قال عودة طوعية قال !!!!!

(عدل بواسطة عبدالمنعم الطيب حسن on 07-26-2017, 08:27 AM)
(عدل بواسطة عبدالمنعم الطيب حسن on 07-26-2017, 08:55 AM)

Quote: دا الكلام؛ تشكر ابوحراز اذ اسعدتنا؛ ........................... عارف يا ابوحراز زي ما قال واحد صاحبي:انو القرارات دي اتخذت لينا القرار الما قادرين عليهو؛ عليك الله هي الجرجرة دي لمتين؟ خلاص لقد هرمنا؛ نرتب امورنا بهدوء ونشتت بهدوء؛ واولاد الهواء الطلق؛ والحوش الفسيح دا قراب بالله بارك لصاحبك؛ وقول ليهو خلاص مهمتك انتهت ؛ انجزت يا رجل!!! فامشي وكابس ولا تتمسكن؛ واسعي في تلقيط القريشات للقادم الجميل؛ .................. الاطفال اجمل حاجة في الدنيا يا صاحبي؛

Quote: مشكلتنا في السودان ما بنشتغل !! لانو بنلقى الونسات وقعاد الضللة والقهاوي والكورة والبرامج اللذيذة ...

Quote: أبو حراز إزيك تصدق الثمار كثيرة ، بس الغفلة يا صاحب دمت،،

Quote: يا سلام كلام معبر تمام تسلم ابو حراز

Quote: حباب ابو حراز .. في رجوعه خير له .. فتلك هي المنح من قلب المحن والنعم من قلب النقم .. وربنا كريم واجواد .. ذكرتني قصتك هذه قصة لطيفة حدثت في قطر في الثمانينيات شبيهة : كان هنالك سوداني يعمل بالجيش ويذهب كل سنة في اجازة قصيرة .. تنقضي ما بين واجب وزيارات للاهل ومشغوليات.. وفي مرة من المرات جلس 6 اشهر مرة واحدة متواصلة .. ضاربا عرض الحائط بانتهاء اجازته وغاب فيها عن العمل .. وبطبيعة القانون العسكري عدت حالته هروب عن العمل وعمم على اسمه بالمنافذ والمطار .. ثم انه بعد 6 اشهر رجع للدوحة ومن المطار خمشوهو الجماعة بتاعين الشرطة العسكرية واودعوه السجن الحربي.. ثم بعد يوم او يومين عرضوهو على قائد الجيش في محكمة عسكرية وكان القائد اظن ان اسمه الشيخ محمد بن عبد الرحمن آل ثاني .. وكان رجلا صارما شديدا وعسكري رفيع الطراز .. أها الرجل العسكري المسجون جاء مخفورا لمكتب القائد وفي حراسته عسكريين .. ثم وقف انتباه ووراءه الحرس .. فوجد القائد متحفزا ومعه رائد يقرا لائحة الاتهام بصوت عال : غياب بدون عذر لمدة 6 شهور .. هنا انتفض القائد وضرب الطاولة في غضب : يا عسكري كيف تتغيب 6 اشهر .. ؟ اجاب العسكري : يا سيادتك انا غيبني عذر قوي .. القائد بغصب : عذرك شنو ..؟..اتكلم العسكري : يا سعادتك انا ما بقدر اتكلم قدام العساكر ديل .. القائد بغضب : حرس انصراف .. فعمل الحرس خلف دور وخرجوا من المكتب .. القائد بغضب : ها .. ايش عذرك يا عسكري؟ العسكري : والله يا سعادتك برضو ما بقدر اتكلم الا معاك انت فقط ؟؟ الرائد بغضب : انضبط يا عسكري .. تبغيني اطلع انا بعد ؟ القائد يهديء من الرائد : خلاص يا ابوفلان .. لو سمحت خلنا نشوف ايش سالفة هذا الزول .. تكفى خلنا بروحنا نشوف اخرته.. الرائد يخرج بغضب الى الخارج .. وبعد ان اصبح القائد والعسكري السوداني لوحدهما شبك القائد اصابعه وانحنى للامام على مكتبه الضخم "ناهرا" العسكري : تكلم ..ايشعندك؟ ايش غيبك 6 شهور ؟ العسكري خائفا : والله يا سيادتك انا زول متزوج لي 5 سنوات .. وكل مرة تدوني اجازة شهر امشي تضيع كلها والمرة ما تحمل .. اجي راجع أهلي و زملائي اضحكوا علي وكلهم بي اولادهم .. أها المرة دي قلت والله لو ما حملتها واتأكدت ما ارجع للدوحة .. القائد ضاحكا : اها ان شاء الله حملتها وتاكدت ؟ العسكري : الحمد لله .. يحكي لي من اخبرني بالقصة أن القائد الصارم هذا ضحك حتى نزلت دموعه ثم نادى على الرائد الذي دخل مسرعا مندهشا ثم اخد منه الملف وكتب قراره : يطلق سراحه فورا ويحسب له الغياب اجازة بدون راتب اها يا عزيزي ابوحراز نعمة الذرية لا تعادلها نعمة الريالات .. ولو استقبل كثير من المغتربين ما استدبروا من امرهم لما اغتربوا اصلا .. احتراماتي

Quote: بوست يفتح النفس.. (وفي السماء رزقكم....)..إلى آخر الاية الكريمة فالرزق ليس المال فقط.

(عدل بواسطة willeim andrea on 07-26-2017, 03:07 PM)

Quote: الحاجة ودوها اولاده السعودية٠ ٠٠٠ فى عرفات، تعبت ٠٠٠ قالت لى اولاده: "هسه المقعداكم حارسين الحجّار دى شنى! ومضيعين على البنوت [زوجاتهم] بٌطَانِن." ... تحياتى للجميع

Quote: الجميل ابو حراز .... ازيك يا راجل من زمن جميل وانت دايما اجمل .... عجبني موضع البوست شديد لانو فيه الجانب المليان من الكوب .... الخوف من المجهول وحده البيمنعنا من اتخاذ القرار في التغير .... بس لو الواحد مننا أتذكر كيف كانت احاسيسه قبل الاغتراب .... يبقي ما في جديد غير انك تسعي جاهد للاحسن بالرغم من كل شي والا ايه .... مودتي واحتراماتي

Quote: ابو حراز لك التحيه قريبنا كمال يوسف التقيته في واحده من اجازاتي وكان يحمل طفل على كتفه فقلت ليهو ما شاء الله يا كمال دا اخر العنقود قال لي لا دا في بعدو واحد وكمان في واحد في الطريق انتو اجمعو الريالات واحنا بنجمع الوليدات المهم الفوائد كثيره زميلنا مغترب 15 سنة ولا يملك منزل بعد صدور القرارات مباشره اول تفكير له كان البيت وفعلا نزل اجازة اشترى ارض وبداء بنيان والان منزله في التشطيبات وبعد بداء التنفيذ لقرارات المقابل المادي قال لي انا لو المقابل المادي دا كان الضحك شرطني القرارات الاخيره جعلت الكثيرين يفكروا في ان لهذه الغربه نهايه لابد ان يستعدوا لها بعد ان كانوا تاركين الحبل على القارب ومحل ما يرسى يرسى

Quote: رغم المعاناة وشظف العيش والفوضي في السودان انت في بلدك ومافي زول يقول ليك تلت التلاتة كم

Quote: يا سلام،، وعسى أن تكرهوا شيئا وهو خير لكم تحياتي لك باش مهندس أبو حراز