الواطا دي في خشمنا كلنا عشان فقدنا كرامتنا وخلينا الكيزان يمرمطونا وبقينا زي الفيران يزرزروا فينا ويعملوا كل الدايرنو في بلدنا ونحنا قاعدين فراجة كأننا داخلين سينما نتفرج على فيلم لاب يخصنا الحاصل للبطل ولا الضحية وفي سرنا نقول دا ما تمثيل ساكت ونقوم من الكراسي بعد الفيلم ينتهي نقشقش ايدينا وننفض قشر التسالي من هدومنا ونكسح على بيوتنا ! أما البنيات والوليدات المحجوزين في قرية الشيخ الياقوت ومجهجهين بين العسكر والجوع والعطش مافي زول شعر بغبينتهم ! يحاحوا فيهم زي السواسيو في الحر من ضل لضل وهم عدمانين الحيل ونحنا عدمنا المروة والشهامة ! وبقينا زي الغرباء وشغالين بمبدأ ( كل زول ياكل نيمو) ونحنا الأكلنا الحنضل 28 سنة ! النيم بقى ما فارق معانا! والذلة بقت ما فارقة معانا! والشتائم نبلع فيها زي الظلط وما نلقى الموية الندليها بيها ! وحدنا وين ومتين نحس بالظلم ؟ ومتين نقوم من كساحنا ؟ ومتين تجم العافية قلبونا قبل زنودنا! ومتين نتذكر كلوسنا الوقفوا وصدورهم مكشوفة للسلاح ؟ وسلمونا الراية حمراء موشحة بدمهم , ونحنا سويناها فرشة لكساحنا ! متين نقيف في وجه الظالم والظلم ؟ متين نرجع نكون شعب السودان القوي الماب يرضى الحقارة؟ ومتين نخلى الوطن يحس باننا نستحقه ونستحق عظمته ؟ ومتين نقيف ونردد : لما يطل في وجهنا ظالم- نحمي شعار الثورة نقاوم ؟؟ لقد لاح هلال قول كلمة الحق! فقد حان الوقت! فحيا على الخلاص.... ست البنات.
يسلم خشمك يا بت كمبال وزي ما قال حميد: ليكم يوم يا أولاد الهرمة يومُ نراه قريباً ويرونه بعيداً ولكن سنن التاريخ تقول لهم: لو دامت لغيرك وفيهم جبابرة وأباطرة لما آلت إليك
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ست البنات
فيس بوك
تويتر
انستقرام
يوتيوب
بنتيريست