مرات بتكون محتاج تكتب عشان تقول انك موجود للناس الحولك اصحابك احبابك اهلك والعشيرة الكبيرة والصغيرة ..بتلقى نفسك بين فرصه انك تكتب او تقرا الحنيين فى بوستات اصحابك صور اتحاد الادباء الفانيين بورتسودان الكافاب شوارع السوق الكبير سوق السمك القديم والسجن العمومى وصوت محمود عبد العزيز يصدع من احدى بترينات الساعاتيه فى البرندة الكبيرة لسوق الساعات يا محمود الحب والسلام ولحظات الشوق و الممشى العريض بين الموقف الكبير ومدارس الكمبونى وفندق سمارماز حيث كانت اللقياء تحت تفاصيل الشوق وعبث الشباب بواكير التمرد على قوانيين الحضور المنزلى ( ويا انا يا بيت ابوك) ....وتسوقك السكة اصوات كيرنات الميناء وصفق شجرة نيم الولفه يتساقط فى جوانب حضورك ...على حافة بحر الشوق نواحى الركن الهادى ومسرح الثغر ...سواحل اندهاشك من تلك البواخر الكبيرة يفصلنا عنها مرمى حجر فى سطح بحر امنياتك بعالم سعيد...والجبنة فنجانها البكرى ذات سكر خفيف الطعم وحبيبه تكمل عامها الرابع والعشرون فى حضرتك.... كنا حضور فى عوالم العارف بالحب استاذى جمال الدين شبيكة (طيب الله مرقده مع الصدقين والشهداء) ... فى صحبة انسان الانسانية ومن علمنى بان اقتسم شربات الحب مع اصدقاى استاذى عبد العزيز سعودى فى بواكير مسرح الاحلام ونحن نخطو نحو الافق ...بكل كبرياء الحب.... هى فعلا لحظات يتوقف عندها الحضور والامنيات وماذلنا نسرج سرج سفرنا البعيد من تلك المدينه ....يا بورتسودان الحب والقلب سلام..... محمد البحر هدندوى من دنقلا....
07-02-2016, 12:41 PM
عمر دهب عمر دهب
تاريخ التسجيل: 10-19-2014
مجموع المشاركات: 2010
يامحمد مالك علينا بورتسودان ذكرياتها لمن تصل بتجى من اول وجديد ، من الكبرى القديم ونحن نتعلم السباحة والمكان كير يبلع السفينة ومن طعم الملح بعد السباحة ونحن نحاول الدخول لماسوارة مدرسة وسط المدينه ذكريات المدرسة الشرقية والناظر مدنى ادم مدنى وعثمان بليلة بعربيته وطلبة الاهلية قاعدين فى سور الشرقية قبل زيادته الزمن داك انت يامحمد فى الحيرة والطيرة مافى زمن سينما الخواجة وافلام جولينجيما وقاتل او مقتول و سبنا وشامى كابور ايام نجلس فى سور الاميرية وناكل العجور بالشطة بتجى لمن صاحبى صابر الماصابر يزيد الطحنية فى مخبازه عمك هارون فى ديم سواكن ويقول كده ظابطه بتجى لمن تسمع عل نور رحمه الله يكوريك حى العرب سكر دا وزمبا يصرخ عطش واصوات المواتر تملاء نهار سوق ديم المدينة ذكريات الثانوى العام استاذ امان وملاسى وهبود والجمعية الادبية وزملاء الزمن الجميل احمد البكرى ومحمد عبدالله محمد بتجى لمن صلاح صاحب جنه الشاطى يرص الكراسى من عصرا بدرى وحركة الميناء توقفت تماما الا من بقاياء كلات يسرعون بالمغادرة غايتو يامحمد لمن تانى تكتب ذى كتابتك دى لازم تعمل حساب لقلوب اذا دخلت لماضى الثغر صعب ترجع .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد البحر
عمر دهب
فيس بوك
تويتر
انستقرام
يوتيوب
بنتيريست