الساكت عن الحق شيطان اخرس حليب الاطفال لم يسلم من جشعهم(بحري)

Quote: السلام عليكم اللبن الفي الصوره ده بتاع أطفال رضع، بنشتريهو من صيدلية ببحري بالقرب من مستشفي احمد قاسم، قبل يومين، مشيت هناك ولقيت شخص تاني ما نفس الزول البشتري منو كل مره، طلبت منو علبه واديتو مبلغ ٨٥ الف، قال لي ١٢٠ الف قلت ليهو زاد ولا شنو؟ شلت العلبه ورجعت البيت، وقبل ما أفكر افتح العلبه واحضر الرضعه لطفلي، جاتني فكره انو اتاكد من تاريخ الانتهاء، واكتشفت انو صلاحيه العلبه منتهيه من شهر ٣ الفات، وطابعين تاريخ انتهاء تاني بختم مزور لقتره أطول! حسبنا الله ونعم الوكيل، رجعت في اليوم التاني للصيدلية ولقيت الشخص البشتري منو كل مره، ووريتو الحاصل، نطط عيونو وقال لي لا لا ما اشتريتو مننا، ما عندنا حاجه مدته منتهيه هنا، أكدت ليهو انو اشتريتو منهم، ووصفت ليهو الشخص الباعو لي امس بمبلغ ١٢٠ الف، اخونا أتراجع شويه وقال لي خلينا نشوف الزول الباعو ليك، قلت ليه تمام، قال لي ما بيجي هسع، قلت ليهو بتتظرو لمن يجي، وما مضي زمن طويل وجاء الزول الباعو لي، اول ما شافني خاف خوف شديد، أنا من الغضب كنت عاوز اضربو والله، قلت ليهو ياخي لو عاوز قروش بديك ليها ساي لله ، بس ما تسمم اولاد الناس ياخي بترضي الشيء ده لنفسك او لأولادك ؟، وكمان تزور في التاريخ؟ أنا هسع ممكن أشتكيكم،.... حاول ينكر ويراوغ وتدخل الرجل التاني وشكلو هو صاحب الصيدليه، حقك علينا وقعد يعتذر ورجع لي ال ١٢٠ الف، وقال لي أنا طلبت منو ينزل اللبن المنتهي ده وما يبيعو نهائي والسعر زاد ل ٩٠ الف ما ١٢٠ الف.طلعت وقلت ليهم مستحيل اشتري منكم شيء تاني.المهم أنا ما ذكرت اسم الصيدليه هنا عشان ما اقطع عيشهم، وعاوز انبه المواطنين انو ياخدو حزرهم عند شراء ادويه او معلبات في مجتمع أصبحت فيهو روح الانسان لا تسوي شيءوحسبنا الله ونعم الوكيلام محمد

(عدل بواسطة Adam Youssif on 05-10-2016, 12:47 PM)