|
|
|
 Re: هل اتسع الرتق على الراتق .. مخيّر الله (Re: عمر أبوعاقلة)
|
قبل فترة كنت بقلب في صفحات الأرشيف
بعض الكتابات التي جعلتنا نتعلق بهذا الحوش
مجادعات بين المستشار محمد المرتضى يناجي فيها عماد عبدالله (الديامي) للعودة الطوعية للحوش
فوجدت رد عماد عبدالله ردّ الله غربته عن حوش بكري:
Quote: مرتضى يا ابن خالتي ..
هسه مفروض أجاوب اقول شنو يعني ؟؟ .. إنت مش عارف ميلان الحال الهنا و هناك ؟؟
دافننو سوا يا صاحبي .. كلو بقى ما يجيب مريسة تامزين ..
البركة في حِبيبة الغنا الفضل .. بقينا عليهو و بس .
أمانةً في زمتك دي , إنت ما فترت من العاك عييك و الثقافة و الحصافة و السخافة و القيافة و الرهافة و الهيافة و الهتافة و كترة القُفافة التي يعتلها العالمين في هذا البلد حاصل فاضي ؟؟
بقيت كاين كييف - ما كييف المدينة - .. بتكيف قدام التلفزيون في النشرة الجوية بتاعت العربية .. بيجيبوا ليك عدد من مدن العالم و live عينك عينك .. و لثواني بس .
أي و الله , تشوف في التو و اللحظة : زيورخ / دسلدورف / بوسطن / مراكش / بومباي / بروكسل / آسبن .. و و و و ..
سبحانك يا رب .. ياخي اتاريها الدنيا بره ماشة كويس شديد
مدن في الليل و مدن في النهار و ناس و انوار و غيوم و مطر و سحاب و خضره و جبال و مباني و شوارع و مصايف و مهرجانات و رسم و مزيكة و و و .
ياااااااااا جماعة .. !! نحنا بس من دون خلايق الله في هذا الكون الحدادي ده الـ ( خِـريـنا ) في الجامع .. وللا كيف ؟!!
طيب و بعدين ؟ ..
اي شي ضد الناس السودانيين ؟؟ .. ليه ياخ ؟؟
بداية من الطقس و الجو .. و الحكومة و المعارضة و الليل و النهار .. كلو علينا واحد ؟؟
نحنا أمنياتنا صعبة قدر ده لامن الدنيا و التصاريف و غيرهم يلاوونا فيها كده ؟؟ ..
.........
عيدكم سعيد من طرف ..
و ياخي يسأل منكم الخير ..
و ما تسووني سِبلة .. أيمان رحمن كلكم قاعدين ممحنين زي حالي كده , انتو بس فايتني بالصهينة و : باكر ياني الزارع من هني لهنوووووك !!! .. يا قول حشاش بي دقنو .
هسه جابتني النوبة الأمازيغية دي و إتكيفت - كعادتي في أرذل العمر هذا - ..
أمانة ما غناييين أهلك ديل يا مرتضى و مليانين حب للدنيا ام قدود دي .
أنحنا تحبنا الشكلوتة بركة إلهي و إنت جاهي .
أدينا النقه و النقه و النقه .. في الفارغة و مقدودة ننق ننق ننق ..
ورثناها من جملة ورثتنا العجيبة , راكبين خشمنا طوااااااااالي و قاعدين قبلنا .
ياربي العصرة ورثتنا النضمي و الشكية و السب و اللعن و ضيق الأخلاق ؟؟ ..
و كللللو ده و نحنا قاعدين محلك سر .. !!
مخير الله |
فعلاً مخيّر الله
مودتي
| |
 
|
|
|
|
|
|
|
|
Re: هل اتسع الرتق على الراتق .. مخيّر الله (Re: عمر أبوعاقلة)
|
لك التحية ابن الوطن .. ابو عاقلة ..
| Quote: كدي أفتوا لينا .. يا متعلمين يا بتوع المدارس |
يا ابن الوطن التعليم عكسو الامية .
والوعي عكسو الجهل .
معظم عصابة الانقاذ من المتعلمين الجهلة .
واخشي ان ياتي احدهم ويجيب عليك .. دحين
نادي الاميين الواعيين وليست المتعلمين الجهلة .
ونكرر مخير الله .
ودمت ودام الوطن والشعب بخير .
| |
|
|
|
|
|
|
|
|
|
Re: هل اتسع الرتق على الراتق .. مخيّر الله (Re: عمر أبوعاقلة)
|
دخل الأبالسة (في طنى النسج الحي) وبين كل بيت وبيت تلقى لجان ومؤتمرات
مصلحجية .. وأرزقية .. وكلاب أمن .. وأمن الأمن
وكلن مع ذلك أنا أؤمن أن حواء السودان أنجبت عمالقة في شتى مناحي الحياة
كثيراً ما نسمع عن حملة الشهادات .. وأوسمة التكريم
هنا عالم .. وهناك متميّز .. مستشار .. خبير .. نابهة
إن سقط هذا النظام البائس .. وحتماً إلى زوال :
كيف يمكن رتق هذه الفجوة التي ضربت كبد الوطن
هل يقدر أبناء هذه الأرض الطيبة أن يلثموا جراح (أمّنا الأرض)
كدي يا شباب كل واحد يفتي لينا في مجاله .. كيف نصلح ما أنكسر
مودتي
| |
|
|
|
|
|
|
|
|
|
Re: هل اتسع الرتق على الراتق .. مخيّر الله (Re: عمر أبوعاقلة)
|
السلام عليكم
الأخ الكريم أبو عاقلة وضيوفه الكرام
صحي الدنيا كلها في ضدنا و الله حبانا بي وطن كان حدادي مدادي مليون ميل مربع بس جو ناس تجار دين ولي زوال كما قلت
يا اخوي يا أبو عاقلة اكان الليل انزاح وطلع فجر النهار يلالي في سماء الخرطوم
مفروض تتسوي حاجات كتيييره خلاص
بلد بنادي لي كل ابنائو في الخارج وفي الداخل لي كل صاحب علم ولي كل صاحب وجع
يتخت نظام تمشي عليهو البلد خطط خمسية وخطط عشريه وخطط عشرينيه
يتحدد نظام بلد قائم علي الوحدة وعلي التسامح حليل زمن صديق منقو وكان في كتابو سوداني
الهدم ساهل يا ابو عاقلة لكن البناء صعب
عاوزين صحه وعاوزين علاج عاوزين هجره عكسيه من الخرطوم لي الأرياف
حليل زمن المدارس بتأجز لي الحصاد عشان الريف وعشان المزارعية
عاوزين بنية تحتيه وفيها زراعه مطرية ومن النيل مرويه
عاوزين نرجع ميزانيتنا لي شهر 7 زي زمان مع الحصاد ونرجع ساعتنا لي توقيتا القديم
عاوزين مصانع وتصنيع زراعي وعاوزين كليه الزراعه و البيطره تكون اعلي من طب البشري
وعاوزين نرجع النقل المكنيكي و المخازن و المهمات والسكك الحديد وسودان اير
عاوزين مكان كل طلقة في البلد مزرعة ومزرعتين وبقرتين وكم شتلات وفي
كل مكان برميل اترمي من طيارة كم شفخانه وكم مدرسة
عاوزين وعاوزين وعاوزين
من غير طموح مابتبني وطن ومن غير امل كل الدروب مقفله
غايتو بحجز مساحه بي كلامي دا لمن نتلاقي بي رواقه
| |
|
|
|
|
|
|
|
|
|
Re: هل اتسع الرتق على الراتق .. مخيّر الله (Re: عمر أبوعاقلة)
|
محمد يا دفعة أبريل
كلامك صح .. لكن القائمة طويلة والجرح غائر
انت عارف مرة كنت بقرأ في خيط للأخ المتألق عبدالحفيظ أبوسن الله يطراه بالخير
"لا يحدث إلا في السودان" أو شئ من هذا القبيل
فيه قصص واقعية جميلة ياخ .. وفعلاً نحن ناس كويسين شديد
بس الله هونيني على قولهم
| |
|
|
|
|
|
|
|
|
|
Re: هل اتسع الرتق على الراتق .. مخيّر الله (Re: عمر أبوعاقلة)
|
| Quote: هل اتسع الرتق على الراتق .. |
ابوعاقلة سلام
رغم ان القول الدارج هو: اتسع الفتق على الراتِق
لكن فى حالتنا هذه نرى أن العنوان كان يجب أن يكون:
إتسع الفتق على الفاتِق لأنه من فتقه دون تمييز وهو ليس بخائط ,,
إنما تصدر لعملٍ لم يكن من إختصاصه.
***
تذكرة:
مُختار الله وليس كما وردت فى العنوان.
| |
|
|
|
|
|
|
|
|
|
Re: هل اتسع الرتق على الراتق .. مخيّر الله (Re: عمر أبوعاقلة)
|
الفاضلابي يا جميل .. تصدق سعيد بوجودك هنا
عزيزي شككت كالعادة في الأمر وأستشرت عمنا قوقل .. ووجدت أنها تستعمل في الحالين
الرتق على الراتق .. والفتق على الراتق
أمّا الراتق في عنوان الخيط ليس مقصود بها من قام بالفتق
لأنه ليس من اختصاصه كما تفضلت .. ولكن مقصود بها من يأتي من شبابنا وخبراتنا وعقولنا النيّرة
فيملأ الأرض عدلاً بعد أن ملئت جورا
المقصود بها أبناء هذا الوطن الجميل .. ومهما هم تأخروا فإنهم يأتون
ومخير الله دي حقتنا العادية دي .. دارجة بحتة ياخ وبتدي النضم طعم خاص
عموماً ملاحظتك في محلها .. ومشكور على الاهتمام
بس برضه ما أدليت بدلوك في الموضوع ذات نفسه
ولك مودتي
| |
|
|
|
|
|
|
| |
عمر أبوعاقلة
مني عمسيب
Mahamed Eltaze
عبدالعزيز الفاضلابى
جلالدونا
فيس بوك
تويتر
انستقرام
يوتيوب
بنتيريست