|
|
 الكوز ابو دقن مصيرو السجن....!!!
|
القصة بقت بايظة بوظ شديد وباكات شطر البقرة الحلوب التي كانت يرضع منها جربندوني اتجهجهت جهجهة ابراهيم عطا استوبر المريخ الشهير ..والنقاطة الكانت بس عاوزة ليها دقن (بكرت) و جكة جكتين في ميدان الفريق لزوم الدفاع الشعبي...ومعاها حبة تكبير وحبيتن تهليل عند اللزوم... النقاطة دي بقت في خطر
جربندي زارته سحابة ولمحة فلاش باكية من انجازاته التاصيلية السريعة والشرتيت الذي تقاطر اليه منذ بدايات اكتشافه الية عمل (كل شي لله) وسرح بخياله الي اياماته الاولي في طريق الترطيبة التي هبطت عليه عندما رشحه (شيخ يس) لتولي ميز معسكر الدفاع الشعبي في المدينة التي كان يقطنها
|
|
  
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
والله زمان يا شيخ( يس) لعبنا( ون تو) احرف ثنائي في الدوري البرازيلي ما يلعب زيو
زيت مجاهدين كف نجرف -بصل مجاهدين لب لب- رغيف مجاهدين- دمورية مجاهدين- باتات مجاهدين- موية مجاهدين....كلو ذهب ما بين جربندي افندي وشيخ (0يس) فيفتي فيفتي....
نص يمشي لجموع للمجاهدين والنص التاني كروبات وفواتير كب فيها جربندي افندي موية تقيلة وكانت اولي الاشارات التي التقطها سريعا وعرف بان الناس الدقانة ديل بجي منهم خيرات وثمرات رطبا جنيا لو دفر معاهم في سكة الدقن دي....وساعد القصة بكم جزاك الله خير ...وكب في شخصيته كوز كوزين مع شوية تهليل وتكبير...
واقتني جربندوني احلي دقن فاقت في طولها الان دقن عباس انصار السنة العامل فيها منقطها وابن كثير .....
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
كانت مرحلة البدايات وامطار الكروبات التي هطلت علي جرنبدي كافية لاشاعة البهجة في بيته الجالوصي ذو الاوضة الواحدة ودخلت البيت هذا ولاول مرة (اربعة غويشات) من الدهب المصقول والموضب عند احرف صائغ في المدينة...وعندما كانت المدينة تسمي تلكم الدقة الدهبية المميزة (دقة الترابي)....حلف وازبد وارغي اخونا جربندي افندي وهدد نفيسة زوجته بانه سيذهب بها الي غياهب الطلاق ان لم تشيع في المدينة بان هذه الدقة اسمها (جيبو جون قرنق حي)
وسنتابع
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
سريع سريع اصبح جربندي وهو الذي طرد من فصول الدراسة ذات زمان بعيد لكونه طالب فاشل يجلب البنقو الي فصول الحكومة واتهم بعدة تهم عجيبة في التحرش بالاطفال في سنة اولي ومحاولة العبث الشين معهم..ليطرده المدير الاسطوري (ود سرور) شر طردة وتلفظه كل مدارس المدينة الاخري لذات السبب ليتحول الي عاطل كبير يستمد اعاشته من والده ذلك الرجل العصامي الذي كان يعمل تزري فقير ولكنه مكافح اهلكته الاحزان عندما لم يجد ابنه جربندي سوي في طريق الضلال والاجرام
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
وكل يوم والتاني جايبو بتاع (كارو) من فريق النسوان الكعبات وهو ثملا منغشم نغشيمة ليها ضل... ليكافح والده ليلا ونهار ليزوجه من احدي النساء الطيبات التي اصابها الخلع والاندهاش عندما طل جربندي عليها ذات مساء وهو يحمل اربع من غويشات الدهب الما بغبباء عينها لدرجة اتهامها له بانه قد يكون نهب احدي المتاجر الدهبية ليلا...ولكنه عالجها بهتاف جادي مكبرا ومهللا.....
دي الدقن ....دي الدقن يا زولة هوووي انتي ما نصيحة ولاشنو ياوهم.. ومن الليلة....الغريق قدام قداااااااااااام وليبيا فتحت وراجلك لقي ليهو شطر ابن لذينة والقصة واااااااااااااره....ومن الليلة يا وهم تجدعي الثوب ده وشوفي ليك خمار اقفلي وشك العامل زي الكبك ده...وبكرة اشوفك في المعسكر بتاع اخوات سعدية....
وسنعود
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
سريع سريع عربية الطوب والرملة والابواب الحديدية الفور ويل درايف هطلت علي بيت جربندي...وشوية شويةاتوضب صالون ابن لذينة...ودقن جربندي ماشة في سكة اللبع تمد وتطورت علاقاته الي ضابط المجلس وامير المجاهدين البجي من الخرطوم
ودقاني خاشي ودقاني مارق من صالون جربندي الذي تمدد الان واصبح هو رجل المرحلة التي عليها تفريخ محاربين ومحاربات بالذهاب بهم الي العمليات وحبة حبة فضي له الجو بموت شيخ (يس) في الحرب الجهادية واصبح هو الكل في الكل تربيع
ليعالج سطوته ويحي ذكره فردة باكه اليمين (يس) بزواج سريع وعاجل لزوجته استخلافا وطمعا في الفيفتيات القبيل كان شيخ (يس) يكابسه فيها
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
يا جربندي ياخي ما ارح معنا الجنوب...
هيييع انا زول من جهز غازيا فقد غزا فخلوني يا اخواني في الله في هذه الابتلاءات وخلوني اعد لهم من رجال وقوي ورباط خيل...والله اكبر الله اكبر..عندما شالته الهاشمية ذات يوم من ايام حضور الزعيم الكبير الي دائرة اختصاص جربندي الجغرافية وشاف بام عينه معنويات المجاهدين فوووووووق والتكبير كان عنانه السماء واختلطت تكبيراته مع تكبيرات الشيخ الكبير الجاي من الخراطيم
مع تكبيرات المجاهدين فكر وقرر سريعا جربندي الذي هو الان شيخ جربندي ان لايفوت هذه السانحة التي يمكن ايضا ان يجي منها وفير المال العام والخاص فقرر بانه سيقود جموع المجاهدين وتوريت توريت يا ارض الفداء اقسم جربندي ان يجعلها ارض للعداء كان هذا هو شعار جربندي الذي عصر فيها علي روحه وقدمها الان رخيصة من اجل الدين ظاهريا ولكن باطن الامر رغبة في مزيد من الكروبات والسفسفة ورا المشية القلبو ما كان دايراها دي لكن يسوي شنو ياخي مع الشيخ الكبير الفقررررررررري ده......
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
كان يوم تحرك جربندي من المدينة هو يوم للوصايات واظهار المغتغت في ثروته التي
لملمها من مرحلته الاولي في سكة اللبع..ووصي بالحواشات والدكان الناصية القاعد فيهو عبود ود اختي ده حقي و الطاحونة الفي فريق ورا حقتي والدكان الفي فريق الاندايات تبعي...وانداية بت شلخة برضها حقتي...وابقي عليها عشرة يا ابوي لحدي ما اشوف لي صرفة مع الجهاد ده واجيكم نابل....ووب عليك يا جربندي من ناس كتيبة جاموس وكتيبة زعلان القالو بلقطو من طرف ديل...!!!!
ونعود
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
عندما وقع المتحرك الذي كان بين صفوفه جربندي مزرقنا بين كمين من الكماين التي نصبتها (كتيبة زعلان) واختلط الحابل بالنابل تحت وابل رصاص الدوشكا والقرنوف والاربجيهات (والبي تو تونتي وهاجة) لم يجد جربندي ادني طريقة من مقاومة (الياااع )والرغبة في الشتات ولكن الامر اصبح له شينا وقاسي وصعيب ..فداااااااك شيخ فلان مضروب دانة مفرطاقهو قطعة صواميل للمجاهدين تاني ما ينفع...!!!
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
وياهووو داااك فلان الفلاني مضروب ومفرطق الراس وكيف له ان يطلع من هذه القبضة الثمينة (حرب الكفار) الرعاديد دون عاهة مستديمة وجرح غائر يمكن ان يساعد في الايام اللاحقة في معركة لملمة الثروة وحور عين الدنيا...!!!
فخش تحت اقرب (شجرةلالوب) وادي المجاهدين ضهرو ورشا روحو واحدة طلقة سلاخية زي السم في (الرجل الشمال) وليجري سريعا صوب المعسكر بطريقة (الهرك) الشهيرة او( الشدت) راجعا الي صفوف الجرحي ومدعيا بانه ضرب في مقتل ولولا القرود الاثنين اللائي هبطا من( شجرة لالوب) مقاربة لمكان ضربه بواسطة الكفار وليحملا ه الي مكان الجرحي....!!!
وتعالت الصيحات الله اكبر الله اكبر
وليصبح ومنذ ذلك التاريخ اسم الشهرة للشيخ جربندي هو (الشيخ الشالتو القرود)..هيييييييييييع ...!!!!
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
تحياتي ياكيكي
والله شيخك ده زي شيخنا الذي بنى له منزلا وديوانا كبيرا مع مسجدا صغير مكيفا وعلق فيه أغلى النجف والتحف - الحوش الكبير بره الحلة لزوم المساحة الكبيرة لتستوعب هذا الرزق الحلال ويستقبل أخوانه شيوخ الطريق والضلال ، والحلة فيها جامع واحد يشهد الله يوم الجمعة ما فيهو ثلاثة صفوف ، أها شيخنا لمن يجي من الخرطوم للقرية تلقى الصعاليك وعشاق السفسفة والعضة حايمين ولامين في داره العامرة ... بس عشان الذبائح والولائم الما خمج ... باقي شيخنا كرشو أكبر من كرش أكبر أم أولاده عندما تكون فيها آخر أيام حملها... أها المغرب والعشاء الصلاة في مسجده العامر وطبعا هو الإمام والخطيب والواعظ ... بس شيخك ده مشهود له بالجهاد ... لكن شيخنا وحاتك كوستى ما بعرفها على وين ... تقول شنو الراحة واللقمة أرزاق ... وحاتك العربات عندو من الاوستن والبدفورد والكومر والاندر روفر والبكاسي دبل ومفرد - لغاية ناس ليلة علوى وشنو ما عارف ... جماعتنا منتظرين شيخنا يدعم المدرسة بشوية كنب وكراسي للمدرسين ... لكن عامل فيها (حميل) ... عليه اللعنة ... يعنى لو تبرع بسعر عزومة كاربة ممكن يشتري كنب وكراسي لكل المدرسة ...
فتك بعافية ...
الشفيع ابراهيم
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: Alshafea Ibrahim)
|
| Quote: لكن شيخنا وحاتك كوستى ما بعرفها على وين ... تقول شنو الراحة واللقمة أرزاق ... وحاتك العربات عندو من الاوستن والبدفورد والكومر والاندر روفر والبكاسي دبل ومفرد - لغاية ناس ليلة علوى وشنو ما عارف ... جماعتنا منتظرين شيخنا يدعم المدرسة بشوية كنب وكراسي للمدرسين ... لكن عامل فيها (حميل) ... عليه اللعنة ... يعنى لو تبرع بسعر عزومة كاربة ممكن يشتري كنب وكراسي لكل المدرسة ... |
هلا يا الشفيع وتحياتي
ونعم انهم جميعا (كوبي اند بيست) وسيماهم في كروشهم وقروشهم التي تاتي من السلفكة والسمسرة باموال البلاد والعباد..
والواحد فيهم تلقاهو زمان مقطع حق تمباكو في (تلتلة) وفجاة كده تنزل عليهو النعمة وهااك يا ضبائح وهاك يا مساجد وممكن يكون فيها (عرسة) عرستين كده لزوم مثني وثلاثة ورباع...
وانه يا الشفيع زمن الطفابيع والجربنديية العملو قروش وكروش
وكل الود
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
وعاد جربندي موشحا بسيرة بطولات زائفة وجد لها من بين المطبلين ثوما وشمار وثلجا كاد هو ان يصدق بل عندما يجد مساحة وزمن وساحة للجاكة يردد بان القرود التي شالته قد قالت له حرم يا شيخ جربندي لوما احنا كقرود سماوية عارفين انو الدنيا لسع محتاجة ليك عشان تعمرها وتحول الارض البور البلقع الي جنة نضيرة كان شلناك يا جربندينا الي الفردوس ونعيم..
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
مشية جربندي تلك كانت هي الاولي والاخيرة فقد قرر بينه وبين نفسه وبعد ماراي من الدماء والقرنوف البفرطق البني ادميين حتت حتت والالغام التي تنبل من حيث يحتسب ولا يحتسب قرر( تاني جهاد نهيييي) ويلقوها عند الغافلين الدقانة مجرمين ديل...
وساعتها كانت اليته الي الالتفاف هو تغيير التخصص والرمي قدام والبحث عن مورد (كجمة) تاني بعيدا من مدارات حاربو واقتلو وجهزو غازي قد غزا دي....
فقرر تنويع اللعب والدخول الي عوالم البندر والرمي قدام في الخرطوم محل الطيارة بتقوم والشيخ ابودقن كبيرة بنوم...!!!
فاصبح الان بعدما كان دمورية مجاهدين لب لب في الماضي .... اصبح الان الشغل بنية تحتية...طرق وعطات لب لب... شركة اتصالات عاوزة تصديق عشان الناس تقول عبرها (الوو) جربندي جاهز موية ونور لب لب عبر تسهيلات من مكتب الوزير شخشييا
صينين عيونهم صغااااااااار عاوزين يحفروا ليهم بير بيرين في البترول جربندي جاهز موية ونور وبقشيش تقيل بكرة الصيني يجيب حفارتو ويدور حفر ..ما ضروري يلقي ليهو بترول او ما يلقي ..ولكن المهم في الامر انو جربندي ياخد
حقو كاش ويقلل النقاش
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبد المنعم سيد احمد)
|
Quote: الله لا كسبن دنيا واخرة
العايشين على لبن الرضيع
وبكاء الايتام وانات الموجوعين
هؤلاء قد باعوا اخرتهم بدنياهم
كذبا ودجلا وخداع
|
تحياتي وتقديري يا عبدالمنعم
وحبابك في سيرة الذين هبطوا علي الارض السودانية ذات دبابة وليل
وعاثو فيها فسادا وسطوة تمكين بكل ادوات السلفكة والاستهبال وبدقونهم الزيف امتصو رحيق هذا الوطن
ولكن حتما سياتي يوم ذهابهم وبالمزيكة الي مزابل التاريخ
وكل الود
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
بيت الجالوص الكان في مدينته تحول اليوم الي قصر منيف في حي من احياء الخرطوم الترطيبة وجربندي يحصد ثمار جهاده
ووااااااااااااره معاه وره تقيلة...
والتلفزيون شغال وصرح المجاهد الشهيد الذي يمشي بيننا جربندي بان الامور كيت كيت
وزار الوزير المنطقة الفلانية العلانية وكان في صحبته المجاهد جربندي .......
وكانت زوجته الرابعة احدي بنات الاسر التي كابسها جربندي في سوق السيخ والاسمنت ..مجاهدة زينة وحجابها وارد ايران
ولكنها تفتيحة تمارس التجارة ما بين السعودية ودبي ولندن كمان....يا وجععععع وكلا بدولارات جربندي التي هطلت عليه السماء دولارا يورو وفرنكا وين وقروشات وارد شنغهاي
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
واما زوجته نفيسة ام العيال فلاتزال في مكانها القديم في ذلك البيت الذي اهلته واخرجته ضربات خطاوي جربندي الاولي من الجالوص الي مدارات الطوب الاحمر والصالون الوثير تمارس مباصرة معيشة اولادها من الدكان والانداية التي تركها
جربندي دون ان يحاسب صاحبتها حساب منكر ونكير كما ا كان في ايامه الاولي تلك وهو حفتانا يحاسب حتي علي شدة اليوم واليوم التالي......وحتي المشك كان له فيه رايا عندما يباع الي غنم مدير المدرسة....!!!
جربندي في كل صولاته الجهادية والقروش التي نزلت عليه كالامطار والمقيلة مع الوزير الفلاني والسفر مع الشيخ الفلاني لموتمر نصرة فلسطين في بلاد وين كده ماعارف..وموتمر تطوير وتنمية البنية التحتية في حزام ماخلف الصحاري العربية والاسلامية ووصل جربندي بملحسته حتي ابواب (ابا كبير) شخشيا الذي اعجبه سخاء ومجاهدات جربندي وصار مصدر ثقة ....ومراسيل دولية علي التقيل...
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
يا جربندي بالله تعال امشي لينا البوسنة وشوف لينا حكاية الهرسك دي شنووو..!!!
ياجربندي بالله ناس جزر القمر ديل بالله دايرين نعمل معاهم تكامل اسلامي افريقي
يا جربندي بالله بكرة من الصباح دغش تمشي لينا امريكا تشوف فلان فرخات ده وتعمل لينا الية عمل اسلامي افروامريكاني
يا جربندي بالله شوف معاك الهند دي حكايتها شنو من باكستان وارفع لينا تقرير...
يارجربندي بالله شوف ي لينا ناس غزة واريحة ديل حكايتها شنو من ناس رام الله..!!
ليصبح الشيخ جرنبدي رسولا للمحبة و مبشرا بالاسلام في ربوع العالم والقصة مشت معاه مشية السنين ما بين سفرة وسفرة كان هناك (عطاء) وكجمة كجمتين في انتظار جربندي الشالتو القرود... وفي سفراته تلك عادت الي حليمته عادته القديمة التي لم يستطع مقاومتها ليلا في السودان ونهار جهارا في سفراته الي كل اركان العالم المختلفة فقد زار جربندي معظم دول العالم
وان رايت ليلا في احدي المراقص الملحقة بالفندق رجلا يرتدي بنطلونا من الجينز و(فانلة كت) ويراقص فتاة غراء فرعاء شحمانا هو جسمها وملتقص معها التصاق ماكوكي لصقوي امريكاني فان ذلك الرجل هو شيخنا جربندي يمارس الرقص الرسالي...!!!
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
هذا ماكان في شان الخارج واما داخليا فان جربندي ما بتفارق لياليه جربندته تلك التي الهمته موضوع الانتهاز عبر الدفاع الشعبي في ايامه الاولي في فريق ورا..وكانت كل صباحاته الخرطومية لابد لها ان تبداء بسيجارة من الصنف الذي صار اكثر جودة ومقدرة علي التسطيل يحرص جربندي ان تكون بكرت وسط عطور وارياح نفاذة استطاع جلبها من بلاد برة,,,...!!!
جربندي الان مشاريع في الدمازين الطير ياكل فيها سنة ونص ويخلي العيش راقد هبطرش
جربندي مشاريع في القضارف وعصارة زيت في النهود
جربندي مصنع اثاثات في سنجة
جربندي شركة جربندي الاسلامية للاستيراد والتصدير الاسلامي
سفريات جربندي الاسلامية الخرطوم –كوستي وبالعكس
مجمع جربندي السكني الاسلامي يرحب بكم واشتري شقة واحصل علي لابتوب وسيارة كرسيدا مجانا
ونعود
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
كل هذه السحابات والاموال والاملاك المنتشرة في ربوع السودان المختلفة والقروش الهبطرش التي رقدت في بنوك بلاد جووه وبره...بكل هذا الارث الكبير والثروة المطر استقبل جربندي افندي
نضمي نسوان الجنائية الاثنين( الشمطانات الغلف) هكذا ردد جربندي عندما راي ذلك بدايات الموتمر الذي نضمت فيهو النسوان الاثنين ديل بسيرة قبض الريس....!!!
صهيونيات عذبات مقاطيع طاري يهوديات (ك ل بيات) هي النغمة التي كانت يرددها جربندي افندي
وحس بحسه الامني وشوية الثقافة الدولية التي لقطها من مباراته للوزير الفلاني والرسالي علان العلاني بان الموضوع ده كبير خلاص وانو الخواجة ابن اللذينة الارجتيني الصهيوني بتاع النسوان اوكمابو ما داير يجيبها البر....وحيقبض زولنا ده حيقبضوا....
ويصبح كجربندي في راسه ريشة لبع وضرب قروش الميري في امر ضيق ...!!!
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: حمزاوي)
|
وتتواصل تداعيات جربندي في غضبته الكبري علي الارجتيني الممسوخ سليل الامبريالية العالمية الكوندليز رايسية...الكولن باولوية...!!!
وهو يردد
معقولة....!!!
معقولة ياربي
بكرة(ابا كبير) يشيلو لاهاي وضهرنا كجربندية يكون مكشوف ويجونا ناس اعتقد وافتكر والمال العام والثراء الحرام ومن اين لك ذلك وناس كذلك حيث انو ايضا..ويقلعو مني المال والبنون زينة الحياة الدنيا....
معقولة يا ناس...!!!!
لعععع يا زول والف لععععععع..!!!
انا جربندي (الشالتو قرود) حرم اقيف ديك احمر وجن احمر وحرم اوكمابو ده الا الاقيهو عريان ميطي
والرهيفة تنقد وحرم يفرزونا بالشورتات والمجتمع الدولي يقول ده شورت اوكمابو وده شورت جربندي
ونعود
ولكن بعد الفاصل
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
جربندي في تداعياته وحمي عاصفة اوكمابو واعصار الجنائية ذهبت به الافكار لمحلات بعيدة خلاص...
ورغم حماسه العالي واستعداده الذي طل لحماية (ابا كبير) لدرجة تهديده بارجاع الايام القديمة واستعداده
لطهورة (اوكمابو) علي طريقة سلاطين باشا عند طهره فتية ود تورشين...الا انه في لحظات خلوته من نفسه تزوره سحابات المخارجة من الدقانة ديل خلاص...ويهتف بصوت متشنج عالي بينه وبين روحه يحدثها....
تاني داير منهم الدقانة ديل شنوووو ياجربندي
...عرس...ياكاا العرست اربعة
عمرة ..مشيتها اربعين مرة..
عرس عرست من طرف الدقن ..خمسة نسوان كل واحدة تقول للقمر زح كده...حمرا وحلا...شحم ولحم تقيل
سفر...الدنيا كلها طاولتها بكراع ######..ولاهاي البكوركو فيها دي زااتها اتجدعت ياجربندي في شوارعها ورقصت
في فنادقها كده لم الله غفر ليك...
قروش..هيييييييييع..حرم النار ماتاكلها..
ونعود
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: MOHAMED EL-BEELI)
|
| Quote: متابعنننك .. واصل بلنجاتك الأسفيرية علي بنى كوز الجربندية واعوانهم من الدقانة والأرزقية ، عليهم لعنتى صباحاً وعشية. |
هلا يا محمد
وحبابك في مدارات ضرب الركب الكيزانية التي وجب ضربها ضرب غرائب الابل الجربندية
وهي سياحة يا محمد في الوعي والممارسة الدقنية التي كانت سمة لعشرين سنة ونيف من عمر هذا السودان الذي اورثه هؤلا القوم الخراب ونعق فيه البوم..
وكل الود والتقدير
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
كان اوكامبو هو نوبة وحمي (ام هلا هلا) الاولي التي اخافت جرقدندي وجعلت ليله نهارا وجعلت الكوابيس والكدايس السوداء تزور احلامه ولكنه وجد في هيجانات الريس ورقصاته الشهيرة تلك الموشحة بوضع اوكمابو وكل دول الاستكبار الاروبي تحت جزمته
سلوي وملاذ دائم ومنصة لامتصاص الخوف والرجفي ... هييييييع يا زول الدود النتر ابو جيقة قااااااعد ومادام رئيسنا وساسنا وسيد راسنا يومي بصوقر فعوجة تاني تببببببببببب مافي... هكذا كان جرقندي يحاول جاهدا ان يطمئن ذاته التي حست الخطورة والهبايب المتوقع لها ان تاتي من ما يسمي بالمجتمع الدولي والجيوش اصحاب البقعات الزرقاء... وخاصة عندما يتذكر ما جري لصدام حسين
وغيره من الزعماء الذين اطيح بهم من خارج الحدود... ولكن جرقندي كلما ضاقت به سبل الكوابيس يجد ملاذا ومهربا في رقصة من رقصات الرئيس التي ذهب بها لدرجة جعلها الفيديو الرسمي في موبايله ورنة الهاتف جعل منها تلك الصوقييييرة الشهيرة (انا ليييهم بقول كلام) حتي ترتاح ذاته الخائفة شديد عندما يغني المغني (قرقر فوووق للدرب ما بخاف) وسنعود..
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
وسرعان ما تناسي جرقندي (خلعة اوكمابو) وانغمس في ماله و لهطه ومصه بانبوب دقني للمزيد من موارد هذا الشعب الفضل.ونيفاشا ضخت له طرق جديدة للتمكين وارتفاع اسعار الدولار اضافت له شطرا جديدا من بقرة الوطن الحلوب وامسك في هذه الجزئية بتلاليبها
وصار يمارس الشفط بكل ارتياح.. فالقوم بهناك وكل الوطن مشغول بالانفصال وتداعيات نيفاشا وجرقندي بهنا مادي في سكة اللبع والشفط و وكل ما يسمع ليهو بصقرية (مطرفة) او لمة موشحة بالبشير فان شاله وجلابيته وعكازه جاهزات للحضور في معيته والجلوس في المقاعد الامامية ثم قيادة الجميع في الهتاف الشهير (سير سير يا البشير نحن جنودك للتعمير) وان هتف القوم (وحدة وحدة) فان جرقندي كان صوتهم الاعلي في الهتاف...وان هتفوا انفصال انفصال نجد جرقندي الاكثر مقدرة علي الهتاف العالي وعميل عميل يا عرمان وجل همه ان ينتهي هذا اللقاء الذي حضر اليه لاداء فروض الولاء والطاعة للريس الذي في غيابه يعني غياب البقرة الحلوب حتي يذهب الي مدارات شفطه او يعلن البشير عن مشروع وكجمة جديدة سرعان ما يجد اليها جرقندي السكة بكل ارتياح حتي يمارس (فقه الكروبات والكجم من المال العام الذي هو حلالا وبلالا لمثله من الرساليين ولما لا فهي الشيخ الذي شالته القرود مثله لا يرد له طلبا وتفتح له ابواب العطاات والبنوك)
وسنعود
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
لعلعة الاعلام الرسمي من تلفزيون سوداني واذااعة وقنوات صديقة وحتي المواسير والحنفيات التي كانت ان فتحتها لهتفت ابوكمابو (عميل جزمة وكبك ارجيتني) و(البشير سير سير) جعلت هذه اللعلعة جرقندي يفكر من المواصلة وعدم التخارج من ابو دقن ومسيرته التي امطرت له لولوا ورطبا جينا... وفكر وقدر ان يدوس في ابنصات الدقن ويشفط (طلق طلق قدر ما الله خلق)..وجنن التعاون الدولي جن في دول الاواصر الانقاذية من ماليزيا والصين وتركيا واستطاع بلعبثته الاخطبوطية ان يلبع دولار دولارين في سمسمرة لاسلحة عبرت الحدود الشرقية في نواحي شلاتين وهي في طريقها الي حماس(وهي لله) ولم يفوت جربندي بحسه اللبعي تلك التجارة الرابحة والقوافل التي دورت في تلك النواحي فاستطاع عبر مشوار مشوارين لبورتسودان ان يكسب ويكب دولارات خضرا ومكوية عبر توفير كميات ماهولة من الجمال والبقال وتوفير (شبيحة) كما يقول السوريين للمسير والعمل في تلك النواحي وكان اول السائرين في الجنازات التي شيدت لضحايا القصف والهببت التي نزل في تلك القوافل من راجمات لا احد وحتي الان يدري او يهتم من اين هطلت...ولكن جربندي كان عقب كل قافلة وهجمة وجنازة يجهز ادواته الاخطبوطية لكي يجهز (شبيحة) لقافلة اخري ويجهز مع كل هذا جلابية بيضاء ومكوية وشال ودموع لكي يسكبها في جنازات قادمة وسايرة في نواحي بورتسودان وشلاتين...
وسنواصل..
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: Abdlaziz Eisa)
|
Quote: ضرب شديد
بالكعب
عربي ولاتيني..
ولا تاخنكم بهم رأفة..
سنسد الشوارع, الزنق, البيوت, الشجر..
والحجارة
وكل حارة
اضرب اضرب فجهنم تقول مدد مدد..
|
هلا يا عبدالعزيز
وتحياتي يا زول يا جميل..
وحبابك في مهرجان وكرنفال شيخ جربندي ذلك الذي سنلاعب فساده في الارض السودانية الشطرنج
وسنردفه علي خيول الضرب الركبي (زنقة زنقة حار حار لبعة لبعة) حتي ياتي صباح هذا الوطن الجميل
وينكشح من سمائه هولا اللصوص والقتلة والمارقين ومصاصي دماء الشعوب بكل دم بارد وبكل دقن سلبة..
وكل الود
وسنتابع
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
كانت كل الايام والاسابيع الجرقندية تجري وتحلو كما الساكوبيس.. دولارات زي المطر تهطل ويتسرب الشرتيت بين يديه شفيفا كما يتسرب الماء والكرش مد في سكة التضخم والانبعاج... حتي جلس الي الجزيرة ذات مساء لتاتي الاخبار بثورة في تونس ضد زعيمها وحزبها الاوحد وبن علي..وهيييييييع يا زول (بني علي) عوووجة وواااحدة ما بتجيهو تببببب.. كانت هذه اولي طلعات جرقندي في هذا الحدث الذي اشد ما اخافه هو هتاف( الشعب يريد اسقاط النظام) ولكن سرعان ما دبت في داخلة سحابة خوفة ورعبه اعادته الي مربع (خوفته الاوكامبوية) عند هتف احد التوانسة المغمورين ذات مساء جزيري بان (بني علي هرب) (بني علي هرب)... وان الطرابلسي اخوان والذين كان جرقندي وفي اطار ماتشاته الدولية قد تورط معهم في صفقات تجارية تغطي شمال افريقيا وغرب الصحراء قد تمت كردنته في الحدود..وكان في كل جلساته معهم يذكرونه باخوان البشيرررررر هيييييييييع (فلان الطرابلسي ) ده واصل بالحيل وحرممممم زيو وزي عبدالله اخو الريس...!!! والطرابلسبة ده يااااها زااااتها مرة الريس الثانية ويا سبحان الله يخلق من الطرابلسي اربعين... ولكن وفي لمح الصبر ضربت الكثير من الدولارات التي كان جربندي يلاعبها الشطرنج في نواحي الشمال الافريقي واصبحت الجزيرة مصدر اخباره الشووم فكل اقرانه والذين يشابهونه في تونس قد تم عشكهم واتت الجزيرة باخبارهم(صرة في خيط),,وجربندي يتابع بخلعة تارة وبعدم اهتمام تارة اخري ولكنه في حسه الداخلي اتسعت دائرة الرجفي والخوفة من ان يسمع هذا الشعب السوداني الفضل بتلك الكركبة التونسية ويفكر ان يقلد ويجاري ما قام به ذلك الشعب الذي هو ليس (ببرشا) كونه كجم وعبر كردنة بني (طرابلسي) الامطار من الدولارات التي كانت تاتي من الشمال الافريقي حتي تتلاقح مع الدولارات التي كانت تاتي من نواحي
مصر في تجارته السرية مع الامبراطور المصري احمد عز..
وسنعود
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: عبدالكريم الامين احمد)
|
Quote: وفجاة كده تنزل عليهو النعمة وهااك يا ضبائح وهاك يا مساجد وممكن يكون فيها (عرسة) عرستين كده لزوم مثني وثلاثة ورباع...
|
سلام يا كيكى قربنا نفتح بوست غياب ليك ،
الكلام الفوق دا بقى لزوم الكوزنة عرسة عرستين دى فى هذا الزمن اللعين الا تكون وارث او عندك دقن ومعاها تبعاتها،مثلا علامة مصنوعة فى سوق ليبيا.
| |
|
|
|
|
|
|
|
|
|
Re: الكوز ابو دقن مصيرو السجن....!!! (Re: Nagat Sid Ahmed Elshiekh)
|
Quote: سلام يا كيكى قربنا نفتح بوست غياب ليك ،
الكلام الفوق دا بقى لزوم الكوزنة عرسة عرستين دى فى هذا الزمن اللعين الا تكون وارث او عندك دقن ومعاها تبعاتها،مثلا علامة مصنوعة فى سوق ليبيا |
هلا يابيكاسو
والمشاغل وكراكير الغربة ام دق دي
كابستنا في السلخ وضرب الركب الكيزانية في هذا المكان
والف شكر علي السؤال
---------
ايوووه عرسة عرستين واحتمال ثلاثي ورباع بقت موهلاتها دقن وعلامة تمت معالجتها في جخانين سوق ليبيا
وحتي التوريث ففي زمن القحط والجفاف وسطوة الدقانة بقي ناااااادر البورث في البلد دي
لذا نجدهم هم من يسيطرون علي دراما (التعداد)
والف تقدير وتحياتي
| |
|
|
|
|
|
|
| |
عبدالكريم الامين احمد
معاوية عبيد الصائم
عبد المنعم سيد احمد
MOHAMED EL-BEELI
Abdlaziz Eisa
Nagat Sid Ahmed Elshiekh
فيس بوك
تويتر
انستقرام
يوتيوب
بنتيريست