الفاتح جبرا ................. الا الجميلة

حفل خيري بالنادي السوداني – Hayward, CA لدعم السودانيين بالمعسكرات والتكايا

مرحبا Guest
اخر زيارك لك: 09-14-2025, 01:03 PM الصفحة الرئيسية

منتديات سودانيزاونلاين

مكتبة الفساد

ابحث

مدخل أرشيف اراء حرة و مقالات

News and Press Releases

اتصل بنا

Articles and Views

English Forum

ناس الزقازيق

مدخل أرشيف للعام 2016-2017م

نسخة قابلة للطباعة من الموضوع ارسل الموضوع لصديق اقرا المشاركات فى شكل سلسلة

« | »
اقرا احدث مداخلة فى هذا الموضوع »

04-14-2016, 05:33 PM

عمر دهب

عمر دهب
تاريخ التسجيل: 10-19-2014
مجموع المشاركات: 2012

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

الفاتح جبرا ................. الا الجميلة
04:33 PM April, 14 2016 سودانيز اون لاين عمر دهب- مكتبتى رابط مختصرإلا الجميلة.. هي حصلت! .. الجميلة خط أحمر .✏الفاتح جبرا...العبد لله سبق أن كتب مقالاَ بعنوان (عملتوها ظاهرة) وهو عن التعدي الذي حدث على ميدان (بحري الشعبيية) من أجل تحويله إلى (مول) للتسوق ... ثم ما أن سمع بالتعدي على ميدان ساحة الرعد (ببيت المال) وتخصيصه كعمارات لبعض المواطنين حتى سطر مقالاً بعنوان (عملتوها شينة) .هنالك المئات من حالات التعدي على ميادين وساحات البلاد وتحويلها إلى منفعة خاصة حتى أصبحت الأحياء دون متنفس ، لو كانت هذه المسالة (أو دعونا نسميها ظاهرة( شئ فردي كان من الممكن أن نقول أنها (تجاوزات) يقوم بها البعض ولكن أن تكون بهذا الكم الهائل وفي مختلف مدن السودان فنقولها بالمصري (أنحنا بننسرق يا رجالة) .نعم وأيم الله هي سرقة تقوم بها (عصابة) لا تحفل بالوطن ولا المواطن ، (عصابة) ما أن يرى أحد أفرادها ساحة أو ميداناً في أحد الأحياء في أي مدينة كانت حتي يسيل لعابه فيشرع في (توضيب) شهادات البحث وبقية المستندات التي تثبت حقه في ميدان يكون قاعد (من زمن الأنجليز) !العبدلله لا يعتقد بأن هنالك بلداً في الدنيا يمكن أن يحدث فيها مثل هذا العبث ؟ كيف يمكن يا جماعة الخير لمكان مخصص كميدان وموجود في الأراضي كميدان وفي خريطة المدينة كميدان وهو على هذا الوضع (ستين ألف سنة) يقوم يجيك زول شايل ليهو شهادة بحث ويقول ليك إشتريتو؟ مش حاجة تخلي باقي السلوك الفي راسنا دي تضرب؟ كلمونا ورونا بتعملوها كيف ؟ عشان إحتمال نفسنا تدخل لينا في ميدان ؟ المدينة الرياضية ذااااتا التي خصصها رئيس الجمهورية لم تسلم من هذه العصابة ، وزعتها وشالت القروش التي لم يدخل منها لخزينة السودان ولللا قرش أحمر .هل هنالك مسؤولاً واحداً وزيراً كان أم خفيراً يمكن أن (يبرر لنا ما يحدث) ؟ والغريبة أن معظم مدن السودان لم تسلم من هذا النهب الواضح الشئ الذي يعني أن معظم مدن السودان قد فقدت الأحياء فيها الرئة التي تتنفس بها والمكان الذي يقضي فيه شبابها ساعات مقدرة من اليوم وهنالك من يتساءل لماذ إرتفعت نسبة تعاطي المخدرات وسط الشاب؟ يمشو وين بالله بس كلمونا؟ يمشوا المسابح وللا يمشوا المكتبات العامة وللا يمشوا صالات السينما وللا يمشوا المسارح وللا يمشو صالات الجمباز والتنس والكرة الطائرة؟طيب لمن ديل كووووولهم ما توفروهم ليهم كمان (تقلعو الميادين) الجوة الأحياء البمارسوا فيها الشباب ديل هواياتهم ؟لا وأيه ودون حياء .. ولأانو شافوا الناس ساكتين .... عاوزين يبيعوا (جامعة الخرطوم) .. بالله مش بيبالغو؟؟؟ جامعة الخرطوم عديييييل كده .. لا زول عاقل يقول ليهم (كترتو المحلبية) لا زول كبير يقول ليهم (بتبالغو) ، لا وأيه (كالعادة) تطلع بالونة إختبار ... ويقوم مسؤول يؤكد ويقوم ليهو مسؤول (ينفي) وأنحنا قاعدين ذي الأطرش في الزفة .لمن بالله نشكو حالنا وضعف مآلنا وقلة حيلتنا؟ بالله عليكم أليس هذا هو الغبن بعينه أن يجد المواطن رئته التي يتنفس بها وقد أقتطعت منه ليذهب ريعها إلى لصوص (عصابة الميادين) الذين لا يتمتعون بذرة من الحياء وهم يفترسون الميادين (الليها مليون سنة) أفتراساً ويحولونها إلى (فلل) و (عمارات) .. وكمان جامعة الخرطوم ... لا وأيه التبرير ... يقول السيد وزير السياحة بأنو الجامعة ح تكون (مزار سياحي) .. سياحة مين يا عم ؟ هو السياحة العندكم عملتو فيها شنووو ...؟؟؟لقد تم من قبل تحجيم سودانير وبيع (الخطوط البحرية السودانية) والسكة حديد، وتدمير مشروع الجزيرة، وتصفية النقل النهرى والنقل الميكانيكى والبريد والبرق والمخازن والمهمات وبيع حديقة الحيوان والأشغال والكثير من المؤسسات حتى مستشفى الخرطوم لم يسلم من التشليع بدعاوى هذيلة لا تقنع أحداً وهنالك أخبار تفيد ببيع (بيت السودان) بلندن وها هي المدينه الرياضية قد تم التغول عليها وبيعت كفلل ومحلات (بالقطاعي) ولم تضع الدولة يدها على اللصوص حتى اللحظة !.. (ودونكم خط هيثرو) ، لكن ده كوووولو كوووم ومجرد التفكير ببيع (جامعة الخرطوم) أو إفراغها كوم تاااني خااالص .. وخط (أحمر) ... هى حصلت؟ !كسرة :الخطوة الجاية ح تكون (إستاد الخرطوم) ... ههههههه شوفو كلامي !!كسرة ثابتة (قديمة):أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +(و) كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+(و)كسرة جديدة لنج :أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنوووووووو؟ : (و) .... (عدل بواسطة عمر دهب on 04-14-2016, 05:39 PM)

04-14-2016, 06:06 PM

عمر دهب

عمر دهب
تاريخ التسجيل: 10-19-2014
مجموع المشاركات: 2012

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الفاتح جبرا ................. الا الجميلة (Re: عمر دهب)
شعب القرشي راجع ________ شعر: معز عمر بخيت -------------- يا عجوبة كفاك أرحل سوبا خِربت وانت قاعد ومافي زول غيرك ح يفضل بعد ما هدًمت دارنا واستبحت وطن أمانَا كل غابة وكل مشتل جيت على الجامعة الفتية وانت معروف زول أذية زول حواري وبندقية وجهل أجهل جيت بليل مظلم وحالك شايل الأسى و المهالك والفساد بالسل تغلغل في دمانا وفي رئاتنا وفي تفاصيل كلْ حياتنا وكل وادي وكل محفل جامعة الخرطوم منارة ونحن رافعين تاج شعارا مهما تنوي ومهما تفعل منبع الثورات ح تبقى وانت في الدبابة أبقى بين عنادك وبين زنادك حلقة من أسخف مسلسل نحن بالعلم ابتدينا جامعة منهج شب بينا والكفاح حاملنو مشعل الجامعة في التاريخ أساسا في العلوم مرفوعة راسا وفي عناوين الحضارة وفي محطات السياسة باقية إقدام خير مؤصل سطرت أمجاد بلادنا وفجرت أحلام ولادنا وكل فذ من صوبا أقبل وانت خربت المرافي والمساكن والمشافي وكل آمال الغلابا الكانوا أجمل قبل ما تسرق ربيعم وقبل ما تخنق رضيعم وتستغل الدين وتجعل أسوأ السوء في مسيرك وكلْ مواطن حر أسيرك والبلد في الذل بتوحل بس تأكد وابقى عارف جامعة قلعة وسيلا جارف وانت أول حاجة ترحل وانو شعب القرشي راجع يهزم الليل والمدافع وانت مدرك لما يزعل ولما يستلهم طريقو والنضال يصبح رفيقو فجأة ح يصيبك في مقتل جامعة الخرطوم حتبقى والعساكر هي الحترحل جامعة الخرطوم حتبقى والعساكر هي الحترحل _________________ معز عمر بخيت

04-14-2016, 06:50 PM

عمر دهب

عمر دهب
تاريخ التسجيل: 10-19-2014
مجموع المشاركات: 2012

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الفاتح جبرا ................. الا الجميلة (Re: عمر دهب)
سيدي الحجاج أزهري محمد علي كلابك والأفاعي الحايمة من روتانا لي أمواج .. كاورت البلد بي حالا .. ... ولا لقت اليقولها جر .. في ناس جيعانة ما قلبت حرف في صاج .. ... في ناس عريانة ما لفحت هدم في الزيفة .. ما طالت ايديها رغيفه .. والسبب المعكر كيفا .. دق بنوتا بالكرباج .. ناس غلبانة بس دغرية .. ما بتعرف تخت طاقية في طاقية .. والدين الحنيف في شرعها الحرية .. زدتها في الحرج احراج .. وزدتها في الدجل دجال .. عوج شفناهو ماسمعناهو في قول زول .. قال بنات دقوها دق العيش .. ولاد ما أندقوا في شبال .. بقت في غصة الأيام .. قيم غنيتا يا قدال .. قيم شلناها عمة وتاج .. رقيص الشامة بت حمدين .. وخت الحنة لي يات من حضور ضفرين .. ونمات العديل والذين .. ورقصة جون مع أوهاج .. مشينا نقدم البنوت على ضو الرتاين .. خفت وهج الغنا الوهاج .. ورحل صوت المغني حزين .. ورطن صوت العنج هراج .. سقط في غفلة نون النسوة .. أخوان البنات والنخوة .. ستار العيوب والرسوة .. شيال الحمول أبعاج .. .. فيا حجاج أكل نارك .. واتلفح بشاكيرك .. مع طلعة شهر زو الحجة .. وأحرم حاج .. وطوف فوق الجثث طاؤوس .. وشعبك لا أكل لا علاج .. وحاج في شنو؟ .. معاك كل البلد هاصت .. وفار نحل الجباية وهاج .. فيا فالق نواة الحبة يافراج .. ويا باسط عجايب الإسرا والمعراج .. ويا خالق الخلايا الحية .. أمشاج ابتلت أمشاج .. طحنتنا طاحونة الفقر .. طحنتنا سنواتا العجاف .. يا الله تلزمنا الصبر والسترة .. والعيش الكفاف .. وترحمنا من صرة وشي .. في وش وليداتنا الضعاف .. .............. غرقان بيرقص منتشي .. ووطنا مقطوع من خلاف .. وبأسم الله ما خلالنا شي .. وفصلنا في آخر المطاف .. يا ناسي أقدار الرجال .. ما تخشى غدر الله وتخاف .. كتر عوج الكلام والميل .. وتحت الجزمة مليون ميل .. تحت الأزمة طاحونة حوافر الخيل .. سقط تلت البلد عفوا .. سقط نص البلد لهوا .. سقط كل البلد سهوا .. فهل صحاك ضمير الأمة في هجعة هوايد الليل .. على زبد الغنا الممحوق؟ .. شنو الخلاك تنوم تحلم على على خرطة وطن مسروق؟ .. وطن في السوق .. وطن أشتر .. مرق من ذمة التاريخ على ذمة كلاب الحر .. ينوم في جبة الدرويش .. يقوم بي بدلة العسكر .. .. فيا ويلك في يوم الويل .. ويا ويلك .. تقوم تحتك قيامة الناس .. أفواج الضحايا .. ستات الكجيك والشاي .. والناس البعرفو شليل .. حشود الطلبة والعمال .. وبنوت الغياب والليل .. طفولة مشردة ونازحين .. وكم حجاج .. يجيك من ديل يجيك من وين .. أولاد الشوارع عووك .. المعدمة ومعدومة .. قطامة وقرضمة وراندوك .. لماضة وطرقت حلقوما .. من كل حتة يجوك .. يوم التسود يوما .. ناسات حكومة الجن .. وناس جنها الحيكومة .. ما طالا الشوارع في .. في ولاد بعرفوا القوما .. ولاد راقدين .. وأولاد اسمها المايقوما .. ديل أولاد شريعة قوش .. المستضعفين في الأرض .. يبنوا ويهدوا عروش .. لا بتخون البعض لابتشتريها قروش .. في كل حته وراك تمرق تلاقي جيوش .. أصدق لسان الحال من نضمك المهبوش .. نفس الولاد جايين من طينة حضارة كوش .. حافظين شعر حميد .. فاهمين قصايد الدوش .. ما تمشي يا محجوب دايرين نظبط بوش .. يا داب عرفنا الصاح .. دخل الكلام الحوش .. وشكرا .. شكرا سيدي الحجاج ............

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]