|
|
|
 Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
سلام أستاذ محمد
وعفارم عليك أنت الطاري سيرة الحبايب ولاحم صلة رحمنا بيهم .
بارك الله فيك يا ود المشايخ يا حبوب .
وألله يا محمد أمنيت أجي الرياض دي عشان تشيل لينا من بيتكم حفاظة شاي ونمشي قلعة عنتر بن شداد
تحكي لينا هناك عن قامة الشعر الطويلة الدوش وعن حميد النيل الجدو النيل و عن الشريف الشريف .
ألف شكر
وياريت عزيزي بكري ابوبكر يمد لينا البوست ده في سقف المنبر العامر
| |
  
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Osman Musa)
|
| Quote: شكرا مجموعة إنعتاق .. عفارم عليكم .. هكذا يكون الفعل الـ يشرف |
ولهم ولك الشكر اخي محمد وانتم تحتفلون بشاعر الشعب والوطن
ومليووووووون سلام يا شعبنا .. وطيلة ما انتم بخير وموجودين الراحل
المقيم شاعر الشعب لم يمت . وتعيشوا انتم واجيالكم وتشيلوا اسموا .
ودمتم جميعآ اخي محمد ودام شبابنا المبدع .
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: مني عمسيب)
|
عثمان موسى ومنى عمسيب حبابكن عشرة في بيت إنعتاق حيث التنادي الحميم
لذكرى النجمين الراحلين العزيزين .. وأشعارهما المضمخة بعبق الوطن
(البنحلم بيهو يوماتي) ..
آسف للتأخير رغم أن شباب إنعتاق بعثوا لي بملف صور الإحتفال .. ولكني
لم أجد فرقة .. والنت تقيل جداً .. فريثما ينعدل حال النت أترككم مع رسالة الصديق الراحل
ميرغني الشايب في رثاء الشاعر : محجوب شريف
محجوب يا شريف: دينك كم علينا .. وأجمل ما لدينا .. بقلم ميرغني الشايب
منذ عقود طويلة أصبح السودان مصدر أحزان وفواجع، واستطالت حوائط المبكى
وانتصبت شواهد القبور في كل شارع وممشى، وقبور أخرى مجهولة بلا شواهد أو
هوية. آثرنا نحن السلامة والخلاص الشخصي، ومارسنا النوستالجيا والاجترار
المهين لمآثر غابرة، ونضالات دارسة، لعل في ذلك بعض العزاء عن الغياب
الطويل والشعور الجارف بالذنب، إلا أن محجوباً نهض فوق كل ذلك سامقاً
وشامخاً، ومعه رهط من الرفاق والأصدقاء. لم يثب إلى "السفن الغارقة
والهاربة"، بل يمم وجه شطر المستقبل، وتأبط الشعر والوطن، ومضى موغلاً في
الحلم واليقظة "وهزّ بالمنشور وبشّر" وهتف "أن أجمل الأطفال قادمون ساعة
فساعة"، "ومكان السجن مستشفى" . هذا الوعي الشقي منذ اليفاعة، القابض
على الجمر، القادم من "المدينة عرب" المنذور للأخطار والحرائق، لم يسقط
في براثن الذات القاتلة، ولم يصغ إنتباهاً "لذهب المعز....."، رغم أن ذلك إغواء
وإغراء لا يقاوم، في زمن الفاقة والمسغبة وضيق ذات اليد وانفراط عقد الرفاق.
لك حبي يا صديقي الملحمي، وأعلم يقينا أنك ستعود من "الُلندرة" كما كان يردد
صديقنا خالد الكد (خالد الحربي)، أكثر ألقاً وبريقاً وبهاءاً، ستعود "للجميلة
المستحيلة"، وستمطرنا شعراً يلملم شتات نفوسنا، ويمنحنا القدرة على التماسك.
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
مرحب يا أبو الريش .. شددنا الرحال من الرياض للهفوف (الرحال قطار يعني) معي المهندس عبدالمنعم العوض
وإبني خالد محمد عبدالجليل، قلوبنا جزلى بتلبية دعوة كريمة من مجموعة إنعتاق لفعالية لا يرد الدعوة لحضورها
باحث عن وطن .. وانقلبنا للرياض مسرورين ومتفائلين شديد.. فقد تحققت في حضورنا ومشاركتنا معاني كلمات
حميد:
ناس ولا إنشاوفوا
غنوة يتعارفوا
فلان ود فلان
ود فلان .. الفلاني
قلنا سرك تعدى
الزمان والمكان
هبشتك ,.. نقشتك
مغمِّد حدرتك
منو المن شدرتك
طعم كم لسان ؟؟
أظل فيكَ حائر
كما العش في طائر
يا سِر الرحيق
كما البرتكان
شنو أصلك
غمائم ؟
حمائم ؟
هديله ؟
نسائم ؟
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
الصورة أعلاه لصاحب هذا الخيط متحدثاً بإسم الملتقى السوداني الثقافي معلناً دهشته بحسن تنظيم وشكل ومحتوى
أمسية انعتاق الفتية مطمئناً بأن (أجمل الشباب قادمون ساعة فساعة .. عيونهم أشد من عيوننا بريقا صدورهم بما
وهبت أكثر أتساعا)، مؤكداً أن الملتقى السوداني الثقافي بالرياض سيعمل بالتنسيق مع مجموعة انعتاق
لمزيد من الفعل الثقافي ال يساهم في رفع كتف الوطن الميل .. على خطى حميد والشريف محجوب:
ما بتحير بين الفوق وبين الناس التحتانية
إلا عقوق والله مغير والله كفيف الإنسانية
بنحب كده ونعشق تمام .. إلا بنكون قدر الثبات
ضد السكات
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
محجوب شريف
يا غيمة رحلت بالخريف
والدنيا صيف
مليانة حيضان السراب
رويانة ارضها باليباب
كل الصحاري البور خراب
جرح الوطن ينزف نزيف
وجعة رحيلك
كتمة في كل الفصول
زادت ليالي الفجعة طول
اخر ظهور فجرو الشفيف
محجوب محصن
من متاهات الزمان
يازول ممكن
جوه في قلب الوطن
بالحب مسكن
شايلو في حضن الامان
غتاك بي توبو العفيف
من كل زيف
صافي الجنان
عفة يدين
عفة لسان
احساس رهيف
جسدت معنى الكبرياء
صابر على كل البلاء
عزة نفس متواضعة
شامخ في إباء
محجوب محصن يا نضيف
من كل زيف
مرقت من الدنيا
زي مرقة عريس
زافنو بالزين والعديل
يا دغري يا زين يا عديل
ما لنت ما ميلت ميل
سنَد غناويك الممرتقة
لي بحور الظلم قيف
ورثت حميد الصغير
رد الجميل
وراجيك حميد الكبير
في دوح ظليل
هناك يقيف
متضاري في اسمو اللطيف
يهمس حفيف
محجوب تعال
محجوب محصن يا ظريف
يا زول وريف
شفيف
عفيف
محجوب شريف
عبدالمنعم العوض -الرياض-ابريل2014م
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: munswor almophtah)
|
عبدالمنعم العوض .. عفاف بت ود أب حريرة .. المنصور المفتاح .. في حضرة محجوب شريف وحميد يطيب الكلام والجلوس والتأمل
السامي .. فقد كانا نجمين سامقين في فضاء هذا الوطن العجيب الغريب (الذي لم تصنه الأناشيد).. (عانيت وراك جنس عنا)، وظل محجوب
وحميد يصوغان المعاني ال تيقن بأن كل شيء سيكون على ما يرام .. نحنا بنحب شاي الصباح والمغربية مع الولاد .. وماني الوليد
العاق لا خنتا لا سراق .. والعسكري الفراق بين قلبك الساساق وبيني هو البيندم .. والديرو ما بنتم يا والده يا مريم .. ما تقولي شن سويت
ما تبكي ما سويت .. غير البطمن ناس بهمن حسيت .. أو كُنّا وكُنّا .. ياما عُزازْ ولحظات التّلاقي لُذاذْ هِلِكْنا وكِتْ وِكِرْ تورنا .. ودهتنا
بصيرة الإنقاذْ هويّتنا إتلغتْ فينا .. وبقينا أعجازْ زمن خاوي وحقيقتو مجازْ .. و كلام كتير زي : أنا ماشي ... راجِع ... لي بِيُوت
تفتح لِي أدُقْ أو ما أدق من غير تقول الزول مِنُو ولا حتَّى علّ الداعي خِير لا مالَك الجابك شِنُو لي بيوت بجِيهن في أيِّ يوم إن جيتا ليل
إن جيت دغُشْ طوَّالي أدفْر الباب وأخُشْ
كل هذه الاقتباسات من حميد والمحجوب لاني مصر ألا أطول عليكن في ا لرد لكين ما عندي ليهو طريقة .. فالدار داركم والتحية
لمجموعة إنعتاق التي قدمت لنا يوماً سيبقى في ذاكرة تاريخ حميد ومحجوب شريف
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
وصلت سدرة منتهاك
عبدالمنعم العوض -الرياض 21مارس 2012م
مرثية حميد المشهد الاول
عز النهار انسد بي كبد الظلام
لاجت فطين
ست البكي المو عارفه وين
تسأل نعزي مع منو؟
ونقول شنو؟
حامدنوا رب العالمين
حميد بنبكي مع منو ؟
وين نورة وين؟
يا نورة آآه يا نورة آآه
آآه يا وطن
بالله مين قدرك حزين
كل الوطن
ياهو الوطن
العاشو جواه الخزين
اسوعت اندهدهت وين؟
راجنك آآ عشم الغلابة المتعبين
راجنك آآ دخري الضهابة المتربين
اسوعت اندهدهت وين ؟
عترلك الحجر آآآآآالبخيت؟
شوف عيني شفتك من زمان
في ها المكان
شوف العيان
متوشح انوار اليقين
عترلك الحجرآآآآآالبخيت
تتسامى بي فوق السحاب
ولوو... رهاب
رافع معاك ظلم السنين
الكان مبوق في الارض من قبل حين
شايل معاك وسخ الارض نضفتها
وكمترت تشق كل زيف غربلتها
واشوفك اتوكل... لي وين؟
عتر لك الحجرآآآآآآالبخيت
عيان بيان
شامخ شموخ
متجلي في داك المكان
واقف مع محمودنا راضي ومبتسم
يتحدى جور الظالمين
فوق المشانق بي ثبات الآمنين
روحك بتفدي وطن نفيس
في البرزخ انت هناك عريس
لا صفقة مافيش لا رقيص
لا حني لا طنبور وكشف القرمصيص
مافيش تعب
مافيش نصب
يبراك ملاك
وسراك براك
ليك ما تريد
كل ما تشاء وهل من مزيد
وحسن الجلالة عليك يميس
ميست....ميس !
ضلن رهين
موتك قطع حبل الوتين
الشمس تشرق كل حين
تخفي القمر
ونور النجوم الانكدر
نوريك جريف قيفها انكسر
نوار جناينها حت ..حت
نورت تميراتها انطفت
نايرات مواسمها كاوقت
طفرت طيورها الورجغت
كيف سون طرابيلها اتنحت
حتى الدوابي انزعزعت
كل الخلوق انزهللت
ممكونة بالوجع الدفين
مسكونة بالنوح والانين
توشل تقاويها الدموع مطر..مطر
ما صدقت ... تغزل كتر
يهوداك مع عيوشة راكبين القطر
سفرا بعيد يتمارى من زمن القطر
الاندثر الاندمر الانطمر
غفلتنا وخليت غناويك ضو سراج
والظلم ينهب في الارض يقطع فجاج
اسوعت اندهدهت وين؟
مرقت حرفك ومنو ما فكيت ريق
تاريك انت نزلت في نص الطريق
فاقد جنيات الفريق
رشعت فوقن يامطر عز الحريق
طايبتهم
ضاحكتهم
لاعبتهم...
وهدهتهم
يا الماك ضنين
عترلك الحجرآآآآآالبخيت
خليتنا لي ظلم البشر
وحكم الكجر
ولي كل شر
يا خي الله في
ايوه الله في
حلة قوافيك المطرزة بالصدق
موجودة في
وان شاء الله مايغشاك شر
خير... ياوفي
نواصل
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
في ندوة حول تجربة حميد بالرياض .. جاء ضمن مداخلة للدكتور/ أحمد الصادق ما يلي:
دعنا نحكي يا سيدي عن مشروع حميد الشعري رحل حميد ولكن سيظل شبحه مخيما علي القول الشعري في السودان
هذا ان لم يدن له عديدون بتمظهرات شعره في متون اشعارهم. ذاكرة الراحل كانت متخمة بتراث المنطقة الشعبي
ومروياته الشعبية وقد استوعبه و تمثله واخيرا تجلي في كل ملاحمه الشعرية. في رأينا أن أهم ملاحمه: نورا والسرة
بت عوض الكريم وعم عبدالرحيم. هي ملاحم تعادل جوهريا وموضوعيا " الدولة الوطنية المفقودة" أي انها حققت
للانسان في تلك الجغرافيا الملحوسة حتي العظم أحلامه و أشواقه، الامر الذي عجزت عن تحقيقه مؤسسات واحزاب
سياسية. نحتفي بالراحل لانه أحسن الينا والي هذا الوطن الجميل الذي، من خلال أشعار حميد، حققنا له الانتماء
والولاء والوفاء. غني حميد لسلام يعم السودان، كيف لا وقد كان كان بابلو نيرودا يقول "يخرج السلام من الشعر
كما الخبز من العجين"، اليتم حالنا من بعد حميد فقد كان صوت من لا يسمع صوته ومدافعا عنا بشجاعة وجسارة وشراسة
في كل نظم وكل ايقاع وصورة رسمها في ملاحمه الخالدة. لترقد روحه بسلام فقد أعطي بلا من ولا أذي للسودان
ولاهله، صرنا ايتام في موائد لئام و صرنا لعبث وسفاهة بالغين واخذنا لمساخة وموات ... بعد رحيله.
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
وصلت سدرة منتهاك (المشهد الثاني )
مرثية حميد -عبدالمنعم العوض
غفت قلوب الذاكرين
صحت عقول الغافلين
بصرك حديد عين اليقين
دابك عرفت المدعين
شوف الوطن ودوه وين
هكروه بين القبلتين
خلوه بين نار اميين
ظلموه يوم صلب المسيح
صلبوه يوم ظلم الحسين
وانت المتيم بيهو
خادمو عرق جبين
يا اخينا شفتك مرة
ماشي مع الرضيية
سالكين دريب الراضية
مرضية و مطمئنة الى رحيم
من يوم الست بربكم ؟
عهدا قديم
راجعين على البيت القديم
قاصدين شهود حق اليقين
عين اليقين
ثم النعيم
ونحن الهني
وإنتوا الهناك
بيناتنا هبَار الشراك
كدبنا في الكرو في رجاك
عاد ماشي مننا وين رجاك
خليت وليداتك براك
كيف بي قفاك؟!
يااخوي وليداتك صغار
وحملك تقيل
جيش من بطان
وحروم كتار
لابسات طرق وناس من زمان
ناس حمتو عيوشة ست الدار
وعم عبدالرحيم
والسرة بت عوض الكريم
كترة رجال وكترة حريم
حملك تقيل وعلينا دين
وكل البلد عليها دين
الشورة كيفن شن نسوي مع الولد
الكت شايلو حمل بلد
وتمر الهبوب بقضى الغرد؟؟!
عفنون وصيص
خاتين بصيص
هدونا بالخوف والمرض
وفي بعضهم راقدين قرض
يا زينا انت رجعت وين؟
عتر لك الحجرآآآآآالبخيت
عتر لك الحجرآآآآآالبخيت
ما شفتو قدامك معارض؟
مشغول تعاين لي مصايبنا
المحتربي فوقنا زي حيبي العوارض
مهموم و ماك ساكت تعارض
و الخوازيق ليها رافض
عرضحالك للوطن
طوالي في خاطرك عرائض
مو مدغمس
مو مدهنس
مو مدلس
مو مملس
خطو واضح ..وفكو عارض
لفيت بي وين... انت وين؟
ياالجيتنا في نفس الزمان
وادركت لي وتر المكان
وشفعك رهين
شفتك ..هوى
دايرين تشمولكن هوا ؟
يا الكتو متقاودين سوا !
بيناتكم الريد والهوى
نازلين علي قيف البحر
فوق سارة كانديقة وهوى
اوعك من البحر البحر
بحر التساب
والضو سراب
في اطن الرهاب
اخد الحذر
الجهجهة وشيمة القدر
ورينا عومك
الليلي يومك
شفتك نزلت على الغريق
ووطنك غريق
مالك ..غتس؟
بنقرت انت مرق.. عديل
شايل وطن ما فيهو ميل
زين يا عديل
وكل القصايد القلتها
ما اتبلت آآآزول ياجميل
مرقت... تسوق المتعبين
مرقت تضاضي المترفين
الشقو... صفنا... فلقتين
واحدي سموها الشمال
والتاني سموها الجنوب
وراقدين تماسيح البلع
متبطحين
بالضفتين
لي...سفنا
وانت وانا
بيناتنا دين
ما دينك انت علي كتير
نصبح حبايب لامتين
ونحن الحبايب من متين
علمتنا
الهودنا
والسودنا
وضوقتنا طعم الغنا
وكيفن تكون الدندنه
انعيك وانعي رويحتي
والاجل الدنا
ابكيك لي مين واللا مين ؟
نواصل
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
ماشاء الله عليكم
مازلتم علي نشاطكم المفرح ولقاءاتكم الثقافيه الراقيه
رحم الله محجوب شريف ومحمد سالم حميد
وصديقي الجميل ميرغني الشايب وهو موجود في كلماته عن محجوب شريف..
وفي نشاطاتكم السابقه الناجحة..
اكيد انتم هناك تحتفظون للعظماء بمكانتهم وتذكرونهم بذكر اعمالهم
الخالده..
التحيه لكم جميعا ولك علي الخصوص يا محمد..
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Muna Khugali)
|
وصلت سدرة منتهاك (المشهد الثالث )
مرثية المرحوم حميد (عبدالمنعم العوض )
حميد فقدنا الضو
ظلام وسنين رهاف
نتبن في سراب الحسرة
كايسين الضفاف
ومن غير خلاف
خليتنا للربا والتلاف
عيش الكفاف
قبلية الوان اختلاف
بالرغم من در العجاف
جبروته في ليلة جفاف
حقك علي..
تب ماب اخاف
من كل تجار السلاح
الدسو كنتوش الملاح
خلونا بايتين القوا
ورافعين سلاح
ماب اترعب انا منهم
ب ازرد تميمة كيدهم
في نحرهم
و امسك على جمر القضية وافنهم
فننن........ فنن
فننن........ فنن
وحميد يصن
عقل البنيات دار يجن
خلن مشاطن وجيهتن
باللخمة ماعرفن يجن
بالهجمة من الصدمة
ماعرفن يجن
صوتك مهابتك دلتن
حراتنا جن
جن سوقرن
خمن بكن
شكلن ونقزن وسكلبن
الليلة وووب الليلة وووب
خليتنا لي وعد الهبوب
شوف العبوب
الفاوة يا عهد الخبوب
سجنونا وووب
هانونا وووب
دقونا وووب
كتلونا وووب
غصبونا ووبين.. واللا وووب
فاقدنك آآآ حميده وووب
وقلبن كلامن ومنحن
اخونا فارس الحوبة عدال العوج
مقنعنا مفتاح الفرج
يا نورنا في عز الظلام
نضالنا.. حرية وسلام
نصفنو ما خلن كلام
زين وصفن
حزنا انتفن فوق قوز الرماد
وقفنا اتوشحنا بي علم الحداد
رجعنا استغفرنا لي رب العباد
شدينا حيلنا
وما انقطع عصب الوزين
سجينا شناط الشعر
واتحزم البلد الحزين
شلناك على كتف الوطن
داعين و مبتهلين
وختيناك بسم الله
في روضة جنان حامدين
وكتبنافوق لحد المكارم
للزمن... شاهدين
بسم الحق بي سر الكلام القلتو
منضوم في عقد القصيد الزنتو
مسنون باوزان الحسام الشلتو
مكنون في لحن الغناوي نفحتو
في المعنى الرصين
شاهدين! ....شاهدين!
نواصل
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: عبدالمنعم العوض)
|
كتبت الأستاذة منى خوجلي:
مازلتم علي نشاطكم المفرح ولقاءاتكم الثقافيه الراقيه
رحم الله محجوب شريف ومحمد سالم حميد
وصديقي الجميل ميرغني الشايب وهو موجود في كلماته عن محجوب شريف..
وفي نشاطاتكم السابقه الناجحة..
اكيد انتم هناك تحتفظون للعظماء بمكانتهم وتذكرونهم بذكر اعمالهم
الخالده.
----------
لك التحية يا أستاذة وسلامة الرجوع والعاقبة للوطن .. الظروف أتغيرت
ولكن والأمر محجوب وحميد حضورنا ضروري لأن ذكراهما ملهمة
وبتدي مشاعر حية .. نحتاجها شديد .. (عانينا وراهم جنس عنا).
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
وصلت سدرة منتهاك (المشهد الثالث )
مرثية المرحوم حميد (عبدالمنعم العوض )
حميد فقدنا الضو
ظلام وسنين رهاف
نتبن في سراب الحسرة
كايسين الضفاف
ومن غير خلاف
خليتنا للربا والتلاف
عيش الكفاف
قبلية الوان اختلاف
بالرغم من در العجاف
جبروته في ليلة جفاف
حقك علي..
تب ماب اخاف
من كل تجار السلاح
الدسو كنتوش الملاح
خلونا بايتين القوا
ورافعين سلاح
ماب اترعب انا منهم
ب ازرد تميمة كيدهم
في نحرهم
و امسك على جمر القضية وافنهم
فننن........ فنن
فننن........ فنن
وحميد يصن
عقل البنيات دار يجن
خلن مشاطن وجيهتن
باللخمة ماعرفن يجن
بالهجمة من الصدمة
ماعرفن يجن
صوتك مهابتك دلتن
حراتنا جن
جن سوقرن
خمن بكن
شكلن ونقزن وسكلبن
الليلة وووب الليلة وووب
خليتنا لي وعد الهبوب
شوف العبوب
الفاوة يا عهد الخبوب
سجنونا وووب
هانونا وووب
دقونا وووب
كتلونا وووب
غصبونا ووبين.. واللا وووب
فاقدنك آآآ حميده وووب
وقلبن كلامن ومنحن
اخونا فارس الحوبة عدال العوج
مقنعنا مفتاح الفرج
يا نورنا في عز الظلام
نضالنا.. حرية وسلام
نصفنو ما خلن كلام
زين وصفن
حزنا انتفن فوق قوز الرماد
وقفنا اتوشحنا بي علم الحداد
رجعنا استغفرنا لي رب العباد
شدينا حيلنا
وما انقطع عصب الوزين
سجينا شناط الشعر
واتحزم البلد الحزين
شلناك على كتف الوطن
داعين و مبتهلين
وختيناك بسم الله
في روضة جنان حامدين
وكتبنافوق لحد المكارم
للزمن... شاهدين
بسم الحق بي سر الكلام القلتو
منضوم في عقد القصيد الزنتو
مسنون باوزان الحسام الشلتو
مكنون في لحن الغناوي نفحتو
في المعنى الرصين
شاهدين! ....شاهدين!
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: وليد التلب)
|
وصلت سدرة منتهاك (4)
مرثية حميد (المشهد الرابع) - عبدالمنعم العوض
الموت ده حق
بكت الرجال
بلدنا.....جال
يا شيخي ود ختم الكمال
منذر انا....وجدوالامين
براقو...شال
ياسيدي سيد العارفين
كل الجنايز... تندفن ؟
امرا.... عجيب!
مولانا .......صلي علي الحبيب
دايرنهم ينداوا بي ضرب الدبيب
امرق! امرق!
امرق واطلب الفضلة من أثر الرسول
واكشح عليهم من ثرى الحسوات وقول
شاهت وجوه
بئس الوجوه
السودت وجه الوطن
وياانت ياودالحسن
انت الحسن
طبعك حسن
ياالفت يعرب والرطن
والما رطن
ماشفت شي
الناس ترصرص في الصفوف
ماشفت شي
الناس تنقر في الدفوف
ما شفت شي
واقفين علي طرف النهار المحتشي
وجات البشاير تنتفض
مقيودة بي بركة قوافيك تنتشي
ملت الشوارع بالهتاف
ابت الشوارع تتمشي
رقصت طرب
بلا وانجلا
ما قال بجي روح مشي
ياخي الخريف محق خلا بيوضة
والزمن الصعيب فات بي وشي
الهم رحل
ورفعنا رايات النصر
مشدودة بي حبل الصبر
مسنودة بي شعب المحل
يافرحة ما سمت
ولا لمت
ولا تمت
ولا عاش الامل
خاذوق نزل
ينقذنا قال
ينقزنا قول
وطعنا في القلب الهمل
سال دمو
جرحو الما اندمل
يا شعب لا ياخدك وجل
يا الماك جبان
ما عاش من بيك استهان
عرطملك الحجر الشقي
وخسر الرهان
زح يا حجر ما ليك مكان
ارحل.. كما القبلك رحل
اقنع .....حار بيك الدليل
انجع......عارفين البديل
الحق ...والدرب والعديل
اسمع....وسمعك مو تقيل
الموت ...يحوم
اطلع ...وجنبنا الدموم
غادر...بتكفينا الهموم
الغم واحزان السنيــن
ارحل متل ما سوى زين
ارحل وان لم تمتثل
جاياك رياح الصابرين
جاياك رياح الصامدين
جاياك رياح الصامتين
تكفي القدور
وتقلع خيام حكم الفجور
وتطلق عقال جملو وتثور
تفرنب الدجل الكجور
وترفرف فوقنا روح حميد تدور
تندهنا تملا العتمة نور
نادوسك المقطوع يلم
خاتي النضم
قولة بغم
يظهر كما الفتح المبين
هبت رياح الصابرين
هبت رياح الصامدين
هبت رياح الصامتين
ونفكو دين
دين الوطن حاملنوا دين
لازم ننزلو من ضهر هم السنين
وينحل قيدك يا بلد فجرك يبين
عبدالمنعم العوض -الرياض -21 مارس 2012م
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: عبدالمنعم العوض)
|
هنالك اتجاه قوي من الملتقى الثقافي الرياضي الاجتماعي لتعميم فكرة الملتقيات الثقافية لربط الشباب بثقافة الوطن وتراثه تفاديا للاستلاب الذي يحيط بنا من كل جانب وتنشط اماناته المختلفة هذه الايام لتحقيق هذا الهدف
نأمل الالتفاف حول هذا البرنامج من قبل المهتمين وخاصة الشباب
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: عفاف أبو حريرة)
|
آخر قصيدة كتبها محجوب شريف:
ﻣِﻦْ ﻭﺟْﺪﺍﻧﻲ
ﺻَﺤَّﺔ ﻭﻋَﺎﻓﻴﺔ
ﻟﻜﻞ ﺍﻟﺸﻌﺐ ﺍﻟﺴﻮﺩﺍﻧﻲ
ﺍﻟﻘَﺎﺻِﻲ ﻫﻨﺎﻙ ﻭﺍﻟﺪﺍﻧﻲ
ﺷُﻜﺮﺍً ﻟﻸﺭﺽ ﺍﻟﺠﺎﺑﺘﻨﻲ
ﻭﺍﻟﺪﺭﺏ ﺍﻟﻠﻴﻜﻢ ﻭﺩَّﺍﻧﻲ
ﻳﺎ ﻃﺎﺭﻑ ﻭﺗﺎﻟﺪ
ﻳﺎ ﻭﺍﻟﺪ
ﺍﻟﻨﻴﻞ ﺍﻟﺨﺎﻟﺪ ﺷﺮَّﻓﻨﻲ
ﻭﺍﺣﺪ ﻣﻦ ﻧﺴﻠﻚ ﻋﺪَّﺍﻧﻲ
ﺇﻧﺖَ ﺍﻷﻭﻝ ﻭﻣﺎ ﺑﺘﺤﻮَّﻝ
ﻭﺗَﺐ ﻣﺎ ﻋﻨﺪﻱ ﻛﻼﻡ ﺑﺘﺄﻭَّﻝ
ﺃﻧﺖ ﺍﻷﻭﻝ
ﻭﻛﻞ ﺍﻟﻌﺎﻟﻢ
ﺑﻌﺪﻙ ﺗﺎﻧﻲ
ﻳﺎ ﻣﺘﻌﺪِّﺩ ﻭﻣﺎ ﻣﺘﺸﺪِّﺩ
ﻣﺎ ﻣﺘﺮﺩِّﺩ … ﻣﺎ ﻣﺘﺮﺩِّﺩ
ﻣﻠﺊ ﺟﻔﻮﻧﻲ ﺑَﻨﻮﻡ ﻣُﺘﺄﻛِّﺪ
ﺑﻞ ﻣﺘﺠﺪِّﺩ .. ﺗﻨﻬﺾ ﺗﺎﻧﻲ
ﻭﻟﻤﺎ ﺗﻌﺎﻧﻲ .. ﺑَﻌﺎﻧﻲ ﻭﺍﻋﺎﻧﻲ
ﻭﻗﻠﺒﻲ ﻭﻋَﺎﻧﻲ ﺃﺣﺒﻚ ﺃﻛﺘﺮ
ﻭﻣﺎ ﻛﻔَّﺮﺕَ .. ﻭﻻ ﻧﻔَّﺮﺕَ
ﻭﻟﻢ ﺗﺴﺘﻌﺼﻰ ﻋﻠﻴﻚَ ﻣَﻌَﺎﻧﻲ
ﻋﻠﻤﺘﻮﻧﺎ ﻧﺴِـﺪ ﺍﻟﻔﺮﻗﺔ
ﻭﺇﺗﻘﺎﺳﻤﻨﺎ ﺭﺣﻴﻖ ﺍﻟﻄَـﺮَﻗَـﺔ
ﻭﻛﻢ ﺷﻠﻨﺎﻫﻮ ﺛﺒﺎﺗﻚ ﺩَﺭَﻗﺔ
ﺑﻜﻞ ﺍﻟﺒَـﻲْ ﻭﻋَـﻠَـﻰْ ﻭﺣﻴﺎﺗﻚ
ﺃﺗﺤﺪَّﺍﻩ ﻛﻤﺎ ﺃﺗﺤﺪَّﺍﻧﻲ.
ﻟﺤﻔﻴﺪﻱ ﺣﻤﻴﺪ ﻗﺎﺳﻢ ﺃﻣﻴﻦ
ﻭﻟﻜﻞ ﺍﻷﻃﻔﺎﻝ …
ﻣﺤﺠﻮﺏ ﺷﺮﻳﻒ
ﻣﺴﺘﻮﺻﻒ ﺗُﻘﻰ ﺍﻟﺘﺨﺼﺼﻲ – ﺃﻣﺪﺭﻣﺎﻥ
31 مارس 2014
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: عفاف أبو حريرة)
|
وصلت سدرة منتهاك (5)
عبدالمنعم العوض
مرثية حميد (المشهد الاخير )
عترلك الحجر آآآآآآ البخيت
عترلك الحجر آآآآآآ البخيت
وبلا ضجيج سكتت ترانيم القنوت
مرقت غناوي الفرحة من كل البيوت
طلت سحايب الحزن يوت
ردد صدى عزمك سكوت
بأعلى صوت
الحق ده موت
ما مت انت
ولا رياح صدك تموت
الزيك انت
ولاب يموت
الحب والحبل المتين
فايتبو فوت
ساريبو مسرانا الامين
درويشنا انت مرقت وين
متناهي شفتك حافي
فوق... جرف القدر
قالو الحجر هو الغدر
الغادر الله يخونو من خان مسلمين
كضب علينا بلا سبب كل ها الدنين
اسع نعزي مع منو
عاد صح بنبكي مع منو
اخوك فطين
حميدنا يا البكيتنا بالدمع الهتين
نبكيك مع وهج الليالي الانطفا
حلم النهار الإنكفا
وتنوووم ........ قفا
ياالكنت تابع لي خفاف المصطفى
ووصلت سدرة منتهاك في الخالدين
في الخالدين.......
عبدالمنعم محمداحمد العوض ـ الرياض ـ21مارس2012م
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: عبدالمنعم العوض)
|
بين الموجة والخزان حُلم (حميد) .. ويا له من حلم
هردت لهاتي بالغنوات ... وقُتْ يبرد حشاك يا امي
ومن التعب البلا صالح .. تفيقي .. تروقي ... تنجمِّي
تسوي مكانسك المطرة .. تضوي البيت وتنحمي
تمرقي صبوحة للجيران ... قدح فوق ايد وفي ايد أَلمْي
يلاقوك شُفّع الكُتّاب نُضاف وظُراف بلا النّسْمي
ويغنولِك ... يغنّولِك غناوي السّابْ
وفي بيّوضة مافي سراب
جبال كَجَبي وفيافي الكاب ... تميد بالخضرة منقسمي
ولا غابار .. ولا هو سحاب .. وتنهجمي
من الدّهشة وتحاحيهُن ... غناكُن نيي ... غُنا الوهمي
ويهتفوا زي كلاب الحي .. على الأغراب
حوافي الصّي وبيوضة
البراسيم فيها مفروضة
خدارا يراري شوف عيني على الأبوابْ
قماريها وحواريها وطواريها بقت روضة .. بقت تشرب من الحامدابْ
تشربي عافيي من إيديّ ... تدوي اليوية بي حشمي
تسوّي السّي وتبتسمي
تشوفي رهاب بُعُد نجمي
واشوفو قريب قُرُب نضمي
اشوف العالم التحتاني .. هيلا هوب وقف ناهضْ
دكّ عمايد الفوقاني ... جوه الُّجب رمى العارضْ
وفي السابو الدمار أفراق عريق الحب نبض قابضْ
متل قبض الحروف في اسمي
غناوينا القبيل رقراق علينا تصب برد قارضْ
أَلُكْ طيناتا من دمّي .. وارمِّلها من عصب عشاق ..
أنط تُلُّبْ واجيك عارضْ
واجر نمي
أدودي لهاتي بالغنوات ... عقب يبرد حشاك يا امي
تسوي السي وتبتسمي
تسمِّي الشعب وتعتصمي
بحبل الشعب تتفرق ظلمةً فيها تتحرق .. صُرُمةً قالوا ليك قسمي
أدودي لهاتي بالغنوات عقب يبرد حشاك يا امي
تقلبي الكلمة بي الكلمي
ضراعك يرمي ما يدمي
تقيفي بعيد عن الشمات تكوني اقرب لي من اسمي
واضمك بارتياح يا امي
أحبك صاح وصاح حلمي
ولاكي سعية للضباح ولا شمش الصباح حزمي
ولا كتف السلاح سواح ولا نزف الجراح ألمي
هيا انحزمي .. هيا انخلقي .. هيا انعتقي ..
متين مو دايرة ري تسقي
ولا في إيد النزيف نبقى ... ولا في إيد الخريف تبقي
ولا الفيضان يبضِّع بِكْ .... ولا في القيفة تنهدمي
ولا ان جات حاره تنهزمي
ولا يغشى الغلب قلبك ولا تشقي
ولا انت تخافي لا تدمي
ضراعك يرمي ما يدمي
فيا حزن البلد عوك كَرْ
ويا سعد الولد ضَرْ ضَرْ ... مع النسمي
ولي قيمة العمل عمي .. وافتحي ظلمتك للضي
سِنِّي على النضال إيدي
سوِّكي بالهتاف فمي
شوارعك لي دويها علي
اذا ما اخر العلاج الكي ... مراويدك حمر صمي
مراويدك حمر يا امي
بليلتي ولا ضبايح طي
قليلتي ولا كُتُر سّمي
وطني ولا ملي بطني
سكاتي ولا الكلام الني
سلام يا امي .. سلام يا امي .. سلام لا هكمي لا دكمي
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
استسمحكم في إبقاء هذا الخيط عالياً ريثما أعود .. بمقال من الطراز
العالي .. لـ / عبدالله علي ابراهيم:
ما الشعر؟ ما الذي يفعله فينا؟ لماذا كان لعبارته المنغومة هذا الأسر؟ المباحث في هذه المسألة بالطبع
قديمة وكثيرة. وأكتفي هنا عن سحر الشعر وعنفوانه بكلمة لمحمد عبد الحي: الشعر رزق من الله.
توقفت عند قراءتي لمرافعة عون الخصاونة، قاضي المحكمة الدولية ورئيس وزراء الأردن الحالي،
في قضية أبيي عند كلمة نقلها عن حكيم آسيوي: "حتى أكثر الأنهار بطئاً تبلغ المصب يوماً". وكان
صوت الخصاونة في الأقلية في الحكم الذي جاء في غالبه لصالح دينكا نقوك. فوجد في كلمة الحكيم
عزاءً بأن الحق، النهر البطيء، سيحصحص وسيبلغ العقول رغم بطئه ويثبتها.
لا أعرف لماذا أصغي جيداً للشاعر متى تحدث عن الأنهار. وأشعر من مدة طويلة بمولد قصيدتي أنا
نفسي عنها على شفتيّ. وهي عن المرأة والنهر. ومن الشعراء من يحسنون هذا الحديث وهناك من
يرتجلونه. ولم أجد من أحسن الحديث عنها مثل الشاعر الزنجي الأمريكي لانقستون هيوز (1902-1967).
وهو من مواليد ريف ميسوري حيث أقمت بالولايات المتحدة. وتأثر هيوز بالشاعر الثوري الفحل والت
ويتمان الذي عرّفنا ببعض سيرته صلاح أحمد إبراهيم. وأكثر من تعلق به من جيلنا محجوب عباس.
وربما كتب رسالة جامعية عن ديوانه "صفق الحشائش". واستغرب أننا عرفنا عن الشعر الأمريكي
التقدمي ولم ير أحدنا الولايات المتحدة. ولما مشينا في مناكبها وأكلنا من رزقها كما نفعل الآن جهلنا
الشعر وتعلقنا بتلابيب الملايات.
وكان هيوز يسارياً استدعاه السناتور مكارثي في جلسات محاكمته للضمير المشهورة في 1953 ليبريء
نفسه من الشيوعية وليشهد على آخرين ويورطهم. وما تزال تلك المحاكمات للضمير، التي سمى بعضهم
فيها بعضهم الأسماء مثل المخرج المجيد إيليا كازان، تؤرق الوجدان الأمريكي. واعترف هيوز للمحكمة
بأنه يساري لا شيوعي وطلب منها أن تصبر عليه ليريها لماذا صار في اليسار. ووعدته. ولكنه ما بدا
يحكي عن تجاربه في الاضطهاد العنصري على عهد طفولته (اضطهاداً أزهده في أمريكا) حتى أخر
سته المحكمة. وقالت إنها سمعت ما يكفيها.
شعر هيوز في الأنهار غريب كما تجلى في قصيدته " حديث الزنجي عن الأنهار" وتسمع فيه لأول مرة عن شباب الكباري:
عرفت الأنهار ما حييت
ما حييت عرفت أنهاراً في عتق العالم وأكثر قِدماً من مسيل الدم البشري في العروق
وتعمقت روحي مثل الأنهار
وسَبحتُ في الفرات والكباري في رونق صباها
ولهيوز قصيدة حري بنا أن نتمثلها في محنتنا الراهنة. فقد علقنا في الحركة الوطنية الآمال
العظام بأن "نرود المجد" وطمعنا في خروج الكنوز من باطن الأرض متى استعدنا إرادتنا
الوطنية بخروج المستعمرين. ولم يتحقق الحلم. وبلغ اليأس ببعضنا حداً كفروا بالحركة
الوطنية واستسخفوا إرادتها. وصاروا مثل قوم موسي ساءهم من النبي إخراجهم من ذل
مصر الطويل ليضربوا في الآفاق العصية. ووجدت هذا الكفر وقد تمكن من صفوتنا خلال
عرضي لكتابي عن بخت الرضا. وزندقوني. قال هيوز عن الفجيعة في الحلم المهيض:
ما الذي يحدث لحلم تباطأ
هل يجف؟
مثل زبيبة تحت الشمس
يحدث ذلك بالطبع. ولكن أكثر الأنهار بطئاً يبلغ المصب بإذن الله.
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
التحية لاعضاء مجموعة إنعتاق الثقافية بمدينة الهفوف علي الاحتفالية الكبيرة
لقامات سودانية عبروا باجمل الكلمات عن واقع الغلابة والمناضلين الشرفاء
شاعر االنضال محجوب شريف وشاعر الوطن حميد رحمهما الله رحمة واسعة.
ولوكنا نعلم يوم الاحتفالية لشدينا الرحال الي الهفوف
وهذه هي السنة الوحيدة التي لم نوفق في تنظيم احتفالية بالشاعر حميد والشاعر
محجوب شريف ونأمل من الاخوة في اللجنة التنفيذية للملتقي الثقافي بالرياض
تنظيم احتفالية شعرية لهولاء القامات
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: عثمان الحسن محمد نور)
|
فعلا يا بروف .. إنعتاق على حداثة نشأتها أقامت أمسية من
الطراز ال يبقى في الذاكرة لزمن بعيد قادم .. حميد ومحجوب
نجمين في سماء الوطن .. أبدعا شعراً رقراقا .. ادانا مشاعر
حية .. يرحمهما الله ..
يجب أن نحي ذكراهما لنستلهم القوة لأشواطنا المستحيلة في
هذا السودان الوطن الجميل .. رغم التناقض في أذقته
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: عفاف أبو حريرة)
|
كتب المهندس/ عبدالمنعم العوض:
واقفين علي طرف النهار المحتشي
وجات البشاير تنتفض
مقيودة بي بركة قوافيك تنتشي
ملت الشوارع بالهتاف
ابت الشوارع تتمشي
رقصت طرب
بلا وانجلا
وكتب الراحل حميد (مقطع من ملحمته السرة بت عوض الكريم):
وإنأوهت .. وحسيت بأعماق الشوارع والتواريخ المجيدة إنأوهت .. وأدتني عين
صنت شويتين .. كوركت .. هيى يا بنيه وكتنا راح .. يا بت شمشنا إدهدهت ..
شوفيلي شافع ود فطين جاء من الطحين
الله فترنا من الطحين
وكان الوقت زالف عصر .. عين الشمش مشغوله بي دوشة سحاب
عرق المراكبية البعاد راحل مع ريحة التساب
ما تدري مارقي من البيوت الحلة .. واللا من التراب
الناس تقول مدقوقة طالعة على الحقاب
مفلوقة بي حجر الصعاب المرة .. نازلة على البحر مشروقة بي موية السراب
الفرة .. مشنوقة عقاب .. بالمرة من كتر العذاب
الحرة في طايوقه داب
يا المرة كيف بقت الرقاب مسيوقة بي قيد السلاب
منشرة من نشر الحجاب في عروقا .. وإشتد الخراب
من بعدما انبلج الفرج من ضيقا .. خدعوها بي حيلة كتاب
رفعوه فوق سن الحراب
ودهت الهزائم خلقتا
فالناس بدل عن نقتا
التلقى فكة ريقتا
وبدل القصور الفي خيال .. التبقى ماهلة كريقتا
وما جاتا راحة طلقتا .. إلا التعمر طلقتا
بي بندقيتاً حقتا .. بي ها الشوارع وبقتا
تنسدا منك دقتا .. ودم فلقتا .. ومر شرقتا .. ونار شنقتا
يا دقن دينك سرقتا
قطعت وضوها انشرقت .. مسحت وشيها إنشهقت
قال نست ما تاكت العوضة التحت .. عن مرقتا
دارت تقوم .. مسك العنيقريب الحنين طرقتا
رجفت بشيش عن نتقتا
رجفت بشيش من الغضب واللا التعب .. فتر السنين ..
واللا الكبر دا الما قدر يمسح سماحة خلقتا
زي نيتا البيضة الشعر .. وزي موج بحر كان الجبين
مديت يميني أساعدا ..
ردت يسارا تباعدا
وقالت لي : أبوي وفر ضراعك للبلد
وادخر مروتك آ ولد
لي يوم بحين
احفض كرامتك تحفضك .. الموت ولا العيش المهين
الموت نفاد الما نفد .. الموت حياة الميتين
أختاها جنة مع الفقر .. وادخل جحيم المتعبين
وإن ما قدرت على دا أبوي .. رب لك دقين
وصنت .. رب لك دقين
وضحكت .. حمدنا الله الحنون .. جيداً خلقنا بلا دقون
وضحكنا زين
مرحب عفاف .. الوطن يعيش مخاض التغيير بكل معاناته
المحببة و (إن طال وإن قصر الزمن الحين بحين)
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
مقطع من ملحمة السرة بت عوض الكريم للشاعر محمد الحسن سالم حميد:
مدِّيت يميني
أساعِدَه
ردَّت يسارَه
تباعِدَه ؟!
وقالت لِي
أبوي ..!
وفِّر ضُراعك
للبلد ؟
وأدخُر مُرُوَّتَك
آولد
لي يوم بحين !
أحفض كرامتك
تحفضك ؟
الموت !
ولا العيش المهين ؟
الموت
نَفاد الما نَفَد
الموت
حياة الميِّتين
أَخَتاها جنِّة
معَ الفِقَر
وأدخُل
جحيم المتعَبين
وإن ما قِدرْتَ
علي دا
أبوي !
رب لك دقين ؟!
وضحكت ..
حمدنا الله
الحنون
جِيدَن خَلَقْنا
بلا دقون !!؟
وضحكنا زين
!!؟
؟؟!
.....
......
الشوك بَمُرْقَ الشوك ؟!
وشوكاً فينا شين ؟
مرّاقو ربَّ العِزّة
شعباً ماب يلين
الجايي
حيكومتنا
لكن الزمن
دِبُّويي
داير النهمِة
وينكن !!
يا الخزين ؟؟
ما قلَّ حاشا صَبُرْنا
لَكِن لا مِتِْين ؟!؟
دعكت عيونَا
التوَّّعت
مسحت وشيها
وصنْقَعَت
كان الغيوم
إنجمَّعَت
تِقْلَت على الريح
النصيح
كان المطور
شوَْْوْوْ
ترَّعَت
زي باكي
فوق دمَّ الحِسين ؟!
لكن دا وين !؟
والتاني وين!؟
وإتلوَّعت
معقول !
في ناساً ما وِعت؟!
لليلِة
بالن بيَن بِْين !!
.....
.....
وكيف
وإنتو نوحنا
من الدَعَت
مؤمنَّا
من جُحر الدقون
الكاكي
يلدَغ مرَّتين
والتالتِة
قرْصَة أبُو الحِصين !
| |
|
|
|
|
|
|
|
|
|
Re: عفارم .. عفارم مجموعة إنعتاق الثقافية باله (Re: Mohamed Abdelgaleel)
|
سنى على النضال ايدى
سوكى بالهتاف فمى
شوارعك لى دويها على
اذا ما آخر العلاج الكى
مراويدك حمر عينى
هردت لهاتى بالغنوات
وقت يبرد حشاك يمى
من التعب البلا صالح
تفيقى تروقى تنجمى
تسوى مكانسك المطره
تضوى البيت وتنحمى
تمرقى صبوحه للجيران
قدح فوق ايد وفى ايد المى
يلاقوك شفع الكتاب
نضاف وظراف بلا النسمى
يغنولك غناوى الساب
وفى بيوضه مافى سراب
جبال كجبى وفيافى الكاب
تميد بالخضرة منقسمى
فيافى الصى وبيوضه
البراسيم فيها مفروضه
خدارا يرارى شوف عينى
على الابواب
قماريها ..طواريها
وحواريها بقت روضه
بقت تشرب من الحامداب
تشوفى رهاب بعد نجمى
واشوفو قريب قرب نضمى
اشوف العالم التحتانى
هيلا هوب واقف ناهض
هد عمائد الفوقانى
جوة الجب رمى العارض
وفى السابو الدمار افراق
عريق الحب نبض قابض
متل قبض الحروف فى اسمى
وغناوينا القبيل رقراق
علينا تصب برد قارص
واجر نمى وادودى لهاتى بالغنوات
عقب يبرد حشاك يمى
وطنى ولا ملى بطنى
سكاتى ولا الكلام النـى
بليلتى ولا ضبايح طى
قليلتى ولاكتر سمى
سلام يمـى
سلام لا هكمى ولا دكمى
| |
|
|
|
|
|
|
| |
Mohamed Abdelgaleel
Osman Musa
مني عمسيب
محمد أبوالعزائم أبوالريش
عفاف أبو حريرة
munswor almophtah
Muna Khugali
وليد التلب
عثمان الحسن محمد نور
فيس بوك
تويتر
انستقرام
يوتيوب
بنتيريست