Quote: ههههههههههههه تعرف يا ود المدير حكاية كمسارى قطر دى بكون عندك معاها زرزره شديده كدى افتح بيها بوست عليك الله وانا والله كان لقيتا اخير لى من حالتى دى..
رغم إنها كانت جميلة ومستحيلة عشقها جميع الناس وسهروا الليالي يحلمون بالوصول إليها، إلآ انني لم أعشقها ولم تكن لديّ الرغبة في إقامة علآقة معها. عطبرة هي حبي الأوّل والآخير. ما فكرت يوماً في ان ابارحها أو أرحل عنها، تلقيت مراحلي التعليمية في مدارسها. لم يكن لي كبير غرد في تحصيل العلم. المواد التي احببتها ما كنت برضى بغير النمرة الكاملة فيها، والمواد المكجنا كان في زول جآب فيها صفر زيّ بحرد مِنو عدييييل كده. عشان كده ما كان عندي كبير غرد لا في الجميلة ومستحيلة، لا في الحنينة السُكّرة. لكن قدماي ساقتني للحنينة السُكّرة إزعاناً لرغبة الوالدة عليها رحمة الله التي رفضت إتفاقي معها علي إكمال الثانوي العالي والبقاء بعطبرة .
03-29-2016, 12:23 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
غادرت عطبرة مرغماً بصحبة مجموعة من أبناءها للإلتحاق بالحنينة السُكّرة. بعد ان إنتهينا من إجراءآت التسجيل، حقبت شنطتي ومرقتها في كِنانة لزيارة صديق لي كان يعمل في مصنع السُكّر هناك. بعد ان قضيت 12 يوم في كنانة رجعت للخرطوم ومن موقف الباصات ذهبت لأخي في مكان عمله، وهناك عرفت انه ذهب إلي عطبرة، ومن هناك علي محطة السكة الحديد. ارجيت القطر في المحطة، ويا سطح جآك زول. مرقتها في عطبرة من غير ان أحضر محاضرة وآحدة في الجامعة، أو حتي اشوف قاعة المحاضرآت. بقيت كتير جداً أمرق من البيت ماشي الجامعة يواتيني القطر في محطة الخرتوم اخفس فوق راسو، ويا اتبرا جآك زول. أها، بعد دآك إشتغلت في مصلحة المخازن والمهمات حتي شويّة بديت ايقّن علي الخرتوم .
03-29-2016, 12:24 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
في العام 87، وقد بدأت تباشير العيد الكبير تهل، جهّزت نفسي للسفر لمدينتي الحبيبة عطبرة لقضاء العيد بين الأهل. في محطة بحري قابلت عدد من ابناء عطبرة في قطار الشوق. الشي الغريب في الأمر، لقيت الجماعة كلهم مجمعين علي السفر في بطن القطر!!!؟ علماً بأنهم من مرتادي السطوح. يا جمآعة!!! والله السفر المافوق السطح ده لآ سفر لآ حآجة. الحاصل شنو؟؟؟. قالوا لي: يا زول نحن جايبين معانا كوشتينة وعندنا تزاكر. اقطع لك تزكرة وتعال معانا. قلت ليهم: لو كنت عارف من بدري كنت جبت تصريح من المصلحة. انا بركب معاكم لكن تزكرة ما بقطعا، وبعرف شغلي مع الكمساري كويّس .
03-29-2016, 12:25 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
تحرك القطر، وربعنا الكوشتينة فوق شنطة سمسونايت من النوع الكُبار، وتعال شوّف الونسة، والقرقرآب، والتعليقات، وتخفيف الدم لزوم كان في جكس وكده. ضاربين بهجة صح. فجأة اشوف ليك الكمساري من هناااااااك ومعاهو البوليس جايين. بالرااااااحة إنسرقت من وسط الجماعة، وكنا رآكبين في تالتة الممتازة. العربات الممتازة دي زماااان جابوها ناس النميري، وفعلاً كانت ممتازة لكننا لم نحافظ عليها، وبكل اسف لم نحافظ علي السكة الحديد. في العربية كان القزاز بتاع الباب مكسور، وفي مجموعة من الشباب وآقفين جنب الباب. اها، انا تسللت من خلآل فتحة الباب الكان فيها القزاز لخارج القطر، وبقيت خارج العربية قاعد فوق السلم، وسامع الكمساري ضارب حِجة مع الجماعة وقطّعم تزاكر. بعد فات الكمساري تسللت لداخل العربية، ومشيت واصلت كشتينة مع الجماعة مخلوطة بخفة دم لزوم مغازلة الجكس وكده .
03-29-2016, 12:26 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
في المرور التاني أشوف ليك جماعتي جايين من هناااااك، والمرّة دي معاهم المفتش كمان. طوااااالي مشيت علي السلم، وانا قاعد فوق السلم سامِعُن بيتكلموا مع الجماعة. فجأة اخدولهم صنّة طوييييلة، وانا قعدت السلم سخّنت معاي والسفاية بقت تشيل وتكتح في وشّي، لكن لُكت الصبر لحدي ما إطمأنيت إنهم فاتوا، رفعت راسي وسألت الجماعة الواقفين جنب الباب: الجماعة ديّل فاتوا ؟؟؟ فإذا بالكمساري يقول لي: لا، لا ما فُتنا. تعال لي بجوّة يا المبروك. في تلك اللحظة تمنيت الوآطة تنشق وتبلعني. اها، الجماعة ساقوني معاهم في المرور، وبقيت زي معروضات الجريمة. العسكري باقي فوقي عشرة التقول كاتل أبوهو، والكمساري اوآت يلقالوا زول ما قاطع تزكرة يقولوا:اها بتقطع واللآ ترافق إخيّك دا؟؟؟. الناس في القطر يشيلوا ويبحلقوا فيني، والجكس بتحِت تِحِت يضحكوا سااااكت، وانا بيني وبين نفسي اقول: يا جماعة دي شقاوة شنو الوقعت فيها دي ؟؟؟ ما كنا مستورين في السطوح لا عساكر لا كماسرة. البوليس لآعب معاي مآن تُو مآن، وفي حآجة كبيرة قالت للكمساري: أجآد ولدي تخليهو. قال ليها: يا حآجة ده وقعتو طِيّنة معاي. كل هذا والمفتش يتبسم بهدوء في ثقة تآمة. الكمساري كلما يمر علي ناس للتحصيل يقول: تمام، تزاكركم تمام، مُش زي زولنا ده، وطوالي يروح حاكي قصتي. لقيناهو لآبد في السلم. نبشني نبيشة صح .
03-29-2016, 12:27 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
الكمساري قال لي: هسّع اكان اخيرلك تقطع لك تسكرة زي رفاقتك، واللآ اخيرلك البهدلة دي؟؟؟ مِن الآكسنت بتاعو عرفت إنّو رُباطابي. قلت ليهو: هسّع بقطع. قال لي: بعد شنو؟. عآن ها البقطع!!! وكت فيك فايدة هن قدُر ما كان تقطع مع رفاقتك. ويمزمز في التمرهندي والنبق. دخلّت إيدي في جيبي عشان اطلّع القروش. طوالي قال لي: خل قروشك في محلهِن زوووول دايِرِن ما في. بيني وبين نفسي قلت: بالله شوف الزول المسيخ دا!!! قروشك؟ ما قروش السكة الحديد!!!. المفتش ما حرّك خشمو بكلمة. كلّ حركات خشمو كانت محصورة في طحن التمرهندي والنبق، وهو يستمع. بالرغم من مساخة الكمساري، مرقت القروش من جيبي وقلت ليهو: هآك اقطع لي تزكرة. قال لي: يقققققطع نفسك. إنت وكت بتعرف للنفر دا، ما قطعتها قبل تدخل في القطر مآلك ؟؟؟ ما عرفت اقول حاجة، وانا مادي ليهو القروش وهو ياكل في التمرهندي. قال لي: إنت قالولك القطر دا السكة حديد ساوياهو وقِف ؟ نِهارت جيّت إتفوججت وسويتلك لعب كشتونة مع رفاقتك بلآ تسكرة!!! بيني وبين نفسي قلت: يا جماعة دي مصيبة شنو الوقعت فيها دي؟!!! البتحلني من الزول دا شنو؟ قلت ليهو: خلآس هآك اقطع لي تزكرة. طوالي قال لي: ما خلآس... القال لك خلآس منو؟ إنت وكت داير تقطع لآبد في السلم عشان شنو؟ مرّت لحظة صمت لا تسمع فيها إلآ مضغ التمرهندي والنبق قطعها الكمساري وقال لي: المرّة دي انا بقطع لك التسكرة، لكن تاني كان شُفتك حايم في القطر دا بلآ تسكرة بخزّق لك عويناتك ديل. قلت: الحمد لله، ومديت ليهو القروش. قبل يقطع التزكرة، المفتش نضم لأوّل مرّة، وسألني: إنت من وين؟ قلت ليهو: من عطبرة. قال لي: ود منو في عطبرة؟ قلت ليهو: ود محمد عثمان المدير. طوالي المفتش قال: يا سلآلآلآلآلآم، إنت ود المرحوم المدير؟؟؟ عندها سمعت الكمساري يترحم علي والدي، ورايته يغلق دفتر التزاكر. المفتش قال لي: اقعد. قلت ليهو: لا، خليني وآقف. قال لي: طيّب امسك مني التمرهندي والنبق ديل، وما ترجِعِن. مسكت التمرهندي والنبق. المفتش قال لي: كان دآير تقعد معانا هنا اقعد، وكان دآير تمشي تقعد مع رفاقتك امش. قلت ليهو: بمشي اقعد مع رفاقتي، لكن لآزم اقطع تزكرة. الكمساري قال لي: يا سلآلآلآلآم ود المدير!!! امش اقعد مع رفاقتك التسكرة خلها. قلت ليهو: والله العظيم ما اقطع تزكرة ما امرق من هنا .
03-29-2016, 12:29 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
الكمساري قطع لي التزكرة. دفعت حقها، ومرقت والعبرة تكاد تقتلني. جدعت للجماعة التمرهندي والنبق فوق الشنطة، وما تبقى من مسافة لعطبرة شعرت كأنها دهوّر، ومن يومها قررت ان لا اصرّح بإسم الوالد في مثل هذه المواقف... ربي ارحمهما كما ربايني صغيرا...
عزيزنا ود المدير سلام يا بلد يا تنا . قلت لي الآ كسنت حق أهلنا ناس نورث أبو حمد ؟ والله لو ما تمرهنديك ونبقك ودومك ومحريبك كان نزلك بي أورنيق 200 في شندي . أنت عارف يا ود المدير لو نزلك بي ال 200 كان تاني ما يفكوك الا حمار الوادي يهنق . يازول عمك رحمك . وبركة الجاتك في تمرهنديك . ههههههههها
03-30-2016, 01:39 AM
د.محمد بابكر د.محمد بابكر
تاريخ التسجيل: 07-16-2009
مجموع المشاركات: 6615
يا سلاااام يا معاويه لقيتك حكاى شديد وصدقت يا صلاح الزبير.. لكن ياخى ظلمتنى شديد كمساريك ده صعب بلحيل اما حكاية عرفتك كيف دى فعلاقة اهلنا ناس عطبره بالسكه حديد زى علاقة ناس القطينه بالكوتشينه فى الاعياد .. عموماً اهديك وكل الأهل بعطبره هذا اللحن للشاعر الأستاذ علي محجوب فتح الرحمن والمعروف ان اول من تغنى بها هو ابن عطبره بابكر الزكار..تحياتى مع تقديرى الذى لا تحده حدود..
03-30-2016, 05:02 AM
شمس الدين ساتى شمس الدين ساتى
تاريخ التسجيل: 12-14-2008
مجموع المشاركات: 2642
Quote: ديل موقفم شنو بعد ما جيت حردان ربنا يرحم أبهاتنا جميعا" ,,, أها يا دكتور شعبيتنا وقعتلك في زول حكاي وعزيز علي شعبيتنا. ودالمدير ياخي سلام
يا سلآم علي طلة الزول السمح صلاح الزبير، الذي يهيج في نفسي ذكريات الشعبية والأيام الجميلة . ليس من المستغرب ان يكون دكتور محمد بابكر من ابناء الشعبية، فالشعبية بطيبة أهلها وتوادهم وتراحمهم قرية في وسط البندر . اللهُمّ ارحم موتانا وموتي المسلمين ...
04-01-2016, 08:49 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
Quote: ياود المدير قبلك وحدك زرزت العدو كمان بعد داك مصر تدفع التذكره جنس لكاعه حسنتك الوحيده هنا بتعرف تحكى كوبس
عمر يا صديق، حبابك يا زول . الموقف يا عمر ما كان بيستحمل امرق من غير دفع، رغم إني كنت متوقع بعد الزرزرة دي امشي الحراصة، لكن والله كانت ارحم لي من الموقف العصيب دا . كتّر خيرك علي الإطراء ...
04-01-2016, 09:14 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
Quote: عزيزنا ود المدير سلام يا بلد يا تنا . قلت لي الآ كسنت حق أهلنا ناس نورث أبو حمد ؟ والله لو ما تمرهنديك ونبقك ودومك ومحريبك كان نزلك بي أورنيق 200 في شندي . أنت عارف يا ود المدير لو نزلك بي ال 200 كان تاني ما يفكوك الا حمار الوادي يهنق . يازول عمك رحمك . وبركة الجاتك في تمرهنديك . ههههههههها
الله، الله، الزول السمح عِتمان جنا موسى بزاتو ؤ صِفاتو !، الليلة طِريتنا ؤ جيت شايل الفرح ؟، وحات الله يا عثمان شوقنا ليك مارق من اللِيّد، اما الفرحة بعودتك اسكُت خلها ساكت !، مشيت السودان يا الخزين ؤ كرمتني يا عثمان، أها المرّة دي بفوتا ليك عِلآ تاني لا تكررا . غايتو دا يوماً سمح بالحيل ...
04-01-2016, 11:22 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
رحِمَ الله الوالد يا ابن عمى قالوا واحد اسموا حيدر كان سُكرجى وبتاع بنقو تاب وطلع مع جماعة من ناس الدعوة ,, وفى يوم دخلوا مسجد كبير مليان بالمصلين ,, بعد الصلاة الجماعة قالوا ليهو: قوم ياحيدر واحكى ليهم قصتك قبل يهديك الله. قام وقال ليهم: صلوا على النبى , أنا كنت بتاع بنقو وسكران وربنا ساترنى وزول فى الدنيا دى عارفنى مافى. ومن يوم مادخلت مع الناس ديل فضحونى فضيحة , من مسجد لى مسجد قوم ياحيدر قوم ياحيدر,, حقو تانى نسميك حيدر يا ودالمدير.
04-05-2016, 08:45 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
Quote: يا سلاااام يا معاويه لقيتك حكاى شديد وصدقت يا صلاح الزبير.. لكن ياخى ظلمتنى شديد كمساريك ده صعب بلحيل اما حكاية عرفتك كيف دى فعلاقة اهلنا ناس عطبره بالسكه حديد زى علاقة ناس القطينه بالكوتشينه فى الاعياد .. عموماً اهديك وكل الأهل بعطبره هذا اللحن للشاعر الأستاذ علي محجوب فتح الرحمن والمعروف ان اول من تغنى بها هو ابن عطبره بابكر الزكار..تحياتى مع تقديرى الذى لا تحده حدود..
والله يا دكتور حاولت أسمع الغنوة ما قدرت . ياخي ساقتني لذكريات جميلة وزمن بعيد كان بالحيل جميل. البلابل طبعاً من عطبرة وكذلك بابكر الزكار الذي وضع اللحن، وكانت هذه الأغنية في حفلآت الأعراس تُغنى ما اكثر من تلآتة مرات، والغريب إنو في حفلآت الأعراس في ذلك الزمن في عطبرة كانوا الناس يطلبو من العطبراوي يغني الأناشيد الوطنية زي يا غريب يلآ لبلدك ولا لن نحيد وانا سوداني، ويحصل تجاوب مع هذه الأناشيد كانّ المستعمر في ورش السكة حديد، وتجد تجاوب من نوع آخر مع اغاني فناني عطبرة فعندما يمنّح مصطفى مضوي في حفلآت الأعراس لا يحتج احد بل تجد الحبوبات والخالآت والعمات يبكن كانّ المناسبة ليست بمناسبة عرس !، ياخي نحن مدينتنا بعد العشناهو فيها ما المفروض نفوتا شِبِر، لكن الزمن فرقنا ياما وحرمنا شال الإبتسامة، ولك مودتي وكامل إحترامي ...
04-07-2016, 09:27 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
رحم الله الخال محمد عثمان المدير رحمة واسعة بس نحن مازيك يا معاوية
اول ما يجينا الكمسارى بنقول ليهو خالنا محمد عثمان المدير وجدنا احمد الشيخ المدريس وكمان نديها ابزيد بركات من نواحي فتوار
حسن اخوى (قبورة) مشهور بقصص الكماسرة مرة مسافر حاول يعرف الكمساري بنفسو "انا ود ابزيد بركات" الكمسارى قال ليهو:" انت منو فيهم : بركات ولا الصادق؟" فبهت الذي نكر
04-07-2016, 02:37 PM
الهادي الشغيل الهادي الشغيل
تاريخ التسجيل: 12-07-2015
مجموع المشاركات: 4388
يا سلام يا ود المدير والله نضميك سمج بالحيل وفيهو تلقائية عجيبة تنساب للقلب دون استئذان ...قصة مشوقة هيجت فينا نحن أبناء عطبرة الذكريات الجميلة والأيام الخوالي أيام السفر بالقطار وطعمية شندي والسطوح على القطار .. أيام لن تعود .
ذكرتني قصتك مع الكمساري قصة حقيقية عن واحد كمساري في عطبرة قريب واحد صاحبنا .. كان أي زول ما عندو حق التذكرة بيديهو الفيها النصيب (نصف أو ربع القيمة) كرشوة ويسامحك .. المهم لمن يبدأ من الدرجة الأولى حتى الرابعة جيبه ده يبتملي قروش كتيرة .المهم زولنا ده جاء الحج بقروش الحرام دي وبعدها رجع عطبرة وكرّم وضبح الخرفان وكتب على الباب زي ما بيسووا ناس زمان ( حجاً مبروراً وسعياً مشكوراً .. هنيئاً لعين شاهدت أرض مكة وطافت بالبيت الحرام سبعاً ) .انتهت الاجازة وزولنا طبعاً تائب وما دار يخرب الحجة .. المهم رجع لشغله وفي اول رحلة سأل واحد (تذكرتك) قال ليهو ما عندي ( طبعاً عارفنو زول رشاوي) طوالي الراكب طلع قروش ومداها ليهو ... صاحبنا طوالي جات صورة الكعبة قدامو واتذكر الحج والتوبة وما دار بخرب حجتو .. طوالي فتح جيبو وقال للراكب ( يا زول أنا حجيت بيت الله وما باكل حرام قروشك دي بيدي ما بهبشا .. انت براك دخلها في الجيب ده ) ..هههههههههههههه
. والله كانت أيام يا ود المدير .. والله بالرغم من بغضنا للإستعمار ، إلا أن الإنجليز تركوا لينا ( صروح ) إن حافظنا عليها وطورناها لكنا في مصاف الدول الراقية . والسكة حديد ضمن ما أعني.. .. من ذكرياتي مع عطبرة التي كنت أمر بها مراراً وتكرارا في طريقي لجبيت وبورتسودانفقد شاءت الأقداران أيتم ثرشيحي لدورة دراسية بسلاح المدفعية ، كان أحد اساتذتي فيها عضو المنبر سعادة العميد الركن محمد احمد الريح فله التحية والتقدير مع التمنيات له بموفور الصحة والعافية . .. لما كنت ( كورنجي ) فأول ما اتجهت له في عصرياتي ، دار الرياضة ، فقد حضرت موسم في تقديري لايقل عن مستوى كرة الخرطوم.. الكرة من شاكر شمس الدين لاعب الوسط لعوض الحاج مهاجم الهدف ، تأكد إنها قون .. أول يوم دخلت دار الرياضة ، حضرت مبكراً ، وجلست مع علية القوم ، قام أحدهم من مكانه وجلس بجانبي وسلم علي سلاماً حاراً وقال لي ، الظاهر إنت ضيف على عطبرة وكدة ؟ قلت ليه نعم بس عرفت كيف ؟ قال لي اإنت من حقك مادام قاطع بقروشك تقعد في الكرسي البعجبك .. لكن والله يا خوي الكرسي القعدت فيهو دا كرسي ( الوكيل )... من تِحت لو شاف زول قاعِد فيهو ما بيسأل بس بطلع بخلي دار الرياضة ! .. قلت ليهو الوكيل في العين والراس وعملت إزاحة للكرسي الجنبو والراجل شكرني ورجع مكانه .. بعد شوية وصل سعادة الوكيل الذي سعدت بنكاته وتعليقاته الظريفة ولم أفارق جواره طيلة أربعة شهور ونصف قضيتها بعاصمة الحديد والنار. . التحية لك ود المدير .. التحية لأستاذي وقائدي ودالريح ..ولسعادة وكيل البوستة الذي نحتُّ ذاكرتي لتذكر اسمه فعصت علي ..والتحية لكل أهلنا في عطبرة وضواحيها.
04-07-2016, 05:12 PM
محمد فضل الله المكى محمد فضل الله المكى
تاريخ التسجيل: 03-29-2008
مجموع المشاركات: 4846
معاك يا ود المدير ... في عربية الفرملة إن شاء الله . القِطار المرَّ ، فيهو مرَّ حبيبي .. والقطر القطر نويت السفر .. قِطارو حلاّ يا ناس قِطارو حلا ..... وكتيييييييير يا ما غنى أهل السودان للقطر كشيء مؤثر في حياتهم كما لم يغنوا لغيره !. . يحكي بعض الزملاء زمن القطر قطر والسنطور سنطور ... إنهم متجمعين في القمرة والغنا مدور يبدو أن الرحلة كانت طويلة .. وكان يخدمهم أحد الأعمام فأكثروا عليه الطلبات ، وصراخ من أجل سرعة تلبية طلباتهم ، فخرج العم من طوره وبادلهم الصراخ والحدة في الكلام ... فقام أحدهم ورطن معه وعرفه بنفسه فقد كان والده يوما وزيرا للخارجية وهو رجل علم ، فاحتضنه عمنا وقال له بصوت عالي ( وإيه اللي جابك مع الهيوانات دول ؟ ) .فانفجروا بالضحك .. وطيبوا خاطر العم .. وكانت الإستجابة للطلبات أسرع .. . ويا قطار الشوق متين ترحل
04-09-2016, 06:54 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
Quote: حسن اخوى (قبورة) مشهور بقصص الكماسرة مرة مسافر حاول يعرف الكمساري بنفسو "انا ود ابزيد بركات" الكمسارى قال ليهو:" انت منو فيهم : بركات ولا الصادق؟" فبهت الذي نكر
هههههههههه، يا محمد عمتنا بشارية بِت الشيخ اكانت عندها ورقة كاتبا ليها عمنا الجيلي ود ابراهيم ؤ طبعاً الجيلي كان كمساري عليهم الرحمة، أها الورقة دي الجيلي كاتبا ليها لعناية الكماسرة ؤ هي صاراها في خُلآلتا ؤ قدُر ما تركب القطر تبرزا للكمساري ؤ حريصة جداً ترجعا من الكمساري للسفرة الجاية . أها، راكبة في القطر، اوآت ما جا الكمساري مسكت خُلآلتا عشان تفك الورقة، كان الكمساري قالها، يا حاجة خليها في فِجتا فترنا من شوفا ورقتك دي ...
04-09-2016, 09:44 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
Quote: يا سلام يا ود المدير والله نضميك سمح بالحيل وفيهو تلقائية عجيبة تنساب للقلب دون استئذان ... قصة مشوقة هيجت فينا نحن أبناء عطبرة الذكريات الجميلة والأيام الخوالي أيام السفر بالقطار وطعمية شندي والسطوح على القطار .. أيام لن تعود .
تسمح لك العافية يا عاشق اتبرا، الشغيل . فجأة كدا لآمن قريت مداخلتك إتذكرت المرحوم عبد القيوم حسن طه الرجل الذي اصبح في يوم ما اميز مُدرب كرة قدم في السودان، إتذكرتوا لآمن يكون القطر في محطة اتبرا والناس ماشين وراهو من ملف لي ملف فوق الرصيف عشان الحجوزات . تعرف يا الشغيل مرّة عندنا نسيبنا رباطابي شاف الناس جاريين ورا عبد القيوم قال لي، الليلة عبد القيوم زي الجدادة المفقعة ...
04-17-2016, 12:55 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
Quote: والله كانت أيام يا ود المدير .. والله بالرغم من بغضنا للإستعمار ، إلا أن الإنجليز تركوا لينا ( صروح ) إن حافظنا عليها وطورناها لكنا في مصاف الدول الراقية . والسكة حديد ضمن ما أعني..
بعد السلآم، توالت الأحداث عاصفة فحالت دون الرد في حينه، فسامحني غلطان بعتذر . السكة حديد يا سعادة جنابك كانت مؤسسة كاملة مُتكاملة لها شخصيتها الإعتبارية القوية ولم تكن قاصرة علي تحريك القطارات فحسب، بل كانت تملك مصنع للمشروبات الغازية، وفندق علي مستوى 5 نجوم بالإضافة للخِدمات التي كانت تقدمها للموظفين والعمال، فقد كانت تقوم بتوصيل الطلبات لهم في البيت بما في ذلك حطب الوقود، وكانت لها ماركتها المسجلة SR ، وكانت خدمات السنطور أو بوفيه القطر علي مستوى ارقى الفنادق . أضف إلي ذلك توفير العلآج واميّز الدكاترة لعلآج الموظفين والعمال، وكانت لها كفتيريا تقدم وجبات مخفضة، إضافة لجلب إحتياجات العمال والموظفين من عجلآت، تلآجات، تلفزيونات، مكيفات ...إلخ بالأقصاد المريحة، وغيرها، ولكن عبثت بها ايدي الطغاة فأصبحت ذكريات حزينة في دواخلنا وصرنا نحلم بعودة مجدها . سأقوم بتقطيع المداخلآت والرد عليها لأنها حوت اشياء تستوجب ان نقف عليها . انا والله سعيد بتواجدك وتعظيم سلآم لشخصك المِفضال . ألف شكر واكرر إعتذاري ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معاوية المدير
علي عبدالوهاب عثمان
ملهم كردفان
اسامه العريفي
Salah Zubeir
عمر دهب
Osman Musa
د.محمد بابكر
شمس الدين ساتى
عبدالعزيز الفاضلابى
MOHAMMED ELSHEIKH
محمد فضل الله المكى
فيس بوك
تويتر
انستقرام
يوتيوب
بنتيريست