|
|
|
 Re: الحكومة طالبانا مغسة (Re: عبدالحفيظ ابوسن)
|
تلك الحكوة القديمة
واحد بسأل في التاني
لو لاقاك اسد بتعمل ليهو شنو ؟
بكتلو بي بندقيتي
لو ما عندك بندقية !
بكتلو بي سيف
طيب ولو ما عندك سيف
بضربو بي الكوكاب
النقول ما عندك كوكاب
بطعنو بي السكين
النقول ماعندك سكين
بلفخو بي عكازي
النقول ما عندك عكاز !!
إتلفت عليهو غاضبا
انت طالبني مغسة ولا شنو !! انت معاي ولا مع الاسد
انتهت الحكوة
طلع الاسد
امسك النفرين
واحد حكومة وتاني الشعب
أي زول بختار حسب موقفه من الحكومة ( عين غامزة زي البجيبوها الشفوت هنا )
| |
 
|
|
|
|
|
|
|
|
Re: الحكومة طالبانا مغسة (Re: عبدالحفيظ ابوسن)
|
يعني افترض ليهو كارثة . وجردوا من كل سلاح ممكن يدافع بيهو عن نفسو . يقوم جاري بس .. واكيد لن يجري بعيدا .. فالنهاية محتومة
إلا يحن عليهو الاسد بتاع الابتدائي داك الفي المطالعة .. مش اسم الزول اندراوس ولا حاجة كدة
| |
|
|
|
|
|
|
|
|
|
Re: الحكومة طالبانا مغسة (Re: عبدالحفيظ ابوسن)
|
لا يبتدع المواطن وسيلة كسب عيش إلا ضيقت عليه الحكومة في رزقه .. وبل وكان رزقه الشحيح مصدر دخل لمؤسسة النهب الحكومي المدعوم بالاوامر المحلية والمدعوم بالفساد
فلم يسلم حتي اطفال الدرداقات
| |
|
|
|
|
|
|
|
|
|
Re: الحكومة طالبانا مغسة (Re: عبدالحفيظ ابوسن)
|
المواطن يقرأ عن احداث كان يستحيل عليه تصديقها . ان تباع المدارس .. ان يستولي احدهم علي ساحة تبلغ مئات الامتار المربعة . وحظوته تحجب عنه عنت وعنجهية موظفي الجبايات
ثم يري ذات السلطة التي تحاصره حتي تشاركه في قوت عياله تصادر منه مورد رزقه . ذات مورد الرزق الذي صدقته له ولا يبلغ بضعة امتار بحجة التعدي علي الارض
تزيل وتصرح ان لا تراجع ولا تعويض
| |
|
|
|
|
|
|
|
|
|
Re: الحكومة طالبانا مغسة (Re: عبدالحفيظ ابوسن)
|
تساهم السلطة يوميا بعكننة مزاج المواطن
سهر الجداد ولا نومو و تلتلتو بالنهار
لا تتخذ قرارا والا كان ضد مصلحة المواطن
تزيد المواصلات
تغير موقعها لاسوأ المواقع للمواطن
تسكو في اي مصلحة حكومية هو مضطر لها
الخ
الخ
الحكومة دي زي النحن اعداءها مع اننا بنصرفها ونأكلها احسن من اكلنا زاتو
نقطتع اللقمة من اولادنا عشانها
عمرنا كلو واقفين معاها
وهي ما دايرة تقيف معانا يوم واحد
| |
|
|
|
|
|
|
|
|
|
Re: الحكومة طالبانا مغسة (Re: عبدالحفيظ ابوسن)
|
Quote:
الحكومة دي زي النحن اعداءها مع اننا بنصرفها ونأكلها احسن من اكلنا زاتو
نقطتع اللقمة من اولادنا عشانها
عمرنا كلو واقفين معاها
وهي ما دايرة تقيف معانا يوم واحد |
يعني يا عبالحفيظ يا خوي باقية علينا مقولة " الكلب برِيد خانقو"؟
بيني وبينك هم مكجننا لله عشان كدا بحبو يطينو علينا عيشتنا.
| |
|
|
|
|
|
|
|
|
Re: الحكومة طالبانا مغسة (Re: elhilayla)
|
تعرف يا الحليلة قريت خبر مدعوم بي صورة في السايبر
هيئة القطارات اليابانية بصدد اغلاق خط مهجور. ولكنهم اكتشفوا انو في طالبة وحيدة بتركب من الخط دة للمدرسة . فلغوا الفكرة
وبقا قطر كامل شغال قصاد بت واحدة
شوف نحن كم !!؟
حي كامل يكسروهو
سوق كامل يزيلوهم
ينجضوا مدينة كاملة بإختيار اسوأ موقف للمواصلات
| |
|
|
|
|
|
|
|
|
|
Re: الحكومة طالبانا مغسة (Re: عبدالحفيظ ابوسن)
|
ليس خيال ولا أفلام ولكنه واقع يحدث في اليابان، ففي جزيرة هوكايدو -أقصى شمال البلاد- محطة قطار تعمل فقط من أجل طالبة واحدة في الثانوية.
وبحسب تلفزيون الصين المركزي "cctv"، فإن محطة قطار "كامي شيراتاكي" في الجزيرة النائية تعمل منذ سنوات من أجل توصيل طالبة في الثانوية لمدرستها وإعادتها، فالقطار يتوقف في تلك المحطة مرة صباحا خلال ذهاب الطالبة لمدرستها، وأخرى مساء لإعادتها لمنزلها بعد إنتهاء اليوم الدراسي.
وأضاف التلفزيون إن سكك حديد اليابان، اتخذت هذا القرار منذ أكثر من 3 سنوات بعدما كانت على وشك إغلاقها نهائيا بسبب انخفاض عدد ركابها، إلا أنها أجلت القرار بعد اكتشافها أن طالبة في المرحلة الثانوية تستخدم القطار يوميًا للذهاب والعودة من مدرستها، وحددت موعد إغلاقها مع إنتهاء دراسة الفتاة المتوقع في مارس القادم.
ولقي قرار السكة الحديد اليابانية ترحيب واسع من متابعي موقع تلفزيون الصين الذين أشادوا باهتمام الحكومة بالتعليم، وعلق شخص على هذا القرار قائلا:" لماذا لا أموت من أجل دولة مثل اليابان، عندما تكون الحكومة مستعدة للذهاب ميلا إضافيا فقط من أجلي".
ومع انخفاض معدل الولادة في البلاد، والشيخوخة السكانية، وخطر فقدان ثلث سكانها بحلول عام 2060، تواجه اليابان عددا من الأزمات بما في ذلك، وجود فائض من المساكن، وتقلص قوة العمل.
| |
|
|
|
|
|
|
|
|
|
Re: الحكومة طالبانا مغسة (Re: عبدالحفيظ ابوسن)
|
لا يخاف المواطن إلا الحكومة !!
هذا بدلا ان تكون حامية له .. فهي عدوه الاول والوحيد !
لا تجد من يمارس عملا شريفا إلا وهو خايف من الحكومة .
فسواق الحافله يخاف ناس الحركة والمحلية
وناس الحركة عملهم اسمو الكمين والكشة ودلالات الاسم كافية
اصحاب المصانع من غير المنتمين للسلطة يخافون الضرايب والزكاة والنفايات وناس الموية ورسوم الانتاج ورسوم الولاية والمحلية واي رسوم اخري !!
ووصل الامر ببعضهم لاغلاق مصنعه
ستات الشاي
الفريشين
العمال
لم تترك الحكومة صاحب عمل الا جابت ليهو السم القدر عشاهو وغداهو
و
القايمة طويلة
لذا تسمع كل يوم بمن اغترب او هاجر رغم كبر سنة .. فقد كان ذلك للشباب
والحكومة لازالت تطارد الموطن بعد ان جردته من كل اسلحته . حتي سلاح الصبر والامل
| |
|
|
|
|
|
|
|
|
|
Re: الحكومة طالبانا مغسة (Re: عبدالحفيظ ابوسن)
|
سلام الله عليكم. اخونا ود ابسن
لمست مكان الوجع ومكان الشوكه مكسوره
الا منقاش بسل مافي
عمك ابو رزم زارع في الجاغوز عجور وتم سقايه العروق زنديه
عياله من المدرسه يجدعوا مخالي القرايه خياط ابوسجه وجري
وجري لعند ابوهم للمساعده ومنتظرين ٤٥ يوم عشان الخضار
يمشي السوق وحركه القرش تدخل جزلان ابو رزم عشان يقدر
يوفر ليهم قرش الفطور
اليوم داك دغشا بدري شحن البوكسي وركب قدام
وعند الذخيره منتظرنه عيال شايلين ذخيره
ادفع يا حاج عشان تلحق السوق
حلف بربه وحتى الجزلان لمن ختم الحواشه وقع
برضو الا تدفع عشان تمشي
وسيد البوكسي كل العنده كان في كم خط بنزين
وتأخر ابورزم وما لحق الملجه وما جاه الفرج الا بعد الناس باعوا وَصَدُّوا راجعين
وصل الملجه والسوق فر
وتمن البيعه كان قدر حق المشوار من حق الفاضي ولا حتى فطور وكان الحلم
بعد البيعه روضه المدينه جاكي زول تقيل
عمك طلع إصبعا ملحوس ودا ما كان الهم والهم كان في العيال الامس كانوا يعبوا ويخيطوا في الشوالات في طرف الجرف
وكل واحد يقول يا يوم بكره ما تسرع
رجع مكسور و القلب بالحسره معصور
فطر مغسه وغبينه وما عارف متل الحال على كل الغلابا مر
اتلهمته ام العيال وشايفه وجهوا ينعل قفاه
عرفت عسر الخطوه في الرجعه فاضي
شرب كوز المويه على البطن الفاضي واتمدد ورقد ما قام
مات بالمغسه
وناس القبانه القبيل أكلوا عجور المرحوم في صينيه الغداء في صيوان العزاء
وَيَا شعب اشبع موت بالمغايس
| |
|
|
|
|
|
|
|
|
|
Re: الحكومة طالبانا مغسة (Re: موسى العجب)
|
مرحبا موسي الراجل في سمته الجديد
مصداقا لقولك صديقي ياسر زنون زرع .. ومن الضمن كان الجرجير .. لحسن حظه زراعته في كوستي جمب الينبوع
الجرجير ربطتو كانت بي 40 ج . ولامن خش السوق باعو بي 4 ج للربطة
السوق متغير لدرجة ان تتأرجح صفيحة الطماطم مابين 500 لي 30 ج
| |
|
|
|
|
|
|
|
|
|
Re: الحكومة طالبانا مغسة (Re: عبدالعزيز الفاضلابى)
|
تعرف يا فاضلابي بين كوستي وربك كبري .. المسافة بينهم ما بتجيب عشرة كيلو
واحد شاحن بوكس طماطم والطماطم نزلت . وظلت جبايتها بنفس سعر الغالية .. اها زولنا جا بدري الكبري للزوغة وكدة
طب قبضوهو
تدفع ما تدفع
لو دفع بخش في خسارة شديدة وسعر الطماطم اقل من جبايتهم
قال ليهم خلاس انا برجع ربك
قالوا ليهو تدفع وبعد داك علي كيفك
فكر كدة وقال ليهم
خلاس بنزل ليكم الطماطم هدية للحكومة وبشيل صناديقي .. سعر صندوق الخشب اغلي من الطماطم زاتها
قال ليهو تدفع وبعد داك ممكن نقبل هديتك
دايرين الصاج بس !! القروش
سييك سيييك معلق فيك
انت تبكي وهو يلحس في دموعك
يدك في خشمو واصبعو في عينك
| |
|
|
|
|
|
|
|
|
|
Re: الحكومة طالبانا مغسة (Re: عبدالحفيظ ابوسن)
|
كل الناس البتضايق فيهم السلطة مستخدمة صغار موظفيها .. وطالقة يدهم بسلطات غير محدودة .. هم الممشين الحكومة دي .. ممشينها غصبا عنهم .. والسلطات بمضايقتها ليهم بتساهم في تدني الانتاج وكساد سوق العمل .. الزول بخلي الشغل بس
ومن كان غنيا كفاية .. هرب من الجبايات بالاستثمارات الجبانة .. اشتري ليهو بيوت واجرها .. ولا عمل ليهو كم ركشة وقلل الصرف
وبمراقبة الاراضي الشاسعة البور وانت في سفرك من خلال نافذة المواصلات بتعرف العزوف عن الزراعة
الحكومة بتعيد في انتاج الحكوة الامثولة بتاعت الدجاجة التي بيض ذهبا
بدل تدعم قطاعات الانتاج والعمل بتدي الولاة والمعتمدين سلطات لا محدودة في سن القوانين المحلية الجبائية
بحدثني فيني زول انو والي النيل الابيض بصدد وضع 5 ج علي كل انبوبة تجهيزا للدورة المدرسية العام القادم
هو في البير وقع فيهو الفيل
| |
|
|
|
|
|
|
|
|
|
Re: الحكومة طالبانا مغسة (Re: عبدالحفيظ ابوسن)
|
| Quote: لا يخاف المواطن إلا الحكومة !! |
شكرا ود اب سن
في الحقيقة الاسثثمار الوطني هو كلمة السر والاسثثمار الوطني يشمل أي نشاط يقوم به المواطن في كل أوجه النشاط البشري بقصد الانتاج أو تقديم الخدمات
عندما يصل المواطن إلى قناعة بعدم جدوى الاقدام على ممارسة النشاط المتوفر له بسبب ضعف العائد والربحية بسبب استحواذ الجبايات المختلفة على النصيب الاكبر من عوائده فهذه كارثة بكل المقاييس
حتى المستثمرين الأجانب اشتكوا مر الشكوى من تعدد الجبايات واختلاف مسمياتها من مركزية لولائية لغير ذات مسمى ...
لو تذكر في بدايات الانقاذ قامت بمصادرة ناتج محصول القمح من المزارعين في سنتين متواصلتين وكانت النتيجة أن توقف الناس عن زراعة القمح والتوسع فيها وحتى اليوم تعاني البلاد من تزايد قيمة فاتورة الدقيق
بالطبع لا ينظر الكثيرين إلى آثار الأمر إلا في ما يظهر لهم من ازدياد فاتورة الدقيق والقمح وأزمة المطاحن التي عجب بها الصحف
وبالطبع فترة (البترول) غطت على الكثير من الحقائق الاقتصادية بسبب الوفرة في النقد الاجنبي والتي تم التصرف فيها كيفما اتفق ...
لا يرى مثقفونا الاراضي البور والشباب المهاجرين والنزوح الداخلي نحو المدن والتشرد من المدارس وسوء التغذية والمشاكل النفسية والتطرف الناتج وغيرها مشاكل لا حصر لها تنتج عن تغيير نمط معيشة الناس
على اية حال الله غالب
المكتولة ما بتسمع الصايح
أحمد الشايقي
| |
|
|
|
|
|
|
| |
عبدالحفيظ ابوسن
Fatima Alhaj
elhilayla
موسى العجب
عبدالعزيز الفاضلابى
فيس بوك
تويتر
انستقرام
يوتيوب
بنتيريست