العنكوليب ده حاجة عجيبة ولغير الناطقين بلغة الزراعة هو حاجة كده زي قصب السكر بس اصغر واحلى بكتير وحلاوته بتحس بيها لما تتعب عشان تلقاه (ودايمن) بتلقاه متفرق في الحواشة مع العيش عشان لو اتزرع في رباط او انقاية بكمل تاني اولاد الحنوت ما بخلوه تب
(ده شرح طويل حواشة وعيش نعمل هوامش للتعريفات مش احسن)
وما لقيت مضاد ليه الا العدار الله يكفينا شر العدار
.........
اها في المنبر ده في ناس عنكوليب والله ناس شوفت حرف منها تخليك مبسوط زي يوم صرف الفردي
ودعوة صباحية كده اصلو التلاتا قالوا خدراء الله يعنكلبكم وما يعدركم
................................
العدار/ يشرحوه كيف ده المهم حاجة كده زي العنكوليب من ناحية الطول بس مضر بالمحصول ويستخدم كغذاء للبهائم يعني المزارع ده حتى الحاجة البتضر عيشو بستفيد منها .
الحواشة / مساحة زراعية تتراوح مساحتها ما بين فدانين الى خمسة او اكثر حسب الدورة وافراد الورثة
الرباط / مسمى زراعي لعدد 18 سرابة القصة / تتكون من ثلاثة اربطة الانقاية / تتكون من ثلاثة قصص الحواشة تتكون من اربعتاشر قصة او اتناشر حسب المسح وحالة الكسل ساعة المسح بين كل قصة وقصة فاصل يسمي التقنت او الجدول لضمان انسياب الماء ( لي زمن داير ادخل انسياب دي في جملة ما شرط تكون مفيدة) والجدول او التقنت بسحب من ابوستة وابوستة بسحب من ابوعشرين وابوعشرين بسحب من الترعة والتي تسحب بدورها من الكنار والكنار بسحب من الكنار الرئيسي بتاع خزان سنار (ده كل شغل مشروع الجزيرة ري انسيابي وكده اما ناس الري بالطلمبات ممكن يستخدموا نفس التكنيك وناس الزراعة المطرية يجروا السبحة بس وربك بجيب المطر )
صرف الفردي ، ده زمن طيب الذكر القطن وهو حساب الارباح بين المزارع والحكومة زمن الحكومة كانت بتتشارك بجيبوا دفترك ويشوفوا صرفتلك كم سلفية وجبت كم قنطار ويدوك حقك على داير المليم وسبحان الله ما كانوا بياكلوا حقك تب يعني قروشك تجيك صرة وخيت وتشتري بتيخة احتفالا بيوم النصر
ولزوم التوقيع
البلد ماهل بشيلنا كلنا
02-02-2016, 08:43 AM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
الشرح زي البودة بفسد عنكوليب الحديس انضم نضمينا بحلاوته وطلاوته وبكل شترابه وبتابه وصميمته وما تعلم كيبودك الهوبان الفخ ساهي زي ما تجي تجي مرات تلشغو ومرات تجيبو ملان ناقصين العقول كان طمبرو ليك ارقصي معليش يا ام ابوك الدنيا جات بالعكسي وحليل المحنة راحت مع القمل هذا والتحايا مرفق طيها لراعي البوست وضيوفه
02-02-2016, 09:09 AM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
ههههههههههههههه مبالغات يا ود الأسد ( من ضهرة الفيس النجاضة ) دي نكتها من اخر الذاكرة لمن قربت تضيع . . حدثنا يا ود الجنيد عن حملات سم الفار اكيد اشتغلت فيها وحدثنا حلو الحديث مع ست القلب وانت تزرع بالجراية وهي تتيرب وانت تشلخ وهي تشلخ ههههههههه وحدثنا عن شوال الكبس وعتالة رحل القطن وترانيم العتالة ..... ضرانا الله اضرو .... ضرانا في القروانة .... ضرانا الله اضرو وحدثنا عن الشعيرية وحلاوة جكسا واكيد انك كنت بتبيع حلاوة البان مرددا ترتيلها حلاوة البان امك تبكي وابوك زعلان يا يابا هييييييييي حليل ابوي وما تنسى السكلي والردحي والهرسي والفوادين والبنسلين يا تمرجي حدثنا عن الخلاوي وتشريف اللم يكون وبليلة الاربحاء الطهور القاشيت ود اب تشة القيلة السماية السلات وملاح الرز وملاح بت علوبة الفركتو وابتو الخ الخ الخ يا حليل ابارا وام وزين وتميرة ومناقزة والمحيربا وصقيعة سلامة وبالعكس
02-02-2016, 09:37 AM
ANWAR SAYED IBRAHIM ANWAR SAYED IBRAHIM
تاريخ التسجيل: 12-02-2014
مجموع المشاركات: 900
هو نان العنكوليب شيلو هين، لازم تعرف من وين تهرب حال وصول صاحب الحواشة او الحارس قبل ما تدخل الحواشة، ياخ ده من شدة ما عزيز في زمانو لمن يزرعوه وسط العيش.. ووسط العدار.. و ممنوع الإقتراب منه قبل وصوله أقرب سوق، كان الحلة كان البندر.. و عشان تصل ليهو في الحواشة و تطلع بدون ما يجيك عكاز لازم تكون سريع وخطاف..
02-02-2016, 06:59 PM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
Quote: حدثنا يا ود الجنيد عن حملات سم الفار اكيد اشتغلت فيها وحدثنا حلو الحديث مع ست القلب وانت تزرع بالجراية وهي تتيرب وانت تشلخ وهي تشلخ ههههههههه وحدثنا عن شوال الكبس وعتالة رحل القطن وترانيم العتالة ..... ضرانا الله اضرو .... ضرانا في القروانة .... ضرانا الله اضرو وحدثنا عن الشعيرية وحلاوة جكسا واكيد انك كنت بتبيع حلاوة البان مرددا ترتيلها حلاوة البان امك تبكي وابوك زعلان يا يابا هييييييييي حليل ابوي وما تنسى السكلي والردحي والهرسي والفوادين والبنسلين يا تمرجي حدثنا عن الخلاوي وتشريف اللم يكون وبليلة الاربحاء الطهور القاشيت ود اب تشة القيلة السماية السلات وملاح الرز وملاح بت علوبة الفركتو وابتو الخ الخ الخ يا حليل ابارا وام وزين وتميرة ومناقزة والمحيربا وصقيعة سلامة وبالعكس
الحبيب ود البوش طبت وطابت ايامك
ود البوش ده من عنكوليب المنبر ومن الناس البزرعوا البسمة غايتو اقول ربنا يديك لامن يرضيك
......
هسي زي المداخلة الفوق دي ما براها بوست وشهادة لله ياها حياتنا ام شعيفة وعصيدة حاااارة وشفع جارية بالفرقان ادونا طايوق وادونا رواب وادونا خمار وما بلقى عندكم ملاح
............ حفظا للمقام ياود البوش اين انا منكم حتى اكتب عن تلكم الصورة الباهية بلودنا ديك غيرك مافي زول بقدر يصورها ويسوقها لعموم اهلنا بالسودان
.......... التيراب ده قصتو قصة ما عندها عنوان غير البهجة ومن اسمو ساي تجيك انبساطة الحبة البتترمي دي بتبقى قندول فيهو رزق الطير ورزق البهائم ورزق البني ادم الحش والكدنكة ورمتنا فلايت وتسمع عيييك وعوووك الضحوة كربت عكارة صاااااااقطة من التيبار القصير داك وفوقها ليمونة من شدرة ناس خالتنا حرم الجعلية وكل الناس حامدة وشاكرة وكل الحلم تتم الضحوة عشان نجي الضهرية وكان طموحك فوق حمار حمامي ليه جرس لزوم الفواتح اصلوا ناس الحلال مواتين بالحيل وسكين البلي القديمة تجيب واحدة بدلها من جهة الصعيد وقبل ما تتم احلامك تسمع رفيقك فلان جاه ضيف وتبقى مارق اصلو الضيف ضيف الحلة علي الايمان الضيف يزردوه شعيرية وشاي لبن لمن يقول ياغربتي . لقيط القطن الوزن الكبس الماركة بحجار ابوكديس ولا راس النمر قبل نايل بور ما يصل والتمرين ده ما بتمشيه الا تقضي الواجب من حليب وعليقة وجدع قصب غايتو بتلفى ليك عشرة دقائق ومرات تصل كدي الكورة تتقد في شوك الكتر ولا اللعوتة الجنب المقابر . مرة باصرت لي قريشات كدي واشتريت لي كدارة شرف من السوق الشعبي ومن حظي العجيب كان في كم بقرة والدة واللبن بكفي الحبان وبزيد والباقي ماف درب ليه الا نبيعه في الحلال التانية معاي ود عمي الله يطراه بالخير بقول لي اقرص الحمار عشان نصل المنسي ومقدر سريع ونرجع نلفى التمرين ومن نصل هناك يشبكني ليك الكيل ده لازم توفيه يوم القيامة ربك بحاسبك اها الرطل بنوزنوا قريب رطلين وشهادة لله عشان نلفى التمرين لكن دافرين روحنا بقصة اوفوا الكيل دي ساي .وما حصل لفينا التمرين تب على الايمان كدارتي ليوم الليلة مزعلاني وقطع شك كان لعبت بيها كان اتسجلت بالعدم كدي في برشلونا تلك ايام لن تعود ولكنها باقية طالما النفس طالع ونازل
.........................
سلاما على اهل الله الطيبن السمحين في البوادي على امتداد هذا الوطن الحبيب
وتحية خاصة لكل حرومنا في الحلال البعيدة فمن غيرهن لا طعم للحياة حرومنا الماخدات مكانتهن بحقهن وما محتاجات لجندرة وسيداو والذي منو
.................. اهل الله .. تعني سلوكهم الدهري ومحبتهم للخير وكل ما يرضي الله التوضيح خشية الهجمة المرتدة والردة
02-02-2016, 08:08 PM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
هي نان كان ما حفظت ليهم حقهم الادبي ما بجوا يدرشوني درش الفتريتة في مرحاكة منقرة
...
المطمورة دي ذكرتني قصة سمعتها بدري زمن الناس كانت بتكتح وقالوا والعهدة على القائل لامن لوري البيرة ده يصل حلة من الحلال برجع فاضي واحد من ناس الحلة بعد يقلع مطمورتو بردمها بقزاز البيرة . عليك النبي شوف البطر ده
ربنا يغفر ليهم وهو العالم بنواياهم وحبابك البوست حقك تب
.............
خفسة كدي
احبابنا بالمنبر مع حفظ المقامات
اطروا الموت اصلو حق وباقي علينا كلنا اتطايبوا واتصالحوا والله ما شايلين منها حاجة البجي بعدنا يا طرانا بخير ولا كمان خلينا سمعة ما بتتذكر . المنبر ده ممكن يساهم في حلحلة المشاكل ويبني ما هدمه الساسة ختوا الكورة واطة وبراحة كدي بنتفاهم ولو رفيقك اداك لبعة كيبوردية سردب ليها تكسب اجر وتخاويه لقدام ونحنا (نحنا دي تشمل كل السودان) كلمة تشحتف روحنا وكلمة تكتل حيلنا اها نعصر على التانية دي والجاي خير اكيد
................... البلد ماهل وبشيلنا كلنا
والبلد ماهل بشيلنا كلنا
02-02-2016, 08:28 PM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
اسمك ده سمح بالحيل وما لاقاني زول اسمو الطيب الا كان اسم على مسمى ربنا يديك الصحة والعافية
فصدة العنكوليب حارة بالحيل وفي حلالنا كان ود خليفة بطهر بالقصب قبل البنج وعدة الحكيم تدخل الحلال ورغم انو جيلنا ما حضر ود خليفة لكن ليوم الليلة لامن يجي اسمو ده بلاوز منو . الزمن ده الطهور بقى ماسخ قبل السماية يطهروا الولد لا حنة لا حربة لا سبحة لا ختة قروش لا قاشيت لا زغاريد . الله يقطع الديجتال خرب الطباع بالحيل .
المر قالوا بسوي الوردة لكن العنكوليب ده ما عندي علم انو بعمل يرقان . المر بكسر الميم ده ياهو قريب لقعور ود البوش
.....................
وفي المنبر ده من الناس العنكوليب
الحبيب محمد النور كبر وده بفصد الحديث بالمقاس الزول ده ما شاء الله تبارك الله شامل في كلو شيء لو جاك من باب الحكي حكاي ولو مسك ليك التراث ما بخلي فيه فرقة ولله في الله كدي بتحب
فالتحية ليه اينما كان
..........................
02-02-2016, 08:48 PM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
لشرح زي البودة بفسد عنكوليب الحديس انضم نضمينا بحلاوته وطلاوته وبكل شترابه وبتابه وصميمته وما تعلم كيبودك الهوبان الفخ ساهي زي ما تجي تجي مرات تلشغو ومرات تجيبو ملان ناقصين العقول كان طمبرو ليك ارقصي معليش يا ام ابوك الدنيا جات بالعكسي وحليل المحنة راحت مع القمل هذا والتحايا مرفق طيها لراعي البوست وضيوفه
تي شن بتشبهي غير الحليب القبيل حلبو
اللا حمض ولا اتغير طعمو على الشربو
يا عنكوليب فداسي النقرشو ونقو
شوفتك ترفع الفوق الفراش مددو متل البوست السمح دا ياهو البجيب ليك الناس الطاعمين زي عنكوليب فداسي الطوال ومواسى صاف الود يا اخي الظريف الجنيد
وحات الله جنس نضميكموا دا الدموع ست يجن واقعات هاااااااا عرب نضحك او نتحسر على ماضى الخيرات
الجنيد ود بله ود البوش
الحبان
ما ورمتنونا ورم دخل جوووووووووووه الضام
بجيكم صادى ما دام اتلملتو اولاد امى
02-03-2016, 08:50 AM
Yousif A Abusinina Yousif A Abusinina
تاريخ التسجيل: 11-12-2008
مجموع المشاركات: 2003
لشرح زي البودة بفسد عنكوليب الحديس انضم نضمينا بحلاوته وطلاوته وبكل شترابه وبتابه وصميمته وما تعلم كيبودك الهوبان الفخ ساهي زي ما تجي تجي مرات تلشغو ومرات تجيبو ملان ناقصين العقول كان طمبرو ليك ارقصي معليش يا ام ابوك الدنيا جات بالعكسي وحليل المحنة راحت مع القمل هذا والتحايا مرفق طيها لراعي البوست وضيوفه
تي شن بتشبهي غير الحليب القبيل حلبو
اللا حمض ولا اتغير طعمو على الشربو
يا عنكوليب فداسي النقرشو ونقو
شوفتك ترفع الفوق الفراش مددو متل البوست السمح دا ياهو البجيب ليك الناس الطاعمين زي عنكوليب فداسي الطوال ومواسى صاف الود يا اخي الظريف الجنيد
وحات الله جنس نضميكموا دا الدموع ست يجن واقعات هاااااااا عرب نضحك او نتحسر على ماضى الخيرات
الجنيد ود بله ود البوش
الحبان
ما ورمتنونا ورم دخل جوووووووووووه الضام
بجيكم صادى ما دام اتلملتو اولاد امى
02-03-2016, 11:36 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
درب اعمامنا ناس ودالبوش وودشيقوق وودبلة صعيب بالحيل ديل مريقين باللبى وجيلنا حصل الكراد . اهو نبرى الاتر بس
ود عمي ابوعجورة مذاكر في حكاوي حلتنا كويس اها بحكي لي مرة عن اهلنا وقال جدن لينا اولادو دقشوا السعودية جابولهم قريشات ادوهن ليه يشتريلم سعية من جيهة سرحان اها خفس على اهلو وعرس لامن رجع سعلوه وين البهائم قالهم بتدور تسعولكم سعية وانا ضهري اعوج .
جدي عم امي ولدوا كان طيار ومن تواريخ حلتنا انو مرة خالنا ده نزل بالطيارة فوق الحلة اها جدنا قاعد يحش في النجيل ومعاه رفيقو جات طيارة بفوق رفيقو سالوا دحين دي ما طيارة ولدك قالوا لالا ديك غبشة الا دي مشارك فيها
كلهم بقوا رحمة
الله يرحمهم ويغفر ليهم
02-03-2016, 12:45 PM
Yousif A Abusinina Yousif A Abusinina
تاريخ التسجيل: 11-12-2008
مجموع المشاركات: 2003
العدار/ يشرحوه كيف ده المهم حاجة كده زي العنكوليب من ناحية الطول بس مضر بالمحصول ويستخدم كغذاء للبهائم يعني المزارع ده حتى الحاجة البتضر عيشو بستفيد منها .
أولاً: لك الود والتحايا الطيبات أخي الجنيد ولضيوفك الكرام. ثانياً: أحب الخدار ولو كان عدار ( كما يقول محبي نادي الميرغني بمدينة كسلا حيث الأخضر هو شعار الفريق). ثالثاً: البهيمة كان أكلت العدار بتلحق أمات طه (أو كما نعتقد نحن أهل الشرق).
02-03-2016, 03:08 PM
عمر السلمة عمر السلمة
تاريخ التسجيل: 01-09-2013
مجموع المشاركات: 264
السلام عليكم ورحمة الله وبركاته قريبنا الجنيد وكل الأهل بالبوست
Quote: صدقت والله . عندنا جماعة متخصصين يعرفوا ليك وين العنكوليب ولما نسالهم بتعرفوه كيف يقولوا ليك بنشم ريحتو
صدقاً لكلام دا ابوي الله يرحمو ويغفر ليهو بحكي لي عن ناس ود العضيم في التقر ومنهم د. الامين الضرير وكان عندو اخوهو كفيف لكن بعرف العنكوليب في الحواشة !!! معليش بوستك عن الناس الحلوين في المنبر لكن الناس ما صدقت لقت ليها فرقة في الماضي الجميل
تحياتي
02-03-2016, 06:06 PM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
سلام لى سيد الحواشة و كل الحلوين المرور ال زى العنكوليب لامن قندولو لونو يقلب و الهدية قلايب
فى القضارف يا ود حمد .. بدل الحواشة بنقول بلاد و عادة بتكون فى طرف الحلة الغريب يا حمد طعامتو دى بتلم الفيران و الفيران بتلم الدبايب و كل فى طلب المأكلة يتربّصون اما لون قندولو البنى اللامع لامن تتفرتق مسايرو و تنهدل و مع انعكاس ضو الشمش بتشوف زحمة ألوان ما شافو الشعرا ساكت
02-04-2016, 04:44 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
تحياتي حمد وضيوفه عنكوليب !!! دة لي الناس الما عندهم مصانع سكر .. نحن عندنا قصب السكر ومن قصد البحر استقل السواقيا والما شاف البحر بتخلعو الترعة ف شنو قصب السكر عندنا في كوستي لا نبدله بالعونكوليب
حياتي حمد وضيوفه عنكوليب !!! دة لي الناس الما عندهم مصانع سكر .. نحن عندنا قصب السكر ومن قصد البحر استقل السواقيا والما شاف البحر بتخلعو الترعة ف شنو قصب السكر عندنا في كوستي لا نبدله بالعونكوليب
الجنيد ود حمد اخوى زى ما قلت ليك السباتة فرهاااااااااااا
هديل ناس ود السن وصلهم خبرك ود المدير بتاوق برجع
لكن يا ود اب شن والله عنكوليب جزيرتنا ولا قصب سكر كوستى
كل زولان عاجبوووووو الصارووو
هههههههههههه
نسيت التحايا الطيبة لكل المرور حبايب دووم
02-04-2016, 09:00 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
الجنيات النجاض الجنيدود البوشانور سيد ادهم - حامي حقوق الملكية الفكرية الطيب ود العباس - كيف تقول العنكوليب فيهو جرحة ؟ انت حوار للشيخ الناس جكسي و محايتو ببسي ولا شنو ؟ العنكوليب ما بقولوا بجرح - عولنا بقولوا بفصد ما ببتذكر فصدة الوليد الفي النواضر ؟القصي : صدقت في السريع و خطاف دي خاصة مع الدماسات بعد ناس السدرة الراجعين ينقطعوا طااااب اسحاق ود حاج الامين - حباب عنكوليب فداسي النقرشو و نقو ابو سنينة - اتريك الزمن دا كلووووو قانص لبوستات الهواميك دي الله يغطس حجرك ود اب سن : صدقت و الله عنكوليب الضهاري اطعم من قصب السكر خاصة كان لقيتا فصوص النص لا فوق رقابة و لا تحت محتاجة لنجرة منجل .ود قدور : أحب الخضار و لو كان عدار هههههههجنس سناحة لكن
سلام يا الجنيد ويا ود البوش على هذه الاستراحة بريحة الدعاش والطمي ونسمة الهمبريب في ضل نيمة مطلة على الترعة رويانة ومخضرة .وزقزقة العصافير وهديل الحمام والقمري .. وأصرار ديك يطارد دجاجة ويقول يا أنت يا أغرق . قبل فترة قريت في الفيس بوك نكتة تحمل كثير من الشجن والشوق لكل ما ذكرت . أستاذ تربية اسلامية من نواحي العاصمة في قرى الجزيرة قبيل حصة الفطور يشرح للصغار عن نعيم الجنة .. عن الفواكه ولحم الطير المشوي وانهار العسل واللبن .. والطعم الذي لا يحلم به بشر .. والصغار عصافير بطونهم تزغرد عشما في لقيمات تسد الرمق لا أكثر .. أختار واحد من دون التلاميذ وقال له :أنت يا حمد لو دخلت الجنة تقول داير شنو ؟ قال الصغير : عصيدة حارة بملاح لوبا يا فندي . هذا هو قمة الحلم وشهوة البطن .. أحلاها السكسانية التي تطبخ في الأعياد والأعراس والشعيرية باللبن عندما يكون الموسم حافل يستحق الاحتفاء به . لا حد يعرف التفاح فضلا عن ألوانه الكثيرة التي تفاجأنا بها بعد الغربة . أقسم بالله أنا شخصيا أول مرة أعرف أن التفاح ممكن أن تصنع منه أشارة مرور لما فيه من أخضر وأصفر وأحمر .وحتى الأخضر ظنيته أحمر عجل قطفه قبل الأستواء كنوا بخير وانداحوا في هذا العبق العميق
02-04-2016, 10:23 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
الحبيب درديري كباشي ........................ وقبل ما ارجع
زي ما في اخوان في الرضاعة
في ناس هنا بشوفهم اخوان وكمان تيمان في الكتابة وقطع شك كلامهم عنكوليب بس
من جهة بتلقى
الحبيب حيدر قاسم
الحبيب محمد حيدر المشرف
الحبيب عثمان محمد صالح
ديل التقول بنقوا من شوال كلام واحد
ومن جهة تانية
بتلقى
الحبيب بلة محمد الفاضل
الحبيب محمد عبدالله حرسم
الحبيب درديري كباشي
الحبيب ودابسن
الحبيب عليش الريدة رد الله غربته
الحبيب دهب تلبو
ديل بشيلو من شوال حدا الشوال داك
وتعنصرا كدي
ناس التعليم ليهم مكانة خاصة فلولاهم ما كان الاخرين
استاذنا وعمنا عمر عبدالوهاب ربنا يحفظه من الناس العنكوليب مرة فتحلوا بوست عن ارتقاشا وفتشت عليه ما لميت فيه اها البوست ده خلاني دخلت نواحي الشمال وانا في كمبيوتري اتذكرت عمنا البشير ودبابكر في سنة تالتة ابتدائي لبسنا وقمنا جيهة القولد وريرة ويامبيو وبابنوسة وما مصدق ليوم الليلة انو الحصة ديك ما سافرنا فيها والله لامن رجعنا البيت قربت اقول لناس البيت جيبوا بيبسي انا جاي من سفر اصلو البيبسي عندنا كان يا لزول مسافر ولا لامن تقرصك عقرب . ياريت عمنا عمر عبدالوهاب يدينا من ذكريات التعليم ومعاملة الطلبة ونظرة المجتمع للمعلم التحية لكل المعلمين على امتداد الوطن وعلى صفحات المنبر العامر
وتحية لكل الناس السمحين الغايبين والقاعدين
.................
اهلنا الكبابيش عندهم قدح عصيدة عجيب وصيغة مبالغة كدي لو قعدت بجاي ما تشوف المحاذيك بهناك لامن تجي ضيف بجيك القدح ومعاه ملاح روح ابييييض قبل ما يدلعوه ويسموه نعيمية وفي نص العصيدة خاتين ليك كباية شوب زي ما بقولن حريم حلتنا لامن يلاقن الدلالي الكباية دي مخنقة سمن والله السمن العندهم ما لاقاني في بكان تاني تاكل وتلحس لا عند كوعك اها قبل ما ارجع نخت القدح ده واتفضلوا البيت بيتكم
02-04-2016, 10:35 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
Quote: بمناسبه التيراب عندنا عمنا قال لولدو بكره التيراب شوف ليك متيربيه ..الولد قال لي مني ومني بكسر الميم..ابوه قال لي مني ومني ياخايب هههههه
على قول ود جبرين انا لله
بسبب التيراب شيدت بيوت وطرب الناس احتفالا حب عذري زي ما غنوا الفنانين حب ببداء من الشلابي لحدي التقنت وبي ضهر ابوعشرين لحدي الحلة لا واتساب لا انستغرام الرسالة بتجي شافهية وقمة القشرة تشنق طاقيتك وتزازي قريب للشارع عشان تلقى نظرة من السمحة ام عجن زي ما غنوا ناس الحقيبة
02-04-2016, 10:46 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
وحباب اهلنا ناس شرق الله البارد وكسلا دي تفتح باب الفرح يوماتي
Quote: أولاً: لك الود والتحايا الطيبات أخي الجنيد ولضيوفك الكرام. ثانياً: أحب الخدار ولو كان عدار ( كما يقول محبي نادي الميرغني بمدينة كسلا حيث الأخضر هو شعار الفريق). ثالثاً: البهيمة كان أكلت العدار بتلحق أمات طه (أو كما نعتقد نحن أهل الشرق).
من اغاني السيرة في الحلال الخدار خداري ومن العين بضاري .
بهائمكم دي متحنكشة ساي هههههه صحيح مرات البهيمة بتتشق بسبب الاكل والشقة دي ما عارف ليها اسم عند ناس الطب لكن العدار في جيهاتنا بنديه ليهن والله يكرم القارئين لامن يكون عندك حمار عجيب بتعلق ليه فترتيتة وده شرف عظيم تحلف بفخر كدي انك بتعلق فتريتة وتحس كانك اوباما في الايام دي
02-04-2016, 10:54 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
لسة شباب ياخ وتستاهل كل خير ولله في الله كده بتتحب
.....
ودي من حلالنا
حبوبتن لينا سمعت بكلمة ما بستغنى اها بقت دايرة تدخلها في اي جملة لزوم الثقافة وكدي مرقت على الجيران تتونس لامن جات قائمة خسمنها بالنبي كان تقعد لفحت توبها كدي مع كشكشة الغويشات وقالت استغنيت والله
...
مرة جاهم ضيف من ناس قدام ( ناس قدام ديل الناس المع الظلط ناس الرغيف والتلج ) ومن الناس الملانين بثقافة ال بي بي سي ديلك ظبطولوا جبنة صاموتية بعد ما بكر وتنى قالها شكر الله الصانع الكلمة جديدة وما عرفت تقول شنو اها دنقرت كدي وقالتلو يصنعني ويصنعك .
02-05-2016, 07:21 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
عمن لي عمل هجرة داخلية سنة سبعة وستين وما منو خبر لمدة سبعة وتلاتين سنة اها سنة الفين وخمسة قلع وطلع ساكن العشرة سنة الاخيرة في كوستي القريبة دي وبين يوم وليلة طلع عندنا اخوان في كوستي ياخ ده كان يوم عيد . بعد الرجعة كدي صنقرت معاه والصنقيرة دي زي شهر وحاجة اها كل مرة بقول لي والله الما عاش في الغرب ما عاش بلد سمحة وناسها طيبة وماهلة ربنا يوقف الحرب بس
العنكوليب ده سريع الذوبان ياخ قصب السكر بفلخ الفك عديل وللحلة الجديدة والانقاذ والنصر والرديف التحايا ولعاصم ودالشيخ نواحي بلد الرسول
02-05-2016, 07:47 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
ومن جبت سيرة الموليتا بقيت اتمطق . ياخ الموليتا دي اكتشاف عجيب بصلة كدي وحبة دكوة ويترترولو شوية سكر ما عارف السر شنو تضربها كدي ما ساعلا في دجاج البيك زاتو . غير الفزع للويقود الناس بتفزع للموليتا والخدرة القايمة بروس وديك خدرة عجيبة زي خدرة الهلالية بتاعت الجروف .
البلد سمحة بناسها والحاصل ده باذن المولى يزول قريب وكان تاوقت في المنبر ده بتلقى من كل شدرة عصا وكلهم من غير فرز خيار من خيار بس نبرد النفس ونطايب النفوس ومن هنا بنمشي ونبني لقدام .
02-05-2016, 07:58 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
الدربكة البتحصل في الحلال صباح كل يوم دي عجيبة البنيات يقشن في الحوش الما ليه حد وريحة ملاح الشرموط تقول ياغربتي ودخاخين التكل زي مصانع السكر صوت الغنيمات بكاء الجهال الغبار البجي كل صباح داك العصيدة ماها صحين واحد بل حوض مونة عديل وفي الراكوبة المطرفة ديك جردلين روب والسعن شغال ياخ صوت السعن ده عجيب لو سمعوه ناس الموسيقى بشتغلوا بيه ولزوم البركة كدي تكتح كورة من الغباشة لامن شنبك يتدفس روب وتسرق يدك للفرصة تخمش منها وتمرق على الجزارة وتلحس في ايدك يلاقيك بقري بقري سمين سمين يلا جاي اوع من المجوك
اها من بحر تراثكم بنشرب . خليك قريب واكشحنا بالفرصة كلها بدل نسرقها
02-05-2016, 09:31 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: حبوبتن لينا طبت راديها وودتوا لبتاع الروادي قاليها ياحاجة راديك ده شغال قالت نان ما بجيب خلف الله حمد مالو
ههههههههههههه،
حباب الجنيد ود حمد، طريتنا آ المبرك ؟، شاحد الكريم تطراك الملائكة في الملأ الأعلي .
الراجل قال لولدو، آ جنا شِد الحُمار دا امش لعمّك العوض قولو، ود السافل قاعد يغني في الرادي . الجنا مشا حدسو، العوض قالو، بِسراعك الحق ابوك قُولُو اليقفلو لآمن اقضى حيضاني المقرنات ديل واجي .
المنافي يا قول ناس المنافي، بالنسبة لي يا الجنيد كانت كأنها جبل شاهق وصلت قمتو ؤُ من هناك عاينت للبلد . ياخي بلدنا فيها تنوّع ثقافي قسم ما تلقاهو في اجعص بلد، تمنيت لو انني لفيت السودان دا شِبِر شِبِر بدل السنين العشتها في المنفى، ؤُ يا قول الغناي كل البلآد في البعد عن الوطن لو كان علي مرمى حجر فهي منفى . كُلو زول حسب بيئته، هسّع كان انا فتحت البوست دا كان سميتو ود لقاي المنبر، وكان رحلت قعدت معاكم في بلدكم كان إخترت نفس الإسم . عندنا عربي جا من الخلاء سكن في اتبرا، واتبرا دي قبل السكة حديد كان إسمها الدآخلة، أها، العربي دا بعد سكن البندر بيتغزل في محبوبتو وصفا قال، يا الشلآخِك مِتِل قضيب الدآخلة .
يقصد شلوخا مِتِل قضيب السكة حديد .
الله يهوّن ...
02-06-2016, 06:26 AM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
سلام الجنيد ود حمد و ضيوفه الكرام غايتو شي فاهمنو و شي ما فاهمنو ..... البوست دا خاص بي ناس الضهاري ....؟؟؟؟ غايتو أعملو حسابكم ما يجيكم هناي داك يرشكم مرة واحدة .....
تحياتي و إحترامي للجميع
02-06-2016, 10:01 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
الحاجات التراثية لو اتنفض منها الغبار بتجيب الناس في موجة واحدة شكل الحياة في كل السودان متشابه لحد كبير والحنين للحياة البسيطة ماسك كل الناس الجبرتها الظروف لخرطوم الفيل ولا بلاد برة .
.. وقبل ما انزل من الناس العنكوليب عمنا يحيى قباني وعمنا صديق الموج وديل ناس توثيق للفن ولو مسكولنا درب التوثيق براه بكونوا فتحولنا طاقة سمحة بس ينفروا على الاقاليم ما يركزولنا في امدرمان المهدي دي . الحبيب بريمة ماشي كويس في تراث اهلنا البقارة الا متباخل في النشر وما عارف نكريه بي شنو اها برضوا لو صنقر في المنبر ده وجدعنا بكم حاجة بتكون ثقافة لبقية الاقاليم .
.................... الجداد في الحلال مشارك الناس حياتهم يعني كل بيت حوض جرجير وحوض خدرة وكم عرق عجور ومرات لزوم الرفاهية عرق بتيخ ودايما يافيه قفص جداد ولا حمام ولامن يجي ضيف بيت وضيف البيت ده ياهو اخوك الكان بقراء ورجع ولا اخوك السافر الخرتوم لغرض اصلو الناس هناك ما ليها في السفر اها تسمع امك ولا اختك الكبيرة اجري اقبض ليك فروجة ولا ديك ياخ كانوا ادوك مهمة تبع الامم المتحدة تنادي كم شافع معاك لزوم السكسكة وامهاتنا ما برجن زول يجي عشان يضبح بقومن بالواجب وكلما تمر الصور دي بقول في سري امهاتنا ديل كان رجال بالجد لو الرجولة مقياس وقمة المتعة لامن يقولولك نضف ام قلنقيد . الاستاذ ذاتوا عصر عليهم ههههههههههههه بيني وبينك الجنة دي لو مافيها ملاح لوبة شن طعمها الحمد لله ربك قال فيما معناه اي حاجة بتدورها بتلقاها علي الجزيمة ناس حلالنا ديلك طلباتهم في الجنة تلقاها ويكاب ولوبة ولو اترفهوا تب ممكن يطلبوا سكسكانية .ا لشعيرية اشتهروا بيها برضوا اهلنا الرزيقات والشاي برضك عندهم مثل سمعتوا منهم بقولولك شاي اللحمر تسع وشاي اللبن كب بلا عد .
02-06-2016, 10:38 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
عبرك التحية لاهلنا في عطبرة وخاصة اسامة المكي ورفيق المسافات الطوال زميل المنبر الحاضر الغائب حاتم شناب وكدي النسعلك ناس عطبرة ديل جت بتشابهو في الطباع السر شنو السؤال مفتاح عشان تنداح وتدينا من بيت الكلاوي .
نامن سمعت عقد الجلاد غنت عطبرة اخدتلي هبرة على بورتسودان بطريق كسلا ومن هناك رجعت بالطريق الجديد ووقفت في عطبرة دغش بدري ولفيت وبقيت بغني براي دي محطة الوطن الكبيركانت تضج متحضرة .
.............. قربت اقولك ان شاء الله حصل الاغنية لانو قطع شك بكون استعجل في شغلانتو ورجع منكرب تال الحلة . اهلنا الفي الحلال ديل رغم بساطتهم علا عندهم بصيرة عجيبة وبديروا حياتهم بطريقة تحير ناس علم الادارة بانواعه . والمحير مقدرتهم على صناعة الفرحة طيارة البخار لمن تجي ده يوم عيد . لو ماشي تهجن بهائمك وتكون سمعتلك بخبر تور جاموسي في حلة تانية تسوق بهائمك تمهرهن وبرضك ده يوم عيد . لو العربية وحلت الهيلمانة البتحصل والضحك البنزل بين الناس وكل ما تجي سيرة العربات دي بتذكر نكتة فرمالة كدي قالولك سيد هوستن بجيب الطماطم من جيهة بتيتخة والله كريم في الغرب اها يوم كبس عليهم المغرب في الخلاء والجماعة قدموه كبر وكمل الحمدو . سورة الفاتحة دي اسمها الحمدو في الدين الشعبي لو جازت التسمية اها خشى على سورة الكافرون وقدر ما لجة فيه ما ظبطت كمساريه قالوا هسي المدخللك في الفرناقة دي شنو
02-06-2016, 11:00 AM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
طلعت من ناس البندر يعني تصدق اصلو ما خاتيك منهم ونحنا جغبر كدي بجونا ولاد اهلنا الساكنين الخرتوم اها لامن تسمعوا يقول بابا ولا ماما تبقى منبهش كدي الانبهاش ده دهشة وانبهار ومعاه تقهية التقهية دي فتحة الخشم ونطيط العيون والمخ بكون واقف نهائي ولو نفسك حدثتك وقلت تجرب تقول ماما لزوم الثقافة وكدي دي فيها جلدة اكيدة والجزاء ما من نفس العمل بدوك الخرج وتمشي تقبلك قش وتحرم من لعب الفلل الى ان يشاء الله . ما عندنا بلي هناك بنلم الفلل بتاعت الفرات والبيبسي ونعمل لين وخرتك وخرتني ضهاري قال ياخ في الضهاري دي في ضهاري تانية
................. سيدي الامير لو جانا بهنا بنضبح ليه ونصرلوا وريقة فيها مطالبنا الحتمية مدارس ومستشفيات وقبل ده كل يسكتلنا الرصاص اللاخمنا ومكمل رويحاتنا ولوموا علي الخرطوم تنضفلوا من ناس الضهاري في اقل من يومين ومن هسي اصواتنا لتنظيم الرايات الاربع وحنبقيه تنظيم الرايات المليونية .
وما شايلني شك تب انو سيدي الامير بطلع يفرق في بوادي كردفان ولا البطانة ولو كسل تب بكون مع اهلنا القريات في شمال امدرمان .
سيدي الامير رغم انو مدينا في راسنا الا قصدوا كويس بس ما قدر يميز من وين يبدأ
...........
ومن غير كسير تلج كنت ماش عليك في السكة من ضمن الناس العنكوليب
ابوحسين وقسم الفضيل ديل مراجع في المنبر ومرات الصادق الخالدي معرفتهم بالتكنولوجيا بتاعت المنبر وفي كثير من الاحيان بتلقى راس الخيت عندهم ودورهم قطع شك بكون سبب في اثبات الحق وتصويب الخطأ فلهم التحية
02-07-2016, 07:07 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
تحياتي ومعزتي الحبيب الجنيد ودحمد ياخ إنت شايل نفلك من إسمك ياوريف بوست ضرا من الكتاحة والسفاية وضُل رهين من وقَّات سموم المنبر...! الجنيد إنت زول مبدع وفي حناياك قاص بارع ياخ العنكوليب من الوطاتو تري...ورقابتو زارقة، بوصفوا بيهو حتي العذاري أها العدار بشق البهائم زي وزي القُلْم، البقاف المعطشة،وعليها ضمة وتسكين اللام أها عن العدارقال الشاعر محمدأحمد ودسعيد: مو الرافع الرويسو الفي خبيبو بسوج مو الطيبق سديرك يا البناك ممفجوج الوادي الغزير شِقلو وعدارو بسوج لبعو وسوّا طفري الهبَّر المقجوج دي توقيع زول ضارب بجذوره في الفنجرة (البلد ماهل بشيلنا كلنا) الجنيد إنت زول عميق في التراث ، وتُعجبني عندما تُدخل في مداخلاتك مفردات كادت أن تندثر، مثلا قلت *صرف الفردي...! "نكريه" دي مفردة فيها إيثار، في المعني تشبه الرشوة، ولكنها تختلف عنها تماما، ممكن تقول زي الغمتة لشافع المرسال أو زي الأجير فوق حقو تديهو زيادة من أجل نشاطه وعمله المتقن أو عبور الفرحة أو البياض في الخط، كان رمل أو ودع يا سلاااام قالت كباشية قديما: خطَّاطة خطي زيدي بكريكي بي مجيدي شوف لي حبيبي في البلد البعيدي *المجيد هو الريال ابوعشرين منسوب للسلطان عبدالحميد شفت "نكريه" دي...! تحياتي وسلامي للفناجرة رباعتك جميعا،ودمت سمحا تحياتي أخي الطيب ودشيقوق وعودا حميدا
02-07-2016, 10:22 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
ياخ العنكوليب من الوطاتو تري...ورقابتو زارقة، بوصفوا بيهو حتي العذاريأها العدار بشق البهائم زي وزي القُلْم، البقاف المعطشة،وعليها ضمة وتسكين اللامأها عن العدارقال الشاعر محمدأحمد ودسعيد:مو الرافع الرويسو الفي خبيبو بسوجمو الطيبق سديرك يا البناك ممفجوجالوادي الغزير شِقلو وعدارو بسوجلبعو وسوّا طفري الهبَّر المقجوجدي توقيع زول ضارب بجذوره في الفنجرة(البلد ماهل بشيلنا كلنا)الجنيد إنت زول عميق في التراث ، وتُعجبني عندما تُدخل في مداخلاتك مفردات كادت أن تندثر، مثلا قلت*صرف الفردي...!"نكريه" دي مفردة فيها إيثار، في المعني تشبه الرشوة، ولكنها تختلف عنها تماما، ممكن تقول زي الغمتة لشافع المرسال أو زي الأجير فوق حقو تديهو زيادة من أجل نشاطه وعمله المتقن أو عبور الفرحة أو البياض في الخط، كان رمل أو ودعيا سلاااام قالت كباشية قديما:خطَّاطة خطي زيديبكريكي بي مجيديشوف لي حبيبيفي البلد البعيدي*المجيد هو الريال ابوعشرين منسوب للسلطان عبدالحميدشفت "نكريه" دي...!تحياتي وسلامي للفناجرة رباعتك جميعا،ودمت سمحايا سلام عليك اخي العبيد كلام قمة في الامتاعبس يا اخونا انتو مالكم متلهمين العدار بالشينة - العدار نفسه ما بكتل ليهو بهيمة خالص لكن النمل اللابد جوة اللوية حقت الفص الزارق جديد هو البضيع البهائم العدار ضلو تحت الراكوبة مهضلم و العدار للصرفات و للكنج كدي يا العبيد اخوي امشي تاوق جوة الكنجة ديك شوف كان في جردل و طشت جواها و كان لقيت الجردل و الطشت مع الصباح فأحد امرين أما زولها جهّز روحو لصلاة الجمعة او تقطع الشك كمان زولك امبارح شرب من ريق أم كفل .وين اسحاق ود اللمين ؟
النم فوق المسور ده بخلي الروح تفرهد عديل ويا عمنا عبيد عقب عقب
زي ما قال عمنا ود شيقوق العدار ما بكتل علا انت وحبيبنا ود قدور اتلهمتوه تب واضيف ليك السيوة برضك بتشق البهائم بعد دق العيش تسمع الصياح الكع ما يقعن السيوة ( السيوة دي باقي البتاب والبتاب ده ياهو القندول بعد الدق بين قوسين التقشير بلغة ناس ابوحسين اهل البندر )
................
تربية الحلال من فوائدها كترة الامهات يعني كل الحروم الفي الحلة اماتك وحظي سمح لفيت حبوباتي بت علي ودالبشير وبت رحمة ودالشمباتي ونضم الحبوبات طاعم وفيه حنية كدي ما بتتلقى حتى من الام . حبوبتي بت علي رغم العمر بتسافر لوحدها سلاما على اهلها فوق ام دومات وام الطيور وحلال قدام . عندي عمين دقشوا الغرب والجنوب ما منهم خبر اها كل ما تسمع خبر عنهم بتتشهل وتقوم عليهم مرقتها كدي في زالنجي والدلنج وهبيلة ونامن ترجع بتجي معاها الخيرات شيء قنقليز وشيء دوم وشيء لالوب ونصيبي كان طابق . لحظة تكون واقف كدي والحبوبة بتفتش في السحارة وتمرقلك هين بلح ولا خمشة مدمس فرحة تمسكك كانك قابض ماهية وفوقها علاوة . واجمل حتة لامن يجروا المفحضة (المحفظة) وكل الحبوبات عندهن مفحضة وداقات الشلاليف ومعظمهن مشلخات وفعلا الشلوخ زينة اها لامن يغمدولك طرادة ما بتقول شكرا بتجر على الدكان الوحيد وتشيل وقية طحنية ولا حلاوة دربس دي كل الرفاهية ولو قسناها بفهم اليوم ما ليها طعم لكن في وقتها حاجة ما بتتبدل . ربنا يرحم حبوبتي بت علي ودالبشير ويمد في عمر حبوبتي بت رحمة ودالشمباتي وربنا يرحم كل حبوباتنا الرحلن ويمد في عمر الموجودات اصلو هن كل الخير والبركة
... حبوبتن لينا عيالها كل مرة يكوركولا الفطور قضى تعالي وهي متكية في ضل الضحى العجيب داك بتحرك فوق غويشاتها وذمامها اها وكت كتر الندهان عليها قالتلهم لاخمني الفطور الفطور لاهو كبد ولاهو رغفان ما عصيدة بي ملاح شرموط ومشاركني فوقها الضبان .
02-07-2016, 01:55 PM
الجنيد حمد الجنيد حمد
تاريخ التسجيل: 01-02-2013
مجموع المشاركات: 626
Quote: يا اخونا انتو مالكم متلهمين العدار بالشينة - العدار نفسه ما بكتل ليهو بهيمة خالص لكن النمل اللابد جوة اللوية حقت الفص الزارق جديد هو البضيع البهائم العدار ضلو تحت الراكوبة مهضلم و العدار للصرفات و للكنج كدي يا العبيد اخوي امشي تاوق جوة الكنجة ديك شوف كان في جردل و طشت جواها و كان لقيت الجردل و الطشت مع الصباح فأحد امرين أما زولها جهّز روحو لصلاة الجمعة او تقطع الشك كمان زولك امبارح شرب من ريق أم كفل .وين اسحاق ود اللمين ؟
هههههههه لا لا جمعة شنو يا الحبيب زولك وحاتك شِرب وحوَّش...! الزول تبارتو ملانة حليب مقنَّن، دي حقت بعد الكافرة تدخل في جفيرها يعني بعد مغيب الشم،(بالليل) وبعد الشَّم تتحكر في وسط السماء"الضُهر) عندو تبارة حِسوة حمَّرة مخطوطة تِحت عنقريبو.......! أها زولك دي تاني حجباتو مرقهن تب وشبلهِن في كراع العنقريب، وقعد بي العراقي بس، وإتلفح ب توبو ،ضارباه هبوب مولاه...! صدقت يا الطيب أخوي العدار مابكتل أتلهمناهو ساكت والسيوة يا الجنيد اخوي مثلها ومثل نبات"الشَّرا" ,إسمه قديما"الشَّري" قال إبن ونان المغاربي: (والمَرْخِ والعَفَارِ والعِضَاهِ والْـ ـبَشَامِ والأثْلِ ونَبْتِ الخَرْبَقِ والرِّمْثِ والخُلَّةِ والسَّعْدانِ والثَّغِرِ وشَرْيٍ وسَنَا وسَمْسَقِ) هو بسمن الغنم وألبل، لكن كان شبعن فوقو نامن زكَّكن، بشُق النعجة ، شقت سكين...! عن الزَّكك قال ود الشلهمة: (قشِّـك قلـّع الدُرّاب وطاتـــو إنحلـّت وفي الزكك البشُق مُريَاح سعيتك تلـّت فيك نزل أب لساناً بى قبيح مااتفلـّت مجّادعيـن بعيـد خايفيـن الرّزق إتخلـّت) *مجدِّعين الجنيد ودحمد ب بوستو السمح دي ورباعتو الفناجرة، خلنا نتلهم المنبر
02-08-2016, 08:19 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
أها زولك دي تاني حجباتو مرقهن تب وشبلهِن في كراع العنقريب، وقعد بي العراقي بس، وإتلفح ب توبو ،ضارباه هبوب مولاه...!
و زولتك ام كفل الوكت داك تكون مع الجارات منتظرة دورها في التوقة ( التوقة ما بتفوت عليكم يا ناس الضهاري) وزلكم الوكت داك بيكون منتكي في عنقريب المخرطة المفروش بالبرش الضفايرو دقاقة و ماسك سبحتو يهمهم بسبحان الله و الحمد لله وكان سمع خطوات كلب ساي قلبو يدق و ريقو يقرطع
نواصل بعد ما ام كفل اخدت بوختا و جات قادلة متلهمة عشاء البايتات و مقنع الكاشفات
02-08-2016, 08:27 AM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
الجنيد ممكن أساهم بعنكوليبة طويلة بس ما طاعمة زي عنكوليبكم لكن ضهراوية برضو
خديجة مرة اللوري كانت تسكن غرب القاش بكسلا وتحديدا حي العمال .. و تمر السوق بصفة دائمة ويومية .. ولآن حي العمال جزء من حياتنا أذ يقبع منزل جدنا .أصبحت ملما بحياتها بصورة أشمل .. زوجها اللوري كان رجل ضخم الجثة جهير الصوت يسمع من مسافات بعيده وهو ينادي و قد كان يعمل في فتل الحبال من سعف الدوم ونسج العناقريب ( السراير ) الشعبية لأهل الحي .. خديجة بالنهار تصل السوق ( لا أدري هل راجلة أم راكبة للمواصلات ) . تبدأ جولتها على برندات السوق تجمع الصدقات .. لكن لولا سلوك غريب جدا كانت تنتهجه خديجة في جولة الشحده هذه لحسبناها شحادة عادية .. لكن الغريب في خديجة أنها كانت أنتقائية بصورة غريبة . .فهي لا تمد يدها لأي شخص .. بل لها أناس معينين . وفوق هذا وذاك لها مبلغ مقطوع لاتقبل أقل منه أو أكثر .. ومن ضمن زبائنها كان الوالد كباشي عليه الرحمة . وكانت تطلق عليه أسم موسى لا أدري من أين لها بهذا الأسم فكانت تقف على جنب وهو عادة ما يكون جلوسا في الصالة أمام المكتبة مع عدد من الاطباء والمحامين وبعض الأعيان أذ يتجمعون أما وقت الافطار أو من الصباح لتناول القهوة .. وتقف خديجة بالقرب منهم وتطلق جملتها المعهودة ( موسى جيب الكرامة ) وكان المبلغ المقطوع هو خمسة وعشرين قرشا العملة الورقية التي كانت تسمى ( الطرادة ) .. بعض الضيوف الجدد يمد يده لها بمبلغ من المال لا تتناوله بل تنظر له بإزرداء وإحتقار كأنها تقول له ( هل سألتك ) وعادة يتحرج الضيف ويعيد ماله لجيبه .. قبل أن يشرحوا له الموقف . كان عندها حساسية بل كراهية مفرطة تجاه بنات جنسها من النساء .. وأذا صادف وجود أمرأه قربها في المكتبة ممكن تعتدي عليه وتجردها من ثوبها دون أي سبب .. وكذلك صادفتها أكثر من مرة في حي العمال في مناسبات الأفراح كانت تحب الحفلات وترقص بهستريا وعنف .. ولكن دائما ما تقف في صف الرجال ولا تقترب من مكان النساء أبدا . لكن أغرب ميزة عند خديجة وهي الأكثر حيرة أنها كانت لا تقبل شخص يعدي أمامها أبدا ..كأنه لها مجال مغناطيسي أو رادار لا تريد أحدا أن يخترقه . لذلك عندما تجدها عابره في السوق تلاحظ لشئ غريب مرات تتوقف أو تجري حتى تسبق شخص ما أو تهرول . ثم تتوقف أو تلف بظهر شخص ما ... كأنها لاعب كرة قدم يراوق . من مواقفي الطريفة معها .يوم ما أرسلني الوالد لأطلب قهوة لأحد الضيوف من قهوة البحر الأحمر وهي كانت تقع في الضلع الأيسر من المستطيل الذي تقع فيه المكتبه وهو مستطيل ناقص ضلع . بطبيعة الحال للحضور من المقهى لا بد أن تسير بشكل قطري بين المقهى والمكتبة .وأنا عائد من المقهى بعد ما طلبت القهوة.. لاحظت بطرف عيني خديجة حاضره في جولتها الصباحية .. قررت بيني وبين نفسي أن أعبر أمامها وأقطع لها مجالها المغنطيسي العجيب مهما كلف الأمر.. بديت وأنا حاني الرأس كأني لا أراها أمشي مسرعا بالتدريج وشعرت بها هي كذلك بدأت تسرع .. كل ما زدت من سرعتي زادت هي وأخيرا قررت أن أجري .. تفاجأت بها ترفع ثوبها بيد واحدة كشفت عن ساقيها وربما أعلى وأنطلقت في الجري .. وتفاجأت اكثر بأن كل الحضور من زبائن المقهى وفوال النيل المجاور أنفجروا بالضحك يبدو أنهم كانوا يراقبون الموقف .. شعرت بحرج كبير جدا .. ومن يومها قررت أن أتعجب فقط ولا أجاري المجانين في سلوكهم مهما كان مغريا .
02-08-2016, 09:34 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
النم ده منهج حياة شامل وكامل فيه سمح القول حفظ الحق الايثار ومحبة المكان وكل القيم السمحة موجودة فيه
........................
الحبيب درديري كباشي حروفك كلها سمحة والبوست بوستك وبي وصفك ده لو وصلت كسلا بصل المكتبة من غير دليل
خديجة دي ياها من اهل الله . الناس الطيبين اللافين في السوق ديل فيهم البركة والخير ومرات بقول نحنا المجانين وهم العاقلين علا الليلها براه قصة العبور دي والمجال المغنطيسي عجيبة بالحيل
في الشحدة البين الفرقان ديك حبوبت لينا جارتها اتلهمتها من الصباح اديني طايوق بعد شوية اديني صلصة يابسة صلصة العلب دي ما بنعرفها بعد شوية اديني شرموط وقت كتر عليها صاحتلها دحين ما اجي افركوا ليك احسن .
............... واحد مطوفش والدنيا صيفية والفلس ساكن الجيوب علي وكل الناس تنم
الليلة الفقر شنق علي طاقيتو في السروال مقيلو وفي السديري سعيتو
اها جاء على مرتوا وقالها والله تديني عشرة جنيه الف ليك الحلة دي كلها عريان ميطي مرتوا مطوفشة اكتر منو قالتلو عشرة جنيه اديني خمسة بس بلف ليك كل الحلال عريانة من ديك وليوم الليلة صاحبنا الطفشة راحت منو
.................
02-11-2016, 11:37 AM
Yousif A Abusinina Yousif A Abusinina
تاريخ التسجيل: 11-12-2008
مجموع المشاركات: 2003
عمنا عبيد الطيب عمنا ودالبوش عمنا ودشيقوق الاستاذ درديري كباشي عمنا يوسف ابوسنينة
الجدنيد اخوى لشنو بتختنى مع العجايز ديل مانى قدرهم
اكتبنى فوق سطرن بررررراى
احد مطوفش والدنيا صيفية والفلس ساكن الجيوب علي وكل الناس تنم
الليلة الفقر شنق علي طاقيتو في السروال مقيلو وفي السديري سعيتو
اها جاء على مرتوا وقالها والله تديني عشرة جنيه الف ليك الحلة دي كلها عريان ميطي مرتوا مطوفشة اكتر منو قالتلو عشرة جنيه اديني خمسة بس بلف ليك كل الحلال عريانة من ديك وليوم الليلة صاحبنا الطفشة راحت منو
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الجنيد حمد
عبدالله ود البوش
ANWAR SAYED IBRAHIM
الطيب عباس
إسحاق بله الأمين
Yousif A Abusinina
بابكر قدور
عمر السلمة
معاوية الزبير
جلالدونا
عبدالحفيظ ابوسن
الطيب شيقوق
معاوية المدير
ABUHUSSEIN
عبيد الطيب
فيس بوك
تويتر
انستقرام
يوتيوب
بنتيريست