|
|
|
 Re: مطلوب مترجم نجيض (Re: مجدى محمد عبد الله)
|
قُولْ لِى هَا الوِليۤدْ أسْمعْ
ؤفُوۤقْ القَالُوۤ فِيكْ بَرْضِي يَمِينْ بِاللهِ مَا بَرْجَع
حَصَـلْ فِي يُـوۤمْ
قَرَع عِشْواوِي أوْ فَجْرَاوي وِكْتِيۤن الحَمَار يِطْلَعْ
سَقِيتْ البُوغَة بالَّلبَقَة ؤمَــرَّة قْرَانْ
كَمَان كَاشَنْتَ للإنْتَايَة فِي التِّيــنَانْ
حَلَبْ جَدْوَل ضَكَر وسْخَانْ
ؤنِحْنَ كَمَـــــان نَمِسكْ الشَّافِعْ الدَّلْعَانْ
مِنْ جَضْمَاتُو ؤنْشَدِّقْ ؤبِنْفَرِّقْ بِيۤن البَهَمْ
بِنْخُتُّو جُوَّه الكَرْ سَاعْة أُمَّاتُو ِبِتْعَلّقْ
ؤقُولْ لِى هَا الوِليۤدْ أسْمَعْ
أوْعَكْ أوْعَى تِتْصَرْبـَع
حَصَل تَرْبَلت فِي قَيَّالَة بِتْحَرِّقْ
حَصَل عَلَّقْ جَخَصْ بَرَّانِي أوْ جُوَّانِي
فِي الكَرَبْ المِعَضِضْ فِيهُ قرْمَدّي ؤبِيْطَقْطِقْ ؟
حَصَل كَدْكَدتْ دُوُنْ طِرّيۤقْ
حَصَل جَرْبَنْتَ عَرَّاقِيكَ بالدِّفِيۤقْ ؟
حَصَلْ بَقَّشْتْ واللا رِمِـدْ
ؤجابُو لَكْ مِنْ المُسَّــارْ
مَلِيۤتْ عِينِيۤكْ بِقَتْ تَدْفِقْ
حَصَل مِنّ الحَفِيرْ كَرَّعْ ؟
ؤصَفِّيۤتْ مُويْتُو مِن دَغَلُوبَة
واتْوَتَحَـت قُـتَّ شبَـَعْ
رَجَعْ شَبْعَانْ وِكِتْ تَرَّعْ
ؤقًول لِى هَا الوِلِيدْ أسْمَعْ
شِنُو المِعْرِضْ.. شِنُو التِّنْقِيرْ ؟
شِنُو الإقْنِينْ... شِنُو اللاوِيۤقْ
شِنُو القُّشُّق .. شِنُو الكَاوِيۤقْ
تَعَرْفَ السَّندقيۤقْ آولِيۤدْ؟ شِنُو العَاشْمِيۤقْ
شِنُو الهَمْبَك هَوَا مِسيۤرِيِقْ
وأتْحَدَّاكْ بِتَعَرِفْ خُلَّةَ المَاريۤقْ
شِنُو النَّعْسَانْ شِنُو الّلقْلُوقْ
شِنِي المَاسْدِيۤرَة والفَاشُوقْ ؟
شِنُو القُلُّقْ ... شِنُو البَرْدَانْ
شِنُو المَاكُوكْ شِنُو الكَمْتَر شِنُو البَدْقُوقْ
شِنُو الرَّحَل التّفرغْ عِيۤنُو للمَارُوۤق
ؤقولْ لِى هَا الوِليۤدْ أسْمَعْ
تَعَرْف الكنْدَرَة أُمْ غُوشَـة ؟
تَعَرْف الكِتْرَة بِى عرُوشَة
شِنُو العَمَيُوقْ شِنُو التُّوۤرِيۤقْ
شِنُو الحُمْبُك شِنُو الحُمّيۤضْ شِنُو اللُّصيۤقْ ؟
ؤقُولْ لِى هَا الوِليۤدْ أسْمَــعْ
حَصَل صَنْقَرَت فُوۤقْ مُشْرَعْ
ؤمَا لِقِيتْ مَعَدَى بِى غَادِي والرَّوَّاسِي اتْمَنَّع
ؤلفِّيۤتْ الهِّــدُومْ فِي الرَّاسْ
نَزَلْتَ طِمِيّة مِنْ القِيۤفَة ﭽُبْ تَبْلَعْ
ؤقًولْ لِى هَا الوِلِيۤد أسْمَـعْ
تَعَرْف الكَـجْ واللالْويۤـبْ؟
حَصَلْ شُفْتّ الرّوَا اتْقَطَّع شِنُو الجَاقُوسْ
شِنِي الحَيَّاصَة والصَارِي... شِنُو البَاطُوسْ
شِنُو الفَافْرُوج شِنُوالمُعْلاق شِنُو الشَّاشَّـاق
حَصَل قَيَّلَتَ فِي رَقْـرَاقْ
فِي السَّلَم المَطَارْقُو رُقَاقْ
شِني الفَرْوَة.. وشِنِي المُخْلا
شِنِي المَلالَـة والمُطَّالَة
شِنِي العِدْلَة...شِنِي الفَقْلَة
شِنُو البَرَبنْدِي والخَنَّاقْ
شِني الوَشَرَة... شِنِي الوَعَرَة
شِني الدَّبَرة... شِنِي الشَّعتَة... شِنِي النَّذْرَة ؟
شِنِي النَّتْرَة شِنِي الطَّرْفَة وشِنِي الصَّرْفَة
شِنِي الهَكْعَة وشِنِي الهَنْعَة
شِنِي العَرْجَا وشِنِي أمْ نُقْنَاقْ
ؤقُولْ لِى هَا الوِليۤدْ أسْمَعْ أخِيۤرْ مِنْ هَا الحَدِيثْ تَقْنَعْ
شِنُو الوِيۤكَابْ شِنُو الرُّﭽََّابْ
شِنُو الغَوَّاصْ شِنُو الضَرَّابْ
حَصَلْ شَقَّقْتَ مَرَّة سَرَابْ
شِنِي النَّذْرَة وسِهيۤتْ غَرَزَتْ
شِنِي العَزَّالَة والوَقَّالَة
شِنُو الأبْرَق شِنُو اللَّبَّابْ
تَعَرْفْ اللِّبْـدَة والضَّنَّـابْ
حَصَلْ شُفْتَ المُشَاطْ بالسَّلَّة
ؤشُفْتَ سَمَاحْتُو جَايِبْ بِالمَتَاقِيلْ تَلَّة
أخَدْتَ التَّبَّة واشّبَلتَ قُتْ مَا دِلا
والعَنَجَاوي جُوَّه سَراتك اتْدَلَّى
بَدُورْ أورِيكْ هَدِي الحِلَّة
ؤقُولْ لِى هَا الوِليۤدْ أسْمَع ؤحَاوِل مَرّه تتشدَّع
حَصَلْ زَوَّفْتَلَكْ شَتْلَـة
حَصَل كَرَّجْتَ شِيۤلَة زُوۤلْ
واتْخَازَلْتَ مِنْ حُوۤضَاً كَبِيرْ ؤصَنَجْ
حَصَل دَقُّوكَ فَلاغَة وِكَتِيۤنْ التَسّوِّي عَوَجْ
وأكَلْتَهَا سَاهِي فِي اللّبَّادْ ؤقَالُوُا لِيۤكَ أمَّا خَمَجْ !
ؤقُولْ لِى هَا الوِلِيۤدْ اسْمَعْ!
حَصَل جَامَلْتَ فِي المَعْرُوضْ
وأكَلْ مُطَّالَة سَاهِي قَرَوضْ
لَحَمْ مَرْدُومْ تَمُرْ مَرْدُومْ
حَصَلْ جُوۤعَرْتَ واللا خِنِقْ
لامِنْ جَاتَك أُمْ دَلْدُومْ
حَصَل جَرَّبْتَ فَكَّة رِيِقْ قُبَّالْ الشَّمِسْ تَشْرِقْ
حَصَل سَوُّولَك الشَّلَهُوۤبْ مِنَ المَحْلُوبْ
حَصَلْ سَاهَرْبَكْ المَرْقُوۤتْ وأبُوقْرِيۤفَة
حَصَل صَبْلَجَتَ فِي القِيۤفَة
حَصَل قَفَّلْ بالعَبَسْ كِمْلِيبة
حَصَلْ شُفْتَ السِّهِيۤتْ البِىۤ التَّلاتَة حَلِيبَة
حَلَبْ عَتْمَة وشِرِبْتَ شخِيبَة ؟
حَصَلْ فِي يُوۤمْ مَليۤتْ لَكْ بُلْ واللا شِرِبْ شَرَابْ الغُلْ
واتْمَسّحْتَ بِى مَجْمُوعْ أوْ بَيَّتَ فِي قَاطُوعْ ؟
أو ضُقْتَ الدَّبَسْ فِي الرَّاسْ أوْ كَبَّر تَبَسْ بي الفَاسْ
بِتْعَرْف التَّغَر وكْتِيۤنْ يِبْدَا فِيهُ يَبَاسْ ؟
حَصَلْ سَاهَـرْتَ بِى الكَبَّـاسْ ؟
بِتْعَرْف السِّعِن والقِرْبَة بِى وكَّايَة
شُوفْ نُقَّاعَة زَي أمْ بُور ؤفِيهُ تَرَايَة
تَعَرْفْ أُمْ تَكَشُو وأمْ بَارِدْ ؟ تَعَرْف الشُّولْ والفَارِدْ
والسِوِّيۤد أكَلْتُو مُلاحْ تَعَرْفْ القُبْسَة والبَيَّاحْ
لِعِبْ شَادِيۤت حِدا الحِيۤشَانْ ؤكُنْتَ صَغِير مَسَكْتَ أضَانْ
وِصِلْتَ المِيسْ وكتْ فَرْحَانْ
لِعِب قَادُوسْ ؤيُومْ قَاسَوكْ ؤمِينْ قَاسَا
واللا الرِّمَّة حَرَّاسَـــــة
لِعِبْتَ كَرَع كَرَع النَّو ورَا الغَابَة
لِعِبْتَ الطَّابْ ؤشِلْتَ الوَاشْ وفلاغة وضَبِح طَابَة
لِعِبْتَ الوَرْ ؤكُوۤرَكْتَ وكَسَرْتَ الجَرْ ؤحَرَّتْ حَرْ ؟
لِعِبْتَ شِبِيۤرْ شِبِيۤر يُوۤمْ شَدْ
ؤقَامْ بِى جَمَاعْتُو طَايِرْ فَرْ
شِنُو النَّاطُور شِنُو المُتْرَارْ
حَصَل ضُقْتَ القَلِيعْ كِيۤفْ حَارْ
حَصَل شَاقَقْتْ سَدَّارِي واتْضَرَعْتَ فِي الغَدَّارْ
لِعِبْتَ الكَاسْ وأدُّوكْ هُوبَة نُصّ الرَّاسْ
حَصَلْ حَشِّيۤتْ لَوِيَة لُوبَا سَاعْة صَنَّة دُنْيَا هَجِيرْ
حَصَلْ غَزّيۤتْ مَنَاجْلَكْ دِيۤلْ فِي تُمْسَاحِيَّة خَاتْيَة المِيۤلْ
حَصَلْ عَلَّبْتَ نَارْ فِي فِجِيۤرْ
حَصَلْ كَوَّعْتَ يُوۤم فِي حِجِيۤر ؟
تَعَرْف الدُّكَرِي المَا انْخَتَ يُوۤمْ فِي جَفِيرْ
حَصَلْ آ ولِيــۤـدْ ؟
فِي التَّكُويَة جِبْتَ صُرَارْ ؤجِبْتَ مَسِيرَة مِنْ التُّوۤبْ
عَجَنْتَهَا فِيهَا بِى طَنُّوبْ
شِنِي الدَّرَّة وشِنُو المَحَوِيۤبْ شِنِي الدَّانْقَا وشِنُو الدَّانُوۤبْ
شِنِي السَّحَارَة والدّوَنِيبْ
حَصَلْ حَجُّوكْ حَصَلْ لُولُوكْ
حَصَلْ بِى غْرَارَة يُوۤمْ غَتُّوۤكْ
حَصَل آوليۤدْ رِكِبْتَ ألْبِلْ
شِبِعْ حَميضْ صِبِحْ تَرْيَانْ ؤفِي شَمْسْ الله مِتّنْبِلْ ؟
حَصَلْ خَرَتُوكَ بِى أمْ فِرْتِيتَة جِيتْ فَاضِي
مَشِيۤتْ كَابَسْتَلَكْ وَرَتَابْ
ؤيُوۤمْ عِرْفُوۤكْ عَشَاكْ كَانْ طَي ؤمِدَّنْبِلْ ؟
حَصَلْ شَقَّتْ كُرَاعْكْ سَارَة فِي الحَجْرَة ؟
حَصَلْ شُفْتَ العَرُوسْ مِتْضَارْيَة فِي الكُجْرَة
حَصَلْ فِي يُوۤمْ سِمِعْتَ الوَالْدَة بِتْبَنّنْ
ؤتَطْحَنْ فِي الدَّرِيشْ مِنْ تَانِي ؤتْفَنِّنْ
شِنُو القُرْقَابْ شِنُو الحَتَّل شِنُو العَنَّبَابْ
شِنُو الغَلَق البِيْفَتَحْ بِىۤ كَدِيس ؤكْلابْ
شِنُو المِشِّقْ شِنُو البِكّكْ تَعَرْفَ الوِيۤنْ واللا القَاوْ
شِنُو الَّلرَصْ البِجُر غِيۤرُو تَعَرْف الكَاو
شنو الاسْنَاج شنو الأرْقُو شنو الرَّتّاج
حَصَل شُفْتَ الرَّضِيَّة تَخُشْ
تَهِزْ سِعْنَاً مَلانْ بِالرُوۤبْ ؤمَرَّة تَرُشْ
مَعَلَّقْ فِي كَشَمْبِيرْ مِنْ حَطَبْ مَقْلُوبْ
حَصَلْ قَالُوۤلكْ إنُّو الكُورْ بِجِيب القُوبْ
تَعَرفْ الفَرْيَة والسِّمْبِيسَة والنّبِيتْ
حَصَل طَقُّوكْ بِالنَّبُّوتْ وِكْتِيۤنْ التَّقُولَه أبِيۤتْ
حَصَلْ قَيَّلْتَ فِي صَنَّانَة تَسْمَعْ صَنْ
تعرف أمْ صَنْ
تَعَالْ نُورِيكْ عَكَاكِيزَنَا وأسَامِيهَا:
أبْ قَرْجَة ؤسَجَم الأُمْ واللاقُوۤنا وأبْ حَنَفَة
ؤكَمَان فِكُّو تَسْمَع كَو وكْتِيۤنْ الحَدِيثْ لاكُو
حَصَلْ شَاهَدْ بَنَات الحِلَّة سَاعَة يِمْشَنْ الوَاقُودْ
ؤتَلْقَى السَّمْحَة تِتْوَقَّى وضَمِيرَه يقُودْ
حَصَل نَادُوۤكْ ؤشَيَّلتَ حَصَلْ شَاهَدْتَها بتَضْفُر ؤبِتَّبِّبْ
تَقِلَبْ النَّخَرة والحَنْقُوقَة ؤتْعَقِّبْ
تَعَرْفْ المُوۤص تَعَرْفْ البُوصْ والزُّمْبَارة واللانْدُوۤبْ
تَعَرْف الشَّلْخَة مَا شَالْ اللَّبَنْ يَا دُوۤبْ
حَصَلْ رَضُّوكْ بَعَدْ قَلَسُوكْ ؟
حَصَل حَجُّـوكْ ؤقالُوا ليۤكَ:
دِي الضَّبَحُوهَا دِي السَّلَخُوۤها
دِي الأكَلُوهَا دِي القَاوَالَة والوَرَّاد وَرَدْ مَا جَا
شِنُو الكُرَّادْ واللا أكَلْتَ يُوۤمْ كَدَّادْ
حَصَل صَارَعْتَ قُمْتَ حَكَلْتَ واللا رَمُوۤكْ
حَصَلْ سَاسَقْتَ بِالدّيۤدَابْ أوْعَاكْ مِنُّو بَسْ بِاللّيۤلْ
بِلِمْ الهَـامْ وأبْ دَفَّانْ ؤمَاهَو عَدِيـلْ
حَصَل نَقّبْتَ ضُقْل الشُّوۤكَة نُصّ اللّيۤلْ
حَصَلْ طَعَّمْتَ لَكْ جَبَّادَة بِى صَارْقيۤلْ
حَصَل آوْلِيۤدْ مَشِيۤت بالغَلَّة للضِّيۤفْ النَّزَلْ فِي الحِلَّة
ؤشِلْ شَاي الصَّبَاحْ "بَاجَقْلِي" بِىۤ البَرَّادْ
سَمَاحْتُو مَلانْ ؤكَانْ يِغْلِي
حَصَلْ فِي يُوۤم سِمِعْ حَبُّوۤبَة بِتْبَنِّنْ تَغِنِي عَلِى:
شَاهِي عَشَرَاتْ رَمَانِي ؤبِىۤ لَبَنْ كَرُّوتْ
شَاهِي عَشَرَات رَمَانِي والبِضُوقُو بِمُوتْ
شَاهِي عَشَرَاتْ رَمَانِي بِضَوي في الكُبَّاي
شَاهِي عَشَرَاتْ رَمَانِي ؤفِي كَبَابِي الشَّاي
شَاهِي عَشَرَاتْ رَمَانِي السُّكَّر أبْ لُوۤنِيۤنْ
شَاهِي عَشَرَاتْ رَمَانِي حَلاتُو بِيۤنْ زُوليۤنْ
شَاهِي عَشَرَاتْ رَمَانِي ؤفِي كَبَابِي الصِّينْ
حَصَلْ كُوۤرَكَتَ للمَطَرَة عَشَاكْ مُطَّالَة
فِي السَّيَالَة والوَعَرَة ؟
حَصَلْ بَرْبَحْتَ سَلَمِيَّة ؤخُوسْتَكْ سَمْحَة لِيۤهَا شَّرَا ؟
حَصَلْ حَللَّتْ يُوۤمْ تَقَرَة بِلا حِرْجِيۤمْ مِنْ النَّقَرَة
تَعَرْف الانْسكَاكْ آولِيۤدْ بِكُونْ بِى وِيۤنْ
تعرف التّبْ والمُسْلَب تعرف الهيـن
شني القِسّيۤبة والتُّرُّوبَة شني الحسكة وشني التَّنَكة
شِنِي الفِرَّة... وشني الفَّرة ؟ شني كتابة وشني الطُرَّة ؟
شني الصُّرّة وشني الصَّرّة
حصل خوّفت حُمْرة عِيۤن.. حصل قَلْفَطْتَ مَرَّة دَحِين ؟
شِنِي الجَّرَّة شِني الكَبْرة شِنِي الكِرَّة
شنو المُحْجَان شنو العِلِّيف شنو محجِّر مشارع القيۤف ؟
حَصَل صَعَّط سَمِن كرِّيفْ
حَصَل قَطْرَنْتَ للحَنْضَلْ مِنْ المُرْكَابْ
حَصَلْ ودَّرْ شَرَابْ البُوغَة بِىۤ الهُرَّابْ ؟
حَصَل آولِيۤدْ فِي مَرَّه املّيۤتْ بِىۤ عَصِيدَة للطَّقْطَاقْ
حَصَلْ فَفْرَجَتَ لِىۤ النَرْمَط حَصَلْ زَمْبرتَ بالمَطَّاقْ
حَصَلْ شِلْتَ الوَقَار فَرَّادِي حَصَل كَضَّبتْ يُوۤمْ جَاكْ فَاقْ
شني الفُوَّامة والبُرَّامَة والنّجامة والكجّامة والمدقاق ؟
شنو اب عَرَّاق شنو السطيح تعرف الشيح واب جلّيۤح ؟
تعرف المفحضة أم سيۤرين حصل شفت المَرِيد ؤمتين ؟
حَصَلْ جَرّيتْ لُبَانْ
واللا بْتَعْرِفْ المِرْتِينْ والمِرْسِينْ
حَصَل سَاهَرْتَ بالكِتْكِيۤتْ حَصَل لبُّولَك البِركِيتْ
حَصَل فِي مَرّه اتْنَهّفَتَ واتْنَخَّجَت وانْدَقِيۤتْ ؟
حَصَلْ فِي كُدُّكَة اتْدَفّيۤتْ
حَصَلْ سِيۤتْ لَكْ سَواقِي إبْلِيسْ لامِنْ صُوۤتْ بُكَاهَا يِعِيطْ
حَصَلْ غَدُّوك بِىۤ سَبَرُوقْ
ؤحَصَل قَالُولك إنُّو الكِيۤلْ عُقُبْ للكِيۤلْ بِجِيْبلُو فْرُوقْ
حَصَل سُوۤجَرْتَلْكْ يُوۤم كُورْ واللا حَوِيَّة بى قِدْ توۤر
حَصَلْ قِدْتَ أمْ صِوۤيتْ للنُّورْ
واللا لِبِس شِقَيَّانة واللا حَفَرت للمَطْمُور
حَصَل يُوۤمْ رَسّلّوكْ لِىۤ صُورْ واللا أكلْ مُلاحْ بَرْبُور
حَصَلْ آوْلِيۤد حَوِيۤت الحًوۤر واللا دَخَلْتَ ضَهَر التًّوۤرْ ؟
ؤقُولْ لِىۤ هَا الوِليۤد أسْمَعْ
حَصَل فِي يُوۤمْ شِرِبْتَ مِحَايَة مِنْ الشِّيۤخْ
واتْبَخَرّتَ وإنْتَ نَصِيحْ
حَصَلْ سِيۤتْلَكْ عَمَارة دَحِينْ ؟
قَرِيۤتْ... تَمْتَم أبْ ؤجَزَمْ
ؤحَالَكْ يُوۤتْ لامِن كَمَّلْ الشَّلْتُوتْ
وسِط حِيۤرانْ وإنْتَ تْجُوطْ
سَبِتْ سَبُّوتْ...أحَدْ نَبُّوتْ
حِفِظْ عَمَّ ... ؤقُمْ سَمَّعْ
ؤقُولْ لِىۤ هَا الوِلِيۤدْ أسْمَعْ مَا بِنْقُولْ كَلامْ شُفَّعْ
نِحْنَ عُمَدْ عَدِيلْ فِي كَلامْنَا نِتْرَبَّعْ
وأخِيۤرْ تَقْنَعْ
حَدِيثِي مَعَاكْ كَأنُّو أضَانَك آبْتَسْمَعْ
لأنِّي عَليۤك مِتْمَكِّكْ وأنَا والله جَدْ سُودَانِي
أيْ واللهِ مَا مْشَكِّكْ
ؤنِحْنَ أولادْ تَرَاجْمَة نْجَاضْ ؤمَاكَ لَدَانَا
وأحْسَنْ تِنْقَرِعْ آوْلِيدْ ؤصَدْرَكْ لِيۤهُو مَا تْفَكِّكْ
| |
 
|
|
|
|
|
|
|
|
Re: مطلوب مترجم نجيض (Re: مجدى محمد عبد الله)
|
معروف بالحيل ومشهور متل شيخ البلد الراحل الشيخ البشرى احمدعبدالسلام
عليه الرحمة والمغفرة
الا روضة الحاج مشهورة اكتر منه وهي من نفس المنطقة
القرية كبيرة وبتقع شمال شندى جنب ديم القراي والمسيكتاب
| |
|
|
|
|
|
|
|
|
|
Re: مطلوب مترجم نجيض (Re: Ahmed Yassin)
|
Quote: معروف بالحيل ومشهور متل شيخ البلد الراحل الشيخ البشرى احمدعبدالسلام
عليه الرحمة والمغفرة
الا روضة الحاج مشهورة اكتر منه وهي من نفس المنطقة
القرية كبيرة وبتقع شمال شندى جنب ديم القراي والمسيكتاب |
سلام احمد ياسين
شكرا على الافادة
القصيدة جاتني في الواتس
الفرزتو كتير بس المافرزتو اكتر
دحين لو ساعدتنا بي معاني الكلمات تكون ماقصرت 
| |
|
|
|
|
|
|
|
|
|
Re: مطلوب مترجم نجيض (Re: مجدى محمد عبد الله)
|
Quote: ولْ لِى هَا الوِليۤدْ أسْمعْ
ؤفُوۤقْ القَالُوۤ فِيكْ بَرْضِي يَمِينْ بِاللهِ مَا بَرْجَع
حَصَـلْ فِي يُـوۤمْ
قَرَع عِشْواوِي أوْ فَجْرَاوي وِكْتِيۤن الحَمَار يِطْلَعْ
سَقِيتْ البُوغَة بالَّلبَقَة ؤمَــرَّة قْرَانْ
كَمَان كَاشَنْتَ للإنْتَايَة فِي التِّيــنَانْ
حَلَبْ جَدْوَل ضَكَر وسْخَانْ
ؤنِحْنَ كَمَـــــان نَمِسكْ الشَّافِعْ الدَّلْعَانْ
مِنْ جَضْمَاتُو ؤنْشَدِّقْ ؤبِنْفَرِّقْ بِيۤن البَهَمْ
بِنْخُتُّو جُوَّه الكَرْ سَاعْة أُمَّاتُو ِبِتْعَلّقْ
ؤقُولْ لِى هَا الوِليۤدْ أسْمَعْ
أوْعَكْ أوْعَى تِتْصَرْبـَع
حَصَل تَرْبَلت فِي قَيَّالَة بِتْحَرِّقْ
حَصَل عَلَّقْ جَخَصْ بَرَّانِي أوْ جُوَّانِي
فِي الكَرَبْ المِعَضِضْ فِيهُ قرْمَدّي ؤبِيْطَقْطِقْ ؟
حَصَل كَدْكَدتْ دُوُنْ طِرّيۤقْ
حَصَل جَرْبَنْتَ عَرَّاقِيكَ بالدِّفِيۤقْ ؟
حَصَلْ بَقَّشْتْ واللا رِمِـدْ
ؤجابُو لَكْ مِنْ المُسَّــارْ
مَلِيۤتْ عِينِيۤكْ بِقَتْ تَدْفِقْ
حَصَل مِنّ الحَفِيرْ كَرَّعْ ؟
ؤصَفِّيۤتْ مُويْتُو مِن دَغَلُوبَة
واتْوَتَحَـت قُـتَّ شبَـَعْ
رَجَعْ شَبْعَانْ وِكِتْ تَرَّعْ
ؤقًول لِى هَا الوِلِيدْ أسْمَعْ
شِنُو المِعْرِضْ.. شِنُو التِّنْقِيرْ ؟
شِنُو الإقْنِينْ... شِنُو اللاوِيۤقْ
شِنُو القُّشُّق .. شِنُو الكَاوِيۤقْ
تَعَرْفَ السَّندقيۤقْ آولِيۤدْ؟ شِنُو العَاشْمِيۤقْ |
حبيبنا مجدي .. سوف أحاول شرح بعض المفردات ذات الاصول النوبية وهي تدخل في نطاق الزراعة
وهناك عبارات رزاعية معروفة : فجراوي .. بالنوبية الدنقلاوية ( فجر تتي ) دوام الفجر للمزارع
ثم هناك ( دوكور تتي ) دوام الظهيرة .. عشاوي غير موجود في منطقتنا ولكن على سياق القصيدة
الشغل ليلاً وقت الليل .. لأن الليل بالنسبة للمزاراع زمان للنمو وخوف من الحشرات كلها تطلع بالليل
البوغة وهي بالنوبية ( كجي) : أيام الاولى من الزراعة .. نهاية السقية الأولى للتربال بعد حراثة
ورفع الحيضان ورمي التيراب (البذور) يكون المزارع قد أنجز فترة التأسيس وبعد ذلك السقي فقط
حتى الحصاد لا توجد أي متاعب .
اللبقة بالنوبية ( أوبوق ) الحاجز الطيني الذي يتحكم في توزيع المياه في الحيضان .. تفتح اللبقة
لتوزيع الماء للاحواض .. يمكن البد المجردة أو بالطورية .. حسب نوع الطين ..
الجدول الضكر وهو الجدول الرئيسي ويكون الحد الفاصل بين السواقي .. وكل ساقية لها جدول ضكر واحد
ويمثل الحد بين الحيازات ويكون إرتفاعة تقرير متر ونصف وهي موروثة في السواقي من مئات السنين
وعند بداية الموسم يتم تنظيفه وتهيئته كل شتوي يعني بعض الفيضان ..
حصل جربنت عراقيك بالدفيق .. أكبر مشكلة كانت تواجهنا زمان .. لأن الجديد من العيد للعيد ..
وموية الدفيق وهي مرحلة ما قبل القلوق .. وفي نوبيه ( دفيه ) .. وهي مرحلة من مراحل ثما النخيل
تبدأ من ( كرونفييه ، دفيه ، قلو ، قنتي ، قوبوش ، كوجكول ، سوودا ، شيو ، بتني ) إذن الدفيق
في المرحلة الثانية .. ولا بد تقشيرها قبل الأكل لأن قشرها خضراء وشديدة مرارة .. وأثناء التقشير
بالفم تتساقط قطرات من مائها على العراقي أو الجلابية .. فمن المستحيل ان تزال أبداً .. فكنا نعاقب في المدرسة
وخاصة بعد إجازة الصيف ثلاثة شهور ( من يوليو إلى اكتوبر ) بعد الفيضان
معليش حبيبنا مجدي .. دوامي إنتهي .. بجيك بكرة إن شاء الله ..
آسف للاخطاء الاملائية صدقني ماراجعت ( حتى المؤنث والمذكر .. غير الناطقين )
مودتي بلاحدود .. فنحن أمة واحدة .. من اصل واحد
| |
|
|
|
|
|
|
|
|
|
Re: مطلوب مترجم نجيض (Re: علي عبدالوهاب عثمان)
|
Quote: شِنُو المِعْرِضْ.. شِنُو التِّنْقِيرْ ؟
شِنُو الإقْنِينْ... شِنُو اللاوِيۤقْ
شِنُو القُّشُّق .. شِنُو الكَاوِيۤقْ
تَعَرْفَ السَّندقيۤقْ آولِيۤدْ؟ شِنُو العَاشْمِيۤقْ |
حبيبنا مجدي .. أنا هنا بصدد الكلمات التي من أصول نوبية كما ذكرت سابقاً ..
مفردات الساقية والزراعة وغيرها ..
( التنقير ) هي في الأصل كلمة نوبية مأخوذة من مصطلحات السواقي ..
( تي ) بالنوبية (بقر) و (قير ) الطريق .. ومقصود به الطريق الضيق بين الزراعة والجدول الضكر
ويكون مساره حتى النيل .. والبقر تسلك هذا الطريق ( تي قير ) لشرب المياه من البحر عندما تكون السواقي خارج الخدمة
وشاعرنا إسماعيل حسن قال ( ما بتحش قش التناقير ) ولدي بوست كامل في سودانيز عن رمزية قش التناقير ممكن عمنا (القوقل)
( المشق ) بالنوبية ( موشوق ) خشبة تكون بمثابة الفرملة للساقية .. كذلك ما يتم تصفيته من بقايا التمر من مشروب النبيذ والدكاي
الكاويق .. (كاو ) في النوبية معناها يجمع وخاصة القش بغرض التنظيف والترتيب .. الكاويق هو المنتج من الجمع ..
فتجد مثلا مجموعة من بقايا القصب والقش وسيقان القمح وغيره يطفح في الماء مكونة جزر صغيرة ..
أما السندقيق جزء من الساقية إذا لم تخني الذاكرة هي التروس المثبتة في الحلقات ..
العاشميق .. بالنوبية ( أشما ) الصوف المتستخرج من النخيل وهي أقوى أنواع الحبال ( حبل العشميق )
وقالت الشاعرة (( عشميق حبل وجج )) وهي تمجد أخاها .. وتصفها بالقوة والصلابة ,,
أري أن معظم الكلمات من أصول نوبية .. وهذا دليل على اننا أمة واحدة ذات قربى ..
مودتي أمجد ..
أرجو لو سمحت تغيير عنوان لأن الجميع يعتبرونه وظيفة شاغرة ولا يجد البوست الرواج .. شوف عنوان كده جذاب ..
مودتي الكثير .. لأنك اثرت فينا كوامن البحث وعد بنا إلى الأصل ..
| |
|
|
|
|
|
|
|
|
|
Re: مطلوب مترجم نجيض (Re: علي عبدالوهاب عثمان)
|
شكرا مجدي لجلب هذه القصيدة الرائعة
وشكرا مترجمنا الراقي علي عبدالوهاب على شرح المعاني وربطها بالزراعة ، فشرحك ممتع كما كنا ممتعا في شرح القمر بوبا
| Quote: شِنِي الفِرَّة... وشني الفَّرة ؟ شني كتابة وشني الطُرَّة ؟ |
أنا غايتو البيت دة رجعني سنين طويييييلة لورا فالفِرة في زراعتنا ما بتنشاف، وما تفر إلا لما تكون تحت كرعينك
أما الكتابة والطُرة فأظنها قريبة
واصل إبداعك
تخريمة:-
فعلا العنوان مس ليدينق
| |
|
|
|
|
|
|
|
|
|
Re: مطلوب مترجم نجيض (Re: حسن فؤاد)
|
يا سلام عليك يا حبيبنا علي عبدالوهاب
جزيل الشكر ياخي وواصل شرحك الممتع
لقيت مقطع صوتي للقصيدة وهو مختلف قليلا عن المكتوب
ختيت الرابط في المداخلة الاولى في البوست
لحدي اسي غيرك انت والشاعر مافي زول من الناطقين بها
عارف روحي made in china ماتجاملني ساي
دمت بخير
| |
|
|
|
|
|
|
|
|
|
Re: مطلوب مترجم نجيض (Re: حسن فؤاد)
|
Quote: وشكرا مترجمنا الراقي علي عبدالوهاب على شرح المعاني وربطها بالزراعة ، فشرحك ممتع كما كنا ممتعا في شرح القمر بوبا
|
مع التحية لحبيبنا مجدي صاحب البوست ..
حبيبنا حسن .. صدقني السودان ده المشترك الثقافي فيه بلا حدود
المفردات والمصطلحات الزراعية ، والعادات والتقاليد نفس الحبوبة نفس الوالدة نفس العنقريب
نفس الفطور والغداء والعرس والسماية والمأتم .. لولا خبث السياسة والسلطة كان يمكن لنا أن تعيش مع بعض بدون حكومة ..
الثقافة هي التي تجمع بدل الحوار الوطني ده كان مفروض حوار ثقافي .. لنتوحد تحت المتشابه وهو الغالب الأعم ..
مودتي حسن .. وشكراً على الكلمات الجميلة .. فأنا محب للتراث النوبي .. لأنني لم أخرج من الحاضنة النوبية إلا إلى عالم الاغتراب
وهنا حملنا الوطن معنا في الجمعيات والتجمعات ..
مودتي لصاحب البوست مجدي ..
| |
|
|
|
|
|
|
|
|
|
Re: مطلوب مترجم نجيض (Re: علي عبدالوهاب عثمان)
|
Quote: شِنُو الرَّحَل التّفرغْ عِيۤنُو للمَارُوۤق
ؤقولْ لِى هَا الوِليۤدْ أسْمَعْ
تَعَرْف الكنْدَرَة أُمْ غُوشَـة ؟
تَعَرْف الكِتْرَة بِى عرُوشَة
شِنُو العَمَيُوقْ شِنُو التُّوۤرِيۤقْ
شِنُو الحُمْبُك شِنُو الحُمّيۤضْ شِنُو اللُّصيۤقْ ؟
ؤقُولْ لِى هَا الوِليۤدْ أسْمَــعْ
حَصَل صَنْقَرَت فُوۤقْ مُشْرَعْ
ؤمَا لِقِيتْ مَعَدَى بِى غَادِي والرَّوَّاسِي اتْمَنَّع
ؤلفِّيۤتْ الهِّــدُومْ فِي الرَّاسْ
نَزَلْتَ طِمِيّة مِنْ القِيۤفَة ﭽُبْ تَبْلَعْ
ؤقًولْ لِى هَا الوِلِيۤد أسْمَـعْ
تَعَرْف الكَـجْ واللالْويۤـبْ؟ |
حبيبنا مجدي .. قصيدة في غاية الاهمية لأنها بصراحة توثيق ..
وفخر وإعزاز بوسائل الانتاج والمكون الإقتصادي الذي يدفع الشعوب إلى الامام
هي ليست فخر شوفيني مثل قصائد الحماسة ( سيف وقتل وترويع ... إلخ )
فهذا الشاعر الرائع يتفاخر بأدوات الانتاج والعمل والأمن الغذائي .
هذا ما نريد أن نقود إليه وطننا وشبابنا بعيداً عن السلاح وقطع الرقاب وسفك الدماء ..
سوف آتي إلى شرح بعض المفردات التي من أصول نوبية في المقطع أعلاه ..
فوق .. راجع ..
مودتي مجدي .. إحتمال أن يطول المشوار مع هذا الرائع ..
بوست إستراحة ..
| |
|
|
|
|
|
|
|
|
|
Re: مطلوب مترجم نجيض (Re: مجدى محمد عبد الله)
|
Quote: شِنُو الرَّحَل التّفرغْ عِيۤنُو للمَارُوۤق
ؤقولْ لِى هَا الوِليۤدْ أسْمَعْ
تَعَرْف الكنْدَرَة أُمْ غُوشَـة ؟
تَعَرْف الكِتْرَة بِى عرُوشَة
شِنُو العَمَيُوقْ شِنُو التُّوۤرِيۤقْ
شِنُو الحُمْبُك شِنُو الحُمّيۤضْ شِنُو اللُّصيۤقْ |
مع التحية حبيبنا مجدي ..
( الماروق ) السماد البلدي مثل فضلات الحيوانات وأحياناً الرماد ..
وهناك سماد آخر طبيعي أنتقل لنا في الشمال من الصعايدة في مصر
يتم جمعه من سطح التربة المالحة التي تخرج من الأرض تلقائياً (نز)
وبالنوبية ( مارو ) وتمت اضافة حرف ( القاف ) للتنغيم بالعربية كما العادة في كثير من المصطلحات
العميوق نوع من أنواع الحشائش سمعت بها لدى أخوانا المتحدثين بالعربية في الشمال ..
التوريق ( من مكونات الساقية ) وبالنوبية ( توريه ) وكالعادة إضافة القاف بالعربية ..
من الاجزاء المهمة جداً في الساقية .. ويعتبر التوريق ناقل للحركة من الحلقات إلى القواديس ( إسي كاق)
ويعتبر التوريق قمة التكنولوجيا لأنه يحول الحركة الطولية إلى عرضية وفي شكل مربع وليس دائرة كعمود السيارة
وطول التوريق حوالي ثلاثة أو أربعة أمتار حسب حجم الساقية .. وصناعة التوريق يأخذ الكثير من الوقت من البصير صانع الساقية ..
والبقرة في بداية تمارينها لقيادة الساقية تعاني من الانسجام مع التوريق لأنها تتخطاه في كل دورة ..
شكراً مجدي .. ومودتي ..
نواصل ...
| |
|
|
|
|
|
|
|
|
|
Re: مطلوب مترجم نجيض (Re: علي عبدالوهاب عثمان)
|
Quote: : شِنِي الفِرَّة... وشني الفَّرة ؟ شني كتابة وشني الطُرَّة ؟
أنا غايتو البيت دة رجعني سنين طويييييلة لورا فالفِرة في زراعتنا ما بتنشاف، وما تفر إلا لما تكون تحت كرعينك
أما الكتابة والطُرة فأظنها قريبة |
سلآم للجميع .
شكراً مجدي لإشراكنا في القصيدة والتي تعتبر قاموس كامل الدسم لا فيهو شق لا فيهو طق،
الشكر موصول للشاعر الفحل الذي قام بهذا التوثيق، ولا يفوتني ان اشكر أُستاذنا علي
عبد الوهاب علي الشرح الوافي .
حسن فؤاد تب ما قصرّت، الفِرّة طائر يكون قانص علي ظهر الأرض واوّل ما تجي جنبو
يطير مُحدث صوت يثير الفزع بجناحيه . بعدين عارف يا حسن، الفِرّة دي فآرا بعيد مِن
الطُرة والكتابة، يعني المعني ما ليها علآقة بيهِن نهائي . زمان كانت العُملة المعدنية اكبر
حاجة فيها الريال واسغر حاجة فيها التعريفة، ودايماً وجه بيكون فيهو كتابة، يعني مثلاً
تلقى مكتوب خمسة قروش فوق الشِلِن ؤُ عشرة قروش فوق الرِيال . أها، الصفحة الفوقا
الكتابة دي بيسموها كتابة، والصفحة التانية عادةً بيكون فيها رسم ساعي البريد راكبلو جمل
دي بيسموها الطُرّة ؤُ دا في لعب الميسر، يقولك ارحكاكَ نلعب طُرّة كتابة، وفي اللعبة
اللآعب بيجدع العملة في الهواء بطريقة حلزونية ويختفا بسرعة ويجعلها ما بيدين راحة
إيدو والوآطة، ؤُ يقولك طُرّة واللآ كتابة ؟، اها كان نقرتها بتربح وكان ما نقرتها بتخسر .
| Quote: بالنوبية ( أشما ) الصوف المتستخرج من النخيل وهي أقوى أنواع الحبال ( حبل العشميق ) |
يا علي ياخي النخلة حاكت الغنماية بتجيبلها صوف ؟،
لِيّف يا علي والليف يستعمل ايضاً في عرش البيوت، ؤُ بيسونو
حبوباتنا مصفي للجبنة، الجبنة بيحشولآ لِيّف في خشّما عشان
التِفِل ما ينزل في الفُنجان .
Quote: شِنُو الرَّحَل التّفرغْ عِيۤنُو للمَارُوۤق
ؤقولْ لِى هَا الوِليۤدْ أسْمَعْ
تَعَرْف الكنْدَرَة أُمْ غُوشَـة ؟
تَعَرْف الكِتْرَة بِى عرُوشَة
شِنُو العَمَيُوقْ شِنُو التُّوۤرِيۤقْ
شِنُو الحُمْبُك شِنُو الحُمّيۤضْ شِنُو اللُّصيۤقْ |
الرحل عبارة عن قُفتين لنقل الأشياء، وبتوضيح اكتر الرحل يُضفر من سعف النخل يكون عبارة عن
قفتين في شكل الصبّابة، يعني شكل حلزوني يُترك فاتح من الجزء الرقيق فيه ويتم قفل هذا الجزء بخرقة
ويوضع بجنبتي الحمار، ؤُ لآمن تجي تفضي الماروق أو التراب بتزيل الخِرقة والماروق أو التراب
بينزل من الرحل، عن طريق الفتحتين وهِن العينين اللآت الرحل .
الكندرة دي ظنيتا البروِد، والغُوشة ظنيتا الخُشة، ؤُ ما تسعلُوني من معناهِن . تراني جازمتكُن .
الكِترة، أظن نبات الكِتِر معروف للجميع .
قال الحاردلو في مسدر الصيد،
أب عراق فتق قرنو المبادر شره
والباشندي عمت مهششيب الدره
وعروش الكِترة نبات يلتف حول نبات الكِتِر له زهرات لها رائحة جميلة هي المهششيب .
العميوق ونسميه المعيوقة، نبات تأكلة الغنم وكان كتّرت فيهو بيعمل لها زَرّقة .
الحُمبُك، ثمر الطُنضُب . لا تسعلوني من الطنضب .
الحميض نوع من النبات وكذلك اللصيق ونسميه اللِويّس وهو نبات متسلق كنا نتمبك
عيدانه في زمن الجهل، ؤُ يا حليل زمن الجهل يا قول الغناي .
الظاهر عصرت عليكم ...
| |
|
|
|
|
|
|
|
|
|
Re: مطلوب مترجم نجيض (Re: معاوية المدير)
|
Quote: حَصَل صَنْقَرَت فُوۤقْ مُشْرَعْ
ؤمَا لِقِيتْ مَعَدَى بِى غَادِي والرَّوَّاسِي اتْمَنَّع
ؤلفِّيۤتْ الهِّــدُومْ فِي الرَّاسْ
نَزَلْتَ طِمِيّة مِنْ القِيۤفَة ﭽُبْ تَبْلَعْ |
حبيبنا مجدي ..
المشرع .. عبارة عن مسرح فضائي مفتوح على خلفية النيل والخضرة .. مكان إنتظار الركاب ..
وقد رسم الشاعر صورة رائعة وممارسة كانت فيها نوع الرجولة والاقدام ..
وأحسن من صور المشرع بالكلمات هو حميد رحمه الله في قصيدة عم عبدالرحيم ..
ومركب المشرع لديها قوانين وسنن ولوائح يعرفها الريس تماماً .. ولا تغيب المركب إلا بعذر مقبول
مثل صيانة أو تلف يجب إصلاحه ..
وكانت هذه ممارسة تتم من الشباب .. أحياناً عند غياب الريس .. وحتى لا يتأخر الناس بالضفة الاخرى
كان شاب يذهب إلى ضفة الأخرى سباحة ثم يعود بالمركب لمن هم بالمشرع ..
ومرات عندما الواحد يسمع زغاريد بالبر التاني او صوت صفقة ورقيص وخاصة في الليالي ..
يلف ملابسه في الراس ويسبح للضفة الثانية .. وشاب زي ده كان يمثل دور بطل في الحفلة
وكان يتباهي في الصباح بهذه المغامرة .. والبحر طبعاً معروف لكل واحد وخاصة قصاد قريته
الواحد كان حافظ كل تفاصيل النيل مكان العمق والضحل والشوك والشيمة .. الخ
صورة رائعة والشاعر متمكن ..
مودتي مجدي ..
| |
|
|
|
|
|
|
|
|
|
Re: مطلوب مترجم نجيض (Re: علي عبدالوهاب عثمان)
|
Quote: حَصَل شُفْتَ الرَّضِيَّة تَخُشْ
تَهِزْ سِعْنَاً مَلانْ بِالرُوۤبْ ؤمَرَّة تَرُشْ
مَعَلَّقْ فِي كَشَمْبِيرْ مِنْ حَطَبْ مَقْلُوبْ
حَصَلْ قَالُوۤلكْ إنُّو الكُورْ بِجِيب القُوبْ
تَعَرفْ الفَرْيَة والسِّمْبِيسَة والنّبِيتْ |
حبيبنا مجدي .. صدقني كلما الواحد عايز يعيش البلد يرجع إلى هذه القصيدة
وأنا منبهر جداً من هذا الشاعر الموثق البارع ..
في الأبيات التي أخترتها فضلت أن أختار هذا المسمى الذي ربما يكون إنقرض
نهائياً وأعاده هذا الشاعر الهمام هو مصطلح ( كشمبير ) وأصل الكلمة من النوبية الدنقلاوية (شاكمبيل)
وهذا يتم تركيبه من ثلاثة خشبات في شكل هرمي تلتقي نهايات الثلاثة أخشاب في القمة وهنا يتم تعليق السعن ..
والسعن بالنوبية ( بينج ) .. ومسمى ( شاكمبيل) مشتق أصلاً من الفعل ( شاكم ) بالنوبية يقابلها بالعربية ( يخج .. يرج) وسبحان الله
نفس معنى كلمة shake اللغة الانجليزية ( وكأصوات وحروف متقاربة مع بعض ) .. ولا يمكن إستخراج الفرصة أو السمن من الحليب إلا بالخج
أو بالنوبية ( شاكم ) shake .. مثلا يقوليك بالانجليزي ( shake it before use ) ( خج او رج قبل الاستعمال)
بالدنقلاوية ( دواء شاكم ) او خج الدواء ..
وفي بعض الاحيان إذا حصلت ملاسنة بين الحريم تصف الواحدة أختها ( بأن قوامها مثل .. شاكمبيل ) لأن منظر( الشاكمبيل )
فيه قبح ( ربما بالعامية العربية وأنا لا أجيدها .. الرجلين المكلوجات ) ..
حبيبنا مجدي .. شكراً على هذه السياحة والردة إلى الماضي الجميل ..
معليش الشرح بالعربية صعب جداً .. عذراً ..
| |
|
|
|
|
|
|
|
|
|
Re: مطلوب مترجم نجيض (Re: علي عبدالوهاب عثمان)
|
Quote: دِي الأكَلُوهَا دِي القَاوَالَة والوَرَّاد وَرَدْ مَا جَا
شِنُو الكُرَّادْ واللا أكَلْتَ يُوۤمْ كَدَّادْ |
حبيبنا مجدي .. شكراً على البوست التوثيقي ..
( كداد ) .. بالنوبية ( كوداد ) .. وهي من أكلات التقليدية .. إندثرت في بعض المناطق
ولكن عندنا في قرى ما زالت على الموائد .. ولكن حسب الطلب مرتين ثلاثة في السنة
ونحن هنا في الاغتراب (جدة) أحياناً نأتي بمكوناته مجففة .. وأهم مكون هو ( تملييه ) بالنوبية
ربما لدى أهلنا الشايقية ( تملييق ) حسب التصريف وتنغيم المتبع في المفردات النوبية ..
كان زمان يتم طبخه ( تملييق + نبتة تسمى الكلانج ) .. والكلانج ( الرجلة البرية ) نفس نبات الرجلة
فقط الرجلة سيقانها خضراء والكلانج سيقانها حمراء وهي نباتات صيفية تنبت داخل أحواض الذرة
وهي نبتة مشبعة بالسوائل (الماء) .. وتقدم للبهائم ضمن القش .. ولكن بعد أن يتم تجفيفها قليلاً ..
لأن إذا البهيمة تناولت منها بكثرة يؤدي إلى النفوق ( قق gag بالنوبية ) وخاصة النعجة لأن معاييرها مختلة وبها شراهة زائدة
وطبيخ ( الكداد ) هو إختبار قاسي للمرأة ومدى معرفتها بفنون الطبخ .. لأن طبيخه يتم بدون لحم ..
ويعتمد على الكميات والخلطات والمقاديير .. فبعض الحريم يتحاشى الدخول في هذه التجربة أو تستعين بإخواتها سراً ..
والكداد مفيد للصحة .. رغم أننا عندما في مقتبل العمر لم نكن نحبه .. فهي وجبة لكبار السن ..
مودتي مجدي .. نواصل مع إختيار المفردات من اصول نوبية ..
| |
|
|
|
|
|
|
|
|
|
Re: مطلوب مترجم نجيض (Re: علي عبدالوهاب عثمان)
|
عزيزي الفاضل مجدي محمد عبد الله
اولا احب اقول ليك انا دخلت البوست بنصيحة من اخ كريم
وابن اخ كريم اعجب كثيرا بهذا البوست والشعر البلدي التوثيقي
لعادات وثقافة قائمة بذاتها واراد ان يشركنا في الاستمتاع بهذا
السفر الرائع ...والشكر له كثيرا..
ولكن وبصراحة قريت القصيدة مرتين..وما قدرت افهم غير الربع...
ولكن وبعد مراجعة شرح الاستاذ النوبي علي عبد الوهاب قدرت
افهم نص القصيدة...
واتصلت يالعزيزة اميرة بت السيد وهي في وعكة صحية خفيفة
وهاجرت من نيويورك الى كاليفورنيا منذ فترة طويلة لقضاء فترة
نقاهة مع اختها..ونصحتها تقرا البوست وتدينا رايها...ووعدت بانها
ستقرا القصيدة وتقوم بالتعليق المناسب.....
وطبعا انا متاكدة انها ستقوم بشرح المزيد من الكلمات النوبية..واظن
الاستاذ علي عبد الوهاب ما قصر وشرح كل او معظم الكلمات والمصطلحات
الصعبة....
راجعة ليكم بالمزيد حول هذه القصيدة البلدية الريفية البدوية والتي تعطينا
شرح كامل لثقافة..او قل لحضارة كاملة....وهذا ادب رفيع نلتمس فيه ثقافة
شعوب وعاداتها....
ودمت بالف خير وصحة وعافية
بسمات
| |
|
|
|
|
|
|
|
|
|
Re: مطلوب مترجم نجيض (Re: Basamat Alsheikh)
|
(حَصَل كَدْكَدتْ دُوُنْ طِرّيۤقْ
حَصَل جَرْبَنْتَ عَرَّاقِيكَ بالدِّفِيۤقْ ؟
حَصَلْ بَقَّشْتْ واللا رِمِـدْ
ؤجابُو لَكْ مِنْ المُسَّــارْ
مَلِيۤتْ عِينِيۤكْ بِقَتْ تَدْفِق)
يا الله !!!!!!
دي مش قصيدة !
دا متحف للتراث ومفردات اللغة الحميمة ,
وأسماء لأشياء كثير منها ااندثر !
ملحوظة:
أغلب ما ورد في القصيدة كان يدخل في تواصلنا اليومي كأسرة ,
تظل هذه القصيدة ضمن أجمل ما قرأت على الاطلاق .
والاحترام والشكر لصاحب البوست الذي أورد لنا هذا الجمال.
ست البنات.
| |
|
|
|
|
|
|
|
|
Re: مطلوب مترجم نجيض (Re: ست البنات)
|
Quote: حَصَل قَيَّلَتَ فِي رَقْـرَاقْ
فِي السَّلَم المَطَارْقُو رُقَاقْ
شِني الفَرْوَة.. وشِنِي المُخْلا
شِنِي المَلالَـة والمُطَّالَة
شِنِي العِدْلَة...شِنِي الفَقْلَة
شِنُو البَرَبنْدِي والخَنَّاقْ |
الرقراق .. الظل الغير مريح .. الظل الذي يتخلله أشعة الشمس ..
مثال راكوبة يكون سقفها فراغات أو ظل نيمة أو نخلة بها فراغات تسمح لأشعة الشمس ..
فعلاً الرقاق غير مريح في فصل الصيف ولا يمكن أن ينام فيه الشخص ..
البربندي .. وتد مصنوع من السيخ .. على شكل الحرف (9) يربط فيه الحمار ..
والبربندي .. حصري للحمير .. وكان زمان نوع من المظاهر .. لأن وتد الخشب لا يمكن أن تحمله معك في أي مشوار
ولكن وتد الحديد ( البربندي ) يمكن ان تستخدمه بدل العصاة .. وعند وصولك إلى المشوار من سهل غرزه في الأرض
ومنظره كان سياحي ومقبول أكثر من الوتد .. وكان من مكمل الشخصية والاناقة .. مع السرج الاحمر الجميل ..
وحبل الشعر المضفور والقلادة الحمراء من العشميق الناضر .. واللجام ( للحمار) ويستخدم للذكور فقط ( الحمارة ) ما تحتاج لجام
لأنها هادئة والمتزنة في سلوكها .. وأحياناً ولزيادة التميز كان هناك الفروة فوق السرج .. كان زمان أولاد العمد والمشايخ
هم أصحاب الحمير المميزة ..
أجمل قصيدة قرأتها في حياتي ..
التحية لصاحب البوست ..
| |
|
|
|
|
|
|
| |
مجدى محمد عبد الله
Ahmed Yassin
علي عبدالوهاب عثمان
حسن فؤاد
معاوية المدير
ست البنات
فيس بوك
تويتر
انستقرام
يوتيوب
بنتيريست