|
|
|
 Re: قصتنا مع جراح عظام بكوستي (Re: عبدالحفيظ ابوسن)
|
تعرض شقيقي زوجتي لكسر في غطاء الركبة جراء انزلاقه في الشارع.
وهو شاب ورياضي
ذهبنا به لطبيب العظام بكوستي . وقرر اجراء عمليه له . وحددها بعمل مسطرة . سألته مستفسرا
العملية وين
بإعتبار ان نسيبي له تأمين صحي
ارشدني لمستوصف
مستبعدا تلميحا اجراءها في مستشفي بلفظ طبعا المستشفي حكومي
المهم حسب قوله
ان العملة بسيطه بعد ان شاهد صورة الاشعة . كسرين سيتم ربطهن بسلك .
اعطانا ورقة للمستوصف . ودخلت مع مالك المستوصف في مفاصلة وكان رجلا فاضلا خفض ربع القيمة .. وقال لي
الا المسطرة الدكتور كاتبها بي 600ج ! ودي ماعندي معاها سكة تخفيض
اجرينا العملية .
وللاسف بعد 40 يوم لم يستطع نسيبي ثني ركبته .
ذهبنا له وقرر ان يمرنها له تحت البنج
وايضا في المستوصف بمبلغ 500 ج
وضعه تحت البنج الكامل . وحين خرج من المستوصف . طلب منا تحويله للخرطوم
وقال
انا اتصلت علي جراح هناك تمشو ليهو وكتبت ليهو جواب
وفعلا ذهبنا وتم عمل مسامير وجبص
سؤالي لاطباء المنبر
هل يتم عمل تمارين تحت البنج الكامل
هل يتم التحويل بواسطة خطاب ليس فيه تفاصيل الحادث وماذا فعل هو ولماذا حولنا
| |
 
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
قابلته بعد التمرين الذي قاله وطلب منا تحويله للخرطوم
ما كنت حاضر التمرين . ففي بالي هو فيزوسيربي عادي
لكن حين وصلت المنزل لقيت الجو كئيب كانو بيت بكا
وما فهمت شي . مشيت ليهو في عيادتو وبدا ممتعضا لحضوري
وقال لي
الامر بسيط هي كراع بس مافيها مشكلة وانا شرحت الناس قبيل
قلت ليهو متمالكا نفسي
بس انا مافهمت فهمني
قال لي في الصورة شفت كسرين ولامن خشيت لقيتهم تلاتة . اجتهدت اربطهم وهسة لامن عملت التمرين ! لقيت في رباط فك
وانا حولتكم الخرطوم لي زول بساعدكم !
ودي حاجة عادية ومعروفة في الكسور
فهل صحيح ان دي حاجة عادية
هل ممكن ان يخطي جراح عظام في قراءة صورة اكس راي
ومش مفروض يكلمنا انو وجد 3 كسور بدل اتنين
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
ماهي حدود ال medical ethics
في تمليك المعلومات من الطبيب للمريض
ماهو حق المريض عند الطبيب
أليس من حقه ان يشرح له باستفاضه عن مرضه عن عمليته عن مخاطرها .
قد ينظر الطبيب للعائد المادي فقط .. في حالتنا هذه صرفنا حوالي 5 مليون وقد تصل 6 .. وينظر المريض لصحته غير عابئا بالمال . تهوين العملية
ثم الحديث عن مشاكلها لدرجة ان يسافر للخرطوم من كوستي لا يأتي الا لاحقا
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
سلامات يا عبد الحفيظ و تمنياتي لنسيبك بالشفاء العاجل
ساجيبك في ما يتعلق بالجانب الاخلاقي و الالتزام المهني الذي يحكم العلاقة بين الطبيب و المريض.
من حق المريض أن يعرف طبيعة مرضه او اصابته و خيارات العلاج و نسبة نجاح كل منها و الاثار
الجانبية المتعلقة بها. و من واجب المريض أن يشرح كل هذا بصراحة و بدون مواربة او اخفاء
لاي جانب من الجوانب. و من حق المريض أن يتأكد من قدرة الطبيب على القيام بالتداخل العلاجي
المقترح و انه يمتلك المؤهلات و الخبرة اللازمة.
موافقة المريض على خطة العلاج حق اصيل من حقوقه و هذه الموافقة يجب أن تستند على امتلاك
كافة المعلومات الضرورية التي تمكن المريض من اتخاذ قرار الموافقة fully informed consent
في السودان نتعامل مع هذا الجانب بخفة و لا نوليه الاهتمام اللائق و انا لا اعرف مدى المسؤولية
القانونية في هذا الجانب و لكن في بقية ارجاء العالم هذه مسألة مهمة و على درجة عالية من الاهمية
في الولايات المتحدة مثلا هذا الأمر عالجته المحكمة العليا supreme court نفسها.
| |
|
|
|
|
|
|
|
|
Re: قصتنا مع جراح عظام بكوستي (Re: سيف النصر محي الدين)
|
6 مليون في كوستي .. ثم 7 مليون في الخرطوم
غير مصاريف السكن والاكل والترحيل .
قرابة ال 15 مليون
ودي واحدة من الاسباب للاسف بتخلي الناس تمشي برة للعلاج
زي ما نصحني صديق اي علاج بكلفك هنا 3 مليون امشي مصر حا تصرف اقل منو وتتفسح وتجيب بضاعة تغطي خسارتك
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
مرحبا سيف
وحبابك
كنت اتوقع ذلك . تعرف يا دكتور معظم اصحابي اطباء اختصاصين هنا في السودان والخليج واوربا . اضف ان لدي شقيقين اطباء .. وبنتي تدرس الطب .. لكنك اضفت لي معلومة محكمة .
اصدقائي من ذلك الجيل السمح .. وهم زاتم ناس سمحين . سماحة المهنة المربوطة بالانسانية قبل تحرير العلاج
سأعود
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
Quote: و من واجب المريض أن يشرح كل هذا بصراحة و بدون مواربة او اخفاء
لاي جانب من الجوانب |
هنا قصدت : من واجب الطبيب و ليس المريض.
شكرا يا عبد الحفيظ: الزول ده حتى في التحويل مفروض يحدد اسبابه بدقة و ليه عملو
و ما الفائدة منه ثم هو يجب أن يتحمل جزء من التكاليف على الأقل.
قوانين الرعاية الصحية الجديدة في امريكا المعروفة باوباما كير Obama Care تفرض غرامة على المستشفيات
في حالة اعادة ادخال المريض Re-admission خلال فترة 30 يوم.
| |
|
|
|
|
|
|
|
|
|
Re: قصتنا مع جراح عظام بكوستي (Re: سيف النصر محي الدين)
|
تشكر دكتور سيف
نحن ناس بسطاء وسهل التعامل معنا لدرجة السذاجة .
اخبرنا الدكتور ان العملية بسيطة جدا . بنربط الطاقية بي سلك . وانصرف ذهننا لفتق القماش ! الامر بسيط
بعض الاصوات طالبت بذهابنا للخرطوم من البداية . لكن لحسابات كتيرة فضلنا نعملها في كوستي . واصلا العملية بسيطة وسهلة .
فهل هذا يعد تضليلا لنا بتسهيل العملية وهوانها .
في الحياة العادية نستهين بالمصائب ونقلل من خطورتها . كسبا للاجر . ولكن اعتقد ان هذا لا يجوز حين اتعامل مع جهة فنية
وكما اسلفت انت يا صاحب في ردك يجب ان احيط علما بكل تفاصيل العملية . وتعقيداتها .
بالاضافة يا دكتور سيف الا يجب ان نعلم بما حدث بعد العملية مباشرة
وثم نأتي للتمارين تحت البنج الكامل .جنرال اناسيسيا
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
من اهم مشاكلنا في السودان طبيا
التخدير العام
وكم عملية نجحت تقنيا ولكنها فشلت جراء التخدير وتسببت في موت المريض .
بل ان بعض الناس يرفض اجراء عملية لا تهدد حياته ان كان سيتعرض للتخدير العام
قبل ان اعرف هل يوجد اخصائي تقدير بكوستي . اقول مطمئنا ان التخدير كان يقوم به ممرضين لهم خبرة طويلة في التمريض . براميدكال . وتعارف علي تسميتهم ب محضر عملية
فهل تعريض مريض للتخدير العام دون شرح ذلك له يعد خروجا عن المهنية دعك عن الميديكال ايثكس ؟
وهل يا دكتور سيف يوجد ما يسمي ب تمرين تحت البنج
اقصد
اقصد اكسيرسايس اندر جنرال اناسيسيا ؟
ام ان الامر ليس بتمرين . بل هو استكشاف تحت البنج واظن له تسمية حسب ما اسمع من اصدقائي الاطباء
وهل هذا الامر ان وجد يتحمله المريض بكلفة 500 ج
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
نعم يا حفيظ البنج العام يجب أن يكون موضوعا من الموضوعات التي تناقش مع المريض و تبيين
مخاطره و بدائله و ضرورته إن كان ضروريا.
بالنسبة لتحريك الركبة تحت تأثير البنج العام هذه تعرف بــKnee Manipulation under General Anesthesia
و هي ينصح بها لمعالجة التيبس stiffness الذي قد ينشأ بعد عمليات الركبة او منظار الركبة. و لكني بصراحة لا اعرف
متى بالتحديد يجب على الجراح أن يلجأ اليها (how soon). ما شاهدته هنا في الولايات المتحدة و التي يمارس فيها الطب المبني على البراهين
بصورة كبيرة هو أنهم لا ينصحون حتى بالعلاج الطبيعي بعد عمليات المفاصل و ينصحون فقط بالحركة العادية و الدراسات
اثبتت أنه لا فائدة من العلاج الطبيعي بعد هذه العمليات بل أنه قد يكون مضرا و ينصح به فقط في حالات أن يصاب
المريض بالتيبس فعلا.
رأيي هو : ربما أن الزميل ليس متأكدا من الذي فعله و يبدو أن لا احد معه هناك ليستشيره. عموما اذا كانت المسألة فقط كسرا
في الKnee cap و ليس هناك اي قطع او اصابة في الاربطة لا اعتقد أن مشكلة كبيرة ستحدث و سيتعافى المريض
تماما مع الوقت. يا ريت معنا جراحين عظام هنا لنسمع منهم.
| |
|
|
|
|
|
|
|
|
|
Re: قصتنا مع جراح عظام بكوستي (Re: سيف النصر محي الدين)
|
تشكر دكتور سيف
تشكر يا صاحب
لقد كنت مفيدا جدا
الميديكال ايثكس او الاخلاق الطبية . وقسم ابقراط وكل ذلك يخص الاطباء . وقد كان قديما قبل مجلس التخصصات الطبية السودانية . الذي يتعامل مع الطبيب الذي يريد التخصص كطالب مربوط بزمن .. قد يكون اضر بالتخصص
زمان الطبيب بمتحن بارت تو اظنو ويخش الروتيشن لي فترة مربوطة بإمكانيات الطالب ثم يمتحن . هذه الفترة تطلب التفرغ التام للتخصص واكتساب الخبرة والاحتكاك باساطين الطب . فيتعلم الطب والاخلاق الطبية !
وكيفية التعامل مع المريض .
نحن كسودانين لا نستكثر المال في العلاج . ولا نفاصل لثقتنا المطلقة في الاطباء . استغل تلك الميزة بعض الاطباء من عديمي الحس المهني والاخلاقي والانساني والديني . فأستغلوا المرضي . تزامن ذلك مع تناقص الخبرة المهنية . فكأنها معادلة .. وكما يقول شقيقي احمد .. العلم نور من الله . من كان صادقا في توجهه ومهنته فتح الله عليه ووفقه
المال شحيح يا صاحبي شحيح جدا
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
يا سلاااام يا صاحب
تشكر يا سيف ياخ
الرابط مهم جدا جدا . شرح لي حالة نسيبي بالتفصيل الدقيق
مما استلفت انتباهي
التدخل الجراحي وزمنه . يعني ما طوالي الزول وقع دخلو عملية . نسيبي خش عملية بعد تقريبا 9 ساعات . وهنا بقول التأكد لانو عضلات الفخدة قوية جدا ممكن تسحب قطع الباتيلا المكسرة وتفشل العملية
وبرضو الملاحظة التانية . الحركة وزمن الشفاء . هل تصدق نحن ما كنا عارفين هل يتحرك ولا لا ؟ ما كان في توجية واضح لينا . اعتمدنا علي خبرات المعايدين بس . امشي لا ما تمشي
وبرضو حكاية الفيزوسيربي دي جيدة بتفيدني جدا كمعلومة
عموما بدون محاولة تلخيص للرابط اشكرك جدا والله
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
أزيك يا عبد الحفيظ وعساك طيب ..
ربنا يكتب الشفاء لشقيق زوجتك ويواليه بالعافية ..
نقول يا حفيظ قدر الله ومشاء الله فعل ..
لأوضاع البلد كان من الأفضل الذهاب به للخرطوم مباشرة وفي الخرطوم البحث عن من هو مؤهل لإجراء العملية حتى لو كانت بسيطة ..
في العام 2007 يا صديقي قررنا نعمل عملية تغيير مفصل في الركبة اليمين للوالدة نتيجة للاحتكاك والآلام التي كانت تعاني منها.
كانت أقوال الأطباء الذين قابلناهم في الخرطوم أن العملية تكلف ثلاثون مليون وقتها وذلك من غير أتعاب المكنكة .. أي والله يا حفيظ من غير أتعاب شغل اليد
وما يتبعه من شاش وغيره .. بل وصل الأمر بأحدهم أن قال فترة الضمان لهذا المفصل ثلاث سنوات .. يعني المعنى بعد ثلاث سنوات ما ترجعوا تقول لي
العملية حصل فيها كيد أو كيد .. شفته كيف ..
المهم طلعنا على القاهرة ومن أجرى العملية شاب متخصص في منتصف الأربيعنات من عمره .. وضحك كثيرا حينما قلنا له عن موضوع الثلاث سنوات للمفصل
ورد بتهكم المصريين يا عم هي أتوبيس ولا ركبة ..
المهم يا حفيظ الحمد لله تمت العملية وبتوفيق من الله ثم من الطبيب .. والوالدة ربنا يحفظها ويديها العافية في أمان الله والركبة زي الفل ما شاء الله.
معذرة للتطويل ياحفيظ ولكن في حكي بعض التجارب فوائد .. كما استفدنا أيضا مما أورده الدكتور سيف له الشكر أجزله.
وقبل أن أنسى يا حفيظ من الناحية المالية كانت التكلفة في القاهرة نصف ما كانت عليه في الخرطوم وذلك شامل التذاكر للوالدة وشقيقي وشقيقتي وإيجار شقة لمدة شهر بالقاهرة .
تحياتي
| |
|
|
|
|
|
|
|
|
|
Re: قصتنا مع جراح عظام بكوستي (Re: مجاهد السوباوي)
|
ربنا يكتب الشفاء لقريبك يا ود أب سن
السؤال المفروض ينطرح
هو ليه المريض أفضل ليه (مادياً وصحياً) يمشي مصر، رغم إنو سفر وبعيد وفيهو تذاكر وفنادق
بعد دا ليه يكون أجدى ليه يسافر برة السودان ؟؟؟
في رأيي المتواضع إنو مفروض يقفلوا كل كليات الطب في السودان والتعاقد مع أطباء من الهند أو الفلبين مباشرة
والداير يقرأ طب ويجي يضبحنا يمشي يقراهو برة ويشتغل محل ما عاجبو
حقو الدولة ما تكلف نفسها عبء طالب طب عشان في النهاية يتخرج طبيب فاشل وبليد يتعلم الحجامة في قفانا نحن اليتامى
وبعد دا يتعامل معاك بمنتهى الجشع والاستغلال
ياخي أطباء العظام ديل والله بالذات مفروض الزول أصلو ما يمشي عليهم
يشوف ليهو أقرب بصير ويمشي عليهو وينتهي من القصة دي خاصة إذا كانت المشكلة صغيرة
تحياتي مثنى وثلاث ورباع
| |
|
|
|
|
|
|
|
|
|
Re: قصتنا مع جراح عظام بكوستي (Re: بدرالدين بابكر مصطفى)
|
مرحبا مجاهد
وحبابك
ربنا يدي الوالدة العافية ويطمنكم دوما عليها
دي الاشكالية البتخلي الناس تبحث عن العلاج خارج البلد . وفي نفس الوقت بتحول الطبيب لي تاجر . بدل يفكر يشخص مرضك يفكر يملصك كم وتروح انت
اسعار الغرف في المستوصفات اسعار فنادق مية نجمة ! مش خمسة نجوم . خدمة التمريض متدنية .. الدكتور لو جاك الصباح بكتبو في حسابك زيارة بالشي الفلاني ويختوها ليهو في حسابو .. وتدفع انت حتي لو عاين ليك ساي
المستوصف برضو بدفعك فحوصات بسعر يفوق سعر السوق وكلو في الفاتورة .
وبعد دة كلو اريت مريضك يطيب .
واضح جدا من نوعية عربية الطبيب وعمره ان تري كم يكسب من مرض وثقة الغلابا المتعبين
كما ذكرت لك اعلاه معظم اصحابي اخصائين وكذلك شقيقي .
شهدت معهم بدايات عياداتهم . بضربو البوهية براهم واثاث من بيوتهم . ويكدحون لشراء عربة يكون زمنها مع الميكانيكي اكثر من استعمالهم لها
واحسبهم اخر اجيال الاخلاق المهنية العالية والمنضبطة
اقول ليك
جراح العظام قال لي كلام لم احسب ان طبيبا متمرنا يقوله . اقصد هاوس مان
قال لي
انت هسة عاملين كدة ما هي كراع بس . !؟
قالها متأففا مني محتقرا اهتمامي
وسأعود لتلك النقطة لاحقا
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
من اوائل الدروس التي تعلمتها في هذه الحياة
ان لا استهين بقدرات الاخرين في الفهم
وان لا احتقر ذكاءهم
وان لا يخدعني المظهر المتواضع عن خبيئة ثقافتهم وسعة اطلاعهم
يعني كدي شوفو كمية المعلومات الاخدتها من رابط الصديق سيف . معلومات مشروحة مع صور بيانية . واستفاضة غير مملة
يعني انا هسة كدي لا تنقصني الا مهارة القطع والخياطة . ومع خبرتي في رتق ملابسي ممكن اعمل عمل قد يكون افضل مما عمل لنسيبي . يعني لو قريت جراحة كان ممكن هسة اكون محسوب مع ابن كوستي بروفسر مصطفي عبدالله محمد صالح المصنف ضمن افضل 100 عالم في العالم كله
يعني الدكتور ما كان حنعجز عن الفهم لو شرح لينا . كنا استطعنا ان نتخذ خيارات افضل . خيارات توفر لنسيبي زمن . فقد تأخر اربعين يوما من العلاج !
ولو اخبرنا انها مجرد كراع . لكنا ذهبنا لمن يعتبرها عبارة عن عضو من اعضاء الجسد درس تشريحها وعرف اهميتها .
ولو سأل اعرجا دعك من مقطوع القدم عن امنيته لتمني ان يكون صحيح القدم
حين قال لي هي مجرد كراع . تذكرت تطور العلم وتخصص التخصص . ولو بحثت لوجدت ان حتي القدم لها تخصص منفرد ولوجدت لاجزاء القدم اختصاصين . تمشي لي واحد عندك الم ركبة يقول ليك انا متخصص عضم شيطان بس
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
التوعية
كيف لنا ان نحمي انفسنا نحن الشعب من جشع وصلف بعض الاطباء
ماهي الحقوق التي تكفل لنا خدمة محترمة بمبلغ معقول مقارنة مع الوضع العام . ولنذهب خطوة للامام بل مقارنة مع الدول الجارة او بل قل حتي الدول الاوربية
فلايمكن لمرض سهل العلاج ان يقضي علي مدخرات الاسرة وقد يضطرهم لبيع الضروري من عفشهم
كيف ؟
من اين اتي هؤلاء الاطباء ؟
هل هم جنينيا شرعيا للسياسة الحالية . سياسة تحرير الاسعار ؟
اوليس لهؤلاء الاطباء حس انساني يجعلون يحسون بآلام الفقراء
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
مرحب يا بدر يا دفعة
تعرف زمان .. زمان ما بعيد حتي نهاية ال80 كان في حاجة اسمها مناطق شدة .
مناطق الشدة بمشو ليها الاطباء الجدد . وهي المناطق الخلوية . هو طبيب وصيدلي ومرات ممرض . يعملون في ظروف صعبة . لاتتوفر لهم سبل الحياة العصرية . لا كهربا لا موية لا ترفية
وكانوا يبدعون
وكل ذلك قبل ان نتحول للعلاج الاستثماري ل يجن الاطباء
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
هناك مفهوم concept يا عبد الحفيظ يعرف في الغرب بـــpatient empowerment
يعني تقوية وضع المريض في العملية الصحية/الطبية باعتبارها مفاوضة بين جهة تقدم سلعة/خدمة
و هي الطبيب او المستشفى و بين جهة تدفع مالا للاستفادة من تلك الخدمة/السلعة . تقوية موقف المريض
تتم بتزويده بالمعلومات لأن الدراسات اثبتت ان هذه هي الثغرة الرئيسية في العملية و هي ما تعرف بالـknowledge gap
فالمريض كمستهلك او مشتري عندما يذهب للطبيب لا يعرف بالتحديد ما هي العروض المتاحة و ما هي البدائل و لا يعرف
التكلفة الحقيقية، اذن فتمليك المعلومات للمرضى يسهم بشكل فعال في تقليل او ردم هذه الفجوة المعلوماتية ليصبح
في امكانه الدخول في العملية التفاوضية بثقة. بعكس المتوقع تقوم جهات تقدم الخدمة الطبية بجهود مقدرة لمعالجة
الأمر و توفير المعلومات للمرضى و للعامة بشكل عام. انا كنت قد تعرضت لهذا الأمر هنا في المنبر من قبل
في هذا البوست:
اذا كنت تقرأ بالانجليزية فضع هذا الموقع على مفضلتك.اذا كنت تقرأ بالانجليزية فضع هذا الموقع على مفضلتك.
تصور لو كان بامكاننا انشاء موقع مشابه باللغة العربية..مشروع يستحق أن تبذل فيه الجهود.
| |
|
|
|
|
|
|
|
|
|
Re: قصتنا مع جراح عظام بكوستي (Re: سيف النصر محي الدين)
|
تشكر دكتور سيف
تشكر يا صاحب
نعم اقرأ بالانجليزية
وحفظت الموقعين . وهي مواقع مفيدة جدا
للاسف عاجز الان عن الكتابة بالحروف الانجليزية لعيب طارئ بالموبايل سأصلحه لذا كتبت الكلمات الانجليزية بنطقها العربي
شاكر ليك جدا
| |
|
|
|
|
|
|
|
|
|
Re: قصتنا مع جراح عظام بكوستي (Re: سيف النصر محي الدين)
|
سلام ود اب سن
و نسأل الله ان يمن على ابنكم بالشفاء العاجل
واحدة من مشاكلنا تحميل الخطأ الطبّى للقدر
يعنى ما ممكن خطأ طبى بتسبب فى موت زول نقول عليهو قدر الله و نحتسب
و طال ما الطب اتحول لى سلعة على الدولة ان تسن القوانين لحماية المستهلك اللى هو المريض
و الحصول على نتيجة ايجابية تعادل المال الذى دفعه او التعويض عن كل ضرر فى حالة حدوث خطأ
____
مواطن امريكى تعرّض للاصابة فى ركبته اثناء العمل ,,, حول للعلاج الطبيعى بعد اجراء عملية فى الركبة
و حصل خطأ و تفاقمت الاصابة ... الان يا ود اب سن اقوم بأستلامه من المطار كل شهر اذهب به الى الفندق
و تانى يوم الصباح امشى بيهو لى مركز مخصص لى جراحة العظام مرفق به جزء خاص للعلاج الطبيعى ثم اعود به للمطار
الداير اقولو فى الحالة دى ... الزول ده مرتبو بيستلمو على داير المليم طيلة سنتين ... كل مصاريف العلاج و الترحيل الاقامة مدفوعة
و بعد داك حيدوهو التعويض المادى المناسب للاضرار التى حدثت له و من اهمها الضرر النفسى و بالمناسبة دى هو لا بفاوض فى امر التعويض
انما يفاوض نيابة عنه كالعادة فى مثل هذه الامور محامى يعرف كيف يحفظ له حقه
فى البلد دى تغلط تتحمّل كل التبعات و ياريت ده يحصل فى بلدنا عشان نرتاح من حاجات كتيرة
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
ود ابسن وضيوفه سلام
الف سلامه ان شاء الله
اجر وعافيه
وكان الله في عون الجميع
وسلمكم الله من ناس يا ختت يا صابت
الله يعيين شعب النيل الابيض الصابر على جور الزمن
والله اول ما تأتي ذكري المرض والعلاج في كوستي
الواحد يتذكر كم من ضحايا بسبب الأخطاء المتعمده
بسبب قله الخبره في كثير من الاطباء الذين أتوا الي كوستي
المسكين شعبها
نسال الله عاجل الشفاء وحصن الله الجميع بالعافيه
وجنبهم ويلات مشارط الجهاله
وكم من عزيز لدينا كان ضحيه
| |
|
|
|
|
|
|
|
|
|
Re: قصتنا مع جراح عظام بكوستي (Re: موسى العجب)
|
مرحبا جلادونا
وحبابك
قبل ثلاثة سنوات ذات الطبيب في وفاة ابي .. حضر جميع اخوتي للعزاء . من ضمنهم اشقائي الاطباء . بنت اختي لينة اظنني كتبت عنها هنا . طالبة في ثالثة طب اصيب بمرض نادر وهو MultipleSclerosis فأقعدها . انزلقت من كرسيها المتحرك wheelchair فشفقنا عليها والجو حزين . جرينا بيها المستشفي . ذات الطبيب الان طلب صورة للقدم . شقيقي منعم ذهب للحديث معه كزميل علي ان يأخذ صورة للقدم الاخري حتي يقارن نسبة لمرضها . فذهب شقيقي الاصغر بكري له وهو طبيب بكل ادب . وكان متحركا داخل المستشفي معرفا بنفسه بعد السلام
دكتور ابوبكر طبيب بالسعودية
فقال له ناهرا
ناهرا
امشو اقعدو هناك وبطلو شفقتكم دي
كان بكري مؤدبا جدا يتخلق باخلاق المهنة فصمت وعاد وقعد هناك ولكنه شفقان
انفتح نقاش بيننا وكنا مجموعة . حول الاخلاق الطبية وحق الزمالة . المريض طالب طب والسائل طبيب وزميل .
زمان الدكتور ما بدفع في العيادة اسرة طبيب لو علم ان ابنهم طبيب
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
كما ابتدأت ان البوست يتناول شأنا خاصا .. ولكنه عام
عام في ان يحذر غيرنا من الوقوع في تلك الاخطاء
ان يعو حقوقهم ويطالبو بها
ان لا يتحرجو من طرح الاسئلة علي الطبيب المعالج
ان يكون الكلام واضحا محددا
ماذا سيفعل لهم
ماهي نسبة نجاح العملية
ماهي المخاطر والاعراض الجانبية المتوقعة
وليأخذو في اعتبارهم ( للاسف ) انهم يتعاملون مع تاجر يعرض سلعة يجب ان تستحق المبلغ المطلوب . فلا يسمحو له بغطرسة وافتراء زائد .
عليه ان يستحق المبلغ المطلوب
لا ينف ذلك وجود اطباء مفعمين بالانسانية .. العلم والاخلاق
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
وان لا يلقو بالا للامضاء الذي يمهرونه بالموافقة
فهو لا يمنعهم من اخذ حقهم اذا حدث تقصير من الطبيب او المستشفي
المجلس الطبي والمحكمة كفيلة بحفظ حقوقهم
الاخلاق السودانية الاصيلة السمحاء للذين يمتلكون حسا سودانيا اصيلا . وليس للذين يستغلون جهلهم وحاجتهم ومرضهم
الهدف فليكن ليس مال التعويض بل كشف اولئك الاطباء للناس
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
مرحبا موسي الراجل
وحبابك
حفظنا الله واياكم
بتذكر زمان
رحم الله دكتور حمودة فتح الرحمن . كان نقيب الاطباء بكوستي . واحد عمل ليهو كورس في القلب بتاع شنو ما بعرفو . وعلق لافتة
اخصائي القلب
وهو من اولاد كوستي ودفعته .. نزل اللافتة منو طوالي
هسة لافتات الاطباء والله تنافس لافتات المحال التجارية وشركات الدعاية
لافتات اشكال وانواع ويكتبو علي كيفهم .. شي استشاري وشي اختصاصي وشي وشيتين
زمان
كان للافتة مواصفات ومقايس محددة
والمكتوب زاتو محدد
فكان الواحد بعاين يشوفو خريج وين
جامعة الخرطوم
تخش ليهو بس
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
اخي ابوسن
سلام
و شفي الله المريض
لكن هل تقدمتم بشكوى للمجلس الطبي او النيابة
فلعل للطرف الاخر ما يقوله
ليس شكا في اقوالك فانت مصدق عندي لكن حتى يتسنى اعمال العدالة و حتى لا ينبري
لك احد هنا ان الطرف الاخر (ربما فقئت كلتا عينيه) خصوصا انت حددت الشخص لان كوستى لا اظن يكون فيها اكثر من اخصائي عظام
واحد
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
سلامات أستاذ عبدالحفيظ
شفى الله مريضكم وأجر وعافية إن شاءالله
فعلا" موضوع شرح طرق العلاج ومناقشة نتائج العمليات والتدخلات الطبية ومآلاتها قبل القيام بها
موضوع شائك جدا" في مجتمعاتنا ويوجد تقصير كبيير من الأطباء والمؤسسات الصحية وكذلك جانب
من مرافقي وأهل المريض.
من المفروض قبل بدء أي علاج أن يناقش الطبيب المريض ويشرح طرق العلاج والبدائل والمضاعفات
المتوقعة وأن يوقع المريض على القبول قبل بدء الأجراء الطبي والحاجة دي معروفة لكل الأطباء وأصبحت
جزء أساسي من إجتياز إمتحانات التخصص أو ما يعرف بال communication skills وعلى المريض عدم
إبداء الموافقة ما لم يفهم تفاصيل الإجراء.
المشكلة إننا في العالم الثالث ونسبة الأمية والجهل عالية جدا" وحتى وسط المتعلمين أكاديميا" الثقافة العامة والصحية
متدنية جدا" فلذلك يلجأ الأطباء إختصار الموضوع في مفهوم عام ( حاجة صغيرة) (عملية عادية) (عملية كبيرة) أو شرح
مختصر ودي ممارسة خاطئة.
وهناك مشكلة كبيرة تواجه الأطباء وهي ما يعرف بال confidentiality !! ودي نقطة مهمة جدا" في منو المفروض
يعرف نوع المرض وتفاصيلو والإجراءات الحتتعمل الحاصل في السودان مفروض تشرح للاولاد والجيران وناس الحلة
والمريض آخر من يعلم!!
حتة ال communications والconfidentiality أغلب الأطباء السودانيين بالخارج بتعاملوا معاها بصورة علمية
لكن في داخل السودان بيحدث العكس!!
متأسف للإطالة أو إذا خرجنا من لب الموضوع.
| |
|
|
|
|
|
|
|
|
|
Re: قصتنا مع جراح عظام بكوستي (Re: عثمان الأمام)
|
اخونا حفيظ ربنا يكتب سلامة نسيبك
رغماَ عن انك قلت
( ولو بحثت لوجدت ان حتي القدم لها تخصص منفرد ولوجدت لاجزاء القدم اختصاصين . تمشي لي واحد عندك الم ركبة يقول ليك انا متخصص عضم شيطان بس ) على سبيل الدعابة الممزوجة بالأسى على ما آل اليه حالنا الا انه يا صديقى لجراحة العظام فروع اوردها لك و للدكتور الذى استنكف الأهتمام بالكراع..
وهى ما يسمى بال Subspecialties
Arthroplasty
Foot and Ankle
Orthopaedic Oncology
Pediatric Orthopaedics
Spine
Sports Orthopaedics
Trauma
Upper Extremity
ربنا يكون فى العون وطمنا على قريبك وقلبى على وطنى.
| |
|
|
|
|
|
|
|
|
|
Re: قصتنا مع جراح عظام بكوستي (Re: د.محمد بابكر)
|
مرحبا عثمان الامام
وحبابك
امين
تشكر
تعرف الاستهانة بذكاء وفهم الاخرين يقود للخداع
اي اسرة واقصدها حرفيا يوجد بها شخص واسع الافق . ويمكن ان يفهم المطلوب والمقصود
ولكن بعض اطباء هذا الزمان لهم صلف وعنجهية زائفة . لا تخلو اسرة ممتدة من وجود طبيب او طبيبة . ليس الامر صعبا ان تشرح
المهم ان تؤدي مهمتك بكفاءة واحترافية . اخبرهم عن المرض .. ماذا ستفعل لهم .. وكيف .. والنتائج المتوقعة .. نسبة العملية . اطرح لهم الخيارات . كن عادلا في طرح الخيارات
مثلا العملية حقتنا دي . وفقا لرابط د. سيف .. ممكن تكون بدون عملية . تثبت الرجل يمنع من الحركة فترة 6 لي 8 شهور . وسيتعافي المريض . حتي العملية ليست صعبة
المهم عدم الحركة . ودي كانت اهم وصية في الرابط ولم يخبرنا بها الطبيب . اهم وصية بعد العملية . لا تتحرك ولا تضغط علي قدمك .. اها دي جهل ولا علم .. الا يكون هو زاتو ما عارف المعلومة
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
شفى الله مريضكم والبسه ثوب العافية
يا اخي والله واحدين يجوا داخلين المستشفيات بي كرعيهم في لحظات على الة حدباء محملولين ...
مهازل وعدم مسؤلية وسبهللية طبية ماليها حد ...
اتخيل في مستشفى سنار من امتر من شهربن لا يوجد بنج للعمليات خاصة عمليات اللوز عندنا واخد جارنا بنتو ليها اكتر من شهر بتمشي عشان يعملوا ليها العملية بترجع بححة لايوجد بنج ..الا للعمليات الحرجة ....
----####-----
ختاما اتمنى الشفاء العاجل يارب لي نسيبك
مع مودتي
| |
|
|
|
|
|
|
|
|
|
Re: قصتنا مع جراح عظام بكوستي (Re: علي دفع الله)
|
مرحبا عوض
وحبابك
اشكرك لتصديقي
لم اتهم الدكتور حاليا ابدا . بل شرحت ما حدث له بحياد كامل . دون اطلاق اتهام .
نسيبي حصل له كسر في طاقية الركبة . الباتيلا
الطبيب قال كسرين وبعمل ليهن سلك
بعد 40 يوم لم يستطع المريض ثني ركبته
مشينا ليهو قال عمل ليهو تمرين تحت البنج الكامل . ووجد 3 كسرات بدل كسرتين
وديناهو الخرطوم
سألت اسئلة
الطبيب قال العملية سهلة وعادية ولم تكن كذلك
بعد 40 يوم اخبرنا انهن 3 كسرات مش كسرتين ! رغما عن صورة الاشعة
قال عمل تمرين تحت البنج الكامل ودفعنا قروشو . هل يوجد تمرين تحت البنج الكامل
ماهي حدود مسؤولية الطبيب في تمليك المعلومات لنا
استخف بقلقنا وقال هي مجرد كراع
عموما . يهمنا مصلحة مريضنا
ولم نفكر حتي الان في بلاغ للمجلس الطبي
رغم استشارتي لمحامي في ذلك . ولو اردت لباشرت قبل الان
وتظل السيناريوهات مفتوحة
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
مرحبا د. محمد بابكر
وحبابكت
تشكر والله
تعرف قياسا كدة .. حساب جانقي لو كان للعين الصغيرة دي اكثر من تخصص لجميع اجزاءها فما بالك بالكراع الطويلة وعريضة دي
قالوا
واحد فكي غاشي ناس الحلة وهو جاهل .. ماكل شارب ساكن .. ومتصرف منهم .. اها يوم زارهم واحد متعلم .. بعد الصلاة داير يكشف الفكي للناس ويبين جهلو
قال ليهو
ياشيخنا اقرا لينا سورة البقرة
الفكي مفتح .
قال ليهو
انت اقرا لينا سورة التور
الزول نطط عيونو بي سخرية
وقال ليهو مافي سورة للتور
الفكي عاين منتصرا للجمع وقال
عاينو زولكم !! التور اب قلقات ماعندو سورة وكيف البقرة ام شق عندها سورة
وانتصر الجهل
| |
|
|
|
|
|
|
|
|
|
Re: قصتنا مع جراح عظام بكوستي (Re: د.محمد بابكر)
|
تحياتي استاذي ابو سن
شفاء الله مريضكم وجميع مرضي المومنين
قبل ثلاثة شهور الوالد الله يعطيه الصحة والعافية تضايق الساعة واحدة صباحا
من حبس البول المهم اتصل بأخخي الأصغر وبطريقة مستعجلة تم توصيله الي
مستشفي امدرمان قابل نائب اخصايي حاول ان يدخل له القسطرة عن طريق
المجري البولي لكن ما استطاع بعد محاولات قال ما في طريقة الإ ان يتم فتح
عن طريق المثانة وهنا كانت الكارثة ، تخيل انو نائب الإخصائي ما قدر يحدد
موقع المثانة في النهاية فتح البطن عملية 12 فتلة عشان يركب القسطرة في المثانة
وهذه العملية بدون اي بنج "كيري" ساكت لرجل تجاوز ال ثمانين عاماً
في النهاية اطرينا الي تسفيره للقاهرة بعد يومين لمراجعة هذه العملية وومن ثم عمل
عملية نظافة للمجري البولي
| |
|
|
|
|
|
|
|
|
|
Re: قصتنا مع جراح عظام بكوستي (Re: د.محمد بابكر)
|
مرحب ود دفع الله
وحبابك
العلاج الاقتصادي .. تحرير العلاج
سياسة حمدي التي تبرأ منها حمدي زاتو
اضرت بالمستشفيات ضررا كبيرا . مستشفي كوستي يزرع الورود ويضرب البوماستيك ومافيهو اوكسجين .
وكتر خير ابناء كوستي بالخارج . فمن خلالي قدموا للمدينة
الادوية والاجهزة ودعم جمعيات مرضي الكلي والسكري .
احضروا اكثر من ماكينة غسيل للكلي
وجهاز لكشف السكر التراكمي
واجهزة شخصية لكشف السكري
وجهاز للربو
ومنظمات للاوكسجين
ومستشفي كامل للاطفال
هذا انا شاهدا عليه ومن خلالي
وغيره الكثير ودون حصر غرفة للعناية المكثفة وتجهيز عنابر وسراير ومبردات وادوية واكثر
رفعت الحكومة يدها
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
أخوى الاستاذ /عبد الحفيظ
السلام عليكم ورحمة الله ولاسرتك الكريمة ولكل اهل كوستى
والف سلامة لقريبك
وادعو له بان يتمم الله شفاؤه ...... آآآآآمييييين
تعرف يا اخوى عبد الحفيظ ..
رحم الله امواتنا
فى داخل منزلنا عندنا شجرة كبيرة جدا .. وفى مرّة من المرّات وصل اليها قردا ( كـكّـو ) وجلس وتربّع
المهم .. رأته اختى الصغرى وبدات تلاعبه ثم مدّت يدها لتعطيه جوافة ( التى كانت تصلنا من الجزيرة أبا آنذاك )
فما كان من القرد الاّ وان خدشها على يدها .. ذهبت اختى الى الوالدة رحمها الله وهى تبكى ..
عندما رات امى ذلك الخدش قلقت جدا .. وقالت لازم نمشى الدكتور .. فقلت لها دكتور مين .. اليوم الجمعة ومافى دكاترة .. خليها تاكل نارها
عندما اصرّت .. ذهبنا بها الى احد الاطباء امام المستشفى وكان معروفا ذلك الوقت .. دخلنا اليه رحّب بنا اهلا يا حاجة .. اهلا انور .. خير ؟؟
حكينا الفيلم .. فقال .. لا لا لا دا موضوع كبييييييير .. ذهب الى دولاب الكتب واحضر كتابا فى حجم ( الدكشينرى - حق زمان )
وبدأ يفتش !! ويفتّش !! انا قلت الزول دا فاكّة منّو زلا شنو
بعد داك كتب اسم دواء .. او مصل ما عارف ثم جاب ليهو ورقة تانية فيها وصف الشركة واسمها فى الخرطوم
ثم قال لى يا انور لازم تقوم الان تمشى الخرطوم وتشيل معاك حافظه ولمن تستلم البتاع دا تشترى ثلج وتحط البتاع دا فى الثلج وتجى راجع فى نفس اليوم بكرة .. فقلت له يا خى معقول الاقى بص الآن
قال لا لا لا ابدا لو مشيت السوق الشعبى فقلت له يا دكتور الان المغرب انتهى .. المهم اصرّ لازم السفر
رجعنا البيت والتقينا الوالد وبرضو حكينا الحصل ..
قال خلاص خير .. وانا طالع من البيت شاهدت الدكتور جرجس عياد اسكندر والتى كانت عيادته امام منزلنا مباشرة ( الباب X الباب )
مشيت عليهو وقصيت ليهو القصّة المملّة دى ..!!
قال لى امشى جيب لى اختك المجنونة دى وهى ذاتها الخلاّها تمشى تهبّش شنو ؟؟
رجعت البيت وكوووللللنا مشينا .. المهم عاين ليها كدا !! وعاين لى كدا ( طبعا مافى زول فيكم شايفنى ) ههههههه
فقال يا حاجّة لو عندك حبوب ضغط امشى ابلعيها هههههه
كيف يعنى ؟! ردت الوالدة - فقال لها لا خرطوم ولا فيل !!
دا خدش عادى .. غسلى ليها يدّها بصابون فنيك ولو حصلت حاجة انا بقفّل عيادتى
وقبل ان استدير لاعود مع الجماعة البيت قلت ليهو ضيّعت لى سفرة للخرطوم يا عمنا
قال لى طيب بديك حق السينما والباسطة والحليب ايش رايك .. قلت له طيب ناول !
فبدأ ينادى فى ابوى .. يا حاج سيد يا حاج سيد ادّى ( المخنفس ) دا حق الحلاقة .. ههها
....
ولو حكيت ليك يا شيخ عبد الحفيظ والله قصص مبالغة وهذه قصة بسيطة .. يعنى على الطاير كدا
سلامى ليك والجميع
انور
| |
|
|
|
|
|
|
|
|
|
Re: قصتنا مع جراح عظام بكوستي (Re: ANWAR SAYED IBRAHIM)
|
مرحبا اسامة
وحبابك
قريت امس تعاون بين الاردن والسودان لتدريب الاطباء . شفت كيف
شفي الله والدكم
اها المثانة ولا المحسن كما يقول اهلنا بغلبن زول ..
وزمان هسة ما عارف . كان اولي عامة .للطلاب وتانية بدرسوا ضمن ما يدرسون التشريح والكيميا الحبوية وعلم وظايف الاعضاء . وهي علوم اساسية . بعني يفترض يكون من سنة تانية عارف المثانة وين وقاعدة كيف والعضلات والاوردة الفيها والاعصاب .. عارف خرطتها ووظيفتها وطريقة عملها ووو تفاصيل كتيرة . ودة البفرق اطباء زمان من هسة . معرفة العلوم الطبية الاساسية .
بعني نايب ولا كما يقولون ريجسترار ما عارف وين المثانة . دي ما مشكلة مفروض يسقط في امتحان النواب حتي يعرفها . لكن حيتخرج اخصائي وبرضو ما عارف وين موقعها
قضية التأهيل مهمة
في زمن العلاج المجاني . مافي عيادات بالنهار . كل الاطباء بداومو بالنهار ودي فرصة تدريب وتعليم للاخلاق الطبية والمهارات
لكن بعد تحرير العلاج . والدخول بي قروش للدكتور . الاطباء عندهم الحق . ماممكن اشتغل ليك وتشيل قروش وانا اخد ماهية . من هناك بدات خصخصة العلاج
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
سلامات ابو سن
و البركة فيكم فى عمنا اب سن ..
..
و شكرا لأخلاقك لأنك لم تذكر اسم الطبيب ..
ممارسة الطب فى النيل الأبيض صارت تجارة ..
سؤال للأطباء عامة و ارجو نقلها لأطباء النيل الأبيض ..
أصبت بالملاريا و عند ظهور نتيجة الفحص فى الخرطوم سألني من فى المعمل ( المختبر) ..
" انت حصل مشيت جنوب النيل الابيض؟" أجبته بنعم ..
و تكرر السؤال فى مستشفى ( تقى)
(مشيت قريب دا كوستى او ربك ؟)
أها هنا سألته ( ليه؟)
الملاريا دى إلا فى المنظقة ديك .. و بنسميها فى الخرطوم (وخيمة) .. (و كوستى ربك ملوثة صحيا ..) ..
| |
|
|
|
|
|
|
|
|
|
Re: قصتنا مع جراح عظام بكوستي (Re: معتصم الطاهر)
|
نتمنى لنسيبك الشفاء العاجل
ونقول ليك الله المستعان..
لكن عاوزة اؤكد ليك حاجة واحدة تكون في علمك( دي اقتبستها من ود بادي)
ان جراح العظام ده لو كان في أمريكا كان اخضعوهو لتحقيق اداري لانه فشل
يعرف من قراءة صورة الاشعة كم كسر في الركبة.. وثانيا المستشفى كانت حتدفع
تعويض اقله 300 ألف دولار للمريض عشان يمشي يتعالج في احسن مستشفى ويصلح
الكسر..
لكن نقول شنو في نظام الرعاية الصحية العوجاء في السودان..
وقبل كده قرينا حاجات غريبة ومنها ان المريض لمن يصل المستشفى اذا ما دفع
رسوم العلاح مقدما ما بيتعالج...
ودمت بالف حير وصحة وعافية.. وان شاء الله ما تحتاج ليهم ابدا
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
مرحبا انور
رحم الله جرجس عياد اسكندر . وهو طبيب انكليزي استقر بالسودان .كانت طبيبا انسانا .
وذلك جيل من الاطباء لا تزال بقيتهم تناضل من اجل قيم واخلاق المهنة
وكثير من اساتذة كلية الطب بجامعة الخرطوم قديما كانوا نموذجا للاخلاق الطبية الرفيعة . وطبقوا ذلك ودرسوه لطلابهم
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
Quote: رحم الله جرجس عياد اسكندر . وهو طبيب انكليزي استقر بالسودان .كانت طبيبا انسانا .
وذلك جيل من الاطباء لا تزال بقيتهم تناضل من اجل قيم واخلاق المهنة
وكثير من اساتذة كلية الطب بجامعة الخرطوم قديما كانوا نموذجا للاخلاق الطبية الرفيعة . وطبقوا ذلك ودرسوه لطلابهم |
سلامات ود ابو سن .. كفارة للراجل اجر وحسنة
دكتور جرجس عياد كان شاطر شديد اذكر كان عيادتو في السرايات
اذكرة طشاش كان رجل سمح السجية اصلع كثير المزاح كنت صغيراًجدا كثير ما عالجنا ونحن اطفال رحمه الله رحمه واسعه
ومن الدكاترة الكويسين في كوستي دكتور روميل والله دا انا ما بنساو كلو كلو شاطر جدا وهو ايضا من اقباط كوستي ان شاء الله قاعد بس ما هاجر .
| |
|
|
|
|
|
|
|
|
|
Re: قصتنا مع جراح عظام بكوستي (Re: الطيب عباس)
|
مرحبا معتصم
وحبابك
رحم الله عمي صديق اب سن وغفر له
سمعت بيك في بيت البكا انك كنت بربك وتعمل لصيانة الجامع العتيق بربك . تقبل الله عملك
تعرف من المستفز جدا عربية مكتوب عليها مشروع مكافحة الملاريا . اظن المشروع هدية . العربية سمحة ووجيهة . شايفها لافه في كوستي . لكن ما شايف اي خطوات لمكافحة الباعوض ناقل الملاريا . الان والدنيا شتاء بنوم جوة الاوض ونشغل المراوح من البعوضة !
بقت ساكنة معانا صيف خريف .. وزمان كانت في الخريف . حسب نظرية عمنا دارون تكون بقت من ذوات الدم الحار
المكافحة الا من بعض المحاولات من جمعيات شعبية وترش الجازولين المخلوط بالموية .
اضف بذلك انو دواء الملاريا .. الكوارتيم جابتو منظمة ! اجنبية ويفترض توزيعه مجانا من المستشفي . وبنشتريهو من السوق ب مية جنية
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
سلامات أستاذ عبدالحفيظ
نعم إختصار عملية مناقشة المريض حول العمليات في مفاهيم عامة يعتبر ممارسة خاطئة ويجب أن
يكون بالتفصيل مع ذكر خيارات العلاج والمضاعفات والخ الخ
أي عملية أو تدخل جراحي لديه مضاعفات قد تزيد أو تنقص نسبتها والمرضى في الدول المتقدمة يعلمون
حقوقهم وثقافتهم الصحية عالية جدا" وقد تفاجأ بالمريض يسألك عن نقاط دقيقة جدا" حتى عن تاثير المرض
على ساعات عمله ونوعه وهكذا. أما بالنسبة للمجتمعات كمجتمعنا ثقافتنا متدنية جدا" وينظر المريض للطبيب
الذي يناقش ويوضح المضاعفات ولو قل حدوثها على أنها عدم ثقة منه وهذا الحديث ليس عنجهية ولا تكبر لكنه
عن تجربة . (والله مشيت لي دكتور فلان لي عملية البواسير خوفني وقال لي ممكن يحصل ناسور وممكن يحصل
كيت وكيت خليتو مشيت لي فلان دخلني العملية في يومي وعملا لي لا ناسور لا شي تاني!!) والسيناريوهات المشابهة
كثيرة .فثقافة المجتمع ليها دور كبير على المريض وعلى الطبيب كليهما وهو دور سلبي اتمنى أن يتفاداها الأطباء.
Quote: مثلا العملية حقتنا دي . وفقا لرابط د. سيف .. ممكن تكون بدون عملية . تثبت الرجل يمنع من الحركة فترة 6 لي 8 شهور . وسيتعافي المريض . حتي العملية ليست صعبة
المهم عدم الحركة . ودي كانت اهم وصية في الرابط ولم يخبرنا بها الطبيب . اهم وصية بعد العملية . لا تتحرك ولا تضغط علي قدمك .. اها دي جهل ولا علم .. الا يكون هو زاتو ما عارف المعلومة |
بالنسبة للعملية المذكورة الموضوع ليس بالبساطة هذه!!
حسب نوع الكسر ومكانه يتم تحديد العملية أو لا بل ويتم تحديد زمن العملية هل عاجلة أو بعد أيام
النقطة الثانية المهمة نعم قد لا يظهر الكسر في الإكس راي وقد يحتاج المريض لاشعة مقطعية أو رنين مغنطيسي
ودي مشكلة أساسية في السودان يلجأ الأطباء لتشخيص الحالات بأقل فحوصات ممكنة نتيجة عدم توفر الفحوصات الأدق
أكيد في كوستي ( وغير متأكد) يصعب وجود اشعة مقطعية أو رنين .
أما بالنسبة للمضاعفات الstiffness من المضاعافات الشائعة لعملية اصلاح الpatella وبيحدث حتى في المستشفيات الكبيرة
ونسبة حدوثه عالية وإذا حدث فعلا" يحتاج المريض إلي علاج طبيعي تحت التخدير العام وكمان عدم التئام الكسر برضو من
المضاعفات الشائعة وقد يحدث أيضا" .
بالنسبة للحركة أيضا" لا يوجد شئ قاطع للحركة في نوع هذه العملية والطبيب المتابع هو البيحدد في بعض انواع الكسر يوصي
بالحركة المبكرة وتدريجيا" وفي البعض يوصى بعدمها فالموضوع ليس بهذه السهولة.
نأسف للإطالة مرة أخرى وشفى الله مريضكم.
| |
|
|
|
|
|
|
|
|
|
Re: قصتنا مع جراح عظام بكوستي (Re: عثمان الأمام)
|
Quote: أما بالنسبة للمضاعفات الstiffness من المضاعافات الشائعة لعملية اصلاح الpatella وبيحدث حتى في المستشفيات الكبيرة
ونسبة حدوثه عالية وإذا حدث فعلا" يحتاج المريض إلي علاج طبيعي تحت التخدير العام وكمان عدم التئام الكسر برضو من
المضاعفات الشائعة وقد يحدث أيضا" . |
سلامات يا دكتور عثمان
من واجب الطبيب أن يخبر المريض باي مضاعفات متوقعة قبل العملية و عشان ما يحصل الكلام القلت عليهو
انو دكتور تاني ما يجيب سيرة المضاعفات المتوقعة فتبدو و كأنها مرتبطة بالدكتور الذي تحدث عنها، يجب أن يوضح
للمريض ان هذه المضاعفات تحدث مع جميع الجراحين الاخرين و ليس معه فقط. ممكن تجربة اعداد مواد مطبوعة
تذكر فيها المراجع بصورة مختصرة. يمكن أن تصدر هذه المواد عن وزارة الصحة او عن المجلس الطبي بحيث
انها تكون موجودة على موقعهم على الانترنت و يقوم الطبيب بطباعتها للمريض بحسب الحاجة.
هي امريكا في القضية المشهورة Canterbury vs. Spence و التي نظرتها المحكمة العليا استقر الرأي على أن
risk او خطورة متوقعة مرتبط بعملية او اجراء طبي يجب أن يخبر به المريض إذا كانت احتمالية حدوثة مهمة احصائيا
القوانين اللاحقة فسرت هذا الحكم و وضعت 1% كحد ادنى يلزم الطبيب بذكر الخطورة المتوقعة اذا جاوزت هذا الحد
انظر:
http://www.lawnix.com/cases/canterbury-spence.htmlhttp://www.lawnix.com/cases/canterbury-spence.html
| |
|
|
|
|
|
|
|
|
|
Re: قصتنا مع جراح عظام بكوستي (Re: سيف النصر محي الدين)
|
عذرا للرد الراتب
تحياتي دكتور عثمان
وتشكر والله
بالنسبة لحديثي المقتبس من قبلك . لم يكن مقصود بحرفيته . بل اتي للتدليل علي خيارات العملية بشكل ساخر
توجد اشعة مقطعية بكوستي . سي تي اسكان
وبمبلغ 400ج ولكنها في مستوصف اخر !!
لم نكن لنرفض الصورة لو طلبت منا . والجراح طلب منا فحوصات قبل العملية بمبلغ 370 ج تقريبا . وحسب كلام المستوصف هي واحدة من شروطه لكل مريض تجاوز ال 40 سنة . من ضمنها فحص الكبد والكلي .
المهم كما تقولون بلغتكم ما كان في كاونسلينق . حتي تصلب القدم او الاستيفنيس لم يتم ذكره لنا
ولم يتم ذكر انه وجد ثلاثة كسور بدل اثنين الا بعد 40 يوم وهو وضع غطاء فوق الركبة لم ذلك حقيقة
المريض قابل اكثر من مرتين وذاكرا الالم لم يخف
اعتقد ان مهمة الطبيب هي قتل الالم . والالم افضل طبيب في تقديري فهو مؤشر علي خطأ موجود يمكن ان تسميه مرضا
المهم
في تقديري ان الطبيب الذي يرفض تمليك المريض المعلومات الصحيحة بإفتراض ان المريض ( الزبون ) سيذهب لغيره تحول من طبيب لتاجر .
هذا لا يعف الطبيب ابدا بل يدينه
لو تم شرح تعقيدات العملية لنا . وانه لو حدث ذلك سيتوجب ذهابنا للخرطوم . لذهبنا مباشرة للخرطوم اختصارا للزمن .
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
تحياتي بسمات
وحبابك
نحن شعب طيب وبسيط
مادايرين نشتكي ولا تعويض . دايرين خدمة تحفظ لينا صحتنا . ما بنستخسر المال في العلاج .
رغم ان النتايج مرات بتكون موت
بعض الاطباء يعميهم الجشع مستغلين جهل المريض بحقوقو .
تلقا الناس زعلانة من الطبيب ولامن واحد يشتكي عشرات الناس تجي تترجاك انك تعامل بيهو الله
| |
|
|
|
|
|
|
|
|
|
Re: قصتنا مع جراح عظام بكوستي (Re: عبدالحفيظ ابوسن)
|
مرحب الطيب
وحبابك
عيادة جرجس حسب ما اذكر في حي المرابيع تفتح علي البحر
شاهدته وهو كهل . كان محبا للاطفال . يحملنا ابي اليه فيداعبنا .. ونرتاح له. تمرق منو يودونا كافتريا روضة المدينة محمد عمر موسي نشرب الهيلاهوب
| |
|
|
|
|
|
|
| |
عبدالحفيظ ابوسن
سيف النصر محي الدين
أيمن محمود
بدرالدين بابكر مصطفى
جلالدونا
موسى العجب
د.محمد بابكر
علي دفع الله
اسامه العريفي
ANWAR SAYED IBRAHIM
معتصم الطاهر
الطيب عباس
فيس بوك
تويتر
انستقرام
يوتيوب
بنتيريست