|
|
|
 Re: الي سوداني المهاجر:خارج السودان نحن سودان (Re: Bashasha)
|
الكلام عن مطاردة سودانيين مثلك في امريكا او الوغواغ لانهم ارتكبو مخالفات ضد مكان اقامتم، لو كمواطنين ام للعمل، فهذا مدمر لنسيجنا الاجتماعي وخطر جدا جدا، بلا ادني مردود علي الاطلاق.
والاهما هذا لايشبهنا بالذات كمعارضة طارحة روحا كبديل.
نعم هذا يشبه اذلام نظام القتلة، ومثل هكذا سلوك يشبهمم وبالتالي طبيعي يجي منهم، لانهم يجسدون علي مستوي السلوك، كل ماهو وافد، دخيل واجنبي بي معايير رجل وامراة الشارع، البسيط في السودان، وهذا هو سبب فشل مشروعم الكارثي، الاشعل البلد، لانو وافد، اجنبي وغريب، ولا لاي سبب اخر.
نعم ده هو سبب قبر مشروعم الولع البلد ودمر شخصية السوداني والسودانية التاريخية,
اذا وعينا بالحقيقة دي، مهما كلف ومهما كانت المرارة لاينبغي لنا كقوي بديل التعامل مع بعضنا باخلاق الوهابية، الكيزان، اي اخلاق شيطان جرة الاسلام الوافد.
ينبغي ان نعامل هؤلاء خارج السودان، كسودانيين اولا، وان لم يكونو من حيث طريقة تفكيرم.
هذا واجبنا اولا ثانيا وثالثا.
من الجهة الاخري، عشان تكسب الشارع وغبش الشارع انتا لاتملك غير هذا اطلاقا، والا سيكسب نظام القتلة زي كل مرة.
الكارثة المعارضة للاسف لاتملك مثل هكذا بعد نظر مصدرو الاساسي الاحساس المباشر بالقلب، البسيط جدا وعفوي.
| |
  
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
نعم المحك الاساسي هو الاحتكام لارثنا السوداني كقاعدة في كل شئ تقريبا، اكرر كقاعدة، ولكل قاعدة شواذ. للاسف اري كثير من التراشق مابينا ويا للعجب، بسبب موقف كل منا من مصالح البلد المقيمين فيهو وهذا نموذج لي قصر النظر، لما تصدم بي مصالح بلد اخري، وهذا مؤلم!
الكارثة كلها في سذاجتنا المعهودة في نظرتنا المثالية لمنطلقات هذه الدول، في موقفا من بلدنا ونظامو المجرم.
يا احبابي امريكا ولا غيرا لايهمها غير مصالحا هي.
وبالتالي مهما فعلت امريكا ولا السعودية لخدمة مصالحا باستخدام نظام القتلة، فده من حقهم يا اعزائي، نعم حقهم الالهي، وبالتالي مامفروض تقول بغم، الا من حيث السرد، الكشف، والتحليل، وليس المحاسبة لامريكا او لغيرا، فهذا جنون!
لذا مامفروض اطلاقا بي سبب موقف قطر ولا امريكا ، ندورا في بعض، هذا عبط يا احبابي ومؤلم جدا.
نعم من حق قطر تسوي الدايرة تسويهو لخدمة مصالحا باستغلال نظام القتلة، فده من حقها يا اعزائي.
ممكن نعري ونكشف هذا ولكن لامعني للهجوم علي قطر او امريكا او معاداتا!
الانكأ كمان والاقبح هو معاداة المقيمين في الامارات كمثال لاهلهم المقيمين في قطر من باب الدفاع عن قطر او امريكا او الامارات!!
ده شئ عجيب بحق!
انا لوكنتا شغال بعقد عمل في السعودية، كمهني محترف، اطلاقا لن اخوض في مواضيع سياسية متصلة بالسعودية اطلاقا، اللهم الا لو عبرت جيوشا البحر لاحتلال السودان!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
من الجانب الاخر ناشطي السودان في امريكا، للاسف بعضهم وبخبث شديد وانتهازية، بيستخدمو قضايا بلدم السودان من اجل الكسب الشخصي الرخيص جدا والحقير جد جدا وعلي حساب ارواح الملايين، وهذه كارثة حقيقية بمعني المفردة، لان بعض هؤلاء بي جدو، ويا للنكتة بتخيل المنظمات الامريكية دي بتسوي البتسووي فيهو من اجل ذنوجة السودان، اللي امثالم بيرصصو في شوارع امريكا كما الارانب بواسطة القانون والدستو ايضا!
هذا لايعني عدم الانخراض في المنظمات الامريكية المصممة لخدمة مصالح امريكا اولا واخيرا، وانما ينبغي الانخراط بوعي شديد، وشديد جدا، بي صورة نقدية عقلية، بتاعة تجار، وتجار شطار جدا.
ده موضوع حنخليهو لي وكتو، ولكن علي هؤلاء ان يعلمو، اننا نعلم، هم جايين من وين، وبالتالي ماشين علي وين، رغم انف المساحيق والشعارات المرفعوة للتمويه, انا عارف بقول في شنو بالضبط او علرف كويس بنحفر بالاظافر في طريق وعر جدا.
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
اعلم فتحنا موضوع شائك او حساس جدا، ولكن شخصيا قناعتي، ان هذا هو مسؤولية اي معارض للنظام، بمعني ان تكون بديل في سلوكك الشخصي، مش ورجغة التنظير، وانما السلوك، اكرر السلوك، كفرد مش كتنظيم سياسي!
نعم جسد مشروع البديل في سلوكك كفرد، نعم او عوووووك سلوكك مش تنظيرك!
نعم كفرد مش كتنظيم!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
اذن انا كمال بشاشا ارفض وبشدة مطاردة سوداني لي سوداني اخر في المهاجر، لانو كوز، قدم للجوء، وماشابه.
ده غلط، وغلط كبير جدا، مدمر للغاية ولايخدم اي قضية.
علي العكس بي حساب السياسة يخدم نظام القتلة بي حسابات الشارع، ويدمر نسيجنا الاجتماعي الاصلا عرضة للانغراض بحكم اسلوب الحياة في مجتمعات المهاجر، بالذات امريكا كندا واوربا.
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
يا اعزائي،
مهم جدا، كمعارضة ان نكون صارمين وقاسين لابعد حد في حسابنا لكل من يتحدث باسمنا من موقع مسؤولية رسمية، لانو العصر القادم هو عصر الناخب، المستقل، المتحرر من الديماغوغية، ايا كانت، طائفية او عقائدية، البنطلق من مصالحو هو كمواطن، وليس الولاء الاطرش الاعمي بتاع درق سيدو، او "كمرات"، زميل، ماجد، وماشابه من القاب.
نعم يكفي الحاصل في الحركة الشعبية الان شمال وجنوب، كنتيجة مباشرة لغياب كرباج الناخب!
يكفي مايحدث في دارفور الان، بواسطة امثال مناوي واشباهه من احتراف للارتزاق لغياب النقد، والرقابة من القواعد، فوق لي طبيعة البناء وقبلو الوعي القبلي اللي دمر السودان!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
سلامات يا بشاشا و شكرًا على وضع الأمور في الهواء الطلق لمناقشتها والحوار حولها.
اليومين دي نقاش موضوع العقوبات الامريكية على السودان هو سيد المواضيع في
تجمعات السودانيين في أمريكا وطبعا الاّراء متابينة ومختلفة. في ناس بشوفوا إنّو
العقوبات غير مفيدة و لا تؤثر على النظام وانو ضررها واقع على الشعب وفِي اخرين
شايفين إنّو العقوبات ما مستهدفة رجل الشارع وأنها في الأساس موجهة ضد النظام
ورموزه وطبعا وبحسب الدستور الامريكي فحق التعبير عن الرأي حق اصيل ومقدس
ومكفول للجميع. اعتقد إنّو الامر يجب الا يخرج عن هذا الإطار ومن حق كل طرف ان
يسعى لتمرير اجندته و ان يدافع عن رأيه والحشاش اليملا شبكته.
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: سيف النصر محي الدين)
|
سيف الدين مرحب بيك،
بالنسبة للعقوبات، فلا لرفع العقوبات رغم الثمن الباهظ البدفعو الفرد العادي كنتيجة لهذه العقوبات، ولكن رفع العقوبات وقبلها الاشارة المضمنة في القرار، سيؤدي الي تماهي النظام في غرورو.
من الجانب الاخر النظام الامريكي واضح انو دماء المهمشين السائلة في اليمن اسالت لعابو وهذا خطير، بالذات لما نضع في الاعتبار طريقة تفكير مرشح الKKK القاعد في البيت الابيض، المابعرف السودان ده، واقع في ياتو قارة، ولاعندو رغبة زاتو يعرف!
نعم اوربا بدورها الان تدعم الجنجويد ومن ثم نظاما في السودان وبقوة!
نعم هذا من حقهم، وكذلك من حقنا ننبه للوضع الاكثر كارثية، القادم.
هذا درس للبتخيلو امريكا ولا اوربا ولا العرب بهمهم مصالح السودان والسودانيين.
مشكور انك ما موافق لمطاردة بعضنا للبعض في المهاجر باسم معارضة النظام.
هذا مرفوض تماما او هكذا ينبغي ان يكون، حتي ولو بي حسابات السياسة دعك من المثاليات كما قد يفهم البعض.
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
| Quote: هذا درس للبتخيلو امريكا ولا اوربا ولا العرب بهمهم مصالح السودان والسودانيين. |
بشاشا
فقر الخيال السياسي بيخلي الناس تفكر
بطريقة المخبر السياسي ، او المواطن
الملتزم بتربية الاعلام الرسمي ، في
المجتمعات الديمقراطية لديك براح
وادوات بعيدة عن سلطة الاخضاع والجبر
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: MAHJOOP ALI)
|
محجوب مشتاقين،
تحياتي عبرك لي سليل الفيزويزي بي خلالو الكوشي!
نعم لما نضع في الاعتبار طبيعة العلاقة اللصيقة فيما بينا كسودانيين في امريكا مثلا، مقارنة بالاخرين فهكذا اسلوب بكون مدمر وخطر جدا، بلا مردود.
نعم احنا سودانيين اولا بالذات في المهاجر او بعد داك كيزان وماشابه.
غايتو لي روحي انتبهتا لي كيف طريقة تفكير الاشعث، اغبر، منا، وبالذات الما فكا حرف الاستلاب، حقيقة هو المرجع، والمعيار، في كل شئ، كقاعدة، وليس المثقفاتي، والعياذ بامون من المثقفاتي حقيقة، بل كل من فكا الحرف!
مابعرف يا محجوب، ولكن بعد عمر بقيت عندي جواي رهبة وتقدير شديد جدا للكبار، بالذات الما اتسجمو بالمدارس والقراية!
لهؤلاء مخزون كبير من ارثنا مقارنة بي ابان كرفتات!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
"ومثل هكذا سلوك "
سلام يا بشاشة..
واتفق معك فى الرأى بخصوص السودانيين. ولكن هناك الأمريكان الذين أدوا قسم الولاء لوطنهم الجديد.. وهؤلاء لا اجد مجالا للولمهم.
بس العبارة الفوق دى لغة الشوام وليست لغة عربية.ِ ولا تشبهك انت السودانى الكوشى حتى النخاع.
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Abureesh)
|
اذن انا كمال بشاشا ارفض وبشدة مطاردة سوداني لي سوداني اخر في المهاجر، لانو كوز، قدم للجوء، وماشابه.
حبيبنا بشاشا .. أوافقك الرأي ..
حتى هنا في السعودية حدثت بلاغات ضد بعض الاخوان بسبب التنافس السياسي
وتم إبعادهم ..
شكراً كثير بشاشا .. اصيل يا بشاشا
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: علي عبدالوهاب عثمان)
|
تحياتي الخاصة لك ايها الكوشي بشبش والاشواق معآ .
والتحية موصلة للاخ العزيز علي عبد الوهاب ومشكور
جزيل الشكر علي الحقانية .
حتى هنا في السعودية حدثت بلاغات ضد بعض
الاخوان بسبب التنافس السياسي وتم إبعادهم ..
هل الأخ العزيز بشاشا لم يعرف هذا الموضوع ؟
وما زال اخونا القاسم في زنازين النظام ! ما رأي الحبيب
بشاشا ؟
ولكم الشكر ,,,,
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: عماد الدين الطيب عمر)
|
ابو الريش تحياتي.
وهل قسم الولا يعني ان نمارس بعض كسودانيين في شوارع امريكا؟
ان نتجسس نتحسس ونترصد بعض؟
ده كلام وين يا ابو الريش وانت تلميذ الشهيد محمود؟
معليش اختلف معاك في فهمك للنظام المعمول بيهو في امريكا اللي قوانينا بتحمي خصوصية الفردِ.
اخوك معلم بالمناسبة في ردهات محاكم امريكا ونظاما القضائي هزمت فيها حتي محامين انا العنقالي بالدقيق!
كلامك ده عيب بل عار ومقزز يا ابو الريش بالذات من جمهوري افتراضا.
ماتنسي في امريكا كلنا حتة "نقروز" والان ارهابيين راسمالنا طلقة واحدة غير طائشة من نظامي ووفقا للدستور!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Ali Abdalla)
|
سلام
اذن انا كمال بشاشا ارفض وبشدة مطاردة سوداني لي سوداني اخر في المهاجر، لانو كوز، قدم للجوء، وماشابه.
كوز مقدم لجوء وطالب الحماية من منو...معقول بس يتسبب في إيذاء اللاجئين جوه وبره
عليك الامان بعضهم لم يبت في قضية اللجوء و يكون نشط لحماية النظام بما فيها مد النظام بكل صغيرة وكبيرة الحساب ليس من اجل التبليغ عنه لانه منتمي للنظام..لكن من اجل الحماية....في قصة شاب من بورندي او رواندا مقدم لجوء وقد منح الحماية...لكن تم التعرف عليه من قبل اسرة كان قد قتل معظم افرادها...اها الكوز الزي دا يسكتوا عليه ولا كيف...صعب التواصل كسوداني مع اتباع القتله وبالتاكيد يتم استغلالك ...
نظام الكيزان ليس كاي نظام...سياستهم نحن والطوفان
راي بصراحة لا يعطى الامان من افقدك الامان
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: عمر نملة)
|
تحياتي بشاشا
وضيوفه
خشيت اعلق علي جزئية صغير في معرض حديثك
وقولك دون اقتباس سوي التي باللون الاحمر
ترفض رفع الحظر رغم الثمن الباهظ الذي يدفعه المواطن العادي لأن رفع الحظر يجعل السلطة تتماهي في غرورها
اعتقد ان غرور السلطة لا سقف لها وتؤكده كل يوم . والثمن الباهظ لا يساوي الغرور
تماهي الغرور استشكل علي كتركيب لغوي ولكني اعتمدت علي معني الغرور المعروف
أكيد الاحترام والتقدير
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Ali Abdalla)
|
العاطفة والانفعالية التي يتسم بها (البعض ) كطبع وكجبلّه هي سبب هذا الخلط شخص عاطفي انفعالي تتحكم فيه مشاعره الفردية لازم يرضى بمقعده ضمن المتفرجين لأن الممارسة السياسية والأحكام التي تنبي عليها المصالح السياسية ده شغل عنده قانون لا ينفع فيه هكذا أطروحات عاطفية الأمر ده بلا شك سلوك فردي بحت ومابنقدر نعممه وأصحابه لاينفع انه يتحدثوا باسم المعارضة ثم هب انك عايز تبلّغ عن زول بيساند النظام وعايز تضره مقابل انه (النظام ) سبب الضرر لأناس من المعارضة طيب وين الانصاف هنا انت خليت النظام وبتسبب الضرر لفرد بيسانده !! هل النقطة دي فيها اي انصاف ؟ ثم هل الزول ده مقطوع من شجرة اليس له زوجة أبناء أسرة أها ديل حتعمل معاهم شنو ؟ وجريرتهم شنو إنك عشان عايز تسبب ضرر لعائلهم تقوم تضرهم هم في صمة خشومم ؟ لا اخلاقيا ولا عمليا الكلام ده ما جاي عشان كده أي شخص تتحكم فيه عواطفه مشاعره انفعالاته أخير ليهو يتفرج من بعيد ومايقرّب من شغل ساس يسوس لانه ده عنده قانون تاني خالص بعدين هل النظام وسدنته قدوة لك انت كمعارض ؟ عشان تباريهم وتكون حذوهم المنكب بالمنكب ؟ في كل تصرفاتهم وافعالهم طيب الشكوى من مخازي النظام في شنو وانت لا فرق بينك وبينه وبين مايفعل وما تفعل حتكونوا وقتها أحمد وحاج أحمد !! لافرق البتة أخير العايز يتحدث باسم المعارضة يرتفي بفكره شوية أو زي ما قلنا يتفرج من بعيد ويدعم عاطفيا لانه ده المتوفر عنده وحظه مايملك أحييك يا بشاشا على بُعد نظرك وياهو ده الكلام أما الناس العايزة تهدد وتبلّغ على السودانيين في المهاجر لانهم بيساندوا النظام ده شغل بتاع عيال ليس إلا ...
المصيبة وين !! ..
احتمال انك تقدر تسبب ضرر لشخص في دول مثل أمريكا بسبب توجه سياسي احتمال ضئيل واغلبه شغل بتاع تهويش في اقرب محك بيطلع فشوش وقتها بيكون الزول فقد الجلد والسقط ومرق كيت أو كما يقولون لا قدر سبب الضرر الهو عايزه ونفّس حقده وحنقه بصورة فردية ولا احتفظ بمباديء وقيم فقدها الكيزان ولازم يتحلى بيها من يطرح نفسه كبديل للنظام الخبوب الحاكم البلد ده والا مصيبتنا حتكون مكندكة بالرماد !! ..
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: جمال ود القوز)
|
ترحيب حار بي كل المشاركين هنا لما اجيكم فردا فرد لأهمية هذا الموضوع.
لحدي ما ارجع في نقطة جانبيه مهمة:
بعض الناشطين السودانيين في امريكا للاسف الشديد او بي سذاجة شديده بينظروا لي امريكا كمنقذ الهي وبالتالي بعضهم يدعو علنا لتدخلا بكل السبل في السودان لازاله نظام القتلة او بي كده يتم انجاز مشروع البديل يا للنكتة بحق عشان هم يمشو يستلمو الكراسي الراجياهم!
من دون أسماء بتكلم عن معرفة لصيغة بي طريقة تفكير بعض المنخرطين في المنظمات الأمريكية من السودانيين اللي في وعيهم هذه المنظمات الأمريكية مصممة لخدمة مهمشي الحلابة وهذا مرعب حقيقه!
بالنسبه لي امريكا ولا أوربا ولا العرب ده افضل نظام ممكن يحلمو بيهو هؤلاء علي الاطلاق في العالم كلو لخدمة مصالحم كأفضل ما تكون الخدمة او بلوشي وهذا من حقهم اعترف وكتابة!
اي كلام او فهم مثالي اخر لهذه الطموحات الاستعمارية من هذه الدول انما يعبر عن ويعكس سذاجة وعبط هؤلاء من جانب وفساد بعض المتنطعين البنطلقو في انخراضم في عمل هذه المنظمات من منطلق تطلعات شخصية نفعيه أنانية ذاتية خالصه لوجه المصالح الشخصية كما هو حال عدد هائل من حاملي السلاح في دارفور من امثال اب قردة او غيرو بغرض الوصول الي قصر غردون والسلام!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
| Quote: حتى هنا في السعودية حدثت بلاغات ضد بعض الاخوان بسبب التنافس السياسي وتم إبعادهم .. |
علي عبدالوهاب يامراحب.
نعم ويا للاسف البعض بيستخدم شعارات البديل كوسيلة لتصفية حسابات طموحات شخصية وهذا مدمر.
السياسة بعامة وهذا ما تعلمتو في امريكا هي اعفن واقذر مجال، وهذا واضح في نظرة الفرد العادي هنا للسياسي، وهذا قطع شك ساهم بقدر كبير في انتشار المعيار الموضوعي العاقل الغير عاطفي لي طرح المرشح من منطلق مصلحة الناخب الشخصية كفرد وكمواطن وهذا ما نفتقده بشدة في السودان وكنتيجة الصادق والميرغني هيمنو علي الساحة هيمنة مطلقة من دون اداء او محاسبة وكنتيجة برزو المغامرين لملئ الفراغ من امثال اب عاج، البشير، زينكو، ورامبو، وماشابه!
المصيبة كمان ناسنا في المعارضة ما بقبلو نقد كهذا، مع انو محوري واساسي واقل تكلفة!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
| Quote: هل الأخ العزيز بشاشا لم يعرف هذا الموضوع ؟ وما زال اخونا القاسم في زنازين النظام ! ما رأي الحبيب بشاشا ؟ |
اميرتنا بت عمسيب مرحب بيكي او لي قدام,
نعم هذه اخلاق الكيزان ياعزيزة فلا جديد هنا.
الجديد بي معني مغاير او مختلف هي دعوتنا هذه للمعارضة بان تستلهم ارث شعبنا في شرف الخصومة وليس ارث شيطان الجرة الوافد والدخيل، لو كانت المعارضة هي البديل بالفعل والسلوك مش بالرغي الاجوف!
كالعادة شئ مكلف جدا متي ما اتصل الامر بالسلوك والممارسة مش ورجغة الوهابية.
بالعدم ما الفرق؟
كيف كمعارضة نتبني ذات اساليب اذلام نظام القتلة لنكون البديل في نفس الوكت؟
قطعا هذا مزاح!
اها العين بالعين ده، هو قانون حمورابي الاري، وليس ارثنا نحن تلاميذ البرعي... الياقوت، ازرق طيبة!
ايوا زي ماقال يوريكا طبك!
كلام مثالي؟
ده كلام الغبش!
اذن حتي بالارقام كحساب سياسي كده بنربح اذا لابد من التضريب!
اذن اخوكي واعي وعارف الكوز ممكن يصل ياتو حد في الانحدار لما يخاصم، ولكن الاسلاموي كقاعدة ماسوداني من حيث طريقة التفكير، وبالتالي نموذجو مامعيار ولا ينبغي لنا كمعارضة سودانية 100 المية طارحة روحا كبديل جد جد، بي معني سوداني بالفهم البسيط للمفردة دي في وعي ادروب، ادمو، فطومة، ومحمد احمد!
طولي بالك او ياريتك تواصلي باعتبارك من ابرز رموزنا في هذا الفضاء.
معزتي.
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: كمال عباس)
|
السنوسي بدر مشتاقين او مرحب بيك،
غايتو لي روحي انا امريكي من حيث التكييف القانوني لوجودي هنا وليس الا، اذا بنتكلم عن واقع الحياة اليومية كمعيار وبالتالي انا "افريقيون حر" علي قول وردي، حدث اوكان موجود في امريكا لاي سبب زي ماقال المارد مالكوم بعد اكثر من 400 سنة اقامة في امريكا!
ده قبل مايكون راي او كلامي فهي عقيدة مش فقط راي امثال ساكن البيت "الابيض" اي رئيس امريكا ذات نفسها مرشح الKKK اللي لايمكن يجي يوم، ينظر فيه امثالو لامثالنا من "النقروز" كامريكيين علي الاطلاق، وهذه حقيقة عايشتها وتنفستها كما الهواء بطول وعرض 30 سنة في امريكا!
اذن اي سوداني يتوهم روحو كامريكي ولا الماني، ولا انجليزي فاعلم انو كاره زاتو كالمعتاد، او بي كده حيغتس او يطش اكتر!
الطريف البعض في اليمين ابتدا ينظر لامثالنا في حركة الوعي الكوشي المندفعة بقوة ومجتاحة لشوارع امريكا في اوساط اهلنا افارقة امريكا، كحليف منتظر لليمين الجديد بتاع "طرمبة" اي مايعرف الان بALT Right وهذا عجيب بحق!
انا عارف كويس هم قاصدين شنو او جايين من وين بي كلامم ده، بس ده ما محلو!
لما اجي المنبر واقرا كلام ناس الخواض اوناس الشامي، راسي بلف قصبا عني لاننا فعلا كسودانيين عايشين في عالم ودنيا اخري تماما يا للماساة!
العالم باسرو الان واللحظة يسطرع حول تاريخنا وارثنا الحضاري ونحن اخر من يعلم وهذا عجيب، بل مخيف بحق!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
| Quote: اعتقد ان غرور السلطة لا سقف لها وتؤكده كل يوم |
ود اب سن يامراحب،
ياعزيزي لغة الغزاة العرب هذه، الاعجمية مالغتي وان كنتا اجيدا بافضل من ايا من ملوك ال سعود.
غرضي اقول رفع العقوبات حيخلي النظام يشطح ضمة، بدل ما يتراجع لو كان ذكي، ولكن من اين له الذكاء، وهو من اباد الملايين، شلع السودان، ودمر شخصية السوداني التاريخية.
لوكنتا مكان البشير اليوم التالي لرفع العقوبات كنت قدمت استقالتي ودعيت الجميع لمؤتمر دستوري مع تشكيل حكومة انتقالية بتاعة تكنوغراض، مع الاعلان صراحة استعدادو للمساءلة القانونية اللي مفروض تشمل الكل من 56م.
بي كده كان طلع من كابوس لاهاي الحامي النوم وكنتيجة السودان باسرو في مهب الريح كثمن لانو مرعوب او خايف وهو الجندي افتراضا يا للعار!
رفع العقوبات للاسف مطلب شعبي بطول وعرض البلاد بغض النظر عن راي امثالنا، وهذه حقيقة!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
ود القوز ياجمال مشتاقين،
بالنسبة للانفعال من بعض اقطاب المعارضة في مواجهة الكيزان فهذا متوقع لاننا بشر، والبسو فيهو هؤلاء الفسدة الفسقة طبيعي يولد ردود افعال احيانا عنيفة.
اها دي فرصة نسلط الضوء ونستفيد من الدرس ده، بي اننا ما ننجرف اطلاقا لنطارد الكيزان في المهاجر او بي كده نبقي زيهم نمارس الفجور في الخصومة حد القتل غدرا حتي في دور العلم، للعزل، باستخدام سلطة الدولة الباطشة واجهزتا الاجرامية في مواجهة افراد سلفا مشردين في معسكرات الذل في ارض اجدادم.
اذن دعونا نتعلم ونتعظ من التجربة دي الدفعت ببعضنا حد المطالبة بمطاردة الكيزان الجو لاحقننا في المنافي، بعد ما خلينا ليهم السودان بي اكملو.
هذه دعوة للتامل والتفكير بي اعصاب باردة هادئة، باستلهام ارثنا المستهدف بواسطة شياطين الجرة هؤلاء!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
| Quote: ولكن وبحسب إطلاعي فإنه لا أحد إستهدف إي كوز في أمريكا لمجرد إنه كوز ! |
كمال ودعباس يامراحب.
التحية ليك او اميرتنا بت عمسيت كابرز رموز المعارضة في هذا الفضاء.
نعم ياعزيزي الدعوة لمطاردة الكيزان في امريكا صدرت من البعض في المعارضة وهناك اكثر من بوست للاسف يحرض علي الكيزان كافراد باعتبارم ارهابيين او بقدمو لللجوء وهذا عار للاسف!
خد عندك كمثال قول واحد:
واشنطن: مخاوف كيزانية من ترحيل كيزان من أمريكا - صور وفيديوهات وأسماء واشنطن: مخاوف كيزانية من ترحيل كيزان من أمريكا - صور وفيديوهات وأسماء
نعم دعوة لترحيل سودانيين باعتبارم ارهابيين بتحريض منظمات امريكية للقيام بهذا الدور وهذا عار.
ده هو المقصود في كلامنا في الخيط ده.
حنقعد نسك بعض في المحاكم كسودانيين بنقل معاركنا داخل السودان حول العالم فيما بينا كافراد؟
عشان نستفيد شنو مثلا من كده كمعارضة مقدمة روحا كبديل لنظام القتلة؟
الفرق شنو مابين اي كوز واي معارض بيعمل كده لتصفية حساباتو الشخصية؟
هو ماعشان كده امامنا المهدي قال:
الفشا غبينتو خرب مدينتو!
مدينتو هنا تعني الشعارات الافلاطونية المرفوعة بواسطة المعارضة، اللي للاسف كما صنم عمر المصنوع من العجوة، لما يجوع البعض منا، بروح من دون مايرمش، قارش صنم شعاراتو عشان يترع او يسوي باع بي طول حسو!
قطعا المهدي الامام ما كان رجل عادي فيما اتصل بالعمل الجماهيري قياسا بما انجزو من دون تلفزيون، اذاعة، تلفون، افون، وطساب، فيسبوك،...الخ!
نعم الرجل اشعل ثورة هزت اركان العالم باسره بي قدرتو العجيبة علي التواصل مع الجماهير بالحدس، بالقلب، اي بالحاسة السادسة!
....يتبع....
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
| Quote: من إثار هذه القضية قصد من الكوز الذي تحصل علي اللجوء السياسي بإعتباره ضحية للتعذيبوالإستهداف وأنه حياته في خطر |
نواصل مع ابو الكيم:
يعني ماعندك مانع تطارد الكوز اللي تحصل علي الاقامة بواسطة اللجوء السياسي؟
لو كده، فالمشكلة كلها هنا!
طيب علي كده او يقوم الكوز كرد فعل ينبش فايل الضرائب بتاعتك ليثبت تزويرك، او يرصد حصولك علي اعانة من الحكومة بالتزوير وهكذا!
اها او كده احنا جايين نغير النظام في الخرطوم؟
هل مخلوق بصل مراحل زي دي من الدرك السحيق في الفجور في الخصومة يؤتمن علي مصالح شعبو وصولجان السلطة في يدو؟
طيب لوكده، قطع شك رجل الشارع حيقول مايقعدو امثال نافع ويواصلو ذات اسلوبم البشع الفاجر في ادارة الصراع مع خصومم لو البديل لايختلف عنو في شي؟
عارف لما ازور السودان واتشبك مع كباري ضد النظام كانو بقولو لي ديل حرامية اكلو او شبعو، والمعارضة حرامية، فليه نرجاهم من اول وجديد ياكلو او يشبعو؟
وقع ليك كلام الغبش؟
عرفتا سر بقاء النظام المتمثل في ضعف نموذج المعارضة في تصور عامة الناس اللي ماشايفة اي فرق يذكر بين الاتنين؟
خد عندك واحد زي عرمان، فرقو شنو من نافع؟
واحد زي الصادق، هو الاكثر شطط في تعاليه علي قواعدو في الهامش وتعصبو لي وهم العروبة وبالتالي هو كوز اكتر من الكيزان وانغازي باكثر من الانغازيين مجتمعين!
اذن لازم المعارضة تضرب مثل لرجل وامراة الشارع في الالتزام الصارم بي اخلاقنا كسودانيين مش تعيد انتاج ذات نموذج نظام القتلة من اول وجديدوهي مقدمة روحا كبديل؟
اي بديل هذا؟!
...يتبع...
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
اذن ياكمال، ان نترصد سودانيين زينا بعيد عن ديارنا بالنبش في خصوصيات حياتم الخاصة، ومن ثم تحريض المنظمات الامريكية عليهم لمطاردتم، غير يمزق نسيجنا الاجتماعي ويولع النيران بينا كافراد، مابفيد في شئ.
بالذات لما نضع الثمن الباهظ للفاتورة دي في الاعتبار، للخصم من رصيد سلفا مكشوف اي بالسالب اي بالاحمر بي لغة المحاسبة والبنوك، فقطع شك الحساب حيتسمكر اي حيتشمع من قبل الناخب اي البنك!
هذا لايشبهنا كسودانيين، مدمر، مكلف، ولايفيد بي شئ علي الاطلاق!
بالعدم عليك الله وريني الحكمة من طيش كهذا، وفجور كهذا في الخصومة؟
او قبلها منو الحياتمن مخلوق كهذا دي اخلاقو علي حياتو كناخب، او كمان يسلمو مقاليد السلطة، يا للهول؟
منو؟
عارف من القصص البحكوها عن ازهري رئيس مجلس السيادة، انو مرة او معاهو المحجوب، قبل مايسوقو المحجوب البيت بالعربية في نهاية يوم العمل، ازهري قالو قال للمحجوب عايز امشي مستشفي الخرطوم ازور قريبي لكني خايف الغفير يمنعني من الدخول لو وصلنا متاخرين، فياخي ارح نمشي بسرعة!
هذا مانعني بارثنا الحضاري كسودانيين اللي احنا كمعارضة ملزمين باحياؤ، ببعثو، وتقديمو كبديل في سلوكنا كافراد ونحن في موقع مسؤولية!
اها شفتا الفرق؟
ده كلام غريب ياكمال ان يصدر من امثالك!
معقولة واحد مننا تربي علي نموذج شخصية الازهري يعمل كده في سوداني اخر، لانو كوز؟
معقولة يا كمال؟
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
عارف يا ابو الكيم، من القصص العايشتها بي نفسي وانا يافع في دنقلا، البتمثل ذبدة وعصارة ارثنا الحضاري بالذات في ادارة الصراع،
كيف الشاكي والمشتكي في قضايا الاراضي كانو بصلو الفجر حاضر سو، يركبو حميرم الاتنين سوا، يغنو شويتين، او يمدحو شويتين علي مدي 6 ساعات احيانا
لما يصلو المحكمة والجلسة تبدا، لتبدا المعركة القانونية الشرسة مابين الخصمين!
بي نهاية الجلسة بيمشو المطعم في القولد بحري، اها تعال شوف المصارعة الماخمج بتاعة اهلنا في الجبال بين الخصمين ديل افتراضا، كل واحد فيهم بحاول يقلع محفظة "خصمو" عشان يمنعو من الدفع!
ليه؟
عايز يدفع هو!
مرة اتنين منهم دقو الدلجة عديل بتصارعو قدام المطعم كل واحد مصر يدفع الفاتورة كاملة!
ياهم ديل، اهلي!
نعم اهو ده، مغزي شرف الخصومة في ارثنا، لاننا بحق وبرغم انف جنون البقر الحالي، شعب عريق بمعني المفردة!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: عبدالحفيظ ابوسن)
|
سلام ياعزيزنا بشاشة قلت
((( ده كلام غريب ياكمال ان يصدر من امثالك!
معقولة واحد مننا تربي علي نموذج شخصية الازهري يعمل كده في سوداني اخر، لانو كوز؟ )))
,,,,,,,,,,
يعني ماعندك مانع تطارد الكوز اللي تحصل علي الاقامة بواسطة اللجوء السياسي؟
أنا لم أقول إني أتبني هذا المفهوم أو أدعو له ! من وين جبت الكلام دا ؟
أنا قلت إنو دا فهمي لرؤية الناس اللي القالو الكلام دا !! قلت الجماعة ديل ماإستهدفوا الكوز
لمجرد إنو كوز ! والدليل إنهم ماتعرضو للكوز اللي جاء عن طريق زواج أو لوتري وإنما إستهدفوا
" الكوز الذي تحصل علي اللجوء السياسي بإعتباره ضحية للتعذيبوالإستهداف وأنه حياته في خطر ثم عاد ليمجد نظام القتلة ويصف من ساعدوه في الحصولعلي اللجوء بالخونة والعملاء ! - يقصد من زور ولفق للحصول علي لجوء لايستحقه وإستمرفي دعم نظام الإنقاذ !"
** وقلت إنو هناك نموذج لمعارض آخر ب قام ويقوم بمساعدة كيزان بالحصول علي اللجوء بدعوي إنه أنصاري أو إتحادي وما أن يحصل علي لجوء حتي يعض اليد التي ساعدته في كيزاللجوء ويصفه بالعمالة والإرتزاق ومع هذا لايمارس هذا المعارض الكيد ويسعي الوقيعة بالكوزبل يقول أنا ماب أقطع رزق زول ويراعي للأسرة والأطفال !........)
دا كلامي وهو واضح لايقبل مزائدة يابشاشة !
وكلامك دا قلناه لما السعودية صنفت الأخوان تنظيم إرهابي قلنا مامفترض واحد يستغل الحكاية
دي لتصفية حساب أو لكيد سياسي ويقوم باللجوء بالسلطات واشيا بأن فلان أخو مسلم
_( لوح البعض بهذا الأمر ولم يفعلوه) وإنما فعل ذلك الكيزان في السعودية والأمارات !
إنتهي
نجي لموضوع آخر مختلف نوعيا
مسألة نحن سودانيين يجب أن نتحلي بقيمنا ونحل خلافتنا في الغربة بالروح السودانية السمحة
جيد ولكنه ليس علي إطلاقه !
يعني لي شفت سوداني يسرق وينصب ويحتال وبإستمرار حاتتستر عليهو لمجرد إنو سوداني؟
لو إكتشفت سوداني داعش فجر ودمر أو خطط للتدمير والقتل حاتسكت وتقول أديهوحصانة
لأنو سوداني !؟
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: كمال عباس)
|
من القصص العايشتها بي نفسي وانا يافع في دنقلا، البتمثل ذبدة وعصارة ارثنا الحضاري بالذات في ادارة الصراع،
كيف الشاكي والمشتكي في قضايا الاراضي كانو بصلو الفجر حاضر سو، يركبو حميرم الاتنين سوا، يغنو شويتين، او يمدحو شويتين علي مدي 6 ساعات احيانا
لما يصلو المحكمة والجلسة تبدا، لتبدا المعركة القانونية الشرسة مابين الخصمين!
بي نهاية الجلسة بيمشو المطعم في القولد بحري، اها تعال شوف المصارعة الماخمج بتاعة اهلنا في الجبال بين الخصمين ديل افتراضا، كل واحد فيهم بحاول يقلع محفظة "خصمو" عشان يمنعو من الدفع!
==========================
يا سلام يا بشاشا أصيل .. نعم هذا نموذج حي لأهلنا
لم يكن الخصام إلى درجة الفجور إطلاقاً .. ورضا تام بالحكم
ولم يكن هناك تغول أو أخذ الحق بالقوة
والمهم كان التسامح .. يرجعوا من المحكمة سوا كما ذكرت
وهذا هو التسامح .. حبيبنا بشاشا .. قيمة التسامح كانت عالية لديهم لأن هذه القيمة
موروثة عبر الاديان التي مرت على المنطقة ..
صدقني حبيبنا بشاشا التربال مصطلح مهم وعالي القيمة ومترع بالاصالة والحب والتسامح والامانة
ومن معيب عندنا تتشفى من المقهور أو المهزوم ..
شكراً بشاشا أمبس .. لقد توقفت طويلاً على الصورة التي رسمتها لنموذج الخلاف ومثالية السلوك
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: محمد حمزة الحسين)
|
نواصل بعضا من قصص أزهري القالو كان بديري زيي كده زي ماقالو لي في المنبر ده من نيجيريا:
قالو مرة دقو الباب ضيوف. ست الدار مش واحد من الشفع فتحت الباب او رحبت بالضيوف كالمعتاد.
اها في الصالون رئيسة حكومة الأسرة نادت الزعيم لي جو او قالت ليهو ما في سكر في البيت!
الزعيم جا مارق او قال للضيوف عن ازنكم دقيقة بي نفسو او ما رسل واحد من الشفع!
نعم الزعيم ورئيس مجلس السيادة ماشي الدكان كدر يا خلق امعانا في اكرام ضيوفو!
نعم بي نفسو !
ياالهي!!
نعم بالجلابيه من دون حرص كركول او مزيقا عشان يجيب السكر من دكان الحي او ما بعيد بالجروره!
حولا ولاقوه!
بالله دموعي رقرقت!
شي عجيب بي معايير عصر شيطان الجره!
كلنا قربنا جوابات ازهري او هو بكوس يتسلف من الأغنياء من "رعاياه"!
ياريت كلنا ياسودانيين نقيف هنا ونديها صنه!
كلنا قطع شك بالذات مواليد الخمسينات والستينات فتحنا علي الواقع الانجب نموذج هذا الرجل!
علي الاقل مكان نشاتا في دنقلا لما ظهر طرح شياطين الجرة هؤلاء الدمرو نموذج ازهري فينا عايشت وعن قرب رد فعل غمار الناس علي هذا الطرح الوافد. العجيب بحق والغريب علي ارثهم الجسدو نموزج الزعيم!
ايوا والله انا عايشت ردود افعال الغبش من اهلي علي ترهات الوهابية واسلامم الوافد والغريب!
حقيقه انا زول محظوظ بالجد شفتا اشياء بالعين المجردة ياريت لو كان بيدي الزمن داك أوثق كل هذا ياريت!
شي عجيب بحق!
فيا معارضة فلو عايزين ترمو نموذج سلوك وشخصية ازهري في القمامة لتستبدلوهو بي نموذج علي عثمان فليبقي علي عثمان مكان ما قاعد لمن يجي البديل الفعلي المستنبط من اروع ما فينا من قيم منذ عصر الاهرامات!
لا يمكن الاسلام السياسي ينجب ويقدم زي نموذج سلوك الازهري علي الاطلاق!
علي العكس شيطان الجرة هذا نبت كما السلعلع في ديارنا للقضاء علي هذا النموذج واذا به يذهب الي مذبله التاريخ ليبقي نموذج الياقوت ازرق طيبة شيخنا البرعي فينا باعتبارو الاصل والفصل مهما قبر مؤقتا!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
بالضبط كدة يا بشاشا الاسلام السياسي هو تناقض وتنافي مع القيم والموروث الإيجابي استفاد أركان. وكوادر الإنقاذ من التعليم المجاني والداخلية المجان واللقمة المجان والكتاب المجان. ولكن وما ان وثبوا للسلطة
نسفوا مجانية العلاج والتعليم وأضطروا الناس للتسول. لدفع رسوم الدراسة وروشتة العلاج
^ بل وصلت الوقاحة بالبشير بان أمتن علينا بأننا عرفنا الهوت دوق في عهد الإنقاذ وواصل نائبه. السابق الحاج آدم الوقاحة قائلا اننا لم نكن لم سوي غيار واحد قبل الإنقاذ والآن. دواليبنا مليانة هدوم. بفضل الإنقاذ ؟! اما مصطفي. عثمان اسماعيل فقد وصف وشبه شعبنا قبل الإنقاذ بالشحاديين !!
البشير الذي. أعلن في مطلع عهد الإنقاذ انه يسكن بيت شعبي بكوبر كشف في لقاء إعلامي عن بعض عقاراته بيوت في كافوري وبيت في المعمورة وشقة في مجمع النصر الفاخر ومزرعة في السليت !!
البشير وعصابته هم اذلوا الشعب وافقروه. وأثروا ثراء مشبوه ومجهول المصدر وهم من فصل الآلاف من العمل وقطعو ا الارزاق. وهجروا الناس في المنافي وطاردوا بعضهم ووشوا بهم لدي الدول الآخري واحضروهم
من هناك لسجون السودان
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: كمال عباس)
|
| Quote: فيا معارضة فلو عايزين ترمو نموذج سلوك وشخصية ازهري في القمامة لتستبدلوهو بي نموذج علي عثمان فليبقي علي عثمان مكان ما قاعد لمن يجي البديل الفعلي المستنبط من اروع ما فينا من قيم منذ عصر الاهرامات! |
شكرا" بشاشا وأنت تعيد لنا بعض من
سودانيتنا المنتهكه من قبل بني كوز
وبعض معارضيهم ...
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
تحياتى و تقديرى الاخ بشاشا ..
اطلعت على كل البوست تقريبا .. اتفق معك فى معظم ما ذهبت اليه فى هذا البوست ..
للسودانيين ان يتعاملوا بوعى تجاه بعضهم البعض .. معارضة كانوا و حكومة او ما بينهما و ذلك من أجل السودان ..
بكل اسف .. كثير من المعارضين الذين يتعاملون بشطط و شراسة تجاه قادة الانقاذ ..
سرعان ما يذهبون الى السودان و تجدهم يجالسونهم فى السر غير العلن .. و يتوددون لهم .. و يطلبون منهم ما لا تتخيله ..
نود ان نكون مخلصين .. و يكون موقفنا فى السر كما هو فى العلن .. !!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: الطيب رحمه قريمان)
|
| Quote: الفين سلام بشاشا. انا اقبل كلامك لو للكيزان نفس فهمك. |
عبدالله محمد احمد تحياتي،
كلامي ده لازم نقبلو من دون شروط مع تقديري انو ماشيتن ساهل.
نعم لازم نكون مبدأيين مش فقط في الطرح وانما الممارسة.
الكيزان ماعندهم فهم زي ده ولايمكن يكون عندهم فهم زي ده وهذا للوهلة الاولي مدهش او محير لما نضع الاعتبار كيف انهم مقدمين روحم كظل لله في ارضه!
كيف الرافعين شعار دولة لا اله الا الله يكونو افسد من مشي علي قدمين؟
اليس هذا عجيب؟
نعم في عرفهم انسان في نموذج ازهري مثلا وبكل طهرو او نقاؤو ما مسلم او نموذج للانسان الرسالي بي فهمم!!
نعم هم جو لقبر نموذج ازهري وبعث نموذج امثال نافع!
منطق عجيب ولكنو يحكي عن الكثير جدا، المثير، المركب، والبسيط!
زي ماقتا وانا يافع في دنقلا انتبهت للرفض القاطع لطريقة تفكير هؤلاء لدي البسطاء الكانو بستغربو جدا او بضحكو من كلام هؤلاء، بالسليقة كده او بالفطرة!
اليك هذا الدواس الفكري كنموذج اللي شهدتو في الستينات وانا يافع مابين واحد من جدودي او كباري مع الوهابي الوحيد في الحلة وهو ايضا من كبارنا:
قال ليهو "اي الوهابي" مامعناه، بتمشي مع النسوان ليه وانتا راجل؟
اها جدنا ده متعود مع عدد من اماتنا، يمشو السوق في منطقة مجاورة كمجموعة كل اسبوع في شكل سيرة علي ظهور الحمير اخر ونسة او بي مزاج!
الوهابي المنظر ده فرق معاهو شديد!
تفتكر جدنا كان ردو شنو؟
قال للوهابي، ما معناهو والكلام بي لغتنا الكوشية النوبية لهجة دنقلا:
وهل الراجل المابمشي مع النسوان كمان راجل؟
نعم تاملو بلاغة هذا الرد المحتاج لي مجلد كامل لشرحو!
نعم براك شوف عزيزي القارئي ماذا كانت نتيجة الفصل مابين النوعين في المجتمع الوهابي كمثال فقط في السعودية، اللي ادت لتفشي ظاهرة الشذوذ الجنسي اللي ممكن تعطل دورة انتاج الحياة بي اكملا!
زي ما قتا النقطة دي عايزة مجلد بي حالو لشرحها!
نعم في مجتمع دنقلا كنا حتي في سن المراهقة مش بنختلط بل بنلعب في ضو القميرة حتي منتصف الليل احيانا اولاد وبنات!
اها كالفورنيا دي مافيها كلام زي ده!
لاحظ بعد ده، علي الاقل لحدي جيلنا، في مجتمع دنقلا الرجل والمراة بكونو "عذراء" كقاعدة الي يوم الدخلة!!!
ياالهي!
عزيزي القارئي،
ليه باستمرار انا بستشهد بالمجتمع الولدتا واتربيت فيهو؟
عشان اووكد الكلام ده منطلقو هو ارثنا نحن في السودان، مش امريكا، شغل استنارة، رقي، تحضر، تقدمية، حداثة، وماشابه من ترهات وعي الانبهار الاستلابي!
انا كمال بشاشا اشهد اني ابن دنقلا في كل مايخطه يراعنا هنا، مهما بدا للبعض غريب او مختلف!
اضيف ايضا، انا كمال بشاشا اشهد باني تربية امات باكتر من ابائي عليهم شابيب الرحمة!
نعم تاثير اماتي علي كان طاغي جدا جدا، وهذا يوضح جانب اخر غير مطروق في مجتمعات الريف بعامة في كافة السودان وليس فقط دنقلا!
قال ول ابا قال، مش ود امي!
قيم مجتمع رعوي قطع شك يابريمة ادم الذكوري!
اخير اقيف هنا!!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
| Quote: الاختلافات السياسية بيننا نحن كـ سودانيين نقلناها معانا للخارج |
عماد الدين الطيب مرحب بيك
كسودانيين من ابرز سمات شخصيتنا التاريخية هي التكاتف والتعاضد عكس انسان الشمال خريج كهوف التلج، اللي ابرز سمات شخصيتو الفردية، والفردية المطلقة!
لكل من السمتين ديل ايجابياتا او سلبياتا لما "البندول" مايكون في نصفو الذهبي!
النيل لعب دور اساسي في تشكيل هذه النزعة الجماعية لمواجهة مخاطر الفيضان بحكم اسلوب المعيشة اي الزراعة مقابل اسلوب الرعي في الشمال الكوني.
بناءا عليه بعيد من بلدنا راسمالك كسوداني حقيقة هو اخوك السوداني وهذا واقع معاش بواسطتنا جميعا في المهاجر.
الخصومة علي مستوي السلوك والممارسة حد المواجهة والمقاطعة مش الصراع الفكري في منابرو علي اساس سياسي او حتي عقدي غريب، وافد، دخيل، ولايشبهنا قط بالذات في الغربة.
غير انو ده مابخدم اي غرض رغم الثمن الفادح.
يعني شنو تطارد سوداني لانو كوز، تبلغ عنو، عشان يقبضو، يحاكمو او بعد داك يطردو؟
ماهذا؟
عشان تصل لي شنو بالضبط كمعارض للنظام بي سلوكك الغريب ده؟
هل اهلنا في السودان في الشارع بقبلو عيب كهذا منك، كمعارض للنظام او بي كده يصطفو خلفك كنموذج يحتذي، وبالتالي كبديل لاذلام نظام القتلة؟
العكس تماما!
اقلاه حليزمو بيوتم كرد فعل، وهذا هو سر بقاء هذا النظام!
نعم للاسف المعارضة ماقادرة تقدم نموذج يحتذي علي مستوي سلوك رموزا كقاعدة بالنسبة لي رجل الشارع وكنتيجة هناك عامة زهد في الشارع مقارنة بالماضي فوق لي هاجس الجهوية رغم انف تضحية بناتنا واولادنا من الطلاب.
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Kostawi)
|
الان ننتقل لي قلب موضوع هذا ال بوست:
اولا عزيزي القاري عمري في يوم من الايام ما كنتا سياسي أي "منظم" بي رندوق الجماعة او من فتحتا بالقلب كنتا ضد كل المتداول في السودان كسياسة_ توجهات سياسية _ومنظومات سياسية.
ومن عاصرونا في الجامعة بشهدو كيف كنتا بعدي يومي خنق كأي جعلي مع الجميع او من دون فرز!
بناء عليه المعارضه في الخارج بتحتاج تديها صنه حقيقه من حيث التكتيك وقبلها الفهم اي النظرة اي التقييم للساحة في امريكا مثلا والمنافي بعامة ومن ثم الإستراتيجية.
هذا صراع بقاء او فنا!
نعم المعادلة صفريه وبالتالي الموضوع عايز تشغيل للمخ وقبلها مرونة عالية جدا جدا ما بينفع معاها الديماغوغيه اياها المعهودة في "المنظمين"!
واضح انو معارضة امريكا خسرت الجولة دي والاعتراف بالنتيجة دي من دون "ايقو" هو المدخل للخروج من الورطة دي يا أعزائي وهذا درس ودرس عظيم فاسمعو كلام الببكيكم.
يا اعزائي انا شايف المعارضة حتي في الداخل ماقادره تتواصل مع الشارع ولغة الشارع اللي كلو اكواد ورموز عايزة فك ولكن عجز المعارضة وعدم قدرتا علي تفكيك لغة الشارع الهيروغليفية واضح جدا!
هذه مقدمة وحنطبق استنتاجنا علي واقع امريكا ونوضح المعارضة طشت وين كنموذج للقراءة الخاطئة اي التفكيك الخاطي لي هيروغلوفيه الشارع وكنتيجة النظام كسب الجولة للاسف من دون ما يفك طلقة واحدة او يدق طوريه!!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
وكعادته هرع قريمان مسرعا من أقصي مدينته ليجير كلام بشاشا لصالح الإنقاذ وللنيل من المعارضة!
ولكن قلب وجوهر كلام بشاشا يجرم الإنقاذ ويبرز تنافيها مع قيم وأخلاقيات شعبنا وينصح بعض المعارضين بألا يحاربوها بسلاحها ولا يستخدموا وسائلها
دا كلام بشاشا
(نعم هذا يشبه اذلام نظام القتلة، ومثل هكذا سلوك يشبهمم وبالتالي طبيعي يجي منهم، لانهم يجسدون علي مستوي السلوك، كل ماهو وافد، دخيل واجنبي بي معايير رجل وامراة الشارع، البسيط في السودان، وهذا هو سبب فشل مشروعم الكارثي، الاشعل البلد، لانو وافد، اجنبي وغريب، ولا لاي سبب اخر.
نعم ده هو سبب قبر مشروعم الولع البلد ودمر شخصية السوداني والسودانية التاريخية,
اذا وعينا بالحقيقة دي، مهما كلف ومهما كانت المرارة لاينبغي لنا كقوي بديل التعامل مع بعضنا باخلاق الوهابية، الكيزان، اي اخلاق شيطان جرة الاسلام الوافد.
ينبغي ان نعامل هؤلاء خارج السودان، كسودانيين اولا، وان لم يكونو من حيث طريقة تفكيرم. )
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
يعني شنو تطارد سوداني لانو كوز، تبلغ عنو، عشان يقبضو، يحاكمو او بعد داك يطردو؟
==============
بشاشا أمبس كلام جميل وده من عمق قيمنا ..
يا سلام يمكن يكون كوز أو غير كوز لكن وراه ناس ياكلوا عيش ..
بشاشا إنت زول أصيل تذكرني زمان كبارنا في البلد ..
إبن عمنا كان زول بتاع سكر .. جاء واحد لعمنا قال الولد ده بسلموا للبوليس
عمنا قال ليه ( أيوا هو سكران دائماً لكن زول نفير وفزع في الحصاد والبناء وحش التمر )
بعدين ديل حراس الحلة كان جاء سفيه من برا مين يقدر عليهو ..
وكمان السجن دا ما عيب .. الناس يقولوا لينا ولدهم في السجن .. أمش شوف شغلك
وقال كمان ( عمرنا كلو نشرب ونسكر .. يعني بس عشان نميري قال حرام )
نعم الحبيب بشاشا هناك قيم متأصلة في الناس بالفطرة وهي قيم موروثة
بتجارب إنسانية ..
شكراً بشاشا على البوست ..
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: علي عبدالوهاب عثمان)
|
عزيزي القارئ
مصداقا لي كلامنا عن عدم مصداقيه المعارضة وعدم قدرتا علي التواصل مع الجماهير في الاخبار حفيد مقبولة اي الصادق المهدي الجاكي من اصلو عامل عربي قالو ماشي عاصمة الخديوية عشان ينضف اسنانو هذا العار تأملوا!
رجل فارغ بمعني المفردة مارقا لي كردستان يرسل في الجوابات بطالب فيها الاكراد بعدم المطالبة بتقرير المصير!
تاملو طريقه تفكير هذا المخلوق بديل البشير افتراضا!
نعم او هو بتكلم بي لهجة الخديوية قال مصر "واحشاني" مش ليغوس مثلا عاصمة اكثر من 20000000 نعم عشرين مليون انصاري طبقا لبعض التقديرات!
نعم مش راجع مكان اقامتو في معسكرات الذل في دارفور وانما من إمدرمان ماشي القاهرة عشان سنونو؟
وقسما بالله لو كنتا مكانو لرحلت للعيش في معسكرات لاجيي دارفور اكل مما يأكلون واشرب مما يشربو باعتبارم عشيرة حبوبتي ومنبع الثوره الام!
قارنو شخصية هذا العار بي واحد زي مانديلا العاش في السجون يكسر في الصخور شغل سخره لاكثر من ربع قرن لاهان لا لان اطلاقا وانما خر له جبابره الأوربيين ساجدين بل مستنجدين وهو في السجن!
حتي بعد ما وصل القصر من السجن طلع فات بيتو اوخلا جيفه السلطة لي كلابا او عاش كفرد عادي من دون مايورث ايا من ال بيتو!
تخيلو لو كان عندنا من هو في مقام ايمان زهد واخلاص مانديلا فقط تخيلوا كيف كان بكون الحال!!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: عمر نملة)
|
| Quote: صعب التواصل كسوداني مع اتباع القتله وبالتاكيد يتم استغلالك |
عمر نملة مرحب بيك.
من تواصل في مجتمعك المحلي من السودانيين فهذا يخصك لوحدك. ده ماموضوعنا . موضوعنا هل صاح وباسم معارضة النظام في السودان نطارد في المهاجر سودانيين زينا بالتبليغ عليهم لدي السلطات الامريكيه لانهم كيزان لأي سبب؟
ده هو موضوعنا.
اذا انتا بتعمل كده فانت مثلهم ماسوداني او بي كده انتا حر.
فقط تأكد نموذجك ده لا يمكن يكون بديل لنموذج سلوك اذلام نظام القتلة وموضوعا الأساسي هنا.
نعم نوعك ده في المعارضة هو الكره الفرد العادي في السودان في السياسة وكنتيجة ابتعد واعتزل السياسة جاري ورا لقمة العيش او بي كده مدد ابو حنيفة النظام رجليه!
.
لا يمكن تعيد انتاج نموذج شخصية اذلام نظام القتلة فسقا وفجور في الخصومة لتتوهم روحك كبديل كمان بلا خجله!
مانديلا رفض رفض قاطع نزعة من حولو فش الغبينه في من ساموهم ذل العذاب في ارض اجدادم اي بيض جنوب افريقيا!
نعم رفض يخرب جمال وجلال مدينتو بي فش غبينتو علي قول سيدي ومولاي الامام المهدي.
جاييك بي مهلة دي مقدمة فقط.
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
سلام
هل صاح وباسم معارضة النظام في السودان نطارد في المهاجر سودانيين زينا بالتبليغ عليهم لدي السلطات الامريكيه لانهم كيزان لأي سبب؟
لسبب واحد ببلغ عنهم اذا كانوا او سيكونوا سبب تهديد سلامتي وسلامة كل شخص فقد الامان بسببهم...( والجمرة يا الواطيها) كلامك كلام زول يدوا في الموية الباردة...تنظير ما اكتر...والدين اجاز كل دا ...شفت النموذج بتاع الغبش في حديقة بروكسل منتظرين ناس الامن من السودان عشان يعطوا الضوء الاخضر لترحليهم واذلالهم واحتمال كبير تتم التصفية...طبعا كلاب الامن عارفين كل كبيرة وصغيرة من يهمك امرهم بداعي الاخلاق عشان كدا بخت اصبعي في عينهم...كلامك وبوستك دا كريستالي..اما شخصك ليس لي الحق في تقيمية ولا يهمني من تكون...وقول ما تقول وقيم على اقل من مهلك..بين وبينك موضوع البوست...
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: عمر نملة)
|
عمر نمله مشكور علي المثابرة
اولا عايزين نكون علي ذات الصفحة لتفادي سوء التفاهم او حتي لا أبدو كالذي بحاول يدردق فيك.
بنتكلم عن عمل عام منظم باسم المعارضة الطارحه روحا كبديل لنظام القتلة مش عراك شخصي بين نفرين.
اذا ده حاصل ففرقك شنو من اذلام نظام القتلة اذا علنا او بلا خجله امام الملا بتقول ايو ببلغ فيهم "اذا" و "ح" و "س" يهددو سلامتك؟
اليس هذا منطق وذهنيه وتركيبه العاملين ببيوت الاشباح يا نملة؟
نعم نافع لما كان بشمر عن الساعد ليتولي التعذيب بي نفسو لي ضحاياهو في بيوت الاشباح هاجسو ودافعو الأساسي كان الخوف علي سلامتو هو شخصيا لو فشل الانقلاب كنتيجة مباشرة لي نشاط امثال الشهيد علي فضل!
بعدين رجل الشارع كناخب لما يرفض هكذا اسلوب لإدارة الصراع من قبل جهة طارحه روحا ليهو كبديل حتقول ليهو ايدك في المويه الساقطة يا ناخب وانا كصاحب طموح سياسي ايدي في النار او بي كده عندي رخصة اسوي الدار اسوي للوصول لي كراسي السلطة؟
اهو ده ردك للبتخوفو من نموذج امثالك وصولجان السلطة في يدهم؟
حيثق في نوعك ده كيف رجل الشارع الانتا عايزو يطلع الشارع يضحي بي حياتو عشان يستلمو الزيك المابختلفو في سلوكم عن اللي هو ثار ضدهم لتبقي عليهو المسكين حكاية الصام او فطر بي بصلة؟
ما هذا؟
اذن هناك تقاليد وقيم محددة في ثقافتنا بتحكم إدارة الخلاف الصراع لا تملك غير الانصياع ليها لو ايدك في المويه ولا في النار كفرد عادي دعك من عمل عام او كمان سياسي خليك من معارضه او كمان بلا خجله بديل!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
كم انت كبير أخي بشاشا،،كانوا يلقبون مالكولم اكس بأكثر رجل غاضب في العالم
وانت، ومن قبل أن انضم لهذا المنبر، كنت الاكثر غضبا وحماسا في سبيل توصيل افكارك، ،والان،وبهدوء، كالزاهد وسط الصحراء
امسكت باهداب الحقيقة، ،اننا سودانيون، ،بالرغم من العفن الذي يتسلل ويحتوي كل خلاياك، ،وأنت تري احدهم منافحا ومدافعا عن العفن الذي
تركه خلفه،هناك،،،شكرا بشاشا
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Saifaldin Fadlala)
|
وأنت تري احدهم منافحا ومدافعا عن العفن الذي
تركه خلفه،هناك،،،
يا حامل المسك انت كنت فين لما العفن كانوا بسجلوا مكالمات الغبش في الدنمارك...لو لا يقظةتهم وسباتك لما تم حسم امره ومحاكمتة وترحيلة ...ناس ما تختشي تقدم لجووغ وتتباكي..وعندما تمنح حق الحماية تكون يد النظام ...ما تعتبره انت عفن اعتبرة دفاع وحق غصبا عنك. كفاية تنظير وانفصام...نعم لتجريد كل كوز في االغرب من حق لا يستحقة
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: عمر نملة)
|
| Quote: نعم لتجريد كل كوز في االغرب من حق لا يستحقة جاب ضقلا يلولح، عمر نملة! |
نعم قال كل كوز في الغرب!
نعم من طرف داير يكشهم برا اوربا وامريكا فقط لانهم كيزان!
الطريف جدا ومن فرط التماهي والاندغام في شخصية الاسلاموي، هو لاينتبه ولايعبا كثير لراي الشارع في هكذا شطط، طيش، تطرف باسم النضال وماشابه!
لما نسالو فرقك من اذلام نظام القتلة شنو بي زي البتسوي فيهو ده من فجور في الخصومة لايشبهنا كسودانيين يروح مقهي!
او لو بالغ يقول ليك انتا مثالي!
ياخي اذا الناخب مثالي فلا تمتلك الا ان تمتثل لمثالية ناخبيك لو اصلا ده عمل عام!
ياخي ماعلي كيفك!
نعم دي طريقة تفكير امثال غوش اللي افتراضا انتا مقدم روحك كبديل ليهم، ولانسيت؟
قال علينا يدس السم في العسل!
اين هذا العسل في مثل هكذا تقوط؟
نعم كل ماهناك انتا بتتعامل مع الهم العام كمرحاض ليس الا لدلق الجواك، دون ادني اكتراث للمردود!
مرة اخري كسودانيين هذا لايشبهنا اطلاقا وهادا طرفي كناخب من اشباهك!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
يا عمر نملة، ،اولا افهم محتوي ما كتبته وبعد ذلك رد الرد الذي يريحك، ،ثانيا الشخص الذي كان يتجسس على اللاجئين ليس في
الدانمارك وإنما في النرويج، ولم يقبضه الغبش كما زعمت، بل جهاز المخابرات النرويجي، ،لم اسمع بأن هناك شخص اعتقل في الدنمارك
بسبب تسجيله مكالمات الغبش، ،لذا تحري معلوماتك جيدا قبل كبها في منبر يقرأه عدد مقدر
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: خالد العبيد)
|
| Quote: ولا شغلة لي بالكيزان فهم ليس نبت بلادنا |
خالد العبيد تحياتي او مشتاقين،
ياعزيزي، قنا احنا لازم نقدم نموذج نابع من ارثنا الحضاري كسودانيين، لو بنتكلم عن بديل للمشروع الحضاري الاستعماري الامبريالي الوافد والدخيل اي مشروع اسلام ثقافة الغزاة العرب.
بناءا عليه خارج السودان وكدرس نقدمو للكيزان لازم نعاملم كافراد كاحسن ماتكون المعاملة، نعم كسودانيين في مقابل سودانيين.
هذا مهم للغاية لو كنا جادين في مشروع البديل اللي مفروض يتجسد في سلوكنا اليومي كافراد قبل مانكون منظمات سودانية.
اي كلام، تصور، سلوك اخر يستهدف سودانيين زينا وان كانو اجانب من حيث طريقة التفكير، اي كيزان فسيهزم مشروع البديل تماما لنعيد انتاج ذات الكارثة من اول وجديد.
لازم رجل وامراة الشارع يعرفو اننا بالفعل، بالحق، بالسلوك بالممارسة، نمثل مشروع بديل وهذا للاسف لاوجود له في تصور رجل الشارع بما يكفي ويغريه الخروج للشارع لازالة نظام القتلة!
نعم الشارع متخوف جدا من المعارضة وهذه حقيقة وحقيقة مرة!
الشارع لايري فرق يذكر مابين نظام القتلة، وسلوك رموز المعارضة لو كافراد او احزاب سياسية ديماغوغية خارج حركة التاريخ، تسبح بحمد وتعبد اصنام امثال صدام، الخديوي ناصر، كارل ماركس وماشابه،
او اكلي سحت من امثال الفارغ الصادق المهدي الخاتي بتو في المعارضة او ولدو في قصر غردون، همو اعياد الميلاد وتنضيف السنون في ديار الخديوية!
اما الميرغني فعايش متنقل مابين عاصمة هكس باشا، وعاصمة علاء الدين اوما عاد بعرف مايسمي بالسودان في الخرطة وين!
اما حملة السلاح، من امثال القبلي مناوي وجبريل، والنرجسي الذكوري عرمان، فحولا ولاقوة!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
نعم كل ماهناك انتا بتتعامل مع الهم العام كمرحاض ليس الا لدلق الجواك، دون ادني اكتراث للمردود
ما ينفع يا محترم تفتح بوست تنادي فية باخلاق وقيم المجتمع السوداني وملافظك خرا..خلي صدرك رحب ..
راي ما بتقدر تلمسه بكلامك دليل تربيتك لو موجودة من اصلاما من حقك تسب او تنقص من شخص بمجرد خالفك الراي..تاني اقول ليك كل من يهدد سلامتي وسلامة كل لاجئ سوداني بتعامل معه بالقانون...ولو انت عندك اجندة عايز تمررها ببوستك دا تكون حاجة تانية...غريب انفصام الشخصية..ينادي بالقيم والاخلاق..ويمرحض ويتفوه خرا
اما لصاحب الدنمارك ما من حقك تصف اي كائن بالعفنّّّ
مع الملاحظة حتي الان لم اتلفظ او اقيم شخوصكم التي لا تهمني..قول رايك وسيب غيرك يقول...كفاية وصايا
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: عمر نملة)
|
| Quote: ما ينفع يا محترم تفتح بوست تنادي فية باخلاق وقيم المجتمع السوداني وملافظك خرا |
.
اعلاه عمر نملة يسوي شغل ضربني بكا!
عزيزي القارئي،
من قبل 20 سنة، اي قبل سودانيزاولاين، نعم زمن الكتابة في الاسافير كان بالانجليزي فقط، كنت بوقع مداخلاتي في "سودانت" بي جملة:
Telling it like it's!0
الي يوم رحولنا للدارة الاخرة ده حيكون شعارنا!
نعم لما سجلت هنا في المنبر ده، نشرت وثيقة محددة بمثابة قانون يحكم علاقتي بالخصم في ساحة مخصصة للملاكمة الفكرية يا اسامة الخواض!
نعم في دستور بشاشا هذا، قنا تعريف الاساءة هو الكلام المامسنود بي حجة او حجج، برهان او وبراهين.
نعم لايهم اطلاقا اقناع او اقتناع الخصم بالبراهين هذه، بقدر ما مهم نقيم الدليل علي صحة ما نقول!
واضح انو سماء رؤيتنا كانت ولاتزال واضحة جدا، واننا ننطلق من ارضية صلبة جدا، محددة، ووفقا لقواعد صارمة، عكس خصومنا الماشين امفكو من شاكلة عمر نملة هذا!
بناءا عليه الزول ده جا دافر، كالعادة عامل ثوري، مدرع نيشان النقاء، وكايي امننجي بدا يفتش في الضمائر، واصما كلامنا بالسم، وسلوك امثالو بالعسل!!
كرد، قنا ليهو عنقر ما مدنقر، هذا تقوط باسم النضال والنقاء الثوري، ليس الا!
نعم علي الملا وكتابة، قال هو، في ديار الغربة حيشتغل "مصفراتي" اي بي تعابير المريكان حيكون Whistle-blower يا لعاره، ضد من يعتقد هو، ويقرر انو كوز من السودانيين!
نعم ذات طريقة تفكير اذلام نظام القتلة اي ك.لاب الامن!
اذن هذا تغوط!
نعم الزول ده دلق الجواهو والسلام!
نعم هكذا سلوك، يعبر عن، يعكس، ويحكي عن انسان غير سوي!
اذن بشاشا وكالعهد به، ووفاءا لمبادؤو اخد كاميرا قلمو الشهيرة، والتقط صورة، لي مشهد كريه جدا!
علي كده، لو الصورة الالتقطتا كاميرا قلم بشاشا كانت كريهه، فهل بشاشا هو المسؤول ام صاحب الصورة؟
اتمني تواصل...
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
من قبل 20 سنة، اي قبل سودانيزاولاين، نعم زمن الكتابة في الاسافير كان بالانجليزي
,،تاريخك ما بيشفع ليك ...بتفتخر انك بتكتب بالانجليزي...بين وبينك محتوى البوست البتحاول فيه ان يترك الجلاد يتنعم بالاقامة التي لايستحقها...خلاصة كلامي مع بوستك
1- لا للتعامل مع الكيزان
2_ كل كوز بيشكل مصدر خطر في الغرب فيجب حذره وعدم التداخل معه اجتماعيا
3- اذا وجدت اي ثغرة قانوية يجب استخدامها لكسر شوكة النظام
4- كل من يحصل معلومة عن كوز كان سبب في إيذاء اي شخص يجب التبليغ عنه
اما عن تلخيص بوستك
1- انت لا تستطيع استيعاب الراي المضاد لانك تستند علي ماض وشهرة .
2- تخلط خلط واضح بين الشخوص و الآراء
3-فكرك توقف في محطة زمنية وتحاول بهذا البوست ان تلبس ثوب جديد ..ولكن هيهات (يموت الزمار وصوابعه بتلعب)
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: عمر نملة)
|
| Quote: شكرا" بشاشا وأنت تعيد لنا بعض من سودانيتنا المنتهكه من قبل بني كوز وبعض معارضيهم ... |
صلاح زبير يامراحب،
نعم لازم نلتزم في صراعنا مع بني كوز بي تقاليدنا كسودانيين اي "الاصول" بي لغة كبارنا، او بالذات امهاتنا.
غايتو لما اسرح في موضوع الاصول هذا، والله بتعجب لانو زي اهتمام اهلنا هذا وبالذات السودانيات باتباع قواعد محددة صارمة، مفصلة، دقيقة في كل منسبة او منحي من مناحي الحياة، بالذات ما اتصل بي تقاليد التواصل الاجتماعي يؤكد فعلا النظرية الجديدة البتقول باصل اموي للحضارة، واللي انجزتو السودانية تحديدا.
يعني امسك عندك زي رئيس امريكا الحالي اي السيد طرمبة، او شوف لو في اي وجه للمقارنة مابين ارثنا الحضاري، وارث امثال راعي البقر هذا، اي سانتانا الذي لايحرم او ديجانقو هذا!
نعم احنا وبحكم وعي الاسترقاق بنربط مفهوم "تحضر" و "حضارة" بي سلوك ونموذج طرمبة هذا، لانو "ود بيضة" اي خواجة، في ذات الوكت البنربط فيهو الوحشية والبدائية بالانسان الاسود او الافريقي اي الذنجي، لاننا نري الوجود بعيون امثال طرمبة، حسن البنا، ابن العثيمين، عفلق، وعبدالناصر!
شئ عجيب بحق!
رئيس الولايات المتحدة علنا وامام الملا بيشتم مواطنيه واصمنا اياهم ب:
"اولاد العاهرات" اي "الشرا...."!
حولا ولاقوة!
| |
|
|
|
|
|
|
|
|
|
Re: الي سوداني المهاجر:خارج السودان نحن سودان (Re: Bashasha)
|
| Quote: كم انت كبير أخي بشاشا،،كانوا يلقبون مالكولم اكس بأكثر رجل غاضب في العالم |
سيف الدين فضل الله، مرحب بيك.
عاجزين عن الشكر ونتمني نكون قدر حسن الظن.
مالكوم رجل عظيم عظيم بمعني المفردة.
الكس هيلي مؤلف سفر الجذور، اطلق علي مالكوم صفة "رجــــــولتنا"!
نعتذر عن هكذا وعي ذكوري، ولكن مالكوم كان فارس بحق.
انا عايشت يوم افتتاح الفلم بتاعو في كالفورنيا!
يا الهي!
مجرد فلم عن مالكوم اليوم داك في منطقتي منتصف التسعينات ادي الي خلو الشوارع من الحركة، من فرط الرهبة.
ده الطلعتا بيهو من نقاشي مع البيض في اليوم داك.
بعضهم كان مرعوب ولا ادري لماذا من مجرد فلم!
| |
|
|
|
|
|
|
| |
Bashasha
سيف النصر محي الدين
MAHJOOP ALI
Abureesh
علي عبدالوهاب عثمان
مني عمسيب
زهير عثمان حمد
Elsanosi Badr
د.محمد حسن
Ali Abdalla
عمر نملة
عبدالحفيظ ابوسن
جمال ود القوز
كمال عباس
محجوب البيلي
محمد حمزة الحسين
Salah Zubeir
الطيب رحمه قريمان
Kostawi
Saifaldin Fadlala
خالد العبيد
فيس بوك
تويتر
انستقرام
يوتيوب
بنتيريست