كراسة لأكتوبر .. شجن العقد الخامس .. في ذكري الراحل المقيم (21) أُكتوبر العظيم .. هاشم صديق

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 19-02-2019, 07:45 AM الصفحة الرئيسية

مدخل أرشيف للعام 2016-2017م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
21-10-2016, 12:34 PM

يحي قباني
<aيحي قباني
تاريخ التسجيل: 20-08-2012
مجموع المشاركات: 12931

للتواصل معنا

FaceBook
تويتر Twitter
YouTube


كراسة لأكتوبر .. شجن العقد الخامس .. في ذكري الراحل المقيم (21) أُكتوبر العظيم .. هاشم صديق

    12:34 PM October, 21 2016

    سودانيز اون لاين
    يحي قباني-فى الدنيا العجيبة
    مكتبتى
    رابط مختصر


    كراسة لأُكتوبر
    شجن العقد الخامس
    ( مونتاج شعري في ذكري الراحل المقيم (21) أُكتوبر العظيم )

    شعر : هاشم صديق
    __________________________
    بورولوج

    .......

    إنتبه !!

    أقرا الملبّد

    في الوشوش

    وأقرا المغلّف

    في الكلام .

    أركب علي ضهر

    الصعب

    وأمسك شديد

    فوق اللجام .

    حولك حريق

    تحتك حريق

    فوقك حريق

    وقدامك

    الأحلام تضيق

    أدفر جوادك

    في اللهب

    وأبصق

    علي الكضب الصفيق.

    ..........

    إنتبه

    لا تبرا نجماً

    تقرا في وهمو

    الطريق

    ........

    إنتبه

    لا تركب

    الموج البناغم

    وجرسو ناعم

    بُكَره بِعتمدك

    غريق .

    .........

    لا تصدّق العسل

    البنقّط في المثل

    لا ترمي نبضك

    للوَحَل

    لاتغني للقمر

    العتيق .

    .......

    إنتبه!!

    إنتبه!!

    إنتبه !!

    ........

    لا تخُت قليبك

    في عيونك

    وتعتبر كل وش

    صديق .

    .........

    قطع

    ......

    شَدّيت

    سرج الشَمِس

    في النيل

    وسنّيت

    إسمك المهموم

    صبح عقد الشرار

    قنديل

    وقعت وراكا

    يا سيدي

    قصدت حواكا

    وإتبرّكْتَ

    بي توب الضريح

    التيل

    أظني حييت

    بعد ما كنت

    مُتّ عديل

    وأظن هَرْولتَ

    وءاترشرشت

    من ( زمزم )

    ومن ( توتيل )

    وأظن دفَرَن

    خيول شوقي

    بَعد بركَن

    وأبَنّي عديل .

    ..........

    يا سيْدي القَلُب

    عميان

    نسيت ألبس

    حِجابك يوم

    حَدَر ليّ البلد

    زعلان

    وطشيت

    من نجوم ( أُم دُر)

    وفات مني

    الدرب حرْدان

    ..........

    جَريت ...

    قابلني جبل

    الشوق

    وشان أنحت

    هواكا وأروق

    طلعت بروحي

    ليكا عديل

    ناولني الجبل

    إزميل

    اتحزّمتَ يا سيدي

    نَقرتَ

    وإتْقطّعتَ

    شان أنحت

    هواكا جميل

    ومن شِدّة هوايا

    الفيكْ

    لقيت دمعة حجر

    بتسيل .

    نزل مطرالشرار

    ألوان

    واتْقَسّم

    رسم سودان

    عريض وأصيل

    كان مهرو

    الورود والدم

    وكم عاشق

    جريح وكتيل .

    ........

    يا سيدي

    القلب مشروق

    نَقَر طار المحنّة

    نَقَز

    وغاب في حضرة

    المعشوق.

    أظن يا سيدي

    إنت القال

    - أمارات البشارة

    بروق

    وتار أهل الكتيل

    ما بنوم

    وشيطان الغضب

    مطلوق .

    وأظن يا سيدي

    إنت القال

    - كان اتباع

    حليب الطير

    ما بدخل

    شرفنا السوق

    ولا بْتنْفَش

    غبينةََ زول

    ولا ببرُد

    قلِب محروق

    إلا تقوم

    قيامْة الحق

    ويعود

    دُخري الشقا

    المسروق .

    ........

    شدّيت

    سرج الشمس

    في النيل

    وسنّيت

    اسمك المهموم

    صبح عقد الشرار

    قنديل .

    نَضَرتَ

    حلفت بالقرآن

    وبالانجيل

    بي ( نبتا )

    وبي ( مَرّه )

    وبي ( شالا )

    وبي ( توتيل)

    وبي أكتوبر المعبور

    وبي قبر الصبي

    المطمور

    وبي حنضل

    حصاد (أبريل )

    وبي (قرشي )

    و ( بالتاية )

    وبالمصلاية

    والتنزيل

    نسن ءاسمك

    في حجر النار

    نتوهط

    في خيل التار

    نتوكل علي المشوار

    قدامنا القيامة

    عديل .

    ........

    قطع

    .......

    إتهجيت

    من لفحة لهبك

    إسم الشارع

    معني الشارع

    غبن الشارع

    فجر الشارع

    ..........

    ودرس الحسرة

    وفك الشَفْرة

    .........

    إتعلمت

    أدوس الجمرة

    تَدَنْدن وحّه

    في قَلب الطين

    يتفجّر ذََرّة

    تطلع سودا

    وسمرا

    وخضرا

    .........

    إتْدَرْدَرْتَ

    في درب الشمس

    التَطلع حته

    تَغَسْل الجته

    ويتلّب طاغية

    في صدر الساقية

    معاهو المافيا

    ونرجع تاني

    نزح في الضَلْمة .

    ...........

    إتوترت

    جروح ... وصدام

    سكون ... وكلام

    عذاب ... وضلام

    من كل مسام

    الشجن العام

    ولا اتجرست

    ولا نقنقت

    ولا اتفكيت

    من ريد الأمة .

    ...........

    غَمّستَ الوتر

    الصابر فيكا

    وإتْنَسمتَ

    غُبار ايديكا

    شالني الهم

    في الروح

    في الدم .

    في النور

    والضَلْمة .

    في التيه

    واللمّة

    ولبست الريح

    طاقية وعِمّه

    وأصبحت كبير

    بهوية وهمه .

    ...........

    يا أكتوبر

    هليت فليل

    للباب نَقَرتَ

    تبيت حفيان

    بي غبني فتحت

    لقيتك خيل

    مشدودة حيل

    سلامك حار

    وغُناك بندار

    في الحال صَحَصَحتَ

    وإتذكرت

    القسم الغالي

    وصية وذمة

    وهموم الناس

    وعذاب الكلمة .

    .........

    يا أكتوبر

    هليت مزحوم

    بصروف وهموم

    البيت مسكون

    بطيور الشوم .

    الجوف محروق

    والخير مسروق

    والصوت مكتوم .

    ..........

    نَقّرت الباب

    والدنيا خراب

    ( الحق مقلوع )

    ( الخوف مزروع )

    ( الشين مرفوع )

    الزين مقطوع

    الجوع سكين

    والطاغية سمين

    الناس بتصوم

    وصقور الموت

    في الجو بتحوم .

    .........

    يا أُكتوبر

    جيت مشتاق

    حضنك رقراق

    ذكّرت الناس

    الألم العام

    الغضب النام

    الحق ينضام

    الصوت معبور

    السيف مكسور

    و( الساقية تدور )

    ..........

    ( وأنحنا زمان

    للشمس النايرة

    قطعنا بحور

    حلفنا نموت

    أو نلقي النور

    وكان في الخطوة

    بنلقي شهيد

    بي دمو بيرسُم

    فجر العيد

    وما اتراجعنا )

    ..........

    يا أُكتوبر

    هليت فليل

    نَقّرت وَتَرْنا

    تبّينا صحينا

    وليكا فتحنا

    لقيناك خيل

    مشْدودة حيل

    في الحال

    صَحْصَحْنا

    .........

    حلفنا نقوم

    وينسمع الصوت

    الكان مكتوم

    لا صف مقسوم

    لا خوف

    لا نوم

    لا حق في بيت

    لي طير الشوم

    لا طاغية سمين

    لا غش بالدين

    لا جوع سكين

    لا صقور بدقون

    في الجو بتحوم .

    ..........

    ( قسماً .... قسماً

    يا أكتوبر )

    - لي درب النور -

    في الدم بنعوم

    ينكسر الخوف

    ويتجلاّ الشوف

    وتعود أقمارك

    يا خرطوم

    ...........

    غمّست

    القلم الصابر

    فيكا

    وإتنسمت

    غبار إيديكا

    أصبحت كبير

    بهوية وهِمه

    .........

    ولبست الريح

    طاقيه وعِمّه.

    .......

    قطع

    .....

    عيداً يِمِش

    عيداً يجي

    والدنيا ما زادت

    حرِف .

    مارَفّ

    للجايت طَرِف

    رمضان يفوت

    لكنو ساكن

    في البيوت

    لسه الصيام

    راجينا عام

    حَلْق الفرح

    عطشان نِشِف.

    مادَقّ باب

    عشماً حباب

    ولسه الحساب

    نايم كشِف

    ........

    أمريكا جات

    القاعْدة جات

    وكسوتنا للعيد

    ورجقات.

    يا ربي كيف

    العيد يكون

    والجاي كامن

    في السكون ؟!!

    .......

    قطع

    .......

    وقع وطنك

    من الساري

    علي صدرك

    رقد عاري

    صرخ لحظة

    وتر جواكْ

    ..........

    سطع حُزنك

    علي جنبك

    فلق بحرك

    شظي الأفلاك

    ........

    تلوّح للفضا

    المسلول

    يكح ظنك

    ويفر منك .

    بَرِد عمرك

    يشق ضُفرك

    وتتجاسر

    علي نبضك

    تدق باباً

    صمد مقفول

    .........

    تسامر

    في وجع ضحّاك

    تَنَقرش

    في وتر ذكراك

    مجنزر

    بي خيوط رؤياك .

    .........

    قطع

    .....

    خلّي الشِنَط

    أوزن عذابك

    والَقرَف

    واختم جوازك

    بي رماد

    نار الأسف.

    أضحك

    علي القمر النزف.

    ما تقول وداع

    تفضا الديار

    من كل نار.

    في اليم دوار

    في البر دوار

    وفي الحضرة

    كم شيخاً ولي

    حلقوم وطار

    ( يكشف ) وسط

    نَقَزي الصغار

    .........

    قطع

    .......

    شبكة

    من خيط الكآبة

    نازلة

    في شُرَف العيون.

    ضاغطة .. كالحة

    صفرا .. مالحة

    شادّة توبك للجنون

    صحرا .. رَمَضَا

    كاكي .. يا نكي

    تل شدايد

    سم جرايد

    سهرة عبرة

    سرحة حسرة

    وهجرة

    لي زُحل الشجون

    ..........

    مُحمد أحمد

    يا مسهّد

    عودك يشهد

    إنو كل الحُزن

    قصة

    والحَسَك

    في الرحلة حصة

    والدَرِس

    باقيهو لسه

    ........

    أقرا وافهم

    يا مُحمد

    أصحا ما تغمّد عيون .

                  
|Articles |News |مقالات |بيانات

21-10-2016, 04:33 PM

عبدالرحمن الخليفة

تاريخ التسجيل: 25-02-2007
مجموع المشاركات: 255

للتواصل معنا

FaceBook
تويتر Twitter
YouTube


Re: كراسة لأكتوبر .. شجن العقد الخامس .. في ذكري (Re: يحي قباني)



    ذات الصرخه الثائره منذ 52 عاما ورسم {الملحمه} شعار الثورات
    هاشم ياله من ينبوع هميم لم ينهزم ولم يتوقف عن الرسم التعبيرى النارى
    ,,,,ليعيد ( اكتوبر) ونافح بعمر اجيال ليعيد الثورات من سارقيها
    احييك استاذ قبانى بمتابعة وتوثيق زفرات الشاعر الفذ هاشم صديق
    ودمتما
                  
|Articles |News |مقالات |بيانات

21-10-2016, 06:28 PM

Hamid Elsawi
<aHamid Elsawi
تاريخ التسجيل: 22-09-2005
مجموع المشاركات: 2230

للتواصل معنا

FaceBook
تويتر Twitter
YouTube


Re: كراسة لأكتوبر .. شجن العقد الخامس .. في ذكري (Re: عبدالرحمن الخليفة)

    حاجة ترد الروح يا قباني

    نسيت ألبس
    حِجابك يوم
    حَدَر ليّ البلد
    زعلان
    وطشيت
    من نجوم ( أُم دُر)
    وفات مني
    الدرب حرْدان

    -------------
    هاشم فشي غبينته
    في الكلمات
    كلمات يمكن لشخص
    موهوب يأديها بشكل
    مسرحي مع موسيقي
    تصويرية تتخلل العرض
    زي موسيقي عزة مثلا
    و لو كان اكثر ن شخص يكون اجمل
    لتغيير اللبس او الزي ليمثل كل انحاء
    السودان.
    بالطريقة دي ح ترجعنا للمسرح

    عاشت ذكري اكتوبر
    و التحية ل هاشم صديق
    و هو ما زال
    يحمي شعار
    الثورة يقاوم

    _________
                  
|Articles |News |مقالات |بيانات

22-10-2016, 04:44 AM

يحي قباني
<aيحي قباني
تاريخ التسجيل: 20-08-2012
مجموع المشاركات: 12931

للتواصل معنا

FaceBook
تويتر Twitter
YouTube


Re: كراسة لأكتوبر .. شجن العقد الخامس .. في ذكري (Re: عبدالرحمن الخليفة)

    تحياتي لك اخونا عبد الرحمن و للأصيل هاشم صديق ...

    توثيق اعمال الأستاذ هاشم شرف لي افخر به و اتباهى ...

    هاشم من سلالة نادرة ... ثابت على المبادي ...
                  
|Articles |News |مقالات |بيانات

22-10-2016, 04:45 AM

يحي قباني
<aيحي قباني
تاريخ التسجيل: 20-08-2012
مجموع المشاركات: 12931

للتواصل معنا

FaceBook
تويتر Twitter
YouTube


Re: كراسة لأكتوبر .. شجن العقد الخامس .. في ذكري (Re: يحي قباني)

    Quote: حاجة ترد الروح يا قباني

    حامد يا صديقي ...

    هاشم ده ما في منو اتنين ...
                  
|Articles |News |مقالات |بيانات

22-10-2016, 10:27 AM

محمد أبوالعزائم أبوالريش
<aمحمد أبوالعزائم أبوالريش
تاريخ التسجيل: 30-08-2006
مجموع المشاركات: 13837

للتواصل معنا

FaceBook
تويتر Twitter
YouTube


Re: كراسة لأكتوبر .. شجن العقد الخامس .. في ذكري (Re: يحي قباني)


    عبرك ليهو التحية يا صديقي
                  
|Articles |News |مقالات |بيانات

23-10-2016, 09:47 AM

Hamid Elsawi
<aHamid Elsawi
تاريخ التسجيل: 22-09-2005
مجموع المشاركات: 2230

للتواصل معنا

FaceBook
تويتر Twitter
YouTube


Re: كراسة لأكتوبر .. شجن العقد الخامس .. في ذكري (Re: محمد أبوالعزائم أبوالريش)


    يا أكتوبر

    هليت مزحوم

    بصروف وهموم

    البيت مسكون

    بطيور الشوم .

    الجوف محروق

    والخير مسروق

    والصوت مكتوم .
                  
|Articles |News |مقالات |بيانات

23-10-2016, 04:48 PM

أبوذر بابكر

تاريخ التسجيل: 15-07-2005
مجموع المشاركات: 6238

للتواصل معنا

FaceBook
تويتر Twitter
YouTube


Re: كراسة لأكتوبر .. شجن العقد الخامس .. في ذكري (Re: يحي قباني)

    والله يا قبانى

    كان فى زول واحد بس فى الدنيا كلها
    ما عادى

    بكون ياهو هاشم ده

    يا سلااااااااام ياخى

    عليك سلم عليهو
    اوديهو التحية
                  
|Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de