عَلِّ صوتك.. أنت نوبي.... شعر

شهداء الثورة السودانية من ٢٥ اكتوبر ٢٠٢١ يوم انقلاب البرهان
دعوة للفنانين ، التشكليين و مبدعي الفوتوشوب لنشر جدارياتهم هنا
مرحبا Guest
اخر زيارك لك: 01-19-2022, 10:13 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف للعام 2016-2017م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
12-24-2016, 08:18 PM

Mannan
<aMannan
تاريخ التسجيل: 05-29-2002
مجموع المشاركات: 6634

للتواصل معنا

FaceBook
تويتر Twitter
YouTube

20 عاما من العطاء و الصمود
عَلِّ صوتك.. أنت نوبي.... شعر

    08:18 PM December, 24 2016

    سودانيز اون لاين
    Mannan-واشنطن دى سي
    مكتبتى
    رابط مختصر

    هذه قصيدة قد يعتبرها البعض أنها ذات نفس عنصري ولكني قلتها لإيماني بأن كل شعوب السودان تنتمى الى النوبة...

    عَلِّ صوتك... إنت نوبى شعر نورالدين منان *****************
    علِّ صوتك ...
    أوعى صوتك يوم يوطى
    خلى صوتك يملا وادى النيل صداهو
    يملا جنباتو ويغطى
    إوع يوم تنسى وتصدق
    إنك انت بقيت عروبى
    او شعوبى
    انت نوبى ...
    حتى لوقالولك انك
    جاى من أوسٍ وخزرج
    واللا من أشراف قريش
    واللا من بيت النبوة
    لا تصدق
    حتى لو أدوك قروش الدنيا او دقوك وصوتك يوم تحشرج
    لست من اوس وخزرج
    انت تاريخك بعمر النيل وطولو
    هوة هوة
    مين يطولو
    ومين ينولو
    مهما قالو
    برضو خليهم يقولو
    إنت أجدادك بعانخى وأركمانى
    وجدتك ريناس أمانى
    مهما غشوك
    رحلوك من حلفا .. كشوك
    او تسللوا من ثقوب تاريخك انت
    او تسربوا حبة حبة
    من عيوبك ومن عيوبى
    حقو أخجل من هروبى
    ما حيمسحو مجد شبتاكا وشباكا
    اصلو منحوت فى الصخور
    وبرضو مدفون فى القبور
    وفى دروبك وفى دروبى
    إنى نوبى وانت نوبى..
    وكل هذا المجد كالإهرام وراكا
    مجد اجدادك بعانخى وأركمانى
    ومجد شبتاكا وشباكا
    انت نوبى
    اوع تهرب من حضارتك
    ومن خدار لونك وما اجمل سمارك
    وتفتكر انك عروبى
    وتنسى انك انت نوبى
    واللا تقبل بى خسارتك
    وتنسى "كارَك" وتنسى "مَارَكْ"
    وتنسى حارتك وتنسى جارك
    وتنسى جارتك وتنسى ساقيتك وحمارتك
    حتى لو اصبحت يوما كالمعرى فى البلاغة
    انت نوبى.. وانت كوشى .. انت زى كوكو وإساغة
    يا حفيد شبكا وبعانخى
    انت عنوان التآخى
    ابن ترهاقا وأمانى وأركمانى
    بس عايش بالأمانى *******
    من عيوبك ومن محاسنك
    انك انت اصيل وطيب
    ناسى تاريخك... مغيب
    زول مسالم
    وما مصادم
    وانت انسانى وتعانى...
    وانت حاكمك انتهازى وزول أنانى ******
    إنت فى أرض الكنانة وبرضو فى السودان مقيد
    تضحياتك لا تحدد
    كل تاريخك مبدد
    برة تاريخك مصفد
    انت فى كجبار وفى اسوان مهدد
    ولسة دينك لم يسدد *******
    من زمن بقط الخلافة
    والخلافات والسخافة
    خلو امجادك محاصرة بالخرافة
    وختو بينك وبين جدودك كم مسافة
    وقالوا عار ما تبقى نوبة
    وشادوا حيطان العروبة
    من زمن ايوب ... وإخشيد والعروبة
    صرت تابع.. صرت اسما بعض نوبة
    صرت فى أسرك تعانى
    زول مشوه.. مصردانى
    ليس إلا.. حرف علة
    واخت إنَّ واخت كانَ
    فعل ماضى وفرتكانة
    شعب ضايع فى الصوانى
    وبرضو محكوم غصب عنك ...
    تبقى فى الآخر عروبى...
    ونصف نوبى
    يا حبيبى...
    ويبقى قدامك خيارين...
    تبقى نوبى او عروبى...
    *********
    لم تكن يوما شخيتو او أمانى
    كأثاث البيت او مثل الأوانى
    لم تكن كنداكة النيل متاعا
    او مشاعا
    بين مثنى و ثلاث و رباع
    فى صوالين الرعاع
    كانت الكنداكة السمراء فى رأس الجيوش
    ترهب الأعداء تعلى مجد كوش
    ايها الكوشى مهلا أين مجدك؟
    هل تبدلت وهل اخترت لحدك؟
    هل تبينت بأن الموت قد اختار وحدك؟؟
    هل نسيت الآن جدك ؟؟
    يا ابن ترهاقا تقدم ...
    لست وحدك
    انت لم تخلق لكى تغرق او تختار سدك
    انت والإهرام صنوان فلا تختار ضدك
    انت والتاريخ والمفتاح للمستقبل الباهرعندك
    هكذا كان التآخى
    عندما قال بعانخى:
    نحن لا نسرق قوت الضعفاء
    نحن لا نطمع فى سلب حقوق الفقراء
    *******
    عَلِّ شان النوبة عالى
    عالى فوق فوق للنجوم
    واسى كنداكات بلادنا
    والجراحات التولول وما بتنوم
    مهما ليل النوبة طول
    والعدو حواليك يحوم
    يوم حتنهض من سباتك
    ما الخطر جاك يللا قوم
    يللا يا كنداكة قومى
    نحن عارفينك أصيلة وما بتنومى
    إلا أطفالك ينوموا
    وانتى حارسة الحق تحومى
    إلا جوكى اليوم ديابة
    مرة بى جلباب أهلنا
    ومرة بالزى الحكومى
    واللا زى جيش النجومى
    يللا جونا الجنجويد
    من مماليك وانكشارى
    كلهم جايين يشوفو
    يوم اقول الروب واعلن انكسارى
    وانسى مجدى وانتصارى
    واعلن انى بدون بلادى بلا هوية
    يا زمن وقف شوية
    شوف بلادنا بقت ضحية
    أصبحت خالية وتكية
    جوها دهابة وديابة
    فى بيوتنا وشالو بابه
    وصارت النوبة الحزينة
    تبكى "يمة" وتبكى "يابا"
    هكذا ضعنا جميعا
    كاليتامى تكوس فى "بابا"
    وشوفو كيفن يبكى نيلنا
    والحرايق فى نخيلنا
    تحرق النوبة وشبابا
    يا إلهى أين صرنا؟
    هل بقينا خلاص تعابى؟
    وصار سلاحنا غنانا بى طمبورنا او وتر الربابة؟
    واللا ب"الدكّاى" سكرنا!
    من رماة أحداق بقينا
    لعبة او "شخشيخة" فى أيدى العصابة؟
    أمة كانت مستنيرة
    تعرف الرب والكتابة
    ضيعت تاريخا مرة
    وضعنا بين عتمور وغابة
    يا نقيف دوت او نموت
    وننسى ترهاقا وأمانى
    زى خراب سوبا ونعانى
    وما نجيب السيرة تانى
    نوبة.. كوش .. اوأركماني
    وكانى مانى...
    ونبقى دون أو مصردانى...
    Apedimac.jpg Hosting at Sudaneseonline.com


                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de