شوف عيني جابوا الصبرات ( جمع صبرة ) طعموهن من هشاشة العظام والنزلة ! الصبرات موقفنهن صف يمسكوا واحدة واحدة في كيس ويحنسوها ويهديئوها لحدي ما تنطمنلهون ,
ويطعنوها بالحقنة ويدوها جرعة دواء بالبزة وتبلعو ويفكوها ! ملحوظة: الصبرة دي في السودان تعيش في الجنائن والخلا والعربات يضربنها في طريق اللواري , ويكونن مجدعات في شارع الظلط بالكوم !وزول جايب خبرن مافي تب !! وكمان الشفع الصغار وكت يشوفوها يفلعوها بالحجار ويجروا وراها يزكوها لامن تدخل في جحرها ,
وزول كدي بيقولهون شيئ مافي !!
قااادر الله يا صبرات استراليا المدلعات ومزقلتات !!
ويا حليلكم يا أطفال الغبش الهاملين ضوومة!!!! ست البنات.
ست البنات.
01-19-2016, 02:25 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 1192
ياست البنات الصبرات في السودان أكتر من نوع بعض المتداخلين بتكلموا عن البتاكل الدجاج وعندهم الصبرة هي الثعلب الـ ''fox'' وإنت بتقصدي الصبرة اللي هي الـ " indian palm squirrel" وهي في شرق السودان كما في الصورة وبالعربي هي السنجاب.
01-19-2016, 08:06 PM
ست البنات ست البنات
تاريخ التسجيل: 10-02-2002
مجموع المشاركات: 3639
تحياتي الملك شوف الاسماء المرفعين وهو الذئب البعشوم وابوالحصين هو الثعلب الصبرة وهي السنجاب اسم الصبرة دة جا من وين .. بتصبر يعني ولا كيف .. غايتو السناجب الكانن في مجلة ميكي ما بصبرن
01-20-2016, 06:19 AM
Mohamed E. Seliaman Mohamed E. Seliaman
تاريخ التسجيل: 08-15-2005
مجموع المشاركات: 17863
ايّ والله صدق يا ملك، الله يقطعا زمان المنقة البتتحتا دي تقرما ست، ما بتاكل وآحدة ؤُ تكتفي وكذلك في الجداد يا قولك .
غايتو يا ستهن لي حدهن، الختيتيها رقدت جايبالك سنجاب ؤُ تقولي صبرة!؟. وحات الله السنجاب دا انا ماشفتو عِلآ بعد جيت امريكا الشمالية دي نعمنو في البلد ما عندنا، نحن صبرتنا ياها الثعلب ...
01-20-2016, 10:22 AM
El-Saddig Abdalla Abbas El-Saddig Abdalla Abbas
تاريخ التسجيل: 03-03-2014
مجموع المشاركات: 139
زمان في النصف الأخير من السبعينات كنا ساكنين في واحد من بيوت الجوازات "بيت حكومة" تبع الكرنتينة في مدينة الجنينة الحدودية بغرب دارفور، وبيوت الحكومة التبع الكرنتينة دي كانوا عبارة عن صفين من البيوت . . صف شمالي متجه جنوباً ودي بيوت مبنية من زمن الإنجليز مكون من حداشر بيت . . وفيهن بيت في النص مكسر "خرابة" وصف جنوبي مكون من ثلاث بيوت متلاصقة ومتشابهة في كل شيء وحديثة البناء، كنا أول من سكن فيها بعد اكتمال بناءها، وكان البيت الطرفي الأقرب للكرنتينة من جهة الغرب. وخلف هذه البيوت تقع غابة كبيرة مترامية الأطراف تمتد حتى المرتفعات التي تحد منطقة الكرنتينة من جهة الجنوب. وبين هذه البيوت والغابة في بيوت للنمل من الطين الأحمر المرتفعة عن سطح الأرض بشكل جبال مصغرة وبها الكثير من الحفر والفتحات بشكل غريب وجميل ومخيف في نفس الوقت وفي منها بتكون كبيرة أعلى من هامة طفل في العاشرة من العمر. وكان خلف المنزل الكنا ساكنين فيهو واحد من هذه البيوت وتستوطنه العديد من الحشرات والزواحف من سحالي وأفاعي وغيرها، ومن ضمن سكان هذا البيت عائلة من الصبرات وكنت أراقبها كثيرا وأنا ممتطي حائط منزلنا الخلفي مراقبا لحركاتها المثيرة والسريعة جدا ورشيقة في نفس الوقت. وكانت لما تقيف جنب الجحر بتاعها ترفع راسها وكمن تبحلق بعيونها وعند أي حركة حولها أو من جانبي تدخل الجحر في أقل من لمح البصر هي وصغارها وشكلها أقرب للسنجاب ولكنها تختلف منه في الذيل.
وتقبلي خالص الود على إثارة هذه الذكريات الحميمة
01-20-2016, 10:31 AM
Kabar Kabar
تاريخ التسجيل: 11-26-2002
مجموع المشاركات: 18024
سلام ست البنات أنا غايتو حضرتني صبرة حميد الله يرحمه
الصبرة كمير كوكو تتعشى عشاها من ضو الصبرة حرامية وشو في حبال خازوقها اتلولو لا ترمى دموعك شوشو قاوم والمرة بتحلو ترف استخبارتم أو صاج الدبابة الكروو و خشب الطيارة الفى الجو الترمى قنابل بو ... بو كم يبنى بلادك يالضو والضو بكى فورن وشى من شوقو واللا من التعب غلبو المشى كل فردى جارها من بلد يالضو سلامتك جيت متين ؟؟؟؟؟ سبتوها وحدها يالخزين سبتوها وحدها للدعت سبتوها وحدها للبعوض للطير ودابى البحر .... نوني الضبابين .... الكلاب .... الجندب ... الفار .... السعر ...... يالضو بلدنا ودعت راحت شتول دوب فرعت فاتت بيوت ما ضاقت الزين والعديل ما اتمتعت .... ضاعت سعايات انسعت يالضو تليسو بالبساط أخر المطاف شملة كنيش أتوسعت حلتنا غرقت من طرف حلتنا غرقت في شبر غرقنا يالضو صح سرف العلمتنا العوم تغرق هي ما تقدر تعوم يا للأسف .... عز المصاب البركة يالضو في الرقاب إلا لرقاب اتجهجهت ما جاتها راحة من كتر ما اتجهجهت ما دام معلقة في السراب صنت شوي ونهنهت خايفالك يلهفك السراب يالضو يهقلنا السراب والضو صنم ما جاب جواب .... لا ذاتها هي استنت جواب ....
01-20-2016, 04:42 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
سلام يا أحبة .. الصبرة يا ست البنات زي ما قالولك اللإخوان غير السنجاب .. هي شبيهة بالسنجاب ولكن في حجم االقط السيامي وإن كانت أقصر منه .. مدغلمة ؤ ضنبا طويل كثيف الشعر تستخدمو في الدفاع عن نفسها بافراز مادة نتنة.. تتحرك مدنقسا راسا للأسفل . وإن لم أكن مخطئ تسمي في بعض المناطق بالظربون.. حيوان ليلي نادرا ما يرى بالنهار ولا يخرج من جحره لذا من الصعب صيده .. فعلا يا اب سن يعرف الثعلب بالبعشوم وابو الحصين. لكن اسم البعشوم هو السائد في مناطقنا .. واسم الثعلب دا عرفنا في المدارس زيو وزي مسميات أخرى كالخروف والفلاح ـ أي والله.. اذكر في المدرسة الأولية عادي التلاميذ كانوا بقولو للأستاذ لما يشير لحرف الخاء مقرون بصورة الخروف .. خاء كبش .. طبعا لفظ الفلاح ( المزارع ) عندو تنميط خاص في مناطقنا .. لما تقول فلاح معناه إنت بتقصد الصعايدة الذين قدموا من مصر .. وهم ساكنين في المدينة واغلبم بشتغلو تجارة .. على زمنا كان في منهج الجغرافيا في نظام زيارات ميدانية .. مثلا زيارتنا للتجار زيارتنا للمساعد الطبي الخ .. بودونا ليهم ؤ يعرفونا بمهنم .. الأستاذ قال في الحصة الجاية زيارتنا للفلاح حقيقة كلنا فرحنا .. يوم الحصة جينا كلنا مستحمين ونضاف ؤ في عقل بالنا حيودونا المدينة لإنو في القرية مافي فلاح .. المهم طلعنا مع الأستاذ ماشين ؤماشين ونحن نتلفت نفتش في البص العايز يودينا المدينة .. لما وصلنا طرف البحر شفنا واحد معروف عندنا من رجال الحلة شغال بعزق وبكبر في جريد النخل .. الاستاذ وقف واشار بصبابو وقال ( ذاك هو الفلاح ) .. واحد من التلاميذ رد متسائلا بتلقائية تفضح دهشته ( هو دا ياهو الفلاح )؟!! : والله ما أنا ..
يا كبر صبرتكم دي ياتن مؤتمر وطني او جاتكم من مصر.. مؤكد القبور إذا كانت قريبة من المساكن أو غابة بتعتبر أفضل مسكن جاهز للصبرة .
01-20-2016, 05:17 PM
Khalid Basheer Khalid Basheer
تاريخ التسجيل: 04-14-2013
مجموع المشاركات: 373
ياستهم...قيل أن جدنا – رحمة الله عليه – و هو رجل جميل من زمن جميل قال الكلام الساخر دة في قصة جماعة مع صبرة ....دة البتذكرو لكن هي اطول من كدة...
جنياتنا العشرة ..فرسان الحشرة جارين بليلهم ساكاهم صبرة اسمع لك خبرا واحدين بعصيهم وواحدين بالحجرا جات ماشة الصبرة و كاجة سنانا ادوها قفاهم و قالوا الموت جانا العاقل فيهم اصبح ملحوسة ، عمتو فوق راسو اتلفت يكوسا كان ناسي الراوي و اتذكر دوبو فيهم من اصبح عريان من توبو و فيهم من فاقد فردة مركوبو
01-20-2016, 05:18 PM
جلالدونا جلالدونا
تاريخ التسجيل: 04-26-2014
مجموع المشاركات: 8653
هههههه .. فروجة دي قلع من جو الكوديق يا جلجل.. إلا الديك باين عليهو فارس عيني بارده .. ياخي صورتك دي للبعشوم الثغلب سيد اللسم في ثياب الواعظينا .. الصبرة أللتنا فتشتلا صورة ما لقيتا كان ود المدير ولّ المستنير سخو بلقوها لينا.
01-21-2016, 00:51 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14007
لقيتو ليكم هو من فصيلة "ابن عرس" ياها دي الصبرة البتتكلم عنها أختنا ست البنات، وياها الي أنا ذكرتها في مداخلتي الأولى، إنو مشاهدتي لها كانت في الجنينة "الكرنتينة"
01-21-2016, 09:01 AM
ابو جهينة ابو جهينة
تاريخ التسجيل: 05-20-2003
مجموع المشاركات: 21604
تحياتي ست البنات وتحية لكل من جاء هنا ممغوسا من الصبرات في قرانا الشمالية.
أها هاكم الصبرة دي :
عمنا سيد في إحدى قرانا بأقصى الشمال ، دخل منزله منتصف الليل وهو ( منعنش ) بفعل عرقي غتيت، وقال لزوجته ( الزهجانة ) من سهرو برة البيت: قومي سوي لى حاجة آكلها. فقالت من بين أسنانها : ما في شيء في البيت ، فقال لها : قومي أضبحي لى جدادة فقالت : الجدادة دي مش دايرة إمكانيات ؟ ما عندنا لا زيت لا بصل لا دقيق لا ملح ، أتخمد نوم ساكت. فزمجر وكظم غيظه وتسلل إلى مخدعه. بعد قليل سمعا حركة وصياح الدجاج في حوش المنزل. فقالت له الزوجة : قوم شوف الجداد دة مالو، الظاهر في صبرة دخلت البيت. فقال بهدوء : خليهو ياكلهن ، يمكن عندو إمكانيات
01-22-2016, 02:02 AM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ست البنات
أبوبكر عباس
محمد على طه الملك
عبدالحفيظ ابوسن
hameem
بابكر قدور
على محمد على بشير
Mohamed E. Seliaman
معاوية المدير
El-Saddig Abdalla Abbas
Kabar
Khalid Basheer
جلالدونا
ابو جهينة
فيس بوك
تويتر
انستقرام
يوتيوب
بنتيريست