|
راجيك*يابورداب المغرب اتحدوا/البري خارج الحدود/الدواس قريب
|
إلى كل الأحبه الغائبين والحاضرين online هذه باكورة مشاركاتي في منبركم العامر /لست شاعرا بل أتمنى/ وأناجاهزللعكاكيزمع محبتي راجيــــــــــــــــــــــــــــك ************* لـسـه راجيـك مـن زمـان في منارات المرافـي وفـي متاريس الطــريق ولسه جاييك يا بعيدة كاتم أسـرار المحن قاطع البحر الغريـق ولـسـه شايفك زي حديـقة رغم إنو سماك رهاب غيمها ضنّ على الـفـريـق وبرضو مشتاق لي صفاك يا نخلة من خصب الضفاف يا فرحة في زفة صديق شبالو من حور الجنان
*******
من كم زمن شايل أساك عمراً سدر ضياَ خـبا سفراً ودار والسـكه يا زولاً غريب مرسومة بـي تعب المسافة ومكتوبة بي وجع انتظار مسكونة بي لون الفيـــافي وشفت صورتك في المـدار
مغسولة بي مطر السـراب منحوتة في ريـح المنافي ومنسوجة بي وهم السحاب مزروعــة في حزنك قوافي هماً نزل وعـداً يباب ويبقى صوتك هو الرفيق يا قمره يا عز المكان
*******
ضيعت في بعدك خطاى وكتمت في روحي الشهيق دقيتها أوتاد الغياب ولّعت في قلبي الحريق تاريني بحلم بي عيونك لو عيونك بكرة تفرح أبقى أختصر الصراع وأتمنى أرشف من نداك ياومضه ياسر اليراع ياواحه في حر الهجير وبرضو راجيك من زمان
*******
أيامك الحاضرات عدم ما ضيك مجمر بالعذاب أحلامك الجايات عشم يابنيه مهرك ما دهب اولادك التايهين عجب عافوا المكان ركبوا الصعب في كل بر في الجو كمان حتى البحر شيتا كعب ما لُن بعاد والقسمه دارت في العقاب واحد طمع واحد ضهب واحدين كتار عرفوا السبب هجروا التراب سابوه تب خلوه للساهرين نهب بدقونهم الطايلات كضب أزلامك القاعدين غصب وبرضو ساعين لرضاك ولسه صابرين يازمان
******* وبكره راجعين يا بلد نتمنى نلقاك زي زمان ممدودة والنيل في افتتنان نغشاكي في ضل الضحى ونستنى من ضرعك مطر نبراكي في عز الضهر نجمة دليل وثبات أثر يا كلمة غناها البعيد
ما إنت يا بلد المسار إنت النغم إنت القصيد للعز محل للروح دثار لا كنت تايه عن هواك لا اخترت من غيرك صحاب بس كنت راجيك من زمان
*******
جاييك أنا ومن بكره باديهو المسير يافزعة في وكت النفير يا مطيره شايله مع العصير خليني أحلم بي رؤاك وأديني يادرة الأمان لكني خايف من جفاك ما أصلي كايسك من زمان مترجي من طيفك حنان ياسمحه يافايته الحسان والله رايدك من زمان وياني صامد صبري بان وبرضو مستنيك كمان ولسه راجيك من زمان لسه راجيك من زمان
صلاح الأحمر الرباط 2005/9/20م/
|
|
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
الأخ/ صلاح الأحمر ( ابو رضا ) هذه بداية تواصل معكم عبر المنبر .اضم صوتي لصوتك وندعو بورداب المغرب للتكاثر والتناسل في المنبر ويحلقون عاليا بالجيد المفيد ، ونتمنى ان نلم شتات الذين ابتعدوا عن مياه الأطلس . اعجبتني قصيدتك .. لااجيد الشعر للرد عليك ..اسمح لى ان اعبر لك عن اعجابي بمقطع في القصيدة توقفت فيه للحظات لأنه عبر بصدق عن اشجاننا وتطلعاتنا : بكره راجعين يابلد نتمنى نلقاك زي زمان ممدودة والنيل افتتان *************** ولك معزتي اخوك عمر عبدالسلام
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
يالاحمر يخرب مظنك
الموضوع قصيده وخاتى كلمه دواس دى مالك
اخوك اول ماشاف العنوان وبورداب المغرب وفى النهايه دواس طوالى اتذكر اهلنا
فى الغرب والدواس دا عندهم معناه اماامسحك او تمسحنى طوالى قلت اشوف اصحابى
هناك واحذرهم ، وجدت القصه قصيده جميله رقيقه تدل على شفافية صاحبها معبره
عن مكنونات جميله وسعدت بها ايما سعاده ، واصل وعين الله ترعاك0
وياطارق جيت اقدم واجب الحمايه لقيتك كاشف الموضوع ، اها نخليك واخونا الاحمر
بعافيه0
تحياتــــــــــــــــى
ســـــــــــــــــــيد
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
الأعزاء/عمر عبد السلام(أبوأنس) وملكة سبأوسيدمحمد أحمد سيدنا شكرا على المرور والتحية.ولسه عندنا هترشات شعريةلم تر النور خاتيهافي السحارة لحدي ماتكتر التشجيعات.عليكم الله سخنوا (الطرح) شويه عشان البوست الهفتان الإسمو (راجيك) يتحرك كده ولاكده.وأنا متأكد بأن الأخ/سيدنا ماكان حيخش البوست لولا كلمة دواس.وبعدين الكلمة دى ماعاجباني كده ساكت /لاكين القضيه فيها( إن)عشان اعتزازي بعرق حبوبتي في كردفان.
وياملكة سبأاسمي الكامل جبتيهو من البروفايل بتاعي ولا في سابق معرفه؟
لكم مودتي.
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
إلى الغامضة والظريفه جدا /ملكة سبأ
صباح العشر واللعوت.طبعا ده ماحتفهميهو إلا إذا كنت من حاج عبدالله وأشك في ذلك لأنى لي تلاته سنين بكابس في الشبكه وماخليت موقع ولا جحر مادخلتو عشان ألقى لي أي ضب ولاسحليه من حاج مكه العجيبه ولم اوفق في ذلك. بعدين عليك الله بطلي لعبة الاستغمايه دي وبلاش حكايات توم آند جيري.أصلو الغربة محرقه روحنا وبقى ماعندنا صبر. آل أيه..آل ملكة سبأ آل. انا ماحأخش البروفايل بتاعك لأني حاسسس بأنو عندك شنبات. ثم تانياحاج عبدالله كلها كان فيها بلقيس واحده هي بنت عمنا الرحوم عبدالرحمن زندكيه طيب اله ثراه.وكمان في واحد سمين وقصيرمن أهلنا الفلاته كان ببيع الطعميه في محطة القطر اسمو (بلغيس) بالغين.ومصيبتنا مصيبه لو أخونا طارق جبريل قرا الكلام ده. بالله أظهر وبان عليك الأمان...ولاحأأكلم ليك سيدناسليمان..يرسل ليك مارد من الجان.. وشخارم بخارم وأبرا كدبرا وهت شبابا رفيه وهوكس بوكس وعرفتك ياملكة سبأ انتي لاملكه ولاحاجه عاوزه تخمينا وبس واتحداك تعرفي الإسم الحفيفي للوالدة بت الحاج......مع صادق مودتي واطيب تحياتي
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
صباح العوير ( دا بتعرفو اذا كنت بتقعد في القيفة وتتحاوم جنب البيارة والترعة)
Quote: واتحداك تعرفي الإسم الحفيفي للوالدة بت الحاج |
تدفع كام ؟!
ن
ن
ن
(نفيسة عبد السلام الأحمر)
أطيب وأكرم وأشهم أمرأة بالحاج عبد الله
وبعدين انا آسفة ياصلاح والله ماكان قصدي استغماية ولا غيرو
لكن !!
خلى اخلاقك سياحية
بلقيس بت المرحوم عبد الرحمن زندكية اعرف انها زوجة سيد الشفيع اخو منى الشفيع لكن ما أنا !!
بس بالجد انا بلقيس وحكاية (شنبات) دي بالغت ( فوكّا)
ومع اني من حاجة عبد الله (نص نص) لكن مافى مشكلة اكون سحلية مكتملة منها(مبسوط ؟!)
والمرة الجاية انا اتحداك في أي سؤال عن حاج عبد الله عموما ومدني وتندلتي والخرطوم (الشعبية - الثورة- نمرة 2) ولندن ذاتها
آل شخارم بخارم آل
مع أطيب التحايا والأمنيات
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
Quote: وكمان في واحد سمين وقصيرمن أهلنا الفلاته كان ببيع الطعميه في محطة القطر اسمو (بلغيس) بالغين.ومصيبتنا مصيبه لو أخونا طارق جبريل قرا الكلام ده |
انت يا ابو رضا انا خليني انتو عندكم شنو غير بيع الطعمية في الحاج عبد الله دي قالو العروس في يوم عرسها تخت صينية الطعمية تحت الكوشة بس تسمع صوت القطر وهاك يا جري (طعمية.. طعمية.. طعمية)
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
العزيز /أبو ريم/د.طارق جبريل عارف لسانك فلقة عشان كده استدرجتك للفخ الذي دخلته مختارا كالفراش يعانق اللهب فيمنح ناره المزيد من الوهج.لاكين هسع كدي عاوز اسألك/عارفك سنجك ومناسب مع الدناقله/بس عليك الله مافيك عرق رباطاب؟ بعدين قصةالطعميةدي حقيقيه والعهده على اخينا الحبيب/د.أحمد سكينجه له أطيب التحايا. قال مره واحد صاحبو عرس في الحاج عبدالله .الحفله شغاله والناس مهججه والعجاجه رابطه في السما. فجأه سمعوا صفارة القطر /اكسبريس الأبيض تضبط عليهو ساعتك.الساعه واحده تمامايصل للحاج عبدالله طبعا الكلام ده زمان لما كان في سكه حديد.وقاليك بس قولة تووووووت تلتين الناس الفي العرس قاموا فرتكو.مافضل إلا العريس وأهلو وناس السيره.حتى الفنان والكورس زاغو. والعريس يتلفت زي الطيره مافاهم أي حاجه.وبعد شويه العروس ذاتها دنقرت وجرت ليها صينيه من تحت كرسي الكوشه وهاك ياجري علي محطة القطر.أخو العريس وأختو قامو يشوفو الحاصل شنو ومشو ورا العروس لحدي ماوصلت المحطه وبدأت موالها الذي ألفه كل رواد القطارات المسافره إلى الصعيد والنيل الأبيض والغرب.فمن منكم مر بالحاج عبدالله ولم يسمع تلك اللازمه...طعمييييييه..جنجداد مستوي..جبنه وشاي..مساويك ..مساويييييك
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
الأحت العزيزة/بلقيس صباحك سعيد توقعت أن ألقاك هذا الصباح لعل المانع خير. كنت أتمنى أن يطول لهاث البحث عمن تكونين .لكن ينتابني إحساس عنيد بأن الحلقة بدأت تضيق أكثر فأكثر.بالآمس ، وفي الثانيــة والنصف بعد منتصف الليل صليت نافلةوخلد ت إلى فراشي مثقـــلا بتعب النهار وهموم الآتي.ليس من عادتي أن أستغرق وقتا طويلا بحثا عن النوم، إذ سرعان مأأغمض جفني وأسافر في سبات عميق.بقيـــت محدقا في وميض ضوء أخضر ينبعث من أحدالأجهزة الإلترونية التـي اقتحمت علينا حياتنا ولم تترك لن خصوصية حتى في غرف نومنـــا. أخذني ذلك الوميض بعيدا فاستحضرت معه سنوات الطفولة ونحـــن نتراكض في ليل الخريف البهيم نتبع تلك اليعاسيب وهي تومــض بضوئها الأخضر السحري ،فاغرين أفواهنا دهشة وفرحالهذا العجب المحلق بجسد يشع روعة وجلالا ويشئ بعظمةالصانع المبدع الواحـد الأحد ،لاإله إلا هو. أتعرفينها يابلقيس؟ إنها نحلة النار التي نسميها(الجوهرة).كنا نحرص على اصطيادهابرفق شديدونصنع لها من راح أكفناالصغــــيرة مهدا مغلقا حتى نجد كأسا من الزجاج نحاصرها فيه بعد أن نبسطها على سطح مستو.ها نحن قدجلسنا القرفصاء وعيوننامركزة على ذلـك المخلوق العجيب/حاشا الــجوهرة أن تكون حشرة يادكتور ودالريح/ ومض هنا برق هناك وضوءاليعاسيب السجينة يحيل عتمةالمكان إلى فرح طفولي يطاول وهج الكواكب القصيةفي سماواتهاالمشــــرعـةنحو أبواب الخلود.وهج هنا..شرر هناك ونيران الذاكرة تتقدكمرجل يكاد أن ينفجر. ....وللحديث بقيه ايتهاالنجمة العصية...ألم أقل لك يابلقيس أنك(كسرت ماسورةالذكريات)فاستعدي للفيضان..مع مودتي..
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
صلاح يا لزيز تاني
يبدو الفوازير بتاعة الملكة دي عندها جوائز كبيرة
ونحنا قررنا ندخل في المشاركة دي
اتصل بي الفاتح وحكى لي كتير ....
المهم كان ما طلعت واحدة من اخوات عبد الواحد كمبال
الفاتح قال ليك دي بتكون بلقيس اخت نفيسة بشرى
ساكنين في البراميل وانشاء الله تطلع هي عشان ترتاح
وناخد (الكادو) انا والفاتح
دكتور أمير ازيك اكيد الزكريات رجعتك كتير
سلام لكل ناس المغرب
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
الاخ صلاح الاحمر شاعر الضواحي العنيد.... ايوه البوست بوستك انشاء الله تبيع فيه موليتا.. بس خايفين البوست يتحول لي دلالة عشان كدة انا وناصر بنحاول نوجه البوست عشان ما يطلع من اطار الشعر الجميل
الاخت بلقيس لك كل التحية والاحترام... خفي على ود الاحمر شوية الزول دا مخو حايطرشق من التفكير في من تكوني( اظهر وبان عليك الامان)
الاخ ناصر استمر مع صلاح في الاستغماية يمكن تكسب الجائزة الكبرى ونتقاسمها معاك ففتي ففتي مع خالص تحياتي ومحبتي
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: د.أمير احمد الرفاعي)
|
أخي العزيز صلاح بن الأحمر المريخابي.. كل السلام والشوق لك ولشارع مدام غشقر! هاأنذا ألبي النداء إذ أتيت حاملا سفروقي وقرجتي، ولم أجد الدواس فقلت أقلبها سلام لدم بدءا بأخينا الدكتور أمير الذي شرفنا كثيرا وحد من حريتنا في العياث فسادا بالبيئة.. والدور على ابن الكويت البار (أنا الباير) ناصر.. ألف تحية ليك.. وإلى أخينا عمر بن عبد السلام بن اللوسيو كل المودة.. والآن دعني أغطس - بعيدا عن قوارب الموت - لأعبر الضفة الأخرى حيث وليد صفوت.. وبعدها أعود لابن الرياض الما مايل طارق بن جبريل الذي لم يحرق مراكبه بعد..! أشواقي لكل من شرب الحريرة وأشربها مخضبة بالمعدنوس!
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
Quote: ياأمير وياناصر البوست ده حقي أداني ليهو بكري جزاه الله خيرا وأنا حر ابداه بالشعر..أكملو بالطعمية ولاإن شاء الله أبيع فيهو ببوش انتو مالكن ومالى |
صلاح يا احمر والله الببوش دا لو وصل حلة ناس الملكة دي وهي حلتكم طبعا انا ح استثمر هناك
في تجارة الببوش!!!!!
د. ود الامين لك كل الحب والاحترام اجمل شئ انو ود الاحمر دا جمعنا مع بعض
واصبحنا قريبين منك يا ريت نشوفك
د. أمير طبعا الكادو انا قريب منو خالص لاني استعملت كل الوسائل
واستعنا بصديق خارج الكويت
يا صلاح على حسب الاستعانة بصديق ، ركز على التانية كل الاحتمالات
تطبق عليها على حسب الصديق وآخر معلومة انها شغالة في سكر كنانة
ويا ملكة عليك الله ريحينا.
وانا على استعداد على تمويل مملكتيك بكل انواع الببوش وطبعا نفسك تعرفي الببوش دا شنو!!!!!
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
يا إلهي !
زدنا واحدا وستصل إلى مكان صرخة الميلاد الأولى !!
Quote: أما بلقيس الثانية فقد بحثت عنهافي الجوار،قريبا من دار جدتها زينب بت مالك أو حاجه(زيبق) كما كان يحلو للراحل عثمان الحسين أن يناديها.هي حفيدةالعم عثمان سيدأحمد وكريمةالراحل العزيز عبدالعظيم (ود اللغا) عليهم جميعا رحمةالرحمن وسابغ الغفران. |
دقيت في العراضة
تعرف وانا صغيرة كنت الوحيدة من بين أقراني تقريبا التي تربطها صلة حميمة ببيت الحمر بالرغم من انني الوحيدة ايضا التي هجم عليّ (قردكم) ذات مرة ونحن نلعب في الزقاق الذي يفصل بينكم وبيت حاجة (زيبق) والذي يفتح عليه أيضا بيت ناس عثمان الحسين أو عمتكم خديجة ، بالمناسبة انا كنت بلعب مع ناس شيماء وأمي بتقول انا قدر محمد عباس ود آمنة(يعني لاقدرك لا لحم سدرك )
أما النورستان المهاجرتان هدى وبدرية كنت افرح جدا بصحبتهما وقضائي معظم أوقاتي معهن ..صخب ومرح اول النهار ثم حمام وراحة في منتصفه ثم حشو جيوبي بكمية معتبرة من النبق (انت سر شواويل النيق الكانت في بيتكم دي شنو ؟!)
حميد مازال يحتفي بي كل ماقابلته ويتساءل : بالله دي بلقيس بت .....
احمد ومتوكل يتعمدان مكاوتي بمناداتي بلقيـ ( قطعة البلد)
طبعا كل هذه ذكريات تجاوزت بالعمر سنينا عددا قد تفوق الكم وعشرين عاما.. وحقيقي حاج عبدالله لم تعد كالماضي أو بالتحديد الفريق ...
واعترف اني لا اتذكر اني رأيتك إلا من خلال صورة زفافك عشان كدا ما اظن انك حاتعرفني ولا حتتذكرني !!! ...
رايك شنو تحكي ؟!
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
ابنتي العزيزه /بلقيس صباح الخير انت في مقام ابنائي ولي منهم ثلاثة..رضا 17/وديع13 ثم دلوعة أبيهاجيهان وهي في الرابعه وأمهم الرائعه شريكة الدرب/نزهه التي كانت ومازالت خير سند لي في الغربه (البطاله) وأوفى صديق. امرأة رقيقة بقدر ماهي قويـة الشكيمة،حباها الله بنعمة العطاء وحب الناس ، فلها المحبة والتقديرلأنهــا أصيلة وأخت رجال. وبعدين يابلقيس عاوزه تكبري روحك ليه ؟ لوانت قدر محمدعباس ،فمحمد اقدر أولده.وياما شلتو ولعبتو وكنت بحبو موت ،ربما لأنوكان بيذكرني طفــولتي بي شقاوتو. وبعدين انا مذكرك كويس جدا رغم انوالذاكره بدت تصفي بعض الوجوه والأسماء وتلك ربما ضريبة الغياب الطويل.بالله كيف خضر وسيداحمد وعبد العاطي وحمزه وميرغني وطارق(أبكر قومو قومو) ومحمد البشيروحسن وعلويه وخديجه وسيــده ورابعه وبلدو.تحياتي للجميع واعتذر لمن لم استحضرهم والرحمة والغفــران لمن رحلوا عن دنيانا الفانية.وتحيه خاصة لعوض الكريم،وده بالذات صورتو مرسومة قدامي ولم تنمح.....ونواصــــــــــــــــــل بإذن الله.........
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: WadAker)
|
Quote: دخول للتحية والاشواق والاحترام لكل الدرارى/ات |
حبابك عشرة ياودعكر..بس انت (من اللول ماخليتي فيها احترام وبديتي بتخسار الهدره،واحنا ماشي دراري ،حنا شلاغميه.وزايدون مامعاناش الدريات) وكي جيتك في الهدره المغربية؟وبعدين حاتسحب كلامك وتعتذر ولا نقوم نقلبهامعاك؟ وسع قشابتك ياود عكر حبينا نمزح معاك وصافي. الف مرحب وسبحان الله ملا محك تحيل إلى شبه شديد مع الصديق الراحل والأخ العزيزمعاويةمحمد عوض الله عليه رحمة الله .اليس كذلك يابورداب المغرب؟ شكرا لمرورك ياود عكر ولك تحية حارة.....ونلتقي باذن الله.......
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
Quote: يااخوانا اشرحوا لينا حكاية ارشفة المنبر دي الوكت ضايق وماعاوزين نتمقلب. |
سلامات
اعتقد انه المنبر بتأرشف مرتين في السنة ونحن في نهاية النصف الأول الآن .. والبوست لم يمشي الأرشيف مافي طريقة كتابة رد فيه تاني ..
اها بكري قام حدد لأي عضو موضوع يشيله معاهو النصف التاني من العام عشان يقدر يواصل فيه عادي ...
طبعا بعد الأرشفة وبداية النصف الثاني ممكن تكتب مية موضوع ومافي زول يقول ليك لع غايتو الا الباوندوث يحمّر ليك
اها وبما انه عندك بوست ويحيد ومشيحيد شيله وامشي لبكري في الرابط التحت دا وقول ليه يجيبه ليك ... للمعلومية انا اتطوعت قبل فترة وطلبت من بكري عنك ... وانت امرق عليه تاني اكد ليه
دا البوست بتاع بكري اعفصه وداخل :
اعلان للجميع:ارشفة المنبر العام الحالى للنصف الاول لع...م 2006 يوم 10 مايو
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
الأخ/ صلاح ( ابورضا) ياريت تباشر في موضوع ( الشجر ) الذي دردشنا حوله قبل ايام .. اكيد سيكون ممتعا ومفيدا.. ولكن قبل ذل عاوز لى شوية توضيحات ( الدواس قريب ) مفهومة ..بس ( البري خارج الحدود ) عوزه ليها شرح ؟ معليش نحن اولاد عاصمة ..ثقافتنا الإقليمية ضعيفة .. والتحية ..وعلى درب بورداب المغرب متحدين . اخوك عمر
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: omer abdelsalam)
|
عزيزي /عمر صباحك بغرير
برى- بريا وابترى السهم والقلم(أي نحته) فانبرى، فهو بري بفتح الباء وكسرالراء وتشديد الياء.وهو أيضا مبري. وبرى الشخص أي هزله وأضعفه. الباري/ناحت السهم. ومن الأمثال/اعط القوس لباريها.أي فوض أمرك لمن يحسنه. البراية والبراءهي النحاتة. البراءة والمبراء والمبراة تعني السكين وآلة البري. الإبرية والتبرية/قشر الرأس يسقط عند المشط. وبالعامية المغربيةالبرايةالسودانية تعني المنجرة. والبري هو ايضا القد. ولماقلت البري خارج الحدود.كان في بالي الورطات التي أقحمني فيها الصديق ابومدين وهو يصر في العديدمن المناسبات على تقديمي شاعرا ويغريني باعتلاء منابر الجاليةالمسكينة لأمارس عليهم البري. وذلك كان بريا محليا. اماهذا الذي نحن بصدده فهو بري خارج الحدود. وليسامحنا زوار المنبر العام. كفاية ولاأزيد؟
ولك محبتي.......ود اللحمر
| |
|
|
|
|
|
|
Re: راجيك*يابورداب المغرب اتحدوا/البري خارج الحدود/الدواس قريب (Re: صلاح الأحمر)
|
Quote: برى- بريا وابترى السهم والقلم(أي نحته) فانبرى، فهو بري بفتح الباء وكسرالراء وتشديد الياء.وهو أيضا مبري. وبرى الشخص أي هزله وأضعفه. الباري/ناحت السهم. ومن الأمثال/اعط القوس لباريها.أي فوض أمرك لمن يحسنه. البراية والبراءهي النحاتة. البراءة والمبراء والمبراة تعني السكين وآلة البري. الإبرية والتبرية/قشر الرأس يسقط عند المشط. وبالعامية المغربيةالبرايةالسودانية تعني المنجرة. والبري هو ايضا القد. ولماقلت البري خارج الحدود.كان في بالي الورطات التي أقحمني فيها الصديق ابومدين وهو يصر في العديدمن المناسبات على تقديمي شاعرا ويغريني باعتلاء منابر الجاليةالمسكينة لأمارس عليهم البري. وذلك كان بريا محليا. اماهذا الذي نحن بصدده فهو بري خارج الحدود. وليسامحنا زوار المنبر العام. كفاية ولاأزيد؟ |
تزيد شنو يا اخوي؟؟ دي ما البراية زاتا الحزرتنا منها في العنوان بطعميتها ونبقها...
| |
|
|
|
|
|
|
|