|
|
 الكادوك ((الشبكشي))
|
07:52 AM Oct, 20 2015
سودانيز اون لاين
عباس الدسيس-Saudia
مكتبتى فى سودانيزاونلاين
كادوك .. شبكشي .. كتبا... والاسماء تتعدد المقصود عمل السحر ظاهره انتشرت في السودان بكثرة مع الضائقة المعيشيه وقلت الحيله غايتو يا الانقاذ خليتي الناس تفتش خشم البقرة.
قالو في فكي اشتهر بجيب العرسان فكي كارب البنات الاعمي شايل المكسر منكبين فيهو أها واحده من زميلاتنا الزمان في البنوك قررت تمشي ليهو ومعروف في وسط العاملين في البنوك نسبة البايركس كبيرة جدعت توبا ومشت مع زميله ليها خاضت التجربة مع الفكي ولقت ليها عريس وقت وصلو للفكي خشا ليك في جيبي لي ديك ازرق وسخل ابيض مافيهو نقطة لون وادفعي البياض وانا من حسي بشتغل ليك والمرة الجاية لازم تجيبي الحاجات دي عشان الخدام بعد الشغل عايزين الضبيحه (( وانشاء اللاهو تهسلي عريس مريش وزي الهاتم في أصبعك )) أها المسكينه الفكي شال منها راتب شهرين بياض ياخ ديل فاتو شركات التوظيف شغل بدون ملايين ما بمشي معاهم الزوله نفضت توبا مع زميلتها وطلعت بي حق المواصلات وماشين راجعين إركبو الحافلة.
زولتنا المسكينه سرحت في الحافلة تفكر في العريس مواصفاتو شنو يا ربي وجيه عندو عربية بيتو سمح.... طارت بخاليها تبحث ما بدواخل عش الزوجيه السعيد... الكمساري بتاع الحافلة جاء كشكش عايز القروش فتحت شنطتها تدفع قال ليها ...يا الاخت حقك مدفوع قالت ليهو... سجمي الدفع منو قال ليها ...عمك الشايب الواقف داك.
عاينت لي زميلتها الجابتا وقالت ليها دا كلام شنو يا بت امي عاد يا الفكي ما قدر دا من الحافلة عايز تعقد لي.؟؟؟؟؟
عمك الشايب البت سرحانه كانت بتعاين ليهو بدون قصد افتكر شبهتو وقام دفع ليها!!!!!!
علي وزن حكاية شيخ الامين مع الهلال لما اتغلب قال ليهم التشكيله وصلتني متاخره كنا بنلعب في نادي النيل مدني سجلنا والموسم السابق كان النادي مهدد بالهبوط بداية الموسم جابو لينا فكي في النادي عشان تكون البداية قوية الفكي جا شايل ليهو في بوكس شجر عشر بي لبنو دخلونا ليك في غرفة كبيرة زي الصالون قبل المبارأة قالو لينا طلعو الشرابات والكدارات!!
الفكي عليك امان الله وقع فينا تخبت في الكرعين بالعشر المشكله أنا عندي حساسية ضد البازنجان وبعض النباتات ما اكتشفته حكاية العشر الا بعد تخبت الفكي قعدته اتكرش زي الجربان طلعت من الغرفة جري مشينا لعبنا الماتش اتغلبنا زي الترتيب والفكي قبض قروشو ومشي الجماعه رجعو ليهو زعلانيين شنو يا شيخنا ما قلته بنغلب 2/1 ؟؟؟
قال ليهم ... يا جماأه الشغل أبي يمشي أشان عندكم لاعب نجس القام جاري من الغرفة.
قلت ليهم بالله ورونا المرة الجاية لو في فكي عشان نغتسل ليهو ونتوضأ بس شوفو لينا واحد تاني بخبت بالزهور والورد وفكونا من حكاية العشر ((بضم العين))
قالو في واحده ماشاءالله ست بيت نوع الشطورا تتلفح بيها وضراعا زي فخذة التور مشت لي فكي وقالت ليهو راجلي عينو طايره عايزاك تعمي لي عينو ما اشوف في الدنيا غيري أنا.
الراجل يوم جاء البيت شايل معاهو كديسه لقاها في الشارع وهو داخل البيت قال ليها شايفه البقره.
المرأة طنطنت في سرها غايتو يا الفكي ليستو لي تليسه .... هوي يا راجل يا اهبل دي كديسه ما بقره
قال ليها البتكلم معاك منو أنا بتكلم مع الديسه.
من الظواهر الاخري لو اتونست مع واحد في السودان وحكيت ليهو عن الغربه ومشاكلها والشغل وفي زول هناك عندك معاهو مشكله طوالي انط ليك.
يا زول ما تشيل هم عندي ليك فكي كارب اطيرو ليك طيرت ابريش.
غايتو يا اللوتري المرة دي الناس جاينك بالفقرا.
|
|
 
|
|
|
|
|
|
|
|
Re: الكادوك ((الشبكشي)) (Re: عباس الدسيس)
|
حبيبنا وحبيب الكل عباااااااس ياخي كل سنة وانت طيب اولا ومشتاقين والله ليك ولي جدعاتك دي ,,, ياخي انا مشيت السودان وجيت ما فهمت اي شي شي غير مفهوم حياة الناس والمجتمعات شي عجيب جدا ,, اما ما ذكرته عن الفقرا فحدث ولا حرج الموضوع بقى زي عيادات شارع الدكاترة والصفوف ما تديك الدرب ده غير حديث الناس في الونسات والعن ذاك الفكي وعن شطارتو وعن غيبياتو ,,,,, ياخي السودان ده ماش على وين لا ثوابت لاي شي في السودان بس الناس عايشة بالابديت البحصل كل يوم وكل ساعة وهلم جرا ,,,
كدي واصل في الحكاوي وبجيك صاد ...
تحياتي : ياسر العيلفون 0
| |
|
|
|
|
|
|
|
|
|
Re: الكادوك ((الشبكشي)) (Re: ادريس خليفة علم الهدي)
|
Quote: حبيبنا وحبيب الكل عباااااااس ياخي كل سنة وانت طيب اولا ومشتاقين والله ليك ولي جدعاتك دي ,,, ياخي انا مشيت السودان وجيت ما فهمت اي شي شي غير مفهوم حياة الناس والمجتمعات شي عجيب جدا ,, اما ما ذكرته عن الفقرا فحدث ولا حرج الموضوع بقى زي عيادات شارع الدكاترة والصفوف ما تديك الدرب ده غير حديث الناس في الونسات والعن ذاك الفكي وعن شطارتو وعن غيبياتو ,,,,, ياخي السودان ده ماش على وين لا ثوابت لاي شي في السودان بس الناس عايشة بالابديت البحصل كل يوم وكل ساعة وهلم جرا ,,,
كدي واصل في الحكاوي وبجيك صاد ...
تحياتي : ياسر العيلفون 0 |
حببنا ياسر سلام وتحية
اخبارك والاسرة الكريمه
حمدلله علي السلامة وانشاءالله اجازة ممتعه سمعنا كنت شغال عدادات وحفلات بقيت زي المنشار سعوديه تاكل سودان تاكل مافي تجلي او تكس
ياخي الفنانيين قالو كل واحد عندو حجاب احمد الصادق لما مشي بورتسودان والجمهور نبذو قالو نسي البس الكجور
كان تشوف ليك واحد تجيبو معاك وبالمرة تشوف لينا واحد نفك الساجور
مشتاقين والله
| |
|
|
|
|
|
|
|
|
|
Re: الكادوك ((الشبكشي)) (Re: عباس الدسيس)
|
.
الدسيس كيف حالك ياخ ... طوله
وبمناسبة البورة والبايرِكس .. واحدة قريبتنا ( عشان ماحدش يزعل ) ضارباها بورة لمن بقت
تهضرب بالعرس .. ركبت ركشة من الشهدا ومتجهه شمالاً ( مافي داعي لإسم الحي)بتاع لركشه عامل ليهو
مسجل فاتحو عالاخِر.... زكي عبد الكريم بغني ( اميرة الشباب انا جاييك عريس )
يا زول ضربه ليك الهوا ، قعدت تطمِن في رقبته ( يا زوله بكره يجيك عريس مغترب
يجيب ليك ديك الشيلة من جدة من باب شريف ، الزفاف حتجيبو لي سامية اختي من دبي ،
شريف القِشير داك ما دايراهو يغني لي في الدخله .. طه أو حسين ال ....لستِك الركشه طااااخ ضرب
اتهجمت قالت ....هي سجمي عقدتوا ؟
وإن شاء الله لا بوره ...لا تورابورا
| |
|
|
|
|
|
|
|
|
|
Re: الكادوك ((الشبكشي)) (Re: عباس الدسيس)
|
Quote: الدسيس كيف حالك ياخ ... طوله
وبمناسبة البورة والبايرِكس .. واحدة قريبتنا ( عشان ماحدش يزعل ) ضارباها بورة لمن بقت
تهضرب بالعرس .. ركبت ركشة من الشهدا ومتجهه شمالاً ( مافي داعي لإسم الحي)بتاع لركشه عامل ليهو
مسجل فاتحو عالاخِر.... زكي عبد الكريم بغني ( اميرة الشباب انا جاييك عريس )
يا زول ضربه ليك الهوا ، قعدت تطمِن في رقبته ( يا زوله بكره يجيك عريس مغترب
يجيب ليك ديك الشيلة من جدة من باب شريف ، الزفاف حتجيبو لي سامية اختي من دبي ،
شريف القِشير داك ما دايراهو يغني لي في الدخله .. طه أو حسين ال ....لستِك الركشه طااااخ ضرب
اتهجمت قالت ....هي سجمي عقدتوا ؟
وإن شاء الله لا بوره ...لا تورابورا |
محمد فضل الله
اخبارك يا حبيبنا
زولتك دي لو كمان اتقلبت الرقشة تقول ليهم شويه علي موديني وين عنبر الولاده
تحياتي وتقديري
| |
|
|
|
|
|
|
| |
عباس الدسيس
ياسر السر
ادريس خليفة علم الهدي
محمد فضل الله المكى
اسامة عثمان السيد
فيس بوك
تويتر
انستقرام
يوتيوب
بنتيريست