|
أنا عيدي جاني نكد !!
|
01:26 PM Sep, 30 2015 سودانيز اون لاين ست البنات- مكتبتى فى سودانيزاونلاين
كل عام وانتم بخير والعيد مبارك عليكم جميعا.
أول يوم العيد كان عندي محاضرة !
ثاني يوم العيد عندي امتحان !
ثالث يوم العيد قعدت اتذكر في أخواني واهلي الماتوا وأبكي !
يعني لا عيد لا خروف لا توابعه !
اتصلت بأهلي في الوطن : قالوا العيد مسيييخ !
وكمان قالوا كيف يكون العيد جميل والطيور كلها مهاجرة !!
العيد يكون ودا فرحو ويين ؟
ست البنات.
|
|
|
|
|
|
|
|
Re: أنا عيدي جاني نكد !! (Re: Deng)
|
عذرا يا خية لعلي مصابا اليوم بداء الجلافة وقلة الذوق قصدت وبشكل شخصي معظم اخواني غياب في هذا العيد كل اصحابي غياب في هذا العيد ف ذهب العيد معهم عذرا صادقا ان كنت نكدا ارعنا
| |
|
|
|
|
|
|
Re: أنا عيدي جاني نكد !! (Re: ست البنات)
|
سلام , الأخ ابوسن,
لطالما اعجبتني كتاباتك و اعجابك بمدينتكم كوستي . ولم يخالجني شك يوما في احترامكم للجميع هنا في هذا الاسفير الذى اصبح في بعض الاحيان يدفع بنا الى البحث عن مهجر أخرى ولو كان في المريخ ! ( خاصة بعد امتشاف الماء في مجرات قصية ) وتحياتي لك والى اسرتك .
| |
|
|
|
|
|
|
Re: أنا عيدي جاني نكد !! (Re: جلالدونا)
|
ستو عيدك مبارك وكل سنة وانتي بخير
ده شنو ال بسوو فيهو ايام الله كلها ما لقولك غير يوم الضحية
ديل فنانين في التعذيب ..ما اكسامينر الغتاته حقتهم
| |
|
|
|
|
|
|
Re: أنا عيدي جاني نكد !! (Re: اخلاص عبدالرحمن المشرف)
|
حبابك يا خية لا والله كنت فظا عليك فبدلا من تضميد جرحك المنوسر وسعت فتقه تعرفي العيد الفات .. كان اول عيد ضحية وابي غياب .. كنت بنتقد الناس الببكو يوم العيد واسدي النصائح الجافة كحكيم قرية مهجورة .. عاجز عن رؤية اختلاج مشاعر من يبكون .. اها من صحيت من النوم يوم العيد عيني انقطع وقايها .. انهمر دمعي قبل ان اتسوك .. عافت نفسي العيد .. بكيت قدر ما الله اداني وغلبت السكات .. زوجتي واطفالي .. بكيت كما لم ابك من قبل .. قبل ابوي وامي التي رحلت قبله وبكيت اصحابي .. بكيت هزيمة العيد لي .. فبدل ان بفرحني ابكاني ابيت احلق دقني وابيت البس وابيت امرق ولم اكن مكابرا .. حسيت بطعم مرير في حلقي وكأن فرحي خيانة لموتهم تذكرت مجلس ابي يوم العيد باذلا قارورة عطره لاولاده .. نتعطر ولو كنا متعطرين .. يبذلها لنا وكان محبا للعطر ويشتريه
| |
|
|
|
|
|
|
Re: أنا عيدي جاني نكد !! (Re: اخلاص عبدالرحمن المشرف)
|
قليل من ذكريات مجترة لأوقات بهية في رحابة من نحب.... وبقية من تصاوير وأخيلة صعبت على الممحاة .. واستنطاق لجماد التغرب ، في مباهج أطفال الحي يهرولون ويغدون وفي محياهم رسمت ابتسامة العيد لتبقى هنالك لحيظات نقطتها من فوران الزمن لتضحي ألقة جذابة ... على أن يكون بجانبك ما تجففين به المآقي
كل عام وانتي بخير
| |
|
|
|
|
|
|
Re: أنا عيدي جاني نكد !! (Re: عبد العزيز محمد عمر)
|
الأخ عبدالعزيز محمد عمر ,
ربنا يجعل أيامك كلها أعياد بين أهلك ومن تحب ,
حين كان العيد يحمل معاني اسمه لم نك ننتبه له !
كنا نفرح ونلبس الجديد ولم نك نحسب لقادم الأيام المريرة !
ربنا يجمعنا بمن بقي منهم لعلنا نشعر ببعض فرج وأحاسيس العيد .
شكرا ليك .
ست البنات.
| |
|
|
|
|
|
|
Re: أنا عيدي جاني نكد !! (Re: عبدالحفيظ ابوسن)
|
أخوي عبدالحفيظ هسع قطعت قلبي والله !
والحال من بعضو , نفس الغصة ونفس الهزيمة !
كانت الله يرحمها أمي تحننا وتكحلنا ( وكان الاحتكال مقصور على يوم العيد فقط) وتريحنا وتمسحنا !
وكان أبى يدينا العيدية ويصابحنا صباح العيد ويبارك لنا شيئ في الخد ,
وشيئ فوق الراس , ويزرر الزرائر ويربط رباط الحذاء لنا !
وكان حبيبي الراحل عبدالواحد وغرم بتسريح شعري !
وكانت قبلة المصلين عقب صلاة العيد مباشرة بيتنا العامر وفطور امي الما خمج !
كانت النسوة في الحي يستعطفوا أمي بأن لا تبدر بالافطار حتى لا يبور فطورهن !
كان للعيد طعم - وابي يفتح لنا المذياع وابراهيم يتغنى يا عيد تعود بالخير !
يا الله !!!
الله يرحم من طبعوا في قلوبنا ووجداننا الحب وحب العيد ولم تبقى لنا سوى الذكريات !
ست البنات.
| |
|
|
|
|
|
|
Re: أنا عيدي جاني نكد !! (Re: اخلاص عبدالرحمن المشرف)
|
اخلاص الحبيبة توام الروح ,
سلام وعيدك فرح ومسرة ,
كان العيد عيدا هناك في بلادنا -
كنت أقيف مع أبى ساعة الذبح وأفرح للمراسيل ( شفع الزمن يقول دا انتهاك لحريتهم)!
وكان أبي يشوي لنا السلات ويدي كل واحد في ايدو !!!
وكانت امي تفرح للمتنا !
الله الله عليها من أيام جميلة لم نك ندري انها لن تعاد ولن تعود !!
غايتو الله كريم علينا .
والعيد الجايي يارب نتلاقى فيهو وسط اهلنا ونتذكر كل الآلام دي ونضحك على الزمن ونقول ليهو : اها غفلناك !!
شكرا يا اخلاص وطلتك عيد .
ست البنات.
| |
|
|
|
|
|
|
Re: أنا عيدي جاني نكد !! (Re: جلالدونا)
|
الأخ جلادونا سلام وعيدك جميل ,
والله كل الأمهات يوم العيد قالن زي قول أمك دا !! الله يديها ويديهن الصحة ويجمع ليهن وليداتن وبنياتن الغايبين/ت,
والله بس الواحد حاسي انو في أيام جميلة كدا بيحتاج فيها لمن يحبهم .
تحياتي وكل عيد وانت بخير.
ست البنات.
| |
|
|
|
|
|
|
Re: أنا عيدي جاني نكد !! (Re: عفاف أبو حريرة)
|
العزيزة عفاف ابوحريرة ( اسمك زاتو سمح) !
تسلمي وربنا يفتح علينا بأعياد قادمات وسط الأهل والأحباب تنفض عنا غبار وحشة وحرمان الغربة اللعينة .
وعيدك سعيد وجميل وربنا يجعل كل أيامك اعياد.
ست البنات.
| |
|
|
|
|
|
|
Re: أنا عيدي جاني نكد !! (Re: Deng)
|
شكرا اخي الشفيف دينق ,
وان شاء الله الوقت داك عازماك مرارة وشية في بيتنا العامر ,
وتصابح صباح العيد بين ناس بيحبوا الناس !
ست البنات.
| |
|
|
|
|
|
|
Re: أنا عيدي جاني نكد !! (Re: ست البنات)
|
ست البنات .. وضيوفك ... سلام وكل عام وانتم بخير وبخير ,, ودائما تامين .. ولامين ...
قولتي ... لا عيد... لا خروف.. لا توابعه ! وانا اضيف ... قرااايه بس ...
تحياتي ,,,
| |
|
|
|
|
|
|
Re: أنا عيدي جاني نكد !! (Re: محمد مجيدو)
|
الحبيبة بت امي امي ... ست البنوت ..
كل عام وانت والاسرة الحبيبة اسرة كمبال بالف خير وصحة وعافية ..
والله يا حبيبة أخير انت عيد بانكدو في النهاية إحساس إيجابي كان ام سلبي أكان شفتيني للحظة دي ماعارفة العيد كان ياتو يوم .. ربنا يصبرك والشكية لي الله من الكان السبب .
كدي اتمشي وسط الزهور ديل .
| |
|
|
|
|
|
|
Re: أنا عيدي جاني نكد !! (Re: مني عمسيب)
|
منى عمسيب اخيتي في الغربة وصديقتي عبر الأسافير ,
عيدك جميل زيك ان شاء الله ,
شفتي كيف الزمن جار بينا ووين الزمن ساقنا ؟!
زهورك مبهجة وشكرا نورتي ابوست انتي وزهورك يا رائعة .
والعيد الجايي انشاء الله شيتنا في صحن واحد !
ست البنات.
| |
|
|
|
|
|
|
Re: أنا عيدي جاني نكد !! (Re: ست البنات)
|
بتنا العزيزة ست البنات سلامات وأنشاءالله ربنا يعوضك وتلاقي نفسك . السنة القابلة في نص البلد . العيد في الغربة أمسخ من لبن العشر . غايتو البركة في التلفزيون الأمريكي أبو سبعة ألف قناة . وملاح الكرارة بي كسرة الذرة الشامية المكسيكية . تحياتي
| |
|
|
|
|
|
|
Re: أنا عيدي جاني نكد !! (Re: ست البنات)
|
الاخت ست البنات عيدكم مبارك ونشارككم مساخة الأعياد حيث مضي علي 25 سنة لم أحضر لا عيد فطر أو عيد أضحي في السودان بين الاهل والاحباب والله يجازي الكان السبب.
| |
|
|
|
|
|
|
Re: أنا عيدي جاني نكد !! (Re: سيف اليزل سعد عمر)
|
ست البنات كل عام وأنتم بألف خير
قرأت كلامك أعلاه ، وأنتابتني هجمة حزن يرقد بين الحنايا ، ويستمر كنار تحت الرماد ، ثم يهتاج كل عيد ..... يوم العيد الفائت ، إتصلت بإحدى قريباتي التي توفى شقيقها قبل العيد بأيام قلائل. لم ترد على التلفون هربا من جملة : كل عام وأنتم بالف خير ) فهي تجزم بأنها ليست بخير لا في العيد ولا العام القادم ولا الأعوام التي تليها. ذهبنا لبيتهم فلم تفتح الباب ، وأنا على يقين بأنها كانت موجودة. ولكنها هربتْ من هجمة حزن تقف على أطراف المآقي
غايتو
| |
|
|
|
|
|
|
Re: أنا عيدي جاني نكد !! (Re: سيف اليزل سعد عمر)
|
كل عام وأنت بخير ست البنات..وربنا يجمع الشمل ويلم ألأهل بفرحة لقاء لكل بعيد.....أحمد الله قضيت العيد بين ألأهل والصحاب..رغم قساوة الدنيا تلقى الناس فرحانة بلمة جزء من ألأهل..كل ألأسر فيها من غاب أبدياً أو موقتاً وموعود بعودة إن شاء الله للوطن...وهناك الكثير المغترب داخل الوطن نسأل الله أن يرد غربتنا جميعاً......وجزء ليس بالقليل جارى وراء الغربة عسى أن يمنى نفسه بمستقبل ليعيش جزء من حياته سعيداً..نسأل الله أن يحسن حال بلادنا ويبعد عننا الطغاة لنعيش باقى عمرنا فى صفاة....
| |
|
|
|
|
|
|
|