|
|
 وبعدين ياخى مع المطاعم السودانية دي !!!!!
|
07:48 AM Sep, 20 2015
سودانيز اون لاين
walid taha-الرياض ، السعودية
مكتبتى فى سودانيزاونلاين
الجمعة بعد الصلاة خطرت لينا فكرة إنو نجيب كسرة وملاح من المطعم فكانت وجهتنا مطعم .... هنا فى الرياض وهو يعد مفخرة المطاعم السودانية إذ يختلف عن البقية بإنو عندو كراسى كويسة وكاشير أكثر حداثة .
الحصل يا سادة إنو تم تجهيز الطلب من ملاح وعيش ولمّن جو عشان يدونى الكسرة برز من بين الإستاف أحد العمال وتقدم ناحية الكسرة (وبدت لى الكِسرة بعيدة جدا من مخالب هذا العامل ) وقلت أكيد الزول ده ماشي لحاجة تانية غير الكسرة . ببساطة هذا العمال كانت تبدو على يديه آثار جروح وقشور مع ذلك يلف الكسرة بكل بساطة يا مؤمن دون حسيب ولا رقيب ، طوالي ثبتو قلت ليه ما عايز كِسرة فإستغرب ، ومشيت لسوداني من ضمن العاملين وقلت ليهو بصريح العبارة : انا ماعايز الزول ده يدينى كسرة ، فياخ أديني ليها إنتا ، فإستجاب مشكور ولف لى الكسرة بدون ما يلبس اى حاجة طبعا (رغم إنو عيني لصندوق القفازات !!!) لكن طبعا كان أهون لى مية مرة من يدينى ليها سالف الذكر .
شلت حاجاتى وطوالى على الكاشير قلت ليه بالله دايرك دقيقة ، ياخى مطعمك ده لمن عملتو كان مفخرة لكن لمن يجي واحد زى عاملك داك بالكمية بتاعت القفذارة دى يلف للناس الكسرة اللهى بتمشي لبطن الواحد طوالي يبقى لا مفخرة ولا حاجة والحال يغنى عن السؤال قام مشكور بالتجاوب معاى وقال بغضب لا أعلم إن كان مصطنع أم لا (أنا مديهو قفازات ياخ ) وجرى عليهو ، ما عارف بعد داك الحصل شنو لكن أتوقع ولا حاجة .
المنظر بقى متكرر وعادى . كل المطاعم السودانية إتملت عمال من تلك الجنسية الآسيوية التى تعد من أحد أكثر الجنسيات قذارة وأصبحو يعوسون الكسرة ويلفونها ويفركون الملاح ويرمون القراصة وهذا ما يوضح وما تقع عليه الأعين أما ما يدور خلف الكواليس الله وحده أعلم به .!!
وبعدين ياخى معاكم !!!
|
|
 
|
|
|
|
|
|
|
 Re: وبعدين ياخى مع المطاعم السودانية دي !!!!! (Re: walid taha)
|
أهلاً بالحبيب وليد.....والسلام عليكم....تخيل نحن والمصريين ما برانا عندنا وساخة كده عجيبة وبالذات فى حاجات ممكن نخفيها بذكاء لكن على عينك ياتاجر بعملوها....
مرة زى حكايتك دى مشيت أشترى حاجة من مطعم سودانى..والله الزول ده شوف عينى دردم سفتو وماشى يدينى الحاجة طوالى قلت ليه شكراً يا أبن العم..أنا ماعايز أكلك ولا بشترى منك ثانى..ووريته خطأه وإعترف بذلك وكلمت الكاشير برضو وثانى ما جيت بجنبهم خالص....وبعدين لو كل واحد بتكلم بنقدر نصلح ولو بسيط من ثقافتنا لأن مثل هذه ألأشياء تكتسب.....إديك الف عافية..
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: walid taha)
|
أخ / وليد طه --- تحياتي...
فعلاً نكأت جرحاً عميقاً ...
عدم إهتمام بالجودة والصحة العامة ...
أردأ أنواع الزيوت المشبعة المستخدمة في الطبخ ...
لف الكسرة وهي ساخنة في أكياس البلاستيك وخطورتها على الصحة العامة ...
وتجد خلف الكواليس --- أردأ انواع الطماطم والبصل المعطن المستخدم في الطبخ ....
إضافة الى عدم إهتمام عمال المطبخ بالنظافة العامة ...
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: ahmedona)
|
مرحب أحمدونا
| Quote: لف الكسرة وهي ساخنة في أكياس البلاستيك وخطورتها على الصحة العامة ... |
تعرف صدقا لكلامك مرة فى جده - ودى تقريبا عند كل مطاعم الفول السودانية فى جده حسب مشاهداتى - إنو بكبو الفول السفرى وهو مولع نار فى كيس عادي !!
سألت البكب الفول كيف تكبو الفول المسخن ده فى كيس بلاستيك عادى زى ده ؟!
فكانت إجابتو : (ده كيس حراري) فما فهمت أبدا يعنى شنو كيس حراري ،، لكن شلت الفول ومشيت دفقتو فى أقرب زقاق !!!
فلو فى زول عرف (الكيس الحراري) يكلمانا بالله
شكرا أحمدونا
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: walid taha)
|
لكم التحية
صاح والله نحن نفتقر لثقافة النظافة في مطاعمنا ، ومقارنة بمطاعم الشوام واللبنانيين من حيث النظافة وأحواض الغسيل الما مكتحة والطلعة البهيةمع الإبتسامة وإنتقاء الكلمات البتكتل الحيل (زي تكرم وعلى راسي ومن عيوني) والفوط في الطاولات البيضاء والحمراء والكاسات المقلوبة ، فنجد صورة مختلفة تماما كدي أمشي غبيرة شوف المباشرين بالعراريق وصرة الوشي ...غايتو جنس حالة بس!!!!
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: سامي سالم)
|
| Quote: كدي أمشي غبيرة شوف المباشرين بالعراريق وصرة الوشي ...غايتو جنس حالة بس!!!! |
تحياتي اخي وليد وعبرك التحايا للأخ سامي
والله النقطة الذكرتها دي مزعلاني شديد الاخ سالم
وفي احد القهاوي في غبيراء بتلقي السودانيين قافلين
الشارع من بداية شارع غبيراء العام الي مقابر العود
تحس نفسك كأنك في السوق الشعبي
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: سامي سالم)
|
تحياتي للجميع
وفي السودان حدث ولا حرج .. حصل لي موقف قبل كدة واظن كتبتو عنو هنا قبل فترة
لابس جلابية مبرقعة بالزيت ووسخانة ويدو لافيها بي قطعة قماش مهترئة ووسخانة وظاهر فيها اثر الدم المتخثر . وشغال يغرف في الفول والدمعة .. بشيل الطعمية والبيض بيده العارية
ومش هو بل تقريبا كل المطاعم التي ارتادها بحكم وجودي في السوق واتناول افطاري في السوق ..
اما السمك فحدث ولا حرج .. محل التحمير والنضافة واحد وعينك لي نفس الزول البطلع احشاء السمك برميها في الصاج
اها
نسيت
لو نضمت بعتبروك مدلع
مرة مشيت افحص الملاريا .. البت اتناولت حقنة فحص مفتوحة ورفضت .. قالت لي فتحتها هسة . قلت ليها لا داير واحدة جديدة .. وفعلا طلعت واحدة جديدة وتعاملت معي بعدائية بعدها
دة المجال الطبي فما بالك بغيره
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: سامي سالم)
|
سلام وليد ...
سبحان الله انا فتحت الموضوع ده امس مع جمع كريم هنا في جدة
بالحرف الواحد قلت ليهم معقول ما يكون في جدة دي كلها مطعم سوداني وااااااحد نضيف
وقلت ليهم لو زول فتح مطعم مرتب ونضيف وعمالو نضيفين الناس مستعدة تدفع اي مبلغ في الاكل البتاكلو
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: walid taha)
|
انا قبل كدا كنت بفطر في احد المطاعم بعد شوية حسيت بحاجة شابكة في حلقي المهم بعد معافرة وآخ وإخ قدرت طلعتها لقيتها دبوسة بتاعة دباسة ... رحت لي الزول البيحاسب وكلمته بأدب وبصوت منخفص بأن هذا لا يليق ان يحدث في مطعم ولو شخص غيري كان ممكن يعمل منها قضية الخ .... قام بكل بجاحة فتح الدرج وطلع قيمة الطلب وقال لي هاك خلاص خد قروشك ... رميتها في وجهه واحتسبت امري لله من تصرف الجهلاء ..
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: محمود أحمد أبوشرا)
|
| Quote: انا قبل كدا كنت بفطر في احد المطاعم بعد شوية حسيت بحاجة شابكة في حلقي المهم بعد معافرة وآخ وإخ قدرت طلعتها لقيتها دبوسة بتاعة دباسة ... رحت لي الزول البيحاسب وكلمته بأدب وبصوت منخفص بأن هذا لا يليق ان يحدث في مطعم ولو شخص غيري كان ممكن يعمل منها قضية الخ .... قام بكل بجاحة فتح الدرج وطلع قيمة الطلب وقال لي هاك خلاص خد قروشك ... رميتها في وجهه واحتسبت امري لله من تصرف الجهلاء .. |
الحبيب أبو أحمد الزول الراقي
يا أخي ألف بعد الشر عليك ...وانا شخصياً أكاد أجزم أن هذا الكاشير لم يفهم ولا كلمة
مما قلته له أنت ...
حقيقي عندنا مشكلة عويصة في الناحية دي داخل السودان وخارجه
تقبل الله منا ومنك صالح العمل
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: walid taha)
|
ذات مرة دخلت مطعم سوداني ( المنطقة الشرقية السعودية ) وطلبت من أحد السودانيين الموجودين في المطعم وقال كويس
بعد شوية جاء واحد تاني من بتاعين المطعم شافني واقف وسألني عن طلباتي قمت وريتو
أنا عايز كده وكده وكده ... في اللحظة دي قام صاحبنا الأول هاج وماج وقال لي ياخي ما قلنا
خلاص بنديك بصورة فجة كده...!!!
قلت ليه ياخي الراجل سألني عايز شنو ووريتو وين المشكلة هنا ؟؟؟ ومش أكلكم ده هدا طرفي
منو وطلعت ومن داك اليوم ما دخلت المطعم ده تاني ...!!
مشكلتنا نحن السودانيين ما بنعرف نتعامل مع الزبون ولا بنعرف نكسبو لجانبنا مش زي الجماعة إياهم من
الشوام واللبنانيين يحسسوك إنك انت الزبون الوحيد عندهم ويكيلو ليك من الكلام البكتل الحيل
داك ...!!!
وذات مرة أيضاً دخلت فرن سوداني ولقيت الزول البطلع العيش من الفرن مدقر سفتو قدر الكتلة والله ...!!!
صراحة نحن شعب فاكنها في نفسنا ساي ، عاملين فيها إننا أكثر شعب مثقف وأكتر شعب نظيف واكتر شعب ....الخ
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: walid taha)
|
| Quote: كل واحد بتكلم بنقدر نصلح ولو بسيط من ثقافتنا لأن مثل هذه ألأشياء تكتسب |
سلام للجميع
كلام اخونا اسماعيل دا الحل لازم نتكلم و بصوت عالي
المغتربين دائما بتحسسوا من الكلام عشان ما يقولوا خلاص اغترب وجاء يتفلهم علينا ...
نزلت السودان قبل سنتين دخلنا محل فول في السوق العربي الراجل يعد ما صلح الفول مسح اطراف الصحن باصبعة و لحسو ....طوالي نبهتو بصوت عالي قدام الناس ....
بتاع العيش يبل اصابعه بلسانة عشان يفتح الكيس ويشيل بيها العيش ... وبتاع اللبن السخن ينفخ الكيس قبل ما يكب اللبن السخن
دخلت سوق بحري بتاع الخضار اشتري بلح ...لقيت نفسي لافي على ستات الدكوة اسالهم ان يغطوا الدكوة من الغبار وكلهن اتقبلن كلامي.
احسن نتكلم بدل نرسل قروش العمليات .
تحياتي
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: محمد جبره)
|
بوست مهم جدا
ياخي انا مرة مشيت افطر لي في مطعم في بحري فاتح في السكة حديد ..طلبت فول مصلح وعيشتين زيادة...عليك امانة الراجل شايل صحن الفول بيد والعيش
باليد التانية ويعطس الظاهر عندو حساسية ...قلت لي يا اللخو انا فولك ابو مخاخيت دا ...تب ما بدورو ...قال لي في ستين ...احترمت نفسي ومشيت.
سلام يا صاحب البوست ...لك التحايا
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: حسين عمر الفكي)
|
Quote: أوع من مصلح ... سااااادة بس ..
وبدون زيت كمان ... |
الأخ وليد طه وضيوفه الكرام
لكم الود والتحايا الطيبات
حاجة غريبة في المطاعم السودانية .... إشتري فول سادة .. مامصلح
وضعه في الثلاجة في البيت حتى يتم تبريده تماماً .. ستكتشف أنك
إشتريت فول غارق في زيت يجمد بطريقة غريبة .... الكلام ده في
الرياض والله .... قال نوع الزيت ده بيساعد في نضاج الفول ؟؟؟؟
تحياتي ....
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: حاتم إبراهيم)
|
سلامات
ياحاتم ختيت يدك في الجرح
دي ثقافة غذائية عامة، بتاع المطعم الفي الرياض يجيب
الشغل النضيف من وين، ما حاجاتنا كلها مجوبكة ، خلي المطاعم
في البيوت الكلام دا في ، قبل كم يوم شفت إعلان عن تلوث اللبن المكشوف، اتذكرت سيد اللبن، وبتاع الطعمية المكشوفة في الشارع....
يعني ما تعصروا شديد على بتاع المطعم
لكن يا حاتم عذبت الكولتي كنترول عذاب..
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: walid taha)
|
قبل كم سنة في يوم خريفي مريت على جزار في السوق العربي غرب مباني الكمبوني
والله يا شباب الضبان مغطي كامل اللحمة ...!!!
قلت للراجل ياخي الضبان ده ما عندك ليه حل ؟؟؟ وكانت المفاجأة شال علبة البف باف
وحول اللحمة قعد إرش والله الكلام ده قدام عيني ؟؟؟ انفعلت واتضايقت من عمليتو دي
وقلت ليه يا رجل اتقي الله انت ما عارف البف باف ده خطر على الصحة ...!!
قال لي ياعم النار تقتل كل شئ .....!!!!!
ولسه الجماعة يغنو مبسوطين :
نحن بلدنا بي خيراتا
البلد البتشبها ياتا؟؟
هي حياتنا واحنا حياتا
وما بندور بلاها وحاتا
نحن بلادنا نتحدابا
يا ربي نتحدى البلدان التانية بي شنو ؟؟؟ بالوسخ والرفالة دي ولا كيف ؟؟؟
رحم الله رجلاً عرف قدر نفسه ...
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: Othman Al-Hasan Babikir)
|
يا وليد طه سلامات
بعد وجهات النظر الفوق دي
خلونا نسأل سؤال عن السبب لهذا التردي الصحي للتعامل مع الأغذية في السودان؟
هل الأمر له علاقة بمستوى المعيشة والحالة الاقتصادية أم أن الأمر يرتبط بالنافوخ السوداني الذي يتهيب التعامل مع النظافة والاوتكيت في المأكل والملبس...
النظافة يجب أن تتحول إلى ثقافة عامة حتى تتغير الأفكار ويتغير السلوك تبعا لذلك..
عندنا مشكلة كبيرة تتمثل في المكابرة وعدم الإعتراف بالأخطاء
بداية التصحيح هو الإعتراف بأن هنالك مشكلة تحتاج إلى جهد لتحل.. وصعب جدا الإعتراف بالوساخة ..
هل نمط حياتنا يغلب عليه عدم النظافه وعدم الاكتراث لمطلوبات سلامة الأغذية؟
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: عبدالعظيم عثمان)
|
Quote:
نحن بلدنا بي خيراتا
البلد البتشبها ياتا؟؟
هي حياتنا واحنا حياتا
وما بندور بلاها وحاتا |
أعتقد أنه ولكي يستقيم معنى القصيدة كان عليكم أخي ( عثمان بابكر )
تقديم حرف الراء على حرف الياء في الكلمة المكتوبة في الأعلى بالأحمر .
التحية لصاحب البوست، وضيوفه ومطاعمه.
...
..
.
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: Frankly)
|
بوست حلو جدا وحيوي
مساكم خير
غايتو للمتزوجين النساوينوم شغالين او بدرسن حبشية تظبت ليك الزغني والكسرة وملاح السلج والشطوط وتدفع ليها الالف ريال شهري واتا مبسوط وحات نظري االاكل من حلاتو وطعامتو ونضافتو قرربت اعمل موقع في النت للطلبيات مفكر عديل في الموضوع ابقو قرااب بس
كويس انو البلدية نفذت اوامرا بخصوص الفاصل الزجاجي عقبال مايجبروهم يشدو الحلل قدام عيون الناس لانو هناك لقو مطاعم بضبحو الجريووو عادي وماتجربة لحوم الحمير في الوطن ببعيدة
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: حامد بدري)
|
جيتكم ثانى...وشكراً أخى محمد جبرة للتأييد....حقيق البوست حيويى....وخلونا نعترف بالخطأ عشان نعرف نصلحه....
دى ثقافتنا وبيئتنا ومجتمعنا هم سبب هذه العلة...النسوان فى المناسبات الواحدة بطرف توبة تمسح الكبابى وهى تكون بدون مؤاخذة قشت بيه عرقه أو أنفها ..أنا فى بيوت بدخله كان مته ما بشرب فيها تحس بالوسخ يتحدث.....والعجب النسوان البعوسن الكثرة عواسة وعواسة خليها على الله.......تجى ضيف عادى تنوم فى مخدة راقد فيها منو قبلك ما تعرف......الله يحفظنا بس...لكن الحمدالله ألأن فى وعى شوية وتثقيف صحى عبر ألأعلام والوسائط ألأجتماعية.
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: الصادق عبدالله الحسن)
|
مشكلة المطاعم السودانية والنظافة مشكلة كبيرة خلاص, في نجران كان في واحد سوداني بعمل فول ودائما يكون خاتي سفة دقار لوري بس وبي طريقة مقرفة, في جدة كمان في مطعم سوداني في باب شريف, في شهر من شهور رمضان مشيت أشتري فطور رمضان, كانوا كابين الحلو مر في حفاظة وساخنة شديد, في سعودي جاء يشتري حلو مر, قال لي شوف دي وسخانة كيف؟ حالتنا صعبة
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: aosman)
|
كانت هنالك محاولة جادة من احد الاخوة لنقل المطاعم السودانية من الحالة التي يرثى لها
الى وضعية افضل وفعلا قام بأنشاء مطعمه بجدة بشارع غرناطة و وضع فيه ديكور جيد
وطاولات نظيفة جدا مقارنة بنظيراتها من المطاعم السودانية الا ان المطعم بعد فترة وجيزة اغلق
لا علم لي بالسبب و لكن اجزم انه لقلة الزبائن .كيف لا و نحن امة ندمن الوسخ و نرتاده و نتجمهلا عنده
ولو لا ذلك لنجح هذا المطعم السوداني الرائع .
شكرا ......صاحب البوست و ضيوفه الكرام
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: Othman Al-Hasan Babikir)
|
تعرف يا عثمان الحسن المحير في الأمر
تلقى السوداني نضيف في لبسه وبيستحمي كل يوم وقد يكون أكثر من مرة في اليوم(ما زي بعض الشعوب) في مصر القريبة دي في إعلامي قبل أيام أعلن حملة. وطلب من الشعب المصري أن يستحم (الإعلامي هو تامر أمين)..
عندنا السوداني جنه مسواك أراك ومعاجين وخلافه .. وإلقاء يهتم بالحلاقة... وعندما يتعلق الأمر بنظافة الغداء وسلامته الصحية يعود إلى اللامبالاة ولا يكترث إلى النظافة وسلامة الغذاء.. صراحة أمر محير جدا
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: عبدالعظيم عثمان)
|
تحية طيبة للجميع
والله موضوع ذو شجون يا جماعة ، فى زيارة لـ امارة عجمان فى دولة الامارات ، الشباب عزمونا عشا ، دخلنا المطعم ، طلبو ، مشيت اغسل يدي، و عينى جات فى المطبخ ، الصراصير حاميه جنب صينيه الطعمية عاااااادى جدا !!! طوالى لغينا الطلب و شوفنا مطعم فاست فوود !!!
لكن برضو مشينا مطعم ( ايبونى ) فى دبى ، ما شاء الله تبارك الرحمن ، موقع هادئ ، نظافه على اعلى المعايير ، و خدمة ممتازة ، فعلا مثال للمطاعم المحترمة اللى بترفع الراس
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: ودقاسم)
|
دا موضوع لي سابق كنت نزلتو قبل كدا في كم موقع
.....................................
صحينا اليوم داك بعد نومة متاخرة وقصيرة على صوت اذان الجمعة في بيت احمد صاحبنا بمدينة جده ام جضاض
اتوضينا على عجل وجرينا لحقنا الصلاة في النفس الاخير ونسبة للتأخير في الحضور فقد صلينا تحت اشعة الشمس المولعة نار ( تحتك اسفلت وفوقك شمس ) لما تخلص الصلاة بتحس انو في جزو من جسمك اصبح شية شهية ما عليك إلا تحلب فيها ليمونة وشطة وبصلة خدرا وتهم بالاكل اللذيذ
المهم
ابتدينا نتشهى في اننا نتغدا او نتناول وجبة دسمة ولذيذة وين مع الجوعة العجيبة الكانت حاصلة .
الاقتراحات كانت كتيرة .. لكن في نهاية الامر وفقنا في التركيز على مطعم السودة ببني مالك وذلك لما يتميز به من ضلعة شهية ومقرمشة سال لها لعابنا ونحن بنفكر فيها ، وملاح تقلية مغمس بالكسرة والشطة العجيبة والبصل الابيض ثم بعد ذلك التحلية السودانية الخاصة من خليط الخشاف والبسبوسة والكاستر الاصفر المريخي
دورنا العربية واتجهنا صوب المطعم ولسان حالنا بيحسب ويعد في الدقايق والثواني الفاصلة بيننا وبين الاكل
والبطون التكورك
دخلنا واسرعنا في الجلوس على الطربيزة الشينة وممسحة بي فوطة تحتوي على مخلفات طعام شهر كامل لي ورا ولي قدام امكن
وطلبنا المراد ( الضلعة + التقلية المملحة بالكسرة - التحلية السحرية القلنا للجرسون البنقالي المتسودن جيبا لينا بعدين )
حقيقة يا اخوانا ما قادر اوصف ليكم الشعور شنو والضلعة قاعدة تهبط قدامي على صحن مغطى بالمكرونة الجميلة
وبدون اي مقدمات ملخت لي حتة من اللحمة وغمستها في الشطة ودخلتها في الخشم البدا يلوك فيها اوتومتيكلي واشتغلت وظايفو من مضغ وتذوق وألخ
لما جيت املخ اللحمة التانية انتبهت في الضلعة على حاجة غريبة
وكأنني رأيت كرعين لهذه الضلعة
حيث هممت بخلع نظارتي ومسحتها عدة مرات واعدتها مرة اخرى للعيون المعمشات ثم قعدت اعاين للكرعين الفي الضلعة
اتخيلو انو صرصور ( قرمبعة ) ملصق في الضلعة .. وموش ملصق ساي . لا .. متبل مع الضلعة بالتتبيلة الكاملة من بهارات ودقيق وغيرو
يعني انا لو ما عندي قوة ملاحظة شوية او امكن إلهام من ربنا الساعة ديك كان ممكن ما افرزو ذاتو
على الرغم من اني ما الزول القريييف داك .. إلا اني حقيقة قرفت اللحظة ديك ونفسي طلعت من الضلعة ومن الاكل السوداني ومن السودان ذاتو
في فرق لما تاكل حاجة بمزاجك وتاكل حاجة مغصوب ومجبور عليها
او بمعنى تاني مدقوس ومستنكح ( بفتح الكاف ) فيها
يعني انا قبل كدا اكلت قعونجات واكلت دمعة ابو القنفد ( ولذيذة جدا الاخيرة دي على فكرة )
لكن كان الكلام دا بمحض ارداتي ومافي حاجة غاصباني او جابراني عليها
المهم
بحركة لا ارداية وقفت على حيلي وكنت عاوز اعمل فلم هندي .. لكن في نداء خفي جواي منعني من الحاجة دي ( امكن لاني سوداني والشغالين في المطعم ديل سودانيين زيي وعارف تماما وفي السعودية دي بذات جرة تلفون سغيرة على البلدية بيجو يقفلو ليهم المطعم فوق راسم وبينقطع عيش الشغالين جواو كلهم )
قمت غسلت يديني ومشيت ادفع الحساب وكلمت الراجل ( الزول السوداني ) القاعد في الكاشير بانو الحصل كيت كيت كيت
اتخيلو ولا كلمة لا ياخ معليش ما قالا
قال لي :
- الحمد لله انكم طلعتو سودانيين
طيب لي يا جماعة ..
هل لاني سوداني وود بلد وطيب معناتو آكل السجم الاحمر ذاتو واعمل نايم ؟
ولي السلبية في التعامل واخذ الموضوع بالبرود المعتاد
انا جات طالعة لي في الضلعة قرمبعة .. معناتو في القيزان جوة في ضبوب وسحالي وبني ادمين ذاتو
عموما السؤال السألتوا لي نفسي من اليوم داك وهسة بطرحو عليكم :
لي دايما نحنا بناخد الامور ببساطة وبرود في التعامل
ولي دايما عندنا عدم مراعاة لشعور الناس الباقين ( خلينا نقول ما عامة او احيانا )
والسؤال الاهم :
لي دايما مطاعمنا اوسخ مطاعم بالمقارنة مع بقية المطاعم التانية .. مع العلم انو حتى البنقالة والاندونيسيين والباكستان مطاعمم بتكون نضيفة لدرجة انها فيها اقسام خاصة للعوائل .
مطاعمنا دايما عبارة عن قدرة فول وقيزان شوربة ممصمصة ومنقد شية كبيرة ملان سكن وطرابيز وسخانة وجرسونات اخلاقم في راس نخرينم
لي وين ولي متين ولي شنو
وبس .
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: walid taha)
|
Quote: الحل بتفعيل العمل الصحي كما كان سابقاً في السودان، وسن القوانين ومتابعتها وإعطاء ضباط الصحة صلاحية التفتيش الدوري والمصادرة والإبادة وفتح بلاغات جنائية ضد المخالفين لتعريضهم صحة الناس للخطر بعدم الإلتزام بالضوابط الصحية ...
+++
Samet ALsamet
المسألة موجودة في كل بلاد العالم الثالث ، والفروق في الدرجة فقط .
لكن ..
على هذا الحال .. ستنتظرون 100 عام على الأقل حتى يتحسن الوضع ..
ولكن .. يمكن أن يتحسن في 100 يوم إذا كان هناك ( قانون ) واضح لكل تفاصيل الغذاء ، وتطبيق جاد من خلال متابعة حازمة .. فهل هناك مبادرون لوضع هذا القانون من خلال المنبر وعرضه على المسئولين ؟ |
| الدولة ليست مسؤولة عن خيارات الناس في قبول الأكل الفاسد! | لا اعتقد أن الحلول أعلاه ناجحة، فحتى في (العالم الأول) تحتفظ كل دولة بنوع من الأغذية يعتبر "فاسد"، حتى بمعاييرها هي، كوريا مثلاً لديهم نوع من المخللات يسمى (كيمشي) أعفن من الكول، وبريطانيا واليابان وفرنسا لكل منهم أطعمة غريبة (exotic).
أما ما يتعلق بالنظافة (hygiene) فهذا أمر يعود للسلوك ولا تنفع معه القوانين، فمن شب على شيء شاب عليه، فما الذي يجعل شعب كامل لا يطيق السواك؟ ولا يرى مشكلة في ذلك؟ بما في ذلك برلمانهم وحكومتهم وأزهر شخص فيهم؟
وما الذي يجعل أفراداً يصرون على استخدام العود في السواك حتى في المركبات العامة؟
هل تنفع القوانين هنا؟
الحل أن لا تسلك سلوكاً ترفضه من الآخرين أمام صغارك، ولا تدع زوجتك تعلمهم سلوكاً لم تره منها قبل أن تتزوجها، وتذكر أن طفلك لا يفعل ما تأمره به، بل يقلد ما تفعله أنت بالكامل.
أمنعهم من حضور الذبح، لا تشركهم فيه، امنع صغيرك من استخدام يده في بيت الأدب، لا تجعله يستخدم أدوات الكبار، عوده على أن يستقل باحتياجاته الشخصية (ليفة، مخدة، كباية) وأن لا يأكل كما تأكل الضباع يكد اللحم ويقرش العظم، وأن لا يبصق أمام الناس أو على الأرض أو يشتري من الأرض ... إلخ.
_____
ثم ننتظر عشرين عاماً ونرى. |
| |
|
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: ahmedona)
|
شكرا أخ وليد
المطاعم السودانية رديئة رغم أن الاكل السوداني طاعم للغاية وبدأ في جذب العرب بالذات العزاب واصحاب الأعمال المستمرة
غير مشكلة النظافة هناك مشكلة أخرى هي مشكلة اغراق الطعام بالتوابل وهي مشكلة تواجه أصحاب المتاعب من القولون العصبي والحساس
لا يمكن أن تحصل على طعام من مطعم سوداني إلا وهو مغرق بالفلفل والبهارات
لو كنت المسئول بهذه المطاعم لأوقفت استخدام الكسرة التقليدية واستخدمت الكسرة المغلفة من المخبز مباشرة
ـأحمد الشايقي
| |
|
|
|
|
|
|
|
|
Re: وبعدين ياخى مع المطاعم السودانية دي !!!!! (Re: walid taha)
|
كيف حالك يا وليد إن شاء الله كل الأمور تمام ..
بتفق معاك في كل القلتو لكن برضو في نماذج مشرقة -على قلتها- عندك مثال مطعم امواج في الخرطوم مالك المطعم سوداني والإدارة كذلك وحتى الآن رغم مرور سنين من افتتاحو لكن محافظ على جودة الطعام والنظافة وفي تطور مستمر وأفضل كتير من مطاعم حتى خارج السودان
تحياتي
| |
|
|
|
|
|
|
| |
walid taha
ismeil abbas
ahmedona
سامي سالم
اسامه العريفي
عبدالحفيظ ابوسن
جمال الباقر
محمود أحمد أبوشرا
معتصم سليمان
Othman Al-Hasan Babikir
محمد جبره
حسين عمر الفكي
بابكر قدور
لطفى العمده
Adam Youssif
حاتم إبراهيم
عبدالعظيم عثمان
رحمه فضل المولى عجك
الصادق عبدالله الحسن
Frankly
حامد بدري
waleedi399
aosman
طارق ابراهيم ابوالفضل
محمد الامين احمد
ودقاسم
مازن الجمّال
يوسف أبو صالح
محمد عبدالله مختار
فيس بوك
تويتر
انستقرام
يوتيوب
بنتيريست