|
|
 تفاتيش جوازات السفر
|
12:18 PM Sep, 15 2015
سودانيز اون لاين
د.محمد حسن-
مكتبتى فى سودانيزاونلاين
بعد الغيبة ..يطل محياك
وفيك اغالط نفسي عن الاشواق
واقول
انا بتوهم اني بحس
الحالة الوجد
لما اكون
واقف برجاك.
شوفتك...
عافية حرفا
ليك بيوصف
كلما يشوف النور الباهر
من عينيك ،
واظل مشتاق.
وانت
نيلا شق بطاح
لون كل تاريخ الناس
بي اسمك
عزة..
وانا ياعزة فيك بغني
واقول بهواك
منك
وفيك
عبق امدر والطابية الشاهدة
على
جبن الساسة
وغدر الساسة
وجهل الساسة
والبوابة تمد في لسانها
وبرضو بغني جمالك ونور محياك
حلة فنقر
شارع الدومة
وعرضة القرضت
كل قلوب عشاقا قرضة
وكيف ما اريدك
وكلما تبيني
فيني يبين يا عزة جمالك،
عرقا ناتح
وجوة الجوف
يا غالية تساؤل
وين القاك؟
كيفن وبيننا بحور
ومزالق
وكم طيارة
وناس بتفتش جوة جوازك
عن لون قلبك
وشكل اشعارك
وعمق افكارك
وعن تاريخ ميلادك
جوة قلوب الناس الحايرة
وكيف في بعدك هي بتهواك
كيف القاك
ومن بناتنا جمارك
عايزة تجمرك
نبل احساسي
واني بريدك رغم الكاكي
عايزة تجمرك
روعة صورتك جوة عيوني
عايز تصادر مني هويتي
وتسمح لي
اني اواصل دون رؤياك؟
هل بتصدقي ؟
اني اسافر دون محياك؟
او اتخطى ضفاف النيل
غير ما امشي وازور
واغسل وشي.
بموية النيل؟!
واصدح
بي الحانك وليك اغني
كم اهواك..
هل بتصدقي !!
في التسفار المر
كم ناجيتك
كلما طيفك يلاعب
فيني الخاطر
وانت بتعرفي
انو الخاطر بيك مشحون
وانو الليل بكسيني شجون
واني بقسم بدرة سهري
على النجمات
ترجع لي
وحياتك انت
ضي كلمات
وابقى اصور فيها جمال مغناك
وهل بتصدقي
كلما مغني يغني
بشوفك في الحانه ،
مموسقة
تمرقي من بين اوتار العود
ومن بين نغمات كمنجة حنينة
ومن طمبور صادح
بملاني
حنين وجنون
وانا بتمنى لقاك
اتدثرتك لمن تشتي
وفيني تزمهر ريح الفربة
واتزملتك
كلما امشي مرافي باردة
وخالية تمام من احساس،
لحين اتوسد جنبي
رصيف..
وانا بتوجع ليك وبيكي
كلما شفت
في التلفاز
اطفالنا يفتشو قرص رغيف
وكيف القاك
وبيني وبينك
سكة ومطرة
وكوم اشعار
واماني بترحل زي غيمات
واتلقاكي
مطرة تصب
في عينينا
تغسل مننا فتر الغربة
تراب الغربة
ووجع الكربة
وكيف اتكوم فينا
حنينا دافق
بالسنوات
وارجع ادندن
زي ترتيل متواتر دايما
وزي اوراد ما تفارق شفتي
واكد ليك بين
ثنيات الزمن الماشي
اني بريدك
وجد بهواك
وما بس
|
|
 
|
|
|
|
د.محمد حسن
أحمد الشايقي
ادريس خليفة علم الهدي
فيس بوك
تويتر
انستقرام
يوتيوب
بنتيريست