|
|
|
 Re: ضرغام عباس .. صاحب البوستات المُهدرة (Re: معاوية الزبير)
|
ود الزبير سلام
فعلا ضرغام اضافة جيدة للمنبر و اختيارو للمواضيع ممتاز جدا و راسو مليان ...
بحتاج لي معرفة تكتيك في ادارة البوستات و توقيت فتح البوستات
و حتى توقيت كتابة الردود على مداخلات الغير ....
ود الزبير ما تجي نفتح لينا معهد لتعليم الأعضاء الجدد فنون و علوم ادارة البوستات ... :) :) :)
امنياتي بالتوفيق للأخ ضرغام
تحياتي و احترامي
.
| |
 
|
|
|
|
|
|
|
 Re: ضرغام عباس .. صاحب البوستات المُهدرة (Re: معاوية الزبير)
|
ايوة يا معاوية، دا الحاصل. بوستات بديعة جدا تضيع فى الزحمة. اي بوست فيهو كلام سياسة فى الغالب يلقى رواج. غير ذلك، لا. قبل ايام كتبت لي بوست اقترحت فيهو حركة و عمل جماعي لاستخدام الواتساب لتعليم الاطفال فى السودان الانجليزية -اذا ما تعليم عديل على الاقل تعريضهم لها و رمي بذور معرفة باللغة من وكت مبكر- بتوفير فيديويهات قصيرة من اليوتيبوب و غيره و نقلها للواتساب. انا براي كنت عامل لي من فترة قروب لناس بيتنا و بنقل فيهو فيديوهات قصيرة لاغاني اطفال و مواد تعليمية اخري بالانجليزية. الحكاية دي كانت مفيدة لكن للاسف صعب الاستمر فيها لانو النت شوية ضعيف فى المناطق خارج العاصمة، لكن فى العاصمة كويس. لو ناس كتار اهتمت بالموضوع ممكن يتم الارسال من داخل السودان، المسالة بتكون اسرع. شئ تاني العمل الجماعي ممكن يدي فرصة للجمهور ان يضغط شركات الاتصالات لتحسين خدمة النت -اعلان مقاطعة صغيرة ممكن يكون له مفعول السحر لانو شركات الاتصالات بتحسب دخلها بالدقيقة-. البوست غتس و مافي زول قال لي الله يجيرك. نحن شعب عندما ميل كتير للكلام و التحليل و استعراض القدرات المختلفة. لكن ما قدرنا اصلوا نتحرك فى عمل جماعي. لو فى اي لحظة من الزمن قدرنا على الحركة الجماعية من النوع دا ح نغير الواقع غصبا عن الحكومة.
| |
|
|
|
|
|
|
|
|
 Re: ضرغام عباس .. صاحب البوستات المُهدرة (Re: abubakr salih)
|
| Quote: ود الزبير ما تجي نفتح لينا معهد لتعليم الأعضاء الجدد فنون و علوم ادارة البوستات ... :) :) :) |
والله فكرة يا أبو حسين،
خلاص نبدأ بي "تعليم الكبار"، لكن بالماسنجر لأنو النقش في الكبر عايز المداراة
كلّم أصحابك، أنا أصحابي منقوشين 
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: معاوية الزبير)
|
| Quote: ود الزبير انت كنت ألفة زمان في المدرسة مش كدا :) |
أبداً وحياتك، كنت من المهرجلين الثابتين لدرجة مرة كنت داكي المذاكرة، والألفة كتبني مهرجل بحكم العادة
المدرس كان ظريف دقاني في الطابور دبل، قال ليهم التانية دي باعتبار ما كان حتما سيكون.
بالله يا ود البشرى علّمنا كيف نشيل الضحكة من وش البوست دا، ما تقولي اسمع ليك نكتة بايخة
-----
أها يا أبو حسين رأيك شنو ندرّس في المعهد التكتيك البرازيلي 1 : 3 : 5 بتاع تفط مداخلة وترد على أخرى
دا بكون للنابغين بس.. صاح !
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: معاوية الزبير)
|
| Quote: ايوة يا معاوية، دا الحاصل. بوستات بديعة جدا تضيع فى الزحمة. اي بوست فيهو كلام سياسة فى الغالب يلقى رواج. غير ذلك، لا. |
بكري علوم
عارف صاحبك القال أنا زي الألفة، بيلمح لدعوات سابقة أطلقتها لجعل المنبر مكانا لمناقشة وإثراء القضايا الاجتماعية والاقتصادية التي تؤثر مباشرة على وضع البلد
باعتبار إنو عمرنا ما ح نتفق في السياسة ولن نغيّر مواقعنا ولن نكسب سوى المزيد من البغض والعداوات المتبادلة
Quote: نحن شعب عندنا ميل كتير للكلام و التحليل و استعراض القدرات المختلفة. لكن ما قدرنا اصلوا نتحرك فى عمل جماعي.
لو فى اي لحظة من الزمن قدرنا على الحركة الجماعية من النوع دا ح نغير الواقع غصبا عن الحكومة. |
يقول فيلسوف الاجتماع الأميركي إريك هوفر:
(نعتقد أن الثورات هى سبب التغيير، ولكن العكس هو الصحيح، فالتغيير هو الذي يمهد للثورة)
نفس مغزى المقولة الدينية لا يغير الله ما بقومٍ..
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: جلالدونا)
|
Quote:
يقول فيلسوف الاجتماع الأميركي إريك هوفر:
(نعتقد أن الثورات هى سبب التغيير، ولكن العكس هو الصحيح، فالتغيير هو الذي يمهد للثورة)
نفس مغزى المقولة الدينية لا يغير الله ما بقومٍ.. |
كمان ما قدر دا يا ود الزبير
قالوا ليك دروس فى محو الاميه الاسفيريه
وفن ادارة البوستات
تقوم تبدأ لينا بى علم الاجتماع
وكمان فيلسوف اجتماع وامريكى كمان !
بتبالغ لكن !
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: Kabar)
|
الفصل الأول
موجِهات عامة:
لا تستعجل في فتح بوست بمجرد أن تبرُقَ (تخطر) فكرةٌ ما في ذهنك (خليك تقيل، فالمنبر ما طاير، والتهكير لمّا يحصل ما دايم)
انتظر حتى تختمر الفكرة تماما في ذهنك بحيث تصبح متأكدا من قدرتك على متابعة البوست وإدارته بنفس كفاءة البداية وبعيدا عن الملل لأطول وقت ممكن
اطرح فكرتك بصورة مباشرة ومركزة ومختصرة ولكن واااضحة منذ مداخلتك الأولى أو بالكتير التانية متفادياً أسلوب التشويق والإثارة
(فلو دامت لأجاثا كريستي لما وصلت إليك)
ضع في ذهنك أن فكرة البوست لن تستمر طويلا بالتسلسل والسلاسة التي تتخيلها
فأنت لست الآخرين، ولكل عضو تفكيره وفهمه المستقليْن عنك وهو لا يعلم بالضرورة مقصدك من غايات البوست
ولكن مع توقعك لهذه الانحرافات عليك اختيار الوقت المناسب لإعادة البوست إلى مساره
تقبّل حقيقة الاختلافات الثقافية والمستوى التعليمي وفارق السن والخبرة بين أعضاء المنبر
وتجمّل بالصبر في الرد على المداخلات متسلحا بمعرفتك لهذه الحقيقة
قبل إرسال مداخلتك، راجعها مرة واتنين وتأكد من خلوها من الأخطاء الطباعية خاصة، ولا مشكلة كبيرة مع القواعد والنحو والإملاء
المهم أن تكون مفهومة للجميع
تتيح لك هذه المراجعة أيضا التراجع عن إرسال المداخلة إذا كانت ناتجة عن انفعال أو غضب أو رغبة في إيذاء الآخر
ابتعد عن المداخلات الطويلة وما تتخيل إنو الناس مستمتعة وقاعدة تتلذذ بكل كلمة تكتبها
فكلك عورات وللناس أقلمُ (المداخلة الحالية دي مثال سئ جيد جدا)
ههه شكلها فكرة المعهد بتاع أبو حسين إحلوت
(الرسوم ح تكون بالذهب يا جلالدونا، الصينيين ديل ما مضمونين، بكرة يسقِطوا ليك حجر اليورو زاتو)
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: أبوبكر عباس)
|
بعض المداخلات لها خلفيات قد لا تكون (أو تكون) ملمّا بها وبالتالي لا تستعجل في الرد عليها فربما المقصود أن يرد عليها المقصود
زي المداخلة الفوق دي، لست معنيا بالرد عليها
لكن إذا حاولا أن يحرفا البوست بالمهاترات، فلا تتردد يا فاتح البوست في حسمهما بالتي هي ألطف
وإلا فشنو كدا لِمَنْ شنو ما عارف
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: أبوبكر عباس)
|
يا بكّور دي شنو؟ نعلّها تمصير "جنس حاجات"
هي نان كدي م بقيتها زي مشية الغراب بعد حاول يقلد الطاووس و نسى مشيته الأصلية هههههههه
ياخي المصريين ما عندهم قولة جنس حاجات دي, بقولوها "دا ربنا له حاقات" و خلاص
يا ود الزبير مالي أحس نبرة تحسّس في تعليقاتك التالية لردّك علي, الوش الأخضر ما نفع ولاّ كيف ؟
انشا الله اكون احساسي غلط, وإلاّ لك العتبى وكدا
| |
|
|
|
|
|
|
|
|
Re: ضرغام عباس .. صاحب البوستات المُهدرة (Re: عبدالحفيظ ابوسن)
|
Quote: لا أحسبة ينتظر تفاعلا
ضف لذلك أسلوب كتابة أدبي كلاسيكي، يميل للبلاغة والتورية والاستعارات وبقية العقد الفريد.
لا يخاطب هذه المواضيع بلغة سهلة مباشرة. |
يا حاتم لغة سهلة مباشرة اكتر من (أدونا حبة طايوق)
بعد دا إلا يعوس ليك حرفين قراصة
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: معاوية الزبير)
|
Quote: كمان ما قدر دا يا ود الزبير
قالوا ليك دروس فى محو الاميه الاسفيريه
وفن ادارة البوستات
تقوم تبدأ لينا بى علم الاجتماع
وكمان فيلسوف اجتماع وامريكى كمان !
بتبالغ لكن ! |
ما كدا والله يا علي بشير
لكن بكري علوم الشيوعي دا قلنا نقوقل ليهو مقولة للبروف لينين عن الثورة
لقيت قدامي كلام صاحبك هوفر قمت (قشيتو) بيهو
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: معاوية الزبير)
|
Quote: ود الزبير يا زول فنان
تصدق انا ما فوتا له ( عمود نور ) مش كده وبس بفتشو بالاسم
الزول ده اضافة ( نوعية ) |
سلام يا بت المشرف
Quote: ول ابا معاوية..حبابك
اول حاجة بديت بيها (تواصل) ..بعد ملاحظة اسم ضرغام..كتابة محتاج تقراها اكثر من كذا مرة..!
التحية ليهو..ومزيدا من التفاعل معاهو..!كبر |
وأهلا بي كبر العائد غانم حكاوي مطر الرشاش
صدقتما والله، وقد آلمني أن تمر كتاباته ببساطة هكذا، لا لسبب سوى أننا لا نحفل بالجديد إلا إذا جاء مصحوبا بالرعد والبروق
وصاحبنا -فوق ذلك- غابت عنه صناعة الكتابة في سوقنا هذا
البركة في معهد ابو حسين التعليمي العالي
بس ما يلم لينا الزول الشفيف دا مع الصنايعية ناس جلالدونا ومن لف معاهو
---
قاعدة رقم ما بعد كم كدا ما عارف:
لا تجمع الرد على شخصين بمداخلة واحدة، ما لم تكن واثقا من تقديرهما للوضع وترفعهما واستغنائهما عن الإفراد
| |
|
|
|
|
|
|
|
|
 Re: ضرغام عباس .. صاحب البوستات المُهدرة (Re: معاوية الزبير)
|
حاجتين يا ضرغام
الأولى بعتذر ليك من جديد على وضع ايقونة الوجه الضاحك في اول البوست وكان مقصودة بيها سطر واحد في المداخلة الافتتاحية
التانية ما سميتها (حضرتنا) بي موجهات عامة لفتح لبوستات كانت كلام عام فعلا وما مقصود بيها حضرتكم
فااا شنو، عادي يا حبيب، قل كلمتك واذهب، ستجد من يلتقطها، المهم تكون الكلمة مفيدة
لو فعل كل واحد فينا ذلك لفاض المنبر بالكلام المفيد ما المغتغت و فاضي
نتمنى نقرأ ليك من جديد مع مزيد من التفاعل
أشكرك
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: Muhib)
|
سلام يا محب
مع التعديلات الجرت مؤخرا في المنبر بقيت ما بعرف أجيب الرابط
لكن سأنقل بعضها هنا،
وهذه حالة متأخرة جدا في التعامل مع التكنولوجيا، لكنها مضمونة
أقصد زي يبوظ ليك جهاز كهربائي وما تعرف تصلحو تقوم تطفئ مقبس (حلوة!) الكهرباء
--------------
أدونا حبة طايوق
لم تسمح الحالة الصحية للتربيزة لمواصلة العمل (إن دور) بعد ان انكسرت رجلها ، فأحالتها العائلة للعمل (آوت دور) مسنودة على حائط الجيران ببعض طوبات بديلا عن الرجل المعطوبة
تستخدمها البنت لترفع قامتها القصيرة الى مشارف حوش الجيران ..
تنادي ذات صباح ( وكل صباح ) خالتي .. خالتي .. قالت ليك أمي أدونا حبة طايوق نسخن بيهو صاج العواسه .. فيأتيها صوت خالتها رخيماً يغالب دخاناً منبعثاً من طاقة التُكل : قول ليها يخربنا ... ( دعوة تكتنفها بلاغة الاعتذار ) .
وقبل ان تنزل تلمح السراير التى ما زالت بالحوش فتبادلها صديقتها ابتسامة بنصف عين مفتوحة تحمل معنى ( نتلاقى بعدين )
هذا ملمح ( فلاش باك ) مجتمعنا و صباحاته ( ايفرى دى لايف ) يأسرك ببياض النية و صفاء الدواخل و أريحية التعامل .. فلا الشاحدة تمعرَ وجهها او أريق ماؤه ولا المشحودة دخلت فى أظافر الخجل او كُستبانة الحياء من الاعتذار ( الجيل الجديد لا يعرف الكُستبانة ) ...
المشاحدة بين الجيران تجسد معنى التكافل و تعضد قيم التراحم ... حاجات البيت ( باك اب ) بيت الجيران مما يشكل ( سكيورتى غذائى ) عالى الجودة ينداح فى منظومة الشبكة دونما collision او delay ...
كانت فى السابق المشحودات عبارة عن ملح او طايوق او ثلج..
فرضتها ظروف الاستصغار فى حالة الملح و الطايوق او لظروف ندرة الإمداد الكهربائي فى حالة الثلج ..
و رغم اختفاء هذه الظاهرة مثلما اختفت اشياؤنا الجميله الا انه ظهر نوع جديد من المشحودات
ميديا .. لينك .. رقم هاتف فلان او ايميله
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: معاوية الزبير)
|
لكن والله ضرغام دا برلوم شفت بشكل .....
ولااااااا هببك ..... تستاهل .....
هسه تلقى بعاين كدا يقول هسه دا مالو ؟ 😏 لوووووووب
دا منو ؟؟ يقرا مداخلات بكور وود البشرى المشهورييين ديل
يقول من انتم ؟
ازف الوقت لتنحيكم ......
ارحلوا ياخ. بوظتوا. اعصابنا ....
-----------
اسد على المنبر وضرغام هزبر ... ارجو الراجيكم تانى ...
| |
|
|
|
|
|
|
|
|
 Re: ضرغام عباس .. صاحب البوستات المُهدرة (Re: دينا خالد)
|
Quote: لكن والله ضرغام دا برلوم شفت بشكل .....
ولااااااا هببك ..... تستاهل .....
هسه تلقى بعاين كدا يقول هسه دا مالو ؟ 😏 لوووووووب
دا منو ؟؟ يقرا مداخلات بكور وود البشرى المشهورييين ديل
يقول من انتم ؟
ازف الوقت لتنحيكم ......
ارحلوا ياخ. بوظتوا. اعصابنا ....
-----------
اسد على المنبر وضرغام هزبر ... ارجو الراجيكم تانى ... |
بطلي هرجلة .....
الزول دا مسجل غياب ليهو 3 أيام
آخر مداخلة ليهو كانت يوم 11 و البوست دا مفتوح يوم 12
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: محمد الكامل عبد الحليم)
|
الخبير ود الزبير تحياتي،،
تعرف إنت ذاتك محتاج تعدل عنوان البوست لإضفاء إثارة فيضانية عليه مثل:
تكنيك الكتابة المثالية بالمنبر .. ضرغام عباس مثالاً!!
لتحقيق الآتي:
١. لو عنوانك ما مفهوم ما بخشوا للبوست الا الناس البعرفوك بس ههههه
٢. جذب الأعضاء الجدد لمعرفة تكنيك الكتابة المثالية
٣. الإثارة بإيراد أسم غير معروف (ناس الشمار وما أكثرهم حيتلموا)
وهكذا 
بعدين ممكن تضيف إنوا في سودانيز اون لاين إذا ما بتشارك في بوستات
الآخرين عشان الناس يعرفوا مويتك مافي زول بهوي ناحية بوستاتك :)
مع التحية للأخ ضرغام وضيوف البوست .. بعد الريكومنديشن حنمشي نشوف
الحاصل في بوستاته!
في نية لزيارة قطر بعد كم شهر كدا.. نلم فيك كيف؟
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: Ahmed Alim)
|
Quote: الاستاذ ضرغام سجلناه في قائمة المتأملين....استثارة المتأمل من شروطها(خت الكورة في الواطة)...واللعب الممرحل أمام خصم غير موجود...
توجد كرة في دائرة (الاحلام)...تستدير حين تعبث بها نسائم الشدو...تتحرك عندئذ لكن يعيدها الخيال الي منتصف التكوين لتتسع الدائرة قبل حدوث الانفجار العظيم ..عند ميلاد الفكرة...(الكرة (الطائرة)..
يا ود الزبير حبينا معاك ضرغام لكنه رابض يعاين من بعيد...الي ماذا ؟ |
ود الكامل يا حبيب سلام
ظنيتك في الأول قاصد ضرغام، عايز تقول ليهو (كي تستثير المتأمل عليك كذا وكذا..)
لكن قبل ما أرد، قريت مداخلتك مرة تانية، مطبقاً موجّهةً عامة إضافية لم أكتبها ضمن الموجهات بتاعت (الخبير) الفوق ديك (هههه)
فاشتبه عليّ المقصود!
أما ما يخص الجزء التاني من مداخلتك، فسنربض بدورنا في جهة خفية نراعي ليهو ماذا هو فاعل (فقط أنتظرُ أن يؤدي هذا البوست غرضه)
موجّهاية عامة بعد إضافية:
إذا أدى البوست غرضه فلا داعي للمط والتطويل (يعني ما تكون ثقيل)
أها قطر البوست دا داخل على المحطة الأخيرة، فـ دَقْ دَقْ دَقْ دَقْ والعجلات يصرّن مع قضيب السكة
والناس مطلّعة روسينا من الشبابيك الخ الخ
إنتو وين ود المدير؟
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: معاوية الزبير)
|
Quote: الخبير ود الزبير تحياتي،،
تعرف إنت ذاتك محتاج تعدل عنوان البوست لإضفاء إثارة فيضانية عليه |
ههههه الخبير الزائر احمد عالم
طوالي تمشي تسجل عند مدير المعهد عادل أبو حسين تلقاهو في المداخلة رقم 3، تسلمو السيرة الذاتية وما تنسى تخت لينا رقم تلفون أرضي
باقي نحن مدرسة سودانيز القديمة الثانوية، قصة واتساب والكلام دا ما بخارج معانا
| Quote: في نية لزيارة قطر بعد كم شهر كدا.. نلم فيك كيف؟ |
ما بتحتاج. بس تعال جنب بيوت المدرسين واسأل أولاد الحلة
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: يحي قباني)
|
ما متذكر حركتو ديك
لكن المتذكرو إنو أنا نيتي حسنة والله
أبو حسين دا ما مضمون
----
ثم مستمتعين بأغانيك ساااكت
نسمع في الكلمات ونضاهيها بالبنات البرقصن، والما برقصن .. ونلقى الفرقِ ما شاسع
و.. ديمه صليبي طااالع
زي ما كنا نقول زمان
المودة محفوظة يا أليف وبتاريخ صلاحية أبدي
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: معاوية الزبير)
|
بوست جميل يا معاوية لكن أجمل مافيه عدم تدخل المعني وإلا ما كنا حظينا بهذا الإبداع منك ومن الأخوان
انت مُهدرة ده جايه من مُهدرجة أصلوا عندنا كل ماهو مهدرج جميل لكن برضو خطير ومُهاب
لو في طريقه أكتبوني في الفصل المسائي " فصل نقابة المعلمين"
| |
|
|
|
|
|
|
|
|
|
Re: ضرغام عباس .. صاحب البوستات المُهدرة (Re: Elawad Ahmed)
|
| Quote: لو في طريقه أكتبوني في الفصل المسائي " فصل نقابة المعلمين" |
مسائي شنو يا دكتور العوض انت جيت جاااهز
شايفك صمدت في بوست تغيير اسم الحزب الشيوعي لغاية ما جوك الرفاق، كمان قدرة امتصاص الانفعالات عندك عالية
أما ضرغام دا فبكون لابدلو فوق رأي مستصحبين مداخلة دينا Quote: هسه تلقى بعاين كدا يقول هسه دا مالو ؟ 😏 لوووووووب
دا منو ؟؟ يقرا مداخلات بكور وود البشرى المشهورييين ديل يقول من انتم ؟ |
غالبا يجئ بمداخلة واحدة كاشحا ملاية بوستينا دا
وهازئا: قوموا لفوا
و ربنا يكضب الشينة
| |
|
|
|
|
|
|
| |
معاوية الزبير
دينا خالد
ABUHUSSEIN
abubakr salih
محمد البشرى الخضر
حاتم إبراهيم
جلالدونا
على محمد على بشير
Kabar
أبوبكر عباس
عبدالحفيظ ابوسن
محمد محمد قاضي
Muhib
سيف اليزل سعد عمر
Ahmed Alim
يحي قباني
Elawad Ahmed
فيس بوك
تويتر
انستقرام
يوتيوب
بنتيريست