|
|
 Re: حِلتنا يوم الجمعة . أشعار ود المدير وشقشقة (Re: معاوية المدير)
|
مـرآفـئ ...
سموم الغربة حين تعصِف
بتتخلل مساماتنا
وتهِب نار البُعاد فينا
شرارا يطيّر يتوزّع في اعماقنا
ويفجّر لمأسينا
ؤُمِن الشريان سُحُب تطلع
تسِد افاق فراقاً حار
تهوّن لينا قاسينا،
سحابة الذكرى والأشواق
تنقّطِ فوق جروف النيل
ؤُضفافو تكون مرافينا
وارسى هنآك
أستنشق شذى النسمة الصباحيّة
أحِس بالرآحة في جوآي
وانفاس طالعة ترسم لوحة ورديّة
جوز وِزيّن يعوّم يرقُص
علي أنغام مرآكبيّة
ؤُصِبي حفيان علي شركو
يدوّدِر في قِمرِيّة
حِس دلُوّكة شاقي الليل
ندى شبال
صفقة وعرضة صقرّية
ؤُ دُغشاً بدري تسمع
عبد الوآحد الأذآن
صوتو يجيك جميل نديان
قعد سيدنا فوق بِرشو
حِداهو اتلملمو الحيرآن
دواياتُن ؤُ ليحانُن
يرتلو يتلو في القرآن
ؤُ حاجة نفيّسة
سايقة وراها ود بِنتا
رايحة تصابِح الجيرآن
ؤُ لمّة ناس
في دُكان ابوي الحاج
جابو الصرفة في الدُكان
ؤُ حِس صِبيان
يلعبو كُوّرة في الميدآن
ؤُلحمة ضآن
ضابحين في الحرآزة كبِش
مقتت في طشِت كيمآن
في عُمق الصورة
وجه صبُوّح
كاتِم ريدُو مابي يبوّح
تبني من الأماني صروّح
ؤُ تِتسائل متين يرجع حبيب الروّح ؟،
خيالآ معاهو في الخاطِر
محل ما قبّل المسكين
ؤُ ويّن ما يروّح
في الخلفيّة رعاويّة
كاشين في المراعي سعيّة
يضايرُ يحوا في السخلآن
ما يدُخلن خدار محجوّب
ؤُنفيّر صِبيان
متعاونيّن يدُقوا الطوّب
من تالآ الصعيّد ظهرت
في السما عاكلة قالعة هبوّب
والناس قاموا يجآرُو
يكابسو يضايرو في الحاجات
دخلوا اتلموا في اللوضة
حتي النعجة والسخلآت
ؤُفي وسط السما
انشرّن سُحُب شايلآت
تُقآل دآكنات
يفركِع في ضلآما رعد
معاهو شرار بروق لآمعآت
تصُب مطراً تقيلة شديّد
تدوّم ساعات
بعد تكرِس
يمرقو الناس يفقدو بعض
والصبيان يتُرسو السيل
يساعدو البيتُو صابو خرآب
يِنكربو ويعدلوا الميّل
دوآم للحوّبة مدخوريّن
الزينيّن جُمال الشيّل
صُمُوُدٌ في مواطن الشِدّة
شِيتاً وِرسو جيّل عن جيّل
ؤُ تتفجّر عيون النِعمّة
تدلِق في البوادي خدآر
يهيّج الوادي يِهتزّ
تفتِّح في رُباهو ازهار
طيورُو تغني فرحانة
بعد ما كان يباب وقِفار
بُساط الخُدرّة يِنشرّا
وتطيّب القعدة للسُمآر
صوت دوباي رخيّم صافي
ممزوّج بنغم مِزمآر
ؤُ رآكب فوق قعودُو ينِم
مقاطِع من صميم مُسدآر
صورتك يا بلد جُوآي
حقيقة وريدي ليك صآفي
ؤُ نفسي اجيك يا مولآي
زي ما جاك خليل هيمان
حالِق والقدم حافي
نزرع في رُباك سلآم
نشِد ساعِدنا عوآفي
نقدِل فوق علآيل ابروّف
ؤُ ريّدك ننضُمُو قوآفي
يا محط امالي السلآم
نيلك العكرآن ؤُ صآفي
تِنفجِر خيرآت ضِفآفو
ولينا تتفتّح مرآفئ ...
/
ود المدير ...
| |
 
|
|
|
|
معاوية المدير
فيس بوك
تويتر
انستقرام
يوتيوب
بنتيريست