|
في صلاة الجمعة أمام المسجد دعا (اللهم شتت شمل الشيعة والشيوعيين) ..!!
|
02:47 PM Mar, 20 2015 سودانيز اون لاين ناذر محمد الخليفة-www.nazirkhalifa.com مكتبتى فى سودانيزاونلاين
الليلة في خطبة صلاة الجمعة في مسجد حلتنا .. عندنا امام كدة متشنج حبتين .. خطبتو مرات بتخلي الناس تسرح وتنصرف عنها وترعى في غنم ابليس .. كلامو ما مرتب وانفعالي جدا ومواضيعو ما راكبة مع بعض وما زابطة وكل ستة في حتة وهنا شرطة وهنا إنت ..!!
المهم الناس بتنتظر متين الامام دا ينتهي من الخطبة عشان يقومو للصلاة لأنهم اساسا ما فاهمين للخطبة شي رغم انو المكرفونات والسماعات مية المية ..
خطبة الليلة كعادتا كانت زي سابقاتا .. الامام بيمسك في رؤوس المواضيع ويتلب فيها وما بيخش في جوهر الموضوع .. انا قدر ما اتلفت حواليني يا لقيت زول نايم يا لقيت زول بيعاين لي سقف المسجد سارح في شنو ما تعرف .. يا لقيت زول مدنقر وشو للأرض وهو في حالة جمود لكن سبحتو مدورة زي ساقية جحا ..
حاولت الليلة افهم شي من الخطبة وكالعادة فشلت لحدي ما جات ساعة الدعاء .. مع الدعاء والناس بتقول آمين .. أمين .. الامام دعا وقال اللهم شتت شمل الشيعة والشيوعيين .. والجماعة طبعا مرروها وقالوا امين مع انو ما كان في أي مبرر يدخل الجماعة ديل في الدعا لأنو في الخطبة ما اعتقد جاب سيرة ديل ولا ديل لا بخير لا بشر .. اللهم تكون جات مع القافية وحشاها سندوتش مع باقي الدعاء ..
مع اني ما شيوعي لكن استنكرت الزج بالجماعة ديل في مساجد الله وكمان الدعوة عليهم .. حلتنا دي بالذات فيها كتير جدا من الشيوعيين بعضهم لا يفوتون الصلوات الخمس في المسجد .. تصور كيف يكون شعورم وامام مسجدم يدعو عليهم ؟!!
لقيت روحي ما براي .. لمن طلعنا حرم المسجد في كتيرين مستنكرين الدعوة دي . وفي شيوعيين سألناهم رايم قالو ما سمعوا الأمام لأنهم اساسا كانوا يا نايمين يا سارحين من ملل الخطبة ..!!
طلعنا برة المسجد لقينا شفع بيوزعوا ورق دعاية انتخابية لي مرشح رئاسي اسمو مين كدة البارودي ..!!
غايتو لو دايرين تشوفو بالجد معنى جملة لبن سمك تمرهندي صلو الجمعة في اي مسجد من مساجد الخرطوم بعد ما تسألوا الله السلامة ..!!
|
|
|
|
|
|
|
|
Re: (Re: عمار عبدالله عبدالرحمن)
|
سلام الفاتح ...
Quote: كمان لو ما جاب سيرة أمريكا تبقي الخطبة دي ناقصة سلام ناذر ..... |
والله بيكون جابا .. لكن بيكون سمعا براو .. غايتو مع الانتخابات دي في افلام حا نخشها لوج عديل كدة ...
| |
|
|
|
|
|
|
Re: (Re: ناذر محمد الخليفة)
|
اما الشيعة الما عندهم علاقة بالانتخابات ولا بالخطبة ولا بالمسجد زاتو .. فسيرتم جات كدة بس تمومة جرتق .. من باب (أنا وأخوي الكاشف) ..!!
| |
|
|
|
|
|
|
Re: (Re: ناذر محمد الخليفة)
|
ود الخليفة شوق الشوق دا ما يكون بتاع عباد الرحمن الجنبكم داك او بتاع شرونى امشي صلي في جامع جدى السنوسي ياخى وارفع عليه الفاتحة تلقى مدفون جوة الجامع واسمع الخطبة هناك علشان تعرف الفرق ناس في عبادة الله ماعندهم شغلة بي شيوعي ولا غيرو عندهم سماحة النفس وقلوبن عامرة بالايمان
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
هلا وضاحة ....
كيف أخبارك .. وييييين ليك مدة ما ظاهرة ..!!
Quote: ود الخليفة شوق الشوق دا ما يكون بتاع عباد الرحمن الجنبكم داك او بتاع شرونى امشي صلي في جامع جدى السنوسي ياخى وارفع عليه الفاتحة تلقى مدفون جوة الجامع واسمع الخطبة هناك علشان تعرف الفرق ناس في عبادة الله ماعندهم شغلة بي شيوعي ولا غيرو عندهم سماحة النفس وقلوبن عامرة بالايمان |
اسم الجامع خليهو .. غايتو لو دايرة تعرفيهو رسلي ليك زول يكوس الجوامع يشوف الحيطو مقشرة .. بس ياهو زاااتو !!
Quote: امشي صلي في جامع جدى السنوسي ياخى وارفع عليه الفاتحة تلقى مدفون جوة الجامع |
دا كلام دا يا وضاحة !! ومالكم دافننو جوة الجامع ؟! مقابر فاروق تاني شارع منكم ؟!
لا يجوز .. صدقيني لا يجوز !!
وزي ما قلتي اهلنا ديل وبالذات الجعليين في الصلاة دي ما عندهم شغلة بي سياسة ..
واحد من أهلك العمراب سألوهو جنسك شنو ؟ قالهم جعلي أحمد الله .. قالولو نان المو جعلي ما يحمد الله ؟! قالهم يحمد الله فوق سجم أمو ?!! هههههههههههههههههه
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
أخونا تاج ابراهيم من نافذة الفيس :
Quote:
والله يا ناذر بوستيك وكتابتك الرائعة اضحكتني كثيرا من فرط اعجابي باسلوبك الراقي وبا العامية ووصفك لما يدور داخل بعض المساجد- تحياتي لكم واتمنى ان نرى المزيد وبالدارجة السودانية ممتع جدا في الوصف بدءا بالمقدمة ولب الموضوع والخاتمة- منتهى التشويق في العرض والسرد
تحياتي يا ناذر وبعدين كيف تسمحون لمثل هذا الرجل ان يخطب ويصلي بكم الجمعة- جيبولكم زولا فاهم وخطيب- والا يمكن ضهرو قوي والعندا ضهر ما بندق علي بطنا - وزي الامام دا بقولوا عليهو يا مودر او مشوتن او عندو اندرابة والله يصلح الحال
|
تسلم يا تاج ... بالمناسبة أئمة الجوامع والمساجد بقوا زي التعيين السياسي في السودان .. اعتقد زمان كان يحق للمصلين او للجنة المسجد اختيار امامهم وخطيبهم .. هسي شايف الموضوع زي اتغير لانو في اجماع على عدم قبول الأمام دا وحتى هو غريب من المنطقة .. بعدين الدنيا والمزاج العام مزاج انتخابات .. ما في حاجة اسمها تختار .. في ناس عندهم تفويض يختارو ليك الحاجات البتنفع معاك والما بتنفع معاك وانت ما عندك حل غير ترضى بالواقع أو تلزم دارك ..
بمناسبة الخطباء ديل : قالوا كان في واحد في الأبيض راسو فاضي وكان بيجيب خطب من كتب مصرية وسعودية بيقرا منها للمصلين .. المهم زولك مرة الزمن زنقو .. لفح ليهو خطبة من خطب الشيخ أبو العيون المصري .. وداك كان خطبو تخصص في شواطي العراة في الاسكندرية والغردقة .. والوكت داك الابيض فيها ازمة موية شديدة .. وهو بدا يقرا في الخطبة لحدي وصل مقطع بيقول (أمنعوا بناتكم واولادكم من التجول في الشواطي ) واحد من المصلين زعل وهاج ليك فيهو : شواطي أيه يا شيخ ؟!!
هو نحن لاقين نشرب لمن كمان تجيب لينا شواطئ ههههههههه
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: وضاحة)
|
هلا ابو سن ...
Quote: تحياتي يا صاحب وضيوفك دة البخلينا نجي مع اقامة الصلاة ونتخارج مع السلام خايف الواحد يحضر خطبة من الخطب الزي دي ويفسد جمعتو |
والله في أئمة وخطباء يا ابو سن يجبروك تجي من أول الخطبة ويشدو انتباهك بي كلامم الجميل المرتب .. خاصة الكلام البيلامس قضايا الساعة وهموم المواطن ..
بس ديل قلة للاسف ..
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
هلا وضاحة ...
Quote: المهم نحن متعودين نصلي الجمعة و الطراويح طوالى في الجامع فى قطر بالذات صلاة الطراويح ما بنفوتها خالص اها كنت فاكرة الجوامع زى بتاعت قطر ما حصل صليت فى جامع فى السودان قامت امى قالت خلاص نمشي نصلى فى الجامع بتاع الحديقة علشان جامع جدو كان فيه صيانة قمنا مشينا دخلنا مصلى اننساء وقمنا قعدنا للخطبة والجو كان سخن ومافى مكيفات أتخنقت عدددديل والموكيت وسخااان والجامع شكلوا من برة ما بطال اثناء قاعدين بنسمع فى خطبة الجمعة شفت ليك الصراصير حايمة فى طرف الحيط خفت ليك خوفة بقيت الملم فى نفسي وعبايتى لانى بخاف من الصراصير خوف الموت لما خلص الخطبة الامام ما سمعتوا زاتوا كان بقول فى شنو واقموا الصلاة و قال الله اكبر انا كنت نزلت تحت جرى على الباب |
الصراحة في مساجد ومصالي المصلين المداومين عليها ما معتنين بيها .. أمكن لضعف اللجان القائمة عليها وامكن عجز اللجنة عن استقطاب الدعم .. وبنفس القدر في مساجد واضح عليها النضافة والغسيل ومكيفات الفريون الشغالة طوالي ..
بس كمان التبذير ما حبابو .. مسجدنا كان جميل جدا بي لونو الانناسي وما كان في داعي لي سيراميك أو بطيخ وكان أولى بي مبلغ وتكلفة السيراميك التبرع به بعمل وجبات توزع للفقراء وهم كثر .. ليس في اطراف العاصمة فحسب بل حتى داخل العاصمة وعلى مرمى حجر من هذا السيراميك وصحبه ..
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
تحياتي لك أخي ناذر.. تعجبني جدا كتاباتك وأسلوبك الشيق.. أئمة المساجد وخطب الجمعة في عهد الإنقاذ مهزلة حقيقية.. أغلب الأئمة موالين للسلطة وبيشتغلو كسير تلج ليها.. والأسوأ من كده: بيستغلو الخطبة لـ(تسويق) فكرتهم السياسية للمصلين..ودي جريمة تانية.. في عهد الإنقاذ نادرا تلقى خطيب جمعة معتدل بيناقش (هموم الناس اليومية)..بس فالحين ينبزو الفنانين وبأقبح الكلمات كمان!!!
ده مقال مرتبط للدكتور بابكر فيصل بابكر :
Quote: أئمة المساجد وشؤون السياسة .. بقلم: بابكر فيصل بابكر
mailto:[email protected]@gmail.com قبل هبوط الإنقاذ على أهل السودان, كانت خطب الأئمة في غالبية المساجد تركز على تثقيف الناس في شئون دينهم, وكيفية تجويد عباداتهم, وإحسان معاملاتهم, ولكن هذا الحال تبدَّل كثيراً بعد إنقلاب يونيو وأضحى الأئمة يتدخلون بصورة سافرة في الأمور "السياسية" ويُصدرون الفتاوى في قضايا لا يفقهون فيها شيئاً. وتتمثلُ خطورة هذا التدخل في أنَّ كثيراً من الناس يُجلوُّن "منبر" الإمامة ويتأثرون بالآراء التي تصدر عنهُ بإعتبار أنها تمثل رأي "الدين" في الوقت الذي يسعى فيه الإمام "لتسويق" فكرة أو موقف سياسي يخدم به مصلحة "السلطة" أو يؤيد به جماعة سياسية بعينها أو يُرَّوج به لإتجاه فكري مُعيَّن. تبَّدت هذه الحقيقة بوضوح في الحوار الذي أجرتهُ الأستاذة لينا يعقوب مع إمام مسجد الخرطوم الكبير كمال رزق ونشرتهُ صحيفة "السوداني" الاسبوع الماضي, حيث سألتهُ عن مُبرِّر دعوته بهلاك "السيسي والأسد وحفتر", فقال أنهُ يدعو بالهلاك لكل ظالم, واتهمهم بمحاربة "الإسلام", ثم كشف عن إنتمائه الحقيقي بالقول : ( جماعة الإخوان المسلمين أكبر جماعة مسالمة في العالم ولم يحدث أن فجرت أو قتلت أو دمرت, هي جماعة قائمة على منهج فكري أصيل .. جماعة الإخوان جماعة مثالية ومسالمة، والدليل أن حزب النهضة في تونس نجح في الانتخابات وفاز وتنازل عنها، كيف مثلاً تكون هذه جماعة إرهابية ؟ كلمة إرهابية تستخدم لضرب الإسلام الذي يمثله الإخوان المسلمون.. الإسلام الوسطي يقود مسيرته الإخوان المسلمون في العالم ). في البدء نقول أنهُ من حق كمال رزق أن ينتمي لأية جماعة دينية أو سياسية, ولكن ليس من حقه أن "يستغل" منبر المسجد ليُروِّج لإنتمائه السياسي, ويدعو بالهلاك على "خصوم" جماعتهِ, وقبل كل ذلك يُصِّور الصراع بين "الإخوان المسلمين" وخصومهم على أنه إستهدافٌ "للإسلام" كدين, هذا تخليطٌ مفضوح, ومدالسة ٌ( مُخادَعَة) لا تليقُ بمنبر الإمامة في المسجد. أمّا القول بأنّ جماعة الإخوان المسلمين هى أكبر جماعة "مسالمة في العالم" ولم يحدث أن " فجرَّت أو قتلت" فهو إدِّعاءٌ باطلٌ , وكذبٌ حنبريت ( كَذِبٌ خالصٌ، لا يُخالِطُه صِدْق ), فهو يناقضُ أفكار الجماعة التي خاطب مؤسسها أتباعهُ قائلاً ( أيها الإخوان أدعوكم للجهاد العملى بعد الدعوة القولية، سندعو كل الهيئات إلى الإسلام، فإن أجابوا الدعوة آزرناهم، وإن لجأوا إلى المراوغة والدوران فنحن حرب عليهم ولا هوادة معهم حتى يفتح الله بيننا وبين قومنا بالحق وهو خير الفاتحين ). إنتهى الهيئات المقصودة في قول "حسن البنا" أعلاهُ هى التنظيمات و الأحزاب والجماعات السياسية , و"الجهاد العملي" يعني إستخدام العنف ضد مخالفي الجماعة, وهو الأمر الذي تمَّت ترجمتهُ عملياً في أنشطة "التنظيم الخاص" الذي نفذ عمليات إغتيال أحمد ماهر والقاضي أحمد الخازندار ومحمود فهمي النقراشي وغيرهم. هذه جماعة حربية بإمتياز لا تتوَّرع في استخدام العنف ضد كل من لا يتفق معها, العنف موجود في شعارها الذي يُزَّينه سيفان و مكتوب عليه "واعدوا" وليس "وادعوا", وهو كذلك عنصر أساسي في بيعتها التي تتم على المصحف و"المسدس", ومُخطىءٌ من يظن أنَّ هذا العنف يوَّجهُ لأعداء الأمة, هو عنف مُوجهٌ لكل من يختلف مع الجماعة. ليس هذا فحسب بل إنَّ الجماعة هى التنظيم الذي رضع أبناؤهُ من ثدي أفكار سيد قطب حول العنف و جاهلية المجتمع وتكفير المختلفين, وهى الأفكار المبثوثة في كتابه "في ظلال القرآن" الذي إستلًّ منه الكتيب الذي أضحي بمثابة المرجعية الأساسية للعنف لدى كل الجماعات المتطرفة وهو كتاب "معالم في الطريق". لا يكتفي كمال رزق بإظهار دفاعه المُستميت عن جماعة الإخوان المسلمين بل يقول رأياً وكأنهُ الرأي الوحيد والنهائي في مسألة فقهية تحتملُ الإختلاف وهى مسألة سفر المرأة من دون محرم, فنجدهُ يُقرُّ بمهاجمته لوزير الداخلية لأنه أجاز سفر المرأة دون مُحرِم, ويقول ( أنا أتحدث عن حكم شرعي, لا يجوز للمرأة أن تسافر وحدها مسيرة يوم وليلة، هذا حديث صحيح وهو حكم شرعي ). ولكن صاحبنا تجاهل إجتهاداً آخر في هذه القضية, وهو إجتهادٌ أقرب لروح العصر ومعطياته, وهو كذلك يستند على حديث عن الرسول الكريم رواه البخاري عن عدي بن حاتم أنه قال لهُ ( فإنْ طالت بكَ حَياةٌ لتَرَيَنَّ الظَّعِينةَ -أى المُسافِرة- ترتحِلُ مِن الحِيرةِ حتى تطُوفَ بالكَعبةِ لا تخافُ أَحَدًا إلَّا اللهَ ), ومن هنا جاء الرأي بجواز سفر المرأة وحدها إذا كانت آمنة. أصحاب الرأي الآخر يرون أنَّ العلة من منع سفر المرأة وحدها هى "إنعدام الأمن", وهو الأمر الذي كان شائعاً في ذلك الزمان, وبالتالي فإذا توفر الأمن عبر وسائل السفر المختلفة من طائرات وسفن وقطارات وغيرها فليس هناك ما يمنع سفر المرأة وحدها, وعليه فإنهم "خصَّصوا" بهذا الحديث أىٌ حديث آخر يُحرِّم سفر المرأة وحدها بغير مُحرِم. ومعلومٌ كذلك أنَّ أمهات المؤمنين، رضى الله عنهن قد سافرن للحج بعد وفاة الرسول الكريم "بدون مُحرِم" في عهد سيدنا عمر بن الخطاب الذي أرسل معهن سيدنا عثمان بن عفان ليحافظ عليهنَّ. ولكن كلام كمال رزق هذا لا ينفصلُ عن رؤية مدرسة في الفكر الإسلامي لا همَّ لها سوى التضييق على المرأة في كل شىء متناسين أنَّ المرأة في عصرنا هذا أصبحت "رئيسة وزراء" و "رائدة فضاء" وتحمَّلت مسؤليات يعجزُ كثير من الرجال عن تحمُلها, ألم يسمع رزق "بالنساء" الكُرديات المُقاتِلات اللائي أذقن "رجال" داعش الأمرَّين في معارك "كوباني" في سوريا ؟ حديثنا عن أئمة المساجد ينطبقُ بذات القدر على "شيوخ الدين" الذين ينضوون تحت ألوية هيئات ومؤسسات تُصدر الفتاوى الدينية, ومنها "هيئة علماء السودان", التي أتى ذكرها في الحوار مع رزق حيث قالت له الأستاذة لينا أنَّ نائب الأمين العام لهيئة علماء السودان أعلن دعمه اللا محدود للرئيس البشير, فأجابها بالقول : لا مانع من أن يقول رجل الدين رأيه. ونحنُ نتفق مع رزق في أنَّ كل شخص حُر في إبداء رأيه, ولكن عندما يصدر الرأي عن أفراد هذه الهيئة التي تدَّعي أنها تمثل "علماء الدين" فإنَّ تأثيره على البسطاء من الناس يكون كبيراً لذات السبب الذي ذكرناه بخصوص أئمة المساجد, وبالتالي فإنَّ من الأجدى أن يحتفظ شيوخ تلك الهيئات بآرائهم لأنفسهم حفاظاً على حياد منابرهم في موضوعات حسَّاسة مثل الإنتخابات. ولكنَّ من يعرف طبيعة هذه المؤسسات يُدرك مدى إرتباطها "بالسلطة" الحاكمة, ذلك أنَّه لا بدّ لكل سلطة سياسية من مشروعية , ويُمثل "الدين" في عالمنا الإسلامي المصدر الأول للمشروعية ولعلنا حالياً نري أنَّ السلطات السياسية في كثير من الدول الإسلامية توجد بينها وبين المؤسسات الدينية الرسمية علاقة تبادل منافع , فالسلطة السياسية تُغدق علي المؤسسات الدينية المنح والمناصب والرواتب والعطايا وأعضاء المؤسسة الدينية الرسمية يمنحون الشرعية لتلك السلطات السياسية. غير أنَّ أكثر ما يُثير المرء في حديث رزق هو قولهُ أنَّه يسعى لقيام ( دولة إسلامية بمنهج إسلامي بدستور وحكم إسلامي قائم على منهج النبوة والأخلاق والعدل ), ذلك أننا ظللنا نكتب منذ زمن ونعيد القول عن إستحالة تطبيق مثل هذه الأحلام, على الأقل هذا ما تقول به التجربة التاريخية الممتدة منذ آلاف السنين. وقد سبق لنا أن قلنا في معرض سعينا لدحض فكرة وجود "حكم إسلامي صحيح" وآخر خطأ أنه لا توجد تجربة إسلامية تحتذي سوى تلك التي إرتبطت بالرسول ( ص) بوصفه مبعوث السماء للأرض وما عدا ذلك فهو مُجرَّد إجتهادات بشرية تحتمل الصواب والخطأ, بما في ذلك تجربة الخلافة الراشدة. وهذا هو الدرس الذي يُعلمنا لهُ تاريخ الدولة الإسلاميَّة منذ خلاف السقيفة , ومنذ أن سالت دماء المسلمين في الجمل وصفيِّن والنهروان وكربلاء, مروراً بإمبراطوريات المُلك الوراثي العضوض للأمويين والعباسيين والفاطميين, وصولاً لخلافة بني عثمان التي ثار عليها المسلمون في جميع أنحاء العالم الإسلامي بما في ذلك ثورة الإمام "المهدي" في السودان, وانتهاءً بحُكم ملالي إيران و طالبان أفغانستان وشباب الصومال. إنَّ عجز تجربة القرون الطويلة لأنظمة الحكم الإسلامي عن إنزال ما يُسمى بالإسلام الصحيح لواقع التطبيق العملي سوى بضع سنوات – هي فترة الرسول (ص) - من مجموع أكثر من ألف وأربعمائة عام يعني أنَّهُ لا يوجد منهج متفقٌ عليه و أنَّ التجربة الصحيحة نفسها تجربة فذة وغير قابلة للتكرار. قال رزق في ذات الحوار : ( نحن الآن في عصور الانحطاط التي أقصت رجل الدين وجعلته في ركن قصي من الحياة وأبعدته عن كل ما يتعلق بالحياة ). ونحن من جانبنا نتفق معهُ في أنَّ مجتمعات المسلمين تعيش منذ زمن بعيد في حالة جمود و إنحطاط, ولكن ليس بسبب إقصاء رجال الدين كما يقول, بل بسبب "تسلط" رجال الدين وتدخلهم "اللامحدود" في كل أمور الحياة وجوانبها المُختلفة. |
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: أحمد عمر)
|
سلام احمد عمر ..
Quote: أغلب الأئمة موالين للسلطة وبيشتغلو كسير تلج ليها.. والأسوأ من كده: بيستغلو الخطبة لـ(تسويق) فكرتهم السياسية للمصلين..ودي جريمة تانية.. في عهد الإنقاذ نادرا تلقى خطيب جمعة معتدل بيناقش (هموم الناس اليومية)..بس فالحين ينبزو الفنانين وبأقبح الكلمات كمان!!!
|
بالضبط كدة لكن في أئمة ما بخافو وما شغالين بالانقاذ وتوجيهات وزارة الارشاد للائمة وديل بيستندو على إرث وقاعدة عريضة من مؤيديهم بيستمدو شرعيتم منها .. لكن حتى القلة ديل الفالتين من عقال الانقاذ متهمين بالتطرف الديني زي شيخ عبد الحي وشيخ كمال رزق وشيخ عبد الكريم وشيخ محمد عبد القادر وكتيرين غيرم ..
مشكور للمقال .. يتماشى مع موضوع البوست تماما ..
| |
|
|
|
|
|
|
Re: (Re: محمد أبوالعزائم أبوالريش)
|
دكتورة وضاحه
لو ربنا طول في العمر حاجي اكتب ليك عن جدك السنوسي (رضوان الله عليه) ,,, وعن المسجد ,,,,,,,,
| |
|
|
|
|
|
|
Re: (Re: ahmedona)
|
Quote: اللهم شتت شمل الشيعة والشيوعيين يعنى الدعا على اسرائيل و امريكا خلوه ( بقى ما شغال )
ازيك يا ناذر
| |
|
|
|
|
|
|
Re: (Re: حمد اسماعيل)
|
**ود الخليفه .. ** سلام وصباحك خير..
** عندما يختلط التأسلم السياسى بالفساد وعذاب العِباد ,, ويكون الجهله هُم الخطباء ,, توقع الخطبه القادمه :- ** ايها المسلمون اسمعو وأعوا من يصوت لغير الشجره فمستقره النار ,, فعليكم بالشجره تتفيوا ظلالها وتتذوقوا ثمارها وتحتطبون منها .. (قوموا الى صلاتكم وعليكم بالشجره ) (ابو محمد فؤاد) - الماكيكى ..
| |
|
|
|
|
|
|
Re: (Re: عبدالكريم أحمد الامين)
|
كلامو صح وكمان نسى الجمهوريين
(اللهم شتت الشيعة والشيوعيين و الجموريين) عليهم اللعنة الكضابين
Quote: المهم نحن متعودين نصلي الجمعة و الطراويح طوالى في الجامع فى قطر بالذات صلاة الطراويح ما بنفوتها خالص |
في كندا بتصلوا الجمعة والتراويح وين ؟
| |
|
|
|
|
|
|
Re: (Re: عبدالعزيز حسين عبدالرحيم)
|
Quote: في كندا بتصلوا الجمعة والتراويح وين ؟
|
فى حى سعد قشرة بيت عوضية ..متذكرو وللا ؟ ياخمرجى ...ااااحى من جنابو الاتعبنى ب كابو ووووووووووووواى ..الروب ..هاك التعهد ده ..
تحياتى يا نازر بس كمان اختنا واضحة ..ماهينة ..
كسرة ..الامام ماكان يتم جميلو ويدعو على المريخ
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
يا الماكيكي انت قديم خلاص ..
Quote: ** عندما يختلط التأسلم السياسى بالفساد وعذاب العِباد ,, ويكون الجهله هُم الخطباء ,, توقع الخطبه القادمه :- ** ايها المسلمون اسمعو وأعوا من يصوت لغير الشجره فمستقره النار ,, فعليكم بالشجره تتفيوا ظلالها وتتذوقوا ثمارها وتحتطبون منها .. (قوموا الى صلاتكم وعليكم بالشجره )
|
الدعا دا اتقال لكن بي طرق تانية ..
يكون قابلك بوست الزول الادعى انو المهدي المنتظر ونازل مرشح في دائرة سوبا .. قابلتو في جريدة المستقلة .. جاي يشتري ليهو 400 عدد من الجريدة الفيها خبر انو هو المهدي .. قلت ليهو انت مرشح في الدائرة ما خايف بعد دعوتك دي الناس يمشو منك .. قال لي العكس ناسو ومريدينو كترو زيادة !! قلت ليو الحكومة رايا شنو ؟! قال لي هو مشي وقابل البشير والبشير آمن بي انو هو المهدي المنتظر وطلع أمر فوري انو مرشح الموتمر الوطني في سوبا يتنازل وكل الناخبين يدو الزول دا !! قلت ليهو انت مهدي منتظر للمؤتمر الوطني ولا للبشرية كلها ؟ قال هو حاليا داير يثبت حكم البشير عشان بعد داك يتفرغ لي نشر دعوتو في الشام والعراق وأرض الحجاز!! قلت ليهو طيب لو ناسك ما صوتو ليك وما صوتو للبشير حا تعمل ليهم شنو ؟! قال لي ما حا اعمل ليهم حاجة .. ديل بعدين حسابم عن ربنا !!
شفت الكنتة وين ؟!
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
ناذر لك التحية على متعة الحكي الطاعم ومثمر حكاية النوم في خطبة الجمعة دي من الظواهر الما بتشوفه الا في مساجد السودان احنا كان عندنا امام جامع المصلين حافظين الخطب بتاعتو لانها مكررة والقاسم المشترك بين غالب ائمة المساجد عدم المواكبة وعدم الاطلاع وفهمهم القاصر للدين انو طقوس
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: منتصر عبد الباسط)
|
ناذر ازيك ومشتاقين كتير اطرف ماعند ائمة المساجدفى امريكا انهم يدعون على امريكا التى جاءوا اليها ولم تذهب اليهم ونجخوا فى غسل عقول الصغار فصاروا متطرفين بدرجة عالية الجودة مع ذلك لم يعاتبهم احد ،علما ان معظمهم يعيش مجانا وعلى حساب دافعى الضرائب
اسوأ امام جامع سمعته فى حياتى فى حى امبدة الجميعاب كان يدعو على بعض اهل الحى وباسمائهم للاسف ولم يحرك احد ساكن الائمة يا ناذر محتاجين يعرفوا ماهية وظيفتهم
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: سلمى الشيخ سلامة)
|
Quote: كلامو صح وكمان نسى الجمهوريين
(اللهم شتت الشيعة والشيوعيين و الجموريين) عليهم اللعنة الكضابين
Quote: المهم نحن متعودين نصلي الجمعة و الطراويح طوالى في الجامع فى قطر بالذات صلاة الطراويح ما بنفوتها خالص
في كندا بتصلوا الجمعة والتراويح وين ؟ |
ناذر ابن عمى سلام بوستاتك عسل لكن بتلم الضبان ياخى!!!
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
سلام علي الفكي ..
Quote: حكاية النوم في خطبة الجمعة دي من الظواهر الما بتشوفه الا في مساجد السودان احنا كان عندنا امام جامع المصلين حافظين الخطب بتاعتو لانها مكررة والقاسم المشترك بين غالب ائمة المساجد عدم المواكبة وعدم الاطلاع وفهمهم القاصر للدين انو طقوس |
انت عارف الأسوأ من النوم شنو ؟!
المصلي بعد ينوم ويلكزوهو للصلاة . ويقش عرقو وريالتو من وشو ما بيتوضا .. طوالي يقوم يصلي زي الكأنو ما كان نايم قدر دا !!
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
يا سلام يا عم ناذر
أهو انت مقبوض بالثابتـة ومتصــور في بروفايلك مع الشيوعيين الصينيين
الامام دا لو كان قال الشيوعيين ومن والاهم .. خلاص .. وطاتك اصبحت وأنت موالي الملاعين ديل في نواحي شنغهاي
عمك الامام بياخد مرتبه من بترول طلعوه الشيوعيين الصينيين وأقرب دولة لحكومته الميمونة هي روسيا الشيوعية سابقاً وحالياً
أئمة مساجدنا (بتـلـبـو) من المواضيع يا ناذر لأنهم فاقد تربوي مكدر وموزع على المساجد بمهنة إمام مسجد وهم حافظين بس رؤوس المواضع (يقرو جريدتهم ويدعو على الشيوعيين ويشتتوا)
كل شئ بالسياسة ومفبرك وتحت الطاولة يا ناذر والقروش في النهاية من بترول الصين الشيوعية دي زاتها ...
لك التحية
أحمد الشايقي
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: jini)
|
.
يا ناذر تحياتي لك وللأسرة عموم
ياخي انت جدودك شيوخ وصالحين وأشراف، البوديك تصلي خلف النكرات والدجالين شنو؟! الم تسمع بجدك الذي لم يتخلف قط عن صلاة الفجر بالمسجد لخمسة وأربعين عاما على التوالي، حتى يوم وفاته كان قد أدرك صلاة الفجر! صلاة الفجر يا ناذر ، وليست صلاة الجمعة!
.
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
فيصل من الفيس :
Quote: يا ناذر خليك امين وانقل الحقيقة انا كنت موجود في المسجد والامام قال ( اللهم شتت شمل الشيعه والشوعيين والشايقية ) فلماذا جبنت عن اكمال الشينات ؟؟؟؟؟؟؟؟؟؟؟؟؟؟؟؟؟؟ |
لمن وصل الشايقية أنا كنت بهمهم وبطنطن من الاستنكار وما سمعتها ..
انت داير تجيب لي مشاكل مع السناجك ديل ولا شنو هههههه
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
سلام سلمى ...
Quote: ناذر ازيك ومشتاقين كتير اطرف ماعند ائمة المساجدفى امريكا انهم يدعون على امريكا التى جاءوا اليها ولم تذهب اليهم ونجخوا فى غسل عقول الصغار فصاروا متطرفين بدرجة عالية الجودة مع ذلك لم يعاتبهم احد ،علما ان معظمهم يعيش مجانا وعلى حساب دافعى الضرائب
اسوأ امام جامع سمعته فى حياتى فى حى امبدة الجميعاب كان يدعو على بعض اهل الحى وباسمائهم للاسف ولم يحرك احد ساكن الائمة يا ناذر محتاجين يعرفوا ماهية وظيفتهم
|
الفي أمريكا ديل مستغلين جو الديمقراطية وحرية التعبير البتنعم بيها امريكا .. لكن برضو ما بيعفيهم انهم من الناس البياكلو في قصعة امريكا ويبصقوا عليها في نفس الوكت وياله من نفاق !!
Quote: اسوأ امام جامع سمعته فى حياتى فى حى امبدة الجميعاب كان يدعو على بعض اهل الحى وباسمائهم للاسف ولم يحرك احد ساكن الائمة يا ناذر محتاجين يعرفوا ماهية وظيفتهم
|
وهذا أسوا أنواع الأئمة والدعا .. فلا ستر شخصا ستره الله ولا ذهب اليه ناصحا دون أن يعلم به أو يراه أحد ..!!
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
محمد جلال ..
Quote: يا ناذر .. زولك ده احتمال متابع المنبر ده وتحالف الشوايعة مع الشيعة أنا زمااان كنت منتبه للتحالف ده وكنت خاتي الصورة دي
|
بي كلامك الفوق دا وشعارك بتاع بروفايل زمان يمين بالله شكيت انك تكون الامام دا هههههه وأنا ما متابع المنبر فما حا اقدر افتيك في تحالف الشيعة والشيوعيين ههههه
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
عمك الشايقي ....
Quote: أهو انت مقبوض بالثابتـة ومتصــور في بروفايلك مع الشيوعيين الصينيين
الامام دا لو كان قال الشيوعيين ومن والاهم .. خلاص .. وطاتك اصبحت وأنت موالي الملاعين ديل في نواحي شنغهاي
|
أنا موالي شيوعيين شنغهاي وديل سادة العالم وما فيهم كلام .. وحتى حكامنا ولاة أمورنا موالينهم وما معتبرنهم كفرة زي شيوعيي ليننجراد وموسكو ..
غشمعنى أنا ؟! أنا المضبلن المسيكين البتبع ولاة أمري وما بعصي للحاكم امرا ؟!
| |
|
|
|
|
|
|
Re: في صلاة الجمعة أمام المسجد دعا (اللهم شتت � (Re: ناذر محمد الخليفة)
|
مشكورين علي التفاعل يا شباب ...
أمبارح عمنا الأمام فك الشيوعيين وقبل على الشيعة ما خلى ليهم جمبة يرقدو عليها ...
طيب الشيعة ديل موجودين من زمان !! ليه بس ائمة المساجد ما يقوموا عليهم الا اليومين ديل والا بعد موقف السودان الاخير وخطبة الشيخ عبد الرحمن السديس الاخيرة بخصوص الشيعة ؟! ليه دايما بنسخر الدين لخدمة القضايا السياسية وحسب الحوجة ..
طبعا سرحت كالعادة بحسب في غنم ابليس ومرة مرة بتطقش اضاني كلمة كلمتين وما انتبهت الا لمن الجمبي لكزني اقوم للصلاة بعد ما اقاموها ..!! ..
طلعت بعد الصلاة قابلت واحد صحبي صلى في نفس الجامع لقيتو مندهش جدا سالتو قلت ليهو فهمت حاجة من الخطبة ؟ قال لي الخطبة خليها .. انت في صحابة جو جُداد ولا شنو ؟! قلت ليهو ليه ؟! قال لي الامام ذكر اكتر من عشرة صحابة ما عرفت منهم ولا واحد !! هههههههههههههههههههههههه
طبعا قصدو ائمة الشيعة الذكرم الخطيب عشان تشوفو مستوى ملل الخطبة وعدم مقدرتها على استحواذ حواس المستمع ..
| |
|
|
|
|
|
|
|