|
|
 عبد الله والكراكة
|
05:39 PM Mar, 15 2015
سودانيز اون لاين
محمد عبد الله حرسم-السعودية -جدة
مكتبتى فى سودانيزاونلاين
من فجة في جوف الصبر
عبد الله منو الآهة تمرق
زى مرق
مرقه برق
من بين ركام سحب الغضب لي بناية الظلم تحرق
سيف وشو يبرق
لمعتو تضوي المكان ولو يموت ما عاد حتفرق
وشو المسور بالتعب
صبرو الفتر من صبرو تكا وانتحب
لمتين على الأطفال بخاف
لمتين بزك حق الرغيف
لمتين بمش ضل الحيط
حالو حال نفسو وبقيف
ما هو عارف الظلم شين
وكتين تعم
شينتو بتعم
وبلحقك تحت اللحاف
ما نحن في الزمن التعيس
ما برحم الزول الضعيف
ما بتلقى ليك زولا نضيف
وقال يا لطيف
عبد الله في الليل البهيم
سارح في ملكوت الكريم
يسمع لعب محمود وريم
يا عبد الله
شيل الحلة
الحلة تقيلة
وقعت منى
كسرت سنى
قالو القاضى احسن منى
وين يا قاضى
وين عدالة الزمن الماضي
مليون ميل
ولا ختة كراع ما لقيت
مليون ميل
ولا لقيتلك حتى حتة بيت
أبوك ما علمك تسرق
ولا خلوك تقول بالحرقة مرة أبيت
مليون ميل
وحتى النسمة ما خلوها
عشان ترسم عروق البيت
ما كت فاكر الزمن برميك
عشان بالطيبة أتربيت
صحيت
ولقيت
ربع نمرة
وخشب وصفيح
هيا تاريخ
تعال اكتب على التصريح
زول مولود ايوة صحيح
وأنت الاصلو ما أتذمرت
وطول عمرك تقول راضى
لا أتكلمت
لا مرقت معاك كلمات غناك
وفاكر الناس
معاك ومعاك
مجلس شعبي
ومجلس حارة
ومجلس بلدى
ومجلس فاضي
وفاكر الناس معاك ومعاك
تروح حيكومة
وتجى حيكومة
وفاكر الناس معاك ومعاك
وراتب قدر المارق
وقدر الما مارق
وصابر راضى
وفاكر الناس معاك ومعاك
امشو هناك
تعالو هنا
وأنت بترجا في العاطى
هموم تكتر
هموم تظهر
وأنت بترجى في العاطى
هيا تخطيط
وكت تلحق منابر الروح
ما بنصبر ولا نطاطى
يجينا زعيط
يقول تخطيط
وبعدو معيط
يقول تختيت
زعيط يشحد في حق الناس
معيط داير يسرق الكاس
وناس السيدة نص الليل
في ورق الناس لغي و تشريط
وناس اللجنة للتصحيح
وللتمطيط
وناس تكتب
مين يقعد
ومين يمرق
وعبد الله ما صدق
وكت أسمو أنكتب يمرق
مشاوير من هموم اكتر
وناس زينوبة
ناس احمد
هموم اكتر
وناس تكتب
واستئناف
واسترحام
وكل الناس زحام وزحام
باكر في
وبتلقي البنصفك يوفى
تنوم والفرج قرب
وحتى الشمعة ما بتتطفىء
وجاك صبحا مكشر نابو
بى غفلة
وصوت اللجنة جاك عالي
حتمرق تب
كان راضى كان ما راضى
هيا لجنة
وين ذمتكم السمحة
وين صلواتكم
ما قتو الكلام بى مهلة
وين الخوة وين الحق
وينكم لما في أيدكم يضيع الحق
ما مارقين
وصوت عبد الله
مارق عالي
في واضاتو ماسك عاضى
وفى المهلة البقت شهرين
حتمرق مرقة الشينين
بعد شهرين ؟
هيا عبد الله
بس شهرين ؟
حتمرق وين ؟
دى الحيكومة
مين بقدر يلومها
يا عبد الله صوتك حي
صوتك فوق
ما راضى الكلام الني
ولا تسكت
شوف السيدة ساوا الكي
هي يا حيكومة
ما عندك شغل غير دا الحي
ما بمرق
رئيس اللجنة
كان للسرقة هو البيسرق
كان للمرقة هو اليمرق
كان للمرقة هو اليمرق
وصوت كراكة عند الباب
هو اليمرق
وصوت اللجنة جوه الغاب
هدوا البيت
وصوت عبد الله
مارق أبيت
وما بمرق
وصوت القاضي فضوا البيت
وصوت عبد الله ما بمرق
وصوت كراكة
كبكرررب
وصوت أطفال وعبد العال
يا عبد الله امرق جاى
وصوت عبد الله
ما بمرق
وصوت الدم
وناس بتجوط
وناس تنضم
وصوت إسعاف
ودم ورعاف
وناس بالفرجة ورمت تب
وفرجة ناس عشان تسكت
كروهم بالقطع اضعاف
وصوت كراكة كب كرررب
وصوت شفع
وصوت السيدة في الزغرودة فرحانة
عشان هي الشالت القطعة
عشان هي الكسبت الجولة
عشان هي الباعت الجيرة وكسرت هيبة الدولة
وصوت عبد الله
في الإنعاش
دا كان ان عاش
ودايرين دم
وناس مكسورة من الهم
وصوت الرادى
يغنى( بلادي..يا بلادي ...أهلا ..صدرونا حماية ليكى من الاعادى )
هوى يا عبد الله صوتك كم
بهايمك كم
ولادك كم
مهيتك كم
كان تمرق
وصوت محمود يلاعب ريم
يا عبد الله شيل الحلة
الحلة تقيلة وقعت منى
كسرت سنى
وصوت عباس
وناس الحلة
وصوت الحفلة
شان في الكورة شالو الكاس
وجات زينوبة ثكلت ووب
وصنت ناس
بدون احساس
وحس زيونوبة اقفلو الباب
هو وينو الباب ؟
وصوت كراكة كبكررررب
وصوت بوليس
ها يا وسخان يا سجمان
عشان السيدة بعت الناس
وصوت قطر الخميس في الراس
وصوت اقلام على الكراس
ظلم ظلمات
اكان مات
وناس تنضم
هو الغلطان اكان يمرق
وناس عارفة الحقيقة وساكتة مجبورة
وناس بالحرقة مقهورة
وناس صابرة
وناس تتفرج الكورة
وفى داك اليوم
صبحنا وصبحت الصورة
وكانت نيمة متكية
وقامن فوق خشب ضحكاتنا صرصورة
وعمارات بى ذمة الباعونا ممهورة
وناس الحلة ما عارفين
وولاد السيدة فرحانين
من سيارة لي سيارة راكبين كم
ما عارفين ال تمن بى كم
هى يا إسماعيل
ما كلمت ناس بيتك
ولا علمتهم
وين عبد الله كب الدم
هى يا إسماعيل وين البيت
كم داخلين وكم مارقين
وما بتنضم
هى يا إسماعيل عارف الحق
وخايف الدق
وكتين يكون هم المدينة الكورة
وفى آخر المتمة الكاس
وكتين تكون الأمة مذعورة
بدون احساس
حتبقى الصورة ياها الصورة
بالإذعان ممهورة
لا قطر الخميس برجع
لا الزغرودة
ولا الأطفال بغونلك
يا عبد الله شيل الحلة
مليون ميل ما كفاك
ولا لقيتلك كفن يفداك
في المليون وما تلقالك البستر حشاك
شن فايدة مشيك
من شغله لي شغله
وشن فايدة همومك
وأنت مرسوم في الدموع النازلة بى مهلة
ضاقت عليك
حتى الصبر ما لقيت
ضاقت عليك
وناس السيدة مليون بيت
أيا خازوق
جيت من وين
لي أولادنا كم بكيت
أيا عبد الله ما بتموت
عشان لسه الضمير والصوت
عشان أنت البنيت الحلة بيت جنب بيت
عشان أنت الوقفت أبيت
أيا عبد الله ما بتموت
ما بتموت
لأنك في العرض جيت حي
وقت يا حى
لانك قلت الخير
وافدت الغير
ومن فجة في وش الفجر
بانت غيوم رسمت صور
صورة مظلة وحتة مشهورة
ضمير إنسان بريد الناس
سمح صورة وسمح سيرة
عشان مكتوب بى مهر الدم
على لوحة حضور جياتنا ممهورة
شان علمت أولادك
أبدا مايرضو بالحيرة
ولا ينومو
وفى عيونهم حاجة مكسورة
|
|
 
|
|
|
|
|
|
|
|
Re: عبد الله والكراكة (Re: هاشم احمد ادم)
|
هاشم احمد ادم
الحضور النقى دوما تزداد معه ضربات القلب وتتسع السعادة لتشمل جميع الاعضاء
شكرا لانك منحتنى دفء كلماتى
ومعنى يزيدنى يقين
شكرا دوما صديقى هاشم وقلمك الانيق وقلبك الفخم
| |
|
|
|
|
|
|
|
|
|
Re: عبد الله والكراكة (Re: محمد عبد الله حرسم)
|
وين يا قاضى
وين عدالة الزمن الماضي
مليون ميل
ولا ختة كراع ما لقيت
مليون ميل
ولا لقيتلك حتى حتة بيت
أبوك ما علمك تسرق
ولا خلوك تقول بالحرقة مرة أبيت
مليون ميل
وحتى النسمة ما خلوها
عشان ترسم عروق البيت
***
سلمتْ قريحتك يا حرسم
تحياتي
| |
|
|
|
|
|
|
|
|
Re: عبد الله والكراكة (Re: عبد الحميد البرنس)
|
Quote:
حين يتألق حرسم إنسانية وشعرا، تحياتي. |
الجميل عبد الحميد
واقسم لك انى فى لحظة ما بالامس قلت اكتب لك لانى افتقدتك
وها انت ذات تثبت لى بان القلوب تحس بعضها
شكرا لكلماتك التى اثق فيها
| |
|
|
|
|
|
|
|
|
|
Re: عبد الله والكراكة (Re: محمد عبد الله حرسم)
|
ما بمرق
رئيس اللجنة
كان للسرقة هو البيسرق
كان للمرقة هو اليمرق
كان للمرقة هو اليمرق
وصوت كراكة عند الباب
هو اليمرق
وصوت اللجنة جوه الغاب
هدوا البيت
وصوت عبد الله
مارق أبيت
وما بمرق
وصوت القاضي فضوا البيت
| |
|
|
|
|
|
|
| |
محمد عبد الله حرسم
هاشم احمد ادم
Shaker Hamid
ابو جهينة
عبد الحميد البرنس
محمد البحر
فيس بوك
تويتر
انستقرام
يوتيوب
بنتيريست